(1)

Teastaíonn pacáistíocht oiriúnach ó tháirgí chun iad a chosaint agus iad a bheith éasca le hiompar ón áit a dtáirgtear iad go dtí an áit a n-úsáidtear nó a dtomhlaítear iad. Is ríthábhachtach d’fheidhmiú an mhargaidh inmheánaigh do tháirgí go gcuirfí cosc ar bhacainní ar an margadh inmheánach don phacáistíocht. Le rialacha ilroinnte agus ceanglais dhoiléire, cruthaítear éiginnteacht agus costais bhreise d’oibreoirí eacnamaíocha.

(2)

Léirítear i staidreamh an Choimisiúin (Eurostat) maidir le dramhaíl ó phacáistíocht don tréimhse 2010-2021 go n-úsáidtear sa phacáistíocht méideanna móra ábhair phríomhúil (óghábhar). Úsáidtear 40 % de phlaistigh agus 50 % de pháipéar san Aontas le haghaidh pacáistíochta, agus is ionann an phacáistíocht agus 36 % de dhramhaíl sholadach chathrach. Cruthaíonn na méideanna móra pacáistíochta a ghintear, agus atá ag méadú de shíor, chomh maith le leibhéil ísle athúsáide agus bailiúcháin agus droch-athchúrsáil, bacainní suntasacha ar gheilleagar ciorclach ísealcharbóin a bhaint amach. Ba cheart, leis an Rialachán seo, dá bhrí sin, rialacha a bhunú lena gcumhdófar saolré iomlán na pacáistíochta a rannchuideoidh le feidhmiú éifeachtúil an mhargaidh inmheánaigh trí bhearta náisiúnta a chomhchuibhiú, agus drochthionchair na pacáistíochta agus na dramhaíola ó phacáistíocht ar an gcomhshaol agus ar shláinte an duine a chosc agus a laghdú. Trí bhearta a leagan síos i gcomhréir le hord na réiteach dramhaíola a leagtar amach i dTreoir 2008/98/CE ó Pharlaimint na hEorpa agus ón gComhairle (3) (‘ord na réiteach dramhaíola’), leis an Rialachán seo ba cheart rannchuidiú leis an aistriú chuig geilleagar ciorclach.

(3)

Leagtar síos le Treoir 94/62/CE ó Pharlaimint na hEorpa agus ón gComhairle (4) ceanglais ar na Ballstáit maidir le pacáistíocht a bhaineann le comhdhéanamh na pacáistíochta agus a cineál in-athúsáidte agus in-aisghabhála (‘ceanglais fhíor-riachtanacha maidir le pacáistíocht’), agus socraítear spriocanna aisghabhála agus athchúrsála do na Ballstáit.

(4)

In 2014, mhol an Coimisiún sa tseiceáil oiriúnachta uaidh a bhaineann le Treoir 94/62/CE go ndéanfaí oiriúnuithe ar na ceanglais fhíor-riachtanacha maidir le pacáistíocht, ar measadh gur príomhuirlis iad chun feidhmíocht chomhshaoil níos fearr a bhaint amach maidir le pacáistíocht, chun na ceanglais sin a dhéanamh níos nithiúla agus níos éasca a fhorfheidhmiú agus chun iad a neartú.

(5)

I gcomhréir leis an gComhaontú Glas don Eoraip, a leagtar amach i dTeachtaireacht ón gCoimisiún an 11 Nollaig 2019, tugtar gealltanas i ndoiciméad dar teideal The Circular Economy Action Plan for a cleaner and more competitive Europe (CEAP) [an Plean Gníomhaíochta nua don Gheilleagar Ciorclach chun Eoraip níos glaine agus níos iomaíche a bhaint amach, (PGGC)], a leagtar amach i dTeachtaireacht ón gCoimisiún an 11 Márta 2020, go ndéanfaí na ceanglais fhíor-riachtanacha maidir le pacáistíocht a atreisiú d’fhonn gach pacáistíocht a dhéanamh in-athúsáidte nó in-athchúrsáilte faoi 2030, agus bearta eile a bhreithniú chun pacáistíocht (iomarcach) agus dramhaíl ó phacáistíocht a laghdú, dearadh a spreagadh maidir le pacáistíocht is féidir a athúsáid agus a athchúrsáil, castacht ábhar pacáistíochta a laghdú agus ceanglais maidir le cion an ábhair athchúrsáilte i bpacáistíocht phlaisteach a thabhairt isteach. Le PGGC, léirítear freisin a riachtanaí atá sé cur amú bia a laghdú. Geallann an Coimisiún go ndéanfaidh sé measúnú ar indéantacht an lipéadaithe ar fud an Aontais a éascaíonn deighilt cheart na dramhaíola ó phacáistíocht ag an bhfoinse.

(6)

Is é an plaisteach an t-ábhar pacáistíochta is déine ó thaobh carbóin de agus i dtéarmaí úsáid breosla iontaise, tá athchúrsáil ar dhramhaíl phlaisteach thart ar 5 oiread níos fearr ná loscadh le haisghabháil fuinnimh. Mar a shonraítear sa Straitéis Eorpach um Plaistigh i nGeilleagar Ciorclach, a leagtar amach i dTeachtaireacht ón gCoimisiún an 16 Eanáir 2018, tugtar gealltanas in PGGC méadú a dhéanamh ar ghlacadh plaisteach athchúrsáilte agus rannchuidiú le húsáid níos inbhuanaithe a bhaint as plaistigh. Rannchuidíonn buiséad an Aontais agus an córas acmhainní dílse le laghdú a dhéanamh ar thruailliú ó dhramhaíl ó phacáistíocht phlaisteach. Ón 1 Eanáir 2021, le Cinneadh (AE, Euratom) 2020/2053 (5) ón gComhairle, tugadh isteach ranníocaíocht náisiúnta atá comhréireach le cainníocht na dramhaíola ó phacáistíocht phlaisteach nach ndéantar a athchúrsáil i ngach Ballstát. Is cuid í an acmhainn dhílis sin de na dreasachtaí chun tomhaltas plaisteach aon úsáide a laghdú, athchúrsáil a chothú agus borradh a chur faoin ngeilleagar ciorclach.

(7)

Chuir an Chomhairle i dtábhacht go láidir sna Conclúidí uaithi dar teideal ‘Ag féachaint le Téarnamh Ciorclach Glas’ a glacadh an 11 Nollaig 2020, gur cheart don athbhreithniú ar Threoir 94/62/CE forálacha níos nithiúla, níos éifeachtaí agus níos fusa le cur chun feidhme a nuashonrú agus a bhunú chun pacáistíocht inbhuanaithe sa mhargadh inmheánach a chothú agus castacht pacáistíochta a íoslaghdú, chun réitigh indéanta go heacnamaíoch a chothú, in-athúsáidteacht agus in-athchúrsáilteacht na pacáistíochta a fheabhsú, chomh maith le substaintí ar díol imní iad in ábhair phacáistíochta a íoslaghdú, go háirithe in ábhair pacáistíochta bia. Ina theannta sin, chuir an Chomhairle i bhfios go láidir gur cheart, san athbhreithniú ar Threoir 94/62/CE, foráil a dhéanamh freisin do lipéadú pacáistíochta ar bhealach atá intuigthe go héasca chun tomhaltóirí a chur ar an eolas faoi in-athchúrsáilteacht na pacáistíochta agus faoin áit ar cheart dramhaíl ó phacáistíocht a dhiúscairt chun athchúrsáil a éascú.

(8)

Sa Rún ó Pharlaimint na hEorpa an 10 Feabhra 2021 maidir leis an bPlean Gníomhaíochta nua um an nGeilleagar Ciorclach (6), athdhearbhaíodh an cuspóir go mbeadh gach pacáistíocht in-athúsáidte nó in-athchúrsáilte ar bhealach a bheadh inmharthana go heacnamaíoch faoi 2030 agus iarradh ar an gCoimisiún togra reachtach a thíolacadh chun athbhreithniú a dhéanamh ar Threoir 94/62/cé, lena n-áirítear bearta chun dramhaíl a laghdú agus spriocanna agus ceanglais fhíor-riachtanacha uaillmhianacha chun pacáistíocht iomarcach a laghdú, lena n-áirítear i ríomhthráchtáil, feabhas a chur ar in-athchúrsáilteacht agus castacht na pacáistíochta a íoslaghdú, cion an ábhair athchúrsáilte a mhéadú, substaintí guaiseacha agus díobhálacha a bhaint de réir a chéile, agus athúsáid a chur chun cinn.

(9)

Comhlánaítear leis an Rialachán seo Rialachán (AE) 2024/1781 ó Pharlaimint na hEorpa agus ón gComhairle (7), nach dtugtar aghaidh ar phacáistíocht mar chatagóir shonrach táirgí ann. Ba cheart a mheabhrú, áfach, go bhféadfaí le gníomhartha tarmligthe arna nglacadh ar bhonn Rialachán (AE) 2024/1781 ceanglais bhreise nó ceanglais níos mionsonraithe a bhunú maidir le pacáistíocht le haghaidh táirgí sonracha, go háirithe i ndáil le híoslaghdú pacáistíochta i gcás inar féidir pacáistíocht ar lú a tionchar ar an gcomhshaol a bheith mar thoradh ar dhearadh nó athdhearadh táirgí.

(10)

Ba cheart feidhm a bheith ag an Rialachán seo maidir leis an bpacáistíocht go léir a chuirtear ar an margadh san Aontas agus maidir le gach dramhaíl ó phacáistíocht, gan beann ar an gcineál pacáistíochta nó ar an ábhar a úsáidtear. Ar mhaithe le soiléireacht dhlíthiúil, ba cheart an sainmhíniú ar phacáistíocht faoi Threoir 94/62/CE a athstruchtúrú gan an tsubstaint a athrú. Ba cheart pacáistíocht díolacháin, pacáistíocht ghrúpáilte agus pacáistíocht iompair a shainmhíniú ar leithligh. Ba cheart dúbailt téarmaíochta a sheachaint. Mar sin, sa Rialachán seo, freagraíonn pacáistíocht díolacháin do phríomh-phacáistíocht, pacáistíocht ghrúpáilte do phacáistíocht thánaisteach agus pacáistíocht iompair do phacáistíocht threasach.

(11)

Maidir le cupáin, coimeádáin bhia, málaí ceapaire nó earraí eile ar féidir leo feidhm phacáistíochta a chomhlíonadh, níor cheart a mheas gur pacáistíocht iad i gcás ina ndeartar iad le bheith folamh agus ina mbeartaítear go ndíolfaidh an dáileoir deiridh mar sin iad. Níor cheart a mheas gur pacáistíocht iad na hearraí sin ach amháin i gcás ina bhfuil siad deartha agus ceaptha lena líonadh ag an díolphointe, agus sa chás sin ba cheart a mheas gur ‘pacáistíocht seirbhíse’ iad, nó gur dhíol an dáileoir deiridh iad agus bia agus deochanna iontu, ar choinníoll go bhfuil feidhm phacáistíochta acu.

(12)

Níor cheart é a bheith i gceist leis an sainmhíniú ar phacáistíocht táirgthe phríomhúil go ndéanfaí leathnú ar na táirgí a meastar gur pacáistíocht iad faoin Rialachán seo. Le tabhairt isteach an tsainmhínithe agus úsáid an tsainmhínithe sa sainmhíniú ar ‘táirgeoir’ ba cheart a áirithiú, maidir leis an duine nádúrtha nó dlítheanach a chuireann an cineál sin pacáistíochta ar fáil den chéad uair, gurb é nó í an duine sin an táirgeoir faoin Rialachán seo agus nach iad na gnólachtaí príomhearnála, amhail na feirmeoirí, a úsáideann an cineál sin pacáistíochta na táirgeoirí.

(13)

Earra, atá ina chuid dhílis de tháirge agus a bhfuil gá leis chun an táirge sin a choinneáil, a thacú ná a chaomhnú ar feadh a shaolré agus a mbeartaítear eilimintí uile an earra sin a úsáid, a thomhailt nó a dhiúscairt le chéile, níor cheart a mheas gur pacáistíocht é ós rud é go bhfuil a fheidhmiúlacht nasctha go dlúth lena bheith mar chuid den táirge. I bhfianaise iompraíocht tomhaltóirí maidir le málaí tae agus caife a dhiúscairt chomh maith le haonaid aon fhreastail córais caife nó tae, a dhiúscraítear sa chleachtas mar aon le hiarmhar an táirge as a n-eascraíonn éilliú sruthanna inmhúirínithe agus athchúrsála, ba cheart déileáil leis na hearraí sonracha sin mar phacáistíocht, áfach. Tá an cur chuige sin i gcomhréir leis an gcuspóir an bailiúchán ar leithligh de bhithdhramhaíl a mhéadú, mar a cheanglaítear le hAirteagal 22 de Threoir 2008/98/CE, agus áirithítear leis an méid sin an comhleanúnachas maidir le hoibleagáidí airgeadais agus oibriúcháin deiridh ré. Níor cheart a mheas gur pacáistíocht iad péinteanna, dúigh, vearnaisí, laicir agus greamacháin a cuireadh go díreach ar tháirge. Mar sin féin, ba cheart lipéid atá crochta go díreach ar tháirge nó atá greamaithe de, lena n-áirítear lipéid ghreamaitheacha atá greamaithe de thorthaí agus glasraí, a mheas mar phacáistiú, ós rud é nach é an lipéad féin atá greamaitheach ach an gliú ar an lipéad. Thairis sin, mura bhfuil in ábhar ar leith ach cuid neamhshuntasach d’aonad pacáistíochta, agus nach mó a mhais ná 5 % de mhais iomlán an aonaid in aon chás, níor cheart an t-aonad pacáistíochta sin a mheas mar phacáistíocht ilchodach. Leis an sainmhíniú ar phacáistíocht ilchodach sa Rialachán seo, níor cheart pacáistíocht aon úsáide atá déanta go páirteach as plaistigh a dhíolmhú, gan beann ar an leibhéal tairsí, ó cheanglais Threoir (AE) 2019/904 ó Pharlaimint na hEorpa agus ón gComhairle (8).

(14)

Níor cheart pacáistíocht a chur ar an margadh ach amháin má chomhlíonann sí na ceanglais inbhuanaitheachta agus na ceanglais lipéadaithe a leagtar síos sa Rialachán seo nó de bhun an Rialacháin seo. Ba cheart a mheas go gcuirtear an phacáistíocht ar an margadh nuair a chuirtear ar fáil ar mhargadh an Aontais den chéad uair í, rud a chiallaíonn nuair a sholáthraíonn an monaróir nó an t-allmhaireoir í lena dáileadh, lena tomhailt nó lena húsáid le linn gníomhaíocht tráchtála, bíodh sin ar íocaíocht nó saor in aisce. Dá bhrí sin, pacáistíocht a cuireadh ar mhargadh an Aontais cheana féin roimh dháta chur i bhfeidhm na gceanglas ábhartha agus atá i stoic na ndáileoirí, lena n-áirítear miondíoltóirí agus mórdhíoltóirí, níor cheart gur ghá di na ceanglais inbhuanaitheachta agus lipéadaithe a leagtar síos sa Rialachán seo nó de bhun an Rialacháin seo a chomhlíonadh.

(15)

I gcomhréir le hord na réiteach dramhaíola agus smaointeoireacht saolré chun an toradh foriomlán is fearr ó thaobh an chomhshaoil de a sholáthar, ba cheart é a bheith d’aidhm ag na bearta dá bhforáiltear sa Rialachán seo an méid pacáistíochta a chuirtear ar an margadh i dtéarmaí toirte agus meáchain a laghdú, chun giniúint dramhaíola ó phacáistíocht a chosc, go háirithe trí íoslaghdú pacáistíochta, chun pacáistíocht nach gá a sheachaint, agus athúsáid pacáistíochta a mhéadú. Ina theannta sin, ba cheart é a bheith d’aidhm ag na bearta dá bhforáiltear sa Rialachán seo úsáid ábhar athchúrsáilte i bpacáistíocht a mhéadú, go háirithe, i bpacáistíocht phlaisteach ina mbíonn an glacadh le hábhar athchúrsáilte an-íseal, trí chórais athchúrsála ar ardchaighdeán a neartú agus, ar an gcaoi sin, na rátaí athchúrsála don phacáistíocht go léir a mhéadú agus cáilíocht na n-amhábhar tánaisteach a bheidh mar thoradh air sin a fheabhsú agus, ag an am céanna, cineálacha eile aisghabhála agus diúscartha deiridh a laghdú.

(16)

I gcomhréir le hord na réiteach dramhaíola, arb í diúscairt dramhaíola trí líonadh talún an rogha is lú tosaíochta, ba cheart é a bheith d’aidhm ag na bearta dá bhforáiltear faoin Rialachán seo líonadh talún le dramhaíl ó phacáistíocht a laghdú.

(17)

Ba cheart pacáistíocht a dhearadh, a mhonarú agus a thráchtálú ar bhealach a bhfágann gur féidir í a athúsáid a oiread uaireanta is féidir nó a athchúrsáil ar ardchaighdeán, agus chun a tionchar ar an gcomhshaol a íoslaghdú le linn a saolré iomláin agus le linn shaolré na dtáirgí ar lena n-aghaidh ar dearadh í. Chun an cuspóir sin a ghnóthú, ba cheart an chumhacht chun gníomhartha tarmligthe a ghlacadh i gcomhréir le hAirteagal 290 den Chonradh ar Fheidhmiú an Aontais Eorpaigh a tharmligean chuig an gCoimisiún i ndáil le líon íosta uainíochtaí a shocrú do phacáistíocht in-athúsáidte le haghaidh na bhformáidí pacáistíochta is minice a úsáidtear san athúsáid.

(18)

I gcomhréir le cuspóirí PGGC agus Teachtaireacht ón gCoimisiún an 14 Deireadh Fómhair 2020 dar teideal Chemicals Strategy for Sustainability – Towards a Toxic-Free Environment (‘Chemicals Strategy for Sustainability’) [An Straitéis Ceimiceán um an Inbhuanaitheacht – i dTreo Timpeallacht Saor ó Thocsain (An Straitéis Ceimiceán um an Inbhuanaitheacht)], agus chun bainistiú fónta na gceimiceán a áirithiú ar feadh a saolré agus an t-aistriú go geilleagar ciorclach saor ó thocsain, agus ábharthacht na pacáistíochta sa saol laethúil á meas, is gá leis an Rialachán seo aghaidh a thabhairt ar thionchar na pacáistíochta ar shláinte an duine, ar an gcomhshaol agus ar fheidhmíocht inbhuanaitheachta níos leithne ar feadh a saolré, lena n-áirítear ciorclaíocht, mar thoradh ar láithreacht substaintí ar cúis imní iad ar feadh shaolré iomlán na pacáistíochta, ó mhonarú go húsáid agus deireadh ré, lena n-áirítear bainistiú dramhaíola.

(19)

Agus an dul chun cinn eolaíoch agus teicneolaíoch á chur san áireamh, ba cheart pacáistíocht a dhearadh agus a mhonarú ar bhealach a chuirfeadh teorainn le láithreacht miotal trom áirithe agus substaintí eile ar údar imní iad ina comhdhéanamh. Mar atá ráite sa Straitéis Ceimiceán um an Inbhuanaitheacht, déanfar substaintí ar údar imní iad a íoslaghdú agus a ionadú a mhéid is féidir, ag cur deireadh de réir a chéile leis na cinn is díobhálaí d’úsáid shochaíoch neamhriachtanach, go háirithe i dtáirgí tomhaltais. Dá réir sin, ba cheart substaintí ar údar imní iad mar chomhábhair d’ábhar pacáistíochta nó d’aon cheann de na comhpháirteanna pacáistíochta a íoslaghdú agus é de chuspóir a áirithiú nach mbíonn aon drochthionchar ag an bpacáistíocht, chomh maith le hábhair a athchúrsáiltear ó phacáistíocht, ar shláinte an duine ná ar an gcomhshaol, ar feadh a saolré.

(20)

Grúpa ina gcuimsítear na mílte ceimiceán sintéiseach is ea substaintí sárfhluarailcile agus pholafluarailcile (PFASanna) a úsáidtear go forleathan san Aontas agus sa chuid eile den domhan i raon leathan feidhmeanna. Ó thaobh thonnáiste PFASanna de, tá ábhar teagmhála bia agus pacáistíocht bhia ar cheann de na hearnálacha is ábhartha. Tá gach PFAS faoi raon feidhme an Rialacháin seo an-mharthanach iad féin, nó díghrádaíonn siad ina PFASanna an-mharthanach sa chomhshaol. Nuair a bhreathnaítear go sonrach ar na héifeachtaí a d’fhéadfadh a bheith ann ar shláinte an duine a mheastar a bheith ina n-ábhar mór-imní tar éis do dhuine a bheith gan chosaint orthu go fadtéarmach, i.e. carcanaigineacht, só-ghineacht, tocsaineacht atáirgthe, lena n-áirítear éifeachtaí ar lachtadh nó trí lachtadh, agus tocsaineacht sain-spriocorgáin, aicmítear líon mór PFASanna i gcás ceann amháin ar a laghad de na cúig éifeacht sin. Bunaithe ar airíonna fisiceacha PFASanna, go háirithe a marthanacht, mar aon leis na héifeachtaí sainaitheanta ar an tsláinte i gcás roinnt PFASanna, is guais chomhshaoil agus do shláinte an duine iad PFASanna.

(21)

Is cinnte go mbeidh daoine nochta do PFASanna de thoradh iad a bheith in ábhair teagmhála bia. De dheasca nach féidir tairseach a leagan síos i gcás na nguaiseacha a bhaineann le PFASanna, is riosca do-ghlactha do shláinte an duine é nochtadh do PFASanna ó ábhair teagmhála bia. Dá bhrí sin, ba cheart teorainn a chur le PFASanna i bpacáistíocht teagmhála bia. Chun forluí a sheachaint leis na srianta maidir le húsáid PFASanna a leagtar síos i ngníomhartha eile dlí de chuid an Aontais, ba cheart don Choimisiún meastóireacht a dhéanamh chun a mheas an gá an srianadh ar PFASanna i bpacáistíocht teagmhála bia a leagtar síos sa Rialachán seo a leasú nó a aisghairm.

(22)

Is comhdhúil cheimiceach é bisfeanól A (BPA) a úsáidtear i monarú ábhar tadhaill bia, amhail earraí cistine in-athúsáidte plaisteacha nó líneálacha le haghaidh cannaí, go príomha mar shraith chosantach. Féadfaidh nochtadh do BPA, a d’fhéadfadh tarlú trína aistriú isteach i mbia agus deochanna a dhéanfadh tomhaltóirí a ionghabháil ina dhiaidh sin, a bheith ina riosca do thomhaltóirí, fiú ar leibhéil ísle, de réir measúnú a d’fhoilsigh an tÚdarás Eorpach um Shábháilteacht Bia (EFSA) in 2023.

(23)

I bhfianaise an nós imeachta leanúnaigh maidir le BPA, i gcomhréir leis na cumhachtaí a thugtar don Choimisiún faoi Rialachán (CE) Uimh. 1935/2004 ó Pharlaimint na hEorpa agus ón gComhairle (9) maidir le hábhair teagmhála bia, meastar go nglacfar srian ar úsáid BPA roimh dheireadh 2024. A luaithe a ghlacfar é, beidh feidhm ag an srian ar úsáid BPA maidir le gach pacáistíocht bhia agus maidir le hábhair teagmhála bia, agus beidh idirthréimhse ghinearálta 18 mí i gceist.

