Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32005E0913

    Azzjoni Konġunta tal-Kunsill 2005/913/PESK tat- 12 ta' Diċembru 2005 dwar appoġġ għall-attivitajiet ta' l-OPCW fil-qafas ta' l-implimentazzjoni ta' l-Istrateġija ta' l-UE kontra l-Proliferazzjoni ta' Armi ta' Qerda tal-Massa

    ĠU L 331, 17.12.2005, p. 34–41 (ES, CS, DA, DE, ET, EL, EN, FR, IT, LV, LT, HU, NL, PL, PT, SK, SL, FI, SV)
    ĠU L 175M, 29.6.2006, p. 209–216 (MT)

    Legal status of the document No longer in force, Date of end of validity: 12/12/2006

    ELI: http://data.europa.eu/eli/joint_action/2005/913/oj

    Date of document:
    12/12/2005
    Date of effect:
    12/12/2005; Dħul fis-seħħ Data tad-dokument Ara Art. 4
    Date of end of validity:
    12/12/2006; Ara Art. 4
    Author:
    Il-Kunsill tal-Unjoni Ewropea
    Form:
    Azzjoni konġunta
    Treaty:
    Trattat dwar l−Unjoni Ewropea
    Legal basis:
    Link
    Link
    Link
    Select all documents mentioning this document
    Instruments cited:
    Link
    Link

    29.6.2006   

    MT

    Il-Ġurnal Uffiċjali ta’ l-Unjoni Ewropea

    209

    AZZJONI KONĠUNTA TAL-KUNSILL 2005/913/PESK

    tat-12 ta' Diċembru 2005

    dwar appoġġ għall-attivitajiet ta' l-OPCW fil-qafas ta' l-implimentazzjoni ta' l-Istrateġija ta' l-UE kontra l-Proliferazzjoni ta' Armi ta' Qerda tal-Massa

    IL-KUNSILL TA’ L-UNJONI EWROPEA,

    Wara li kkunsidra t-Trattat dwar l-Unjoni Ewropea, u b'mod partikolari l-Artikolu 14 tiegħu,

    Billi:

    (1)

    Fit-12 ta' Diċembru 2003, il-Kunsill Ewropew adotta l-Istrateġija ta' l-UE kontra l-Proliferazzjoni ta' Armi ta' Qerda tal-Massa, li fil-Kapitolu III tagħha fiha lista ta' miżuri biex tiġi miġġielda tali proliferazzjoni;

    (2)

    L-objettivi ta' l-Istrateġija ta' l-UE huma kumplimentari għall-objettivi segwiti mill-Organizzazzjoni għall-Projbizzjoni ta' Armi Kimiċi (OPCW), fil-kuntest tar-responsabbiltà tagħha għall-implimentazzjoni tal-Konvenzjoni dwar l-Armi Kimiċi (CWC).

    (3)

    Fit-22 ta' Novembru 2004 l-Kunsill adotta Azzjoni Konġunta dwar appoġġ għal attivitajiet ta' l-OPCW fil-qafas ta' l-implimentazzjoni ta' l-Istrateġija ta' l-UE kontra l-Proliferazzjoni ta' Armi ta' Qerda tal-Massa (1), li kellha tiskadi sena wara l-adozzjoni tagħha.

    (4)

    Il-kontinwazzjoni ta' tali assistenza intensiva u mmirata mill-UE lill-OPCW hija meħtieġa fil-kuntest ta' l-implimentazzjoni attiva ta' Kapitolu III ta' l-Istrateġija ta' l-UE, b'mod partikolari dawk il-miżuri relatati ma' l-universalizzazzjoni tas-CWC, u tal-provvista ta' riżorsi finanzjarji għall-appoġġ ta' proġetti speċifiċi mmexxija minn istituzzjonijiet multilaterali.

    (5)

    Il-Kummissjoni qablet li tiġi fdata bis-superviżjoni ta' l-implimentazzjoni xierqa tal-kontribut ta' l-UE,

    ADOTTA DIN L-AZZJONI KONĠUNTA:

    Artikolu 1

    1.   Bil-għan li tingħata applikazzjoni immedjata u prattika lil xi ftit elementi ta' l-Istrateġija tal-UE, l-Unjoni Ewropea għandha tappoġġa l-attivitajiet tal- OPCW, bl-objettivi li ġejjin:

    —

    il-promozzjoni ta' l-universalità tas-CWC;

    —

    l-appoġġ għall-implimentazzjoni bis-sħiħ tas-CWC mill-Istati Parti;

    —

    il-kooperazzjoni internazzjonali fil-qasam ta' attivitajiet kimiċi, bħala miżuri ta' akkumpanjament għall-implimentazzjoni tas-CWC.

