29.11.2008

MT

Il-Ġurnal Uffiċjali ta’ l-Unjoni Ewropea

187

---

DEĊIŻJONI TAL-KUMMISSJONI

ta’ l-1 ta’ April 2005

li tistabilixxi regoli dettaljati dwar il-monitoraġġ tal-użu mill-ġdid/rkupru u l-miri tal-użu mill-ġdid/rkupru stipulati fid-Direttiva 2000/53/KE tal-Parlament Ewropew u tal-Kunsill dwar vetturi li m’għadhomx jintużaw

(notifikat bid-dokument numru C(2004) 2849)

(2005/293/KE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat id-Direttiva 2000/53/KE tal-Parlament Ewropew u tal-Kunsill tat-18 ta’ Settembru 2000 dwar vetturi li m’għadhomx jintużaw (1), u b’mod partikolari t-tielet subparagrafu tal-Artikolu 7(2) tagħha,

Billi:

(1)

Skont id-Direttiva 2000/53/KE l-Kummissjoni hija meħtieġa tistabbilixxi regoli dettaljati li huma neċessarji biex tiġi kkontrollata l-osservanza mill-Istati Membri tal-miri stipulati fl-ewwel subparagrafu tal-Artikolu 7(2) ta’ dik id-Direttiva. Huwa biżżejjed illi l-Istati Membri juru li tal-anqas intlaħqu l-miri rikjesti.

(2)	Huwa neċessarju li jiġu armonizzati l-karatteristiċi u l-preżentazzjoni tal-kalkolu tal-miri stipulati fl-ewwel subparagrafu tal-Artikolu 7(2), sabiex id-dejta prodotta mill-Istati Membri tkun tista’ tiġi mqabbla.

(3)	L-akbar preċiżjoni tal-miri tista’ tinkiseb biss jekk id-denominatur għall-kalkolu tal-miri jkun ibbażat fuq in-numru ta’ vetturi li m’għadhomx jintużaw li jiddaħħlu f’sistema tat-trattament ta’ xi Stat Membru.

(4)	Biex jiġu bbilanċjati r-riskji ta’ ineżattezzi u l-isforzi amministrattivi ħalli tinkiseb informazzjoni preċiża, l-Istati Membri huma permessi jużaw ipoteżi tal-kontenut ta’ metall biex jistabbilixxu l-ammont ta’ metalli li jista’ jiġi rkuprat minn vetturi li m’għadhomx jintużaw.

(5)	Għandha tintuża informazzjoni diġà disponibbli dwar il-vetturi, li tkun f’forma standardizzata, biex jiġi stabbilit il-piż ta’ vettura.

(6)

Il-fjuwil li jitneħħa matul iż-żarmar ma għandux jitqies għall-kalkolu tal-miri, peress li mhix disponibbli fl-Istati Membri kollha informazzjoni affidabbli dwar l-ammont ta’ fjuwil li hemm fil-vetturi li m’għadhomx jintużaw. Għandu jintuża ammont ta’ fjuwil li jkun il-medja tal-UE għall-iskop li tiġi mmonitorjata l-osservanza tal-miri, sabiex, kemm jista’ jkun, jiġu armonizzati l-metodi ta’ kalkolu u b’hekk tiġi żgurata l-komparabilità tal-miri nazzjonali milħuqa fl-Istati Membri.

(7)

Bħala konsegwenza tas-suq intern, l-Istati Membri jistgħu jesportaw il-vetturi li m’għadhomx jintużaw iġġenerati fit-territorju tagħhom lil pajjiżi oħra għal trattament ulterjuri. Sabiex jitnaqqsu l-problemi tal-allokazzjoni u sabiex jiġu evitati sforzi estensivi ta’ monitoraġġ u kalkolu, ir-rata tar-riċiklaġġ u l-rkupru mill-partijiet tal-vetturi esportati għandha tiġi attribwita lill-Istat Membru li jkun esportahom.

(8)	Huma meħtieġa kampanji dwar il-magni tat-tqattigħ (shredders) sabiex jiġu stabbiliti l-output streams ta’ magna tat-tqattigħ b’rabta ma’ vetturi li m’għadhomx jintużaw.

(9)

Il-Kummissjoni għandha tkompli timmonitorja l-kalkolu tal-miri, inkluża r-rilevanza tal-massa tal-esportazzjonijiet u l-influwenza tagħha fuq ir-rati tar-riċiklaġġ u l-irkupru. Għal dan il-għan, l-Istati Membri għandhom jirrappurtaw ukoll it-tagħrif ta’ qabel is-sena 2006. Din l-informazzjoni għandha tintuża biss għal skopijiet ta’ monitoraġġ.

(10)	Din id-Deċiżjoni tapplika mingħajr preġudizzju għar-Regolament 2150/2002/KE dwar l-Istatistika tal-Iskart (2).

