31962L2005

L-Ewwel Direttiva tal-Kunsill

dwar l-istabbiliment ta' ċerti regoli komuni għat-trasport internazzjonali (it-trasport ta' merkanzija bit-triq għall-kiri jew għall-ħlas)

IL-KUNSILL TAL-KOMUNITÀ EKONOMIKA EWROPEA,

Wara li kkunsidra t-Trattat li jistabilixxi l-Komunità Ekonomika Ewropea, u b'mod partikolari l-Artikolu 75(1) tiegħu,

Wara li kkunsidra l-proposta mill-Kummissjoni,

Wara li kkunsidra l-Opinjoni tal-Kumitat Ekonomiku u Soċjali,

Wara li kkunsidra l-Opinjoni tal-Parlament Ewropew,

Billi l-adozzjoni ta' politika ta' trasport komuni tinvolvi inter alia l-istabbiliment ta' regoli komuni għat-trasport internazzjonali ta' merkanzija bit-triq lejn jew mit-territorju ta' Stat Membru, jew li jgħaddi mit-territorju ta' Stat Membru wieħed jew aktar;

Billi l-istabbiliment progressiv tas-suq komuni m'għandux jiġi impedut minn ostakoli fis-settur tat-trasport; billi huwa neċessarju li tiġi assigurata espansjoni progressiva fit-trasport internazzjonali ta' merkanzija bit-triq, waqt li wieħed iżomm f'moħħu l-iżviluppi fil-kummerċ u l-moviment ta' merkanzija fil-Komunità;

ADOTTA DIN ID-DIRETTIVA:

L-Artikolu 1

1. Kull Stat Membru għandu, sa mhux iktar tard mill-aħħar ta' l-1962 u bil-mod stabbilit fil-paragrafi 2 u 3 ta' dan l-Artikolu, jilliberalizza t-tipi ta' trasport internazzjonali ta' merkanzija bit-triq għall-kiri jew bi ħlas li jinvolvu Stati Membri oħrajn elenkati fl-Annessi I u II ta' din id-Direttiva, meta dan it-trasport isir lejn jew mit-territorju ta' dak l-Istat Membru jew li jgħaddi mit-territorju ta' dak l-Istat Membru.

2. It-tipi ta' trasport elenkati fl-Anness I għandhom jiġu eżentati minn kull kwota jew sistema ta' awtorizzazzjoni.

3. It-tipi ta' trasport elenkati fl-Anness II m'għandhomx iktar ikunu soġġetti għal sistema ta' kwota. Jistgħu, madankollu, jibqgħu soġġetti għal awtorizzazzjoni bil-kondizzjoni li l-ebda restrizzjoni kwantitattiva ma tkun involuta; f'dak il-każ l-Istati Membri għandhom jassiguraw li d-deċiżjonijiet dwar applikazzjonijiet għal awtorizzazzjoni jingħataw fi żmien ħamest ijiem mill-irċevuta.

4. Iż-żewġl-Annessi ma' din id-Direttiva għandhom jiffurmaw parti integrali tagħha.

L-Artikolu 2

L-Istati Membri għandhom jinfurmaw lill-Kummissjoni bil-miżuri meħuda biex jimplimentaw din id-Direttiva fi żmien tliet xhur mid-dħul fis-seħħ tagħha u f'kull każ qabel l-aħħar ta' l-1962.

L-Artikolu 3

Din id-Direttiva m'għandhiex taffettwa l-kondizzjonijiet li taħthom kull Stat Membru jawtorizza liċ-ċittadini tiegħu biex jingaġġaw fl-attivitajiet imsemmija f'din id-Direttiva.

L-Artikolu 4

Din id-Direttiva hija indirizzata lill-Istati Membri.

Magħmula fi Brussel, fit-23 ta' Lulju 1962.

Għall-Kunsill

Il-President

E. Colombo

--------------------------------------------------

L-ANNESS I

It-Tipi ta' trasport li għandhom ikunu eżentati minn kull kwota ta' trasport jew sistema ta' awtorizzazzjoni

1. Traffiku mal-fruntiera f'żona li testendi fuq kull naħa tal-fruntiera għal fond ta' 25 kilometru f'linja dritta, bil-kondizzjoni li d-distanza totali involuta ma taqbiżx il-50 kilometru f'linja dritta.

2. Trasport okkażjonali ta' merkanzija lejn jew minn ajruporti, fil-każ ta' servizzi ta' l-ajru li jkunu dirottati.

3. Trasport ta' bagalji f'karrijiet agganċjati ma' vetturi li jġorru l-passiġġieri u t-trasport ta' bagalji fit-tipi kollha ta' vetturi lejn u mill-ajruporti.

4. Trasport tal-posta.

5. Trasport ta' vetturi bil-ħsara.

6. Trasport ta' skart u drenaġġ.

7. Trasport ta' karkassi ta' l-annimali għar-rimi.

8. Trasport ta' naħal u ħut żgħir.

9. Trasport tal-funerali.

--------------------------------------------------

L-ANNESS II

Tipi ta' trasport li għandhom jiġu eżentati minn kull sistema ta' kwota imma li jistgħu jibqgħu soġġetti għall-awtorizzazzjoni skond l-Artikolu 1(3) ta' din id-Direttiva

1. Trasport minn Stat Membru għaż-żona ta' fruntiera ta' Stat Membru ħdejh, li jestendi għal fond ta' 25 kilometru f'linja dritta mill-fruntiera komuni tagħhom.

2. Trasport ta' merkanzija f'vetturi bil-mutur li l-piż mgħobbi tagħhom, inkluż dak tal-karrijiet, ma jeċċediex is-6000 kilogramma.

3. Trasport ta' oġġetti u xogħolijiet ta' l-arti għal eżebizzjoni jew skopijiet kummerċjali.

4. Trasport okkażjonali ta' oġġetti u ta' materjal esklussivament għal skopijiet ta' pubbliċità jew informazzjoni.

5. Tneħħija minn intrapriżi li jkollhom personal u tagħmir speċjali għal dan l-iskop.

6. Trasport ta' materjal, proprjetà u annimali lejn jew minn eżibizzjonijiet teatrali, mużikali jew ta' films jew avvenimenti sportivi, ċirku, eżibizzjonijiet jew fieri, jew lejn jew minn xandiriet tar-radju jew televiżjoni jew films.

--------------------------------------------------