(24)

I gcomhréir le EU Action Plan: ‘Towards Zero Pollution for Air, Water and Soil’ [Plean Gníomhaíochta an Aontais Eorpaigh um Uisce, Aer agus Ithir Saor ó Thruailliú], a leagtar amach i dteachtaireacht ón gCoimisiún an 12 Bealtaine 2021, ba cheart beartais an Aontais a bhunú ar an bprionsabal gur cheart bearta coisctheacha a dhéanamh ag an bhfoinse. Cuireann an Coimisiún i dtábhacht sa Straitéis Ceimiceán um an Inbhuanaitheacht gur cheart Rialacháin (CE) Uimh. 1907/2006 (10) agus (CE) Uimh. 1272/2008 (11) ó Pharlaimint na hEorpa agus ón gComhairle a atreisiú mar bhunchloch chun ceimiceáin a rialáil san Aontas agus gur cheart iad a chomhlánú le cuir chuige chomhleanúnacha chun ceimiceáin a mheasúnú agus a bhainistiú sa reachtaíocht earnálach atá ann faoi láthair. Dá bhrí sin, cuirtear srian ar shubstaintí i bpacáistíocht agus comhpháirteanna pacáistíochta ag an bhfoinse agus tugtar aghaidh orthu go príomha faoi Rialachán (CE) Uimh. 1907/2006 i gcomhréir leis na rialacha agus na nósanna imeachta a leagtar síos faoi Theideal VIII den Rialachán sin, chun sláinte an duine agus an comhshaol a chosaint, feadh gach céime de shaolré na substainte, lena n-áirítear céim na dramhaíola. Dá bhrí sin, ba cheart a mheabhrú go bhfuil feidhm ag an Rialachán (CE) Uimh. 1907/2006 sin maidir le srianta a ghlacadh nó a leasú ar shubstaintí a mhonaraítear lena n-úsáid nó a úsáidtear i dtáirgeadh pacáistíochta nó comhpháirteanna pacáistíochta chomh maith le substaintí atá i bpacáistíocht nó comhpháirteanna pacáistíochta a chur ar an margadh. A mhéid a bhaineann le pacáistíocht a thagann faoi raon feidhme Rialachán (CE) Uimh. 1935/2004, ba cheart a mheabhrú go bhfuil sé d’aidhm ag an Rialachán sin ardleibhéal cosanta a áirithiú do thomhaltóirí bia phacáistithe. Anuas air sin, d’fhéadfadh sé go mbeadh substaintí i bpacáistíocht, i gcomhpháirteanna pacáistíochta agus i ndramhaíl ó phacáistíocht faoi réir srianta a leagtar síos i ngníomhartha eile dlí de chuid an Aontais, amhail srianta agus toirmisc a bhunaítear maidir le truailleáin orgánacha mharthanacha faoi Rialachán (AE) 2019/1021 ó Pharlaimint na hEorpa agus ón gComhairle (12).

(25)

I dteannta na srianta is infheidhme maidir le hábhair agus earraí teagmhála bia, a leagtar amach in Iarscríbhinn XVII a ghabhann le Rialachán (CE) Uimh. 1907/2006 agus i Rialachán (CE) Uimh. 1935/2004, is iomchuí, ar chúiseanna comhsheasmhachta, na srianta atá ann faoi láthair a choinneáil ar bun maidir le luaidhe, caidmiam, mearcair agus cróimiam heicsifhiúsach atá i bpacáistíocht nó comhpháirteanna pacáistíochta.

(26)

Bunaítear coinníollacha maidir le maoluithe i leith na dtiúchaintí luaidhe, caidmiam, mearcair agus cróimiam heicsifhiúsaigh atá bunaithe i bpacáistíocht nó comhpháirteanna pacáistíochta i gCinntí 2001/171/CE (13) agus 2009/292/CE (14) ón gCoimisiún, arna nglacadh faoi Threoir 94/62/CE, agus ba cheart iad a choinneáil ar bun faoin Rialachán seo freisin. Mar sin féin, chun an dul chun cinn teicniúil agus eolaíoch a chur san áireamh, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún chun na tiúchaintí do cheann ar bith de na miotail sin, a leagtar síos sa Rialachán seo, a laghdú, nó i ndáil leis na coinníollacha a chinneadh nach mbeidh feidhm ag suim thiúchaintí na miotal sin maidir le hábhair athchúrsáilte nó lúba táirge atá i slabhra atá iata agus rialaithe nó maidir le cineálacha pacáistíochta nó formáidí pacáistíochta áirithe. Ar bhonn na Straitéise Ceimiceán um an Inbhuanaitheacht, is iad na tiúchaintí céanna atá le cur i bhfeidhm, mar phrionsabal, maidir le substaintí guaiseacha agus maidir le hóghábhar agus ábhar athchúrsáilte. D’fhéadfadh imthosca eisceachtúla a bheith ann, áfach, ina bhféadfadh sé a bheith riachtanach maolú ar an bprionsabal sin. Ba cheart na himthosca eisceachtúla sin, lena dtugtar údar le leibhéil éagsúla tiúchana d’ábhar athchúrsáilte i gcomparáid le hamhábhar príomhúil, a bheith bunaithe ar anailís de réir an cháis. Agus na díolúintí atá ann cheana i leith na dtiúchaintí luaidhe, caidmiam, mearcair agus cróimiam heicsifhiúsaigh á leasú, ba cheart don Choimisiún an prionsabal sin a chur san áireamh.

(27)

Gan dochar do shrianadh PFASanna, leis an Rialachán seo níor cheart foráil a dhéanamh don fhéidearthacht srianta a fhorchur ar úsáid substaintí bunaithe ar chúiseanna sábháilteachta ceimicí, ná ar chúiseanna a bhaineann le sábháilteacht bia, ach amháin má tá riosca do-ghlactha ann do shláinte an duine nó don chomhshaol, lena n-áirítear ach gan bheith teoranta do na srianta ar luaidhe, caidmiam, mearcair agus cróimiam heicsifhiúsach a bunaíodh cheana féin ar bhonn Threoir 94/62/CE agus ar cheart a choinneáil faoin Rialachán sin, ós rud é go dtugtar aghaidh ar na srianta sin faoi ghníomhartha eile dlí de chuid an Aontais. Mar sin féin, leis an Rialachán seo, ba cheart a bheith in ann freisin srian a chur, go príomha ar chúiseanna seachas sábháilteacht cheimiceach nó bia, ar shubstaintí atá i bpacáistíocht agus comhpháirteanna pacáistíochta nó a úsáidtear ina bpróisis mhonaraíochta, ar substaintí iad a dhéanann difear diúltach d’inbhuanaitheacht na pacáistíochta, go háirithe a mhéid a bhaineann lena ciorclaíocht, go mór mór próisis athúsáide nó athchúrsála.

(28)

Pacáistíocht a dheartar agus é de chuspóir aici a bheith athchúrsáilte, nuair a thagann sí chun bheith ina dramhaíl ó phacáistíocht, tá sé ar cheann de na bealaí is éifeachtúla chun ciorclaíocht na pacáistíochta a fheabhsú agus cur le rátaí athchúrsála pacáistíochta agus le húsáid ábhair athchúrsáilte i bpacáistíocht. Tá critéir maidir le dearadh pacáistíochta le haghaidh athchúrsála bunaithe ag an tionscal, trí bhíthin scéimeanna deonacha tionscalaíochta, agus ag roinnt Ballstát le haghaidh roinnt formáidí pacáistíochta chun táillí freagrachta leathnaithe táirgeora a mhodhnú. Chun bacainní ar an margadh inmheánach a chosc agus chun cothrom na Féinne a sholáthar don tionscal, agus é de chuspóir aige sin inbhuanaitheacht na pacáistíochta a chur chun cinn, tá sé tábhachtach ceanglais shainordaitheacha a leagan síos maidir le hin-athchúrsáilteacht na pacáistíochta, trí na critéir agus an mhodheolaíocht a chomhchuibhiú chun measúnú a dhéanamh ar in-athchúrsáilteacht na pacáistíochta bunaithe ar mhodheolaíocht ‘dearadh le haghaidh athchúrsála’ ar leibhéal an Aontais. Chun an cuspóir a leagtar amach sa Phlean Gníomhaíochta don Gheilleagar Ciorclach a bhaint amach, ba cheart, faoi 2030, an phacáistíocht uile a bheith in-athchúrsáilte ar bhealach atá inmharthana ó thaobh na heacnamaíochta de, ba cheart pacáistíocht in-athchúrsáilte a dhearadh le haghaidh athchúrsáil ábhar, agus, nuair a thagann sí chun bheith ina dramhaíl, ba cheart go bhféadfaí í a bhailiú ar leithligh, agus í a shórtáil ina sruthanna sonracha dramhaíola gan difear a dhéanamh d’in-athchúrsáilteacht sruthanna dramhaíola eile agus í a athchúrsáil ar an mórchóir. Ba cheart in-athchúrsáilteacht na pacáistíochta a shloinneadh i ngráid feidhmíochta in-athchúrsáilteachta arna mbunú ar bhonn critéir maidir le dearadh le haghaidh athchúrsála ó 2030 agus ar bhonn critéir maidir le dearadh le haghaidh athchúrsála agus maidir le hathchúrsáil ar an mórchóir ó 2035do chatagóirí pacáistíochta mar a liostaítear in Iarscríbhinn II agus a shloinntear i ngráid A, B nó C. Ba cheart a mheas go bhfuil an phacáistíocht ag na gráid sin in-athchúrsáilte agus, dá bhrí sin, go gceadófar í a chur ar an margadh. Ba cheart pacáistíocht faoi bhun ghrád C a mheas mar phacáistíocht nach féidir a athchúrsáil go teicniúil agus ba cheart srian a chur leis an bpacáistíocht sin a chur ar an margadh. Mar sin féin, níor cheart na critéir sin a bheith á gcomhlíonadh leis an bpacáistíocht ach ón 1 Eanáir 2030 chun am leordhóthanach a thabhairt do na hoibreoirí eacnamaíocha oiriúnú a dhéanamh. Ón 1 Eanáir 2038, ba cheart don phacáistíocht a bheith ag grád B sula gcuirfí ar an margadh í.

(29)

Ba cheart don sainmhíniú ar athchúrsáil ábhar sa Rialachán seo na sainmhínithe ar athchúrsáil agus aisghabháil ábhar a leagtar amach i dTreoir 2008/98/CE a chomhlánú. Le hathchúrsáil ábhar, coinnítear na hacmhainní i gcúrsaíocht laistigh de gheilleagar na n-ábhar agus níor cheart, dá bhrí sin, cóireáil bhitheolaíoch ar dhramhaíl a chur san áireamh leis. Níor cheart don sainmhíniú ar athchúrsáil ábhar difear a dhéanamh do ríomh na spriocanna athchúrsála a leagtar síos do na Ballstáit faoin Rialachán seo. Tá na spriocanna sin agus ríomh na spriocanna sin bunaithe ar an sainmhíniú ar athchúrsáil a leagtar amach i dTreoir 2008/98/CE.

(30)

Le hathchúrsáil ar ardchaighdeán tugtar le tuiscint go bhfuil na hábhair athchúrsáilte, bunaithe ar a saintréithe teicniúla caomhnaithe, ar cháilíocht choibhéiseach nó ar cháilíocht níos airde i gcomparáid leis an ábhar bunaidh agus gur féidir iad a úsáid chun amhábhair phríomhúla a ionadú i bpacáistíocht nó i bhfeidhmeanna comhchosúla. Is féidir an t-ábhar athchúrsáilte a athchúrsáil arís agus arís eile. Chun táirgeadh amhábhar athchúrsáilte ardcháilíochta a chumasú, tá sé ríthábhachtach go mbaileofaí dramhaíl ó phacáistíocht arna sórtáil i gceart. Is é an difríocht idir athchúrsáil ábhar agus athchúrsáil ar ardchaighdeán go ndéantar, leis an athchúrsáil ábhar, an t-ábhar pacáistíochta a athchúrsáil ina ábhair, agus leis an athchúrsáil ar ardchaighdeán, déantar an t-ábhar pacáistíochta a athchúrsáil ina ábhair atá ar an gcáilíocht chéanna a chiallaíonn gur féidir na hábhair sin a úsáid le haghaidh pacáistíochta nó le haghaidh feidhmeanna eile lena gcaomhnaítear cáilíocht an ábhair athchúrsáilte.

(31)

Cé go ndearnadh measúnú ar dhearadh le haghaidh athchúrsála, ní áirithítear leis sin, ann féin, go ndéantar pacáistíocht a athchúrsáil sa chleachtas. Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún chun modheolaíocht aonfhoirmeach agus sásra um líne chúraim a bhunú, lena n-áirithítear go ndéanfar an dramhaíl ó phacáistíocht a athchúrsáil ar an mórchóir go héifeachtach, bunaithe ar phróisis bhailiúcháin ar leithligh úrscothacha sheanbhunaithe, agus ar phróisis sórtála agus athchúrsála sheanbhunaithe arna gcruthú i dtimpeallacht oibríochtúil. Dá bhrí sin, ó 2035, ba cheart measúnú nua a dhéanamh bunaithe ar chainníocht, i.e. meáchan an ábhair a athchúrsáiltear go héifeachtach ó gach ceann de na catagóirí pacáistíochta de réir na modheolaíochta agus na dtairseach a leagtar amach sa Rialachán seo. Ba cheart na tairseacha maidir le hathchúrsáil ar an mórchóir a shainiú agus an sprioc le haghaidh méid an ábhair athchúrsáilte bhliantúil a leagtar amach sa Rialachán seo á cur san áireamh. Faoi 2030, tá coinne leis go gcuirfidh na Ballstáit tuarascáil faoi bhráid an Choimisiúin cheana féin i ndáil leis na chéad sonraí maidir le cainníochtaí dramhaíola ó phacáistíocht arna n-athchúrsáil de réir chatagóir na pacáistíochta a chur faoi bhráid an Choimisiúin chun go ndéanfaí faireachán orthu. Na táirgeoirí, i gcás oibleagáidí faoin bhfreagracht leathnaithe táirgeora a chomhlíonadh ar bhonn aonair, na heagraíochtaí um fhreagracht táirgeoirí a gcuirtear de chúram orthu na hoibleagáidí sin a chomhlíonadh, nó na hoibreoirí bainistithe dramhaíola ó phacáistíocht, i gcás ina bhfuil na húdaráis phoiblí freagrach as bainistiú na dramhaíola ó phacáistíocht a eagrú, ba cheart dóibh a áirithiú go ndéantar an dramhaíl ó phacáistíocht a bhailiú ar leithligh, a shórtáil, agus go ndéantar an t-ábhar a athchúrsáil i mbonneagar suiteáilte agus próisis sheanbhunaithe arna gcruthú i dtimpeallacht oibríochtúil á n-úsáid, agus ba cheart dóibh an doiciméadacht theicniúil uile a sholáthar don mhonaróir lena n-áirithítear go ndéantar pacáistíocht a athchúrsáil ar an mórchóir.

(32)

Chun rialacha comhchuibhithe a bhunú maidir le dearadh pacáistíochta chun a hin-athchúrsáilteacht a áirithiú, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún chun critéir mhionsonraithe a leagan amach i ndáil le critéir ‘dearadh le haghaidh athchúrsála’ agus gráid feidhmíochta in-athchúrsáilteachta a bhunú, lena mbunaítear conas measúnú feidhmíochta in-athchúrsáilteachta a dhéanamh agus a thoradh a chur in iúl, lena mbunaítear tuairisc ar na coinníollacha chun go gcomhlíonfaidh gach catagóir pacáistíochta a gráid feidhmíochta in-athchúrsáilteachta faoi seach, lena mbunaítear creat maidir le modhnú na ranníocaíochtaí airgeadais a bheidh le híoc ag táirgeoirí chun a n-oibleagáidí um fhreagracht leathnaithe táirgeoirí a chomhlíonadh, chomh maith leis na hIarscríbhinní gaolmhara a ghabhann leis an Rialachán seo a leasú.

(33)

Chun nuálaíocht i bpacáistíocht a spreagadh, ba cheart tréimhse ama breise a thabhairt chun go bhféadfadh pacáistíocht a léiríonn gnéithe nuálacha as a dtagann feabhas suntasach ar chroí-fheidhm na pacáistíochta agus a bhfuil sochair chomhshaoil inléirithe aici na ceanglais in-athchúrsáilteachta a chomhlíonadh. Ba cheart údar a bheith leis na gnéithe nuálacha, go háirithe a mhéid a bhaineann le húsáid ábhar nua, agus ba cheart a mhíniú sa doiciméadacht theicniúil a ghabhann leis an bpacáistíocht go mbeartaítear conair athchúrsála a bhunú. Ba cheart an fhaisnéis sin a úsáid, inter alia, chun leasú a dhéanamh, i gcás inar gá, ar na gníomhartha cur chun feidhme i dtaca le critéir maidir le dearadh le haghaidh athchúrsála. Ba cheart don oibreoir eacnamaíoch fógra a thabhairt don Choimisiún agus don údarás inniúil freisin sula gcuirfear pacáistíocht nuálach ar an margadh.

(34)

Chun sláinte agus sábháilteacht an duine agus ainmhithe a chosaint, de bharr chineál na dtáirgí pacáistithe agus na gceanglas gaolmhar, na ceanglais in-athchúrsáilteachta maidir le neasphacáistíocht i gcomhréir le Treoir 2001/83/CE ó Pharlaimint na hEorpa agus ón gComhairle (15) agus le Rialachán (AE) 2019/6 ó Pharlaimint na hEorpa agus ón gComhairle (16), atá i dteagmháil dhíreach leis an táirge íocshláinte, chomh maith le forphacáistíocht mar a shainítear sna gníomhartha reachtacha i gcásanna inar gá an phacáistíocht sin chun ceanglais shonracha a chomhlíonadh chun cáilíocht an táirge íocshláinte a chaomhnú, níor cheart na ceanglais sin a bheith sainordaitheach. Ina theannta sin, níor cheart na ceanglais in-athchúrsáilteachta a bheith sainordaitheach maidir le pacáistíocht phlaisteach atá íogair ó thaobh teagmhála le haghaidh feistí leighis a chumhdaítear le Rialachán (AE) 2017/745 ó Pharlaimint na hEorpa agus ón gComhairle (17), pacáistíocht phlaisteach atá íogair ó thaobh teagmhála le haghaidh feistí leighis diagnóiseacha in vitro a chumhdaítear le Rialachán (AE) 2017/746 ó Pharlaimint na hEorpa agus ón gComhairle (18), pacáistíocht phlaisteach atá íogair ó thaobh teagmhála de le haghaidh bianna a cheaptar lena úsáid mar bhia do naíonáin agus do leanaí óga agus bia chun críocha speisialta míochaine a chumhdaítear le Rialachán (AE) Uimh. 609/2013 ó Pharlaimint na hEorpa agus ón gComhairle (19), nó pacáistíocht a úsáidtear chun earraí contúirteacha a iompar i gcomhréir le Treoir 2008/68/CE ó Pharlaimint na hEorpa agus ón gComhairle (20). Pacáistíocht díolacháin a dhéantar as adhmad éadrom, coirc, teicstíl, rubar, ceirmeach nó poirceallán, ba cheart í a dhíolmhú freisin ós rud é go gcuirtear ar an margadh i gcainníochtaí fíorbheaga í, i.e. is lú ná 1 % de mheáchan na pacáistíochta a chuirtear ar mhargadh an Aontais gach catagóir. Níor cheart a chumhdach leis an díolúine sin an oibleagáid ranníocaíochtaí airgeadais a íoc i gcomhréir leis an bhfreagracht leathnaithe táirgeora.

(35)

Tá roinnt Ballstát i mbun gníomhaíochta chun in-athchúrsáilteacht na pacáistíochta a spreagadh trí tháillí freagrachta leathnaithe táirgeora a mhodhnú. Féadfaidh na tionscnaimh sin a ghlactar ar an leibhéal náisiúnta éiginnteacht rialála a chruthú d’oibreoirí eacnamaíocha, go háirithe iad siúd a sholáthraíonn pacáistíocht i roinnt Ballstát. An tráth céanna, is ionstraim eacnamaíoch éifeachtach é na táillí freagrachta leathnaithe táirgeora a mhodhnú chun dearadh pacáistíochta níos inbhuanaithe a dhreasú chun pacáistíocht atá níos éasca a athchúrsáil a bhaint amach agus feidhmiú an mhargaidh inmheánaigh a fheabhsú ag an am céanna. Is gá, dá bhrí sin, na critéir maidir le modhnú na dtáillí freagrachta leathnaithe táirgeora a chomhchuibhiú bunaithe ar an ngrád feidhmíochta in-athchúrsáilteachta a fhaightear tríd an measúnú a dhéanamh ar in-athchúrsáilteacht, agus gan méideanna iarbhír na dtáillí sin a shocrú. Ós rud é gur cheart baint a bheith ag na critéir leis na critéir maidir le hin-athchúrsáilteacht na pacáistíochta, is iomchuí cumhacht a thabhairt don Choimisiún na critéir chomhchuibhithe sin a ghlacadh an tráth céanna lena mbunófar na critéir mhionsonraithe maidir le dearadh le haghaidh athchúrsála de réir na catagóire pacáistíochta.

(36)

Chun ciorclaíocht na pacáistíochta a áirithiú, ba cheart pacáistíocht a dhearadh agus a mhonarú sa chaoi gur féidir ábhair phríomhúla a ionadú níos minice le hábhair athchúrsáilte. Tacaíonn úsáid mhéadaithe na n-ábhar athchúrsáilte le forbairt an gheilleagair chiorclaigh le margaí a fheidhmíonn go maith d’ábhair athchúrsáilte, laghdaíonn costais, spleáchais agus tionchair chomhshaoil dhiúltacha a bhaineann le húsáid na n-amhábhar príomhúil, agus fágann gur féidir úsáid a bhaint ábhar atá níos tíosaí ar acmhainní. I ndáil leis na hábhair phacáistíochta éagsúla, is i bpacáistíocht phlaisteach atá an t-ionchur is ísle d’ábhair athchúrsáilte. Chun aghaidh a thabhairt ar na hábhair imní sin ar an mbealach is iomchuí, is gá glacadh le plaistigh athchúrsáilte a mhéadú, trí spriocanna sainordaitheacha a bhunú maidir le cion an ábhair athchúrsáilte i bpacáistíocht phlaisteach ag leibhéil éagsúla ag brath ar íogaireacht teagmhála (21) na bhfeidhmeanna pacáistíochta plaistí éagsúla, agus ag áirithiú go dtiocfaidh na spriocanna chun bheith ceangailteach faoi 2030. Chun ciorclaíocht na pacáistíochta a áirithiú ar bhonn incriminteach, ba cheart feidhm a bheith ag spriocanna méadaithe ó 2040.

(37)

Níor cheart a mheas go dtagann ábhar páipéir a eascraíonn as an bpróiseas laíonála adhmaid faoin sainmhíniú ar phlaisteach faoin Rialachán seo.

