EUR-Lex Access to European Union law
This document is an excerpt from the EUR-Lex website
Document 32015D1339
Council Decision (EU) 2015/1339 of 13 July 2015 on the conclusion, on behalf of the European Union, of the Doha Amendment to the Kyoto Protocol to the United Nations Framework Convention on Climate Change and the joint fulfilment of commitments thereunder
Deċiżjoni tal-Kunsill (UE) 2015/1339 tat-13 ta' Lulju 2015 dwar il-konklużjoni, f'isem l-Unjoni Ewropea, tal-Emenda ta' Doha għall-Protokoll ta' Kjoto għall-Konvenzjoni Qafas tan-Nazzjonijiet Uniti dwar it-Tibdil fil-Klima u t-twettiq konġunt tal-impenji taħtha
Deċiżjoni tal-Kunsill (UE) 2015/1339 tat-13 ta' Lulju 2015 dwar il-konklużjoni, f'isem l-Unjoni Ewropea, tal-Emenda ta' Doha għall-Protokoll ta' Kjoto għall-Konvenzjoni Qafas tan-Nazzjonijiet Uniti dwar it-Tibdil fil-Klima u t-twettiq konġunt tal-impenji taħtha
ĠU L 207, 4.8.2015, p. 1–5
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
ELI: http://data.europa.eu/eli/dec/2015/1339/oj
4.8.2015 |
MT |
Il-Ġurnal Uffiċjali tal-Unjoni Ewropea |
L 207/1 |
DEĊIŻJONI TAL-KUNSILL (UE) 2015/1339
tat-13 ta' Lulju 2015
dwar il-konklużjoni, f'isem l-Unjoni Ewropea, tal-Emenda ta' Doha għall-Protokoll ta' Kjoto għall-Konvenzjoni Qafas tan-Nazzjonijiet Uniti dwar it-Tibdil fil-Klima u t-twettiq konġunt tal-impenji taħtha
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-Artikolu 192(1), flimkien mal-punt (a) tat-tieni subparagrafu tal-Artikolu 218(6), tiegħu,
Wara li kkunsidra l-proposta mill-Kummissjoni Ewropea,
Wara li kkunsidra l-kunsens tal-Parlament Ewropew (1),
Billi:
(1) |
Fil-Konferenza ta' Doha dwar it-Tibdil fil-Klima li saret f'Diċembru 2012, il-Partijiet għall-Protokoll ta' Kjoto għall-Konvenzjoni Qafas tan-Nazzjonijiet Uniti dwar it-Tibdil fil-Klima (“il-Protokoll ta' Kjoto”) adottaw l-Emenda ta' Doha, li tistabbilixxi t-tieni perijodu ta' impenn tal-Protokoll ta' Kjoto, li jibda fl-1 ta' Jannar 2013 u jintemm fil-31 ta' Diċembru 2020 (“l-Emenda ta' Doha”). L-Emenda ta' Doha temenda l-Anness B tal-Protokoll ta' Kjoto, billi tistabbilixxi aktar impenji legalment vinkolanti ta' mitigazzjoni għall-Partijiet elenkati f'dak l-Anness għat-tieni perijodu ta' impenn, u temenda dispożizzjonijiet u tistipula aktar dispożizzjonijiet dwar l-implimentazzjoni tal-impenji ta' mitigazzjoni tal-Partijiet matul it-tieni perijodu ta' impenn. |
(2) |
L-Unjoni u l-Istati Membri tagħha qablu mal-Emenda ta' Doha bħala parti minn pakkett li permezz tiegħu l-Partijiet għall-Konvenzjoni Qafas tan-Nazzjonijiet Uniti dwar it-Tibdil fil-Klima (“il-Konvenzjoni”) qablu li, sa tmiem l-2015, jadottaw protokoll, strument legali ieħor jew eżitu miftiehem li jkollu saħħa legali taħt il-Konvenzjoni li jkun japplika għall-Partijiet kollha, li jsir effettiv u jiġi implimentat mill-2020 'il quddiem. In-negozjati dwar dan l-istrument legalment vinkolanti għadhom għaddejjin fil-Grupp ta' Ħidma Ad Hoc dwar il-Pjattaforma ta' Durban għal Azzjoni Msaħħa. |
