This document is an excerpt from the EUR-Lex website
Document 32014R0526
Commission Delegated Regulation (EU) No 526/2014 of 12 March 2014 supplementing Regulation (EU) No 575/2013 of the European Parliament and of the Council with regard to regulatory technical standards for determining proxy spread and limited smaller portfolios for credit valuation adjustment risk Text with EEA relevance
Regolament ta' Delega tal-Kummissjoni (UE) Nru 526/2014 tat- 12 ta' Marzu 2014 li jissupplimenta r-Regolament (UE) Nru 575/2013 tal-Parlament Ewropew u tal-Kunsill fir-rigward ta' standards tekniċi regolatorji għad-determinazzjoni ta' firxa ta' approssimazzjoni indiretta u portafolli iżgħar limitati għar-riskju tal-aġġustament tal-valwazzjoni tal-kreditu Test b'rilevanza għaż-ŻEE
Regolament ta' Delega tal-Kummissjoni (UE) Nru 526/2014 tat- 12 ta' Marzu 2014 li jissupplimenta r-Regolament (UE) Nru 575/2013 tal-Parlament Ewropew u tal-Kunsill fir-rigward ta' standards tekniċi regolatorji għad-determinazzjoni ta' firxa ta' approssimazzjoni indiretta u portafolli iżgħar limitati għar-riskju tal-aġġustament tal-valwazzjoni tal-kreditu Test b'rilevanza għaż-ŻEE
ĠU L 148, 20.5.2014, p. 17–20
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
20.5.2014 |
MT |
Il-Ġurnal Uffiċjali tal-Unjoni Ewropea |
L 148/17 |
REGOLAMENT TA' DELEGA TAL-KUMMISSJONI (UE) Nru 526/2014
tat-12 ta' Marzu 2014
li jissupplimenta r-Regolament (UE) Nru 575/2013 tal-Parlament Ewropew u tal-Kunsill fir-rigward ta' standards tekniċi regolatorji għad-determinazzjoni ta' firxa ta' approssimazzjoni indiretta u portafolli iżgħar limitati għar-riskju tal-aġġustament tal-valwazzjoni tal-kreditu
(Test b'rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) Nru 575/2013 tal-Parlament Ewropew u tal-Kunsill tas-26 ta' Ġunju 2013 dwar ir-rekwiżiti prudenzjali għall-istituzzjonijiet ta' kreditu u d-ditti tal-investiment u li jemenda r-Regolament (UE) Nru 648/2012, u partikolarment it-tielet subparagrafu tal-Artikolu 383(7) tiegħu,
Billi:
(1) |
L-applikazzjoni ta' metodu avvanzat għad-determinazzjoni ta' rekwiżiti ta' fondi proprji għar-riskju tal-Aġġustament tal-Valwazzjoni tal-Kreditu (CVA) jista' jkun li tinvolvi kontropartijiet li ma jkollhom l-ebda firxa ta' Swap ta' Inadempjenza tal-Kreditu (CDS). Fejn dan ikun il-każ, l-istituzzjonijiet għandhom jużaw firxa li hija xierqa fir-rigward tal-klassifikazzjoni, l-industrija u r-reġjun tal-kontroparti (“firxa ta' approssimazzjoni indiretta”) skont it-tielet subparagrafu tal-Artikolu 383(1) tar-Regolament (UE) Nru 575/2013. |
(2) |
Ir-regoli dwar id-determinazzjoni tal-firxa ta' approssimazzjoni indiretta għar-riskju ta' CVA għandhom jipprevedu l-użu ta' kategoriji wiesgħa tal-klassifikazzjoni, l-industrija u r-reġjun, u għandhom jippermettu lill-istituzzjonijiet il-flessibbiltà neċessarja biex jiddeterminaw l-aktar firxa ta' approssimazzjoni indiretta xierqa skont il-ġudizzju espert tagħhom. |
(3) |
Fl-ispeċifikazzjoni aktar dettaljata ta' kif l-attributi tal-klassifikazzjoni, l-industrija u r-reġjun tal-emittenti uniċi għandhom jiġu kkunsidrati mill-istituzzjonijiet fl-istima tal-firxa ta' approssimazzjoni indiretta xierqa għad-determinazzjoni tar-rekwiżiti tal-fondi proprji, kif meħtieġ mir-Regolament (UE) Nru 575/2013, għandhom jiġu stabbiliti regoli għal konsiderazzjoni ta' dawn l-attributi b'referenza għall-kategoriji minimi għal kull attribut, sabiex tkun żgurata applikazzjoni armonizzata ta' dawn il-kundizzjonijiet. |
