31976L0308

Id-Direttiva tal-Kunsill

tal-15 ta' Marzu 1976

dwar l-għajnuna reċiproka għall-irkupru ta' talbiet li jirriżultaw minn ħidmiet li jiffurmaw parti mis-sistema li tiffinanzja l-Fond Agrikolu Ewropew għall-Gwida u Garanzija, u ta' imposti agrikoli u dazji doganali

(76/308/KEE)

IL-KUNSILL TAL-KOMUNITAJIET EWROPEJ,

Wara li kkunsidra t-Trattat li jistabbilixxi l-Komunità Ekonomika Ewropea, u b'mod partikolari Artikolu 100 ta' l-istess,

Wara li kkunsidra r-Regolament tal-Kunsill (KEE) Nru 729/70 tal-21 ta' April 1970 dwar il-finanzjar tal-politika agrikola komuni [1], kif emendata l-aħħar bir-Regolament (KEE) Nru 2788/72 [2], u partikolarment Artikolu 8(3) tal-istess,

Wara li kkunsidra l-proposta mill-Kummissjoni,

Wara li kkunsidra l-opinjoni tal-Parlament Ewropew [3],

Wara li kkunsidra l-opinjoni tal-Kumitat Ekonomiku u Soċjali [4],

Billi mhux possibli fil-preżent li tkun infurzata fi Stat Membru talba għall-irkupru msaħħa minn dokument imfassal mill-awtoritajiet ta' xi Stat Membru ieħor;

Billi l-fatt li d-dispożizzjonijiet nazzjonali li jirriferu għall-irkupru huma applikabbli biss fil-limiti tat-territorji nazzjonali huwa fih innifsu ta' xkiel għat-twaqqif u t-tħaddim tas-suq komuni; billi din is-sitwazzjoni ma tħallix li r-regoli tal-Komunità jiġu applikati fis-sħiħ u b'ġustizzja partikolarment fis-settur tal-politika agrikola komuni, u tagħmel eħfef ħidmiet frawdolenti;

Billi huwa għalhekk meħtieġ li jiġu adottati regoli komuni dwar il-għajnuna reċiproka għall-irkupru;

Billi dawn il-miżuri għandhom japplikaw kemm għall-irkupru ta' talbiet li jirriżultaw mid-diversi miżuri li jagħmlu parti mis-sistema ta' finanzjar totali jew parzjali tal-Fond Agrikolu Ewropew għall-Gwida u Garanzija kif ukoll għall-irkupru ta' imposti agrikoli u dazji doganali fil-limiti tat-tifsira ta' l-Artikolu 2 tad-Deċiżjoni 70/243/KEFA, KEE, Euratom tal-21 ta' April 1970 dwar is-sostituzzjoni ta' kontribuzzjonijiet finanzjarji mill-Istati Membri bir-risorsi tal-Komunitajiet infushom [5], u ta' Artikolu 128 tal-Att ta' Adeżjoni; billi għandhom ukoll japplikaw għall-irkupru ta' interessi u spejjeż inċidentali għal talbiet bħal dawn;

Billi l-għajnuna reċiproka trid tikkonsisti f'dan li ġej: l-awtorità mitluba trid min-naħa l-waħda tforni lill-awtorità applikanti bit-tagħrif li din ta' l-aħħar jkollha bżonn sabiex tirkupra t-talbiet li jinqalgħu fl-Istat Membru li fih tkun tinsab u tgħarraf lid-debitur bid-dokumenti kollha li jirreferu għal talbiet bħal dawn li jiġu minn dak l-Istat Membru, u min-naħa l-oħra trid tirkupra, fuq it-talba ta' l-awtorità applikanti, it-talbiet li jinqalgħu fl-Istat Membru li fih din ta' l-aħħar tkun tinsab;

Billi dawn il-forom differenti ta' għajnuna jridu jingħataw mill-awtorità mitluba skond il-liġijiet, regolamenti u dispożizzjonijiet amministrattivi li jirregolaw materji bħal dawn fl-Istat Membru li fih tkun tinsab;

