14.2.2017

MT

Il-Ġurnal Uffiċjali tal-Unjoni Ewropea

L 37/23

---

DEĊIŻJONI TA' IMPLIMENTAZZJONI TAL-KUMMISSJONI (UE) 2017/253

tat-13 ta' Frar 2017

li tistabbilixxi l-proċeduri għan-notifika ta' twissijiet bħala parti tas-sistema ta' twissija bikrija u ta' reazzjoni stabbilita b'rabta mat-theddid transkonfinali serju għas-saħħa u għall-iskambju ta' informazzjoni, ta' konsultazzjoni u ta' koordinazzjoni ta' reazzjonijiet għal theddid bħal dan skont id-Deċiżjoni Nru 1082/2013/UE tal-Parlament Ewropew u tal-Kunsill

(Test b'rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Deċiżjoni Nru 1082/2013/UE tal-Parlament Ewropew u tal-Kunsill tat-22 ta' Ottubru 2013 dwar theddid transkonfinali serju għas-saħħa u li tħassar id-Deċiżjoni Nru 2119/98/KE (1), u b'mod partikolari l-Artikolu 8(2) u l-Artikolu 11(5) tagħha,

Billi:

(1)

Id-Deċiżjoni 2119/98/KE tal-Parlament Ewropew u tal-Kunsill (2) stabbiliet sistema ta' twissija bikrija u ta' reazzjoni (“EWRS”) bħala netwerk ta' komunikazzjoni permanenti bejn il-Kummissjoni u l-awtoritajiet kompetenti tas-saħħa pubblika tal-Istati Membri għall-prevenzjoni u l-kontroll ta' ċerti kategoriji ta' mard komunikabbli (in-“network ta' komunikazzjoni permanenti”). Il-proċeduri li jirregolaw il-funzjonament tal-EWRS ġew stabbiliti fid-Deċiżjoni tal-Kummissjoni 2000/57/KE (3).

(2)

Ir-Regolament (KE) Nru 851/2004 tal-Parlament Ewropew u tal-Kunsill (4) stabbilixxa Ċentru Ewropew għall-Prevenzjoni u l-Kontroll tal-Mard (“ECDC”). Skont l-Artikolu 8 ta' dak ir-Regolament, l-ECDC qed jappoġġja u jgħin lill-Kummissjoni billi jopera l-EWRS. B'mod partikolari, l-ECDC iwettaq operazzjonijiet ta' kuljum u manutenzjoni tal-applikazzjoni tat-teknoloġija tal-informazzjoni ta' sistema ta' twissija bikrija u ta' reazzjoni (“tal-applikazzjoni tal-IT tal-EWRS”).

(3)

Id-Deċiżjoni 2119/98/KE tħassret u ġiet sostitwita mid-Deċiżjoni Nru 1082/2013/UE. Id-Deċiżjoni l-ġdida reġgħet daħħlet fis-seħħ l-EWRS. Hija testendi wkoll l-ambitu tan-netwerk ta' komunikazzjoni permanenti li jkopri tipi oħra ta' theddid bijoloġiku, u kategoriji oħra ta' theddid transkonfinali serju għas-saħħa, inkluż theddid ta' oriġini kimika, ambjentali jew ta' oriġini mhux magħrufa. Barra minn hekk, hija stabbiliet regoli dwar is-sorveljanza epidemjoloġika, il-monitoraġġ, it-twissija bikrija ta', u l-ġlieda kontra t-theddid transkonfinali serju għas-saħħa.

(4)

Wara li jitqiesu r-rieżamijiet tal-EWRS, huwa xieraq li jiġu rieżaminati u aġġornati l-proċeduri li jirregolaw it-tħaddim tagħha. Sabiex ikun żgurat il-funzjonament tajjeb tal-EWRS u tiġi applikata b'mod uniformi, huwa meħtieġ li jiġu stabbiliti proċeduri dettaljati għall-iskambju ta' informazzjoni. Proċeduri bħal dawn għandhom jevitaw id-duplikazzjoni ta' attivitajiet jew azzjonijiet konfliġġenti ma' strutturi u mekkaniżmi eżistenti għall-monitoraġġ, il-provvediment ta' twissija bikrija u l-ġlieda kontra theddid transkonfinali serju għas-saħħa.

