(1)

Is-sistema attwali tat-tassazzjoni tal-kummerċ bejn l-Istati Membri hija bbażata fuq arranġamenti tranżitorji introdotti fl-1993 li saru antikwati u suxxettibbli għal frodi fil-kuntest ta' sistema tat-taxxa fuq il-valur miżjud (VAT) kumplessa ħafna. F'Ottubru 2017, il-Kummissjoni ressqet proposta leġislattiva li tistabbilixxi l-prinċipji għal sistema definittiva tal-VAT għall-kummerċ transfruntier bejn in-negozji bejn l-Istati Membri li tkun ibbażata fuq it-tassazzjoni tal-provvisti transfruntiera fl-Istat Membru ta' destinazzjoni. Peress li s-sistema definittiva tal-VAT għall-kummerċ intra-Unjoni tista' tieħu diversi snin biex tkun implimentata b'mod sħiħ, hemm bżonn ta' miżuri fuq perjodu qasir li jiġġieldu l-frodi tal-VAT transfruntiera b'mod aktar effettiv u f'waqtu. It-titjib u s-simplifikazzjoni tal-istrumenti ta' kooperazzjoni amministrattiva, b'mod partikolari l-Eurofisc, huma wkoll ta' importanza sinifikanti fil-ġlieda kontra l-frodi tal-VAT inġenerali u biex tissaħħaħ il-fiduċja bejn l-awtoritajiet tat-taxxa qabel ma tiġi introdotta s-sistema definittiva tal-VAT.

(2)

Ta' spiss ikollhom jitwettqu inkjesti amministrattivi għall-ġlieda kontra l-frodi tal-VAT, b'mod partikolari meta l-persuna taxxabbli ma tkunx stabbilita fl-Istati Membri fejn tkun trid titħallas it-taxxa. Biex jiġi żgurat l-infurzar xieraq tal-VAT u biex jiġu evitati x-xogħol doppju u l-piż amministrattiv tal-awtoritajiet tat-taxxa u tan-negozji, meta mill-inqas żewġ Stati Membri jqisu li tkun meħtieġa inkjesta amministrattiva fl-ammonti ddikjarati minn persuna taxxabbli mhux stabbilita fit-territorju tagħhom iżda taxxabbli fih, jenħtieġ li l-inkjesta titwettaq mill-Istat Membru fejn tkun stabbilita l-persuna taxxabbli sakemm ma jkunx kapaċi jipprovdi l-informazzjoni mitluba. L-Istati Membri rikjedenti jenħtieġ li jkunu lesti jassistu lill-Istat Membru ta' stabbiliment billi jieħdu sehem b'mod attiv fl-inkjesta. Peress li l-uffiċjali tal-Istati Membri rikjedenti jista' jkollhom għarfien aħjar tal-fatti u ċ-ċirkostanzi tal-każ u fejn l-Istat Membru rikjest ma jkunx ħtieġ uffiċjali mill-Istati Membri rikjedenti, jenħtieġ li l-uffiċjali ta' dawn tal-aħħar ikunu jistgħu jkunu preżenti waqt l-inkjesta amministrattiva sa fejn ikunu ssodisfati l-kondizzjonijiet għal tali preżenza fil-qafas tal-liġi nazzjonali tal-Istat Membru rikjest. F'din l-okkażjoni, jenħtieġ li l-uffiċjali tal-Istati Membri rikjedenti jkollhom aċċess għall-istess bini u dokumenti bħall-uffiċjali tal-Istat Membru rikjest permezz tal-intermedjazzjoni tagħhom. Fejn il-leġislazzjoni tal-Istat Membru rikjest fiha tali kondizzjonijiet għall-provvediment tal-preżenza jenħtieġ li jkun preżunt li l-Istat Membru rikjest għandu jwettaq l-azzjonijiet meħtieġa biex jissodisfa dawn il-kondizzjonijiet. Fi kwalunkwe każ, jenħtieġ li uffiċjali mill-Istati Membri rikjedenti, fejn iqisuh meħtieġ, ikollhom il-possibbiltà li jkunu preżenti għal konsultazzjoni dwar l-inkjesta fl-Istat Membru rikjest mal-uffiċjali tiegħu wara li jinfurmawhom. L-għan ta' tali konsultazzjoni jista' jkun biex ikun hemm skambju ta' fehmiet u ta' informazzjoni dwar l-iżvilupp tal-inkjesta u biex jiġu proposti u diskussi azzjonijiet possibbli.