Billi huwa meħtieġ li wieħed jagħmel il-kondizzjonijiet li taħthom talbiet għall-għajnuna jkunu jridu jitfasslu mill-awtorità applikanti u li tingħata tifsira restrittiva taċ-ċirkostanzi partikolari li fihom l-awtorità mitluba tista' tiċħad il-għajnuna f'xi każ partikolari;

Billi meta l-awtorità mitluba jkun jeħtiġilha taġixxi f'isem l-awtorità applikanti sabiex tirkupra xi talba, għandha tkun kapaċi, jekk id-dispożizzjonijiet fis-seħħ fl-Istat Membru li fih tkun tinsab hekk jippermettu u bil-qbil ta' l-awtorità applikanti, li tagħti żmien lid-debitur sabiex iħallas jew tawtorizza ħlas bin-nifs; billi xi interessi fuq faċilitajiet ta' ħlas bħal dawn għandhom ukoll jintbagħtu lill-Istat Membru li fih l-awtorità applikanti tkun tinsab

Billi, fuq talba raġonata mill-awtorità applikanti, l-awtorità mitluba għandha wkoll tkun kapaċi, kemm-il darba d-dispożizzjonijiet fis-seħħ fl-Istat Membru li fih tkun tinsab hekk jippermettu, li tieħu miżuri ta' prekawzjoni sabiex tiggarantixxi l-irkupru ta' talbiet li jinqalgħu fl-Istat Membru applikanti; billi talbiet bħal dawn m'għandhomx madankollu jingħataw xi trattament preferenzjali fl-Istat Membru li fih l-awtorità mitluba tkun tinsab;

Billi huwa possibbli li matul il-proċedura ta' rkupru fl-Istat Membru li fih l-awtorità mitluba tkun tinsab it-talba jew id-dokument li jawtorizzaw l-infurzar tagħha maħruġa fl-Istat Membru li fih tinsab l-awtorità applikanti jistgħu jiġu kkontestati mill-persuna konċernata; billi għandu jiġi stabbilit f'każijiet bħal dawn li l-persuna konċernata għandha tressaq l-azzjoni biex tikkontesta t-talba quddiem il-korp kompetenti ta' l-Istat Membru li l-awtorità applikanti tkun tinsab fih u li l-awtorità mitluba trid tissospendi kull proċedura ta' infurzar li hi tkun bdiet sakemm tittieħed deċiżjoni mill-korp imsemmi qabel;

Billi għandu jiġi stabbilit li dokumenti u tagħrif mgħoddija fil-kors tal-għajnuna reċiproka għall-irkupru m'għandhomx jintużaw għal skopijiet oħra;

Billi din id-Direttiva m'għandhiex tillimita l-għajnuna reċiproka bejn xi Stati Membri partikulari taħt xi ftehim jew arranġamenti bilaterali jew multilaterali;

Billi huwa meħtieġ li jkun żgurat li l-għajnuna reċiproka taħdem bla xkiel u li għal dan il-għan tkun stabbilita proċedura tal-Komunità sabiex jiġu stabbiliti r-regoli dettaljati għall-applikazzjoni ta' għajnuna bħal din f'perijodu xieraq; billi huwa meħtieġ li jitwaqqaf kumitat sabiex jorganizza kollaborazzjoni mill-qrib u effettiva bejn l-Istati Membri u l-Kummissjoni f'dan il-qasam,

ADOTTA DIN ID-DIRETTIVA:

Artikolu 1

Din id-Direttiva tistabbilixxi r-regoli li għandhom jiġu inkorporati fil-liġijiet, regolamenti u dispożizzjonijiet amministrattivi ta' l-Istati Membri sabiex jiġi żgurat l-irkupru f'kull Stat Membru tat-talbiet li għalihom jirriferi Artikolu 2 li jinqalgħu fi xi Stat Membru ieħor.