    2.   Il-proġetti ta' l-OPCW li jikkorrispondu ma' miżuri ta' l-Istrateġija ta' l-UE, għandhom ikunu l-proġetti, li l-għan tagħhom hu li jsaħħu:

    —

    il-promozzjoni tas-CWC bit-twettiq ta' attivitajiet, inklużi seminars u workshops reġjonali u sub-reġjonali, intiżi li jżidu n-numru ta' membri ta' l-OPCW;

    —

    il-provvista ta' appoġġ tekniku sostnut lill Istati Parti li jitolbuh għall-istabbiliment u l-funzjonament effettiv ta' Awtoritajiet Nazzjonali u l-approvazzjoni ta' miżuri nazzjonali ta' implimentazzjoni kif previst fis-CWC;

    —

    il-kooperazzjoni internazzjonali fil-qasam ta' attivitajiet kimiċi permezz ta' l-iskambju ta' informazzjoni xjentifika u teknika, kimiċi u tagħmir għal finijiet mhux projbiti taħt is-CWC, biex isir kontribut lejn l-iżvilupp tal-kapaċitajiet ta' l-Istati Parti għall-implimentazzjoni tas-CWC.

    Deskrizzjoni dettaljata ta' dawn il-proġetti msemmija tinsab fl-Anness.

    Artikolu 2

    1.   L-ammont ta' referenza finanzjarju għat-tliet proġetti elenkati fl-Artikolu 1(2) għandu jkun ta' EUR 1 697 000, li ser ikun iffinanzjat mill-budget ġenerali ta' l-2006 ta' l-Unjoni Ewropea.

    2.   In-neqfa ffinanzjata mill-ammont stipulat fil-paragrafu 1 għandha tiġi ġestita b'mod konformi mal-proċeduri u r-regoli tal-Komunità Ewropea applikabbli għall-budget ġenerali ta' l-Unjoni Ewropea bl-eċċezzjoni li kwalunkwe finanzjament ta' qabel m'għandux jibqa' l-proprjetà tal-Komunità Ewropea.

    3.   Għall-għan ta' l-implimentazzjoni tal-proġetti msemmija fl-Artikolu 1, il-Kummissjoni għandha tikkonkludi ftehim ta' finanzjament ma' l-OPCW dwar il-kondizzjonijiet għall-użu tal-kontribut ta' l-UE, li għandu jkun f'għamla ta' għotja. Il-ftehim għall-finanzjament li għandu jiġi konkluż għandu jistipula li l-OPCW għandha tiżgura l-viżibbiltà tal-kontribut ta' l-UE, xierqa għad-daqs tiegħu.

    4.   Il-Kummissjoni għandha tirraporta dwar l-implimentazzjoni tal-kontribuzzjoni ta' l-UE lill-Kunsill, b'assoċjazzjoni mal-Presidenza.

    Artikolu 3

    Il-Presidenza għandha tkun responsabbli għall-implimentazzjoni ta' din l-Azzjoni Konġunta b'assoċjazzjoni sħiħa mal-Kummissjoni. Il-Kummissjoni għandha tissorvelja l-implimentazzjoni xierqa tal-kontribut ta' l-UE msemmija fl-Artikolu 2.

    Artikolu 4

    Din l-Azzjoni Konġunta għandha tidħol fis-seħħ fil-jum ta’ l-adozzjoni tagħha.

    Għandha tiskadi sena wara l-adozzjoni tagħha.

    Artikolu 5

    Din l-Azzjoni Konġunta għandha tiġi pubblikata fil-Ġurnal Uffiċjali ta’ l-Unjoni Ewropea.

    Magħmula fi Brussel, nhar it-12 ta' Diċembru 2005.

    Għall-Kunsill

    Il-President

    J. STRAW

    (1)  ĠU L 349, 25.11.2004, p. 63.

    ANNESS

    appoġġ ta' l-UE għall-attivitajiet ta' l-OPCW fil-qafas ta' l-implimentazzjoni ta' l-Istrateġija ta' l-UE Kontra l-Proliferazzjoni ta' Armi ta' Qerda tal-Massa

    1.   Objettiv u Deskrizzjoni

    Objettiv ġenerali: l-appoġġ għall-universalizzazzjoni tas-CWC u, b’mod partikolari l-promozzjoni ta’ l-adeżjoni għas-CWC minn Stati mhux Parti (Stati firmatarji kif ukoll Stati mhux firmatarji) u l-appoġġ għall-implimentazzjoni tal-CWC mill-Istati Parti.

    Deskrizzjoni: L-assistenza ta' l-Unjoni Ewropea (UE) għall-OPCW ser tkun iffokata fuq l-oqsma li ġejjin, identifikati mill-Istati Parti tas-CWC bħala li jeħtieġu azzjoni urġenti:

    (i)

    il-promozzjoni ta' l-universalità tas-CWC;

    (ii)

    l-appoġġ għall-implimentazzjoni tas-CWC mill-Istati Parti;

    (iii)

    il-kooperazzjoni internazzjonali fil-qasam ta' attivitajiet kimiċi.

    Il-proġetti deskritti hawn taħt ser jibbenefikaw esklussivament mill-appoġġ ta’ l-UE. Il-finanzjarment ta' l-UE ser ikopri biss spejjeż speċifikament relatati ma' l-implimentzzajoni tal-proġetti. Għaldaqstant, dawn il-proġetti mhux ser ikunu ffinanzjati taħt il-Budget Regolari ta' l-2006 ta' l-OPCW. Minbarra dan, l-akkwist ta' kwalunkwe oġġett, xogħol jew servizz ser isir mill-OPCW.

