23.12.2008   

MT

Il-Ġurnal Uffiċjali ta’ l-Unjoni Ewropea

L 345/75

(1)

F’Ġunju 2004 il-Kunsill Ewropew talab il-preparazzjoni ta’ strateġija ġenerali għall-ħarsien ta’ l-infrastrutturi kritiċi. Konsegwentement, fl-20 ta’ Ottubru 2004 il-Kummissjoni adottat Komunikazzjoni dwar il-Ħarsien ta’ l-Infrastruttura Kritika fil-ġlieda kontra t-terroriżmu li pproponiet suġġerimenti dwar x’jista’ jtejjeb it-tisħiħ Ewropew tal-prevenzjoni ta’, l-istat ta’ tħejjija u r-rispons għall-attakki terroristiċi li jinvolvu l-infrastrutturi kritiċi.

(2)

Fis-17 ta’ Novembru 2005, il-Kummissjoni adottat Green Paper dwar Programm Ewropew għall-Ħarsien ta’ l-Infrastruttura Kritika li pprovdiet għażliet ta’ politika dwar l-istabbiliment tal-programm u n-Netwerk ta’ Informazzjoni ta’ Twissija dwar l-Infrastruttura Kritika. Ir-reazzjonijiet li ngħataw għall-Green Paper enfasizzaw il-valur miżjud ta’ qafas Komunitarju għall-ħarsien ta’ l-infrastruttura kritika. Ġie rikonoxxut il-bżonn li jiżdied il-ħarsien ta’ l-infrastruttura kritika fl-Ewropa u li ikun hemm għajnuna biex jitnaqqsu l-vulnerabilitajiet dwar l-infrastrutturi kritiċi. Ġiet enfasizzata l-importanza tal-prinċipji ewlenin tas-sussidjarjetà, tal-proporzjonalità u tal-kumplimentarjetà, kif ukoll tad-djalogu mal-partijiet ikkonċernati.

(3)

F’Diċembru 2005, il-Kunsill għall-Ġustizzja u l-Intern appella lill-Kummissjoni biex tressaq proposta dwar Programm Ewropew għall-Ħarsien ta’ l-Infrastruttura Kritika (“EPCIP”) u ddeċieda li għandu jkun ibbażat fuq approċċ li jieħu kont tar-riskji kollha, bil-prijorità li jintegħleb it-theddid mit-terroriżmu. Taħt dan l-approċċ, theddidiet li ġejjin mill-bniedem, dawk teknoloġiċi u diżastri naturali għandu jittieħed kont tagħhom fil-proċess għall-ħarsien ta’ l-infrastruttura kritika, iżda għandha tingħata prijorità lit-theddida mit-terroriżmu.

(4)

F’April 2007 l-Kunsill adotta konklużjonijiet dwar l-EPCIP li fihom tenna li finalment hi r-responsabbiltà ta’ l-Istati Membri li jamministraw l-arranġamenti għall-ħarsien ta’ l-infrastrutturi kritiċi li jinsabu fi ħdan il-fruntieri nazzjonali tagħhom filwaqt li laqa’ l-isforzi tal-Kummissjoni biex tiġi żviluppata proċedura Ewropea għall-identifikazzjoni u l-indikazzjoni ta’ l-Infrastrutturi Kritiċi Ewropej (“ECIs”) u l-valutazzjoni tal-ħtieġa għat-titjib tal-ħarsien tagħhom.

(5)

Din id-Direttiva tikkostittwixxi l-ewwel pass f’approċċ gradwali għall-identifikazzjoni u l-indikazzjoni ta’ ECIs u l-valutazzjoni tal-ħtieġa għat-titjib tal-ħarsien tagħhom. Għaldaqstant, din id-Direttiva tikkonċentra fuq is-setturi ta’ l-enerġija u tat-trasport u għandha tiġi riveduta bil-ħsieb tal-valutazzjoni ta’ l-impatt tagħha u l-ħtieġa li jiġu nklużi setturi oħrajn fil-kamp ta’ applikazzjoni tagħha, inter alia is-settur tat-Teknoloġija ta’ l-Informazzjoni u l-Komunikazzjoni (“TIK”).

(6)

Ir-responsabbiltà primarja u finali għall-ħarsien ta’ l-ECIs taqa’ fuq l-Istati Membri u l-proprjetarji/operaturi ta’ tali infrastruttura.