(3)

It-trażmissjoni ta' informazzjoni mingħajr talba minn qabel lill-awtoritajiet kompetenti ta' Stati Membri oħra skont ir-Regolament tal-Kunsill (UE) Nru 904/2010 (3) jenħtieġ li tkun kemm jista' jkun sempliċi u effettiva. Għalhekk huwa neċessarju li l-awtoritajiet kompetenti jitħallew jittrażmettu l-informazzjoni b'mezzi oħra minbarra l-formoli standard meta jqisu mezzi sikuri oħra aktar xierqa u jaqblu li jużawhom jew meta l-informazzjoni tkun ġiet riċevuta minn pajjiż terz.

(4)

L-eżenzjoni mill-VAT għall-importazzjonijiet ta' merkanzija prevista fl-Artikolu 143(2) tad-Direttiva tal-Kunsill 2006/112/KE (4) (“il-proċeduri doganali 42 u 63”) tiġi ta' sikwit abbużata u l-merkanzija tiġi ddevjata għas-suq illeċitu mingħajr ma titħallas VAT. Għalhekk huwa essenzjali li, meta l-uffiċjali doganali jivverifikaw jekk humiex issodisfati r-rekwiżiti għall-applikazzjoni tal-eżenzjoni, dawn ikollhom aċċess għar-reġistru tan-numri ta' identifikazzjoni tal-VAT u d-dikjarazzjonijiet rikapitulattivi. Barra minn hekk, jenħtieġ li l-informazzjoni miġbura mill-awtoritajiet doganali, bħala parti minn din il-proċedura, tkun disponibbli għall-awtoritajiet kompetenti tal-Istat Membru fejn ikun mistenni li jsir l-akkwist intra-Komunitarju sussegwenti.

(5)

Biex tiġi indirizzata l-frodi li tirriżulta mis-sistema doppja tal-VAT applikabbli għall-karozzi, jenħtieġ li l-uffiċjali ta' kollegament tal-Eurofisc ikunu jistgħu jaċċessaw id-data dwar ir-reġistrazzjoni tal-vetturi b'mod awtomatizzat. Din id-data tippermettilhom jidentifikaw malajr min ikun wettaq tranżazzjonijiet frawdolenti u fejn ikunu twettqu. Jenħtieġ li tali aċċess ikun disponibbli permezz tal-applikazzjoni tas-softwer tas-Sistema ta' Informazzjoni Ewropea tal-Liċenzji tal-Vetturi u tas-Sewqan (EUCARIS), li l-użu tagħha huwa obbligatorju għall-Istati Membri skont id-Deċiżjonijiet tal-Kunsill 2008/615/ĠAI (5) u 2008/616/ĠAI (6), fir-rigward tad-data dwar ir-reġistrazzjoni tal-vetturi.

(6)

Biex jiġu żgurati l-kondizzjonijiet uniformi għall-implimentazzjoni tad-dispożizzjonijiet dwar l-aċċess awtomatizzat għall-informazzjoni miġbura mill-awtoritajiet doganali u għad-data dwar ir-reġistrazzjoni tal-vetturi, jenħtieġ li l-Kummissjoni tingħata setgħat ta' implimentazzjoni. Jenħtieġ li dawk is-setgħat jiġu eżerċitati skont ir-Regolament (UE) Nru 182/2011 tal-Parlament Ewropew u tal-Kunsill (7).