Artikolu 2

Din-Direttiva għandha tapplika għad-dispożizzjonijiet kollha li għandhom x'jaqsmu ma:

(a) rifużjonijiet, interventi u miżuri oħra li jiffurmaw parti mis-sistema ta' finanzjar totali jew parzjali tal-Fond Agrikolu Ewropew għall-Gwida u Garanzija, inklużi ammonti li jridu jinġabru b'konnessjoni ma' dawn l-azzjonijiet;

(b) imposti agrikoli, fil-limiti tat-tifsira ta' Artikolu 2(a) tad-Deċiżjoni 70/243/KEFA, KEE, Euratom u Artikolu 128(a) tal-Att ta' Adeżjoni;

(ċ) dazji doganali, fil-limiti tat-tifsira ta' l-Artikolu 2(b) ta' l-imsemmija Deċiżjoni u Artikolu 128(b) tal-Att ta' Adeżjoni;

(d) interessi u spejjeż inċidentali għall-irkupru tat-talbiet li għalihom saret referenza hawn fuq.

Artikolu 3

F'din id-Direttiva:

- "awtorità applikanti" tfisser l-awtorità kompetenti ta' kull Stat Membru li tagħmel talba għall-għajnuna b'konnessjoni ma' xi talba li għaliha jirreferi Artikolu 2;

- "awtorità mitluba" tfisser l-awtorità kompetenti ta' Stat Membru li ssirlu talba.

Artikolu 4

1. Fuq it-talba ta' l-awtorità applikanti, l-awtorità mitluba għandha tipprovdi kull tagħrif li jkun utli għall-awtorità applikanti fl-irkupru tat-talbiet tagħha.

Sabiex jinkiseb dan it-tagħrif, l-awtorità mitluba għandha tagħmel użu mis-setgħat mogħtija mil-liġijiet, regolamenti jew dispożizzjonijiet amministrattivi li japplikaw għall-irkupru ta' talbiet bħalhom li jinqalgħu fl-Istat Membru fejn dik l-awtorità tkun tinsab.

2. It-talba għal tagħrif għandha tindika l-isem u l-indirizz tal-persuna li għaliha jirriferi t-tagħrif li jrid jingħata u n-natura u l-ammont tat-talba li ssir.

3. L-awtorità mitluba mhiex obbligata li tforni tagħrif:

(a) li ma tkunx tista' tikseb bl-iskop li tirkupra talbiet bħal dawn li jinqalgħu fl-Istat Membru li fih tkun tinsab;

(b) li jikxef xi sigrieti kummerċjali, industrijali jew professjonali; jew

(ċ) li l-iżvelar tiegħu jista' jippreġudika s-sigurta ta' jew imur kontra l-politika pubblika tal-Istat.

4. L-awtorità mitluba għandha tgħarraf lill-awtorità applikanti bir-raġuni li għaliha tkun ċaħdet xi talba għal tagħrif.

Artikolu 5

1. L-awtorità mitluba għandha, fuq it-talba ta' l-awtorità applikanti, u skond ir-regoli fis-seħħ għan-notifika ta' dokumenti bħalhom jew deċiżjonijiet fl-Istat Membru li fih l-awtorità mitluba tkun tinsab, tinnotifika lid-destinatarju b' kull dokument u deċiżjoni, inklużi dawk ta' natura ġudizzjarja, li jiġu mill-Istat Membru li fih l-awtorità applikanti tkun tinsab u li jkollhom x'jaqsmu ma' xi talba u/jew l-irkupru tagħha.

2. It-talba għan-notifika għandha tindika l-isem u l-indirizz tad-destinatarju konċernat, in-natura u s-suġġett tad-dokument jew deċiżjoni li għandhom jiġu notifikati, jekk meħtieġ l-isem u l-indirizz tad-debitur u t-talba li għaliha d-dokument jew deċiżjoni jirreferu, u kull tagħrif utli ieħor.

3. L-awtorità mitluba għandha minnufih tgħarraf lill-awtorità applikanti bl-azzjoni meħuda fuq it-talba tagħha għan-notifika u, aktar minn hekk, bid-data li fiha d-dokument jew deċiżjoni ġiet mgħoddija lid-destinatarju.