(3) |
L-Emenda ta' Doha hija soġġetta għall-aċċettazzjoni mill-Partijiet għall-Protokoll ta' Kjoto, u ser tidħol fis-seħħ għal dawk il-Partijiet li jkunu aċċettawha fid-disgħin jum wara d-data li fiha d-Depożitarju tal-Konvenzjoni jkun irċieva strument ta' aċċettazzjoni mingħand tal-inqas tliet kwarti tal-Partijiet għall-Protokoll ta' Kjoto. B'kollox hemm bżonn ta' 144 strument ta' aċċettazzjoni biex tidħol fis-seħħ l-Emenda ta' Doha. |
(4) |
Il-Kunsill qabel, fil-konklużjonijiet tiegħu tad-9 ta' Marzu 2012, li jipproponi impenn konġunt kwantifikat ta' tnaqqis ta' 20 % tal-emissjonijiet għat-tieni perijodu ta' impenn tal-Protokoll ta' Kjoto għall-Unjoni u l-Istati Membri tagħha. Dak l-impenn ġie ddeterminat abbażi tal-għadd totali tal-emissjonijiet ta' gass b'effett ta' serra li ġew permessi matul il-perijodu mill-2013 sal-2020 skont il-pakkett dwar l-enerġija u l-klima. (2) |
(5) |
Il-Kunsill qabel ukoll, f'konformità ma' dan l-approċċ, li l-obbligi tat-tnaqqis tal-emissjonijiet tal-Istati Membri individwali m'għandhomx jeċċedu l-obbligi miftiehma fil-leġislazzjoni tal-Unjoni, u li l-impenn għandu jkun ibbażat fuq l-ammont totali tal-emissjonijiet tas-sena bażi tal-Istati Membri f'konformità mal-Protokoll ta' Kjoto. Għalhekk, l-Unjoni u l-Istati Membri tagħha qablu fil-Konferenza ta' Doha dwar it-Tibdil fil-Klima dwar impenn kwantifikat għat-tnaqqis tal-emissjonijiet li jillimita l-medja tal-emissjonijiet annwali tagħhom ta' gass b'effett ta' serra matul it-tieni perijodu ta' impenn għal 80 % tat-ammont totali tal-emissjonijiet tas-sena bażi tagħhom. Dan huwa rifless fl-Emenda ta' Doha. |
(6) |
F'konformità mal-konklużjonijiet tal-Kunsill tad-9 ta' Marzu 2012, l-Unjoni u l-Istati Membri tagħha offrew ukoll li jgħaddu għal tnaqqis ta' 30 % sal-2020 meta mqabbel mal-livelli tal-1990, bħala parti minn ftehim globali u komprensiv għall-perijodu lil hinn mill-2012, dment li pajjiżi żviluppati oħrajn jimpenjaw ruħhom għal tnaqqis paragunabbli fl-emissjonijiet, u li pajjiżi f'fażi ta' żvilupp jikkontribwixxu b'mod xieraq skont ir-responsabbiltajiet u l-ħiliet rispettivi tagħhom. Din l-offerta hija wkoll riflessa fl-Emenda ta' Doha. |
(7) |
Il-miri għall-Unjoni u l-Istati Membri tagħha huma elenkati fl-Emenda ta' Doha b'nota f'qiegħ il-paġna li tiddikjara li dawk il-miri huma bbażati fuq l-intendiment li jintlaħqu b'mod konġunt mill-Unjoni Ewropea u l-Istati Membri tagħha, f'konformità mal-Artikolu 4 tal-Protokoll ta' Kjoto. L-Unjoni, l-Istati Membri tagħha, il-Kroazja u l-Islanda ħarġu wkoll dikjarazzjoni konġunta mal-adozzjoni tal-Emenda ta' Doha, li tesprimi l-intenzjoni tagħhom li jissodisfaw b'mod konġunt l-impenji tagħhom għat-tieni perijodu ta' impenn. Din id-dikjarazzjoni hija riflessa fir-Rapport tal-Konferenza u ġiet affermata mill-ġdid fil-Konklużjonijiet tal-Kunsill tas-17 ta' Diċembru 2012. |