(7)

Bil-għan li jiġi żgurat il-monitoraġġ effettiv u effiċjenti tal-VAT fit-tranżazzjonijiet transfruntiera, ir-Regolament (UE) Nru 904/2010 jipprevedi l-preżenza ta' uffiċjali fl-uffiċċji amministrattivi u waqt l-inkjesti amministrattivi fi Stati Membri oħra. Sabiex tissaħħaħ il-kapaċità tal-awtoritajiet tat-taxxa biex jivverifikaw il-provvisti transfruntiera, jenħtieġ li jkun hemm inkjesti amministrattivi li jitwettqu b'mod konġunt li jippermettu lill-uffiċjali minn żewġ Stati Membri jew aktar jagħmlu parti minn tim wieħed u jieħdu sehem b'mod attiv f'inkjesta amministrattiva li titwettaq b'mod konġunt.

(8)

Sabiex tiġi miġġielda il-frodi transfruntiera l-aktar serja, jenħtieġ li jiġu ċċarati u msaħħa l-governanza, il-kompiti u l-funzjonament tal-Eurofisc. Jenħtieġ li l-uffiċjali ta' kollegament tal-Eurofisc ikunu jistgħu jaċċessaw, jiskambjaw, jipproċessaw u janalizzaw malajr l-informazzjoni kollha meħtieġa u jikkoordinaw kull azzjoni ta' segwitu. Madankollu, tali koordinazzjoni ma timplikax id-dritt li tintalab xi azzjoni ta' inkjesta speċifika mill-Istat Membru parteċipanti. Huwa meħtieġ ukoll li tissaħħaħ il-ġlieda kontra l-frodi tal-VAT fil-livell tal-Unjoni, b'mod partikolari billi l-koordinaturi tal-oqsma ta' ħidma tal-Eurofisc jingħataw il-kapaċità li jitolbu informazzjoni mmirata mill-Aġenzija tal-Unjoni Ewropea għall-Kooperazzjoni fl-Infurzar tal-Liġi (“Europol”) u l-Uffiċċju Ewropew Kontra l-Frodi (“OLAF”). Għalhekk, sabiex jirċievu bħala skambju informazzjoni rilevanti miżmuma mill-Europol u l-OLAF, il-koordinaturi tal-oqsma ta' ħidma tal-Eurofisc jenħtieġ li jkunu jistgħu jibagħtu kull informazzjoni neċessarja lill-Europol u lill-OLAF.

(9)

Biex ikunu żgurati l-kondizzjonijiet uniformi għall-implimentazzjoni tad-dispożizzjonijiet dwar il-Eurofisc, jenħtieġ li l-Kummissjoni tingħata setgħat ta' implimentazzjoni. Jenħtieġ li dawk is-setgħat jiġu eżerċitati skont ir-Regolament (UE) Nru 182/2011.

(10)

L-organizzazzjoni tat-trażmissjoni tat-talbiet għal rifużjonijiet tal-VAT - skont l-Artikolu 5 tad-Direttiva tal-Kunsill 2008/9/KE (8) toffri l-opportunità li jitnaqqas il-piż amministrattiv għall-awtoritajiet kompetenti biex jirkupraw obbligazzjonijiet ta' taxxa mhux imħallsa fl-Istat Membru ta' stabbiliment.

(11)

L-Istati Membri jistgħu jikkomunikaw ukoll informazzjoni rilevanti lill-OLAF meta jqisu li dan ikun xieraq, Dan jippermetti lill-OLAF jissodisfa l-mandat tiegħu li jwettaq investigazzjonijiet amministrattivi kontra l-frodi, il-korruzzjoni u attivitajiet illegali oħra li jaffettwaw l-interessi finanzjarji tal-Unjoni, u jipprovdi assistenza lill-Istati Membri biex jikkoordinaw l-azzjoni tagħhom ħalli jħarsu l-interessi finanzjarji tal-Unjoni kontra l-frodi.

(12)

Il-Kummissjoni jista' jkollha aċċess għall-informazzjoni kkomunikata jew miġbura skont ir-Regolament (UE) Nru 904/2010 biss meta dan ikun meħtieġ għall-kura, il-manutenzjoni u l-iżvilupp tas-sistemi elettroniċi ospitati mill-Kummissjoni u użati mill-Istati Membri għall-finijiet ta' dan ir-Regolament.