(4) |
Barra minn hekk, fil-każ ta' emittent uniku, fejn tkun teżisti konnessjoni, bħal bejn gvern reġjonali jew awtorità lokali u s-sovran, għandu jkun possibbli li ssir stima ta' firxa ta' approssimazzjoni indiretta xierqa fuq il-bażi tal-firxa tal-kreditu ta' emittent uniku, fejn dan iwassal għal stima aktar xierqa. |
(5) |
Sabiex iwasslu għal komputazzjoni xierqa tar-riskju ta' ħlas ta' CVA, għandha tiġi determinata firxa ta' approssimazzjoni indiretta permezz tad-dejta li ġiet osservata f'suq likwidu u s-suppożizzjonijiet fir-rigward tad-dejta, bħall-interpolazzjoni u l-estrapolazzjoni tad-dejta li tirrelata ma' maturitajiet differenti, għandhom ikunu konċettwalment sodi. |
(6) |
Sabiex tiġi żgurata l-konverġenza tal-prattiki fost l-istituzzjonijiet u sabiex jiġu evitati inkonsistenzi, meta wieħed iqis il-probabbiltajiet implikati ta' inadempjenza (“PDs”), il-firxiet tal-Iswaps ta' Inadempjenza tal-Kreditu (“CDS”) u t-telf fil-każ ta' inadempjenza (“LGD”) jikkostitwixxu ekwazzjoni waħda b'żewġ fatturi varjabbli mhux magħrufa u li l-konvenzjoni tas-suq hija li jintuża valur fiss għal LGD sabiex jinħarġu PDs implikati minn firxiet tas-suq, l-istituzzjonijiet għandhom jużaw valur għal “LGDMKT” li huwa konsistenti ma' LGD fiss li huma komunement użati minn parteċipanti fis-suq għad-determinazzjoni tal-PDs implikati minn dawk il-firxiet ta' kreditu likwidu negozjati li ntużaw biex tiġi ddeterminata l-firxa ta' kredit ta' approssimazzjoni indiretta għall-kontroparti inkwistjoni. |
(7) |
Għall-finijiet tal-permess għall-użu tal-metodu CVA avvanzat għal numru limitat ta' portafolli iżgħar, huwa xieraq li jiġi kkunsidrat portafoll bħala sett ta' netting kif definit fl-Artikolu 272(4) tar-Regolament (UE) Nru 575/2013 in-numru tat-tranżazzjonijiet tal-metodu tal-mudell mhux intern (“IMM”) soġġett għar-riskju ta' ħlas CVA u d-daqs ta' settijiet ta' netting mhux IMM soġġetti għar-riskju ta' ħlas CVA, u biex dawn jitnaqqsu f'termini ta' perċentwal tal-għadd totali tat-tranżazzjonijiet kollha soġġetti għar-riskju ta' ħlas CVA u perċentwal tad-daqs totali tas-settijiet kollha tan-netting soġġetti għall-kalkolu tar-riskju ta' ħlas CVA, sabiex jitqiesu d-dimensjonijiet differenti tal-istituzzjonijiet. |
(8) |
Sabiex jittaffew in-nuqqasijiet fil-kontinwità possibbli fl-użu tal-metodu CVA avvanzat għal numru limitat ta' portafolli iżgħar, l-użu tal-metodu CVA avvanzat għandu jitwaqqaf biss meta jinkisru l-limiti kwantitattivi għal żewġ trimestri konsekuttivi |
(9) |
Barra minn hekk, sabiex jagħmluha possibbli għall-awtoritajiet kompetenti li jwettqu d-dmirijiet tagħhom ta' sorveljanza b'mod effiċjenti, huma għandhom ikunu kapaċi jagħrfu meta l-ħtieġa ta' għadd limitat ta' portafolli iżgħar ma tibqax tiġi sodisfatta; għalhekk l-istituzzjonijiet għandhom jinnotifikaw l-awtoritajiet kompetenti f'dawk il-każijiet. |
(10) |
Dan ir-Regolament huwa bbażat fuq l-abbozz tal-istandards tekniċi regolatorji ppreżentati mill-Awtorità Bankarja Ewropea lill-Kummissjoni. |
(11) |
L-Awtorità Bankarja Ewropea wettqet konsultazzjonijiet pubbliċi miftuħa dwar l-abbozz tal-istandards tekniċi regolatorji li fuqhom huwa bbażat dan ir-Regolament, analizzat il-kostijiet u l-benefiċċji potenzjali relatati u talbet l-opinjoni tal-Grupp tal-Partijiet Bankarji Interessati stabbilit skont l-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (1), |
ADOTTAT DAN IR-REGOLAMENT:
Artikolu 1
Id-determinazzjoni ta' firxa ta' approssimazzjoni indiretta xierqa
1. Il-firxa ta' approssimazzjoni xierqa għal kontroparti partikolari tkun meqjusa xierqa wara li jitqiesu l-klassifikazzjoni, l-industrija u r-reġjun tal-kontroparti skont ir-raba' subparagrafu tal-Artikolu 383(1) tar-Regolament (UE) Nru 575/2013, fejn ikunu ssodisfati l-kundizzjonijiet li ġejjin:
(a) |
il-firxa ta' approssimazzjoni indiretta ġiet determinata billi tqiesu l-attributi kollha tal-klassifikazzjoni, l-industrija u r-reġjun tal-kontroparti kif speċifikat fil-punti (b), (c) u (d); |
(b) |
l-attribut tal-klassifikazzjoni ġie definit billi tqies l-użu ta' ġerarkija predeterminata ta' sorsi ta' klassifikazzjonijiet interni u esterni. Il-klassifikazzjonijiet jiġu mmappjati għal passi ta' kwalità ta' kreditu, kif imsemmi fl-Artikolu 384(2) tar-Regolament (UE) Nru 575/2013. F'każijiet fejn bosta klassifikazzjonijiet esterni huma disponibbli l-immappjar tagħhom tal-passi tal-kwalità tal-kreditu għandu jsegwi l-approċċ ta diversi valutazzjonijiet ta' kreditu stabbiliti fl-Artikolu 138 ta' dak ir-Regolament; |
(c) |
L-attribut tal-industrija ġie determinat billi tqiesu minn tal-inqas il-kategoriji li ġejjin:
|
(d) |
l-attribwit tar-reġjun ġie determinat billi tqiesu minn tal-inqas il-kategoriji li ġejjin:
|
(e) |
il-firxa ta' approssimazzjoni indiretta tirrifletti b'mod rappreżentattiv firxiet ta' inadempjenza tal-kreditu disponibbli u firxiet ta' kreditu negozjat likwidi oħra, li jikkorrispondu għall-istrument ta' riskju rilevanti ta' kategoriji applikabbli u li jissodisfa l-kriterji tal-kwalità tad-dejta, imsemmija fil-paragrafu 3; |
(f) |
kemm tkun xierqa l-firxa ta' approssimazzjoni indiretta jiġi ddeterminat b'referenza għall-volatilità aktar milli għal-livell tal-firxa. |
2. Waqt li jkunu qed jitqiesu l-attributi tal-klassifikazzjoni, l-industrija u r-reġjun tal-kontroparti skont il-paragrafu 1, l-istima tal-firxa ta' approssimazzjoni indiretta għandha tkun ikkunsidrata xierqa għal gvern reġjonali jew awtorità lokali abbażi tal-firxa ta' kreditu tal-emittenti sovran rilevanti meta xi waħda mill-kundizzjonijiet li ġejjin ikunu ssodisfati:
(a) |
il-gvern reġjonali jew l-awtorità lokali u s-sovran jkollhom l-istess klassifikazzjoni; |
(b) |
ma hemm l-ebda klassifikazzjoni għall-gvern reġjonali jew l-awtorità lokali. |
3. L-inputs kollha użati fid-determinazzjoni ta' firxa ta' approssimazzjoni indiretta jkunu bbażati fuq dejta affidabbli osservata fuq suq likwidu bidirezzjonali kif definit fit-tieni subparagrafu tal-Artikolu 338(1) tar-Regolament (UE) Nru 575/2013. Għandu jkun hemm biżżejjed dejta disponibbli biex jiġu ġenerati firxiet ta' approssimazzjoni indiretta għall-maturitajiet rilevanti kollha u għall-perjodi storiċi msemmija fl-Artikolu 383(5) ta' dak ir-Regolament.
Artikolu 2
Identifikazzjoni ta' LGDMKT
Sabiex jiġi identifikat it-telf fil-każ ta' inadempjenza tal-kontroparti (LGDMKT) għall-finijiet tal-kalkolu tar-rekwiżiti ta' fondi proprji għar-riskju ta' CVA skont il-metodu avvanzat għal kontroparti li teħtieġ l-użu ta' firxa ta' approssimazzjoni indiretta, l-istituzzjonijiet jużaw il-valur għal LGDMKT li huwa konsistenti mal-LGDs fissi komunement użati minn parteċipanti fis-suq għad-determinazzjoni ta' PDs implikati minn dawk il-firxiet tas-suq li ntużaw biex tiġi determinata l-firxa ta' approssimazzjoni indiretta għall-kontroparti inkwistjoni skont l-Artikolu 1.