(8) |
Fid-deċiżjoni li jwettqu l-impenji tagħhom b'mod konġunt f'konformità mal-Artikolu 4 tal-Protokoll ta' Kjoto, l-Unjoni u l-Istati Membri tagħha huma responsabbli b'mod konġunt, taħt il-paragrafu 6 ta' dak l-Artikolu u f'konformità mal-Artikolu 24(2) tal-Protokoll ta' Kjoto, biex iwettqu l-impenji kwantifikati tagħhom għat-tnaqqis tal-emissjonijiet taħt l-Artikolu 3(1bis) tal-Protokoll ta' Kjoto. Għaldaqstant, u f'konformità mal-Artikolu 4(3) tat-Trattat dwar l-Unjoni Ewropea, l-Istati Membri individwalment u kollettivament għandhom l-obbligu li jieħdu l-miżuri kollha adatti, kemm jekk ġenerali jew partikolari, sabiex jiżguraw it-twettiq tal-impenji li jirriżultaw minn azzjoni meħuda mill-istituzzjonijiet tal-Unjoni, biex tiġi ffaċilitata l-kisba ta' dak l-impenn u biex jastjenu minn kwalunkwe miżura li tista' tipperikola l-kisba tiegħu. |
(9) |
Fl-istess dikjarazzjoni, l-Unjoni, l-Istati Membri tagħha, il-Kroazja u l-Islanda ddikjaraw ukoll, f'konformità mal-Artikolu 4(1) tal-Protokoll ta' Kjoto li jippermetti li l-Partijiet iwettqu l-impenji tagħhom taħt l-Artikolu 3 tal-Protokoll ta' Kjoto b'mod konġunt, li l-Artikolu 3(7ter) tal-Protokoll ta' Kjoto ser jiġi applikat għall-ammont konġunt assenjat skont il-ftehim dwar it-twettiq konġunt mill-Unjoni, l-Istati Membri tagħha, il-Kroazja u l-Islanda u mhuwiex ser jiġi applikat għal xi Stat Membru, il-Kroazja jew l-Islanda individwalment. Il-Kunsill, fil-laqgħa tiegħu tal-15 ta' Diċembru 2009, laqa' tajjeb it-talba mill-Islanda biex tissodisfa l-impenji tagħha skont it-tieni perijodu ta' impenn flimkien mal-Unjoni u l-Istati Membri tagħha u stieden lill-Kummissjoni biex tippreżenta rakkomandazzjoni għall-ftuħ tan-negozjati meħtieġa dwar ftehim mal-Islanda li jikkonforma mal-prinċipji u l-kriterji stabbiliti fil-pakkett tal-Unjoni dwar il-klima u l-enerġija. Il-Ftehim bejn l-Unjoni Ewropea u l-Istati Membri tagħha, minn naħa waħda, u l-Islanda, min-naħa l-oħra, li jikkonċerna l-parteċipazzjoni tal-Islanda fit-twettiq konġunt tal-impenji tal-Unjoni Ewropea, l-Istati Membri tagħha u l-Islanda fit-tieni perjodu ta' impenn tal-Protokoll ta' Kjoto għall-Konvenzjoni Qafas tan-Nazzjonijiet Uniti dwar it-Tibdil fil-Klima (3) (“il-Ftehim mal-Islanda”) jistabbilixxi t-termini ta' dik il-parteċipazzjoni. |
(10) |