    2.   Deskrizzjoni tal-proġett

    2.1.   Proġett 1: Il-promozzjoni ta' l-universalità tas-CWC

    Għan tal-proġett: Żieda fin-numru tal-membri tas-CWC

    Riżultati tal-proġett:

    (i)

    Sħubija msaħħa tas-CWC f'diversi reġjuni ġeografiċi (fl-Afrika, fir-reġjun tal-Karibew, fil-Baċin Mediterran u l-Lvant Nofsani).

    (ii)

    Tisħiħ tar-rettikolati reġjonali (li jinvolvu organizzazzjonijiet u rettikolati sub-reġjonali f'diversi oqsma rilevanti għas-CWC).

    Deskrizzjoni tal-proġett: Attivitajiet reġjonali, sub-reġjonali, u bilaterali relatati ma' l-universalità

    Il-parteċipazzjoni ta' Stati li mhumiex Parti għal attivitajiet reġjonali, sub-reġjonali u bilaterali toffri opportunitajiet għall-OPCW biex tistabbilixxi/tiżviluppa kuntatti ma' rappreżentanti mill-kapitali u biex tiġbed l-attenzjoni għall-vantaġġi u l-benefiċċji ta' l-adeżjoni tas-CWC, kif ukoll obbligi assoċjati. Għajnuna u appoġġ tekniku huma pprovduti ukoll dwar kwistjonijiet speċifiċi rilevanti għat-tħejjija għall-adeżjoni mas-CWC.

    Qabel l-2005, il-livell disponibbli ta' fondi llimita lill-OPCW għat-tmexxija ta' numru zgħir ta' seminars u workshops reġjonali, imfassla primarjament biex ikabbru l-kuxjenza politika dwar il-benefiċċji tas-CWC għal Stati mhux Parti. Fl-2005, l-appoġġ finanzjarju pprovdut mill-UE ppermetta modi aktar intensivi u immirati biex jiġu assistiti Stati mhux Parti fil-proċess ta' tħejjija għall-adeżjoni mas-CWC, per eżempju permezz ta' żjarat bilaterali, jew laqgħat reġjonali/sub-reġjonali li jiffokaw fuq kwistjonijiet ta' implimentazzjoni nazzjonali tal-leġislazzjoni flimkien mar-ratifika tas-CWC.

    Fl-2006, il-kontinwazzjoni ta' tali assistenza intensiva u mmirata ser tippermetti lill-OPCW biex iżżid is-sħubija tagħha bil-ħsieb ta' promozzjoni lejn aktar universalità tas-CWC sa l-għaxar anniversarju tad-dħul fis-seħħ tagħha f'April 2007.

    Il-proġett ser jiffinanzja l-attivitajiet li ġejjin fl-2006:

    (i)

    Workshop dwar is-CWC u taħriġ u appoġġ bilaterali għal Stati mhux Parti fl-Afrika (post fl-Afrika li għad irid jiġi deċiż, l-ewwel u t-tielet trimestru ta' l-2006, jumejn jew tlieta). Il-parteċipanti jridu jiġu sponsorizzati mill-korpi ta' teħid ta' deċiżjonijiet fi Stati mhux Parti, u organizzazzjonijiet reġjonali/sub-reġjonali rilevanti per eżempju l-Unjoni Afrikana. Rappreżentanti mill-Angola, mir-Repubblika Afrikana Ċentrali, mill-Komoros, mill-Kongo, minn Ġibuti, mill-Eġittu, mill-Ginea-Bissaw, mill-Liberja, u mis-Somalja ser jiġu mistiedna. Kelliem mistieden mill-UE ikun ta' siwi kbir biex jinforma lill-parteċipanti dwar inizjattivi ta' l-UE rilevanti għall-Afrika dwar in-non-proliferazzjoni u d-diżarmament relatati ma' l-Armi tal-Qerda tal-Massa.

    Stima ta' Spiża Totali ta' l-Avveniment: EUR 56 000

    (ii)

    Workshop dwar is-CWC għal pajjiżi tal-Baċin Mediterran u tal-Lvant Nofsani (post għad irid jiġi kkonfermat, jumejn jew tlieta, it-tieni trimestru ta’ l-2006) Wara l-workshop li nżamm f'Ċipru fl-2005, bil-fondi mill-UE, li għalih, għall-ewwel darba, attendew l-Istati kollha mhux Parti mir-reġjun, ser jiġu mistiedna rappreżentanti mill-Istati mhux Parti (per eżempju l-Eġittu, l-Iraq, l-Iżrael, il-Libanu, is-Sirja u Stati oħra mhux Parti li huma membri tal-Lega ta' l-Istati Għarab). Minbarra dan, ser jiġu mistiedna korpi ta' teħid ta' deċiżjonijiet u korpi konsultattivi fi Stati mhux Parti, kif ukoll rappreżentanti prinċipali minn Stati Parti u organizzazzjonijiet reġjonal. Kelliem mistieden jew tnejn mill-UE jistgħu jiġu mitluba biex jinfurmaw lill-parteċipanti dwar inizjattivi ta’ l-UE dwar in-non-proliferazzjoni u d-diżarmament relatati mal-WMD, l-aspetti ta' politika-sigurtà tas-Sħubija Ewro-Mediterranja u miżuri ta’ kontroll ta’ l-esportazzjoni implimentati mill-UE.