(13)

Ir-Regolament (UE) 2016/679 tal-Parlament Ewropew u tal-Kunsill (9) japplika għall-ipproċessar tad-data personali għall-fini tar-Regolament (UE) Nru 904/2010. Ir-Regolament (KE) Nru 45/2001 tal-Parlament Ewropew u tal-Kunsill (10) japplika għall-ipproċessar ta' data personali mill-istituzzjonijiet u l-korpi tal-Unjoni għall-fini ta' dak ir-Regolament. Il-ġlieda kontra l-frodi tal-VAT hija rikonoxxuta bħala objettiv importanti ta' interess pubbliku ġenerali kemm tal-Unjoni kif ukoll tal-Istati Membri tagħha. Għall-finijiet tal-ksib tal-objettivi tar-Regolament (UE) Nru 904/2010, jiġifieri l-objettiv ta' kooperazzjoni u skambju ta' informazzjoni li tgħin biex tiġi effettwata valutazzjoni korretta tal-VAT, biex isir monitoraġġ tal-applikazzjoni korretta tal-VAT, b'mod partikolari ta' tranżazzjonijiet intra-Komunitarji, u biex tiġi miġġielda l-frodi tal-VAT, huwa adatt li jkunu previsti restrizzjonijiet speċifiċi u limitati fuq ċerti drittijiet u obbligi stipulati mir-Regolament (UE) 2016/679.

(14)

B'mod aktar speċifiku, l-applikazzjoni sħiħa tad-drittijiet u l-obbligi previsti fir-Regolament (UE) 2016/679 iddgħajjef serjament l-effettività tal-ġlieda kontra l-frodi tal-VAT peress li b'mod partikolari tippermetti li s-suġġetti tad-data jfixklu l-investigazzjonijiet u l-ipprofilar tar-riskju li għaddejjin. Dan jipperikola inkjesti, analiżi, investigazzjonijiet jew proċeduri uffiċjali jew legali li jitwettqu f'konformità mar-Regolament (UE) Nru 904/2010. Dan jiddiżattiva wkoll il-kooperazzjoni amministrattiva bejn l-awtoritajiet kompetenti li huma strument ewlieni għall-fini tal-ġlieda kontra l-frodi tal-VAT. Konsegwentement, jenħtieġ li jkunu previsti restrizzjonijiet fir-rigward tad-dritt għall-informazzjoni trasparenti, id-dritt li tiġi riċevuta informazzjoni fejn tinġabar id-data personali mis-suġġett tad-data, id-dritt li tiġi riċevuta informazzjoni fejn ma tkunx inkisbet id-data personali mis-suġġett tad-data, id-dritt ta' aċċess mis-suġġett tad-data, id-dritt għal tħassir, id-dritt għall-oġġezzjoni tal-ipproċessar ta' data personali u d-dritt li jikkonċerna t-teħid ta' deċiżjonijiet individwali awtomatizzat, inkluż l-ipprofilar. L-eżerċizzju ta' dawn id-drittijiet jenħtieġ li jkun ristrett biss għall-perijodu li jkun neċessarju sabiex ma jkunux imminati l-finijiet segwiti skont l-Artikolu 1tar-Regolament (UE) Nru 904/2010. Jenħtieġ li din ir-restrizzjoni tapplika biss fir-rigward ta' ċerti kategoriji tad-data msemmija fl-Artikoli 1, 14 u 17 ta' dak ir-Regolament sa fejn ikun strettament neċessarju sabiex tkun żgurata l-konformità mal-leġislazzjoni tal-VAT, u mad-dispożizzjonijiet relevanti ta' dan ir-Regolament.