Artikolu 6

1. Fuq it-talba ta' l-awtorità applikanti, l-awtorità mitluba għandha, skond il-liġijiet, regolamenti jew dispożizzjonijiet amministrattivi li japplikaw għall-irkupru ta' talbiet bħalhom li jinqalgħu fl-Istat Membru li fih l-awtorità mitluba tkun tinsab, tirkupra talbiet li huma s-suġġett ta' xi dokument li jippermetti l-infurzar tagħhom.

2. Għal dan l-iskop kull talba li għaliha jkun intalab l-irkupru għandha tiġi trattata bħala talba ta' l-Istat Membru li fih l-awtorità mitluba tkun tinsab, ħlief fejn japplika Artikolu 12.

Artikolu 7

1. It-talba għall-irkupru ta' xi talba li l-awtorità applikanti tindirizza lill-awtorità mitluba għandha tkun akkumpanjata minn kopja uffiċjali jew ċertifikata tad-dokument li jippermetti l-infurzar tagħha, maħruġa fl-Istat Membru li fih l-awtorità applikanti tkun tinsab u, jekk ikun xieraq, minn kopja oriġinali jew ċertifikata ta' dokumenti oħra meħtieġa għall-irkupru.

2. L-awtorità applikanti m'għandhiex tagħmel talba għall-irkupru jekk:

(a) it-talba u/jew d-dokument li jippermettu l-infurzar ma jkunux kontestati fl-Istat Membru li fih tkun tinsab;

(b) tkun applikat, fl-Istat Membru li fih tkun tinsab, il-proċedura ta' rkupru disponibbli għaliha fuq il-bażi tad-dokument li għalih jirreferi paragrafu 1, u l-miżuri meħuda ma jkunux irriżultaw fil-ħlas sħiħ tat-talba.

3. It-talba għall-irkupru għandha tindika l-isem u l-indirizz tal-persuna konċernata, in-natura tat-talba, l-ammont tal-kapital u l-interessi u l-ispejjeż dovuti, kif ukoll kull tagħrif ieħor li jkollu x'jaqsam.

4. It-talba għall-irkupru għandu jkun fiha wkoll dikjarazzjoni mill-awtorità applikanti li tindika d-data minn meta l-infurzar jkun possibli taħt il-liġijiet fis-seħħ fl-Istat Membru li fih tkun tinsab u li tikkonferma li l-kundizzjonijiet imniżżla fil-paragrafu 2 huma sodisfatti.

5. Hekk kif xi tagħrif li jkollu x'jaqsam mal-materja li tat lok għat-talba għall-irkupru ssir taf bih l-awtorità applikanti hija għandha tgħaddih lill-awtorità mitluba.

Artikolu 8

Id-dokument li jippermetti l-infurzar tat-talba għandu, meta hu xieraq, u skond id-dispożizzjonijiet fis-seħħ fl-Istat Membru li fih l-awtorità mitluba tkun tinsab, jkun aċċettat, rikonoxxut, miżjud, jew mibdul b'xi dokument li jawtorizza l-infurzar fit-territorju ta' dak l-Istat Membru.

Aċċettazzjoni, rikonoxximent, żjieda jew bdil bħal dawn jridu jseħħu kemm jista' jkun malajr wara d-data tal-wasla tat-talba għall-irkupru. Huma ma jistgħux jiġu miċħuda jekk id-dokument li jippermetti l-infurzar fl-Istat Membru li fih l-awtorità applikanti tkun tinsab ikun imfassal kif hu xieraq.

Jekk xi waħda minn dawn il-formalitajiet tagħti lok għal eżami jew kontestazzjoni b'konnessjoni mat-talba u/jew id-dokument li jippermettu l-infurzar mill-awtorita applikanti, Artikolu 12 għandu japplika.