    Stima ta' Spiża Totali ta' l-Avveniment: EUR 46 000

    (iii)

    Taħriġ u appoġġ sub-reġjonali u bilaterali mmirati għal Stati mhux Parti fil-Karibew (post għad irid jiġi kkonfermat, jumejn, l-ewwel u l-aħħar trimestru ta' l-2006). Rappreżentanti inklużi mill-Baħamas, il-Barbados, ir-Repubblika Domenikana, Ħaiti, u organizzazzjonijiet reġjonali/sub-reġjonali per eżempju l-OAS, l-OECS ser jiġu mistiedna. Kelliem mistieden mill-UE ikun ta' siwi kbir biex jinfurmaw lill-parteċipanti dwar inizjattivi ta' l-UE dwar in-non-proliferazzjoni u d-diżarmament relatati mal-WMD.

    Stima ta' Spiża Totali ta' l-Avveniment: EUR 24 000

    Stima ta' Spiża Totali tal-Proġett 1:EUR 126 000

    2.2.   Proġett 2: Implimentazzjoni Nazzjonali tas-CWC

    Għan tal-proġett: L-istabbiliment u l-funzjonament effettiv ta' l-Awtoritajiet Nazzjonali, id-dħul l-approvazzjoni ta' miżuri nazzjonali ta' implimentazzjoni, u l-adozzjoni ta' kwalunkwe miżura amministrattiva meħtieġa b'mod konformi ma' l-obbligi ta' l-Artikolu VII tas-CWC.

    Riżultati tal-proġett:

    (i)

    Ikomplu jiġu ffaċilitati l-istabbiliment u l-funzjonament effettiv ta’ Awtoritajiet Nazzjonali u l-adozzjoni ta’ miżuri ta’ implimentazzjoni adegwati fir-reġjuni kollha, permezz ta’ assistenza legali u teknika u appoġġ għall-implimentazzjoni lil Awtoritajiet Nazzjonali.

    (ii)

    Jiġu assistiti Awtoritajiet Nazzjonali fil-proċess ta' implimentazzjoni nazzjonali permezz ta' appoġġ għall-bini ta' kapaċitajiet.

    (iii)

    Permezz ta' programm estiż ta' żjarat, tiġi pprovduta preżenza temporanja ta' l-OPCW fl-Afrika biex tissaħħaħ l-implimentazzjoni nazzjonali taħt l-Artikolu VII tas-CWC fl-Istati Parti Afrikani.

    (iv)

    Tiġi pprovduta informazzjoni adegwata dwar trasferimenti ta' kimiċi elenkati fis-CWC mit-territorji taħt il-ġurisdizzjoni ta' l-Awtoritajiet Nazzjonali, kif ukoll tixrid usa' għall-awtoritajiet tad-dwana sabiex tiġi indirizzata kwalunkwe diskrepanza fid-data ta' trasferiment ipprovduta mill-Istati Parti.

    Deskrizzjoni tal-proġett: il-proġett ser jikkontribwixxi għall-isforzi attwali għat-titjib tal-funzjonament ta' Awtoritajiet Nazzjonali u l-adozzjoni ta' miżuri ta' implimentazzjoni adegwati permezz ta':

    (a)

    assistenza dwar l-kwistjonijiet kollha relatati mas-CWC, b'enfasi partikolari fuq aspetti legali u tekniċi biex tingħata risposta għall-ħtiġijiet ta' l-Istati Parti rikjedenti sabiex jiġu assistiti fit-twettiq ta' l-obbligi tagħhom ta' l-Artikolu VII permezz ta' żjarat bilaterali jew formats oħra xierqa. Tali assistenza tkun ipprovduta minn esperti/persuni ta' riżorsa mill-persunal ta’ l-OPCW bl-inklużjoni ta’ esperti ta’ l-UE kif meħtieġ. It-tul ta' kull żjara tkun ta' madwar 5 ijiem ta' xogħol. In-numru ta' esperti jkun normalment 3 għal kull żjara. It-tul ta' kull żjara u n-numru ta' persuni li jivvjaġġaw f'kull grupp jiġi ddeterminat fuq bażi ta' każ b'każ sabiex jirrispondu għall-ħtiġiet ta' l-assistenza li trid tiġi pprovduta bl-aktar mod kost-effettiv.

    Barra minn hekk, l-UE ser tiffinanzja programm estiż ta' żjarat biex tipprovdi preżenza temporanja ta' l-OPCW fl-Afrika biex tassisti lill-Istati Parti Afrikani fit-twettiq ta' l-obbligi tagħhom ta' l-Artikolu VII. Din il-preżenza ser tiġi stabbilita għal perijodu ta' żmien strettament limitat u l-għan uniku tagħha jkun li tinkoraġġixxi l-implimentazzjoni nazzjonali fl-Afrika.

