31994L0034

Id-Direttiva tal-Parlament Ewropew u tal-Kunsill 94/34/KE

tat-30 ta’ Ġunju 1994

li temenda d-Direttiva 89/107/KEE dwar l-approssimazzjoni tal-liġijiet ta’ l-Istati Membri li jirrigwardaw l-addittivi ma’ l-ikel awtorizzati għall-użu fl-oġġetti ta’ l-ikel maħsuba għall-konsum mill-bniedem

IL-PARLAMENT EWROPEW U L-KUNSILL TA’ L-UNJONI EWROPEA,

Wara li kkunsidraw t-Trattat li jistabbilixxi l-Komunità Ewropea, u b’mod partikolari l-Artikolu 100a tiegħu,

Wara li kkunsidraw il-proposta mill-Kummissjoni [1],

Wara li kkunsidraw l-opinjoni tal-Kumitat Ekonomiku u Soċjali [2],

Filwaqt li jaġixxu skond il-proċedura riferita fl-Artikolu 189b tat-Trattat [3],

Billi r-regoli għall-armonizzazzjoni fil-qasam ta’ l-addittivi m’għandhomx jaffettwaw l-applikazzjoni tad-dispożizzjonijiet ta’ l-Istati Membri li jkunu jeżistu fl-1 ta’ Jannar 1992, li jipprojbixxu l-użu ta’ ċerti addittivi f’ċerti l-oġġetti ta’ l-ikel speċifiċi li huma kkunsidrati bħala tradizzjonali u huma prodotti fit-territorju tagħhom, sakemm dawn id-dispożizzjonijiet ma jkoprux serje sħiħa ta’ oġġetti ta’ l-ikel inklużi l-oġġetti ta’ l-ikel li ma jaqgħux taħt din id-Direttiva imma li rigward tagħhom id-dispożizzjonijiet Komunitarji jipprovdu għall-awtorizzazzjoni ta’ l-addittivi;

Billi dawn il-prodotti jistgħu jingħarfu minn xulxin b’tikkettjar xieraq;

Billi ċ-ċirkolazzjoni libera ta’ l-oġġetti ta’ l-ikel li jikkonformaw mad-direttivi li jirrigwardaw l-addittivi m’għandhomx jiġu affettwati;

Billi l-libertà ta’ l-istabbiliment, kif ukoll tal-produzzjoni u l-bejgħ fit-territorju ta’ kull wieħed mill-Istati Membri ta’ oġġetti ta’ l-ikel li jikkonformaw mad-Direttivi li jirrigwardaw l-addittivi m’għandhomx jiġu affetwati,

ADOTTAW DIN ID-DIRETTIVA:

L-Artikolu 1

L-Artikolu 3a li ġej għandu jiddaħħal fid-Direttiva Nru 89/107/KEE [4]:

"L-Artikolu 3a

1. B’deroga mill-Artikolu 3(2)(a) u (b), il-Kunsill għandu, filwaqt li jaġixxi fuq proposta mill-Kummissjoni skond il-proċedura stabbilita fl-Artikolu 100a tat-Trattat, jawtorizza lill-Istati Membri li jibqgħu jżommu l-projbizzjoni dwar l-użu ta’ ċerti addittivi fil-produzzjoni ta’ ċerti oġġetti ta’ l-ikel ikkunsidrati bħala tradizzjonali sakemm:

- din il-projbizzjoni tkun eżistiet fl-1 ta’ Jannar 1992,

- l-Istati Membri ikkonċernati jawtorizzaw fuq it-territorju tagħhom il-produzzjoni u l-bejgħ ta’ kull oġġett ta’ l-ikel mhux ikkunsidrat bħala tradizzjonali li jikkonforma mar-regoli pprovvduti fl-Artikolu 3.

