32003R0068

Ir-Regolament tal-Kummissjoni (KEE) Nru 68/2003

tas-16 ta’ Jannar 2003

dwar l-użu ta’ informazzjoni, minbarra informazzjoni miksuba minn stħarriġ statistiku, u l-perjodu li fih trid issir il-komunikazzjoni tar-riżultati ta’ l-istħarriġ tat-2003 dwar l-istruttura ta’ azjendi agrikoli

IL-KUMMISSJONI TA’ L-KOMUNITAJIET EWROPEJ

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KEE) Nru 571/88 tad-29 ta’ Frar 1988 dwar l-organizzazzjoni ta’ stħarriġ Komunitarju dwar l-istruttura ta’ azjendi agrikoli [1], kif l-aħħar emendat bir-Regolament tal-Kummissjoni (KE) Nru 143/2002 [2], u b’mod partikolari l-Artikolu 8(2) u punt 5 ta’ l-Anness II,

Billi:

(1) Skond l-Artikolu 8(2) tar-Regolament tal-Kunsill (KEE) Nru 571/88, uħud mill-Istati Membri talbu li jkunu awtorizzati mill-Kummissjoni sabiex jużaw informazzjoni li tkun diġa disponibbli minn egħjun oħra iżda mhux minn stħarriġ statistiku dwar ċerti karatteristiċi.

(2) Ir-riżultati ta’ l-istħarriġ dwar l-istruttura huma ta’ importanza kbira għall-politika agrikola komuni. Huwa neċessarju li jinżamm livell għoli fil-kwalità ta’ l-informazzjoni u għalhekk l-użu ta’ data minn egħjun li mhumiex stħarriġ statistiku jista’ jiġi aċċettat biss jekk din id-data hija ta’ min joqgħod fuqha daqs li kieku kienet data minn stħarriġ statistiku.

(3) Il-perjodu li fih trid tiġi komunikata d-data ta’ l-istħarriġ individwali mill-istħarriġ tat-2003 dwar l-istruttura ta’ azjendi agrikoli għandu jiġi stipulat mill-Kummissjoni. Il-Kummissjoni għandha tieħu in konsiderazzjoni l-fatt illi l-kalendarju għat-twettiq ta’ l-istħarriġ ivarja minn Stat Membru għall-ieħor.

(4) Minħabba l-importanza tar-riżultati ta’ l-istħarriġ dwar l-istruttura għall-politika agrikola komuni u t-talba li dejjem tiżdied għal data aġġornata, id-data mill-istħarriġ għandha tiġi proċessata u komunikata lill-Kummissjoni (Eurostat) malajr kemm jista’ jkun.

(5) Il-miżuri stipulati f’dan ir-Regolament huma skond l-opinjoni tal-Kumitat Permanenti dwar Statistiċi Agrikoli,

ADOTTAT DAN IR-REGOLAMENT:

Artikolu 1

1. Id-Danimarka, il-Ġermanja, l-Olanda, l-Awstrija, l-Isvezja, u r-Renju Unit huma awtorizzati sabiex jużaw informazzjoni li tkun diġa disponibbli, minbarra dik l-informazzjoni li tkun ġejja mill-istħarriġ statistiku ta’ l-istħarriġ ta’ l-2003 dwar l-istruttura ta’ azjendi agrikoli. L-egħjun li jistgħu jkunu użati huma mniżżla fl-Anness I ta’ dan ir-Regolament.

2. L-Istati Membri msemmija fil-paragrafu 1 għandhom jieħdu l-miżuri neċessarji sabiex jassiguraw illi din l-informazzjoni hija, ta’ l-anqas, ta’ l-istess kwalità daqs l-informazzjoni miksuba minn stħarriġ statistiku.

Artikolu 2

Fil-perjodi stipulati fl-Anness II, l-Istati Membri għandhom jikkomunikaw id-data minn stħarriġ individwali mill-istħarriġ ta’ l-2003 dwar l-istruttura ta’ azjendi agrikoli, liema data għandha tkun ikkonfermata.

Artikolu 3

Dan ir-Regolament għandu jidħol fis-seħħ fl-20 jum wara dak tal-pubblikazzjoni tiegħu fil-Ġurnal Uffiċjali tal-Komunitajiet Ewropej.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussel, 16 Jannar 2003.

Għall-Kummissjoni

Franz Fischler

Membru tal-Kummissjoni

[1] ĠU L 56, tat-2.3.1988, p. 1.

[2] ĠU L 24, tas-26.1.2002, p. 16.

--------------------------------------------------

L-ANNESS I

Egħjun, minbarra stħarriġ strutturali, li huma awtorizzati sabiex jiġu użati fl-istħarriġ ta’ l-2003 dwar l-istruttura ta’ azjendi agrikoli:

Id-Danimarka | Sistema Integrata ta' Amministrazzjoni u Kontroll |

Il-Ġermanja | Sistema Integrata ta' Amministrazzjoni u Kontroll |

L-Olanda | Sistema Integrata ta' Amministrazzjoni u Kontroll; Reġistru Nazzjonali ta' l-Irziezet |

L-Awstrija | Sistema Integrata ta' Amministrazzjoni u Kontroll; Sistema ta' identifikazzjoni u reġistrazzjoni ta' annimali bovini |

L-Isvezja | Sistema Integrata ta' Amministrazzjoni u Kontroll; Sistema ta' identifikazzjoni u reġistrazzjoni ta' annimali bovini |

Ir-Renju Unit: | Sistema Integrata ta' Amministrazzjoni u Kontroll; Sistema ta' identifikazzjoni u reġistrazzjoni ta' annimali bovini; Reġistru tal-Biedja Organika |

--------------------------------------------------

L-ANNESS II

Limiti ta’ żmien għall-komunikazzjoni tad-

data

individwali t ta’ l-istħarriġ lill-Ewrostat :

L-Istat Membru | Perjodu ta' stħarriġ | Limitu ta' żmien |

Il-Belġju | Mejju 2003 | tal- 31.8.2004 |

Id-Danimarka | Mejju 2003 | tal- 31.8.2004 |

Il-Ġermanja | Mejju sa Ġunju 2003 | tal- 31.12.2004 |

Il-Greċja | Novembru sa Diċembru 2003 | tal- 31.12.2004 |

Spanja | Ottubru sa Diċembru 2003 | tal- 31.12.2004 |

Franza | Ottubru sa Diċembru 2003 | tal- 31.12.2004 |

L-Irlanda | Ġunju sa Awissu 2003 | tal- 31.8.2004 |

L-Italja | Ottubru sa Diċembru 2003 | tal- 31.12.2004 |

Il-Lussemburgu | Mejju sa Ġunju 2003 | tal- 31.8.2004 |

L-Olanda | April sa Ġunju 2003 | tal- 31.8.2004 |

L-Awstrija | Diċembru 2003 | tal- 31.12.2004 |

Il-Portugall | Novembru 2003 sa Frar 2004 | tal- 31.12.2004 |

Il-Finlandja | Mejju u Novembru 2003 | tal- 31.8.2004 |

L-Isvezja | Ġunju 2003 | tal- 31.8.2004 |

Ir-Renju Unit | Frar sa Ottubru 2003 | tal- 31.8.2004 |

--------------------------------------------------