    Stima ta' spiża totali: EUR 225 000;

    (b)

    għotjiet lil Awtoritajiet Nazzjonali għall-appoġġjati ta' l-isforzi ta' bini ta' kapaċitajiet għal attivitajiet u infrastruttura nazzjonali meħtieġa għall-implimentazzjoni tas-CWC: Irid jinbeda proġett pilota, biex jiġu ffinanzjati attivitajiet ta' implimentazzjoni f' Awtoritajiet Nazzjonali magħżula. Il-proġett fil-fażi pilota tiegħu jkun jiffinanzja madwar 12-il-Awtorità Nazzjonali, kull waħda b' finanzjar massimu ta' EURO 15 000 għal kull waħda mill-Awtoritajiet Nazzjonali magħżula. L-identifikazzjoni ta' kompiti speċifiċi biex jiżdiedu l-kapaċitajiet fi ħdan Awtoritajiet Nazzjonali għat-titjib tal-proċess ta' implimentazzjoni nazzjonali ser jiddetermina l-kwantità u n-natura ta' l-appoġġ li jrid jiġi pprovdut.

    Matul l-2005, il-kontribut volontarju ta' l-UE appoġġja l-isforz ta' l-OPCW biex tassisti lill-Istati Parti sabiex iwettqu l-obbligi tagħhom skond il-Pjan ta' Azzjoni rigward l-implimentazzjoni ta' l-obbligi ta' l-Artikolu VII. Żjarat bilaterali ta' għajnuna teknika pprovdew assistenza speċifika lil Stati Parti rikjedenti. Matul tali żjarat, saret l-identifikazzjoni ta' attivitajiet ulterjuri biex jitwettqu l-obbligi ta' l-Artikolu VII, inkluż l-iżvilupp ta' pjan ta' azzjoni speċifiku għal kull pajjiż. Ir-risposta għal tali żjarat bilaterali ta' għajnuna teknika kienet pożittiva, bl-Istati Parti jibdew attivitajiet biex ikunu konformi ma' l-obbligi tagħhom u jidentifikaw oqsma speċifiċi għal assistenzafutura. Sabiex ikomplu bl-impetu ġġenerat f'dawn l-Istati Parti għall-implimentazzjoni, oqsma speċifiċi ta' assistenza kif identifikat minnhom. jistgħu jkunu appoġġati mill-fondi ta' l-UE fl-2006.

    L-oqsma speċifiċi li għalihom tista' tintalab assistenza fil-ġejjieni qrib mill-Istati Parti jinkludu fondi biex jitmexxew korsijiet ta' kuxjenza nazzjonali għal persunal minn aġenziji, Dipartimenti u Ministeri rilevanti dwar l-implimentazzjoni ta' dispożizzjonijiet differenti tas-CWC, onorarji għall-konsulenza għal esperti ġuridiċi li jfasslu l-leġislazzjoni ta' l-implimentazzjoni nazzjonali, il-pubblikazzjoni u d-distribuzzjoni tal-leġislazzjoni u r-regolamenti fis-seħħ, it-traduzzjoni tal-leġislazzjoni ta' l-implimentazzjoni nazzjonali u r-regolamenti ta' l-infurzar fil-lingwa lokali, l-istabbiliment ta' uffiċċju għall-Awtorità Nazzjonali. Dawn l-għotjiet ma jipprovdux għajnuna finanzjarja għal ħlas tal-pagi.

    Il-proġett pilota li jindirizza oqsma speċifiċi ta' għajnuna, ser jiġi implimentat biex jiżgura li l-kapaċità nazzjonali għall-implimentazzjoni tad-dispożizzjonijiet tal-Konvenzjoni hija msaħħa u tikkontribwixxi b'mod tanġibbli għal progress li mistenni jsir mill-Istati Parti riċeventi.

    L-għażla ta' Awtoritajiet Nazzjonali li jirċievu għotjiet issir abbażi ta' kriterji identifikati b'attenzjoni, inkluża dimostrazzjoni tal-kapaċità tagħhom li jagħmlu progress kwantifikabbli għall-implimentazzjoni tad-dispożizzjonijiet tas-CWC u b'mod konformi ma' pjan ta' azzjoni speċifiku għal kull pajjiż żviluppat matul żjara ta' għajnuna bilaterali. Mekkaniżmu ta' approvazzjoni għall-għażla ta' l-Awtoritajiet Nazzjonali u ta' konsulenti proposti ser jiġi stabbilit u jkun jinvolvi rappreżentanti tal-Presidenza tal-Kunsill ta' l-UE, l-Uffiċċju tar-Rappreżentant Personali tar-Rappreżentant Għoli dwar in-non-profilerazzjoni ta' d-WMD, is-Servizzi tal-Kummissjoni u l-OPCW. Tali għotjiet għandhom jikkontribwixxu biex l-Awtoritajiet Nazzjonali magħżula jsiru entitajiet li jsostnu lilhom infushom fis-snin sussegwenti.