Artikolu 9

1. It-talbiet għandhom jiġu rkuprati fil-munita ta' l-Istat Membru li fih l-awtorità mitluba tkun tinsab.

2. L-awtorità mitluba tista', fejn il-liġijiet, regolamenti jew dispożizzjonijiet amministrattivi fis-seħħ fl-Istat Membru li fih hija tkun tinsab hekk jippermettu, u wara konsultazzjonijiet ma' l-awtorià applikanti, tagħti lid-debitur żmien sabiex iħallas jew tawtorizza l-ħlas bin-nifs. Kull imgħax li tieħu l-awtorità mitluba dwar dan iż-żmien żejjed sabiex isir il-ħlas għandu jintbagħat lill-Istat Membru li fih l-awtorità applikanti tkun tinsab.

Kull imgħax ieħor li jittieħed minħabba ħlas tard taħt il-liġijiet, regolamenti u dispożizzjonijiet amministrattivi fis-seħħ fl-istat Membru li fih l-awtorità mitluba tkun tinsab għandu wkoll jintbagħat lill-Istat Membru li fih l-awtorità applikanti tkun tinsab.

Artikolu 10

It-talbiet li jridu jiġu rkuprati m'għandhomx jingħataw trattament preferenzjali fl-Istat Membru li fih l-awtorità mitluba tkun tinsab.

Artikolu 11

L-awtorità mitluba għandha minnufih tgħarraf lill-awtorità applikanti bl-azzjoni li tkun ħadet dwar it-talba għall-irkupru.

Artikolu 12

1. Jekk, matul il-proċedura ta' rkupru, it-talba u/jew id-dokument li jippermettu l-infurzar tiegħu maħruġa fl-Istat Membru li fih l-awtorità applikanti tkun tinsab huma kontestati minn parti interessata, l-azzjoni għandha titressaq minn din tal-aħħar quddiem il-korp kompetenti ta' l-Istat Membru li fih l-awtorità applikanti tkun tinsab, skond il-liġijiet fis-seħħ hemmhekk. Din l-azzjoni għandha tiġi notifikata mill-awtorità applikanti lill-awtorità mitluba. Il-parti konċernata tista' wkoll tinnotifika l-awtorità mitluba bl-azzjoni.

2. Hekk kif l-awtorità mitluba tkun irċeviet in-notifika li għaliha jirreferi l-paragrafu 1 jew mill-awtorità applikanti jew mill-parti interessata, għandha tissospendi l-proċedura ta' infurzar sakemm ikun hemm id-deċiżjoni tal-korp kompetenti fil-materja. Jekk l-awtorità mitluba tħoss li hu meħtieġ, u bla ħsara għal Artikolu 13, dik l-awtorità tista' tieħu miżuri prekawzjonarji biex tiggarantixxi l-irkupru kemm-il darba l-liġijiet jew regolamenti fis-seħħ fl-Istat Membru li fih tkun tinsab jippermettu azzjoni bħal din dwar talbiet bħalhom.

3. Fejn huma l-miżuri ta' infurzar meħuda fl-Istat Membru li fih l-awtorità mitluba tkun tinsab li qed ikunu kkontestati l-azzjoni għandha titressaq quddiem il-korp kompeteneti ta' dak l-Istat Membru skond il-liġijiet u r- regolamenti tiegħu.

4. Fejn l-awtorità kompetenti li quddiemha tkun tressqet l-azzjoni skond il-paragrafu1 hija tribunal ġudizzjarju jew amministrattiv, id-deċiżjoni ta' dak it-tribunal, sakemm tkun favorevoli għall-awtorità applikanti u tippermetti l-irkupru tat-talba fl-Istat Membru li fih l-awtorità applikanti tkun tinsab għandha tikkonstitwixxi "d-dokument li jippermetti l-infurzar" fil-limiti tat-tifsira ta' Artikoli 6, 7 u 8 u l-irkupru tat-talba għandu jkompli fuq il-bażi ta' dik id-deċiżjoni.

Artikolu 13

Fuq talba raġonata mill-awtorità applikanti, l-awtorità mitluba għandha tieħu miżuri prekawzjonarji sabiex tiżgura l-irkupru ta' talba sakemm il-liġijiet jew ir-regolamenti fis-seħħ fl-Istat Membru li fih tkun tinsab hekk jippermettu.

