28.11.2014   

MT

Il-Ġurnal Uffiċjali tal-Unjoni Ewropea

L 343/19

(1)

Skont l-Artikolu 11(1) u (2) tat-Trattat dwar l-Unjoni Ewropea (TUE), l-istituzzjonijiet iridu, b'mezzi xierqa, jagħtu liċ-ċittadini u lill-assoċjazzjonijiet rappreżentattivi l-opportunità li jesprimu u jaqsmu pubblikament l-opinjonijiet tagħhom fl-oqsma kollha tal-azzjoni tal-Unjoni. L-istituzzjonijiet huma meħtieġa wkoll iżommu djalogu miftuħ, trasparenti u regolari mal-assoċjazzjonijiet rappreżentattivi u mas-soċjetà ċivili. Minbarra dan, skont l-Artikolu 2 tal-Protokoll Nru 2 dwar l-applikazzjoni tal-prinċipji tas-sussidjarjetà u l-proporzjonalità, u mal-Artikolu 11(3) tat-TUE, il-Kummissjoni għandha tikkonsulta b'mod wiesa' qabel tipproponi atti leġiżlattivi.

(2)

F'konformità mal-Artikolu 298 tat-TFUE, fit-twettiq tal-missjonijiet tagħhom, l-istituzzjonijiet, il-korpi, l-uffiċċji u l-aġenziji tal-Unjoni għandu jkollhom l-appoġġ ta' amministrazzjoni Ewropea miftuħa, effiċjenti u indipendenti.

(3)

Il-Kummissjoni hija impenjata li ssaħħaħ it-trasparenza dwar il-kuntatti bejn il-persunal tagħha u organizzazzjonijiet jew individwi li jaħdmu għal rashom.

(4)

Iċ-ċittadini diġà għandhom id-dritt tal-aċċess għal dokumenti tal-istituzzjonijiet kif stipulat fir-Regolament (KE) Nru 1049/2001 tal-Parlament Ewropew u tal-Kunsill (1). Din id-Deċiżjoni ma tikkonċernax l-aċċess għad-dokumenti jew l-applikazzjoni tar-Regolament (KE) Nru 1049/2001.

(5)

Fil-25 ta' Novembru 2014 il-Kummissjoni, filwaqt li segwiet il-Linji Gwida Politiċi tal-15 ta' Lulju 2014 stabbiliti mill-President, adottat id-Deċiżjoni 2014/839/UE, Euratom (2) fejn il-Membri tal-Kummissjoni kienu meħtieġa li jagħmlu pubblika l-informazzjoni dwar laqgħat li jkollhom huma u membri tal-Kabinett tagħhom ma' organizzazzjonijiet jew individwi li jaħdmu għal rashom dwar kwistjonijiet li jirrigwardaw it-tfassil u l-implimentazzjoni tal-politika fl-Unjoni.

(6)

Id-Diretturi Ġenerali tal-Kummissjoni jista' jkollhom laqgħat ma' organizzazzjonijiet jew individwi li jaħdmu għal rashom għal raġunijiet smili bħal-laqgħat imsemmija f'din id-Deċiżjoni. Huwa għalhekk xieraq li jiġu applikati rekwiżiti ta' trasparenza simili għal dawn il-laqgħat.

(7)

Id-Direttorati Ġenerali tal-Kummissjoni għandhom għalhekk jagħmlu pubblika l-informazzjoni dwar il-laqgħat li jkollhom huma ma' organizzazzjonijiet jew individwi li jaħdmu għal rashom dwar kwistjonijiet relatati mat-teħid tad-deċiżjonijiet u l-implimentazzjoni tal-politika fl-Unjoni.

(8)

Laqgħat ma' rappreżentanti ta' istituzzjonijiet jew korpi oħra tal-Unjoni, li jirriflettu l-kors normali tar-relazzjonijiet interistituzzjonali, mhumiex koperti minn din id-Deċiżjoni. Laqgħat ma' rappreżentanti tal-awtoritajiet pubbliċi tal-Istati Membri mhumiex koperti minn din id-Deċiżjoni billi dawn l-awtoritajiet isegwu l-interess ġenerali u jikkontribwixxu għall-ħidma tal-Kummissjoni skont il-prinċipju tal-kooperazzjoni sinċiera. Sabiex jitħarsu r-relazzjonijiet internazzjonali tal-Unjoni, laqgħat ma' rappreżentanti tal-awtoritajiet pubbliċi ta' pajjiżi terzi u ta' organizzazzjonijiet internazzjonali mhumiex koperti minn din id-Deċiżjoni preżenti.