(7)

Hemm ċertu numru ta’ infrastrutturi kritiċi fil-Komunità, li l-interruzzjoni jew id-distruzzjoni ta’ liema jkollhom impatti transkonfinali sinifikanti. Dan jista’ jinkludi effetti intersettorjali transkonfinali li jirriżultaw minn interdependenzi bejn infrastrutturi interkonnessi. Tali ECIs għandhom jiġu identifikati u indikati permezz ta’ proċedura komuni. L-evalwazzjoni tar-rekwiżiti ta’ sigurtà għal tali infrastrutturi għandha ssir taħt approċċ minimu komuni. Skemi bilaterali għall-kooperazzjoni bejn l-Istati Membri fil-qasam tal-ħarsien ta’ l-infrastruttura kritika jikkostitwixxu mezzi stabbiliti u effiċjenti ħafna biex jitrattaw l-infrastrutturi kritiċi transkonfinali. L-EPCIP għandu jibni fuq din il-kooperazzjoni. Informazzjoni dwar l-indikazzjoni ta’ infrastruttura partikolari bħala ECI għandha tiġi klassifikata f’livell xieraq skond il-leġislazzjoni eżistenti tal-Komunità u ta’ l-Istati Membri.

(8)

Peress li setturi varji għandhom esperjenza partikolari, għarfien espert u r-rekwiżiti li jikkonċernaw il-ħarsien ta’ l-infrastruttura kritika, għandu jkun hemm l-iżvilupp u l-implimentazzjoni ta’ sistema għall-ħarsien ta’ l-infrastruttura kritika fuq livell Komunitarju, li tieħu kont tal-karatteristiċi u l-mizuri eżitenti tas-setturi partikolari, inklużi dawk diġa eżistenti fuq il-livell Komunitarju, nazzjonali jew reġjonali, kif ukoll, fejn meħtieġ, arranġamenti transkonfinali għall-għajnuna reċiproka bejn proprjetarji/operaturi ta’ infrastrutturi kritiċi eżistenti. Minħabba l-involviment konsiderevoli ħafna tas-settur privat fis-sorveljanza u l-amministrazzjoni tar-riskji, pjanijiet għall-kontinwità kummerċjali u l-irkupru wara l-falliment, metodu Komunitarju għandu bżonn jinkoraġixxi l-involviment sħiħ tas-settur privat.

(9)

Fir-rigward tas-settur ta’ l-enerġija u partikolarment il-metodi tal-ġenerazzjoni u t-trażmissjoni ta’ l-elettriku (fir-rigward tal-forniment ta’ l-elettriku), huwa mifhum li fejn meqjus xieraq, il-ġenerazzjoni ta’ l-elettriku tista’ tinkludi partijiet tat-trażmissjoni ta’ l-elettriku ta’ impjanti ta’ enerġija nukleari, iżda teskludi l-elementi nukleari speċifiċi koperti b’leġislazzjoni nukleari rilevanti inklużi t-trattati u l-liġi Komunitarja.

(10)

Din id-Direttiva tikkomplimenta miżuri settorjali eżistenti fuq il-livell Komunitarju u fl-Istati Membri. Fejn hemm fis-seħħ mekkaniżmi Komunitarji, dawn għandhom ikomplu jintużaw u ser jikkontribwixxu għall-implimentazzjoni ġenerali ta’ din id-Direttiva. Dupplikazzjoni ta’, jew kontradizzjoni bejn, atti differenti jew dispożizzjonijiet għandhom jiġu evitati.

(11)

Għandhom jiġu stabbiliti Pjanijiet ta’ Sigurtà għall-Operaturi (“OSPs”) jew miżuri ekwivalenti li fihom identifikazzjoni ta’ assi importanti, valutazzjoni tar-riskju u l-identifikazzjoni, l-indikazzjoni u l-prijoritizzazzjoni ta’ kontro-miżuri u proċeduri fl-ECIs indikati kollha. Bil-ħsieb li jiġu evitati ħidma bla bżonn u dupplikazzjoni, kull Stat Membru għandu l-ewwel jivvaluta jekk il-proprjetarji/operaturi ta’ l-ECIs indikati għandhomx OSPs rilevanti jew miżuri simili. Fejn ma jeżistux tali pjanijiet, kull Stat Membru għandu jieħu l-passi meħtieġa biex jassigura li jiġu stabbiliti miżuri xierqa. Huwa f’idejn kull Stat Membru li jiddeċiedi dwar l-aktar forma xierqa ta’ azzjoni fir-rigward ta’ l-istabbiliment ta’ OSPs.

(12)

Miżuri, prinċipji, linji gwida inkluż miżuri Komunitarji kif ukoll skemi ta’ kooperazzjoni bilaterali u/jew multilaterali li jipprevedu pjan simili jew ekwivalenti għal OSP jew jipprevedu Uffiċjal ta’ Kollegament tas-Sigurtà jew ekwivalenti, għandhom jitqiesu bħala li jissodisfaw ir-rekwiżiti ta’ din id-Direttiva fir-rigward ta’ OSP jew l-Uffiċjal ta’ Kollegament tas-Sigurtà rispettivament.