    L-Awtoritajiet Nazzjonali riċeventi, sabiex jirċievu tali għotjiet, ikunu jeħtieġu li jipprovdu lill-OPCW b'objettivi kwantifikabbli li jridu jitwettqu kif ukoll skeda ta' żmien ċara għall-implimentazzjoni tagħhom bl-użu ta' l-għotjiet. Bħala parti mill-kuntratt, l-Awtorità Nazzjonali riċeventi tkun obbligata tirrapporta l-attivitajiet lill-OPCW fuq bażi regolari. L-iżburżar ta' l-għotjiet isiru f'pagamenti, b'pagamenti suċċessivi rilaxxati wara reviżjoni tal-progress miksub. L-OPCW ser tipprovdi lill-UE b'dettalji rilevanti ta' progress mill-Parti ta' l-Istati riċeventi kif ukoll rendikont finanzjarju dwar l-użu tal-fondi minn kull Parti ta' l-Istat riċeventi.

    Stima ta' spiża totali: EUR 180 000.

    ċ)

    il-parteċipazzjoni ta' Awtoritajiet Nazzjonali u awtoritajiet tad-dwana f'laqgħa waħda jew f'bosta laqgħat tekniċi fl-Aja jew f'reġjuni differenti dwar id-dispożizzjonijiet ta' trasferimenti tas-CWC. Dan huwa maħsub għal tixrid usa' ta' informazzjoni dwar dawn id-dispożizzjonijiet. Dawn il-laqgħat ser jinvolvu wkoll, kif xieraq, eżerċizzji ta' simulazzjoni, diskussjonijiet dwar xenarji u skambji ta' esperjenzi minn esperti mill-UE u Stati parteċipanti oħra.

    Stima ta' Spiża Totali: EUR 180 000.

    Stima ta' Spiża Totali tal-Proġett 2: EUR 585 000.

    2.3.   Proġett 3: Il-kooperazzjoni internazzjonali fil-qasam ta' attivitajiet kimiċi

     

    Għan tal-proġett:

    Biex jiġi faċilitat l-iżvilupp tal-kapaċitajiet ta' l-Istati Parti fl-implimentazzjoni tas-CWC fil-qasam ta’ attivitajiet kimiċi b'mod konformi ma' l-Artikolu XI tagħha.

    Dan il-proġett jiffoka essenzjalment fuq il-bini ta' kapaċitajiet permezz tal-provvista ta' appoġġ għal laboratorji analitiċi u taħriġ fil-qasam ta' abilitajiet analitiċi.

     

    Riżultati/attivitajiet tal-proġett:

    (i)

    Il-provvista ta’ tagħmir essenzjali għat- titjib tal-kwalità u l-preċiżjoni ta’ analiżi kimiċi f’laboratorji finanzjati pubblikament fi Stati Parti li l-ekonomiji tagħhom qegħdin jiżviluppaw jew fi transizzjoni.

    (ii)

    Il-possibbiltà li tali laboratorji f’dawn il-pajjiżi ta’ mira jkunu kapaċi jgħollu l-livell ta’ kompetenza teknika tagħhom.

    (iii)

    L-assistenza għal kimiċi analisti kwalifikati minn Stati Parti biex jiksbu iżjed esperjenza u għarfien prattiku għall-iffaċilitar ta' l-analiżi ta’ kimiċi relatati ma’ l-implimentazzjoni nazzjonali tas-CWC.

     

    Deskrizzjoni tal-proġett:

    Il-kontribut ta' l-UE ser jiffoka fuq iż-żewġ aspetti li ġejjin:

    (a)

    Assistenza għal laboratorji

    Taħt Programm ta' Assistenza għal Laboratorji, l-OPCW qed tipprovdi assistenza biex titjieb il-kompetenza teknika ta' laboratorji impenjati fl-analiżi u l-monitoraġġ ta' kimiċi. L-assistenza bażikament tikkonsisti f’appoġġ finanzjarju għat-twettiq ta’ valutazzjoni jew verifika teknika ta’ laboratorju sabiex jiġi mtejjeb il-livell ta’ kompetenza tiegħu, għat-taħriġ ta’ persunal tekniku f’laboratorju/istituzzjoni avvanzat(a) għall-iżvilupp ta’ abilitajiet, għal apprendistat f’laboratorju akkreditat għall-iżvilupp ta’ abilitajiet, għat-tmexxija ta’ proġetti ta’ riċerka ta’ daqs żgħir relatati ma’ l-iżvilupp ta’ metodi, il-validazzjoni eċċ.