(5)

Skont l-Artikolu 15(1)(b) tad-Deċiżjoni Nru 1082/2013/UE, l-Istati Membri huma obbligati li jaħtru awtoritajiet kompetenti responsabbli għan-notifika ta' twissijiet u għall-istabbiliment tal-miżuri ta' reazzjoni (l-awtoritajiet kompetenti tal-EWRS). Sabiex tiġi żgurata l-koordinazzjoni u l-konsistenza fil-komunikazzjonijiet, l-Istati Membri għandhom jinnotifikaw id-dettalji ta' kuntatt tal-EWRS lill-awtoritajiet kompetenti tal-Istati Membri u tal-Kummissjoni kif ukoll kwalunkwe bidla sussegwenti lill-awtoritajiet kompetenti.

(6)

L-effettività tal-EWRS hija dipendenti fuq komunikazzjoni f'waqtha u skambju ta' informazzjoni xieraq dwar il-bidu jew l-iżvilupp ta' theddid transkonfinali serju għas-saħħa. Għalhekk huwa xieraq li jiġu speċifikati limiti ta' żmien ċari li fihom it-twissijiet iridu jiġu notifikati u l-informazzjoni trid tiġi kkomunikata.

(7)

Sabiex jiġi evitat li jkun hemm irduppjar tal-istrutturi ta' notifiki ta' twissija u ta' azzjonijiet konfliġġenti, għandu jkun possibbli għal sistemi oħra rilevanti ta' twissija rapida u ta' informazzjoni, stabbiliti skont dispożizzjonijiet oħrajn tal-liġi tal-Unjoni jew tat-Trattat Euratom li jużaw l-EWRS biex jibagħtu twissijiet u informazzjoni dwar avvenimenti, li huma jew jistgħu jkunu ta' theddid transkonfinali serju għas-saħħa. Tali possibbiltà għandha tiġi suġġetta għar-rekwiżit li l-konnessjoni minn skemi oħrajn ma tikkompromettix is-sigurtà tal-EWRS u tirrispetta r-regoli applikabbli dwar il-protezzjoni tad-dejta. Barra minn hekk, l-EWRS għandha tkun kompatibbli mas-sistema tal-entrati tad-data, tal-flussi tax-xogħol, u tad-drittijiet ta' aċċess ta' kwalunkwe sistemi ta' twissija u ta' informazzjoni oħra li tkun konnessa magħhom. L-applikazzjoni tal-IT tal-EWRS għandha tiġi adattata sabiex tippermetti tali interoperabbiltà bejn id-diversi sistemi ta' twissija u ta' informazzjoni.

(8)

Skont l-Artikolu 11(1) tad-Deċiżjoni Nru 1082/2013/UE, f'każ li tiġi notifikata twissija, l-Istati Membri għandhom jikkonsultaw lil xulxin fi ħdan il-Kumitat għas-Sigurtà tas-Saħħa (“HSC”), bil-ħsieb li jiġu kkoordinati r-reazzjonijiet nazzjonali u biex jipprovdu għall-komunikazzjoni tar-riskji u tal-kriżijiet. Sabiex ikun iffaċilitat il-koordinament ta' tali reazzjonijiet u ta' komunikazzjonijiet effikaċi, huwa xieraq li jiġu speċifikati l-proċeduri li bihom l-Istati Membri jikkoordinaw ir-reazzjonijiet kif ukoll il-proċeduri għal komunikazzjonijiet effikaċi lill-pubbliku ġenerali u/jew lill-professjonisti tal-kura tas-saħħa.