(9)

Sabiex tirrispetta l-karattru speċifiku tad-djalogu mal-partijiet soċjali, previst fl-Artikolu 154 tat-TFUE, kif ukoll il-karattru speċifiku tad-djalogu mal-knejjes u l-organizzazzjonijiet filosofiċi u mhux konfessjonali, previst fl-Artikolu 17(3) tat-TFUE, il-laqgħat li jsiru f'dawn il-kuntesti ma għandhomx ikunu koperti minn din id-Deċiżjoni.

(10)

Fid-dawl tar-rwol speċifiku tal-partiti politiċi rikonoxxuti mill-Artikolu 10(4) tat-TUE, u fid-dawl tal-fatt li l-Ftehim Interistituzzjonali bejn il-Parlament Ewropew u l-Kummissjoni Ewropea tas-16 ta' April 2014 dwar ir-reġistru tat-trasparenza għal organizzazzjonijiet u individwi li jaħdmu għal rashom involuti fit-tfassil u l-implimentazzjoni (3) tal-politika tal-Unjoni jistipula li r-reġistru ma japplikax għall-partiti politiċi, laqgħat ma' rappreżentanti tal-partiti politiċi wkoll ma għandhomx ikunu koperti minn din id-Deċiżjoni.

(11)

Billi f'ċerti każijiet speċifiċi informazzjoni pubblika dwar laqgħa tista' ddgħajjef il-protezzjoni tal-ħajja, l-integrità jew il-privatezza ta' individwu, il-politika finanzjarja, monetarja jew ekonomika tal-Unjoni, l-istabbilità tas-suq jew informazzjoni kummerċjali sensittiva, il-kondotta xierqa ta' proċedimenti tal-qorti jew spezzjonijiet, investigazzjonijiet, verifiki jew proċeduri amministrattivi oħra, jew il-protezzjoni ta' xi interess pubbliku ieħor importanti rikonoxxut fil-livell tal-Unjoni, il-pubblikazzjoni ta' tali informazzjoni ma għandhiex issir f'dawn il-każijiet.

(12)

Skont l-Artikolu 5(a) tar-Regolament (KE) Nru 45/2001 tal-Parlament Ewropew u tal-Kunsill (4), l-ismijiet ta' membri tad-Diretturi Ġenerali li jattendu l-laqgħat mal-organizzazzjonijiet jew individwi impjegati għal rashom jistgħu jsiru pubbliċi; individwi oħra jridu jkunu taw il-kunsens tagħhom b'mod ċar.

(13)

Din id-Deċiżjoni hija bla preġudizzju għar-rekwiżiti jew impenji msaħħa tat-trasparenza li jirriżultaw mil-leġiżlazzjoni tal-Unjoni jew minn ftehimiet internazzjonali konklużi mill-Unjoni,

(a)

“Direttur Ġenerali” tfisser Direttur Ġenerali jew Kap ta' Servizz tal-Kummissjoni.

(b)

“laqgħa” tfisser inkontru bilaterali organizzat b'inizjattiva ta' organizzazzjoni jew individwu li jaħdem għal rasu jew Direttur Ġenerali sabiex jiddiskutu kwistjoni marbuta mat-teħid u l-implimentazzjoni tad-deċiżjonijiet fl-Unjoni. Inkontri li jseħħu fil-kuntest ta' proċedura amministrattiva stabbilita mit-Trattati jew minn atti tal-Unjoni, li hija responsabbiltà diretta tad-Direttur Ġenerali, kif ukoll inkontri ta' tip purament privat jew soċjali jew inkontri spontanji huma esklużi minn dan il-kunċett;

(c)

“organizzazzjoni jew individwu li jaħdem għal rasu” tfisser kull organizzazzjoni jew individwu, irrispettivament mill-istatus ġuridiku tagħhom, involuti f'attivitajiet imwettqa bil-għan li jinfluwenzaw direttament jew indirettament il-formulazzjoni jew l-implimentazzjoni tal-politika u l-proċessi tat-teħid tad-deċiżjonijiet tal-istituzzjonijiet tal-Unjoni, irrispettivament minn fejn isiru dawn l-attivitajiet u mill-kanal jew mezz ta' komunikazzjoni użat.

Dan il-kunċett ma jinkludix rappreżentanti ta' istituzzjonijiet jew korpi oħra tal-Unjoni, awtoritajiet nazzjonali, reġjonali u lokali ta' Stati Membri u ta' pajjiżi terzi jew organizzazzjonijiet internazzjonali. Madankollu, ikopri kull assoċjazzjoni jew netwerk maħluq biex jirrappreżenta reġjuni jew awtoritajiet pubbliċi subnazzjonali oħra kollettivament.