L-Artikolu 4 tal-Protokoll ta' Kjoto jeħtieġ li l-Partijiet li jaqblu li jissodisfaw l-impenji tagħhom taħt l-Artikolu 3 tal-Protokoll ta' Kjoto b'mod konġunt jistabbilixxu fil-ftehim rilevanti ta' twettiq konġunt il-livell rispettiv ta' emissjonijiet allokat lil kull waħda mill-Partijiet. Il-Protokoll ta' Kjoto jeħtieġ li l-Partijiet għal ftehim ta' twettiq konġunt jinnotifikaw lis-Segretarjat tal-Konvenzjoni bit-termini ta' dak il-ftehim fid-data meta jiġu ddepożitati l-istrumenti ta' ratifika jew ta' approvazzjoni tagħhom. |
(11) |
Taħt il-Konvenzjoni u l-Protokoll ta' Kjoto, l-Istati Membri huma primarjament responsabbli għall-emissjonijiet tagħhom. Sabiex ikunu ffaċilitati l-kontabbiltà u l-konformità taħt it-tieni perijodu ta' impenn, huma ddeċidew li jafdaw lill-Unjoni bil-ġestjoni ta' parti mill-unitajiet tal-ammont assenjat tagħhom billi joħolqu ammont assenjat għall-Unjoni. |
(12) |
F'konformità mal-leġislazzjoni eżistenti tal-Unjoni, il-livell ta' emissjonijiet rispettivi allokat għall-Unjoni jkopri l-emissjonijiet ta' gass b'effett ta' serra skont id-Direttiva 2003/87/KE tal-Parlament Ewropew u tal-Kunsill (4), dment li dawk l-emissjonijiet ta' gass b'effett ta' serra jkunu koperti bl-Anness A tal-Protokoll ta' Kjoto. |
(13) |
Il-livelli ta' emissjonijiet rispettivi tal-Istati Membri u l-Islanda jkopru l-emissjonijiet ta' gass b'effett ta' serra minn fonti u assorbimenti minn bjar fit-territorji tagħhom, fejn dawk il-fonti u l-assorbimenti minn bjar mhumiex koperti mid-Direttiva 2003/87/KE iżda huma koperti mill-Protokoll ta' Kjoto. Dan jinkludi l-emissjonijiet kollha minn fonti u assorbimenti minn bjar minn attivitajiet ta' użu tal-art, tibdil fl-użu tal-art u forestrija (LULUCF) ikkawżati mill-bniedem koperti mill-Artikolu 3(3) u (4) tal-Protokoll ta' Kjoto, li huma koperti mill-Istati Membri rispettivi u l-Islanda, kif ukoll l-emissjonijiet tat-trifluworur tan-nitroġenu (NF3). |
(14) |
Kwalunkwe emissjoni mil-LULUCF u mill-NF3 fi Stat Membru jistgħu jkunu kkumpensati permezz ta' eċċess fil-prestazzjoni ta' dak l-Istat Membru f'setturi oħra mhux koperti taħt l-Iskema għall-Iskambju ta' Kwoti tal-Emissjonijiet tal-Unjoni jew permezz tal-użu tal-mekkaniżmi flessibbli tal-Protokoll ta' Kjoto. Stat Membru jista' wkoll juża drittijiet ta' emissjonijiet żejda riportati mill-ewwel perijodu ta' impenn miżmuma f' Riżerva Żejda mill-Perijodu Preċedenti (PPSR) biex ikopri l-emissjonijiet mil-LULUCF u mill-NF3, sa fejn l-emissjonijiet tiegħu jaqbżu l-ammont assenjat lilu. Jekk ikun ċar li Stat Membru individwali jkun għadu qed jiffaċċja emissjonijiet netti sinifikanti mhux mistennija mil-LULUCF u mill-NF3, minkejja li jkun qiegħed jimplimenta politiki b'saħħithom biex jillimitahom, il-Kummissjoni għandha tikkunsidra għażliet oħrajn biex tgħin lil tali Stat Membru. |
(15) |