2. Mingħajr preġudizzju għar-Regolamenti (KEE) Nru 2081/92 [5] u (KEE) Nru 2082/92 [6], qabel l-1 ta’ Lulju 1994, l-Istati Membri għandhom jikkomunikaw lill-Kummissjoni l-lista ta’ l-oġġetti ta’ l-ikel li jikkunsidraw bħala tradizzjonali, filwaqt li jagħtu r-raġunijiet tagħhom fid-dettal, flimkien mad-dispożizzjonijiet leġislattivi rilevanti li jipprojbixxu l-użu ta’ ċerti additivi f’dawn l-oġġetti ta’ l-ikel.

Qabel l-1 ta’ April 1995, il-Kummissjoni għandha tissottometti proposta lill-Kunsill dwar il-kriterji li jridu jiġu applikati sabiex jiġi deċiz jekk prodott huwiex tradizzjonali jew le u dwar il-projbizzjonijiet nazzjonali li jkunu jistgħu jinżammu skond dawn il-kriterji.

Il-Kunsill għandu jaġixxi fuq il-proposta qabel l-1 ta’ April 1996.

3. Sakemm il-Kunsill ikun irregola dwar il-paragrafu 2, l-Istati Membri jistgħu jibqgħu jżommu kull projbizzjoni li tkun ġiet ikkomunikata lill-Kummissjoni skond l-ewwel subparagrafu tal-paragrafu 2, sakemm jikkonformaw mal-kondizzjonijiet ġenerali stabbiliti fil-paragrafu 1."

L-Artikolu 2

L-Istati Membri għandhom idaħħlu fis-seħħ il-liġijiet, ir-regolamenti u d-dispożizzjonijiet amministrattivi meħtieġa sabiex jikkonformaw ma’ din id-Direttiva.

Għandhom jgħarrfu lill-Kummissjoni b’dan.

Meta l-Istati Membri jadottaw dawn il-miżuri, għandu jkun fihom referenza għal din id-Direttiva jew għandhom ikunu akkumpanjati b’din ir-referenza ta’ meta jiġu ppublikati uffiċjalment. Il-metodi dwar kif issir din ir-referenza għandhom jiġu stabbiliti mill-Istati Membri.

L-Artikolu 3

Din id-Direttiva għandha tidħol fis-seħħ fil-jum tal-pubblikazzjoni tagħha fil-Ġurnal Uffiċjali tal-Komunitajiet Ewropej.

L-Artikolu 4

Din id-Direttiva hija indirizzata lill-Istati Membri.

Magħmula fi Brussel, fit-30 ta’ Ġunju 1994.

Għall-Parlament Ewropew

Il-President

E. Klepsch

Għall-Kunsill

Il-President

A. Baltas

[1] ĠU C 206, tat-13.8.1992, p. 1.

[2] ĠU C 73, tal-15.3.1993, p. 4.

[3] L-opinjoni tal-Parlament Ewropew tas-26 ta’ Mejju 1993 (ĠU C 176, tat-28.6.1993, p. 117), ikkonfermata fit-2 ta’ Diċembru 1993 (ĠU C 342, tal-20.12.1993), il-Pożizzjoni komuni tal-Kunsill tad-9 ta’ Marzu 1994 (għadha mhix ippubblikata fil-Ġurnal Uffiċjali) u d-Deċiżjoni tal-Parlament Ewropew tad-9 ta’ Marzu 1994 (ĠU C 91, tat-28.3.1994, p. 75).

[4] ĠU L 40, tal-11.2.1989, p. 27.

[5] Ir-regolament tal-Kunsill (KEE) Nru 2081/92 ta’ l-14 ta’ Lulju 1992 dwar il-protezzjoni ta’ l-indikazzjonijiet ġeografiċi u d-denominazzjonijiet ta’ l-oriġini għal prodotti agrikoli u oġġetti ta’ l-ikel (ĠU L 208, ta’ l-24.7.1992, p. 1).

[6] Ir-regolament tal-Kunsill (KEE) Nru 2082/92 ta’ l-14 ta’ Lulju 1992 dwar iċ-ċertifikati ta’ karattru speċifiku għal prodotti agrikoli u oġġetti ta’ l-ikel (ĠU L 208, ta’ l-24.7.1992, p. 9).

--------------------------------------------------