31995R1643

Ir-Regolament tal-Kunsill (KE) NRU 1643/95

tad−29 ta' Ġunju 1995

li jemenda r-Regolament (KE) Nru 2062/94 li jistabbilixxi Aġenzija Ewropea dwar is-Sigurtà u s-Saħħa fuq ix-Xogħol

Il-KUNSILL TA' L-UNJONI EWROPEA,

Wara li kkunsidra t-Trattat li jistabbilixxi l-Komunità Ewropea, u b'mod partikolari l-Artikolu 235 tiegħu,

Wara li kkunsidra l-proposta tal-Kummissjoni,

Wara li kkunsidra l-opinjoni tal-Parlament Ewropew [1],

Wara li kkunsidra l-opinjoni tal-Kumitat Ekonomiku u Soċjali [2],

Billi, rigward ir-rappreżentanza ta' l-organizzazzjonijiet ta' min iħaddem u tal-ħaddiema, il-kompożizzjoni tal-Bord Amminstrattiv ta' l-Aġenzija Ewropea dwar is-Sigurtà u s-Saħħa fuq ix-Xogħol għandha l-ħtieġa li tinbidel;

Billi hemm il-ħtieġa illi l-kompożizzjoni tal-Bord Amminstrattiv imsemmi tiġi aġġustata sabiex titqies l-adeżjoni ta' l-Awstrija, tal-Finlandja u ta' l-Isvezja;

Billi r-Regolament tal-Kunsill (KE) Nru 2062/94 tat-18 ta' Lulju 1994 li jistabbilixxi Aġenzija Ewropea dwar is-Sigurtà u s-Saħħa fuq ix-Xogħol għandu għalhekk jiġi emendat [3];

Billi t-Trattat ma jipprovdix, għall-adozzjoni ta' dan ir-Regolament, poteri oħra għajr dawk fl-Artikolu 235,

ADOTTA DAN IR-REGOLAMENT:

L-Artikolu 1

Ir-Regolament (KE) Nru 2062/94 huwa hawnhekk emendat kif ġej:

1. Fl-ewwel subparagrafu ta' l-Artikolu 4(2) il-kelmiet "ta' dan ir-Regolament" għandhom jinbidlu bil-kelmiet "tar-Regolament (KE) Nru 1643/95".

2. L-Artikolu 8 għandu jinbidel b'dan li ġej:

"L-Artikolu 8

Il-Bord Amminstrattiv

1. L-Aġenzija għandu jkollha Bord Amminstrattiv li jikkonsisti fi 48 membru, li minnhom:

(a) ħmistax-il membru għandhom jirrappreżentaw lill-gvernijiet ta' l-Istati Membri;

(b) ħmistax-il membru għandhom jirrappreżentaw lill-organizzazzjonijiet ta' min iħaddem;

(ċ) ħmistax-il membru għandhom jirrappreżentaw lill-organizzazzjonijiet tal-ħaddiema;

(d) tliet membri għandhom jirrappreżentaw lill-Kummissjoni.

2. Il-membri riferiti fil-paragrafu 1 (a), (b) u (ċ) għandhom jinħatru mill-Kunsill fuq il-bażi ta' membru għal kull wieħed mill-Istati Membri u għal kull waħda mill-kategoriji msemmija hawn fuq.

Il-membri riferiti fil-paragrafu 1 (b) u (ċ) għandhom jinħatru, fuq il-bażi ta' wieħed għal kull wieħed mill-Istati Membri u għal kull waħda mill-kategoriji interessati, mill-membri u l-membri alternanti li jirrappreżentaw lill-organizzazzjonijiet ta' min iħaddem u tal-ħaddiema fuq il-Kumitat Konsultattiv dwar is-Sigurtà, l-Iġjene, u l-Protezzjoni tas-Saħħa fuq ix-Xogħol imwaqqaf permezz tad-Deċiżjoni 74/325/KEE [4], fuq proposta mill-gruppi ta' dawn il-membri u l-membri alternanti tal-Kumitat.

Fl-istess waqt il-Kunsill għandu jaħtar membru alternant fuq l-istess kondizzjonijiet bħal dawk ta' membru, sabiex jattendi l-laqgħat tal-Bord Amministrattiv biss fl-assenza ta' xi membru jew kif jistabilixxu r-regoli ta' proċedura.

Il-Kummissjoni għandha taħtar il-membri u l-membri alternanti li jridu jirrappreżentawha.

3. Il-membri tal-Bord Amministrattiv jinħatru għal skond ta' tliet snin. Dan jista' jiġġedded.

Hekk kif jiskadi l-iskond tal-kariga jew f'każ li jirriżenjaw, il-membri għandhom jibqgħu jżommu l-kariga tagħhom sakemm tiġġeddilhom il-ħatra jew jiġu mibdula.

4. Il-Bord Amministrattiv għandu jaħtar il-President tiegħu u tliet viċi-Presidenti minn fost il-membri sabiex iservu għal perjodu ta' sena.

5. Il-President għandu jlaqqa' l-Bord Amministrattiv darbtejn fis-sena u fuq it-talba ta' mill-inqas nofs il-membri tiegħu.

6. Id-deċiżjonijiet tal-Bord Amministrattiv għandhom jittieħdu bil-maġġoranza ta' żewġ terzi tal-voti.

Il-membri riferiti fil-paragrafu 1 (a) għandu jkollhom żewġ voti kull wieħed.

Il-membri riferiti fil-paragrafu 1 (b), (ċ) u (d) għandu jkollhom vot kull wieħed.

Il-membri alternanti ma għandhomx dritt li jivvotaw għajr meta jkun assenti l-membru sħiħ.

7. Il-President tal-Bord Amministrattiv u d-Direttur tal-Fondazzjoni Ewropea għat-Titjib tal-Kundizzjonijiet ta' l-Għixien u tax-Xogħol għandu jkollhom il-għażla li jattendu l-laqgħat tal-Bord Amministrattiv bħala osservaturi.

8. Il-Bord Amministrattiv għandu jaddotta r-regoli ta' proċedura tiegħu stess, li għandhom jidħlu fis-seħħ wara li jiġu approvati mill-Kunsill, wara li tingħata opinjoni mill-Kummissjoni."

3. Fir-raba' subparagrafu ta' l-Artikolu 10(1) il-kelmiet "ta' dan ir-Regolament" għandhom jiġu mibdula bil-kelmiet "tar-Regolament (KE) Nru 1643/95".

L-Artikolu 2

Dan ir-Regolament għandu jidħol fis-seħħ fit-tielet jum wara l-pubblikazzjoni tiegħu fil-Ġurnal Uffiċjali tal-Komunitajiet Ewropej.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fil-Lussemburgu, fid-29 ta' Ġunju 1995.

Għall-Kunsill

Il-President

J. Barrot

[1] ĠU C 151, tad-19. 6. 1995.

[2] Opinjoni mogħtija fil-31 ta' Mejju 1995 (għadha mhix ippubblikata fil-Ġurnal Uffiċjali).

[3] ĠU L 216, ta' l-20. 8. 1994, p. 1.

[4] ĠU L 185, tad-9. 7. 1974, p. 15.

--------------------------------------------------