31990D0469

Id-Deċiżjoni Tal-Kummissjoni

tal-5 ta’ Settembru 1990

li tagħti deroga lill-Italja u tistabbilixxi l-kondizzjonijiet ekwivalenti tas-saħħa li għandhom ikunu rispettati dwar it-tqattigħ tal-laħam frisk

(90/469/KEE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jwaqqaf il-Komunità Ekonomika Ewropea,

Wara li kkunsidrat id-Direttiva tal-Kunsill 64/433/KEE tas-26 ta’ Ġunju 1964 dwar il-problemi tas-saħħa li jolqtu l-kummerċ ġewwa l-Komunità tal-laħam frisk [1], kif l-aħħar emendata bid-Direttiva 89/662/KEE [2], u b’mod partikolari Artikolu 13 tagħha,

Billi, skond Artikolu 13 tad-Direttiva 64/433/KEE b’konformità mal-proċedura ta’ Artikolu 16, id-derogi mill-paragrafu 45(ċ) ta’ l-Anness I jistgħu jingħataw, meta mitluba, lil kull Stat Membru li jipprovdi garanziji simili; billi dawn id-derogi għandhom jirranġaw il-kondizzjonijiet tas-saħħa li huma mill-anqas daqs dawk tal-imsemmi l-Anness;

Billi l-awtoritajiet tal-Italja, permezz ta’ telex ta’ l-20 ta’April 1990, ippreżentaw lill-Kummissjoni talba għal deroga mill-paragrafu 45(ċ) ta’ Anness I tad-Direttiva 64/433/KEE għat-tqattigħ tal-laħam frisk taċ-ċanga, tan-ngħaġ u laħam tal-ħanżir; billi din it-talba tipproponi l-kondizzjonijiet tas-saħħa; billi huwa meħtieġ li l-kondizzjonijiet tas-saħħa stabbiliti bħala alternattiva fid-deroga mitluba għat-tqattigħ tal-laħam frisk ikunu mill-anqas daqs dawk tal-paragrafu 45(ċ) ta’ Anness I tad-Direttiva 64/433/KEE;

Billi l-kondizzjonijiet tas-saħħa proposti mill-Italja huma daqs dawk imniżżla fil-paragrafu 45(ċ) ta’ Anness I tad-Direttiva 64/433/KEE;

Billi l-miżuri li hemm ipprovduti f’din id-Deċizjoni huma skond l-opinjoni tal-Kumitat Veterinarju Permanenti,

ADOTTAT DIN ID-DEĊIŻJONI:

Artikolu 1

Minkejja dak li hemm fil-paragrafu 45(ċ) ta’ Anness I tad-Direttiva 64/433/KEE, l-Italja tista’ tawtorizza t-tqattigħ tal-laħam frisk taċ-ċanga, tan-nagħaġ u tal-ħanżir taħt il-kondizzjonijiet imniżżla fl-Anness ta’ din id-Deċiżjoni.

Artikolu 2

Din id-Deċiżjoni hija indirizzata lill-Istati Membri.

Magħmula fi Brussel, fil-5 ta’ Settembru 1990.

Għall-Kummissjoni

Ray Mac Sharry

Membru tal-Kummissjoni

[1] ĠU C 121, tad-29.7.1964, p. 2012/64.

[2] ĠU L 395, tat-30.12.1989, p. 13.

--------------------------------------------------

ANNESS

KONDIZZJONIJIET SPEĊJALI GĦAT-TQATTIGĦ TAL-KARKASSI TAL-BAQAR, TAN-NGĦAĠ U TAL-ĦNIEŻER

1. Il-karkassi, li jiġu mill-kamra tal-qatla, wara li jitkessħu fi kmamar tar-refriġerazzjoni li joperaw b’temperatura ta’ l-arja fil-ħruġ mill-evaporaturi tant li l-karkassi jistgħu jitkessħu għal temperatura interna ta’ +7 °C fi żmien 48 siegħa għall-karkassi tal-baqar u 20 siegħa għall-karkassi tan-ngħaġ u tal-ħnieżer, jinġarru għall-post tat-tqattigħ, li t-temperatura tiegħu ma taqbiżx 12 °C, li jinsab fl-istess grupp ta’ bini taċ-chillers.

2. Il-laħam huwa trasferit f’operazzjoni waħda.

3. Il-karkassi jiddaħħlu fil-kamra tat-tqattigħ u magħmula għadam qabel tintlaħaq temperatura interna ta’ +7 °C jekk it-tqattigħ isir fi żmien 48 siegħa mit-tmiem ta’ l-operazzjonijiet tal-qatla għall-karkassi tal-baqar u 20 siegħa għall-karkassi tan-ngħaġ u tal-ħnieżer.

4. Il-ħin ta’ bejn li l-laħam jiddaħħal fil-kamra tat-tqattigħ u meta jkun suġġett għal aktar refriġerazzjoni ma jaqbiżx is-60 minuta.

5. Malli dan jitqatta’ u jkun ippakkjat, il-laħam jinġarr għal kmamar xierqa ta’ refriġerazzjoni.

--------------------------------------------------