(11)	Il-miżuri maħsuba f’din id-Deċiżjoni huma skont l-opinjoni tal-Kumitat stabbilit bl-Artikolu 18 tad-Direttiva tal-Kunsill 75/442/KEE (3),

ADOTTAT DIN ID-DEĊIŻJONI:

Artikolu 1

1.   L-Istati Membri għandhom jikkalkulaw l-użu mill-ġdid/irkupru u l-miri dwar l-użu mill-ġdid/irkupru stipulati fis-subparagrafu tal-Artikolu 7(2) tad-Direttiva 2000/53/KE fuq il-bażi tal-materjali użati mill-ġdid, riċiklati u rkuprati minn operazzjonijiet ta’ dekontaminazzjoni, żarmar u (ta’ wara) t-tqattigħ. L-Istati Membri għandhom jiżguraw illi għar-rigward tal-materjali li jgħaddu għal trattament ulterjuri, jiġi kkunsidrat l-irkupru li jkun sar tabilħaqq.

Għal dan il-għan, l-Istati Membri għandhom jimlew it-tabelli 1-4 ippreżentati fl-Anness għal din id-Deċiżjoni flimkien ma’ deskrizzjoni xierqa tal-informazzjoni li ntużat.

2.   Meta jimlew it-tabelli 1-4 tal-Anness għal din id-Deċiżjoni, l-Istati Membri jistgħu wkoll jużaw ipoteżi bbażata informazzjoni dwar il-perċentwal medju tal-metalli użati mill-ġdid, riċiklati u rkuprati ta’ vetturi li m’għadhomx jintużaw, minn hawn ’il quddiem l-“ipoteżi tal-kontenut ta’ metall.” Din l-ipoteżi għandha tkun imsaħħa minn informazzjoni dettaljata li tispjega l-perċentwali preżunta ta’ kontenut tal-metall, kif ukoll il-perċentwali preżunta ta’ użu mill-ġdid, irkupru u riċiklaġġ ta’ metall. Din l-informazzjoni għandha tkun valida għal mill-anqas 95 % tal-vetturi li m’għadhomx jintużaw li jirriżultaw mill-Istat Membru inkwistjoni.

3.   Fl-informazzjoni, l-Istati Membri għandhom jinkludu analiżi statistika ta’ dawn li ġejjin:

a)	is-suq nazzjonali attwali tal-vetturi;

b)	il-vetturi li m’għadhomx jintużaw fit-territorju tagħhom; u

ċ)	il-materjali tal-vetturi u l-komponenti inklużi f’din ipoteżi, biex jiġi evitat l-għadd doppju.

Artikolu 2

1.   Fil-każ ta’ vetturi li m’għadhomx jintużaw, jew materjali jew partijiet minnhom, li dwarhom ikun inħareġ ċertifikat ta’ distruzzjoni minn faċilità nazzjonali awtorizzata tat-trattament, u li jkunu ġew esportati f’xi Stati Membri oħrajn jew pajjiżi terzi għal trattament ulterjuri, dak it-trattament għandu, għall-finijiet tal-kalkolu tal-miri, jiġi attribwit lill-Istat Membru li jkun qed jesporta, jekk ikun hemm evidenza soda li r-riċiklaġġ u/jew l-irkupru jkunu f’kondizzjonijiet ġenerali ekwivalenti għal dawk preskritti mil-leġiżlazzjoni Komunitarja dwar din il-materja.

Vetturi li ma jkunux għadhom jintużaw u li dwarhom ikun inħareġ ċertifikat ta’ distruzzjoni minn Stat Membru ieħor jew minn pajjiż terz u li jiġu impurtati għal irkupru u/jew riċiklaġġ fi Stat Membru, m’għandhomx jingħaddu bħala rkuprati jew riċiklati mill-Istat Membru li jkun importahom.

2.   Fil-każ ta’ esportazzjoni lejn pajjiżi terzi, l-Istati Membri għandhom jiddeterminaw jekk tkunx meħtieġa dokumentazzjoni addizzjonali biex tingħata prova li l-materjali esportati jkunu fil-fatt riċiklati jew irkuprati.

Artikolu 3

1.   It-tabelli stipulati fl-Anness għandhom jimtlew mill-Istati Membri kull sena, billi jibdew bl-informazzjoni għall-2006 u għandhom jintbagħtu lill-Kummissjoni fi żmien 18-il xahar minn għeluq is-sena rilevanti.

2.   Għas-snin ta’ qabel l-2006, l-Istati Membri għandhom jirrappurtaw l-informazzjoni disponibbli lill-Kummissjoni fi żmien 12-il xahar minn għeluq is-sena relevanti. L-informazzjoni marbuta mas-snin ta’ qabel l-2006 għandha tintuża biss għal skopijiet ta’ monitoraġġ.

Artikolu 4

Din id-Deciżjoni hija indirizzata lill-Istati Membri.

---

(1)  ĠU L 269, 21.10.2000, p. 34. Id-Direttiva kif emendata l-aħħar bid-Direttiva tal-kummissjoni 2005/63/KE (ĠU L 25, 28.1.2005, p. 73).

(2)  ĠU L 332, 9.12.2002, p. 1. Ir-Regolament hekk kif emendat l-aħħar bir-Regolament tal-Kummissjoni (KE) Nru 574/2004 (ĠU L 90, 27.3.2004, p. 15)

(3)  ĠU L 194, 25.7.1975, p. 39. Id-Direttiva kif emendata l-aħħar bir-Regolament (KE) Nru 1882/2003 tal-parlament Ewropew u tal-Kunsill (ĠU L 284, 31.10.2003, p. 1).

---

---