F'konformità mal-Konklużjonijiet tal-Kunsill tad-9 ta' Marzu 2012 u l-offerta tal-Unjoni u l-Istati Membri tagħha li jadottaw mira ta' 80 % skont it-tieni perijodu ta' impenn, il-livelli tal-emissjonijiet tal-Istati Membri huma ekwivalenti għall-ammont tal-allokazzjonijiet annwali tal-emissjonijiet għall-perijodu mill-2013 sal-2020 kif iddeterminat skont id-Deċiżjoni Nru 406/2009/KE tal-Parlament Ewropew u tal-Kunsill (5). Dak l-ammont, ibbażat fuq il-valuri tal-potenzjal ta' tisħin globali mir-Raba' Rapport ta' Valutazzjoni tal-Grupp ta' Esperti Intergovernattiv dwar it-Tibdil fil-Klima, ġie ddeterminat taħt l-Anness II tad-Deċiżjoni tal-Kummissjoni 2013/162/UE (6) u aġġustat mid-Deċiżjoni ta' Implimentazzjoni tal-Kummissjoni 2013/634/UE (7). Il-livell tal-emissjonijiet għall-Islanda ġie ddeterminat fil-Ftehim mal-Islanda. |
(16) |
F'konformità mal-premessa 11, l-unitajiet tal-ammont assenjat disponibbli fir-reġistru tal-Unjoni fl-aħħar tat-tieni perijodu ta' impenn għandhom jirritornaw fir-reġistri tal-Istati Membri wara li l-Unjoni tkun ikkonformat mal-obbligu tagħha stabbilit fl-Artikolu 11(3) tar-Regolament (UE) Nru 525/2013 tal-Parlament Ewropew u tal-Kunsill (8) u mingħajr preġudizzju għall-Artikolu 10(7) ta' dak ir-Regolament. L-allokazzjoni tal-unitajiet tal-ammont assenjat li jiġu rritornati tindirizza ċ-ċirkostanzi uniċi tar-ratifika tal-Emenda ta' Doha, u mhijiex applikabbli għal, u ma tippreġudikax, kwalunkwe distribuzzjoni ta' sforzi fost l-Istati Membri f'kuntesti oħra, la fil-livell internazzjonali u lanqas f'dak tal-Unjoni. |
(17) |
Skont ir-Regolament (UE) Nru 525/2013, l-Istati Membri huma mitluba jirrappurtaw l-allokazzjoni attwali jew stmata tal-emissjonijiet ivverifikati rrappurtati minn installazzjonijiet u operaturi skont id-Direttiva 2003/87/KE għall-kategoriji tas-sors tal-inventarju nazzjonali tal-gass b'effett ta' serra, meta possibbli, u l-proporzjon ta' dawk l-emissjonijiet ivverifikati mqabbel mal-ammont totali tal-emissjonijiet ta' gass b'effett ta' serra rrappurtati fil-kategoriji tas-sorsi. Dan jippermetti li l-Istati Membri jirrappurtaw b'mod separat dwar l-emissjonijiet koperti mil-livelli ta' emissjonijiet proprji tagħhom. It-taqsima dwar l-ammont assenjat lill-Unjoni fir-rapport tal-Unjoni għandha tidentifika l-ammont tal-emissjonijiet koperti bl-ammont assenjat tal-Unjoni li jkun seħħ f'kull Stat Membru. |
(18) |
Il-Konferenza tal-Partijiet li sservi bħala laqgħa tal-Partijiet għall-Protokoll ta' Kjoto ddeċidiet li sal-15 ta' April 2015, kull Parti b'impenn elenkat fit-tieni perijodu ta' impenn għandha tippreżenta rapport lis-Segretarjat tal-Konvenzjoni, sabiex tiffaċilita l-kalkolu tal-ammont assenjat. Il-Kummissjoni għandha tħejji rapport biex tiffaċilita l-kalkolu tal-ammont assenjat tal-Unjoni, u rapport biex tiffaċilita l-kalkolu tal-ammont konġunt assenjat tal-Unjoni, l-Istati Membri tagħha u l-Islanda. Il-Kummissjoni, l-Istati Membri u l-Islanda għandhom jippreżentaw ir-rapporti tagħhom sal-15 ta' April 2015, li ser jiddetermina l-ammonti assenjati lilhom bħala ekwivalenti għal-livelli tal-emissjonijiet tagħhom kif elenkati fl-Anness II ta' din id-Deċiżjoni. |