(9)	Il-Kontrollur Ewropew għall-Protezzjoni tad-Data ġie kkonsultat f'konformita mal-Artikolu 28(1) tar-Regolament (KE) Nru 45/2001 tal-Parlament Ewropew u tal-Kunsill (5).

(10)	Id-Direttiva 95/46/KE tal-Parlament Ewropew u tal-Kunsill (6) u r-Regolament (KE) Nru 45/2001 għandhom jiġu applikati fil-kuntest tat-tħaddim tal-EWRS.

(11)	Il-miżuri previsti f'din id-Deċiżjoni huma skont l-opinjoni tal-Kumitat dwar it-theddid transkonfinali serju għas-saħħa stabbilit bl-Artikolu 18 tad-Deċiżjoni Nru 1082/2013/UE.

(12)	Id-Deċiżjoni 2000/57/KE għandha, għalhekk, titħassar u tiġi sostitwita,

ADOTTAT DIN ID-DEĊIŻJONI:

Artikolu 1

L-awtoritajiet kompetenti EWRS

1.   Il-Kummissjoni għandha tagħti lill-awtoritajiet kompetenti tal-EWRS, innominati skont l-Artikolu 15(1)(b) tad-Deċiżjoni Nru 1082/2013/UE, aċċess għas-sistema ta' twissija bikrija u ta' reazzjoni stabbilita skont l-Artikolu 8 tad-Deċiżjoni Nru 1082/2013/UE.

2.   L-Istati Membri għandhom jiżguraw li jiġu stabbiliti kanali ta' komunikazzjoni effettivi bejn l-awtoritajiet kompetenti tal-EWRS u kwalunkwe awtoritajiet kompetenti oħra rilevanti fi ħdan il-ġurisdizzjoni tagħhom sabiex jiġi identifikat fil-pront theddid transkonfinali serju għas-saħħa li jissodisfa l-kriterji stabbiliti fl-Artikolu 9(1) u (2) tad-Deċiżjoni Nru 1082/2013/UE.

Artikolu 2

Notifikazzjoni ta' twissija fl-EWRS

1.   Meta Stat Membru jew il-Kummissjoni isiru jafu bil-bidu jew bl-iżvilupp ta' theddida transkonfinali serja għas-saħħa fi ħdan it-tifsira tal-Artikolu 9(1) tad-Deċiżjoni Nru 1082/2013/UE, għandhom jintroduċu t-twissija msemmija f'dak l-Artikolu mingħajr dewmien, u fi kwalunkwe każ mhux aktar tard minn 24 siegħa minn meta jkunu saru jaf għall-ewwel darba bit-theddida.

2.   L-Istat Membru jew il-Kummissjoni jistgħu jinformaw lill-Kumitat għas-Sigurtà tas-Saħħa (“HSC”) dwar l-introduzzjoni ta' twissija.

3.   L-obbligu ta' notifika msemmija fil-paragrafu 1, ma għandhiex taffettwa l-obbligu ta' notifika stabbilit fl-Artikolu 9(2) tad-Deċiżjoni Nru 1082/2013/UE.

4.   Il-fatt li mhux l-informazzjoni kollha rilevanti, kif indikat fl-Artikolu 9(3) ta' dik id-Deċiżjoni, tista' tkun disponibbli m'għandux jittardja n-notifika ta' twissija.

5.   It-twissija msemmija fil-paragrafu 1 għandha tispeċifika kif il-kriterji stabbiliti fl-Artikolu 9(1) tad-Deċiżjoni Nru 1082/2013/UE jiġu sodisfatti.

6.   Meta, wara notifika ta' twissija, Stat Membru jew il-Kummissjoni ikunu jixtiequ jikkomunikaw informazzjoni rilevanti disponibbli għal skopijiet ta' koordinazzjoni skont l-Artikolu 9(3) tad-Deċiżjoni Nru 1082/2013/UE, huma għandhom jużaw il-funzjonalità ad hoc fl-EWRS sabiex jirreġistraw “kumment” bi tweġiba għall-messaġġ ta' notifika inizjali.

