This document is an excerpt from the EUR-Lex website
Document 32007R0290
Commission Regulation (EC) No 290/2007 of 16 March 2007 establishing, for the 2007/2008 marketing year, the percentage provided for in Article 19 of Regulation (EC) No 318/2006
Regolament tal-Kummissjoni (KE) Nru 290/2007 tas- 16 ta' Marzu 2007 li jistabbilixxi, għas-sena tas-suq 2007/2008, il-perċentwal imsemmi fl-Artikolu 19 tar-Regolament (KE) Nru 318/2006
Regolament tal-Kummissjoni (KE) Nru 290/2007 tas- 16 ta' Marzu 2007 li jistabbilixxi, għas-sena tas-suq 2007/2008, il-perċentwal imsemmi fl-Artikolu 19 tar-Regolament (KE) Nru 318/2006
ĠU L 78, 17.3.2007, p. 20–23
(BG, ES, CS, DA, DE, ET, EL, EN, FR, IT, LV, LT, HU, NL, PL, PT, RO, SK, SL, FI, SV)
ĠU L 56M, 29.2.2008, p. 130–133
(MT)
No longer in force, Date of end of validity: 30/09/2008: This act has been changed. Current consolidated version: 30/10/2007
Relation | Act | Comment | Subdivision concerned | From | To |
---|---|---|---|---|---|
Modified by | 32007R1263 | abolizzjoni | artikolu 2 | 30/10/2007 |
29.2.2008 |
MT |
Il-Ġurnal Uffiċjali ta’ l-Unjoni Ewropea |
130 |
REGOLAMENT TAL-KUMMISSJONI (KE) Nru 290/2007
tas-16 ta' Marzu 2007
li jistabbilixxi, għas-sena tas-suq 2007/2008, il-perċentwal imsemmi fl-Artikolu 19 tar-Regolament (KE) Nru 318/2006
IL-KUMMISSJONI TAL-KOMUNITAJIET EWROPEJ,
Wara li kkunsidrat it-Trattat li jistabbilixxi l-Komunità Ewropea,
Wara li kkunsidrat ir-Regolament tal-Kunsill (KE) Nru 318/2006 ta' l-20 ta' Frar 2006 dwar l-organizzazzjoni komuni tas-swieq fis-settur taz-zokkor (1), u b'mod partikolari l-Artikolu 19(3), it-tieni subparagrafu, l-Artikolu 40(2)(d)(v) u l-Artikolu 42 tiegħu,
Billi:
(1) |
L-Artikolu 19(1) tar-Regolament (KE) Nru 318/2006 jipprevedi li perċentwal, komuni għall-Istati Membri kollha, ta' zokkor u isoglukożju jista' jiġi rtirat mis-suq sabiex jinżamm il-bilanċ strutturali tas-suq f'livell ta' prezz qrib dak ta' referenza. |
(2) |
Il-bilanċ imbassar għas-sena tas-suq 2007/2008 juri eċċess fil-provvisti fis-suq Komunitarju, partikolarment minħabba l-fatt li l-abbandun tal-kwoti skond ir-Regolament tal-Kunsill (KE) Nru 320/2006 ta' l-20 ta' Frar 2006 li jistabbilixxi sistema temporanja għar-ristrutturar ta' l-industrija taz-zokkor fil-Komunità u li jemenda r-Regolament (KE) Nru 1290/2005 dwar il-finanzjament tal-politika agrikola komuni (2), kienu anqas mit-tbassir. Dan l-eċċess, li jista' jammonta għal madwar erba' miljun tunnellata zokkor u isoglukożju, aktarx li jikkawża tnaqqis sinifikanti tal-prezzijiet fis-suq Komunitarju matul is-sena tas-suq 2007/2008. |
(3) |
Għalhekk, biex jinżamm bilanċ strutturali tas-suq jeħtieġ li jiġi stabbilit perċentwal ta' l-irtirar fl-applikazzjoni ta' l-Artikolu 19(1) tar-Regolament (KE) Nru 318/2006. |