(38)

Chun ardleibhéal cosanta a áirithiú do shláinte agus sábháilteacht an duine agus ainmhithe i gcomhréir le dlí an Aontais, agus chun aon riosca do shlándáil an tsoláthair nó do shábháilteacht táirgí íocshláinte agus feistí leighis a sheachaint, ba cheart cineálacha áirithe pacáistíochta plaistí a eisiamh ón oibleagáid íosmhéid ábhair athchúrsáilte a bheith ann. Is éard atá sna cineálacha pacáistíochta plaistí sin neasphacáistíocht mar a shainmhínítear i dTreoir 2001/83/CE agus i Rialachán (AE) 2019/6, pacáistíocht phlaisteach atá íogair ó thaobh teagmhála le haghaidh feistí leighis a chumhdaítear le Rialachán (AE) 2017/745, pacáistíocht atá íogair ó thaobh teagmhála le haghaidh feistí leighis diagnóiseacha in vitro a chumhdaítear le Rialachán (AE) 2017/746, pacáistíocht phlaisteach atá íogair ó thaobh teagmhála le haghaidh bia atá beartaithe lena chaitheamh ag naíonáin agus leanaí óga, agus acu siúd amháin, agus pacáistíocht phlaisteach atá íogair ó thaobh teagmhála le haghaidh bia chun críoch speisialta míochaine a chumhdaítear le Rialachán (AE) Uimh. 609/2013. Ba cheart feidhm a bheith ag an eisiamh sin freisin maidir le forphacáistíocht le haghaidh táirgí íocshláinte don duine agus táirgí íocshláinte tréidliachta mar a shainmhínítear i Rialachán (AE) 2019/6 agus Treoir 2001/83/CE i gcásanna ina gcaithfidh an phacáistíocht ceanglais shonracha a chomhlíonadh chun cáilíocht an táirge íocshláinte a chaomhnú.

(39)

Chun na spriocanna maidir le comhtháthú an ábhair athchúrsáilte faoin Rialachán seo a bhaint amach, ba cheart don Choimisiún, tráth nach déanaí ná 3 bliana tar éis theacht i bhfeidhm an Rialacháin seo, athbhreithniú a fhoilsiú ar staid fhorbairt theicneolaíoch agus fheidhmíocht chomhshaoil na pacáistíochta plaistí bithbhunaithe agus, i gcás inarb iomchuí, togra reachtach a thíolacadh lena ngabhann ceanglais agus spriocanna inbhuanaitheachta.

(40)

Chun bacainní ar an margadh inmheánach a chosc agus cur chun feidhme éifeachtúil an Rialacháin seo a áirithiú, ba cheart d’oibreoirí eacnamaíocha a áirithiú go mbeidh in aon chuid phlaisteach den phacáistíocht íoschéatadán áirithe d’ábhar athchúrsáilte a aisghabhtar ó dhramhaíl phlaisteach iarthomhaltais, de réir chineál agus fhormáid na pacáistíochta dá dtagraítear sa Rialachán seo, arna ríomh mar mheán de réir na monarchan monaraíochta agus na bliana.

(41)

Trí úsáid a bhaint as an monarcha mhonaraíochta mar bhonn don ríomh, tugtar roinnt solúbthachta don mhonaróir pacáistíochta maidir leis an íoschéatadán d’ábhar athchúrsáilte a bhaint amach. Níor cheart monarcha mhonaraíochta a thuiscint ach mar thagairt d’aon saoráid thionsclaíoch amháin ina monaraítear an phacáistíocht.

(42)

Ba cheart dreasacht a bheith ann le haghaidh oibreoirí eacnamaíocha chun cion an ábhair athchúrsáilte sa chuid phlaisteach den phacáistíocht a mhéadú. Bealach amháin chun é sin a bhaint amach is ea a áirithiú go ndéanfar táillí freagrachta leathnaithe táirgeora a mhodhnú bunaithe ar chéatadán an ábhair athchúrsáilte sa phacáistíocht. Ba cheart an modhnú táillí sna cásanna sin a bhunú ar rialacha comhchoiteanna maidir le ríomh agus fíorú chion an ábhair athchúrsáilte atá sa phacáistíocht sin. Sa chomhthéacs sin, ba cheart cead a bheith ag na Ballstáit na córais atá ann cheana lena dtugtar rochtain chothrom roimh ré ar ábhar athchúrsáilte a choinneáil chun na spriocanna maidir le cion íosta an ábhair athchúrsáilte a bhaint amach ar choinníoll go gcomhlíonann siad an Rialachán seo. Thairis sin, ba cheart rochtain tosaíochta a dheonú ar na hábhair athchúrsáilte ar phraghsanna an mhargaidh agus ba cheart méid an ábhair athchúrsáilte dá dtugtar rochtain tosaíochta a bheith comhfhreagrach do mhéid na pacáistíochta a chuireann an t-oibreoir eacnamaíoch, faoi thréimhse shonraithe, ar mhargadh an Bhallstáit lena mbaineann.

(43)

Ba cheart cumhachtaí cur chun feidhme a thabhairt don Choimisiún chun coinníollacha aonfhoirmeacha a áirithiú maidir le cur chun feidhme na rialacha maidir leis an gcéatadán den ábhar athchúrsáilte a fhaightear ó aisghabháil na dramhaíola plaistí iarthomhaltais a ríomh agus a fhíorú,, arna ríomh de réir chineál agus fhormáid na pacáistíochta mar mheán de réir na monarchan monaraíochta agus na bliana, agus tionchar comhshaoil an phróisis athchúrsála á chur san áireamh, agus an fhormáid a bhunú le haghaidh na doiciméadachta teicniúla.

(44)

Chun margadh inmheánach a chur ar fáil le haghaidh athchúrsáil ar ardchaighdeán plaisteach agus le haghaidh úsáid amhábhar tánaisteach, in aon chuid phlaisteach den phacáistíocht a chuirtear ar an margadh ba cheart íoschéatadán áirithe d’ábhar athchúrsáilte a aisghabhtar ó dhramhaíl phlaisteach iarthomhaltais a bheith inti, de réir chineáil agus fhormáid na pacáistíochta dá dtagraítear sa Rialachán seo, arna ríomh mar mheán de réir na monarchan monaraíochta agus na bliana. Ba cheart an cineál pacáistíochta a thuiscint mar thagairt don phríomhpholaiméir as a bhfuil an phacáistíocht déanta, agus ba cheart a thuiscint go dtagraíonn an fhormáid phacáistíochta do mhéid agus cruth aonaid pacáistíochta shonraigh.

(45)

Is gá, ar roinnt cúiseanna, ardleibhéal cosanta don chomhshaol agus do shláinte an duine a bheith ann, go háirithe maidir le leibhéal na n-astaíochtaí san aer, san uisce agus san ithir. Ar an gcéad dul síos, is feiniméan domhanda é an t-athrú aeráide nach bhfuil aon teorainneacha aige agus níl nasc díreach ag a éifeachtaí le foinse na n-astaíochtaí gás ceaptha teasa: is féidir éifeachtaí an athraithe aeráide atá díréireach lena rannchuidiú aonair leis na hastaíochtaí gás ceaptha teasa domhanda a bheith ann i dtíortha a bhfuil astaíochtaí ísle gás ceaptha teasa acu. Ar an dara dul síos, tá na córais uisce idirnasctha, mar shampla trí shruthanna aigéanacha, agus léiríonn an taithí a fuarthas roimhe seo gur féidir truailliú, lena n-áirítear truailliú ó dhramhaíl phlaisteach, a tharlaíonn i gcuid amháin den domhan, a scaipeadh go forleathan chuig aigéin agus ilchríocha eile. Ar an tríú dul síos, ní hamháin gur féidir éifeachtaí áitiúla a bheith ag astaíochtaí a théann isteach san ithir, ach is féidir éifeachtaí trasteorann a bheith acu freisin, go háirithe nuair a théann na hastaíochtaí sin isteach sna sruthchúrsaí. Tá cur chun cinn na húsáide ábhair athchúrsáilte i bpacáistíocht phlaisteach bunaithe ar an mbonn gur táirgeadh an t-ábhar athchúrsáilte féin ar bhealach atá inbhuanaithe ó thaobh an chomhshaoil de, ionas go laghdaítear an lorg carbóin agus go spreagtar an geilleagar ciorclach. Chuige sin, is gá coimircí áirithe a chur i bhfeidhm chun a áirithiú nach gcealaítear, leis an gcaoi a bhfaightear ábhar athchúrsáilte, na tairbhí comhshaoil a bhaineann le hábhar athchúrsáilte a úsáid i bpacáistíocht phlaisteach a tháirgtear ina dhiaidh sin. Is gá, dá bhrí sin, aghaidh a thabhairt ar na hábhair imní a bhaineann leis an gcomhshaol ar bhealach neamh-idirdhealaitheach maidir le pacáistíocht phlaisteach a tháirgtear sa bhaile agus pacáistíocht phlaisteach a allmhairítear. Chuige sin, ba cheart allmhairí isteach san Aontas a bheith faoi réir coinníollacha coibhéiseacha maidir le hastaíochtaí agus bailiú ar leithligh agus critéir inbhuanaitheachta le haghaidh teicneolaíochtaí athchúrsála.

(46)

Tá sé ríthábhachtach dramhaíl phlaisteach a bhailiú ar leithligh óir tá tionchar díreach dearfach aige ar an ráta bailithe, ar cháilíocht an ábhair a bhailítear agus ar cháilíocht na n-ábhar athchúrsáilte. Cumasaítear athchúrsáil ar ardchaighdeán agus cuirtear le glacadh amhábhar tánaisteach ardchaighdeáin. Trí bhogadh níos gaire do ‘sochaí athchúrsála’ is féidir giniúint dramhaíola a sheachaint agus spreagtar dramhaíl a úsáid mar acmhainn agus, ag an am céanna, seachnaítear acmhainní a chur faoi ghlas ar na leibhéil is ísle d’ord na réiteach dramhaíola, rud a fhágann go mbíonn éifeachtaí díobhálacha ar an gcomhshaol agus go ndéantar neamhaird de bhainistiú na dramhaíola atá neamhdhíobhálach don chomhshaol. Le bailiú ar leithligh, seachnaítear freisin dramhaíl ghuaiseach agus dramhaíl neamhghuaiseach a mheascadh, rud a áirithíonn sábháilteacht na dramhaíola agus a loingsithe agus lena seachnaítear truailliú, mar a fhoráiltear dó le rialacha idirnáisiúnta amhail Coinbhinsiún Basel maidir le Rialú Gluaiseachtaí Trasteorann Dramhaíolacha Guaiseacha agus a nDiúscairt an 22 Márta 1989 (22), Coinbhinsiún na Náisiún Aontaithe maidir le Dlí na Farraige an 10 Nollaig 1982 (23), Coinbhinsiún na Náisiún Aontaithe um Chosc ar Mhuir-Thruailliú trí Fhuíoll agus Ábhar eile a Dhumpáil, arna dhéanamh i Londain an 29 Nollaig 1972, agus Prótacal 1996 a ghabhann leis, agus Iarscríbhinn V a ghabhann leis an gCoinbhinsiún Idirnáisiúnta um Thruailliú ó Longa a Chosc an 2 Samhain 1973 (MARPOL), arna mhodhnú le Prótacal 1978 a bhaineann leis sin.

(47)

Thairis sin, leis an bplé ar an leibhéal idirnáisiúnta laistigh de chruinnithe éagsúla an Choiste Caibidlíochta Idir-Rialtasaigh chun ionstraim idirnáisiúnta a fhorbairt atá ceangailteach ó thaobh dlí maidir le truailliú plaisteach, lena n-áirítear sa mhuirthimpeallacht faoi choimirce Chlár Comhshaoil na Náisiún Aontaithe (‘an Coiste Caibidlíochta Idir-Rialtasach maidir le Truailliú Plaisteach’), léiríodh ar an leibhéal idirnáisiúnta gur gá dlús a chur leis an ngníomhaíocht maidir le bailiú ar leithligh plaisteach chun a thionchair chomhshaoil a theorannú agus chun borradh a chur faoin ngeilleagar ciorclach, chun giniúint dramhaíola a chosc agus saothrú acmhainní nádúrtha a laghdú. Léirigh sé freisin toil na bpáirtithe conarthacha bearta a ghlacadh chuige sin. Ceanglaítear leis an gCoinbhinsiún maidir le hAerthruailliú Trasteorann Fadraoin (24), arna dhéanamh sa Ghinéiv an 14 Samhain 1979, ar na páirtithe sa Choinbhinsiún sin an comhshaol a chosaint ar thruailliú aeir agus iarracht a dhéanamh truailliú aeir, lena n-áirítear aerthruailliú trasteorann fadraoin, a theorannú agus, a mhéid is féidir, a laghdú de réir a chéile agus a chosc. Faoin gCoinbhinsiún maidir le Cosaint agus Úsáid sruthchúrsaí trasteorann agus Lochanna Idirnáisiúnta (25), arna dhéanamh i Heilsincí an 17 Márta 1992, ceanglaítear ar na páirtithe bearta a dhéanamh chun aon tionchar trasteorann a ghabhann le truailliú uisce a chosc, a rialú agus a laghdú. I gcomhréir le Dearbhú Rio 1992 ó Chomhdháil na Náisiún Aontaithe maidir leis an gComhshaol agus leis an bhForbairt, ba cheart gurb é údar an truaillithe, i bprionsabal, a sheasfadh costas an truaillithe. Dá bhrí sin, ba cheart gníomhaíochtaí tionsclaíocha amhail athchúrsáil plaistigh a bheith fite fuaite le bearta chun truailliú a chosc agus a laghdú.

(48)

Leis an gcuspóir comhshaoil úsáid ábhar a aisghabhtar ó dhramhaíl phlaisteach iarthomhaltais a spreagadh, éilítear go ndéanfaí an athchúrsáil phlaisteach ar bhealach lena n-íoslaghdófaí an truailliú a eascraíonn as. Murach sin, leis an truailliú tionsclaíoch a astaítear le linn na hathchúrsála, laghdófaí nó chuirfí deireadh leis an mbreisluach comhshaoil a bhaineann le húsáid plaisteach athchúrsáilte a spreagadh. Ba cheart critéir inbhuanaitheachta a fhorbairt maidir le teicneolaíochtaí athchúrsála le haghaidh dramhaíl phlaisteach iarthomhaltais. Leis na critéir sin, ba cheart ardleibhéal cosanta don chomhshaol agus do shláinte an duine a áirithiú, go háirithe maidir le leibhéal na n-astaíochtaí san aer, san uisce agus san ithir agus maidir le héifeachtúlacht acmhainní. Chun na críche sin, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún i dtaca le critéir inbhuanaitheachta a bhunú le haghaidh teicneolaíochtaí athchúrsála plaistigh. Dá réir sin, ba cheart athchúrsáil a dhéanamh ar bhealach atá neamhdhíobhálach don chomhshaol, as a dtiocfaidh próisis agus táirgí athchúrsála ardchaighdeáin, agus lena n-áiritheofar ardchaighdeáin in earnáil na hathchúrsála. Trí leibhéal iomchuí inbhuanaitheachta na teicneolaíochta athchúrsála a áirithiú agus, dá bharr sin, an t-ábhar athchúrsáilte, beidh an spreagadh a thugtar d’úsáid ábhair athchúrsáilte i bpacáistíocht phlaisteach ina bheart freagrach ó thaobh an chomhshaoil de. Sa phlé a rinneadh le linn chruinnithe an Choiste Caibidlíochta Idir-Rialtasaigh maidir le Truailliú Plaisteach, leagtar béim freisin ar a thábhachtaí atá sé a áirithiú go n-oibreoidh teicneolaíochtaí athchúrsála ar bhealach atá neamhdhíobhálach don chomhshaol.

(49)

Leis an modheolaíocht chun measúnú, fíorú agus deimhniú a dhéanamh, lena n-áirítear trí iniúchadh tríú páirtí, go gcuirfear rialacha coibhéiseacha i bhfeidhm i gcás ina ndéanfar an t-ábhar athchúrsáilte a aisghabhtar ó dhramhaíl phlaisteach iarthomhaltais a athchúrsáil nó a bhailiú i dtríú tír, ba cheart ardleibhéal cosanta don chomhshaol agus do shláinte an duine a áirithiú, go háirithe maidir le leibhéal na n-astaíochtaí isteach san aer, san uisce agus san ithir, agus é á chur san áireamh gur gá a áirithiú go ndéanfar athchúrsáil ar bhealach atá neamhdhíobhálach don chomhshaol agus an fhéidearthacht athchúrsáil ar ardcháilíocht a áirithiú, mar aon le leibhéal na gcaighdeán cáilíochta le haghaidh earnáil na hathchúrsála, agus leibhéal na héifeachtúlachta acmhainní. Tá na breithnithe sin ríthábhachtach chun ciorclaíocht acmhainní a bhaint amach agus, ar an gcaoi sin, chun níos lú brú a chur ar acmhainní nádúrtha neamh-inathnuaite. Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún chun an mhodheolaíocht sin a bhunú.

(50)

Is gá d’ábhair teagmhála bia ina bhfuil plaisteach athchúrsáilte na ceanglais a leagtar síos i Rialachán (AE) 2022/1616 ón gCoimisiún (26) a chomhlíonadh, lena n-áirítear ceanglais maidir le teicneolaíochtaí athchúrsála. Maidir le pacáistíocht phlaisteach, ach amháin i gcás ina ndéantar an phacáistíocht sin as teireataláit phoileitiléine (TPE), is iomchuí athmheasúnú a dhéanamh ar infhaighteacht teicneolaíochtaí oiriúnacha athchúrsála le haghaidh na pacáistíochta plaistí sin fada go leor roimh dháta chur i bhfeidhm na gceanglas gaolmhar maidir le hábhar athchúrsáilte. Ina theannta sin, ba cheart staid an údaraithe faoi rialacha ábhartha an Aontais agus suiteáil iarbhír na teicneolaíochta sin a chumhdach leis an measúnú sin. Bunaithe ar an measúnú sin, d’fhéadfadh sé go mbeadh gá le foráil a dhéanamh do mhaoluithe ar na ceanglais maidir le cion an ábhair athchúrsáilte do phacáistíocht phlaisteach shonrach atá íogair ó thaobh teagmhála de, nó le hathbhreithniú a dhéanamh ar na maoluithe nó le liosta na n-eisceachtaí a leagtar síos sa Rialachán seo a leasú. Chuige sin, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún.

(51)

Chun na rioscaí a bhaineann le soláthar neamhleor féideartha de dhramhaíl phlaisteach shonrach le haghaidh athchúrsála a bhféadfadh praghsanna iomarcacha nó éifeachtaí díobhálacha ar shláinte, ar shábháilteacht agus ar an gcomhshaol a bheith mar thoradh air, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún i leith coigeartú a dhéanamh ar na híoschéatadáin d’ábhar athchúrsáilte a aisghabhtar ó dhramhaíl phlaisteach iarthomhaltais. Agus an bonn cirt leis an ngníomh tarmligthe sin á mheas, ba cheart don Choimisiún measúnú a dhéanamh ar iarrataí dea-réasúnaithe ó dhaoine nádúrtha agus dlítheanacha.

(52)

Maidir le hábhair nach ábhair phlaisteacha iad, amhail gloine nó alúmanam, is léir go bhfuil treocht ann chun amhábhair phríomhúil a ionadú le hábhair athchúrsáilte agus meastar go leanfaidh sin ar aghaidh mar gheall ar an bhforbairt sa timpeallacht dhlíthiúil agus eacnamaíoch agus ionchais na dtomhaltóirí deiridh. Mar sin féin, ba cheart don Choimisiún faireachán géar a dhéanamh ar úsáid ábhair athchúrsáilte in ábhair phacáistíochta nach plaistigh iad agus ba cheart dó measúnú a dhéanamh ar a oiriúnaí atá sé bearta breise a dhéanamh, lena n-áirítear spriocanna a leagan síos darb aidhm úsáid ábhair athchúrsáilte sa phacáistíocht nach pacáistíocht phlaisteach í a mhéadú.

(53)

Is minic an sruth dramhaíola bithdhramhaíola éillithe le gnáthphlaistigh agus is minic na sruthanna athchúrsála ábhar éillithe le plaistigh inmhúirínithe. Mar thoradh ar an tras-éilliú sin cuirtear amú acmhainní agus is ísle cáilíocht na n-amhábhar tánaisteach; ba cheart an tras-éilliú a chosc ag an bhfoinse. I bhfianaise an ábhair imní sin, ba cheart do na Ballstáit an bainistiú dramhaíola iomchuí ar a gcríoch a shonrú le haghaidh pacáistíocht inmhúirínithe. Toisc go bhfuil an bealach diúscartha ceart do phacáistíocht phlaisteach inmhúirínithe ag éirí níos mearbhlaí do thomhaltóirí, is ceart agus is gá rialacha soiléire comhchoiteanna a leagan síos maidir le húsáid pacáistíochta plaistí inmhúirínithe, gan sainordú a thabhairt ach i gcás ina dtagann leas soiléir don chomhshaol nó do shláinte an duine as an úsáid sin. Is amhlaidh atá go háirithe i gcás inar cuidiú é pacáistíocht inmhúirínithe a úsáid chun bithdhramhaíl a bhailiú nó a dhiúscairt, mar shampla i gcás táirgí ina bhfuil an deighilt idir an t-ábhar agus an phacáistíocht an-chasta, amhail málaí tae.

(54)

Maidir le líon teoranta feidhmeanna pacáistíochta a dhéantar as polaiméirí plaisteacha in-bhithdhíghrádaithe, tagann sochair chomhshaoil inléirithe as pacáistíocht inmhúirínithe a úsáid, a théann isteach i ngléasraí múirínithe, lena n-áirítear saoráidí díleá anaeróbaigh faoi choinníollacha rialaithe. Ina theannta sin, i gcás ina gcuirfidh Ballstát i bhfeidhm Airteagal 22(1), an dara fomhír, de Threoir 2008/98/CE agus ina mbeidh scéimeanna iomchuí bailithe dramhaíola agus bonneagair iomchuí cóireála dramhaíola ar fáil sa Bhallstát sin, ba cheart solúbthacht a bheith ann don Bhallstát sin cinneadh á dhéanamh an ceart cead a thabhairt pacáistíocht inmhúirínithe le haghaidh caife, tae nó córais dí eile a chur ar fáil ar a chríoch den chéad uair in aonaid aonfhreastail atá comhdhéanta d’ábhar pacáistíochta eile nach miotail é, as málaí siopadóireachta plaisteacha an-éadrom, as málaí siopadóireachta plaisteacha éadroma agus an ceart cead a thabhairt pacáistíocht eile a bhí faoi réir ceanglais a bheith inmhúirínithe a chur ar fáil ar a gcríoch den chéad uair roimh dháta chur i bhfeidhm an Rialacháin seo. Chun mearbhall tomhaltóirí a sheachaint maidir leis an mbealach diúscartha ceart, agus breithniú a dhéanamh ar an sochar comhshaoil a bhaineann le ciorclaíocht an charbóin, ba cheart gach pacáistíocht eile a chur ar aghaidh chun athchúrsáil ábhar agus ba cheart a áirithiú le dearadh na pacáistíochta sin nach ndéanann sé difear d’in-athchúrsáilteacht sruthanna dramhaíola eile.

