Táirgí fíona cumhraithe

ACHOIMRE AR:

Rialachán (AE) Uimh. 251/2014 maidir le sainmhíniú, tuairisc, cur i láthair, agus lipéadú ar tháirgí fíona cumhraithe

CAD IS AIDHM LEIS AN RIALACHÁN?

Leagtar amach leis sonraíochtaí táirgí fíona cumhraithe.
Tá sé mar aidhm leis ardleibhéil cosanta tomhaltóirí, barántúlachta táirge, trédhearcachta margaidh agus iomaíochta córa a áirithiú.
Tá feidhm aige maidir leis na táirgí fíona cumhraithe go léir a chuirtear ar an margadh san Aontas Eorpach (AE), cé acu ar táirgeadh iad i mBallstáit AE nó i dtíortha nach tíortha den Aontas Eorpach iad, maille leis na táirgí a tháirgtear san Aontas Eorpach lena n–onnmhairiú.

PRÍOMHPHOINTÍ

Leagtar síos leis an rialachán rialacha sonracha um chur i láthair agus um lipéadú maidir le táirgí fíona cumhraithe, a bhfuil feidhm acu i dteannta le rialacha eile i Rialachán (AE) Uimh. 1169/2011 maidir le faisnéis bhia a sholáthar do thomhaltóirí (féach an achoimre).
Tá 3 phríomhghrúpa i dtáirgí fíona cumhraithe, ina gcuimsítear catagóirí amhail vermouth, sangria agus glühwein:
- fíon cumhraithe *
- deochanna cumhraithe de bhunadh fíona* agus
- manglam táirgí fíona cumhraithe*.
Ní mór táirgí fíona cumhraithe a tháirgeadh i gcomhréir leis na ceanglais, na srianta agus na tuairiscí atá leagtha síos in Iarscríbhinn I agus Iarscríbhinn II a ghabhann leis an rialachán seo.
Le gníomh tarmligthe arna ghlacadh ag an gCoimisiún Eorpach, forlíontar an rialachán le Rialachán Tarmligthe (AE) 2017/670, lena leagtar amach na próisis táirgthe údaraithe maidir le táirgí fíona cumhraithe a fháil.
Cuimsíodh sa rialachán ar dtús creat dlíthiúil chun tásca geografacha táirgí fíona cumhraithe a chosaint. Le Rialachán leasaitheach (AE) 2021/2117, áfach, cuid de phacáiste athchóirithe an chomhbheartais talmhaíochta do 2023-2027, simplíodh an córas um thásca geografacha (TGanna) le haghaidh fíonta, baineadh an scéim TG le haghaidh táirgí fíonta cumhraithe ó raon feidhme Rialachán (AE) 251/2014, agus cumascadh an scéim leis an scéim le haghaidh táirgí talmhaíochta agus earraí bia faoi Rialachán (AE) Uimh. 1151/2012, ina gclúdaítear deochanna alcólacha cheana féin (féach an achoimre).
Aisghaireadh leis an rialachán Rialachán (CEE) Uimh. 1601/91 roimhe seo.

CÉN UAIR ATÁ TOSACH FEIDHME AN RIALACHÁIN?

Tá sé i bhfeidhm ón 28 Márta 2015. Tá feidhm ag Airteagal 36(1) agus (3) ón 27 Márta 2014, áfach, chun an aistriú ó Rialachán (CEE) Uimh. 1601/91 roimhe seo a éascú.

CÚLRA

Le haghaidh tuilleadh faisnéise, féach:

Rialacháin maidir le fíon (An Coimisiún Eorpach).

PRÍOMHTHÉARMAÍ

Fíonta cumhraithe. Deochanna ina bhfuil 75% ar a laghad den toirt iomlán ina dtáirgí fíniúna. Tá neart alcóil idir 14.5% agus 22% toirte iontu. Sampla díobh is ea fíon mormónta.

Deochanna cumhraithe de bhunadh fíona. Deochanna ina bhfuil 50% ar a laghad den toirt iomlán ina dtáirgí fíniúna. Tá neart alcóil idir 4.5% agus 14.5% toirte iontu. Samplaí díobh is ea sangria agus glühwein.

Manglaim táirgí fíona cumhraithe. Deochanna ina bhfuil 50% ar a laghad den toirt iomlán ina dtáirgí fíniúna. Tá neart alcóil idir 1.2% agus 10% toirte iontu.

PRÍOMHDHOICIMÉAD

Rialachán (AE) Uimh. 251/2014 ó Pharlaimint na hEorpa agus ón gComhairle an 26 Feabhra 2014 maidir le sainmhíniú, tuairisc, cur i láthair, lipéadú agus cosaint tásc geografach ar tháirgí fíona cumhraithe agus lena n–aisghairtear Rialachán (CEE) Uimh. 1601/91 ón gComhairle (IO L 84, 20.3.2014, lgh. 14-34).

Rinneadh leasuithe comhleanúnacha ar Rialachán (AE) Uimh. 251/2014 a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

DOICIMÉID GHAOLMHARA

Rialachán Tarmligthe (AE) 2017/670 ón gCoimisiún an 31 Eanáir 2017 lena bhforlíontar Rialachán (AE) 251/2014 ó Pharlaimint na hEorpa agus ón gComhairle maidir leis próisis táirgthe údaraithe maidir le táirgí fíonta cumhraithe a fháil (IO L 97, 8.4.2017, lgh. 5-8).

Rialachán (AE) Uimh. 1151/2012 ó Pharlaimint na hEorpa agus ón gComhairle an 21 Samhain 2012 maidir le scéimeanna cáilíochta do tháirgí talmhaíochta agus do bhia–earraí (IO L 343, 14.12.2012, lgh. 1-29).

Féach an leagan comhdhlúite.

Rialachán (AE) Uimh. 1169/2011 ó Pharlaimint na hEorpa agus ón gComhairle an 25 Deireadh Fómhair 2011 maidir le soláthar faisnéise bia do thomhaltóirí, lena leasaítear Rialachán (CE) Uimh. 1924/2006 agus Rialachán (CE) Uimh. 1925/2006 ó Pharlaimint na hEorpa agus ón gComhairle, agus lena n–aisghairtear Treoir 87/250/CEE ón gCoimisiún, Treoir 90/496/CEE ón gComhairle, Treoir 1999/10/CE ón gCoimisiún, Treoir 2000/13/CE ó Pharlaimint na hEorpa agus ón gComhairle, Treoir 2002/67/CE agus Treoir 2008/5/CE ón gCoimisiún agus Rialachán (CE) Uimh. 608/2004 ón gCoimisiún (IO L 304, 22.11.2011, lgh. 18-63).