(4) |
Madankollu, l-applikazzjoni ta' l-irtirar previst mill-Artikolu 19 tar-Regolament (KE) Nru 318/2006 ma tinċentivax il-produtturi biex inaqqsu l-produzzjoni tagħhom, billi l-perċentwal ta' l-irtirar huwa applikat b'mod lineari għall-kwantitajiet kollha prodotti fil-kwota, mingħajr ma jitqiesu sforzi eventwali minn ċerti impriżi biex jadattaw il-produzzjoni. L-istrument ta' l-irtirar jista' għaldaqstant jitqies insuffiċjenti billi ma jħallix li jkun prevenut il-ħolqien ta' eċċess fis-suq. Fil-fatt, l-Artikolu 19 ma jimpedix il-produzzjoni żejda iżda jippermetti sempliċement l-irtirar taz-zokkor diġà prodott. Dan iwassal għal spejjeż li jistgħu jkunu evitati jekk il-produzzjoni żejda tkun impedita f'fażi preċedenti. |
(5) |
Bil-għan li jitjieb l-istrument ta' l-irtirar billi jinħoloq inċentiv għall-produtturi biex inaqqsu l-produzzjoni tagħhom, il-Kummissjoni biħsiebha tipproponi lill-Kunsill emenda għar-Regolament (KE) Nru 318/2006 li tintroduċi limitu, safejn il-kwantitajiet prodotti fil-kwota minn kull impriża ma jkunux irtirati. Fi kliem ieħor, l-impriżi li jipproduċu inqas mil-limitu jkunu eżentati mill-obbligu ta' rtirar, billi jikkontribwixxu inqas għall-eċċess. B'hekk, l-impriżi jkunu jistgħu jadattaw il-produzzjoni tagħhom u jkunu jistgħu b'mod partikolari jiddeċidu li jipproduċu jew le iżjed mil-limitu. |
(6) |
Biex il-limitu għall-applikazzjoni tal-perċentwal ta' l-irtirar ikollu effett reali fuq il-produzzjoni, jeħtieġ li jkun limitat l-ambitu ta' l-obbligu previst mill-Artikolu 6(5) tar-Regolament (KE) Nru 318/2006 bil-għan li jkun evitat li l-impriżi li jipproduċu z-zokkor ikollhom jħallsu l-prezz minimu għal kwantitajiet ta' pitravi korrispondenti mat-totalità tal-kwota tagħhom, inkluż il-kwantitajiet li għalihom għadhom ma ġewx konklużi l-kuntratti ta' konsenja. |
(7) |
Minkejja dan, mhuwiex possibbli li l-istrument ta' l-irtirar ikun aġġustat fil-ħin biex ikollu effett preventiv fuq il-produzzjoni tas-sena tas-suq 2007/2008. Billi t-tbassir qed juri eċċess partikolarment imdaqqas għal din is-sena tas-suq minħabba l-funzjonament batut ta' l-istrument għar-ristrutturar ta' l-industrija taz-zokkor, jitqies neċessarju r-rikors għall-Artikolu 42 tar-Regolament (KE) Nru 318/2006 biex tiddaħħal urġentement miżura preventiva li tikkonsisti fl-introduzzjoni ta' limitu għall-applikazzjoni tal-perċentwal ta' l-irtirar. Jeħtieġ li dan il-limitu jiġi stabbilit f'livell li jkun possibbli li tkun impedita l-produzzjoni ta' kwantità sinifikanti ta' zokkor, meta mqabbla ma' dik li inkella kienet tkun irtirata skond l-Artikolu 19 tar-Regolament (KE) Nru 318/2006. |
