(1)

An 9 Deireadh Fómhair 2023, ghlac an Chomhairle Cinneadh (CBES) 2023/2135 (1).

(2)

An 27 Samhain 2023, d’eisigh Ardionadaí an Aontais do Ghnóthaí Eachtracha agus don Bheartas Slándála (‘an tArdionadaí’) ráiteas thar ceann an Aontais inar cháin an tAontas agus a Bhallstáit go láidir arís an troid leanúnach idir Fórsaí Armtha na Súdáine agus na Fórsaí Mear-Thacaíochta agus a mílístí cleamhnaithe faoi seach. Cuireadh in iúl leis an ráiteas sin freisin gur saoth leo gur tháinig géarú suntasach ar an bhforéigean agus gur cailleadh daoine in Darfur agus ar fud na tíre, agus gur saoth leo na sáruithe ar an dlí idirnáisiúnta um chearta an duine agus ar an dlí daonnúil idirnáisiúnta.

(3)

An 28 Deireadh Fómhair 2025, d’eisigh an tArdionadaí agus an Coimisinéir Lahbib ráiteas comhpháirteach maidir le hurghabháil El Fasher. Dúradh go neamhbhalbh sa ráiteas gur cor cinniúnach contúirteach sa chogadh é príomhchathair Darfur a bheith urghafa ag na Fórsaí Mear-Thacaíochta agus gur baol go rachaidh an staid dhaonnúil, atá go hainnis cheana féin, in olcas. Thairis sin, dúradh sa ráiteas freisin gur léir brúidiúlacht na bhFórsaí Mear-Thacaíochta i bhfianaise go bhfuiltear ag díriú ar shibhialtaigh ar bhonn a gcúlra eitneach.

(4)

An 20 Samhain 2025, d’eisigh an tArdionadaí ráiteas thar ceann an Aontais, inar cáineadh go láidir na hainghníomhartha a rinne na Fórsaí Mear-Thacaíochta in El Fasher. Chuir sé i bhfios go láidir freisin gur ar cheannaireacht na bhFórsaí Mear-Thacaíochta, Fhórsaí Armtha na Súdáine agus a mílístí comhghuaillithe araon atá an phríomhfhreagracht as deireadh a chur leis an gcoinbhleacht, chomh maith leo siúd a thugann tacaíocht dhíreach nó indíreach dóibh, agus thathantaigh sé ar na páirtithe uile sa choinbhleacht tús a chur arís leis an gcaibidlíocht chun sos cogaidh marthanach láithreach a bhaint amach.

(5)

An 21 Aibreán 2026, d’eisigh an tArdionadaí ráiteas thar ceann an Aontais le cur in iúl go bhfuil 3 bliana ann ó thosaigh an cogadh sa tSúdáin. Cuireadh i bhfios go láidir sa ráiteas go bhfuil an choinbhleacht idir Fórsaí Armtha na Súdáine, na Fórsaí Mear-Thacaíochta agus a mílístí cleamhnaithe faoi seach ag scriosadh saol daoine agus ag ceilt ar an bpobal na hardmhianta a bhain le réabhlóid 2018/19. Cuireadh in iúl sa ráiteas freisin go n-úsáidfeadh an tAontas na huirlisí uile atá ar fáil, lena n-áirítear taidhleoireacht agus bearta sriantacha, chun síocháin a éileamh, lena n-áirítear smachtbhannaí breise a chur i bhfeidhm a bheidh dírithe ar gheilleagar cogaidh na Súdáine.

(6)

I bhfianaise a thromchúisí atá an staid, is iomchuí bearta sriantacha breise a thabhairt isteach.

(7)

Go háirithe, is foinsí móra ioncaim iad mianadóireacht óir agus saothrú óir d’Fhórsaí Armtha na Súdáine agus na bhFórsaí Mear-Thacaíochta, a úsáideann siad chun an choinbhleacht sa tSúdáin a chothú.

(8)

Dá bhrí sin, is iomchuí toirmeasc a chur ar ór a cheannach, a allmhairiú, nó a aistriú, go díreach nó go hindíreach, más de thionscnamh na Súdáine é agus má onnmhairíodh ón tSúdáin é isteach san Aontas nó chuig aon tríú tír tar éis an 15 Iúil 2026.

(9)

Is iomchuí chomh maith toirmeasc a chur ar earraí áirithe a d’fhéadfaí a úsáid le haghaidh mianadóireacht óir nó saothrú óir a dhíol, a sholáthar, a aistriú nó a onnmhairiú, go díreach nó go hindíreach, bídís de thionscnamh an Aontais nó ná bíodh, chuig aon duine nádúrtha nó dlítheanach, eintiteas nó comhlacht sa tSúdáin, nó ar mhaithe lena n-úsáid sa tSúdáin.

(10)

Chun gur féidir conarthaí ábhartha atá ann cheana a fhoirceannadh ar bhealach hordúil, is iomchuí foráil a dhéanamh maidir le heisceacht shealadach ón toirmeasc ar earraí áirithe a d’fhéadfaí a úsáid le haghaidh mianadóireacht óir nó saothrú óir sa tSúdáin a dhíol, a sholáthar, a aistriú nó a onnmhairiú.

(11)

Ba cheart, dá bhrí sin, Cinneadh (CBES) 2023/2135 a leasú dá réir.

(12)

Tá gá le tuilleadh gníomhaíochta ón Aontas chun bearta áirithe a chur chun feidhme,