32002R0315

Ir-Regolament tal-Kummissjoni (KE) Nru 315/2002

tal-20 ta’ Frar 2002

dwar l-istħarriġ ta' prezzijiet ta’ karkassi ta’ nagħaġ friski jew imkessħa fi swieq rappreżentattivi fil-Komunità

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunitajiet Ewropej,

Wara li kkunsidrat ir-Regolament tal-Kunsill (KE) Nru 2529/2001 tad-19 ta’ Diċembru 2001 dwar l-organizzazzjoni komuni tas-suq fil-laħam tan-nagħaġ u tal-mogħoż [1], u b’mod partikolari l-Artikoli 20 u 24 tiegħu,

Billi:

(1) Ir-Regolament (KE) Nru 2529/2001 jistabbilixxi sistema ġdida ta’ primjumijiet biex tissostitwixxi s-sistema preskritta fir-Regolament tal-Kunsill (KE) Nru 2467/98 tat-3 ta' Novembru 1998 dwar l-organizzazzjoni komuni tas-suq tal-laħam tan-nagħaġ u l-laħam tal-mogħoż [2], kif emendat bir-Regolament (KE) Nru 1669/2000 [3]. Biex jitqiesu l-arranġamenti l-ġodda u fl-interess taċ-ċarezza huwa meħtieġ li jkunu stabbiliti regoli ġodda biex jissostitwixxu lil dawk preskritti fir-Regolament tal-Kummissjoni (KEE) Nru 1481/86 tal-15 ta' Mejju 1986 dwar l-istabbiliment ta’ prezzijiet ta' karkassi tal-ħaruf frisk jew imkessaħ fi swieq rappreżentattivi tal-Komunità u l-istħarriġ tal-prezzijiet ta' ċerti kwalitajiet oħra ta' karkassi tan-nagħaġ fil-Komunità [4], kif l-aħħar emendat bir-Regolament (KE) Nru 2877/2000 [5].

(2) Skond l-Artikolu 20 tar-Regolament (KE) Nru 2529/2001, l-Istati Membri għandhom jirrekordjaw il-prezzijiet ta’ l-annimali ovini u tal-laħam ta’ l-annimali ovini. Ir-regoli għall-applikazzjoni ta’ rapportaġġ tal-prezzijiet għandhom għalhekk ikunu stabbiliti.

(3) Il-prezzijiet għandhom ikunu dawk irrekordjati fis-suq rappreżentattiv jew fis-swieq ta’ kull Stat Membru għad-diversi kategoriji ta’ karkassi tan-nagħaġ friski jew imkessħa. Barra dan, fejn hemm iktar minn suq rappreżentattiv wieħed fi Stat Membru l-medja aritmetika jew, jekk meħtieġ, peżata ta’ kwotazzjonijiet irrekordjati f’dawn is-swieq għandha tittieħed.

(4) Il-prezzijiet irrekordjati fis-suq għandhom ikunu bbażati fuq il-prezzijiet, eskluża t-taxxa fuq il-valur miżjud, ta’ karkassi, imma mingħajr tnaqqis awtorizzat fir-rigward ta’ ħlasijiet oħra. Prezzijiet tas-suq għandhom ikunu rrekordjati fir-rigward tal-"piż tal-karkassa" kif iddefinit fid-Deċiżjoni tal-Kummissjoni 94/434/KE tat-30 ta’ Mejju 1994 li tippreskrivi regoli dettaljati għall-applikazzjoni tad-Direttiva tal-Kunsill 93/25/KEE dwar l-istħarriġ statistiku li għandu jitwettaq minn Stati Membri fuq il-popolazzjoni tan-nagħaġ u l-mogħoż u l-produzzjoni [6], kif l-aħħar emendata bid-Deċiżjoni 1999/47/KE [7]. Madankollu, għandu jkun permess li din id-definizzjoni ma tintużax fil-każ ta’ karkassi ta’ ħrief żagħżugħa li jiżnu bejn id-9 u s-16-il kilogramma, biex prattiċi tas-suq, li bihom karkassi sħaħ għall-bejgħ bir-ras u l-ġewwieni jġibu valur kummerċjali ikbar, jistgħu jitqiesu.

(5) F’ċerti Stati Membri l-prezzijiet jirrelataw għal prezzijiet ta' annimali ħajjin. Dawn il-prezzijiet għandhom imbagħad jiġu konvertiti permezz ta’ koeffiċjenti approprjati. Madankollu, f’reġjuni fejn l-istima individwali ta’ annimali ħajjin issir biex ikun stmat il-piż tal-karkassa l-konverżjoni tista’ tkun ibbażata fuq dik l-istima.

(6) Biex tkun spjegata l-bażi li fuqha Stati Membri jiġbru l-prezzijiet, dawn għandhom jgħarrfu lill-Kummissjoni bis-swieq rappreżentattivi magħżula u l-kategoriji ta’ karkassi u l-peżar jew l-importanza relattiva ta’ dawk l-elementi użati għall-kalkolazzjoni tal-prezzijiet.

(7) Il-miżuri previsti f'dan ir-Regolament huma skond l-opinjoni tal-Kumitat ta' Ġestjoni għan-Nagħaġ u l-Mogħoż,

ADOTTAT DAN IR-REGOLAMENT:

Artikolu 1

1. Stati Membri li l-produzzjoni tagħom tal-laħam tan-nagħaġ teċċedi l-200 tunnellata metrika kull sena għandhom jibagħtu lill-Kummissjoni, l-iktar tard kull nhar ta’ Ħamis, il-prezzijiet ta’ karkassi friski jew imkessħa ta' ħrief u nagħaġ.