(19) |
Sabiex ikun enfasizzat l-impenn tal-Unjoni u l-Istati Membri tagħha għal dħul fis-seħħ f'waqtu tal-Emenda ta' Doha, l-Unjoni, l-Istati Membri tagħha u l-Islanda għandhom jagħmlu ħilithom biex jirratifikawha sa mhux aktar tard mit-tielet trimestru tal-2015. |
(20) |
L-Emenda ta' Doha għandha tiġi approvata f'isem l-Unjoni, |
ADOTTA DIN ID-DEĊIŻJONI:
Artikolu 1
L-Emenda ta' Doha għall-Protokoll ta' Kjoto għall-Konvenzjoni Qafas tan-Nazzjonijiet Uniti dwar it-Tibdil fil-Klima li dwarha sar ftehim fit-8 ta' Diċembru 2012 f'Doha hija b'dan approvata f'isem l-Unjoni.
It-test tal-Emenda ta' Doha huwa mehmuż ma' din id-Deċiżjoni.
Artikolu 2
L-Unjoni u l-Istati Membri tagħha għandhom jissodisfaw l-impenji tagħhom skont l-Artikolu 3 tal-Protokoll ta' Kjoto u l-Emenda ta' Doha f'konformità man-notifika tat-termini tal-ftehim ta' twettiq konġunt tal-impenji tal-Unjoni Ewropea, l-Istati Membri tagħha u l-Islanda skont l-Artikolu 3 tal-Protokoll ta' Kjoto f'konformità mal-Artikolu 4 tal-Protokoll ta' Kjoto (“in-Notifika”), li tinsab fl-Anness I ta' din id-Deċiżjoni.
Artikolu 3
1. L-ammonti assenjati għall-Istati Membri u l-Islanda għandhom ikunu ekwivalenti għal-livelli tal-emissjonijiet stipulati fin-Notifika. Sal-15 ta' April 2015, kull Stat Membru għandu jressaq rapport lis-Segretarjat tal-Konvenzjoni biex jiġi ffaċilitat il-kalkolu tal-ammont assenjat lilu, f'konformità mar-rekwiżiti tal-Protokoll ta' Kjoto, l-Emenda ta' Doha u d-deċiżjonijiet adottati skont dawn.
2. Il-Kummissjoni għandha tħejji rapport biex tiffaċilita l-kalkolu tal-ammont assenjat tal-Unjoni, u rapport biex tiffaċilita l-kalkolu tal-ammont konġunt assenjat tal-Unjoni, l-Istati Membri tagħha u l-Islanda (“l-ammont konġunt assenjat”), f'konformità mar-rekwiżiti tal-Protokoll ta' Kjoto, l-Emenda ta' Doha u d-deċiżjonijiet adottati skont dawn. Il-Kummissjoni għandha tippreżenta dan ir-rapport lis-Segretarjat tal-Konvenzjoni sal-15 ta' April 2015.
Artikolu 4
1. L-unitajiet kollha tal-ammont assenjat maħruġa għat-tieni perijodu ta' impenn li jkunu disponibbli fir-reġistru tal-Unjoni wara li l-Unjoni tkun ikkonformat mal-obbligu tagħha stabbilit fl-Artikolu 11(3) tar- Regolament (UE) Nru 525/2013 u wara li jkun sar kwalunkwe trasferiment ta' unitajiet ta' ammont assenjat skont atti ta' implimentazzjoni adottati abbażi tal-Artikolu 10(7) tar-Regolament (UE) Nru 525/2013 (“eċċess tal-Unjoni”) għandhom jiġu rritornati lill-Istati Membri fi tmiem it-tieni perijodu ta' impenn.