(13)

Għandu jiġi identifikat Uffiċjal ta’ Kollegament tas-Sigurtà għall-ECIs indikati kollha biex tiġi ffaċilitata l-kooperazzjoni u l-komunikazzjoni ma’ l-awtoritajiet nazzjonali rilevanti għall-ħarsien ta’ l-infrastruttura kritika. Bil-ħsieb li jiġu evitati ħidma u dupplikazzjoni bla bżonn, kull Stat Membru għandu l-ewwel jivvaluta jekk il-proprjetarji/operaturi ta’ l-ECI indikata għandhomx diġà Uffiċjal ta’ Kollegament ta’ Sigurtà jew ekwivalenti.Fejn ma jeżistix tali Uffiċjal ta’ Kollegament ta’ Sigurtà, kull Stat Membru għandu jieħu l-passi meħtieġa biex jassigura li jiġu stabbiliti miżuri xierqa. Huwa f’idejn kull Stat Membru li jiddeċiedi dwar l-aktar forma xierqa ta’ azzjoni fir-rigward tan-nomina ta’ Uffiċjali ta’ Kollegament ta’ Sigurtà.

(14)

L-identifikazzjoni effiċjenti tar-riskji, theddid u vulnerabilitajiet fis-setturi partikolari titlob komunikazzjoni bejn il-proprjetarji/l-operaturi ta’ l-ECIs u l-Istati Membri, u bejn l-Istati Membri u l-Kummissjoni. Kull Stat Membru għandu jiġbor l-informazzjoni dwar l-ECIs li jinsabu fit-territorju tiegħu. Il-Kummissjoni għandha tirċievi informazzjoni ġenerika mill-Istati Membri dwar ir-riskji, il-vulnerabilitajiet u t-theddid fis-setturi fejn ġew identifikati l-ECIs, inkluż fejn l-informazzjoni relevanti dwar titjib potenzjali fl-ECIs u dipendenzi bejn is-setturi, li jistgħu jiffurmaw il-bażi ta’ l-iżvilupp, fejn meħtieġ, ta’ proposti speċifiċi mill-Kummissjoni dwar it-titjib tal-ħarsien ta’ l-ECIs.

(15)

Biex jiġi ffaċilitat it-titjib fil-ħarsien ta’ l-ECIs, jistgħu jiġu żviluppati metodoloġiji ġodda għall-identifikazzjoni u l-klassifikazzjoni tar-riskji, tal-vulnerabilitajiet u tat-theddid għall-assi infrastrutturali.

(16)

Proprjetarji/operaturi ta’ l-ECIs għandhom ikunu mogħtija aċċess primarjament permezz ta’ l-awtoritajiet relevanti ta’ l-Istati Membri għall-aħjar prattika u għall-metodoloġiji dwar il-ħarsien ta’ l-infrastruttura kritika.

(17)

Il-ħarsien effettiv ta’ l-ECIs jeħtieġ il-komunikazzjoini, il-koordinazzjoni u l-kooperazzjoni fuq livell nazzjonali u Komunitarju. L-aħjar mod kif dan jista’ jintlaħaq huwa permezz ta’ l-indikazzjoni ta’ Punti ta’ Kuntatt tal-Ħarsien ta’ l-Infrastruttura Kritika Ewropea (“Punti ta’ Kuntatt tas-ECIP”) f’kull Stat Membru, li għandu jikkoordina internament kwistjonijiet relatati mal-Ħarsien ta’ l-infrastruttura kritika, kif ukoll ma’ l-Istati Membri l-oħra u mal-Kummissjoni.

(18)

Biex jiġu żviluppati attivitajiet relatati mal-Ħarsien ta’ l-Infrastruttura Kritika Ewropea f’oqsma li jirrikjedu ċertu livell ta’ kunfidenzjalità, huwa xieraq li jiġi żgurat skambju ta’ informazzjoni koerenti u żgur fil-qafas ta’ din id-Direttiva. Huwa importanti li r-regoli ta’ konfidenzjalità skond il-liġi nazzjonali applikabbli jew ir-Regolament (KE) Nru 1049/2001 tal-Parlament Ewropew u tal-Kunsill tat-30 ta’ Mejju 2001 dwar l-aċċess pubbliku għad-dokumenti tal-Parlament Ewropew, tal-Kunsill u tal-Kummissjoni (3) jiġu osservati fir-rigward ta’ fatti speċifiċi dwar assi ta’ infrastruttura kritika, li jistgħu jintużaw biex issir tħejjija u aġir bil-ħsieb li jiġu kkawżati konsegwenzi inaċċettabbli għal installazzjonijiet ta’ infrastruttura kritika. L-informazzjoni kklassifikata għandha tiġi mħarsa skond il-leġislazzjoni relevanti Komunitarja u ta’ l-Istat Membru. Kull Stat Membru u l-Kummissjoni għandhom jirrispettaw il-klassifikazzjoni ta’ sigurtà relevanti mogħtija mill-oriġinatur ta’ dokument.