(55)

Ina theannta sin, níor cheart éilleáin a bheith sa mhúirín a tháirgtear mar thoradh ar an dramhaíl in-bhithdhíghrádaithe. Ba cheart ceanglais chaighdeán EN 13432:2000, doiciméad dar teideal Packaging - Requirements for packaging recoverable by composting and biodegradation - Test scheme and evaluation criteria for final acceptance of packaging [Pacáistíocht – Ceanglais le haghaidh pacáistíochta is inghnóthaithe trí mhúiríniú agus bith-dhíghrádú – Scéim tástála agus critéir mheastóireachta maidir le glacadh críochnaitheach le pacáistíocht], a athbhreithniú maidir le hamanna múirínithe, leibhéil incheadaithe éilleán agus srianta maidir le scaoileadh micreaphlaisteach chun go bhféadfar na hábhair sin a phróiseáil i saoráidí cóireála bithdhramhaíola ar bhealach iomchuí. Ba cheart freisin caighdeán comhchosúil don mhúiríniú baile a bhunú san Aontas.

(56)

Mar a thuairiscítear in ‘EU policy framework on biobased, biodegradable and compostable plastics’ [Creat beartais an Aontais maidir le plaistigh bhithbhunaithe, in-bhithdhíghrádaithe agus inmhúirínithe], a leagtar amach i dteachtaireacht ón gCoimisiún an 30 Samhain 2022, ní thuigtear dianscaoileadh i múiríniú baile as comhlíonadh na gcaighdeán maidir le múiríniú tionsclaíoch. Sa mhúiríniú tionsclaíoch, is iad teochtaí arda agus leibhéil arda taise na dálaí riachtanacha. Sa mhúiríniú baile, a dhéanann daoine príobháideacha, lena n-áirítear i bpobail, bíonn na dálaí iarbhír ag brath go mór ar chúinsí aeráide áitiúla agus ar chleachtais na dtomhaltóirí. Dá bhrí sin, tá an baol ann gur moille an bith-dhíghrádú sa mhúiríniú baile ná sa mhúiríniú tionsclaíoch, nó nach gcríochnófar é. Go háirithe, níor cheart múiríniú baile na pacáistíochta plaistí a mheas ach amháin le haghaidh feidhmeanna sonracha agus i gcomhthéacs dálaí áitiúla sonracha faoi mhaoirseacht na n-údarás ábhartha.

(57)

Ba cheart don Choimisiún, i gcás inarb iomchuí, togra reachtach a thíolacadh chun leasú a dhéanamh ar liosta na pacáistíochta a cheadaítear a mhúiríniú i gcás ina bhfuil údar maith leis agus inarb iomchuí mar gheall ar fhorbairtí teicneolaíocha agus rialála a imríonn tionchar ar dhiúscairt plaisteach inmhúirínithe agus faoi na coinníollacha sonracha lena n-áirithítear go bhfuil úsáid na n-ábhar sin chun leas an chomhshaoil agus shláinte an duine.

(58)

Chun measúnú comhréireachta a éascú a mhéid a bhaineann le ceanglais faoin Rialachán seo maidir le pacáistíocht inmhúirínithe, is gá toimhde comhréireachta a sholáthar le haghaidh pacáistíocht inmhúirínithe atá i gcomhréir leis na caighdeáin chomhchuibhithe arna nglacadh faoi Rialachán (AE) Uimh. 1025/2012 ó Pharlaimint na hEorpa agus ón gComhairle (27). Agus cinneadh á dhéanamh an bhfuil feidhm ag an toimhde, ba cheart sonraíochtaí teicniúla mionsonraithe na gceanglas sin a chur san áireamh, i gcomhréir leis na forbairtí eolaíocha agus teicneolaíocha is déanaí. Ba cheart do na paraiméadair, lena n-áirítear amanna múiríniúcháin agus leibhéil éillithe inghlactha, na dálaí iarbhír i saoráidí cóireála bithdhramhaíola, lena n-áirítear próisis díleá anaeróbaigh, a léiriú. Ní féidir brath ar an gcaighdeán atá ann faoi láthair le haghaidh múiríniú tionsclaíoch mar bhonn do thoimhde comhréireachta, ós rud é gur gá an caighdeán sin a athbhreithniú agus leagan nuashonraithe a chur ina ionad. Mar sin féin, go dtí go mbeidh caighdeán comhchuibhithe nua nó nuashonraithe ar fáil, is féidir an caighdeán atá ann cheana a úsáid mar threoir. Maidir le pacáistíocht atá inmhúirínithe sa bhaile, ba cheart don Choimisiún a iarraidh go bhforbrófaí caighdeánú EN mar is iomchuí.

(59)

Gach pacáistíocht a bheartaítear a bheith i dtadhall le bia nó atá i dtadhall le bia cheana féin, lena n-áirítear pacáistíocht inmhúirínithe, is gá di na ceanglais a leagtar amach i Rialachán (CE) Uimh. 1935/2004 a chomhlíonadh. I gcás inarb iomchuí, ba cheart a bheith in ann úsáid a bhaint as an doiciméadacht agus as an bhfaisnéis a cheanglaítear faoi ghníomhartha dlí an Aontais maidir le hábhair teagmhála bia mar chuid den fhaisnéis agus den doiciméadacht a cheanglaítear faoin Rialachán seo.

(60)

Ba cheart an phacáistíocht a dhearadh chun a toirt agus a meáchan a íoslaghdú agus chun an in-athchúrsáilteacht a chumasú gan cur isteach ar a cumas na feidhmeanna pacáistíochta a chur i gcrích. Ba cheart do mhonaróir an phacáistíocht a mheasúnú de réir na gcritéar feidhmíochta a liostaítear sa Rialachán seo. I bhfianaise chuspóirí an Rialacháin seo chun giniúint pacáistíochta agus dramhaíola ó phacáistíocht a laghdú agus ciorclaíocht na pacáistíochta ar fud an mhargaidh inmheánaigh a fheabhsú, is iomchuí na critéir atá ann faoi láthair a chomhlánú agus a shoiléiriú a thuilleadh agus iad a dhéanamh níos déine. Ba cheart, dá bhrí sin, liosta na gcritéar feidhmíochta pacáistíochta, mar a liostaítear sa chaighdeán comhchuibhithe dar teideal EN 13428:2004 ‘Packaging – Requirements specific to manufacturing and composition – Prevention by source reduction’ [Pacáistíocht – Ceanglais a bhaineann go sonrach le monaraíocht agus comhdhéanamh – Cosc trí laghdú ag an bhfoinse] a mhodhnú. Mar sin féin, go dtí go mbeidh caighdeán comhchuibhithe nua nó nuashonraithe ar fáil, is féidir an caighdeán atá ann cheana, EN 13428:2004, a úsáid. Cé go bhfuil margaíocht agus glacadh le tomhaltóir fós ábhartha maidir le dearadh pacáistíochta, níor cheart iad a bheith ina gcuid de chritéir feidhmíochta lena dtabharfaí údar, iontu féin, le meáchan breise agus toirt bhreise a chur le pacáistíocht. Mar sin féin, níor cheart dó sin dochar a dhéanamh do shonraíochtaí táirge le haghaidh táirgí ceardaíochta agus tionsclaíocha agus le haghaidh táirgí bia agus talmhaíochta atá cláraithe agus faoi chosaint faoi scéim um chosaint tásc geografach an Aontais, mar chuid de chuspóir an Aontais an oidhreacht chultúrtha agus saineolas traidisiúnta a chosaint lena n-áirítear Rialachán (AE) Uimh. 1308/2013 ó Pharlaimint na hEorpa agus ón gComhairle (28) maidir le fíon, Rialachán (AE) 2019/787 ó Pharlaimint na hEorpa agus ón gComhairle (29) maidir le deochanna biotáilleacha nó Rialachán (AE) 2023/2411 ó Pharlaimint na hEorpa agus ón gComhairle (30) maidir le táirgí ceardaíochta agus tionsclaíocha, nó a chumhdaítear le scéimeanna cáilíochta dá dtagraítear i Rialachán (AE) 2024/1143 ó Pharlaimint na hEorpa agus ón gComhairle (31). Níor cheart dó ach oiread baint de dhearaí pacáistíochta atá á gcosaint faoi dhlíthe an Aontais nó na mBallstát maidir le dearadh nó trádmharcanna ná faoi chomhaontuithe idirnáisiúnta a bhfuil éifeacht acu i gceann de na Ballstáit. Ní bheidh údar le heisceacht an chineáil pacáistíochta sin ach amháin a mhéid a bheidh tionchar ag na rialacha nua maidir le híoslaghdú pacáistíochta ar chruth na pacáistíochta ar chaoi nach bhféadfar leis an trádmharc idirdhealú a dhéanamh a thuilleadh idir an t-earra a bhfuil trádmharc air agus earraí gnóthais eile, agus nach bhféadfaidh an dearadh a shaintréithe nua agus aonair a choinneáil a thuilleadh. Chun an baol mí-úsáide a sheachaint, níor cheart feidhm a bheith ag an díolúine ach amháin maidir le cearta trádmhairc agus deartha a bhí á gcosaint roimh an 11 Feabhra 2025. Ar an taobh eile, d’fhéadfadh in-athchúrsáilteacht, úsáid ábhair athchúrsáilte, agus athúsáid pacáistíochta a bheith ina n-údar le meáchan breise nó toirt bhreise a bheith ag pacáistíocht, agus ba cheart iad sin a chur leis na critéir feidhmíochta. Níor cheart pacáistíocht a chur ar an margadh ag a bhfuil ballaí dúbailte, íochtair bhréige agus tréithe eile arb é is aidhm dóibh amháin méid a chur le toirt bhraite an táirge, toisc nach gcomhlíonann an phacáistíocht sin an ceanglas maidir le híoslaghdú pacáistíochta. Ba cheart feidhm a bheith ag an riail chéanna maidir le pacáistíocht nach bhfuil gá léi chun feidhmiúlacht na pacáistíochta a áirithiú.

(61)

Chun na ceanglais maidir le híoslaghdú pacáistíochta a chomhlíonadh, ba cheart aird ar leith a thabhairt ar theorannú an spáis fholaimh sa phacáistíocht ghrúpáilte agus iompair, lena n-áirítear pacáistíocht ríomhthráchtála.

(62)

Chun measúnú comhréireachta a éascú a mhéid a bhaineann leis na ceanglais faoin Rialachán seo maidir le híoslaghdú pacáistíochta, is gá toimhde comhréireachta a sholáthar le haghaidh pacáistíocht atá i gcomhréir le caighdeáin chomhchuibhithe arna nglacadh i gcomhréir le Rialachán (AE) Uimh. 1025/2012 chun sonraíochtaí teicniúla mionsonraithe a chur in iúl maidir leis na ceanglais sin agus critéir intomhaiste deartha a shonrú, lena n-áirítear, i gcás inarb iomchuí, uasteorainneacha meáchain nó spáis fholaimh le haghaidh formáidí sonracha pacáistíochta chomh maith le dearaí pacáistíochta réamhshocraithe agus caighdeánaithe a chomhlíonann an ceanglas maidir le híoslaghdú pacáistíochta.

(63)

Chun ciorclaíocht agus úsáid inbhuanaithe na pacáistíochta a chur chun cinn, ba cheart pacáistíocht in-athúsáidte agus córais athúsáide a dhreasú. Chun na críche sin, is gá coincheap na pacáistíochta in-athúsáidte a shoiléiriú agus a áirithiú go mbeidh sí nasctha ní hamháin le dearadh na pacáistíochta, ach freisin le bunú córas athúsáide lena gcomhlíontar na híoscheanglais mar a leagtar amach sa Rialachán seo iad. Leis an dearadh pacáistíochta, ba cheart an líon is airde uainíochtaí is féidir a chumasú agus na ceanglais sábháilteachta, cháilíochta agus sláinteachais a choinneáil ar bun agus iad á bhfolmhú, á ndíluchtú, á n-athlíonadh nó á n-athluchtú. Chun measúnú comhréireachta a éascú a mhéid a bhaineann le ceanglais faoin Rialachán seo maidir le pacáistíocht in-athúsáidte, is gá toimhde comhréireachta a sholáthar le haghaidh pacáistíocht atá i gcomhréir le caighdeáin chomhchuibhithe arna nglacadh i gcomhréir le Rialachán (AE) Uimh. 1025/2012 chun sonraíochtaí teicniúla mionsonraithe a chur in iúl faoin Rialachán sin agus chun critéir agus formáidí pacáistíochta in-athúsáidte a bhunú, lena n-áirítear líon íosta turas nó uainíochtaí, dearaí caighdeánaithe, chomh maith le ceanglais maidir le córais athúsáide, lena n-áirítear ceanglais sláinteachais.

(64)

Is gá tomhaltóirí a chur ar an eolas agus a chur ar a gcumas dramhaíl ó phacáistíocht a dhiúscairt ar bhealach iomchuí. Chuige sin, is iomchuí córas lipéadaithe comhchuibhithe a bhunú bunaithe ar chomhdhéanamh na n-ábhar pacáistíochta chun dramhaíl a shórtáil, agus é a phéireáil le lipéid chomhfhreagracha ar ghabhdáin dramhaíola. Ba cheart é a bheith ina threoirghné agus lipéid á ndearadh go n-aithneodh gach saoránach an córas lipéadaithe comhchuibhithe sin, gan beann ar a gcúinsí, amhail aois agus eolas ar theangacha. D’fhéadfaí córas mar sin a bhaint amach trí bhíthin picteagram agus gan ach fíorbheagán foclaíochta a úsáid. D’fhónfadh dearaí mar sin freisin chun costais aistriúcháin a íoslaghdú, a thabhófaí murach sin.

(65)

Is céim riachtanach í an tsórtáil chun ciorclaíocht níos fearr a áirithiú maidir le pacáistíocht. Ba cheart feabhsú an chumais sórtála a spreagadh, go háirithe trí nuálaíochtaí teicneolaíochta, chun gurb éifeachtaí an caighdeán sórtála agus, ar an gcaoi sin, gur fearr an t-amhábhar le haghaidh na hathchúrsála.

(66)

Chun cuidiú le tomhaltóirí dramhaíl ó phacáistíocht a shórtáil agus a dhiúscairt, ba cheart córas siombailí comhchuibhithe a thabhairt isteach agus a cheangal a chur ar phacáistíocht agus gabhdáin dramhaíola araon, rud a ligfeadh do thomhaltóirí ’na siombailí a mheaitseáil chun críoch diúscartha. A bhuí leis na siombailí, ba cheart a bheith in ann bainistiú dramhaíola iomchuí a bhaint amach toisc gur cheart dóibh faisnéis a sholáthar do thomhaltóirí faoi airíonna múirínithe na pacáistíochta sin. Leis an bhfaisnéis sin, ba cheart, go háirithe, mearbhall úsáideoirí deiridh a sheachaint maidir le pacáistíocht inmhúirínithe, nach bhfuil oiriúnach, dá réir sin, don mhúiríniú baile, ach atá inmhúirínithe faoi dhálaí a rialaítear go tionsclaíoch amháin. Leis an bhfaisnéis sin, ba cheart mar sin cosc a chur ar phacáistíocht inmhúirínithe a chaitheamh amach sa nádúr. Leis an gcur chuige sin, tiocfaidh feabhas ar bhailiú dramhaíola ó phacáistíocht ar leithligh, rud a fhágfaidh gur fearr caighdeán na hathchúrsála a dhéanfar ar dhramhaíl ó phacáistíocht, agus beartaítear go dtabharfaí isteach leibhéal comhchuibhithe na gcóras bailithe dramhaíola ó phacáistíocht ar an margadh inmheánach. Is gá freisin na siombailí a bhaineann leis na córais shainordaitheacha aisíoctha éarlaise a bhunófar tar éis theacht i bhfeidhm an Rialacháin seo a chomhchuibhiú. Ba cheart na Ballstáit a bheith in ann a cheangal go n-úsáidfear na lipéid chomhchuibhithe sin ar phacáistíocht atá faoi réir córais aisíoctha éarlaise arna mbunú faoin dlí náisiúnta roimh theacht i bhfeidhm an Rialacháin seo. Ós rud é nach trí chórais bailithe dramhaíola cathrach a bhailítear an phacáistíocht iompair sin, níor cheart úsáid na siombailí sin a bheith sainordaitheach i leith na pacáistíochta iompair, cé is moite den phacáistíocht ríomhthráchtála.

(67)

Níor cheart é a bheith sainordaitheach ábhar athchúrsáilte a lipéadú i bpacáistíocht toisc nach bhfuil an fhaisnéis sin ríthábhachtach chun cóireáil cheart na pacáistíochta i ndeireadh a shaolré a áirithiú. Beidh sé de cheangal ar mhonaróirí, áfach, spriocanna maidir le cion an ábhair athchúrsáilte a bhaint amach faoin Rialachán seo agus d’fhéadfadh sé gur mhaith leo an fhaisnéis sin a thaispeáint ar a bpacáistíocht chun tomhaltóirí a chur ar an eolas faoi ábhar athchúrsáilte sa phacáistíocht. Chun a áirithiú go gcuirfear an fhaisnéis sin in iúl ar bhealach comhchuibhithe ar fud an Aontais, ba cheart lipéad a shonraíonn cion an ábhair athchúrsáilte atá sa phacáistíocht a chomhchuibhiú.

(68)

Níor cheart é a bheith sainordaitheach an t-ábhar plaisteach bithbhunaithe i bpacáistíocht a lipéadú ach oiread toisc go bhfuil roinnt coinníollacha ann nach mór do phlaistigh bhithbhunaithe a chomhlíonadh chun inbhuanaitheacht a áirithiú agus tá gá le tuilleadh fianaise eolaíoch chun a áirithiú go mbeidh úsáid an phlaistigh bhithbhunaithe, thar a shaolré iomlán, i gcomhréir le prionsabail an gheilleagair chiorclaigh, a leagtar amach sa Teachtaireacht ón gCoimisiún an 30 Samhain 2022 i ndáil le creat beartais de chuid an Aontais maidir le plaisteach bithbhunaithe, inmhúirínithe agus in-bhithdhíghrádaithe. Mar sin féin, d’fhéadfadh sé gur mhian leis na monaróirí an fhaisnéis sin a thaispeáint ar a bpacáistíocht chun tomhaltóirí a chur ar an eolas faoin ábhar plaisteach bithbhunaithe atá sa phacáistíocht. Chun a áirithiú go gcuirfear an fhaisnéis sin in iúl ar bhealach comhchuibhithe ar fud an Aontais, ba cheart lipéad a shonraíonn an t-ábhar plaisteach bithbhunaithe a chomhchuibhiú.

(69)

A mhéid a bhaineann le pacáistíocht in-athúsáidte, chun úsáideoirí deiridh a chur ar an eolas faoi in-athúsáidteacht, infhaighteacht córas athúsáide agus suíomh na mbealaí bailiúcháin, ba cheart cód QR nó iompróir sonraí digiteacha oscailte caighdeánaithe de chineál eile a sholáthraíonn an fhaisnéis sin a bheith ar an bpacáistíocht sin. Sa chód QR nó san iompróir sonraí, ba cheart faisnéis a bheith ann lena n-éascaítear rianú agus ríomh líon na dturas agus na huainíochta, nó meánmheastachán ar an líon sin mura bhfuil an ríomh sin indéanta. Ba cheart an lipéad sin a bheith saorálach i gcás córais lúboscailte nach bhfuil oibreoir córais acu. Ina theannta sin, ba cheart pacáistíocht díolacháin in-athúsáidte a shainaithint go soiléir ag an díolphointe.

(70)

Níor cheart aon iolrú a dhéanamh ar lipéid ar phacáistíocht. Chun é sin a sheachaint, i gcás ina gceanglaítear le gníomhartha eile dlí de chuid an Aontais faisnéis faoin táirge pacáistithe a bheith ar fáil go digiteach trí iompróir sonraí, ba cheart an fhaisnéis faoin bpacáistíocht a cheanglaítear faoin Rialachán seo, agus faoin táirge pacáistithe faoin ngníomh eile dlí de chuid an Aontais, a bheith inrochtana tríd an iompróir sonraí céanna. Ba cheart don iompróir sonraí sin na ceanglais faoin Rialachán seo nó faoi dhlí eile is infheidhme de chuid an Aontais a chomhlíonadh. Go sonrach, i gcás ina gcumhdaítear an táirge pacáistithe le Rialachán (AE) 2024/1781 nó le dlí eile de chuid an Aontais lena gceanglaítear pas táirge digiteach, ba cheart an pas táirge digiteach sin a úsáid freisin chun an fhaisnéis ábhartha a sholáthar faoin Rialachán sin. I gcás ina bhfuil substaintí ar údar imní iad sa phacáistíocht, ba cheart í a mharcáil trí úsáid a bhaint as teicneolaíocht oscailte chaighdeánaithe marcála digití mar a bhunaítear i ngníomhartha cur chun feidhme arna nglacadh ag an gCoimisiún. Ba cheart a áirithiú leis an bhfaisnéis sin go mbeidh rochtain ag oibreoirí dramhaíola ar fhaisnéis ábhartha maidir le comhdhéanamh ceimiceach na pacáistíochta chun an rogha bainistithe dramhaíola is iomchuí a chinneadh i gcomhréir le hord na réiteach dramhaíola agus, ar an gcaoi sin, ciorclaíocht na pacáistíochta a chur chun cinn.

(71)

Chun cuidiú le cuspóirí an Rialacháin seo a bhaint amach, ba cheart tomhaltóirí a chosaint ar fhaisnéis mhíthreorach agus mhearbhlach faoi shaintréithe na pacáistíochta agus faoin gcóireáil iomchuí maidir le deireadh a saolré, ar bunaíodh lipéid chomhchuibhithe ina leith faoin Rialachán seo. Ba cheart é a bheith indéanta pacáistíocht a áirítear sa scéim freagrachta leathnaithe táirgeora a shainaithint le siombail chomhfhreagrach ar fud na críche ina bhfuil feidhm ag an scéim sin chun a chur in iúl go gcomhlíonann an táirgeoir a chuid oibleagáidí faoin bhfreagracht leathnaithe táirgeora. Níor cheart sainaithint den sórt sin a bhaint amach ach amháin trí chód QR nó teicneolaíocht chaighdeánaithe marcála digití oscailte eile. Ba cheart an tsiombail sin a bheith soiléir agus gan débhrí do thomhaltóirí maidir le hin-athchúrsáilteacht na pacáistíochta.

(72)

Ba cheart lipéad a bheith ar phacáistíocht a chumhdaítear leis na córais shainordaitheacha aisíoctha éarlaise lena gcuirtear in iúl do na tomhaltóirí go gcumhdaíonn an córas sin an phacáistíocht agus, dá bhrí sin, gur cheart í a bhailiú trí bhealaí sonracha bailiúcháin arna n-údarú ag na húdaráis náisiúnta chun na críche sin. Ba cheart an lipéad sin a bheith ina lipéad comhchuibhithe AE arna bhunú ag an gCoimisiún. Ba cheart na Ballstáit a bheith in ann a cheangal go n-úsáidfear na lipéid chomhchuibhithe sin ar phacáistíocht atá faoi réir córais aisíoctha éarlaise arna mbunú faoin dlí náisiúnta, roimh theacht i bhfeidhm an Rialacháin seo.

(73)

Feidhmíonn Treoir 2005/29/CE ó Pharlaimint na hEorpa agus ón gComhairle (32) mar ‘líontán sábhála’ lena n-áirithítear ardleibhéal cosanta do thomhaltóirí i ngach earnáil agus lena gcomhlánaítear ceanglais níos mionsonraithe i ndlí earnáilsonrach nó i ndlí táirge-shonrach an Aontais, ach amháin i gcás coinbhleacht idir an Treoir seo agus rialacha eile de chuid an Aontais a bhaineann le gnéithe sonracha de chleachtais tráchtála éagóracha, agus, sa chás sin, ba cheart forlámhas a bheith ag rialacha an Aontais maidir leis na gnéithe sonracha sin. Le Treoir (AE) 2024/825 ó Pharlaimint na hEorpa agus ón gComhairle (33), foráiltear gur cleachtas tráchtála éagórach é lipéad inbhuanaitheachta saorálach a thaispeáint nach gcomhlíonann ceanglais áirithe.