2. L-eċċess tal-Unjoni għandu jiġi allokat lill-Istati Membri kif ġej:
(a) |
wieħed minn sitta tal-eċċess tal-Unjoni għal Stati Membri li naqqsu l-emissjonijiet annwali medji totali tagħhom b'aktar minn 20 % relattivament għas-sena bażi individwali tagħhom jew il-perijodu taħt il-Protokoll ta' Kjoto sal-aħħar tat-tieni perijodu ta' impenn proporzjonalment għas-superament tal-objettivi tagħhom f'tunnellati; |
(b) |
terz tal-eċċess tal-Unjoni għal Stati Membri li jirċievu trasferiment taħt il-punt (a) u li jkollhom PDG per capita (skont il-PDG fl-2013 f'euro bil-prezzijiet tas-suq) taħt is-60 % tal-medja tal-Unjoni proporzjonalment għas-superament tal-objettivi tagħhom f'tunnellati; |
(c) |
terz tal-eċċess tal-Unjoni għall-Istati Membri kollha proporzjonalment għal-livelli ta' emissjonijiet totali tagħhom kif stabbilit fit-Tabella 1 fl-Anness I ta' din id-Deċiżjoni; |
(d) |
wieħed minn sitta tal-eċċess tal-Unjoni għal Stati Membri li jkollhom PDG per capita (skont il-PDG fl-2013 f'euro bil-prezzijiet tas-suq) taħt id-90 % tal-medja tal-Unjoni proporzjonalment għal-livelli ta' emissjonijiet totali tagħhom kif stabbilit fit-Tabella 1 fl-Anness I ta' din id-Deċiżjoni. |
Artikolu 5
1. Il-President tal-Kunsill għandu jaħtar il-persuna jew persuni bis-setgħa li jiddepożitaw, f'isem l-Unjoni, l-istrument ta' aċċettazzjoni mas-Segretarju Ġenerali tan-Nazzjonijiet Uniti f'konformità mal-Artikoli 20(4) u 21(7) tal-Protokoll ta' Kjoto, flimkien ma' dikjarazzjoni tal-kompetenza li tinsab fl-Anness II ta' din id-Deċiżjoni, f'konformità mal-Artikolu 24(3) tal-Protokoll ta' Kjoto.
2. Il-President tal-Kunsill għandu wkoll jaħtar il-persuna jew persuni bis-setgħa li jippreżentaw, f'isem l-Unjoni, in-Notifika lis-Segretarjat tal-Konvenzjoni f'konformità mal-Artikolu 4(2) tal-Protokoll ta' Kjoto.
Artikolu 6
1. L-Istati Membri għandhom jagħmlu ħilithom sabiex jieħdu l-passi kollha meħtieġa bil-ħsieb li jiddepożitaw l-istrumenti ta' aċċettazzjoni tagħhom simultanjament mal-istrument ta' aċċettazzjoni tal-Unjoni, u sa fejn possibbli fit-tielet trimestru tal-2015. Meta jiddepożitaw l-istrumenti ta' aċċettazzjoni tagħhom, l-Istati Membri għandhom jinnotifikaw, f'isimhom stess, in-Notifika lis-Segretarjat tal-Konvenzjoni f'konformità mal-Artikolu 4(2) tal-Protokoll ta' Kjoto.
2. L-Istati Membri għandhom jinfurmaw lill-Kummissjoni qabel it-tielet sessjoni tal-Grupp ta' Ħidma Ad Hoc dwar il-Pjattaforma ta' Durban għal Azzjoni Msaħħa li għandha ssir mit-8 sat-13 ta' Frar 2015, bid-deċiżjonijiet tagħhom li jaċċettaw l-Emenda ta' Doha jew, skont iċ-ċirkostanzi, bid-data probabbli tat-tlestija tal-proċeduri meħtieġa għal tali aċċettazzjoni. F'koperazzjoni mal-Istati Membri, il-Kummissjoni għandha ssib data li fiha l-istrumenti ta' approvazzjoni jew ta' aċċettazzjoni jiġu ddepożitati simultanjament.