(19)

Il-kondiviżjoni ta’ l-informazzjoni dwar l-ECIs għandha ssir f’atmosfera ta’ fiduċja u sigurtà. Il-kondiviżjoni ta’ l-informazzjoni tirrikjedi relazzjoni ta’ fiduċja tant li l-kumpanniji u l-organizazzjonijiet ikunu jafu li d-data sensittiva u kunfidenzjali tagħhom ser tkun imħarsa b’mod suffiċjenti.

(20)

Peress li l-għanijiet ta’ din id-Direttiva, jiġifieri l-ħolqien ta’ proċedura għall-identifikazzjoni u l-indikazzjoni ta’ l-ECIs, u ta’ approċċ komuni għall-valutazzjoni tal-bżonn ta’ titjib fil-ħarsien ta’ dawn l-infrastrutturi, ma jistgħux jinkisbu b’mod suffiċjenti mill-Istati Membri u għalhekk jistgħu, minħabba l-iskala ta’ l-azzjoni, jinkisbu aħjar fuq livell Komunitarju, il-Komunità tista’ taddotta miżuri, skond il-prinċipju tas-sussidjarjetà, skond l-Artikolu 5 tat-Trattat. F’konformità mal-prinċipju ta’ proporzjonalità, kif imsemmi f’dak l-Artikolu, din id-Direttiva ma tmurx lil hinn minn dak li hu meħtieġ sabiex jinkisbu dawk l-objettivi.

(21)

Din id-Direttiva tirrispetta d-drittijiet fundamentali u tħares il-prinċipji rikonoxxuti b’mod partikolari mill-Karta tad-Drittijiet Fundamentali ta’ l-Unjoni Ewropea,

(a)

“infrastruttura kritika” tfisser assi, sistema jew parti minnhom li jinsabu fl-Istati Membri essenzjali għall-manteniment ta’ funzjonijiet vitali tas-soċjetà, is-saħħa, is-sigurtà, is-sikurezza, il-benessere ekonomiku jew soċjali tal-poplu u li t-tfixkil jew il-qerda tagħhom ikollu impatt sinifikanti fi Stat Membru bħala riżultat tal-falliment biex jinżammu dawk il-funzjonijiet;

(b)

“Infrstruttura Kritika Ewropea” jew “ECI” tiffisser infrastruttura kritika li tinsab fl-Istati Membri li l-interruzzjoni jew il-qerda tagħha jkollha impatt sinifikanti fuq mill-inqas żewġ Stati Membri. Is-sinifikat ta’ l-impatt għandu jiġi vvalutat f’termini ta’ kriterji transversali. Dan jinkludi l-effetti li jirriżultaw minn dipendenzi transsettorjali fuq tipi oħra ta’ infrastruttura;

(c)

“analiżi tar-riskju” tfisser il-konsiderazzjoni ta’ xenarji ta’ theddid relevanti, sabiex tiġi valutata l-vulnerabbiltà u l-impatt potenzjali ta’ interuzzjoni jew qerda ta’ infrastruttura kritika.

(d)

“informazzjoni dwar il-ħarsien ta’ l-infrastruttura kritika” tfisser fatti dwar infrastruttura kritika, li jekk jiġu żvelati jistgħu jiġu wżati għall-pjanijiet u azzjonijiet bil-ħsieb li jiġi kkawżat interuzzjoni jew qerda ta’ installazzjonijiet ta’ l-infrastruttura kritika;

(e)

“ħarsien” tfisser l-attivitajiet kollha immirati lejn l-iżgurar tal-funzjonament, il-kontinwità u l-integrità ta’ infrastrutturi kritiċi sabiex tinżamm lura, tiġi mtaffija u newtralizzata theddida, riskju jew vulnerabbiltà;

(f)

“proprjetarji/operaturi ta’ ECIs” tfisser dawk l-entitajiet responsabbli mill-investimenti fi, u/jew l-operat ta’ kuljum ta’assi, sistema partikolari jew parti minnhom indikata bħala ECI taħt din id-Direttiva.

(a)

il-kriterju ta’ diżgrazzji (ivvalutat f’termini tan-numru potenzjal ta’ mwiet jew korrimenti);

(b)

il-kriterju ta’ l-effetti ekonomiċi (ivvalutat f’termini tas-sinifikat tat-telf ekonomiku u/jew degradazzjoni ta’ prodotti jew servizzi; inklużi l-effetti ambjentali potenzjali);

(c)

il-kriterju ta’ l-effetti pubbliċi (ivvalutat f’termini ta’ l-impatt fuq il-kunfidenza pubblika, is-sofferenza fiżika u l-interruzzjoni tal-ħajja ta’ kuljum; inkluż it-telf ta’ servizzi essenzjali).