(74)

Chun coinníollacha aonfhoirmeacha a áirithiú maidir le cur chun feidhme na gceanglas maidir le lipéadú, ba cheart cumhachtaí cur chun feidhme a thabhairt don Choimisiún chun sórtáil dramhaíola a fheabhsú a thuilleadh, chun an mhodheolaíocht a bhunú chun comhdhéanamh ábhar na pacáistíochta a shainaithint agus chun substaintí ar údar imní iad a shainaithint trí bhíthin teicneolaíochtaí digiteacha caighdeánaithe oscailte, agus chun lipéad comhchuibhithe, sonraíochtaí comhchuibhithe agus formáid chomhchuibhithe a bhunú maidir leis na ceanglais lipéadaithe do phacáistíocht agus do ghabhdáin dramhaíola arna mbunú faoin Rialachán seo. Agus na sonraíochtaí sin á bhforbairt, ba cheart don Choimisiún a laghad eilimintí teanga is féidir a úsáid agus ba cheart faisnéis eolaíoch nó faisnéis theicniúil eile atá ar fáil a chur san áireamh, lena n-áirítear caighdeáin idirnáisiúnta ábhartha. Ba cheart aon éagsúlachtaí atá ann idir na Ballstáit maidir le méid na héarlaise a ghearrtar a chur san áireamh i ndearadh lipéadú comhchuibhithe na pacáistíochta atá faoi réir córas aisíoctha éarlaise. I bhfianaise an chórais nua, ba cheart Cinneadh 97/129/CE ón gCoimisiún (34) a aisghairm ón 12 Lúnasa 2028 agus ba cheart an méid atá ann a chorprú sa ghníomh cur chun feidhme.

(75)

Ba cheart d’oibreoirí eacnamaíocha a áirithiú go gcomhlíonann an phacáistíocht na ceanglais faoin Rialachán seo. Ba cheart dóibh bearta iomchuí a dhéanamh chun an comhlíonadh sin a áirithiú i ndáil lena róil féin sa slabhra soláthair chun saorghluaiseacht phacáistíochta sa mhargadh inmheánach a áirithiú agus chun a hinbhuanaitheacht a fheabhsú.

(76)

Ós rud é gur ag an monaróir atá an t-eolas mionsonraithe faoin bpróiseas dearaidh agus táirgthe, is eisean nó ise is fearr is féidir an measúnú comhréireachta a dhéanamh dá ndéantar foráil sa Rialachán seo. Faoin Rialachán seo, is ar an monaróir, agus ar an monaróir amháin, ba cheart an oibleagáid a bheith an measúnú comhréireachta a dhéanamh.

(77)

Ba cheart a áirithiú go soláthródh soláthróirí pacáistíochta nó ábhar pacáistíochta an fhaisnéis agus an doiciméadacht go léir is gá don mhonaróir chun go bhféadfaidh an monaróir comhréireacht na pacáistíochta agus na n-ábhar pacáistíochta a léiriú. Ba cheart an fhaisnéis agus an doiciméadacht sin a sholáthar ar pháipéar nó i bhfoirm leictreonach.

(78)

Chun feidhmiú an mhargaidh inmheánaigh a choimirciú, is gá a áirithiú go gcomhlíonfaidh pacáistíocht ó thríú tíortha a thagann isteach i margadh an Aontais an Rialachán seo, bíodh sí á hallmhairiú mar phacáistíocht neamhspleách nó in éineacht le táirge pacáistithe. Is gá, go háirithe, a áirithiú gur chuir monaróirí nósanna imeachta iomchuí um measúnú comhréireachta i gcrích maidir leis an bpacáistíocht sin. Ba cheart d’allmhaireoirí a áirithiú, dá bhrí sin, go gcomhlíonann an phacáistíocht a chuireann siad ar an margadh na ceanglais sin agus go mbeidh doiciméadacht a tarraingíodh suas ag monaróirí ar fáil do na húdaráis inniúla náisiúnta lena n-iniúchadh.

(79)

Agus an phacáistíocht á cur ar an margadh, ba cheart do gach allmhaireoir an méid seo a leanas a shonrú ar an bpacáistíocht: a ainm, trádainm cláraithe nó trádmharc cláraithe chomh maith lena sheoladh poist agus, i gcás ina bhfuil sé ar fáil, modh leictreonach cumarsáide trínar féidir teagmháil a dhéanamh leis. Ba cheart foráil a dhéanamh d‘eisceachtaí i gcásanna nach féidir na tásca sin a chur ar an bpacáistíocht.

(80)

Toisc go gcuireann an dáileoir pacáistíocht ar fáil ar an margadh tar éis don mhonaróir nó don allmhaireoir í a chur ar an margadh sin, ba cheart don dáileoir gníomhú leis an gcúram is iomchuí i ndáil le ceanglais an Rialacháin seo. Ba cheart don dáileoir a áirithiú freisin nach ndéantar dochar le láimhseáil na pacáistíochta do chomhlíonadh na gceanglas sin.

(81)

Ós rud é go bhfuil dáileoirí agus allmhaireoirí gar don mhargadh agus go bhfuil ról tábhachtach acu maidir le comhréireacht pacáistíochta a áirithiú, ba cheart dóibh a bheith bainteach leis na cúraimí faireachais margaidh arna ndéanamh ag na húdaráis náisiúnta inniúla, agus ba cheart dóibh a bheith faoi réir chun bheith rannpháirteach go gníomhach tríd an bhfaisnéis uile is gá i ndáil leis an bpacáistíocht lena mbaineann a sholáthar do na húdaráis sin.

(82)

Aon allmhaireoir nó dáileoir a chuireann pacáistíocht ar an margadh faoina ainm nó faoina thrádmharc féin, nó a mhodhnaíonn an phacáistíocht atá curtha ar an margadh cheana ar bhealach a d’fhéadfadh difear a dhéanamh do chomhlíonadh an Rialacháin seo, ba cheart a mheas gurb é an monaróir é agus ba cheart dó an fhreagracht oibleagáidí an mhonaróra a ghlacadh air féin.

(83)

Trí inrianaitheacht pacáistíochta a áirithiú feadh an tslabhra soláthair ina iomláine éascaítear cúram na n-údarás um fhaireachas margaidh oibreoirí eacnamaíocha a rianú a chuir pacáistíocht neamhchomhlíontach ar an margadh nó a chuir ar fáil ar an margadh í. Ba cheart a cheangal ar na hoibreoirí eacnamaíocha, dá bhrí sin, an fhaisnéis faoina n-idirbhearta a choinneáil go ceann tréimhse ama áirithe.

(84)

Ní féidir dul i ngleic leis an bhfadhb iomlán a bhaineann le giniúint iomarcach dramhaíola ó phacáistíocht trí oibleagáidí a leagan síos maidir le dearadh pacáistíochta. I gcás cineálacha áirithe pacáistíochta, ba cheart oibleagáidí maidir leis an gcóimheas spáis fholaimh a laghdú a fhorchur ar oibreoirí eacnamaíocha a líonann an phacáistíocht sin nó a úsáideann ar shlí eile í. I gcás pacáistíocht ghrúpáilte, iompair agus ríomhthráchtála a úsáidtear chun táirgí a sholáthar do dháileoirí deiridh nó d’úsáideoirí deiridh, níor cheart an cóimheas spáis fholaimh a bheith níos mó ná 50 %. Níor cheart feidhm a bheith ag an oibleagáid sin maidir le pacáistíocht in-athúsáidte. I gcomhréir leis an ordlathas dramhaíola agus chun nuálaíocht pacáistíochta a chur chun cinn d’fhonn dramhaíl ó phacáistíocht a laghdú, ba cheart oibreoirí eacnamaíocha a úsáideann pacáistíocht díolacháin mar phacáistíocht ríomhthráchtála a bheith in ann a bheith díolmhaithe ón oibleagáid sin. Chun coinníollacha aonfhoirmeacha a áirithiú maidir leis an gcóimheas idir spás folamh a ríomh, ba cheart cumhachtaí cur chun feidhme a thabhairt don Choimisiún chun an mhodheolaíocht dá ríomh a bhunú.

(85)

Chun ardleibhéal cosanta comhshaoil a áirithiú sa mhargadh inmheánach chomh maith le hardleibhéal sábháilteachta bia agus sláinteachais bia, agus chun gur fusa na spriocanna a bhaint amach maidir le dramhaíl ó phacáistíocht a chosc, níor cheart pacáistíocht neamhriachtanach ná inseachanta a chur ar an margadh. Soláthraítear liosta na bhformáidí pacáistíochta sin sa Rialachán seo. Ba cheart don Choimisiún treoirlínte a fhoilsiú ina míneofar an liosta sin ar bhealach níos mionsonraithe, lena n-áirítear samplaí den phacáistíocht agus treoir a thabhairt maidir leis na díolúintí ó na srianta.

(86)

Chun ciorclaíocht agus úsáid inbhuanaithe na pacáistíochta a chur chun cinn, is gá teorainn a chur leis an riosca nach n-athúsáidfear pacáistíocht a mhargaítear mar phacáistíocht in-athúsáidte sa chleachtas agus a áirithiú go dtabharfaidh tomhaltóirí pacáistíocht in-athúsáidte ar ais. Is é an bealach is iomchuí chun é sin a bhaint amach ceangal a chur ar oibreoirí eacnamaíocha a úsáideann pacáistíocht in-athúsáidte a áirithiú go gcuirtear córas athúsáide i bhfeidhm, rud a fhágfaidh gur féidir an phacáistíocht sin a chur i gcúrsaíocht, a uainiú agus a úsáid arís agus arís eile. Chun na buntáistí is mó a bhaineann leis na córais sin a áirithiú, ba cheart íoscheanglais a leagan síos maidir le córais lúboscailte agus lúbiata. Ba cheart an deimhniú go gcomhlíonann pacáistíocht in-athúsáidte córas athúsáide a bheith mar chuid de dhoiciméadacht theicniúil na pacáistíochta sin. Is féidir méid éagsúil agus clúdach geografach éagsúil a bheith i gceist le córais athúsáide, agus d’fhéadfadh córais áitiúla níos lú a bheith i gceist leo nó córais níos mó lena gcuimsítear críoch iomlán Ballstáit amháin nó críocha roinnt Ballstát.

(87)

Is gá pacáistíocht in-athúsáidte a bheith sábháilte dá húsáideoirí. Dá bhrí sin, ba cheart d’oibreoirí eacnamaíocha a thairgeann a gcuid táirgí i bpacáistíocht in-athúsáidte a áirithiú, sula n-úsáidtear pacáistíocht in-athúsáidte arís, go gcuirtear í trí phróiseas athriochtúcháin, ar cheart ceanglais a leagan síos ina leith.

(88)

Tagann pacáistíocht in-athúsáidte chun bheith ina dramhaíl, de réir bhrí Airteagal 3, pointe (1), de Threoir 2008/98/CE, nuair a dhéanann a sealbhóir í a dhiúscairt, nuair a bhíonn sé ar intinn ag a sealbhóir í a dhiúscairt nó nuair a bhíonn ceangal ar shealbhóir í a dhiúscairt. De ghnáth ní mheastar gur dramhaíl í pacáistíocht in-athúsáidte i bpróiseas athriochtúcháin.

(89)

Chun dreasú a thabhairt maidir le dramhaíl a chosc, ba cheart coincheap nua maidir le ‘athlíonadh’ a thabhairt isteach. Ba cheart athlíonadh a thuiscint mar bheart sonrach maidir le dramhaíl a chosc a chuirtear san áireamh,agus a bhfuil gá leis, chun na spriocanna maidir le dramhaíl a chosc a bhaint amach, mar a leagtar amach sa Rialachán seo iad.

(90)

I gcás ina dtugann oibreoirí eacnamaíocha an deis táirgí a cheannach trí athlíonadh, ba cheart dóibh a áirithiú go gcomhlíonann a stáisiúin athlíonta ceanglais áirithe chun sláinte agus sábháilteacht na dtomhaltóirí a áirithiú. Sa chomhthéacs sin, i gcás ina n-úsáideann tomhaltóirí a gcoimeádáin féin, ba cheart do na hoibreoirí eacnamaíocha, dá bhrí sin, faisnéis a thabhairt faoi na coinníollacha a bhaineann le hathlíonadh agus le húsáid shábháilte na gcoimeádán sin. Chun athlíonadh a spreagadh, níor cheart d’oibreoirí eacnamaíocha pacáistíocht a sholáthar ag na stáisiúin athlíonta atá saor in aisce ná pacáistíocht nach bhfuil ina cuid de chóras aisíoctha éarlaise ag na stáisiúin athlíonta. Ba cheart gníomhaithe eacnamaíocha a dhíolmhú ó dhliteanas i leith fadhbanna sábháilteachta bia a d’fhéadfadh eascairt as coimeádáin a úsáid atá curtha ar fáil ag tomhaltóirí.

(91)

Chun an cion méadaitheach de phacáistíocht aon úsáide agus na cainníochtaí méadaitheacha dramhaíola ó phacáistíocht arna nginiúint a laghdú, is gá spriocanna cainníochtúla athúsáide a bhunú maidir le pacáistíocht in earnálacha a measúnaíodh gurb iad is mó a bhfuil cumas laghdaithe dramhaíola ó phacáistíocht iontu, is iad sin bia agus deochanna beir leat, earraí bána móra agus pacáistíocht iompair. Rinneadh é sin a mheas bunaithe ar fhachtóirí amhail na córais athúsáide a bhí ann cheana, an gá atá le pacáistíocht a úsáid agus an fhéidearthacht na ceanglais fheidhmiúla a chomhlíonadh i dtéarmaí srianadh, slachtmhaireachta, sláinte, sláinteachais agus sábháilteachta. Cuireadh difríochtaí na dtáirgí agus a gcórais táirgthe agus dáileacháin san áireamh freisin. Agus na spriocanna sin á gcur chun feidhme, ba cheart na tairbhí comhshaoil a bhaintear amach le linn saolré iomlán táirge a chur san áireamh. Meastar go dtacóidh leagan amach na spriocanna leis an nuálaíocht agus go méadófar cion na pacáistíochta athúsáide agus na réiteach athlíonta. Níor cheart pacáistíocht phlaisteach aon úsáide a cheadú le haghaidh bia agus deochanna a líontar agus a dtomhlaítear laistigh den áitreabh in earnáil na n-óstán, na mbialann agus na gcaiféanna (HORECA). Ba cheart é bheith de rogha ag tomhaltóirí i gcónaí bia agus deochanna beir leat a cheannach i gcoimeádáin in-athúsáidte nó dá gcuid féin faoi choinníollacha nach lú fabhair ná na coinníollacha is infheidhme maidir le bia agus deochanna a thairgtear i bpacáistíocht aon úsáide. Ba cheart d’oibreoirí eacnamaíocha a dhíolann bia agus deochanna beir leat an rogha a thairiscint do thomhaltóirí an bia nó na deochanna a cheannach i gcoimeádáin dá gcuid féin agus an rogha deochanna a cheannach i bpacáistíocht in-athúsáidte.

(92)

Faoi choinníollacha áirithe, ba cheart na Ballstáit a bheith in ann oibreoirí eacnamaíocha a dhíolmhú ó oibleagáidí athúsáide ar feadh tréimhse in-athnuaite 5 bliana. Ba cheart na coinníollacha sin a bheith bunaithe ar rátaí athchúrsála arda agus le rátaí arda maidir le dramhaíl a chosc is infheidhme sa Bhallstát díolmhaitheach, lena n-áirítear ráta tosaigh idirmheánach maidir le dramhaíl a chosc dar méid 3 % faoi 2028, chomh maith le plean maidir le dramhaíl chorparáideach a chosc agus a athchúrsáil a bheith glactha ag na hoibreoirí eacnamaíocha.

(93)

Maidir le pacáistíocht a chur ar an margadh, ar pacáistíocht í atá faoi réir srianta ar fhormáidí pacáistíochta áirithe a úsáid faoin Rialachán seo le haghaidh modhanna iompair a oibríonn ar bhonn trasteorann i gcás ina bhfuil seirbhísí lónadóireachta ar fáil ar bord, amhail aerárthaí, eitleáin, traenacha, longa cúrsála, báid farantóireachta, luaimh agus báid, ba cheart a thuiscint as sin taisteal leis an bpacáistíocht sin chuig an Aontas nó laistigh de. Ba cheart taisteal laistigh den Aontas a thuiscint mar chás ina n-imíonn an fheithicil iompair as agus ina dtagann sí isteach ag ceann scríbe atá lonnaithe san Aontas.

(94)

Chun a n-éifeachtacht a mhéadú agus chun cóir chomhionann oibreoirí eacnamaíocha a áirithiú, ba cheart na spriocanna athúsáide a chur ar na hoibreoirí eacnamaíocha. I gcás spriocanna athúsáide le haghaidh deochanna, ba cheart na spriocanna athúsáide a chur ar dháileoirí deiridh a chuireann deochanna i bpacáistíocht díolacháin ar fáil do thomhaltóirí. Deochanna áirithe a mheastar a bheith meatach, ós rud é go bhfuil siad íogair do mhilleadh micribhitheolaíoch mar gheall ar bhaictéir nó giostaí, bíonn gá acu le teicneolaíocht aiseipteach shonrach chun iad a chosaint ar mhilleadh agus chun seilfré fhada a choinneáil. Dá bhrí sin, ba cheart bainne agus deochanna meatacha eile a dhíolmhú ón oibleagáid na spriocanna athúsáide le haghaidh pacáistíocht a chomhlíonadh. Ba cheart na spriocanna a ríomh mar chéatadán de na díolacháin, den mhéid nó den mheáchan díolta i bpacáistíocht in-athúsáidte laistigh de chóras athúsáide nó, i gcás pacáistíochta iompair, mar chéatadán den líon uaireanta a úsáidtear í. Ba cheart na spriocanna a bheith neodrach ó thaobh ábhair de. Chun coinníollacha aonfhoirmeacha a áirithiú maidir le cur chun feidhme na spriocanna athúsáide, ba cheart cumhachtaí cur chun feidhme a thabhairt don Choimisiún a mhéid a bhaineann leis an modheolaíocht chun iad a ríomh.

(95)

I gcásanna áirithe, ní gá úsáid a bhaint as formáidí pacáistíochta iompair aon úsáide, toisc go bhfuil raon leathan de roghanna malartacha in-athúsáidte dea-fheidhmithe ann. Chun a áirithiú go n-úsáidfear na roghanna malartacha sin ar bhealach éifeachtach, is iomchuí a cheangal ar oibreoirí eacnamaíocha, agus táirgí á n-iompar acu idir láithreáin éagsúla an oibreora eacnamaíoch chéanna nó idir an t-oibreoir eacnamaíoch agus na fiontair nasctha nó chomhpháirtíochta, gan ach pacáistíocht iompair in-athúsáidte a úsáid i leith formáidí pacáistíochta amhail pailléid, boscaí plaisteacha infhillte, cliathbhoscaí plaisteacha, bulc-choimeádáin idirmheánacha, idir dhocht agus solúbtha, nó drumaí. Ba cheart feidhm a bheith ag an oibleagáid chéanna, ar na cúiseanna céanna, maidir le hoibreoirí eacnamaíocha a iompraíonn táirgí laistigh de Bhallstát amháin. I gcás cineálacha áirithe pacáistíochta iompair nó díolacháin, ní rogha iad roghanna malartacha in-athúsáidte. Is amhlaidh atá i gcás boscaí cairtchláir, ina bhfuil líon na n-uainíochtaí an-íseal, agus i gcás pacáistíochta a úsáidtear le haghaidh táirgí áirithe atá íogair ó thaobh teagmhála de, a éilíonn níochán speisialta idir úsáidí. Dá bhrí sin, ba cheart pacáistíocht den sórt sin a dhíolmhú ón oibleagáid na spriocanna athúsáide le haghaidh pacáistíocht iompair agus pacáistíocht díolacháin a úsáidtear chun táirgí a iompar a chomhlíonadh.

(96)

D’fhéadfadh sé a bheith dúshlánach d’oibreoirí eacnamaíocha beaga na spriocanna athúsáide agus athlíonta a bhaint amach. Dá bhrí sin, ba cheart oibreoirí eacnamaíocha áirithe a dhíolmhú ón oibleagáid na spriocanna athúsáide pacáistíochta a chomhlíonadh má chuireann siad níos lú ná méid áirithe pacáistíochta ar an margadh, agus má chomhlíonann siad an sainmhíniú ar mhicrifhiontar a leagtar amach i Moladh 2003/361/CE ón gCoimisiún (35) de réir mar is infheidhme an 11 Feabhra 2025, nó má tá limistéar díolacháin faoi theorainn achair áirithe ag dáileoir deiridh. Chun na gcríoch sin, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún i ndáil le tairseach an limistéir díolacháin a leasú, na coinníollacha mionsonraithe agus na ceanglais tuairiscithe atá le cur i bhfeidhm maidir le socruithe comhthiomsaithe na ndáileoirí deiridh a bhunú agus a shonrú, an tairseach méide chun oibreoirí eacnamaíocha a dhíolmhú, agus maidir le díolúintí breise a bhunú d’oibreoirí eacnamaíocha eile nó d’fhormáidí sonracha pacáistíochta a chumhdaítear leis na spriocanna athúsáide nó athlíonta i gcás srianta eacnamaíocha ar leith, fadhbanna tromchúiseacha sláinteachais, sábháilteachta bia nó comhshaoil a chuireann cosc ar bhaint amach na spriocanna sin.

(97)

Chun comhlíonadh na spriocanna athúsáide a fhíorú, is gá do na hoibreoirí eacnamaíocha ábhartha tuairisciú do na húdaráis inniúla. Ba cheart d’oibreoirí eacnamaíocha na sonraí ábhartha a thuairisciú do gach bliain féilire, ag tosú ón mbliain féilire 2030. Ba cheart do na Ballstáit na sonraí sin a chur ar fáil go poiblí.

(98)

Ós rud é go bhféadfaidh roinnt formáidí pacáistíochta éagsúla a bheith ag oibreoirí eacnamaíocha, ba cheart baint amach na spriocanna athúsáide a ríomh ar bhonn chainníocht iomlán an bhia nó na ndeochanna a chuirtear ar fáil ar an margadh, trí thagairt do líon iomlán na n-aonad díolacháin, nó do mheáchan an bhia nó do thoirt na ndeochanna, de réir mar is infheidhme.