Artikolu 3

Sistemi oħra ta informazzjoni u twissija rapida tal-Unjoni

1.   In-notifika ta' twissija msemmija fl-Artikolu 2(1) għandha tispeċifika jekk theddid identifikat ikunx ġie nnotifikat minn qabel permezz ta' sistemi ta' informazzjoni jew ta' twissija oħrajn fil-livell tal-Unjoni jew taħt it-Trattat Euratom.

2.   Meta theddida transkonfinali serja għas-saħħa tkun ġiet ikkomunikata permezz ta' sistema waħda jew aktar ta' twissija jew ta' informazzjoni tal-Unjoni, il-Kummissjoni għandha tindika, permezz tal-EWRS, is-sistema ewlenija għat-tip speċifiku ta' skambju ta' informazzjoni.

3.   Għall-finijiet ta' dan l-Artikolu, sistemi ta' twissija u ta' informazzjoni oħrajn fil-livell tal-Unjoni jew taħt it-Trattat Euratom għandhom jinkludu s-sistemi stabbiliti fl-Anness.

Artikolu 4

Koordinazzjoni ta' reazzjonijiet nazzjonali għal theddid transkonfinali serju għas-saħħa

1.   Meta ssir talba għal konsultazzjoni skont l-Artikolu 11(1)(a) tad-Deċiżjoni Nru 1082/2013/UE għal raġunijiet ta' koordinazzjoni bħala rispons għal theddid transkonfinali serju għas-saħħa, il-Kummissjoni għandha tiżgura li ssir konsultazzjoni fi ħdan l-HSC fi żmien jumejn ta' xogħol minn meta ssir it-talba skont l-urġenza marbuta mas-severità ta' dik it-theddida.

2.   Il-Kummissjoni għandha tinforma lill-Kumitat għas-Sigurtà tas-Saħħa bit-talba tal-HSC u tagħmel disponibbli kull tagħrif rilevanti dwar it-theddida b'żieda ma' dik diġà kkomunikata permezz tal-EWRS.

3.   L-Istati Membri għandhom ukoll jipprovdu bil-miktub kull informazzjoni disponibbli rilevanti għat-theddida, minbarra dik diġà kkomunikata permezz tal-EWRS inklużi miżuri għas-saħħa pubblika, jew miżuri oħra, li jkunu ttieħdu jew li hemm intenzjoni li jittieħdu.

4.   L-HSC għandu jeżamina l-informazzjoni kollha disponibbli rigward theddida partikolari, inklużi n-notifiki ta' twissija, il-valutazzjoni tar-riskju, u informazzjoni oħra kkomunikata mill-Istati Membri jew mill-Kummissjoni jew permezz tal-EWRS jew permezz tal-HSC, inkluża informazzjoni dwar miżuri tas-saħħa pubblika li jkunu ttieħdu jew huma intenzjoni li jittieħdu. Eżami bħal dan għandu jiġi konkluż mingħajr dewmien.

5.   L-Istati Membri meta jkunu qed jikkunsidraw jew jieħdu miżuri tas-saħħa pubblika sabiex jiġġieldu kontra theddid transkonfinali serju għas-saħħa għandhom jikkunsidraw ir-riżultat ta' eżami mwettaq fil-qafas tal-konsultazzjoni tal-HSC.

Artikolu 5

Komunikazzjoni dwar riskju u kriżijiet

1.   Wara talba għal konsultazzjoni skont l-Artikolu 11(1)(b) tad-Deċiżjoni Nru 1082/2013/UE, l-Istati Membri għandhom jikkonsultaw lil xulxin fi ħdan l-HSC u jiżviluppaw u jissuġġerixxu l-kontenut u l-forma ta' komunikazzjoni tar-riskji u tal-kriżijiet li jridu jingħataw mill-Istati Membri lill-pubbliku ġenerali u/jew lill-professjonisti tal-kura tas-saħħa. L-Istati Membri jistgħu jadattaw il-komunikazzjonijiet tagħhom skont il-bżonnijiet u ċ-ċirkostanzi tagħhom.