    Madankollu, l-appoġġ provdut mill-OPCW ma jkoprix l-ispiża tax-xiri ta' hardware jew spejjeż oħra ta' investiment. Barra minn hekk, billi għajnuna ta' esperti disponibbli fl-OPCW hija limitata minħabba impenji oħra, huwa meħtieġ li tali għajnuna tinkiseb minn għejjun esterni. Bħala parti mill-Azzjoni Konġunta tal-Kunsill ta' tat-22 ta' Novembru 2004, inbeda proġett dwar għajnuna għal laboratorji biex jiġi implimentat fl-2005 li taħtu tmien lobaratorji ffinanzjati pubblikament f'pajjiżi b'ekonomija li qed tiżviluppa jew transitorja qed jiġu pprovduti b'tagħmir analitiku essenzjali bħal kromatografu tal-gass ta' fuq il-bank (GC) jew kromatografu-spettrometru tal-massa tal-gass ta' fuq il-bank (GS-MS) b'għajnuna teknika meħtieġa sabiex itejbu l-kompetenza teknika tagħhom fl-analiżi tal-qasam tal-kimiċi relatati mas-CWC. Bħala risposta għal nota ċċirkolata mis-Segretarjat Tekniku ta' l-OPCW li kienet qed tfittex applikazzjonijiet għal appoġġ taħt il-proġett, ġew riċevuti numru totali ta' 100 applikazzjoni. Fost dawn, 19-l applikazzjoni ġew rakkomandati għal konsiderazzjoni ta' l-UE. Madankollu, peress li tmien laboratorji biss kellhom jingħataw appoġġ fl-ambitu tal-proġett fl-2005, il-ħdax-il każ li fadal imniżżla f'lista qasira ma setgħux jiġu kkunsidrati biex jiġu aċċettati.

    L-appoġġ ta’ l-UE biex tkun koperta l-ispiża għal tali ħtiġiet ikun ta’ għajnuna kbira biex il-laboratorji fil-pajjiżi ta’ mira ikunu kapaċi jtejbu l-kompetenzi tekniċi tagħhom b’mod sinifikattiv u sabiex titjieb il-kwalità u l-preċiżjoni ta’ analiżi kimiċi. Il-proġett il-ġdid li ser jiġi implimentat fl-2006 ser ikopri tmien laboratorji oħra, jew kemm il-fondi jippermettu, skond l-għażla mill-mekkaniżmu ta' approvazzjoni imsemmi fil-proġett 2.2.b.

    Dan il-proġett, għalhekk, ser ikun estensjoni tal-proġett ta' assistenza tal-laboratorju fl-2005. L-implimentazzjoni tiegħu tibda biss ladarba l-Istati Membri ta' l-UE jkunu għamlu valutazzjoni pożittiva tal-proġett attwali, abbażi tar-rapport bil-miktub li jiġi provdut mill-OPCW.

    Mekkaniżmu ta' approvazzjoni:

    Il-mekkaniżmu ta' approvazzjoni mwaqqaf għall-proġett 2.2b ser jintuża fl-għażla tal-benefiċjarji li jiġu ffinanzjati sknd din l-għotja. Ftehim minn qabel mill-Istati Membri ta' l-UE huwa meħtieġ għal proġetti li jirrigwardaw it-tmien laboratorji finanzjati pubblikament, inkluż appoġġ għal hardware. Laboratorji b'rabta mas-CWC biss għandhom ikunu eliġibbli u ser tingħata konsiderazzjoni kif xieraq dwar l-istatus ta' implimentazzjoni tas-CWC kif ukoll il-kontribut f'waqtu għall-Budget ta' l-OPCW mill-Istati benefiċjarji possibbli. Kwalunkwe trasferiment taħt dan il-proġett għandu jsir b'mod konformi mar-Regolament Nru. 1334/2000 tat-22 ta' Ġunju 2000 li jistabbilixxi reġim Komunitarju għall-kontroll ta' esportazzjonijiet ta' oġġetti u teknoloġija (1) li għandhom użu doppju kif ukoll il-linji gwida tas-sistema għall-kontroll ta' l-esportazzjoni rilevanti, fil-qafas ta' liema s-Segretarjat Tekniku ta' l-OPCW jista' jkun mistieden iwettaq rwol ta' superviżjoni. L-Istati Parti għall-CWC li jkunu benefiċarji taħt dan il-proġett għandhom jiggarantixxu l-użu ta' l-oġġetti trasferiti b'mod konformi mad-dispożizzjonijiet tal-CWC billi jiffirmaw Memorandum ta' Ftehim għal dan il-għan mas-Segretarjat Tekniku ta' l-OPCW.

    Stima ta' spiża totali: EUR 700 000;

    (b)