(99)

I bhfianaise leibhéil arda tomhaltais na málaí siopadóireachta plaisteacha, úsáid neamhéifeachtúil acmhainní agus na dóchúlachta go ndiúscraítear mar bhruscar iad, is iomchuí forálacha a choinneáil ar bun chun laghdú marthanach ar thomhaltas málaí siopadóireachta plaisteacha a bhaint amach, mar a bunaíodh cheana le Treoir 94/62/CE arna leasú le Treoir (AE) 2015/720 ó Pharlaimint na hEorpa agus ón gComhairle (36). I bhfianaise na gcineálacha cur chuige éagsúla atá ann faoi láthair agus na gceanglas tuairiscithe teoranta maidir le málaí siopadóireachta plaisteacha, is deacair a mheas an bhfuil an cuspóir maidir le laghdú ‘marthanach’ ar thomhaltas na málaí sin bainte amach mar thoradh ar bhearta laghdaithe tomhaltais arna ndéanamh ag na Ballstáit, agus anuas air sin, ar tháinig méadú ar thomhaltas cineálacha eile málaí siopadóireachta plaisteacha dá bharr. Is gá, dá bhrí sin, sainmhíniú ar laghdú marthanach ar thomhaltas málaí siopadóireachta plaisteacha a chomhchuibhiú agus sprioc chomhchoiteann a leagan síos chomh maith le ceanglais tuairiscithe nua a thabhairt isteach.

(100)

I bhfianaise thorthaí an staidéir meastóireachta ar mhálaí siopadóireachta plaisteacha dar teideal ‘Scoping study to assess the feasibility of further EU measures on waste prevention and implementation of the Plastic Bags Directive, Part II, Implementation of the Plastic Bags Directive’ [Staidéar scóipe chun measúnú a dhéanamh ar a indéanta atá sé bearta breise de chuid an Aontais a dhéanamh maidir le dramhaíl a chosc agus maidir leis an Treoir maidir le Málaí Plaisteacha a chur chun feidhme, Cuid II, Cur Chun Feidhme na Treorach maidir le Málaí Plaisteacha], is gá bearta breise a dhéanamh chun tomhaltas málaí siopadóireachta plaisteacha éadroma a laghdú agus na héifeachtaí a mheas a d’fhéadfadh a bheith ann dá n-ionadófaí iad le málaí siopadóireachta plaisteacha an-éadroim agus málaí siopadóireachta plaisteacha níos tibhe ná 50 miocrón.

(101)

Ós rud é go bhfuil riosca ard go ndéanfaí dramhaíl de mhálaí siopadóireachta plaisteacha an-éadrom, ar lú ná 15 mhiocrón iad, agus go bhféadfaidís cur leis an truailliú muirí, ba cheart bearta a dhéanamh chun a gcur ar an margadh a shrianadh ach amháin i gcás úsáidí a bhfuil géarghá leo. Níor cheart na málaí plaisteacha sin a chur ar an margadh mar phacáistíocht le haghaidh bulc-earraí bia, ach amháin ar chúiseanna sláinteachais nó mar phacáistíocht le haghaidh bulc-earraí fliucha amhail feoil amh, iasc nó táirgí déiríochta.

(102)

Chun laghdú marthanach a bhaint amach ar thomhaltas málaí siopadóireachta plaisteacha éadroma ar a gcríoch, ba cheart na Ballstáit a bheith in ann bearta a ghlacadh lena n-áirítear toirmeasc a chur ar na cineálacha sin málaí siopadóireachta plaisteacha, spriocanna laghdaithe náisiúnta a chur chun feidhme, ionstraimí eacnamaíocha a choinneáil ar bun nó a thabhairt isteach chomh maith le srianta margaíochta eile, ar choinníoll go bhfuil na bearta sin comhréireach agus neamh-idirdhealaitheach. Féadfaidh na bearta sin a bheith éagsúil ag brath ar thionchar comhshaoil na málaí siopadóireachta plaisteacha éadroma nuair a dhéantar iad a aisghabháil nó a dhiúscairt, a n-airíonna múirínithe, a marthanacht nó an úsáid shonrach atá beartaithe dóibh. Ar an gcoinníoll go mbaintear amach na cuspóirí a leagtar amach sa Rialachán seo le haghaidh na málaí siopadóireachta plaisteacha, ba cheart do na Ballstáit a bheith in ann na forálacha a bhaineann leis na málaí sin a chur chun feidhme trí bhíthin comhaontuithe idir na húdaráis inniúla agus na hearnálacha eacnamaíocha lena mbaineann.

(103)

I gcás ina mbeidh laghdú ar úsáid na málaí siopadóireachta plaisteacha níor cheart teacht as sin go n-ionadófaí iad le málaí ó ábhair phacáistíochta eile. Ba cheart don Choimisiún faireachán a dhéanamh ar úsáid ábhar pacáistíochta eile agus, i gcás inarb iomchuí, sprioc a mholadh, mar aon le bearta chun tomhaltas na n-ábhar pacáistíochta sin a laghdú,.

(104)

Chun cur chun feidhme éifeachtach agus comhchuibhithe na gceanglas inbhuanaitheachta a leagtar síos sa Rialachán seo nó de bhun an Rialacháin seo a áirithiú, ba cheart comhlíonadh na gceanglas sin a thomhas trí úsáid a bhaint as modhanna iontaofa, cruinne agus in-atáirgthe a chuireann san áireamh na modhanna úrscothacha a shainaithnítear go ginearálta.

(105)

Chun a áirithiú nach mbeidh aon bhacainní ar thrádáil ar an margadh inmheánach, ba cheart ceanglais maidir le hinbhuanaitheacht phacáistíochta, lena n-áirítear substaintí ar údar imní iad i bpacáistíocht, pacáistíocht inmhúirínithe, íoslaghdú pacáistíochta, pacáistíocht in-athúsáidte agus córais athúsáide a chomhchuibhiú ar leibhéal an Aontais. Chun measúnú comhréireachta maidir leis na ceanglais sin a éascú, lena n-áirítear modhanna tástála, tomhais nó ríofa, is gá foráil a dhéanamh do thoimhde comhréireachta i gcás pacáistíochta agus táirgí pacáistithe atá i gcomhréir le caighdeáin chomhchuibhithe a ghlactar i gcomhréir le Rialachán (AE) 1025/2012 chun sonraíochtaí teicniúla mionsonraithe na gceanglas sin a chur in iúl.

(106)

In éagmais caighdeáin chomhchuibhithe, ba cheart a bheith in ann dul ar iontaoibh sonraíochtaí comhchoiteanna mar chúl-réiteach chun go n-éascófar oibleagáid an mhonaróra ceanglais inbhuanaitheachta a chomhlíonadh, mar shampla i gcás ina bhfuil moill mhíchuí ann maidir le caighdeán comhchuibhithe a bhunú. Ina theannta sin, ba cheart a bheith in ann dul ar iontaoibh sonraíochtaí coiteanna i gcás inar chuir an Coimisiún srian leis na tagairtí do chaighdeáin chomhchuibhithe ábhartha i gcomhréir le hAirteagal 11(5) de Rialachán (AE) Uimh. 1025/2012 nó i gcás inar tharraing sé siar na tagairtí sin. Ba cheart toimhde comhréireachta eascairt freisin as sonraíochtaí comhchoiteanna a chomhlíonadh, ar sonraíochtaí iad a ghlac an Coimisiún trí ghníomhartha cur chun feidhme.

(107)

Chun coinníollacha aonfhoirmeacha a áirithiú maidir le cur chun feidhme an dul ar iontaoibh sonraíochtaí comhchoiteanna, ba cheart cumhachtaí cur chun feidhme a thabhairt don Choimisiún chun sonraíochtaí comhchoiteanna a leagan síos, a leasú nó a aisghairm le haghaidh na gceanglas maidir le hinbhuanaitheacht, lipéadú agus córais athúsáide, agus modhanna tástála, tomhais nó ríofa a ghlacadh. Ba cheart don Choimisiún tuairimí na gcomhlachtaí ábhartha agus na ngrúpaí saineolaithe a chur san áireamh agus ba cheart dó dul i gcomhairle leis na páirtithe leasmhara ábhartha uile agus na dréachtghníomhartha cur chun feidhme á n-ullmhú aige.

(108)

Chun comhleanúnachas le dlí eile de chuid an Aontais a áirithiú, is é an rud ba cheart a bheith sa nós imeachta um measúnú comhréireachta an modúl ar rialú inmheánach táirgthe a áirítear sa Rialachán seo bunaithe ar na modúil a áirítear i gCinneadh Uimh. 768/2008/CE ó Pharlaimint na hEorpa agus ón gComhairle (37).

(109)

Níor cheart don mharcáil CE ar phacáistíocht a shonrú go gcomhlíonann an phacáistíocht ceanglais an Rialacháin seo; níor cheart di ach a shonrú go gcomhlíonann an táirge pacáistithe dlí is infheidhme an Aontais maidir le táirgí, más ábhartha. Go deimhin, is é a cheanglaítear go hiondúil le dlí an Aontais maidir le táirgí go ngreamaítear an mharcáil CE a bhaineann leis an táirge den táirge féin nó dá phacáistíocht. Má cheanglaítear marcáil CE a chur ar an bpacáistíocht chun a thaispeáint go gcomhlíontar ceanglais an Rialacháin seo, d’fhéadfadh mearbhall agus míthuiscint a bheith ann i ndáil leis an gceist an mbaineann an mharcáil leis an bpacáistíocht féin nó leis an táirge pacáistithe agus ar deireadh thiar le héiginnteachtaí maidir le sábháilteacht éifeachtach agus comhréireacht na dtáirgí pacáistithe lena mbaineann.

(110)

Ba cheart a léiriú leis an dearbhú comhréireachta AE go gcomhlíonann pacáistíocht táirge ceanglais an Rialacháin seo.

(111)

Ba cheart do mhonaróirí dearbhú comhréireachta AE a tharraingt suas chun faisnéis a sholáthar faoi chomhréireacht na pacáistíochta leis an Rialachán seo. D’fhéadfadh sé go gceanglófaí ar mhonaróirí freisin dearbhú comhréireachta AE a tharraingt suas faoi dhlí eile de chuid an Aontais. Chun rochtain ar fhaisnéis a áirithiú chun críche faireachais margaidh, ba cheart dearbhú comhréireachta AE aonair a tharraingt suas i ndáil le gach gníomh dlí ábhartha de chuid an Aontais. Chun an t-ualach riaracháin ar oibreoirí eacnamaíocha a laghdú, ba cheart é a bheith indéanta an dearbhú comhréireachta AE aonair sin a bheith ina shainchomhad de dhearbhuithe comhréireachta aonair ábhartha.

(112)

Le Rialachán (AE) 2019/1020 ó Pharlaimint na hEorpa agus ón gComhairle (38), foráiltear do chreat le haghaidh faireachas margaidh ar tháirgí agus le haghaidh rialuithe ar tháirgí ó thríú tíortha. Ba cheart feidhm a bheith ag an Rialachán sin maidir le pacáistíocht a chumhdaítear leis an Rialachán seo chun a áirithiú go gcomhlíonann pacáistíocht a bhaineann tairbhe as an tsaorghluaiseacht earraí laistigh den Aontas ceanglais lena soláthraítear ardleibhéal cosanta i gcás leas an phobail, amhail sláinte an duine, sábháilteacht agus an comhshaol.

(113)

Ba cheart feabhas a chur ar bhainistiú dramhaíola san Aontas d’fhonn cáilíocht an chomhshaoil a chosaint, a chaomhnú agus a fheabhsú, sláinte an duine a chosaint, úsáid stuama, éifeachtúil agus réasúnach acmhainní nádúrtha a áirithiú, prionsabail an gheilleagair chiorclaigh a chur chun cinn, úsáid an fhuinnimh in-athnuaite a fheabhsú, an éifeachtúlacht fuinnimh a mhéadú, spleáchas an Aontais ar acmhainní allmhairithe a laghdú, deiseanna eacnamaíocha nua a sholáthar agus cur leis an iomaíochas fadtéarmach. Trí úsáid níos éifeachtúla a bhaint as acmhainní, bhainfí amach freisin glanchoigiltis shubstaintiúla do ghnólachtaí, d’údaráis phoiblí agus do thomhaltóirí an Aontais agus, ag an am céanna, laghdófaí iomlán na n-astaíochtaí gás ceaptha teasa.

(114)

D’ainneoin na gceanglas maidir le híoslaghdú pacáistíochta agus na n-oibleagáidí a leagtar síos i dTreoir 94/62/CE, tá méadú tagtha ar ghiniúint dramhaíola ó phacáistíocht i dtéarmaí iomlána agus ar bhonn per capita agus léiríonn treochtaí gur ann do laghdú géar breise ar athúsáid agus ar athlíonadh na pacáistíochta mar gheall ar mhéadú ar thomhaltas beir leat agus ar ríomhthráchtáil. De réir mar a tháinig athrú ar tháirgí, ábhair agus patrúin tomhaltais, tháinig méadú suntasach ar úsáid na pacáistíochta aon úsáide, go háirithe plaisteach aon úsáide. Tá sin nasctha leis an timpeallacht mhiondíola, ina bhfuil líonraí dáilte níos mó, agus le táirgí a mhonarú agus a phacáil ar línte pacáistíochta ardluais, nithe a chuireann brú anuas le chéile ar an margadh do tháirgí athúsáide agus athlíonta.

(115)

Chun faireachán agus fíorú a dhéanamh go gcomhlíonann na táirgeoirí agus na heagraíochtaí um fhreagracht táirgeoirí na hoibleagáidí faoi scéimeanna freagrachta leathnaithe táirgeora a bhaineann le bailiú agus cóireáil dramhaíola óna dtáirgí, is gá do na Ballstáit údarás inniúil amháin nó níos mó a ainmniú.

(116)

Chun a áirithiú gur fearr, gur tráthúla agus gurb aonfhoirmí a chuireann na Ballstáit chun feidhme na spriocanna maidir le dramhaíl a chosc agus a athchúrsáil, agus chun aon laigí sa chur chun feidhme a thuar, ba cheart córas tuarascálacha luathrabhaidh a choinneáil ar bun chun easnaimh a bhrath agus chun bheith in ann gníomhaíocht a dhéanamh roimh na spriocdhátaí chun na spriocanna a bhaint amach. Maidir le leathnú an chórais sin, a bhfuil baint amach spriocanna athchúrsála cumhdaithe aige faoi Threoir 94/62/CE, ba cheart a áireamh ann spriocanna laghdaithe maidir le dramhaíl ó phacáistíocht atá le baint amach ag na Ballstáit faoi 2030, 2035 agus 2040.

(117)

Toisc gur gné thábhachtach den bhainistiú dramhaíola trí chéile iad bainistiú na pacáistíochta agus bainistiú na dramhaíola ó phacáistíocht, ba cheart do na Ballstáit caibidil ar leithligh a shannadh don tsaincheist sin i bpleananna bainistithe dramhaíola a ullmhófar agus an oibleagáid a leagtar síos i dTreoir 2008/98/CE á forfheidhmiú acu. Na bearta maidir le dramhaíl a chosc agus maidir le hathúsáid, ba cheart iad a áireamh sna cláir maidir le dramhaíl a chosc a cheanglaítear de bhun Threoir 2008/98/CE. Ba cheart na caibidlí sin a áireamh sna pleananna bainistithe dramhaíola agus sna cláir maidir le dramhaíl a chosc mar chuid den chéad mheastóireacht rialta eile a dhéanfar mar a cheanglaítear de bhun Threoir 2008/98/CE, nó níos luaithe.

(118)

Cuirtear leis na rialacha bainistithe dramhaíola agus na prionsabail ghinearálta a leagtar síos i dTreoir 2008/98/CE sa Rialachán seo.

(119)

Is é an dramhaíl a chosc an bealach is éifeachtúla chun éifeachtúlacht acmhainní a fheabhsú agus chun laghdú a dhéanamh ar thionchar na dramhaíola ar an gcomhshaol. Tá sé tábhachtach, dá bhrí sin, go ndéanfadh oibreoirí eacnamaíocha bearta iomchuí chun giniúint na dramhaíola a laghdú trí phacáistíocht iomarcach agus úsáid formáidí pacáistíochta áirithe a dhíothú, trí shaolré na pacáistíochta a leathnú, trí tháirgí nó straitéisí díolacháin a athdhearadh ionas gur féidir gan aon phacáistíocht nó níos lú pacáistíochta a úsáid, lena n-áirítear díolacháin i mbulc, agus trí aistriú ó phacáistíocht aon úsáide go pacáistíocht in-athúsáidte.

(120)

Chun an laghdú uaillmhianach marthanach ar ghiniúint fhoriomlán na dramhaíola ó phacáistíocht a bhaint amach, ba cheart na spriocanna maidir le cosc ar dhramhaíl a shocrú le haghaidh an laghdaithe dramhaíola ó phacáistíocht atá le baint amach per capita faoi 2030. Chun sprioc laghdú 5 % ar dhramhaíl ó phacáistíocht a bhaint amach faoi 2030 i gcomparáid le 2018, ba cheart dearbhlaghdú foriomlán a dhéanamh dar garmhéid 19 % ar an meán ar fud an Aontais in 2030 i gcomparáid le cás bonnlíne 2030. Chun a áirithiú go leanfar leis na hiarrachtaí laghdaithe tar éis 2030, ba cheart sprioc laghdaithe 10 % i gcomparáid le 2018 a shocrú do 2035; meastar go laghdófar dramhaíl ó phacáistíocht 29 % leis sin, i gcomparáid le cás bonnlíne 2035. Ba cheart sprioc laghdaithe bhreise 15 % i gcomparáid le 2018 a shocrú do 2040 freisin; meastar go laghdófar dramhaíl ó phacáistíocht 37 % leis sin, i gcomparáid le cás bonnlíne 2040. Chun tacú leis na Ballstáit na spriocanna a bhaint amach maidir le dramhaíl ó phacáistíocht a chosc, ba cheart cumhachtaí cur chun feidhme a thabhairt don Choimisiún chun fachtóir ceartúcháin a bhunú chun an méadú nó an laghdú ar thurasóireacht i ndáil leis an mbonnbhliain 2018 a chur san áireamh. Ós rud é nach mbaineann giniúint dramhaíola ó phacáistíocht tráchtála agus thionsclaíoch le tomhaltas teaghlaigh, ní féidir feidhm a bheith ag na spriocanna maidir le dramhaíl a chosc per capita maidir le dramhaíl ó phacáistíocht tráchtála agus thionsclaíoch. Maidir leis na Ballstáit a bhfuil córas difriúil bunaithe acu chun dramhaíl ó phacáistíocht tí a bhainistiú, ar thaobh amháin, agus chun dramhaíl ó phacáistíocht thionsclaíoch agus tráchtála a bhainistiú, ar an taobh eile, ba cheart na Ballstáit sin a bheith in ann a sainiúlacht a choinneáil.

(121)

Ba cheart na Ballstáit a bheith in ann na spriocanna maidir le dramhaíl a chosc a bhaint amach le hionstraimí eacnamaíocha agus bearta eile chun dreasachtaí a sholáthar do chur i bhfeidhm an ordlathais dramhaíola, lena n-áirítear bearta atá le cur chun feidhme trí bhíthin scéimeanna freagrachta leathnaithe táirgeora, trí bhunú agus feidhmiú éifeachtach córas athúsáide a chur chun cinn agus trí oibreoirí eacnamaíocha a spreagadh chun tuilleadh féidearthachtaí athlíonta a chur ar fáil d’úsáideoirí deiridh. Ba cheart na bearta sin a ghlacadh go comhuaineach agus i dteannta le bearta eile faoin Rialachán seo, bearta atá dírithe ar phacáistíocht agus dramhaíl ó phacáistíocht a laghdú, amhail ceanglais maidir le híoslaghdú pacáistíochta, spriocanna athúsáide agus oibleagáidí athlíonta, tairseacha méideanna agus bearta chun laghdú marthanach ar thomhaltas málaí siopadóireachta plaisteacha éadroma a bhaint amach. Na Ballstáit a chloíonn leis na rialacha ginearálta a leagtar síos in CFAE agus a ghníomhaíonn i gcomhréir leis an Rialachán seo, ba cheart dóibh a bheith in ann forálacha a théann thar na spriocanna íosta maidir le dramhaíl a chosc a leagtar amach sa Rialachán seo a ghlacadh. Agus na bearta sin á gcur chun feidhme, ba cheart do na Ballstáit a bheith ar an eolas faoin riosca a bhaineann le haistriú ó ábhair phacáistíochta níos troime go hábhair phacáistíochta níos éadroime agus ba cheart dóibh tosaíocht a thabhairt do bhearta a íoslaghdaíonn an riosca sin.

(122)

Chun an prionsabal gurb é údar an truaillithe a íocfaidh as a chur chun feidhme, prionsabal a chuirtear in iúl in Airteagal 191(2) CFAE, is iomchuí na hoibleagáidí maidir le bainistiú na dramhaíola ó phacáistíocht a leagan ar tháirgeoirí. Chuige sin, sa Rialachán seo cuirtear leis na ceanglais maidir le freagracht leathnaithe táirgeora a leagtar síos i dTreoir 2008/98/CE chun a áirithiú go gcumhdóidh an scéim freagrachta leathnaithe táirgeora na costais iomlána bainistithe dramhaíola a bhaineann leis an bpacáistíocht agus chun rialuithe leordhóthanacha ag na húdaráis inniúla a éascú. Leis an Rialachán seo, féachtar leis an bprionsabal táirgeoir amháin in aghaidh an aonaid pacáistíochta a shainiú go soiléir, bíodh sin le haghaidh pacáistíocht fholamh nó le haghaidh pacáistíocht ina bhfuil táirgí. Mar riail ghinearálta, ba cheart don táirgeoir a bheith ina oibreoir eacnamaíoch a chuireann táirgí pacáistithe ar fáil, mar mhonaróir, allmhaireoir nó dáileoir atá bunaithe i mBallstát, ó laistigh de chríoch an Bhallstáit sin agus ar an gcríoch chéanna sin,. Áirítear leis sin aon tairiscint maidir le dáileadh, tomhaltas nó úsáid a bhféadfadh soláthar iarbhír a bheith mar thoradh uirthi. Dá bhrí sin, i gcás ina gceannaíonn cuideachta táirge pacáistithe ó Bhallstát eile nach é an Ballstát ina bhfuil an chuideachta lonnaithe é nó ó thríú tír, agus ina soláthraíonn sí an táirge pacáistithe sin sa Bhallstát sin ina bhfuil sí lonnaithe, ba cheart a mheas gurb í an chuideachta sin an táirgeoir toisc gurb í an chéad chuideachta í a chuireann ar fáil an táirge pacáistithe ar chríoch an Bhallstáit sin. Maidir le hardáin ar líne, ba cheart a mheas gurbh ionann táirge a thairiscint den chéad uair agus an táirge a chur ar fáil, de réir shainmhíniú an táirgeora. Mar sin féin, chun aon ualach riaracháin nach bhfuil gá leis a laghdú do ghnólachtaí beaga a líonann pacáistíocht iompair, pacáistíocht táirgthe phríomhúil nó pacáistíocht seirbhíse, cibé acu mar phacáistíocht aon úsáide nó mar phacáistíocht in-athúsáidte, ag an díolphointe, ba cheart gurb é monaróir, dáileoir nó allmhaireoir na pacáistíochta sin a chuireann an phacáistíocht ar fáil den chéad uair ar shuíomh laistigh de chríoch an Bhallstáit an monaróir, ós rud é gurb é an t-oibreoir eacnamaíoch sin is fearr atá in ann na hoibleagáidí faoin bhfreagracht leathnaithe táirgeora a chomhlíonadh.

