32001D0697

Id-Deċiżjoni tal-Kummissjoni

tal-5 ta’ Settembru 2001

li tikkonċerna li l-klorfenapir ma tkunx inkluża f’Anness I għad-Direttiva tal-Kunsill Nru 91/414/KEE

(notifikata bin-numru tad-dokument Ċ(2001) 2617)

(Test b’ relevanza għaż-ŻEE)

(2001/697/KE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat id-Direttiva tal-Kunsill 91/414/KEE tal-15 ta’ Lulju 1991 dwar it-tpoġġija fis-suq ta’ prodotti li jipproteġu l-pjanti [1], kif l-aħħar emendata bid-Direttiva tal-Kummissjoni 2001/49/KE [2], u partikolarment Artikolu 6(1) tagħha,

Billi:

(1) Skond Artikolu 6(2) tad-Direttiva 91/414/KEE (minn hawn ’il quddiem msejħa d-Direttiva) Spanja rċeviet fis-7 ta’ Lulju 1995 applikazzjoni mingħand Cyanamid, (l-applikant) għall-inklużjoni tas-sustanza attiva il-klorfenapir f’Anness I għad-Direttiva.

(2) Skond il-provedimenti ta’ Artikolu 6(3) tad-Direttiva il-Kummissjoni kkonfermat id-Deċiżjoni tagħha 96/521/KE [3] li l-inkartament sottomess għall-klorfenapir ma jistax ikun kunsidrat li jissodisfa, fil-prinċipju, il-kundizzjonijiet tad-data u ta’ l-informazzjoni t’Anness II u għal prodott li jipproteġi l-pjanti li fih din is-sustanza attiva, t’Anness III għad- Direttiva.

(3) Skond Artikolu 5(1) tad-Direttiva, sustanza attiva għandha tkun inkluża f’Anness I għal perijodu ta’ mhux aktar minn 10 snin jekk ikun mistenni li la l-użu u lanqas ir-residwi ta’ prodotti li jipproteġu l-pjanti li jkun fihom is-sustanza attiva ma jkollhom ebda effett ta’ ħsara fuq is-saħħa tan-nies jew ta’ l-annimali jew l-ilma ta’ l-ispieri jew effett mhux aċċettabbli fuq l-ambjent.

(4) Għall-klorfenapir, l-effetti fuq is-saħħa tal-bniedem u fuq l-ambjent ġew stmati, skond il-provvedimenti ta’ Artikolu 6(2) u (4) tad-Direttiva, għall-użu propost mill-applikant. Spanja waqt li aġixxiet bħala Stat Membru nominat biex tħejji r-rapport, issottomettiet abbozz ta’ rapport ta’ valutazzjoni dwar is-sustanza lill-Kummissjoni fit-30 ta’ Novembru 1998.

(5) Meta rċeviet ir-rapport minn għand l-Istat Membru nominat biex iħejjih, il-Kummissjoni daħlet f’konsultazzjonijiet ma’ esperti ta’ l-Istati Membri kif ukoll ma’ l-applikant Cyanamid kif maħsub f’Artikolu 6(4) tad-Direttiva.

(6) Ir-rapport ta’ valutazzjoni mħejji minn Spanja ġie eżaminat mill-Istati Membri u l-Kummissjoni fi ħdan il-Kumitat Permanenti dwar is-Saħħa tal-Pjanti. Dan l-eżami kien finalizzat fis-27 ta’ April 2001 fil-format ta’ rapport ta’ eżami tal-Kummissjoni għall-Klorfenapir.

(7) Valutazzjonijiet maħduma fuq il-bażi ta’ informazzjoni sottomessa qajmu aktar mistoqsijiet partikolarment dwar x’ isir minnha u kif taġixxi s-sustanza fl-ambjent.

(8) L-applikant informa lill-Kummissjoni u lill-Istat Membru nominat biex iħejji r-rapport li ma baqax jixtieq jieħu sehem fil-programm ta’ xogħol għal din is-sustanza attiva, u għalhekk xejn aktar informazzjoni mhu ser ikun sottomessa.

(9) Għalhekk, mhuwiex possibbli li din is-sustanza attiva tkun inkluża f’Anness I għad-Direttiva 91/414/KEE.

(10) Perijodu ta’ konċessjoni għar-rimi, għal-ħażna, għat-tpoġġija fis-suq u l-użu tal-istokk eżistenti ta’ prodotti li jipproteġu l-pjanti li jkun fihom il-klorfenapir mhuwiex meħtieġ għax il-Belġju biss ta awtorizzazzjoni proviżorja għal din is-sustanza attiva. Il-Belġju indika li din l-awtorizzazzjoni issa skadiet u s-sustanza attiva ma kienet qatt effettivament għal bejgħ fil-Belġju.

(11) Din id-Deċiżjoni ma tippreġudika l-ebda azzjoni li l-Kummissjoni tista’ tieħu aktar ’il quddiem għal din is-sustanza attiva fil-qafas tad-Direttiva tal-Kunsill 79/117/KEE [4].

(12) Il-miżuri maħsuba f’din id-Deċiżjoni huma skond l-opinjoni tal-Kumitat Permanenti dwar is-Saħħa tal-Pjanti,

ADOTTAT DIN ID-DEĊIŻJONI:

Artikolu 1

Il-klorfenapir mhuwiex inkluż bħala sustanza attiva f’Anness I għad-Direttiva 91/414/KEE.

Artikolu 2

L-Istati Membri għandhom jassiguraw li mid-data tal-adozzjoni tad-Deċiżjoni preżenti l-ebda awtorizzazzjonijiet proviżorji għal prodotti li jipproteġu l-pjanti li jkun fihom il-klorfenapir ma jingħataw kif maħsub f’Artikolu 8(1) tad-Direttiva 91/414/KEE.

Artikolu 3

Din id-Deċiżjoni hija indirizzata lill-Istati Membri.

Magħmula fi Brussel, fil-5 ta’ Settembru 2001.

Għall-Kummissjoni

David Byrne

Membru tal-Kummissjoni

[1] ĠU L 230, tad-19.8.1991, p. 1.

[2] ĠU L 176, tad-29.6.2001, p. 61.

[3] ĠU L 220, tat-30.8.1996, p. 21.

[4] ĠU L 33, tat-8.2.1979, p. 36.

--------------------------------------------------