2.   L-Istati Membri li jkunu diġà bagħtu l-komunikazzjonijiet dwar ir-riskji u l-kriżijiet relatati ma' theddid transkonfinali serju għas-saħħa għandhom jinformaw lill-HSC u lill-Kummissjoni, bil-miktub, dwar il-kontenut ta' dawk il-komunikazzjonijiet.

Artikolu 6

Diżattivazzjoni tan-notifika ta' twissija.

Meta l-kundizzjonijiet li jkunu ġġustifikaw l-introduzzjoni ta' twissija skont l-Artikolu 9(1) tad-Deċiżjoni Nru 1082/2013/UE ma jibqgħux jeżistu, it-twissija għandha tiġi diżattivata mill-Istat Membru li jkun introduċa t-twissija, jew mill-Kummissjoni fil-każ li t-twissija tkun ġiet introdotta mill-Kummissjoni. Diżattivazzjoni ta' twissija għandha sseħħ biss wara li l-Istati Membri kollha kkonċernati mit-twissija jkunu ftiehmu dwar din id-diżattivazzjoni.

Artikolu 7

It-tħassir tad-Deċiżjoni 2000/57/KE

1.   Id-Deċiżjoni 2000/57/KE titħassar.

2.   Ir-referenzi għad-Deċiżjoni mħassra għandhom jiġu mifhuma bħala referenzi għal din id-Deċiżjoni.

Artikolu 8

Dħul fis-seħħ

Din id-Deċiżjoni għandha tidħol fis-seħħ fl-għoxrin jum wara l-pubblikazzjoni tagħha f'Il-Ġurnal Uffiċjali tal-Unjoni Ewropea.

---

(1)  ĠU L 293 5.11.2013, p. 1.

(2)  Id-Deċiżjoni Nru 2119/98/KE tal-Parlament Ewropew u tal-Kunsill tal-24 ta' Settembru 1998 illi tistabbilixxi xibka ta' sorveljanza epidemjoloġika u kontroll ta' mard li jittieħed fil-Komunità (ĠU L 268, 3.10.1998, p. 1).

(3)  Id-Deċiżjoni tal-Kummissjoni 2000/57/KE tat-22 ta' Diċembru 1999 dwar is-sistema ta' twissija u tweġiba bikrija għall-prevenzjoni u l-kontroll tal-mard li jittieħed taħt id-Deċiżjoni 2119/98/KE tal-Parlament Ewropew u tal-Kunsill (ĠU L 21, 26.1.2000, p. 32).

(4)  Ir-Regolament (KE) Nru 851/2004 tal-Parlament Ewropew u tal-Kunsill tal-21 ta' April 2004 li jistabbilixxi ċentru Ewropew għall-prevenzjoni u l-kontroll tal-mard (ĠU L 142, 30.4.2004, p. 1).

(5)  Ir-Regolament (KE) Nru 45/2001 tal-Parlament Ewropew u tal-Kunsill tat-18 ta' Diċembru 2000 dwar il-protezzjoni ta' individwu fir-rigward tal-ipproċessar ta' dejta personali mill-istituzzjonijiet u l-korpi tal-Komunità u dwar il-movement liberu ta' dik id-dejta (ĠU L 8, 12.1.2001, p. 1).

(6)  Id-Direttiva 95/46/KE tal-Parlament Ewropew u tal-Kunsill tal-24 ta' Ottubru 1995 dwar il-protezzjoni ta' individwi fir-rigward tal-ipproċessar ta' dejta personali u dwar il-moviment liberu ta' dik id-dejta (ĠU L 281, 23.11.1995, p. 31).

---

---