(123)

Ar an taobh eile, nuair a chuirtear an phacáistíocht nó an táirge pacáistithe ar fáil go díreach don úsáideoir deiridh trí bhíthin cianchonarthaí, d’fhéadfadh an táirgeoir a bheith bunaithe freisin i mBallstát eile nó i dtríú tír. Sna cásanna sin, má tá an táirgeoir bunaithe i mBallstát eile, ba cheart dó ionadaí údaraithe maidir leis an bhfreagracht leathnaithe táirgeora a cheapadh sa Bhallstát ina bhfuil an t-úsáideoir deiridh lonnaithe. I gcásanna ina bhfuil an táirgeoir bunaithe i dtríú tír, ba cheart na Ballstáit a bheith in ann foráil a dhéanamh go mbeadh sé sainordaitheach freisin go gceapfaí ionadaí údaraithe maidir leis an bhfreagracht leathnaithe táirgeora chun an riosca a sheachaint go n-éalófaí ó na hoibleagáidí faoin bhfreagracht leathnaithe táirgeora. Chun a áirithiú go n-urramófar an prionsabal gurb é údar an truaillithe a íocfaidh as ’, agus i gcomhthéacs chomhlíonadh na freagrachta leathnaithe táirgeora, is gá cinnteacht a áirithiú maidir leis an gcineál táirgeora atá freagrach as dramhaíl ó phacáistíocht, go háirithe i gcás ‘cuideachtaí lóistíochta’. Is éard is cuideachtaí lóistíochta ann cuideachtaí a fhaigheann earraí allmhairithe ó thríú tíortha a dhéanann gníomhaíochtaí láimhseála maidir leis na hearraí allmhairithe (e.g. díphacáil agus athphacáil i bhformáidí níos lú nó cainníochtaí chun iarrataí cliant a chomhlíonadh) sula seoltar na hearraí chuig cliaint, bíodh sin sa Bhallstát céanna nó i mBallstát eile, leis an bpacáistíocht iompair bhunaidh go léir, le cuid di nó gan í. Sna cásanna sin, ba cheart táirgeoir a shainaithint le haghaidh na pacáistíochta iompair bunaidh a thagann ó thríú tír agus a fhanann leis an gcuideachta lóistíochta agus a thagann le bheith ina dramhaíl san Aontas. De ghnáth, ní bheidh na hearraí faoi úinéireacht na cuideachta lóistíochta, ach ba cheart a mheas gurb í an táirgeoir i gcás pacáistíocht a thagann ó thríú tír agus a láimhseálann sí le linn a gníomhaíochta.

(124)

I dteannta na gcostas arna bhforchur ar tháirgeoirí de bhun an Rialacháin seo agus de bhun Threoir 2008/98/CE, coinníonn na Ballstáit an fhéidearthacht na costais is gá a chumhdach mar thoradh ar ghníomhaíochtaí glantacháin, lena n-áirítear iompar agus cóireáil iardain na dramhaíola ó phacáistíocht atá i mbruscar mar chuid de chostas iomlán bainistithe dramhaíola na pacáistíochta ar cheart a chumhdach leis an bhfreagracht leathnaithe táirgeora. Níor cheart do na costais sin dul thar na costais atá riachtanach chun na seirbhísí sin a chur ar fáil ar bhealach costéifeachtach agus ba cheart iad a bhunú ar bhealach trédhearcach neamh-idirdhealaitheach idir na gníomhaithe lena mbaineann.

(125)

Chun faireachán a dhéanamh ar tháirgeoirí maidir le comhlíonadh a gcuid oibleagáidí airgeadais agus eagraíochta chun a áirithiú go mbainistítear an dramhaíl ón bpacáistíocht a chuireann siad ar fáil ar chríoch Ballstáit den chéad uair, nó nuair a dhéanann siad táirgí pacáistithe a dhíphacáil gan bheith ina n-úsáideoirí deiridh, is gá don údarás inniúil i ngach Ballstát clár táirgeoirí a bhunú agus a bhainistiú agus go gceanglófaí ar tháirgeoirí clárú leis.

(126)

Ba cheart do na ceanglais maidir le clárú táirgeoirí a bheith comhchuibhithe ar fud an Aontais a mhéid is féidir chun an clárú a éascú, go háirithe ós rud é go gcuireann táirgeoirí pacáistíocht ar fáil i mBallstáit éagsúla. Chun coinníollacha aonfhoirmeacha le haghaidh chur chun feidhme na gceanglas clárúcháin a áirithiú, ba cheart cumhachtaí cur chun feidhme a thabhairt don Choimisiún chun an fhormáid a bhunú maidir le clárú sa chlár agus tuairisciú don chlár agus chun gráinneacht na sonraí atá le soláthar agus na cineálacha pacáistíochta agus catagóirí na n-ábhar atá le cumhdach leis an bhfaisnéis a chuirtear isteach a shonrú.

(127)

I gcomhréir leis an bprionsabal gurb é údar an truaillithe a íocfaidh as, tá sé fíorthábhachtach go nglacfaidh na táirgeoirí, lena n-áirítear na gníomhaithe ríomhthráchtála, a chuireann pacáistíocht agus táirgí pacáistithe ar mhargadh an Aontais, nó a dhéanann táirgí pacáistithe a dhíphacáil gan bheith ina n-úsáideoirí deiridh, freagracht as bainistiú na pacáistíochta sin agus as bainistiú na dtáirgí pacáistithe sin ag deireadh a saolré. Tá scéimeanna freagrachta leathnaithe táirgeora le bunú, dá ndéantar foráil i dTreoir 94/62/CE, faoin 31 Nollaig 2024, toisc gurb iad na modhanna is iomchuí chun é sin a bhaint amach agus is féidir leo tionchar comhshaoil dearfach a imirt trí ghiniúint na dramhaíola ó phacáistíocht a laghdú agus bailiú agus athchúrsáil na dramhaíola ó phacáistíocht a mhéadú. Is iomaí éagothromaíocht atá ann maidir leis an mbealach a mbunaítear scéimeanna freagrachta leathnaithe táirgeora, lena n-éifeachtúlacht agus le raon feidhme fhreagracht na dtáirgeoirí. Ba cheart, dá bhrí sin, feidhm a bheith ag na rialacha freagrachta leathnaithe táirgeora a leagtar síos i dTreoir 2008/98/CE, ba cheart feidhm ghinearálta a bheith acu maidir le scéimeanna freagrachta leathnaithe táirgeora do tháirgeoirí faoin Rialachán seo, agus ba cheart forálacha sonracha eile iad a chomhlánú i gcás inar gá agus inarb iomchuí. Mar shampla, chun bailiúchán ar leithligh na dramhaíola ó phacáistíocht a éascú, ba cheart do na táirgeoirí lipéadú na ngabhdán dramhaíola a mhaoiniú. Bheadh oibleagáid mar sin i gcomhréir leis an bprionsabal gurb é údar an truaillithe a íocfaidh as agus leis na híoscheanglais ghinearálta maidir le scéimeanna freagrachta leathnaithe táirgeora a bunaíodh faoi Threoir 2008/98/CE.

(128)

A mhéid a bhaineann leis na hoibleagáidí faoin bhfreagracht leathnaithe táirgeora, is lex specialis é an Rialachán seo i ndáil le Treoir 2008/98/CE. Ciallaíonn sin gur cheart forlámhas a bheith ag na forálacha a bhaineann le freagracht leathnaithe táirgeora sa Rialachán seo ar aon fhorálacha contrártha sa Treoir sin. Baineann an prionsabal sin, mar shampla, le ceanglais maidir le clárú táirgeoirí, modhnú táillí freagrachta leathnaithe táirgeora agus tuairisciú.

(129)

De bhreis ar an gceanglas comhchuibhithe maidir le hin-athchúrsáilteacht le haghaidh modhnú ranníocaíochtaí airgeadais na dtáirgeoirí a bheidh le leagan síos i ngníomhartha tarmligthe a ghlacfar i gcomhréir leis an Rialachán seo, ba cheart ceadú do na Ballstáit critéir eile a úsáid, amhail cion an ábhair athchúrsáilte, in-athúsáidteacht, substaintí guaiseacha a bheith ann nó critéir eile i gcomhréir le Treoir 2008/98/CE.

(130)

Ba cheart táirgeoirí a bheith in ann na hoibleagáidí a bhaineann leis an bhfreagracht leathnaithe táirgeora a fheidhmiú i dteannta a chéile, trí bhíthin eagraíochtaí um fhreagracht táirgeoirí a ghlacann an fhreagracht thar a gceann. Ba cheart táirgeoirí nó eagraíochtaí um fhreagracht táirgeoirí a bheith faoi réir údarú na mBallstát agus ba cheart dóibh a dhoiciméadú, i measc nithe eile, go bhfuil an acmhainn airgeadais acu leis na costais a ghabhann leis an bhfreagracht leathnaithe táirgeora a chumhdach. Agus rialacha riaracháin agus nós imeachta á leagan síos maidir le húdarú a thabhairt do tháirgeoirí i gcomhair eagraíochtaí um fhreagracht aonair agus eagraíochtaí um fhreagracht táirgeoirí le haghaidh comhlíonadh comhchoiteann, ba cheart na Ballstáit a bheith in ann idirdhealú a dhéanamh idir na próisis do tháirgeoirí aonair agus do na heagraíochtaí um fhreagracht táirgeoirí chun an t-ualach riaracháin ar tháirgeoirí aonair a theorannú. Féadfaidh na Ballstáit eagraíochtaí iomadúla um fhreagracht táirgeoirí a údarú, toisc go bhféadfadh níos mó tairbhí a bheith ann do thomhaltóirí dá thoradh sin. Ba cheart an t-údarás inniúil a bheith in ann táillí costasbhunaithe comhréireacha a ghearradh ar tháirgeoirí nó ar eagraíochtaí um fhreagracht táirgeoirí a cuireadh ar iontaoibh na hoibleagáidí faoin fhreagracht leathnaithe táirgeoirí a chomhlíonadh le haghaidh an nós imeachta um údarú a bhaineann le comhlíonadh na n-oibleagáidí sin.

(131)

I gcásanna ina ndéantar an táille freagrachta leathnaithe táirgeora a ghearrann eagraíocht um fhreagracht táirgeoirí a chatagóiriú mar ioncam poiblí, mar is amhlaidh i gcás eagraíochta um fhreagracht táirgeoirí atá á reáchtáil ag an Stát agus chun cloí leis na rialacha buiséadacha lena gceanglaítear go mbeidh an t-ioncam poiblí bunaithe ar shonraí cruinne, ba cheart Bhallstát a bheith in ann a cheangal ar an táirgeoir an fhaisnéis a chur isteach níos minice ná uair amháin sa bhliain chun tuairisciú don údarás inniúil atá freagrach as an gclár. Ós rud é nach bhfuil sainordú táirgeora ag eagraíochtaí um fhreagracht táirgeoirí atá á reáchtáil ag an Stát, toisc nach bhfuil sainordú táirgeora ann, níor cheart feidhm a bheith ag na ceanglais dá bhforáiltear sa Rialachán seo a bhaineann leis na sainorduithe sin.

(132)

Ba cheart a shonrú sa Rialachán seo conas atá inrianaitheacht na n-oibleagáidí trádálaithe a leagtar síos i Rialachán (AE) 2022/2065 ó Pharlaimint na hEorpa agus ón gComhairle (39), lena n-áirítear Airteagal 30(2) agus (3) de, le cur i bhfeidhm maidir le soláthraithe ardáin ar líne a ligeann do thomhaltóirí cianchonarthaí a thabhairt i gcrích le táirgeoirí a thairgeann pacáistíocht do thomhaltóirí atá lonnaithe san Aontas i ndáil le cláir na dtáirgeoirí pacáistíochta a bhunaítear de bhun an Rialacháin seo. Chun críocha an Rialacháin seo, aon táirgeoir, bíodh sé bunaithe i mBallstát nó i dtríú tír, a thairgeann pacáistíocht trí bhíthin cianchonarthaí go díreach do thomhaltóirí atá lonnaithe i mBallstát, ba cheart a mheas go dtagann sé faoin sainmhíniú ar thrádálaí faoi Rialachán (AE) 2022/2065. Chun saorthairbhiú de bharr na n-oibleagáidí faoin bhfreagracht leathnaithe táirgeoirí a chosc, ba cheart a shonrú conas ba cheart do na soláthraithe ardáin ar líne na hoibleagáidí sin a chomhlíonadh i ndáil le cláir na dtáirgeoirí pacáistíochta a bhunaítear de bhun an Rialacháin seo. Sa chomhthéacs sin, i gcás ina gcuireann soláthraithe ardáin ar líne, a thagann faoi raon feidhme Roinn 4 de Chaibidil III de Rialachán (AE) 2022/2065, ardáin a chuireann ar chumas tomhaltóirí cianchonarthaí a thabhairt i gcrích le táirgeoirí, ba cheart dóibh, i gcomhréir le Rialachán (AE) 2022/2065 agus, sula gceadaítear do tháirgeoirí a seirbhísí a úsáid, faisnéis a fháil ó na táirgeoirí sin maidir leis an mbealach a gcomhlíonann siad na hoibleagáidí freagrachta leathnaithe táirgeora a leagtar amach sa Rialachán seo. Tá na rialacha maidir le hinrianaitheacht trádálaithe a dhíolann pacáistíocht ar líne faoi réir na rialachán forfheidhmiúcháin a leagtar amach i Rialachán (AE) 2022/2065.

(133)

D’fhéadfadh cásanna neamh-inmhianaithe comhchosúla de shaorthairbhiú tarlú i ndáil le soláthraithe seirbhíse comhlíonta. Is é is aidhm don Rialachán seo saorthairbhiú mar sin a chosc trí bhíthin cur chuige atá cosúil le cur chuige Rialachán (AE) 2022/2065 a mhéid a bhaineann le soláthraithe ardán ar líne.

(134)

Measfar, chun críocha Rialachán (AE) 2022/2065, gur clár poiblí é clár na dtáirgeoirí arna bhunú de bhun an Rialacháin seo. Dá bhrí sin, ba cheart do sholáthraithe ardán ar líne lena gceadaítear do thomhaltóirí cianchonarthaí a thabhairt i gcrích le táirgeoirí a seandícheall a dhéanamh chun a mheas an bhfuil an fhaisnéis a sholáthraíonn na táirgeoirí lena mbaineann iontaofa agus iomlán, go háirithe trí bhunachair sonraí agus comhéadain oifigiúla ar líne atá ar fáil saor in aisce a úsáid nó a fhíorú nó trí iarraidh ar na trádálaithe lena mbaineann doiciméid tacaíochta iontaofa a sholáthar, i gcomhréir le Rialachán (AE) 2022/2065. A mhéid a bhaineann le sonraí atá ar fáil go poiblí i gclár na dtáirgeoirí, is iondúil go mbíonn sé i gceist le ‘seandícheall’ a dhéanamh de réir bhrí Airteagal 30(2), an chéad fhomhír, de Rialachán (AE) 2022/2065, gur gá an fhaisnéis arna soláthar ag an táirgeoir a fhíorú leis na sonraí atá ar fáil go poiblí i gclár na dtáirgeoirí. Go háirithe, tá feidhm ag an méid sin má tá comhéadan ar líne bunaithe ag Ballstát le haghaidh réiteach uathoibríoch sonraí i gcomhréir leis an Rialachán seo.

(135)

Ba cheart nár dhochar ranníocaíochtaí airgeadais arna bhforchur ar tháirgeoirí de bhun an Rialacháin seo sa bhreis ar na costais dá dtagraítear in Airteagal 8a(4), pointe (a), de Threoir 2008/98/CÉ, d’aon chomhaontú deonach idir margaí ar líne agus táirgeoirí i gcás ina dtoilíonn margaí ar líne, thar ceann táirgeoirí trí shainordú i scríbhinn, glacadh leis na costais sin go léir nó cuid díobh.

(136)

Ba cheart do na Ballstáit foráil a dhéanamh do na bearta lena gcuirtear an fhreagracht leathnaithe táirgeora chun feidhme, na rialacha maidir le bailiúchán ar leithligh na dramhaíola ó phacáistíocht agus na rialacha maidir le lipéadú gabhdán dramhaíola i gcás nach ndéantar foráil sa Rialachán seo maidir le comhchuibhiú iomlán ar na bearta agus na rialacha sin. Thairis sin, ba cheart na Ballstáit a bheith in ann foráil a dhéanamh do cheanglais bhreise maidir leis an bhfreagracht leathnaithe táirgeora a chur chun feidhme, i gcomhréir le Treoir 2008/98/CE agus leis an Rialachán seo, ar choinníoll nach gcruthaíonn na bearta sin bacainní ar an margadh inmheánach. Ní rialaítear leis an Rialachán seo an t-oibreoir atá freagrach as bailiú na dramhaíola ó phacáistíocht agus socruithe conarthacha náisiúnta eile maidir le bailiú dramhaíola ó phacáistíocht.

(137)

Ba cheart do na Ballstáit córais a bhunú chun dramhaíl ó phacáistíocht a aischur agus a bhailiú, ionas go gcuirfear dramhaíl ó phacáistíocht chuig an mbainistiú dramhaíola malartach is iomchuí, i gcomhréir leis an ordlathas dramhaíola. Ba cheart na córais a bheith oscailte do rannpháirtíocht na bpáirtithe leasmhara uile, go háirithe oibreoirí eacnamaíocha agus údaráis phoiblí. Ba cheart na córais a bhunú agus an comhshaol agus sláinte, sábháilteacht agus sláinteachas tomhaltóirí á gcur san áireamh. Ba cheart na córais aischuir agus bhailiúcháin a bheith inrochtana agus ba cheart feidhm a bheith acu maidir le pacáistíocht na dtáirgí allmhairithe faoi fhorálacha neamh-idirdhealaitheacha.

(138)

D’fhéadfadh sé go mbeadh córais bailithe agus athchúrsála dramhaíola ar leithligh bunaithe ag roinnt Ballstát cheana féin, arb iad a bheidh mar bhonn do na húdaruithe náisiúnta agus na socruithe conarthacha ábhartha, agus Airteagal 7 de Threoir 94/62/CE á thrasuí sa dlí náisiúnta. Ba cheart na Ballstáit sin a bheith in ann leanúint de na córais sin a úsáid ar choinníoll go gcuireann siad na hoibleagáidí faoin Rialachán seo chun feidhme i gceart.

(139)

Ba cheart do na Ballstáit bearta a dhéanamh freisin chun athchúrsáil, a chomhlíonann na caighdeáin cháilíochta maidir le húsáid ábhar athchúrsáilte in earnálacha ábhartha, a chur chun cinn. Tá an oibleagáid sin an-ábhartha i bhfianaise an íoschéatadáin a shocraítear do chion an ábhair athchúrsáilte i bpacáistíocht phlaisteach.

(140)

Is céim ríthábhachtach é an phacáistíocht a bhailiú chun ciorclaíocht na pacáistíochta a áirithiú, agus chun margadh láidir d’amhábhair thánaisteacha a áirithiú. Is dreasacht é ráta bailiúcháin éigeantach a bhunú chun córais bhailiúcháin éifeachtúla agus spriocdhírithe a fhorbairt ar an leibhéal náisiúnta, agus beartaítear go méadófaí leis cainníocht na dramhaíola atá sórtáilte agus a d’fhéadfaí a athchúrsáil.

(141)

Tá sé léirithe go n-áirithítear le córais aisíoctha éarlaise, a reáchtáiltear go maith, ráta bailiúcháin an-ard agus athchúrsáil ar ardchaighdeán, ar bhuidéil agus ar channaí deochanna go háirithe. Chun tacú le baint amach na sprice bailiúcháin ar leithligh maidir le buidéil deochanna ar táirgí plaisteacha aon úsáide iad a leagtar síos i dTreoir (AE) 2019/904, chun rátaí arda bailiúcháin agus athchúrsáil ar ardchaighdeán maidir le coimeádáin deochanna mhiotail a ardú a thuilleadh, tá sé iomchuí go gcuirfeadh na Ballstáit córais aisíoctha éarlaise ar bun. Cuirfidh na córais sin le méadú an tsoláthair d’amhábhar tánaisteach ar dhea-cháilíocht a bheidh oiriúnach d’athchúrsáil lúbiata agus laghdófar leis bruscar coimeádáin deochanna.

(142)

Ba cheart do chórais aisíoctha éarlaise a bheith éigeantach do bhuidéil deochanna ar táirgí plaisteacha aon úsáide iad agus do choimeádáin mhiotail deochanna. Féadfaidh na Ballstáit cinneadh a dhéanamh freisin pacáistíocht eile le haghaidh táirgí eile nó pacáistíocht atá déanta as ábhair eile a áireamh sna córais sin, go háirithe buidéil ghloine aon úsáide. Ba cheart do na Ballstáit a áirithiú go mbeidh córais aisíoctha éarlaise le haghaidh formáidí pacáistíochta aon úsáide, go háirithe le haghaidh buidéil deochanna gloine aon úsáide, ar fáil chomh maith céanna le haghaidh pacáistíocht in-athúsáidte i gcás ina bhfuil sé indéanta go teicniúil agus go heacnamaíoch. Ba cheart dóibh cuimhneamh ar chórais aisíoctha éarlaise a bhunú le haghaidh pacáistíocht in-athúsáidte freisin. Ba cheart cead a bheith ag na Ballstáit, fad a chloíonn siad leis na rialacha ginearálta a leagtar síos sa CFAE agus ag gníomhú dóibh i gcomhréir leis an Rialachán seo, forálacha a sháraíonn na híoscheanglais a leagtar amach sa Rialachán seo a ghlacadh, amhail éarlais a ghearradh ag an díolphointe i gcás tomhaltais in áitreabh fáilteachais, nó an oibleagáid atá ar gach dáileoir deiridh glacadh leis an bpacáistíocht lena ngabhann éarlais gan beann ar an ábhar pacáistíochta agus ar an bhformáid ina ndáileann siad í nó ar a n-achar dromchla díolacháin.

(143)

Ba cheart éagsúlacht na gcóras aisíoctha éarlaise arb ann dóibh san Aontas a chur san áireamh sa Rialachán seo, agus a áirithiú nach gcuirfear bac ar fhorbairtí teicneolaíochta sna córais sin fad a chomhlíonann siad na ceanglais agus na critéir chun rátaí bailiúcháin a mhéadú agus athchúrsáil ar cháilíocht níos fearr a áirithiú.

(144)

De bharr chineál na dtáirgí agus na ndifríochtaí i ndáil leis na córais táirgthe agus dáileacháin a ghabhann leo, níor cheart do chórais aisíoctha éarlaise a bheith éigeantach i gcás na pacáistíochta le haghaidh fíona, do tháirgí fíona cumhraithe, agus do tháirgí comhchosúla le fíon, biotáille agus bainne agus táirgí bainne a liostaítear i gCuid XVI d’Iarscríbhinn I a ghabhann le Rialachán (AE) Uimh. 1308/2013. Mar sin féin, féadfaidh na Ballstáit córais aisíoctha éarlaise a bhunú lena gcumhdófaí an phacáistíocht dí sin agus pacáistíocht dí agus neamh-dhí eile freisin.

(145)

Faoin 1 Eanáir 2029, ba cheart do gach córas aisíoctha éarlaise le haghaidh buidéil deochanna phlaisteacha aon úsáide agus coimeádáin deochanna miotail aon úsáide na híoscheanglais ghinearálta a leagtar síos sa Rialachán seo a chomhlíonadh, cé is moite de chórais aisíoctha éarlaise a bunaíodh roimh theacht i bhfeidhm an Rialacháin seo, lena mbaintear amach an sprioc maidir le bailiú ar leithligh 90 % faoin 1 Eanáir 2029. Beidh na ceanglais sin ina gcuidiú chun níos mó comhsheasmhachta agus rátaí tabhairt ar ais níos airde a sholáthar ar fud na mBallstát. Socraíodh iad bunaithe ar dhearcthaí páirtithe leasmhara, anailís ó shaineolaithe agus dea-chleachtas ó chórais aisíoctha éarlaise atá ann faoi láthair. Dearadh na ceanglais chun nuálaíocht a chumasú fad a chuirtear ar fáil leibhéal solúbthachta chun oiriúnú do chásanna áitiúla.