(8) |
Fl-istess kuntest, ikun jeħtieġ li jitqies il-fatt li l-limitazzjonijiet marbuta mal-miżura preventiva jistgħu jkollhom konsegwenzi ekonomiċi serji għall-impriżi fl-Istati Membri li għamlu sforzi partikolari fil-qafas tas-sistema ta' ristrutturar stabbilit mir-Regolament (KE) Nru 320/2006. Effett bħal dan imur kontra l-għan proprju ta' din is-sistema u ta' l-organizzazzjoni komuni tas-swieq fis-settur taz-zokkor, li l-għan tagħha hu li tiggarantixxi l-vijabilità u l-kompetittività ta' dan is-settur. Għalhekk, jeħtieġ li tkun prevista eżenzjoni mill-applikazzjoni tal-perċentwal ta' l-irtirar preventiv għall-Istati Membri fi proporzjon mal-perċentwal tal-kwota nazzjonali li ġie rrinunzjat fil-qafas tas-sistema tar-ristrutturar imsemmija hawn fuq. |
(9) |
Biex tkun totalment effikaċi, il-miżura għandha tiġi adottata qabel ma l-perjodu li fih jinżergħu l-pitravi jidħol ġmielu, biex b'hekk il-produtturi u l-manufatturi jkunu jistgħu jippjanaw u jiġġestixxu fl-aqwa kundizzjonijiet il-produzzjoni tagħhom għas-sena tas-suq 2007/2008. |
(10) |
Madankollu, sabiex jitqiesu l-inċertezzi tat-tbassir l-aktar dawk dwar il-produzzjoni, jeħtieġ li jsir provvediment biex il-perċentwal ta' l-irtirar jista' jiġi aġġustat, jekk dan ikun meħtieġ, ladarba d-dejta dwar iċ-ċifri finali tas-sena tas-suq 2007/2008 tkun aktar preċiża. Jekk il-perċentwal aġġustat ikun ogħla minn dak inizjalment stabbilit minn dan ir-Regolament, id-differenza għandha tiġi applikata għall-produzzjoni kollha fil-kwota, billi l-għan tal-miżura f'din il-fażi ma għadux dak li jinkiseb effett preventiv iżda li s-suq ikun ġestit fir-rigward ta' eċċess li rriżulta effettivament. |
(11) |
Bil-għan li tiġi ffaċilitata l-provvista ta' zokkor u/jew isoglukożju għall-manifattura tal-prodotti msemmija fl-Artikolu 13(2) tar-Regolament (KE) Nru 318/2006, jeħtieġ li l-kwantitajiet irtirati jitqiesu bħala eċċess ta' zokkor jew isoglukożju għas-sena tas-suq 2007/2008 li jistgħu jinbidlu f'zokkor jew isoglukożju industrijali. |
(12) |
Skond l-Artikolu 19(1), it-tieni subparagrafu, tar-Regolament (KE) Nru 318/2006, il-bżonnijiet tradizzjonali tal-provvista ta' zokkor abjad għas-settur tar-raffinar għandhom jitnaqqsu bl-istess perċentwal stabbilit għall-irtirar. F'każ li jiġi stabbilit perċentwal ta' l-irtirar differenti, it-tnaqqis tal-bżonnijiet tradizzjonali tal-provvista għandu jkun aġġustat ukoll. |
(13) |
Il-Kumitat ta' Ġestjoni taz-zokkor ma ħariġx opinjoni fiż-żmien stipulat mill-president tiegħu. |
ADOTTAT DAN IR-REGOLAMENT:
Artikolu 1
1. Għas-sena tas-suq 2007/2008, il-perċentwal imsemmi fl-Artikolu 19(1) tar-Regolament (KE) Nru 318/2006 għandu jkun ta' 13,5 %.