    Kors għall-iżvilupp ta’ abilitajiet analitiċi

    L-Azzjoni Konġunta tal-Kunsill tat-22 ta' Novembru 2004 pprovdiet appoġġ għal kors għall-iżvilupp analitiku għal 20 parteċipant imexxi fi Stat Membru ta' l-Unjoni Ewropea fl-2005. Il-kors tmexxa b'suċċess mill-24 ta' Ġunju sat-8 ta' Lulju 2005 fl-Olanda. Minħabba r-risposta enormi mill-pajjiżi mmirati, jiġifieri l-pajjiżi b'ekonomija li qed tiżviluppa jew transitorja, għall-parteċipazzjoni fil-kors (ġew riċevuti kważi 180 applikazzjoni), qed jiġi propost li jitmexxew 2 unitajiet ta' l-istess kors fl-2006. Il-korsijiet ser isiru fl-Ewropa bl-għajnuna ta' istituzzjoni waħda jew tnejn. Kull kors ser ikun miftuħ għal 20 parteċipant. Il-parteċipanti għandhom ikollhom konnessjoni ċara ma' l-attivitajiet tas-CWC u, b'mod partikolari, l-implimentazzjoni effettiva tas-CWC f'pajjiżhom. L-għanijiet tal-kors ser ikunu biex jgħin kimiċi analisti kwalifikati minn Stati Parti li jew qed jiżviluppaw jew għandhom ekonomiji fi transizzjoni biex jiksbu iżjed esperjenza u għarfien prattiku; biex tkun faċilitata l-analiżi ta’ kimiċi relatati ma’ l-implimentazzjoni nazzjonali tas-CWC; biex jittejbu l-kapaċitajiet nazzjonali fl-Istati Membri billi jiġi offrut taħriġ fil-kimika analitika lil persunal mil-laboratorji ta’ l-industrija, l-istituzzjonijiet akkademiċi u l-gvern; biex tiġi faċilitata l-adozzjoni ta’ prattiċi tal-laboratorju tajbin; u biex tiġi mwessa’ r-riżerva ta' ħaddiema li l l-Awtoritajiet Nazzjonali u s-Segretarjat jistgħu juttilizzaw fil-futur. Għandu jkopri kemm taħriġ teoretiku kif ukoll prattiku f'oqsma li jirrelataw mas-sistema ta' validazzjoni, l-iskoperta u l-korrezzjoni ta' problemi, it-tħejjija u l-analiżi ta' kampjuni. Kull kors ser ikun ta' perijodu ta' gimgħatejn f'Ġunju-Lulju jew fi kwalunkwe perijodu konvenjenti ieħor fl-2006.

    Stima ta' spiża totali: EUR 230 000.

    Stima ta' Spiża Totali tal-Proġett 3: EUR. 930 000.

    3.   Tul ta’ żmien

    It-tul ta' żmien totali stmat għall-implimentazzjoni ta' din l-Azzjoni Konġunta hu ta' 12-il xahar.

    4.   Benefiċjarji

    Il-benefiċjarji ta' attivitajiet relatati ma' l-universalità huma Stati mhux Parti għas-CWC (kemm Stati firmatarji kif ukoll Stati mhux firmatarji). Il-benefiċjarji ta' attivitajiet relatati ma' l-implimentazzjoni huma Stati Parti għas-CWC mhux fl-UE. L-għażla tal-pajjiżi benefiċjarji ser ikunu identifikati mill-OPCW f'koordinazzjoni mal-Presidenza tal-Kunsill ta' l-UE.

    5.   Entità ta' implimentazzjoni

    L-OPCW ser tiġi fdata bl-implimentazzjoni tat-tliet proġetti. L-implimentazzjoni ta' dawn it-tliet proġetti ser tkun imwettqa mill-persunal ta' l-OPCW bl-għajnuna ta' l-Istati Parti għall-OPCW u l-istituzzjonijiet, l-esperti jew il-kuntratturi magħżula tagħhom, bħal hawn fuq. Fil-każ ta' kuntratturi, l-akkwist ta' kwalunkwe oġġett, xogħolijiet jew servizz mill-OPCW fil-kuntest ta' din l-Azzjoni Konġunta għandu jiġi mwettaq skond ir-regoli u l-proċeduri applikabbli ta' l-OPCW, kif spjegat fil-Ftehim dwar il Kontribut tal-Komunità Ewropea ma' Organizzazzjoni Internazzjonali.

    6.   Partijiet parteċipanti terzi

    Dawn il-proġetti ser jiġu finanzjati 100 % minn din l-Azzjoni Konġunta. L-esperti ta' l-Istati Parti ta' l-OPCW jistgħu jiġu kkunsidrati bħala partijiet parteċipanti terzi. Huma ser jaħdmu taħt ir-regoli standard ta' operazzjoni għall-esperti ta' l-OPCW.

    7.   Stima ta' finanzi meħtieġa

    Il-kontribut ta' l-UE ser ikopri 100 % ta' l-implimentazzjoni tat-tliet proġetti kif deskritt f'dan l-Anness. L-istimi ta' l-ispejjeż huma kif ġej:

    Proġett 1

    EUR 126 000

    Proġett 2

    EUR 585 000

    Proġett 3

    EUR 930 000

    SPIŻA TOTALI (minbarra l-kontinġenzi):

    EUR 1 641 000

    Barra minn dan, riżerva ta' kontinġenza ta' madwar 3 % ta' l-ispejjeż eliġibbli (EUR 56 000) hi inkluża.

    SPIŻA TOTALI (inklużi l-kontinġenzi):

    EUR 1 697 000

    8.   Ammont finanzjarju ta' referenza biex ikopri l-ispiża sħiħa tal-proġett

    L-ispiża totali tal-proġett hi ta' EUR 1 697 000.

    (1)  ĠU L 159, 30.6.2000, p. 1. Regolament kif emendat l-aħħar bir-Regolament (KE) Nru 1504/2004 (ĠU L 281, 31.8.2004, p. 1).

    Top