(15)

Peress li l-objettiv tal-prevenzjoni, l-investigazzjoni u l-individwazzjoni tal-evażjoni tal-VAT u l-frodi tal-VAT ma jistax jinkiseb minn mezzi oħra inqas restrittivi ta' effettività ugwali, dawn ir-restrizzjonijiet huma strettament neċessarji biex jinkiseb l-iskop speċifiku inkwistjoni. Huma wkoll proporzjonati fid-dawl tat-telf ta' dħul għall-Unjoni u l-Istati Membri u l-importanza kruċjali li l-informazzjoni ssir disponibbli sabiex tiġi miġġielda l-frodi b'mod effettiv. L-ipproċessar u l-ħżin tal-informazzjoni miġbura u skambjata skont dan ir-Regolament huma limitati għall-objettivi tal-ġlieda kontra l-frodi tal-VAT. L-informazzjoni miġbura u skambjata skont dan ir-Regolament ma tikkonċernax data sensittiva. Ma tistax tiġi pproċessata ulterjorment b'mod li jkun inkompatibbli ma' tali finijiet, inkluż il-projbizzjoni li tiġi pproċessata għal finijiet kummerċjali. Fir-rigward tas-salvagwardji għall-prevenzjoni tal-abbuż jew tal-aċċess jew trasferiment illegali, ir-Regolament (UE) Nru 904/2010 diġà jipprevedi kondizzjonijiet dettaljati dwar l-aċċess tal-awtoritajiet nazzjonali kompetenti għad-data u l-użu sussegwenti tagħha sabiex jinkiseb l-għan ġenerali ta' dak ir-Regolament. Il-perijodu ta' żamma tad-data jenħtieġ li jkun limitat għal dak li huwa neċessarju għall-fini li jinkisbu l-objettivi segwiti.

(16)

Peress li r-Regolament tal-Kunsill (UE) 2017/2454 (11) emenda wkoll l-Artikolu 17 tar-Regolament (UE) Nru 904/2010, b'applikazzjoni mill-1 ta' Jannar 2021, huwa meħtieġ li jiġi emendat ir-Regolament (UE) 2017/2454 biex jiġu aġġornati l-kontroreferenzi rilevanti għal dak l-Artikolu. Peress li r-Regolament (UE) 2017/2454 emenda wkoll l-Anness I għar-Regolament (UE) Nru 904/2010, b'applikazzjoni mill-1 ta' Jannar 2021, huwa meħtieġ li jiġi emendat ir-Regolament (UE) 2017/2454 peress li l-Anness I ma għadux meħtieġ u għalhekk jenħtieġ li jitħassar.

(17)

Peress li l-implimentazzjoni tad-dispożizzjonijiet dwar l-aċċess awtomatizzat għall-informazzjoni miġbura mill-awtoritajiet doganali u għad-data dwar ir-reġistrazzjoni tal-vetturi tirrikjedi żviluppi teknoloġiċi ġodda, huwa neċessarju li tiġi differita l-applikazzjoni tagħhom biex l-Istati Membri u l-Kummissjoni jkunu jistgħu jwettqu dawk l-iżviluppi.

(18)

Peress li l-objettivi ta' dan ir-Regolament, jiġifieri t-titjib tal-istrumenti ta' kooperazzjoni bejn l-Istati Membri u l-ġlieda kontra l-frodi transfruntiera fil-qasam tal-VAT, ma jistgħux jintlaħqu b'mod suffiċjenti mill-Istati Membri iżda pjuttost jistgħu jinkisbu aħjar fil-livell tal-Unjoni, l-Unjoni tista' tadotta miżuri, skont il-prinċipju tas-sussidjarjetà, kif stabbilit fl-Artikolu 5 tat-Trattat dwar l-Unjoni Ewropea. Skont il-prinċipju tal-proporzjonalità, kif stabbilit fl-istess Artikolu, dan ir-Regolament ma jmurx lil hinn minn dak li hu neċessarju biex jintlaħqu dawk l-objettivi.

(19)

Il-Kontrollur Ewropew għall-Protezzjoni tad-Data ġie kkonsultat skont l-Artikolu 28(2) tar-Regolament (KE) 45/2001 u ta l-kummenti formali tiegħu fil-21 ta' Marzu 2018.

(20)

Għaldaqstant, jenħtieġ li r-Regolament (UE) Nru 904/2010 u r-Regolament (UE) 2017/2454 jiġu emendati skont dan,