Sabiex jingħata effett lid-dispożizzjonijiet tal-ewwel paragrafu, Artikoli 6, 7 (1), (3) u (5), 8, 11, 12 u 14 għandhom japplikaw mutatis mutandis.

Artikolu 14

L-awtorità mitluba mhix obbligata:

(a) li tagħti l-għajnuna li għaliha hemm provdut f'Artikoli 6 sa 13 jekk l-irkupru tat-talba jkun, minnħabba s-sitwazzjoni tad-debitur, se joħloq diffikultajiet ekonomiċi jew soċjali serji fl-Istat Membru li fih dik l-awtorità tkun tinsab;

(b) li tieħu r-responsabbiltà għall-irkupru tat-talba jekk l-awtorità applikanti ma tkunx eżawrit il-mezzi ta' rkupru fit-territorju ta' l-Istat Membru li fih tkun tinsab.

L-awtorità mitluba għandha tgħarraf lill-awtorità applikanti bir-raġuni għaliex tkun ċaħdet xi talba għall-għajnuna. Ċaħda raġonata bħal din għandha wkoll tkun mgħoddija lill-Kummissjoni.

Artikolu 15

1. Kwistjonijiet dwar perijodi ta' limitazzjoni għandhom ikunu regolati biss mil-liġijiet fis-seħħ fl-Istat Membru li fih l-awtorità applikanti tkun tinsab.

2. Passi meħuda għall-irkupru ta' talbiet mill-awtorità mitluba wara xi talba għall-għajnuna, li, kieku kienu twettqu mill-awtorità applikanti, kien ikollhom l-effett li jissospendu jew iwaqqfu l-perijodu ta' limitazzjoni skond il-liġijiet fis-seħħ fl-Istat Membru li fih l-awtorità applikanti tkun tinsab, għandhom jitqiesu li kienu ttieħdu fl-Istat ta' l-aħħar, safejn jikkonċerna dak l-effett.

Artikolu 16

Dokumenti u tagħrif mibgħuta lill-awtorità mitluba skond din id-Direttiva jistgħu jiġu mgħoddija biss minn ta' l-aħħar lil:

(a) il-persuna msemmija fit-talba għall-għajnuna;

(b) dawk il-persuni u awtoritajiet responsabbli għall-irkupru tat-talbiet, u għal dak l-iskop biss;

(ċ) l-awtoritajiet ġudizzjarji li jieħdu ħsieb materji li jikkonċernaw l-irkupru tat-talbiet.

Artikolu 17

Talbiet għall-għajnuna u dokumenti li għandhom x'jaqsmu magħhom għandhom ikunu akkompanjati minn traduzzjoni fl-ilsien uffiċjali, jew waħda mill-ilsna uffiċjali ta' l-Istat Membru li fihom l-awtorità mitluba tkun tinsab, bla ħsara għad-dritt ta' l-awtorità ta' l-aħħar li tirrinunzja għat-traduzzjoni.

Artikolu 18

L-Istati Membri għandhom jirrinunzjaw għal kull talba kontra xulxin għar-rimbors ta' spejjeż li jirriżultaw mill-għajnuna reċiproka li huma jagħtu lil xulxin skond din id-Direttiva.

Madankollu, l-Istat Membru li fih l-awtorità applikanti tkun tinsab għandu jibqa' responsabbli lejn l-Istat Membru li fih l-awtorità mitluba tkun tinsab għall-ispejjeż magħmula bħala riżultat ta' azzjonijiet ikkunsidrati bħala li huma bla bażi, safejn is-sustanza tat-talba jew il-validità tad-dokument maħruġa mill-awtorità applikanti huma kkonċernati.

Artikolu 19

L-Istati Membri għandhom jipprovdu lil xulxin lista ta' awtoritajiet awtorizzati biex jagħmlu jew jilqgħu talbiet għall-għajnuna.