2. B'deroga mill-paragrafu 1:
(a) |
il-perċentwal imsemmi fil-paragrafu ta' hawn fuq ma japplikax għall-impriżi bi produzzjoni anqas minn 86,5 % tal-kwota tagħhom għas-sena tas-suq 2007/2008, |
(b) |
għall-imprizi li, għas-sena tas-suq 2007/2008, jipproduċu kwantità daqs jew ogħla minn 86,5 % tal-kwota tagħhom, il-kwantitajiet prodotti 'l fuq mil-limitu tat-86,5 % huma rtirati, |
(c) |
Il-perċentwal fil-paragrafu 1 ma japplikax għall-kwantitajiet prodotti fl-Istati Membri li l-kwota nazzjonali ta' zokkor tagħhom ġiet irrinunzjata għal talanqas 50 % mill-1 ta' Lulju 2006, bħala konsegwenza tar-rinunzja għall-kwoti skond l-Artikolu 3 tar-Regolament (KE) Nru 320/2006. Għall-Istati Membri li l-kwota nazzjonali tagħhom ġiet irrinunzjata għal talanqas 50 % mill-1 ta' Lulju 2006, bħala konsegwenza tar-rinunzja għall-kwoti skond l-Artikolu 3 tar-Regolament (KE) Nru 320/2006, il-perċentwal ta' l-irtirar previst mill-ewwel paragrafu jitnaqqas bi proporzjon mal-kwoti rrinunzjati. |
Il-perċentwal li japplika skond dan il-punt huwa stabbilit fl-Anness.
3. Il-perċentwal imsemmi fil-paragrafu 1 jista' jiġi aġġustat sa mhux aktar tard mill-31 ta' Ottubru 2007. F'każ li t-tieni perċentwal ikun ogħla mill-ewwel wieħed, id-differenza għandha tiġi applikata għall-produzzjoni kollha fil-kwota.
4. Il-kwantitajiet irtirati skond il-paragrafu 2(b) u l-paragrafu 3 jitqiesu bħala eċċess ta' zokkor jew isoglukożju tas-sena tas-suq 2007/2008, li jistgħu jinbidlu f'zokkor jew isoglukożju industrijali.
5. L-obbligu msemmi fl-Artikolu 6(5) tar-Regolament (KE) Nru 318/2006 għall-ħlas ta' talanqas il-prezz minumu japplika biss għall-kwantitajiet ta' pitravi prodotti fil-kwota wara l-applikazzjoni tal-paragrafi 1 u 2.
Artikolu 2
1. Għas-sena tas-suq 2007/2008, il-bżonnijiet tradizzjonali tal-provvista ta' zokkor għas-settur tar-raffinar imsemmija fl-Artikolu 29(1) tar-Regolament (KE) Nru 318/2006, għandhom jammontaw għal massimu ta' 2 110 371 tunnellata li jitqassmu hekk:
(a) |
171 917 tunnellata għall-Bulgarija; |
(b) |
256 582 tunnellata għal Franza; |
(c) |
43 250 tunnellata għall-Italja; |
(d) |
308 488 tunnellata għall-Portugall; |
(e) |
285 135 tunnellata għar-Rumanija; |
(f) |
16 941 tunnellata għas-Slovenja; |
(g) |
51 835 tunnellata għall-Finlandja; |
(h) |
976 223 tunnellata għar-Renju Unit. |
2. L-ammont stabbilit fil-paragrafu 1 huwa aġġustat f'każ ta' applikazzjoni ta' l-Artikolu 1(3).
Artikolu 3
Dan ir-Regolament għandu jidħol fis-seħħ fit-tielet jum wara dak tal-pubblikazzjoni tiegħu fil-Ġurnal Uffiċjali ta' l-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, 16 ta' Marzu 2007.
Għall-Kummissjoni
Mariann FISCHER BOEL
Membru tal-Kummissjoni
(1) ĠU L 58, 28.2.2006, p. 1. Ir-Regolament kif emendat l-aħħar bir-Regolament (KE) Nru 2011/2006 (ĠU L 384, 29.12.2006, p. 1).
(2) ĠU L 58, 28.2.2006, p. 42.
ANNESS
Perċentwal ta' l-irtirar stabbilit skond l-Artikolu 1(2)(c)
Stat Membru |
Perċentwal ta' l-irtirar |
Ir-Repubblika Ċeka |
7,29 |
Il-Greċja |
0 |
Spanja |
10,53 |
L-Italja |
0 |
L-Ungerija |
6,21 |
Il-Portugall (kontinentali) |
0 |
Is-Slovakkja |
4,32 |
Il-Finlandja |
3,24 |
L-Iżvezja |
10,26 |