Artikolu 3
Limiti kwantitattivi fuq l-għadd u d-daqs tal-portafolli kwalifikanti
1. Biex jiġi ssodisfat il-kriterju ta' għadd limitat ta' portafolli iżgħar imsemmi fl-Artikolu 383(4) tar-Regolament (UE) Nru 575/2013, il-kondizzjonijiet kollha li ġejjin għandhom ikunu ssodisfati:
(a) |
in-numru ta' kull tranżazzjoni mhux IMM soġġetta għar-riskju ta' ħlas CVA ma jaqbiżx il-15 % tal-għadd totali ta' tranżazzjonijiet soġġetti għal ħlas ta' riskju ta' CVA; |
(b) |
id-daqs ta' kull sett ta' netting mhux IMM individwali soġġett għar-riskju ta' CVA ma jaqbiżx il-1 % tad-daqs totali tas-settijiet tan-netting kollha soġġetti għal ħlas ta' riskju ta' CVA; |
(c) |
id-daqs totali ta' settijiet ta' netting mhux IMM kollha soġġetti għar-riskju ta' CVA ma jaqbiżx l-10 % tad-daqs totali tas-settijiet tan-netting kollha soġġetti għar-riskju ta' CVA. |
2. Għall-finijiet tal-punti (b) u (c) tal-paragrafu 1, id-daqs ta' settijiet ta' netting għandu jkun l-iskopertura fl-inadempjenza tas-sett ta' netting ikkalkulat li juża l-metodu skont il-valur fis-suq msemmi fl-Artikolu 274 tar-Regolament (UE) Nru 575/2013 billi jqis l-effetti tan-netting, skont l-Artikolu 298 ta' dak ir-Regolament, iżda mhux l-effetti tal-kollateral.
3. Għall-iskop tal-paragrafu 1, l-istituzzjoni tikkalkula, għal kull trimestu, il-medja aritmetika,mill-inqas, tal-kummenti darba fix-xahar tal-proporzjonijiet ta' dawn li ġejjin:
(a) |
l-għadd ta' tranżazzjonijiet non-IMM man-numru totali ta' tranżazzjonijiet; |
(b) |
id-daqs individwali tal-akbar sett ta' netting mhux IMM mad-daqs totali tas-settijiet tan-netting kollha; kif ukoll |
(c) |
id-daqs totali tas-settijiet tan-netting mhux IMM mad-daqs totali tas-settijiet tan-netting kollha. |
4. Jekk il-kriterju speċifikat fil-paragrafu 1 mhuwiex issodisfat għal żewġ kalkoli konsekuttivi msemmija fil-paragrafu 3, l-istituzzjoni tuża l-metodu standardizzat stabbilit fl-Artikolu 384 tar-Regolament (UE) Nru 575/2013 biex jiġu kkalkulati r-rekwiżiti ta' fondi proprji għar-riskju ta' CVA għal kull sett ta' netting mhux IMM u jinnotifikaw lill-awtoritajiet kompetenti.
5. Il-kondizzjonijiet stabbiliti fil-paragrafu 1 għandhom ikunu applikati fuq bażi individwali, bażi konsolidata jew subkonsolidata, skont il-kamp ta' applikazzjoni tal-permess sabiex jintuża l-metodu tal-mudell intern imsemmi fl-Artikolu 283 tar-Regolament (UE) Nru 575/2013.
Artikolu
Dħul fis-seħħ
Dan ir-Regolament jidħol fis-seħħ fl-għoxrin jum wara l-pubblikazzjoni tiegħu f'Il-Ġurnal Uffiċjali tal-Unjoni Ewropea.
Dan ir-Regolament jorbot fl-intier tiegħu u japplika direttament fl-Istati Membri kollha.
Magħmul fi Brussell, it-12 ta' Marzu 2014.
Għall-Kummissjoni
Il-President
José Manuel BARROSO
(1) Ir-Regolament (UE) Nru 1093/2010 tal-Parlament Ewropew u tal-Kunsill tal-24 ta' Novembru 2010 li jistabbilixxi Awtorità Superviżorja Ewropea (Awtorità Bankarja Ewropea) u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/78/KE (ĠU L 331, 15.12.2010, p. 12)