Artikolu 7
Din id-Deċiżjoni hija indirizzata lill-Istati Membri.
Artikolu 8
Din id-Deċiżjoni għandha tidħol fis-seħħ fit-tielet jum wara dak tal-pubblikazzjoni tagħha f'Il-Ġurnal Uffiċjali tal-Unjoni Ewropea.
Magħmul fi Brussell, it-13 ta' Lulju 2015.
Għall-Kunsill
Il-President
F. ETGEN
(1) Kunsens tal-10 ta' Ġunju 2015 (għadu mhuwiex ippubblikat fil-ĠU).
(2) Direttiva 2009/29/KE tal-Parlament Ewropew u tal-Kunsill tat-23 ta' April 2009 li temenda d-Direttiva 2003/87/KE għat-titjib u l-estensjoni tal-iskema Komunitarja għall-iskambju ta' kwoti ta' emissjonijiet ta' gassijiet serra (ĠU L 140, 5.6.2009, p. 63) u d-Deċiżjoni Nru 406/2009/KE tal-Parlament Ewropew u tal-Kunsill tat-23 ta' April 2009 dwar l-isforz tal-Istati Membri biex inaqqsu l-emissjonijiet tagħhom tal-gassijiet serra biex jonoraw l-impenji tal-Komunità għat-tnaqqis tal-emissjonijiet tal-gassijiet serra sal-2020 (ĠU L 140, 5.6.2009, p. 136).
(3) Ara paġna 17 ta' dan il-Ġurnal Uffiċjali.
(4) Direttiva 2003/87/KE tal-Parlament Ewropew u tal-Kunsill tat-13 ta' Ottubru 2003 li tistabbilixxi skema għall-iskambju ta' kwoti ta' emissjonijiet ta' gassijiet serra ġewwa l-Komunità u li temenda d-Direttiva tal-Kunsill 96/61/KE (ĠU L 275, 25.10.2003, p. 32).
(5) Deċiżjoni Nru 406/2009/KE tal-Parlament Ewropew u tal-Kunsill tat-23 ta' April 2009 dwar l-isforz tal-Istati Membri biex inaqqsu l-emissjonijiet tagħhom tal-gassijiet serra biex jonoraw l-impenji tal-Komunità għat-tnaqqis tal-emissjonijiet tal-gassijiet serra sal-2020 (ĠU L 140, 5.6.2009, p. 136).
(6) Deċiżjoni tal-Kummissjoni 2013/162/UE tas-26 ta' Marzu 2013 dwar kif għandhom jiġu ddeterminati l-unitajiet tal-allokazzjoni ta' emissjonijiet annwali tal-Istati Membri għall-perijodu mill-2013 sal-2020 skont id-Deċiżjoni Nru 406/2009/KE tal-Parlament Ewropew u tal-Kunsill (ĠU L 90, 28.3.2013, p. 106).
(7) Deċiżjoni ta' Implimentazzjoni tal-Kummissjoni 2013/634 tal-31 ta' Ottubru 2013 dwar l-aġġustamenti fl-allokazzjonijiet annwali tal-emissjonijiet għall-perijodu mill-2013 sal-2020 skont id-Deċiżjoni Nru 406/2009/KE tal-Parlament Ewropew u tal-Kunsill (ĠU L 292, 1.11.2013, p. 19).
(8) Regolament (UE) Nru 525/2013 tal-Parlament Ewropew u tal-Kunsill tal-21 ta' Mejju 2013 dwar mekkaniżmu għall-monitoraġġ u r-rapportar ta' emissjonijiet ta' gassijiet serra u għar-rapportar ta' informazzjoni oħra relatata mat-tibdil fil-klima fil-livelli nazzjonali u tal-Unjoni u li jħassar id-Deċiżjoni Nru 280/2004/KE (ĠU L 165, 18.6.2013, p. 13).