2. Il-prezzijiet għandhom ikunu dawk irrekordjati fl-arei ta’ kwotazzjonijiet imsemmijin fl-Artikolu 12 tar-Regolament (KE) Nru 2529/2001 ta’ Stati Membri li jissodisfaw ir-rekwiżiti preskritti fil-paragrafu 1. Dawn għandhom ikunu prezzijiet bl-ingrossa rrekordjati minn dawk l-Istati Membri fis-suq jew swieq rappreżentattivi matul il-ġimgħa ta’ qabel il-ġimgħa li fiha tingħata l-informazzjoni. Is-suq jew swieq rappreżentattivi għandhom ikunu determinati mill-Istati Membri msemmija iktar ’il fuq. Il-prezzijiet għandhom ikunu kkalkolati fuq il-bażi ta' prezzijiet tas-suq, mingħajr it-taxxa ta’ valur miżjud.

Artikolu 2

1. Il-prezzijiet tas-suq għandhom ikunu rrekordjati fir-rigward tal-"piż tal-karkassa" fis-sens tad-Deċiżjoni Nru 94/434/KE.

Fejn il-prezzijiet huma rrekordjati skond kategoriji differenti ta’ karkassi l-prezz fis-suq rappreżentattiv għandu jkun ugwali għall-medja, peżata b’koeffiċjenti stabbiliti minn Stati Membri biex jirriflettu l-importanza relattiva ta’ kull kategorija, tal-prezzijiet irrekordjati għall-kategoriji msemmija matul perjodu ta’ sebat ijiem fl-istadju ta’ l-ingrossa.

2. Fil-każ ta’ karkassi tal-ħrief li jiżnu sa 16-il kilogramma, u skond il-prattika normali kummerċjali, prezzijiet jistgħu jkunu rrekordjati qabel it-tneħħija tal-ġewwieni u t-tneħħija tar-ras.

Meta prezzijiet huma rreġistrati fuq bażi ta’ piż tal-ħaj, il-prezzijiet kull kilogramma piż tal-ħaj għandhom ikunu diviżi b'koeffiċjent massimu ta’ konverżjoni ta’ 0,5. Madankollu, fejn il-prattika normali hija li tinkludi r-ras u l-ġewwieni mal-karkassa, għal ħrief li jiżnu sa 28 kilogramma piż tal-ħaj l-Istati Membri jistgħu jistabbilixxu koeffiċjent ogħla.

F'reġjuni fejn ir-rekordjar tal-prezz huwa bbażat fuq l-istima individwali tal-piż tal-karkassi tal-ħrief, il-konverżjoni għandha tkun ibbażata fuq dik l-istima.

Artikolu 3

1. Fejn swieq isiru iktar minn darba matul il-perjodu ta’ sebat ijiem imsemmija fl-Artikolu 2(1), il-prezz ta’ kull kategorija għandu jkun il-medja aritmetika tal-kwotazzjonijiet irrekordjati matul kull suq.

2. Fejn ikun hemm numru ta' swieq rappreżentattivi f’area ta’ kwotazzjonijiet il-prezz għal dik l-area ta’ kwotazzjonijiet għandu jkun il-medja tal-prezzijiet irrekordjati fis-swieq imsemmija, peżata b’koeffiċjenti stabbiliti mill-Istati Membri biex jirriflettu l-importanza relattiva ta’ kull suq jew ta’ kull kategorija.

3. Madankollu, fejn ebda informazzjoni ma tkun disponibbli l-prezzijiet tas-swieq rappreżentattivi ta’ dak l-Istat Membru għandhom ikunu ddeterminati b’referenza b’mod partikolari għall-aħħar prezzijiet magħrufa.

Artikolu 4

Stati Membri għandhom jgħarrfu lill-Kummissjoni sa l-1 ta’ Marzu 2002 bi:

(a) is-swieq rappreżentattivi ta’ kull area ta’ kwotazzjonijiet;

(b) il-kategoriji ta' karkassi tal-ħrief;

(ċ) il-koeffiċjenti ta’ peżar u konverżjoni msemmijin fl-Artikoli 2 u 3.

Stati Membri għandhom jgħarrfu lill-Kummissjoni b’xi bidliet fl-arranġamenti fi żmien xahar wara xi tibdil bħal dan.

Artikolu 5

Ir-Regolament (KEE) Nru 1481/86 hu b’dan imħassar.

Artikolu 6

Dan ir-Regolament għandu jidħol fis-seħħ fit-tielet jum wara l-pubblikazzjoni tiegħu fil-Ġurnal Uffiċjali tal-Komunitajiet Ewropej.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussel, 20 ta’ Frar 2002.

Għall-Kummissjoni

Franz Fischler

Membru tal-Kummissjoni

[1] ĠU L 341, tat-22.12.2001, p. 3.

[2] ĠU L 312, ta' l-20.11.98, p. 1.

[3] ĠU L 193, tad-29.7.2000, p. 8.

[4] ĠU L 130, tas-16.5.1986, p. 12.

[5] ĠU L 333, tad-29.12.2000, p. 57.

[6] ĠU L 179, tat-13.7.1994, p. 33.

[7] ĠU L 15, ta' l-20.1.1999, p. 10.

--------------------------------------------------