Artikolu 20

1. Kumitat dwar l-Irkupru (minn hawn 'il quddiem imsejjaħ "il-kumitat") huwa b'dan imwaqqaf u għandu jkun magħmul minn rappreżentanti ta' l-Istati Membri b'rappreżentant tal-Kummissjoni bħala president.

2. Il-kumitat għandu jadotta r-regoli ta' proċedura tiegħu stess.

Artikolu 21

Il-kumitat jista' jeżamina kull kwistjoni li tikkonċerna l-applikazzjoni ta' din id-Direttiva li titqajjem mill-president tiegħu kemm fuq inizjattiva tiegħu stess jew fuq it-talba tar-rappreżentant ta' Stat Membru.

Artikolu 22

1. Ir-regoli dettaljati biex ikunu implimentati Artikoli 4(2) u (4), 5 (2) u (3), 7 (1), (3) u (5), 9, 11 u 12 (1) u r-regoli dwar tisrif, trasferiment ta' ammonti rkuprati, u l-iffissar ta' ammont minimu għal talbiet li jistgħu jikkawżaw talba għall-għajnuna, għandhom jiġu adottati skond il-proċedura preskritta fil-paragrafi 2 u 3.

2. Ir-rappreżentant tal-Kummissjoni għandu jissottometti lill-kumitat abbozz tal-miżuri li jridu jiġu adottati. Il-Kumitat għandu jagħti l-opinjoni tiegħu fuq l-abbozz f'limitu ta' żmien stabbilit mill-president, b'rispett għall-urġenza tal-kwistjoni. L-opinjonijiet għandhom jiġu adottati b'maġġoranza ta' 41 vot, bil-voti tal-Istati Membri jingħataw il-piż kif hemm provdut f'Artikolu 148(2) tat-Trattat. Il-president m'għandux jivvota.

3. (a) Il-Kummissjoni għandha tadotta l-miżuri proposti fejn dawn ikunu skond l-opinjoni tal-Kumitat;

(b) Fejn il-miżuri proposti m'humiex skond l-opinjoni tal-kumitat, jew jekk l-ebda opinjoni ma tkun mgħotija, il-Kummissjoni għandha mingħajr dewmien tipproponi lill-Kunsill il-miżuri li jridu jkunu adottati. Il-Kunsill għandu jaġixxi b'maġġoranza kwalifikata.

(ċ) Jekk, fi żmien tliet xhur minn meta l-proposta tkun ingħatat lilu, il-Kunsill ma jkunx aġixxa, il-miżuri proposti għandhom ikunu adottati mill-Kummissjoni.

Artikolu 23

Id-dispożizzjonijiet ta' din id-Direttiva m'għandhomx jimpedixxu miżura akbar ta' għajnuna reċiproka milli tkun mogħtija kemm issa jew fil-futur minn Stati Membri partikolari taħt xi ftehim jew arranġamenti, inklużi dawk għan-notifikazzjoni ta' atti legali jew ekstralegali.

Artikolu 24

L-Istati Membri għandhom idaħħlu fis-seħħ il-miżuri meħtieġa sabiex jikkonformaw ma' din id-Direttiva mhux aktar tard mill-1 ta' Jannar 1978.

Artikolu 25

Kull Stat Membru għandu jgħarraf lill-Kummissjoni bil-miżuri li jkun adotta sabiex jimplimenta din id-Direttiva. Il-Kummissjoni għandha tgħaddi dan it-tagħrif lill-Istati Membri l-oħra.

Artikolu 26

Din id-Direttiva hija indirrizata lill-Istati Membri.

Magħmula fi Brussell, fil-15 ta' Marzu 1976.

Għall-Kunsill

Il-President

R. Vouel

[1] ĠU L 94, tat-28.4.1970, p. 13.

[2] ĠU L 295, tat-30.12.1972, p. 1.

[3] ĠU Ċ 19, tat- 12.4.1973, p. 38.

[4] ĠU Ċ 69, tat- 28.8.1973, p. 3.

[5] ĠU L 94, tat-28.4.1970, p. 19.

--------------------------------------------------