(146)

Áiritheoidh na Ballstáit ag a bhfuil réigiúin ina bhfuil gnó trasteorann ard go gceadaítear leis na córais aisíoctha éarlaise pacáistíocht a bhailiú ó chórais aisíoctha éarlaise na mBallstát lena mbaineann agus ba cheart dóibh féachaint leis an bhféidearthacht an éarlais a thabhairt ar ais a áirithiú.

(147)

Ba cheart na Ballstáit sin a bhaineann amach ráta bailiúcháin 80 % de na cineálacha pacáistíochta a ndírítear orthu gan córas aisíoctha éarlaise in 2026 a bheith in ann a iarraidh nach mbeadh orthu córas aisíoctha éarlaise a bhunú.

(148)

Ba cheart na Ballstáit a bheith in ann rogha a dhéanamh an córas aisíoctha éarlaise a chur chun feidhme ar leibhéal fonáisiúnta, agus na rannáin riaracháin náisiúnta ábhartha agus staid shonrach na gcríoch thar lear á gcur san áireamh, fad a léireoidh siad feidhmíocht chomhshaoil agus eacnamaíoch na scéime sin, agus go bhfuil sé comhsheasmhach go hiomlán leis an ráta bailiúcháin 90 % le haghaidh buidéil deochanna phlaisteacha aon úsáide agus coimeádáin deochanna mhiotail a leagtar amach sa Rialachán seo.

(149)

Agus é ina bheart sonrach maidir le cosc giniúna dramhaíola ó phacáistíocht, ba cheart do na Ballstáit réitigh athúsáide agus athlíonta a chur chun cinn go gníomhach. Ba cheart dóibh tacú le bunú na gcóras athúsáide agus athlíonta agus ba cheart dóibh faireachán a dhéanamh ar a bhfeidhmiú agus a gcomhlíonadh i ndáil leis na caighdeáin sláintíochta. Moltar do na Ballstáit bearta eile a dhéanamh freisin, amhail córais aisíoctha éarlaise lena gcumhdaítear formáidí pacáistíochta in-athúsáidte a bhunú, trí bhíthin dreasachtaí eacnamaíocha a úsáid nó ceanglais a bhunú lena gceanglófar ar dháileoirí deiridh céatadán áirithe de tháirgí eile dá chuid, cé is moite de na cinn a chumhdaítear le spriocanna athúsáide agus oibleagáidí athlíonta, a chur ar fáil i bpacáistíocht in-athúsáidte nó i bpacáistíocht is féidir a athlíonadh ar choinníoll nach gcruthófaí leis sin ilroinnt sa mhargadh aonair ná bacainní trádála.

(150)

Ní hionann beag ná mór nádúr na gceanglas maidir le bailiú, sórtáil, athdháileadh ar líontóirí agus glanadh i gcás córais aisíoctha éarlaise aon úsáide agus córais athúsáide éarlaisbhunaithe. Dá bhrí sin, na híoscheanglais atá ann le haghaidh córais aisíoctha éarlaise, níor cheart feidhm a bheith acu maidir le córais athúsáide éarlaisbhunaithe. Ina ionad sin, ba cheart feidhm a bheith ag ceanglais shonracha maidir le córais athúsáide.

(151)

Leasaíodh Treoir 94/62/CE le Treoir (AE) 2018/852 ó Pharlaimint na hEorpa agus ón gComhairle (40) lena leagtar amach spriocanna athchúrsála atá le baint amach ag Ballstáit faoi 2025 agus 2030. Ba cheart na spriocanna sin agus na rialacha sin i ndáil lena ríomh a choinneáil ar bun. Agus túsphointe éagsúil gach Ballstáit á aithint maidir le spriocanna athchúrsála, agus cé go moltar sa Rialachán seo bearta lena n-éascaítear baint amach na spriocanna sin, ba cheart fós a bheith in ann na spriocdhátaí chun spriocanna athchúrsála 2030 a bhaint amach a chur siar, faoi choinníollacha áirithe. Mar sin féin, ba cheart an chumhacht a thabhairt don Choimisiún diúltú do phlean cur chun feidhme athbhreithnithe arna thíolacadh ag Ballstát.

(152)

Le Treoir 94/62/CE, ceanglaítear ar an gCoimisiún athbhreithniú a dhéanamh ar spriocanna athchúrsála 2030 le haghaidh pacáistíochta chun iad a choinneáil ar bun, nó chun iad a mhéadú i gcás inarb iomchuí. Níl sé iomchuí na spriocanna atá socraithe do 2030 a leasú go fóill, áfach, toisc go léirítear leis an bhfianaise go bhfuil deacrachtaí ag roinnt Ballstát na spriocanna reatha a chomhlíonadh fós. Mar gheall air sin, ba cheart bearta lena dtugtar dreasacht do mhonaróirí pacáistíocht atá níos in-athchúrsáilte a chur ar an margadh a shocrú, rud a chabhródh leis na Ballstáit a spriocanna athchúrsála a bhaint amach. Amach anseo, ba cheart sonraí a bhfuil níos mó gráinneachta iontu maidir le pacáistíocht agus sreafaí athchúrsála na dramhaíola ó phacáistíocht a thuairisciú don Choimisiún. Cuirfidh an tuairisciú ar na sonraí sin ar chumas an Choimisiúin athbhreithniú a dhéanamh ar na spriocanna agus an fhéidearthacht ann go gcoinneoidh sé nó go méadóidh sé iad. Chun éifeacht na mbeart, arb é is aidhm dóibh in-athchúrsáilteacht na pacáistíochta a fheabhsú, a chur san áireamh, níor cheart an t-athbhreithniú a dhéanamh níos luaithe ná meastóireacht ghinearálta bheartaithe an Rialacháin seo, eadhon 7 mbliana tar éis dó teacht i bhfeidhm. Le linn an athbhreithnithe sin, ba cheart aird a thabhairt ar an bhféidearthacht a bhaineann le spriocanna nua a thabhairt isteach ar bhonn níos gráinní ná na spriocanna atá ann faoi láthair.

(153)

Ba cheart ríomh na spriocanna athchúrsála a bhunú ar mheáchan na dramhaíola ó phacáistíocht a théann isteach in athchúrsáil. Ba cheart do na Ballstáit iontaofacht agus cruinneas na sonraí a bhailítear faoi dhramhaíl ó phacáistíocht athchúrsáilte a áirithiú. Mar riail ghinearálta, ba cheart tomhas iarbhír mheáchan na dramhaíola ó phacáistíocht a bheith le háireamh mar dhramhaíl athchúrsáilte a dhéanamh ag an bpointe a théann an dramhaíl ó phacáistíocht isteach san oibríocht athchúrsála. Mar sin féin, chun an t-ualach riaracháin a theorannú, ba cheart cead a bheith ag na Ballstáit, faoi choinníollacha diana agus de mhaolú ar an riail ghinearálta, ualach na dramhaíola ó phacáistíochta atá athchúrsáilte a shocrú ar bhonn tomhas ar aschur aon oibríochta sórtála, atá le ceartú trí mheánrátaí caillteanais a tharlaíonn sula dtéann an dramhaíl isteach sna hoibríochtaí athchúrsála a áireamh. Maidir le caillteanais ábhar a tharlaíonn sula dtéann an dramhaíl isteach san oibríocht athchúrsála, mar shampla caillteanais mar gheall ar shórtáil nó réamhoibríochtaí eile, níor cheart iad a áireamh sna méideanna dramhaíola a thuairiscítear mar ábhar athchúrsáilte. Is féidir na caillteanais sin a shuíomh ar bhonn cláir leictreonacha, sonraíochtaí teicniúla, rialacha mionsonraithe le haghaidh meánrátaí caillteanais a ríomh maidir le sruthanna dramhaíola éagsúla nó ar bhonn bearta coibhéiseacha eile. Ba cheart do na Ballstáit faisnéis a áireamh faoi na bearta sin sna tuarascálacha seiceála cáilíochta a ghabhann leis na sonraí a chuir siad faoi bhráid an Choimisiún maidir le hathchúrsáil dramhaíola. B’fhearr na meánrátaí caillteanais a shuíomh ar leibhéal na saoráidí sórtála aonair agus ba cheart iad a nascadh leis na príomhchineálacha dramhaíola éagsúla, na foinsí éagsúla (amhail foinsí teaghlaigh nó tráchtála), na scéimeanna éagsúla bailiúcháin agus na cineálacha éagsúla próiseas sórtála. Níor cheart na meánrátaí caillteanais a úsáid ach amháin i gcás nach bhfuil sonraí iontaofa eile ar fáil, go háirithe i gcomhthéacs dramhaíl a loingsiú nó a onnmhairiú. Níor cheart caillteanais i meáchan ábhar nó substaintí de thoradh próisis chlaochlaitheacha fhisiceacha nó cheimiceacha ar cuid bhunúsach den oibríocht athchúrsála iad, i gcás inarb amhlaidh go ndéantar dramhaíl ó phacáistíocht a athphróiseáil iarbhír ina táirgí, ina hábhair nó ina substaintí, a asbhaint ó mheáchan na dramhaíola a dhéanfar a thuairiscítear mar dhramhaíl athchúrsáilte.

(154)

I gcás ina gcuirtear ríomh an ráta athchúrsála i bhfeidhm maidir le cóireáil aeróbach nó anaeróbach dramhaíola in-bhithdhíghrádaithe ó phacáistíocht, féadfar cainníocht na dramhaíola a théann isteach sa chóireáil aeróbach nó anaeróbach a áireamh mar dhramhaíl athchúrsáilte ar choinníoll go ngineann an chóireáil sin aschur atá le húsáid mar tháirge athchúrsáilte, mar ábhar athchúrsáilte nó mar shubstaint athchúrsáilte. Cé gur minic gur múirín nó díleáiteán an t-aschur ón gcóireáil sin, d’fhéadfaí aschur eile a chur san áireamh freisin ar choinníoll go n-áirítear ann cainníochtaí inchomparáide d’ábhair athchúrsáilte i ndáil leis an chainníocht dramhaíola in-bhithdhíghrádaithe ó phacáistíocht atá cóireáilte. I gcásanna eile, i gcomhréir leis an sainmhíniú ar athchúrsáil, níor cheart athphróiseáil dramhaíola in-bhithdhíghrádaithe ó phacáistíocht ina hábhair atá le húsáid mar bhreoslaí nó mar mhodhanna eile chun fuinneamh a ghiniúint, a dhéantar a dhiúscairt, nó atá le húsáid in aon oibríocht a bhfuil an cuspóir céanna léi agus atá leis an aisghabháil dramhaíola seachas athchúrsáil, a áireamh faoi chomhair bhaint amach na spriocanna athchúrsála.

(155)

Más rud é nach dramhaíl a thuilleadh iad na hábhair dhramhaíola ó phacáistíocht de thoradh oibríocht ullmhúcháin sula ndearnadh iad a athphróiseáil iarbhír, ba cheart iad a áireamh mar ábhair athchúrsáilte ar choinníoll go bhfuil siad beartaithe lena n-athphróiseáil ina dtáirgí, ina n-ábhair nó ina substaintí ina dhiaidh sin, bíodh sé sin chun na gcríoch bunaidh a bhí acu nó chun críoch eile. Maidir le hábhair nach dramhaíl a thuilleadh iad atá le húsáid mar bhreoslaí nó mar mhodhanna eile chun fuinneamh a ghiniúint, a dhéantar a aislíonadh nó a dhiúscairt, nó atá le húsáid in aon oibríocht a bhfuil an cuspóir céanna léi agus atá leis an aisghabháil dramhaíola seachas athchúrsáil, níor cheart na hábhair sin a áireamh faoi chomhair bhaint amach na spriocanna athchúrsála.

(156)

Agus an mhodheolaíocht á bunú aige chun céatadán an ábhair athchúrsáilte a ríomh agus a fhíorú, ba cheart don Choimisiún measúnú a dhéanamh ar na teicneolaíochtaí athchúrsála atá ar fáil, agus a bhfeidhmíocht eacnamaíoch agus chomhshaoil á cur san áireamh, lena n-áirítear cáilíocht an aschuir, infhaighteacht na dramhaíola, an fuinneamh is gá agus astaíochtaí gás ceaptha teasa agus tionchair ábhartha eile ar an gcomhshaol. Ba cheart don Choimisiún é a chur san áireamh freisin gur féidir na teicneolaíochtaí sin a úsáid chun maímh mhíthreoracha chomhshaoil a chur chun cinn.

(157)

Níor cheart maímh maidir le saintréithe pacáistíochta a leagtar ceanglais dlí amach ina leith sa Rialachán seo, amhail in-athchúrsáilteacht, leibhéal na n-ábhar athchúrsáilte agus in-athúsáidteacht, a dhéanamh ach amháin i ndáil le hairíonna pacáistíochta a théann thar na híoscheanglais is infheidhme a leagtar amach sa Rialachán seo agus i gcomhréir leis na modheolaíochtaí agus na rialacha a bhunaítear faoin Rialachán seo. Ba cheart a shonrú leis na maímh sin an mbaineann siad leis an aonad pacáistíochta, le cuid den aonad pacáistíochta nó leis an bpacáistíocht go léir atá curtha ar na margadh ag an oibreoir eacnamaíoch.

(158)

Ba cheart an ceart a bheith ag na Ballstáit athchúrsáil miotal a scartar tar éis loscadh na dramhaíola a chur san áireamh i gcomhréir leis an sciar den dramhaíl ó phacáistíocht a loisctear ar choinníoll go gcomhlíonann na miotail athchúrsáilte critéir cháilíochta áirithe a leagtar síos i gCinneadh Cur Chun Feidhme (AE) 2019/1004 ón gCoimisiún (41).

(159)

I gcás dramhaíl ó phacáistíocht arna honnmhairiú ón Aontas lena hathchúrsáil, tá feidhm ag Rialachán (CE) Uimh. 1013/2006 ó Pharlaimint na hEorpa agus ón gComhairle (42) agus ag Rialachán (AE) 2024/1157 ó Pharlaimint na hEorpa agus ón gComhairle (43).

(160)

Toisc nach gcuirtear aon phacáistíocht nua ar an margadh lena hathúsáid, ba cheart pacáistíocht díolacháin in-athúsáidte a chuirtear ar an margadh agus pacáistíocht adhmaid a dheisítear lena hathúsáid a chur san áireamh chun spriocanna athchúrsála pacáistíochta faoi seach a bhaint amach. Ba cheart na Ballstáit a bheith in ann an fhéidearthacht sin a úsáid chun leibhéal coigeartaithe a ríomh maidir leis na spriocanna athchúrsála trí aird a thabhairt ar 5 phointe céatadáin ar a mhéad de mheánsciar na pacáistíochta díolacháin in-athúsáidte, i rith na 3 bliana roimhe sin, a cuireadh ar an margadh den chéad uair agus a athúsáideadh sa chóras athúsáide.

(161)

Ba cheart do tháirgeoirí agus eagraíochtaí um fhreagracht táirgeoirí a bheith rannpháirteach go gníomhach i soláthar na faisnéise d’úsáideoirí deiridh, go háirithe do thomhaltóirí, maidir le cosc agus bainistiú na dramhaíola ó phacáistíocht. Ba cheart a áireamh ar an bhfaisnéis sin infhaighteacht na socruithe athúsáide le haghaidh pacáistíochta, brí na lipéad a thaispeántar ar phacáistíocht agus treoracha eile maidir le diúscairt na dramhaíola ó phacáistíocht. Ba cheart do thairgeoirí agus d’eagraíochtaí um fhreagracht táirgeoirí na dtomhaltóirí a chur ar an eolas freisin gurb éard a chiallaíonn sé nuair a bhíonn pacáistíocht marcáilte mar inmhúirínithe go bhfuil an phacáistíocht inmhúirínithe i gcoinníollacha a rialaítear go tionsclaíoch i saoráidí cóireála bithdhramhaíola agus nach bhfuil sí oiriúnach do mhúiríniú baile. Níor cheart pacáistíocht a dhiúscairt mar bhruscar. Ba cheart do tháirgeoirí úsáideoirí deiridh a chur ar an eolas faoin ról tábhachtach atá acu chun a áirithiú go ndéantar dramhaíl ó phacáistíocht a bhainistiú ar an mbealach is fearr ó thaobh an chomhshaoil de. Ba cheart teicneolaíochtaí faisnéise comhaimseartha a úsáid agus faisnéis á nochtadh do na húsáideoirí deiridh uile chomh maith le tuairisciú ar phacáistíocht. Ba cheart an fhaisnéis a chur ar fáil ar an ngnáthbhealach, amhail póstaeir lasmuigh agus laistigh agus feachtas ar na meáin shóisialta, nó ar bhealach níos nuálaí, amhail rochtain leictreonach ar shuíomhanna gréasáin le cóid QR a ghreamaítear den phacáistíocht.

(162)

Is gné thábhachtach é bailiú ar leithligh lasmuigh den áit chónaithe chun rátaí bailithe pacáistíochta a mhéadú, agus chun ciorclaíocht na pacáistíochta a fheabhsú. Ba cheart do na Ballstáit agus do ghníomhaithe eacnamaíocha a bheith in ann bearta sonracha a dhéanamh maidir le bailiú ar leithligh lasmuigh den áit chónaithe, agus iad in oiriúint do shuíomh agus do nósanna tomhaltóirí.

(163)

Do gach bliain féilire, ba cheart do na Ballstáit faisnéis maidir le baint amach spriocanna athchúrsála a chur faoi bhráid an Choimisiúin. Chun meastóireacht a dhéanamh ar éifeachtacht na mbeart, arb e is aidhm dóibh tomhaltas málaí siopadóireachta plaisteacha éadroma a laghdú, ba cheart sonraí maidir le tomhaltas málaí siopadóireachta plaisteacha an-éadrom, málaí siopadóireachta plaisteacha éadroma, málaí siopadóireachta plaisteacha tiubha agus maidir le málaí siopadóireachta plaisteacha an-tiubh a thuairisciú ionas gur féidir measúnú a dhéanamh cé acu a tháinig nó nár tháinig méadú ar thomhaltas na málaí sin mar fhreagairt ar na bearta laghdaithe a dhíríonn ar mhálaí siopadóireachta plaisteacha éadroma. Ionas gur féidir measúnú a dhéanamh an bhfuil na córais shainordaitheacha aisíoctha éarlaise atá le bunú ag na Ballstáit éifeachtach, nó an bhfuil údar cuí le díolúintí arna dtabhairt ag na Ballstáit ón oibleagáid na córais sin a bhunú, tá sé tábhachtach faisnéis a fháil, le tuairisciú ó na mBallstáit, maidir le ráta bailithe ar leithligh na pacáistíochta a chumhdaítear leis an oibleagáid córais aisíoctha éarlaise a chur ar bun.

(164)

Chun an mhodheolaíocht le haghaidh an mheasúnaithe ar an athchúrsáil ar an mórchóir a bhunú, ba cheart do na Ballstáit freisin, ar bhonn bliantúil, sonraí a thuairisciú maidir le cainníocht na dramhaíola athchúrsáilte ó phacáistíocht in aghaidh na catagóire pacáistíochta agus cainníocht na pacáistíochta a cuireadh ar fáil den chéad uair ar mhargadh an Bhallstáit, nó arna díphacáil ag táirgeoir nach úsáideoir deiridh é, in aghaidh na catagóire pacáistíochta. Ba cheart don Choimisiún na sonraí sin a chomhlánú agus iad a fhoilsiú chun faireachán a dhéanamh ar fhorbairt bhliantúil na dramhaíola ó phacáistíocht athchúrsáilte ar an mórchóir.

(165)

Ba cheart do na Ballstáit na sonraí a thuairisciú don Choimisiún go leictreonach agus ba cheart dóibh tuarascáil seiceála cáilíochta a chur faoina bhráid freisin. Anuas air sin, ba cheart tuarascáil ina dtugtar tuairisc ar na bearta a rinneadh chun córas éifeachtach um rialú cáilíochta agus inrianaitheacht dramhaíola ó phacáistíocht a thabhairt i dteannta sonraí maidir le spriocanna athchúrsála.

(166)

Chun coinníollacha aonfhoirmeacha a áirithiú le haghaidh chur chun feidhme na n-oibleagáidí tuairiscithe, ba cheart cumhachtaí cur chun feidhme a thabhairt don Choimisiún chun rialacha a bhunú le haghaidh ríomh agus fhíorú na sonraí maidir le baint amach na spriocanna athchúrsála, na rátaí bailiúcháin ar leithligh maidir leis an bpacáistíocht a chumhdaítear leis an gcóras aisíoctha éarlaise, agus na sonraí is gá chun an mhodheolaíocht le haghaidh an mheasúnaithe ar an athchúrsáil ar an mórchóir a bhunú. Ba cheart a áireamh sa ghníomh cur chun feidhme sin modheolaíocht lena gcinntear cainníocht na dramhaíola ó phacáistíocht a ghintear chomh maith le formáid le haghaidh thíolacadh na sonraí a leagan síos. Chomh maith leis sin, ba cheart leis an ngníomh cur chun feidhme sin an mhodheolaíocht a bhunú le haghaidh ríomh an tomhaltais bhliantúil málaí siopadóireachta plaisteacha éadroma per capita agus an fhormáid le haghaidh thíolacadh na sonraí sin, toisc go bhfuil gá leis na sonraí sin chun tacú le faireachán agus cur chun feidhme iomlán na gceanglas substainteach a bhaineann le málaí siopadóireachta plaisteacha, chun sonraí imdhealaithe sainordaitheacha maidir le catagóirí éagsúla málaí siopadóireachta plaisteacha a áirithiú. Ba cheart don ghníomh cur chun feidhme sin teacht in ionad Chinneadh 2005/270/CE (44) agus Chinneadh Cur Chun Feidhme (AE) 2018/896 ón gCoimisiún (45)

(167)

Chun é a chur ar chumas na mBallstát agus an Choimisiúin faireachán a dhéanamh ar chur chun feidhme na gcuspóirí a leagtar amach sa Rialachán seo, ba cheart do na Ballstáit bunachair sonraí maidir le pacáistíocht a bhunú agus ba cheart dóibh a áirithiú go mbeidh na bunachair sonraí sin dea-fheidhmiúil.

(168)

Tá forfheidhmiú éifeachtach na gceanglas inbhuanaitheachta fíor-riachtanach chun iomaíocht chóir a áirithiú agus chun a áirithiú go mbainfear amach na tairbhí a mheastar a thiocfaidh as an Rialachán seo agus an méid a mheastar a chuirfidh sé le cuspóirí aeráide, fuinnimh agus ciorclaíochta an Aontais a bhaint amach. Dá bhrí sin, ba cheart do na húdaráis inniúla féachaint le seiceálacha a dhéanamh gach bliain ar an gcruinneas de chuid de na dearbhuithe comhréireachta AE ar a laghad. Ba cheart feidhm a bheith ag Rialachán (AE) 2019/1020 leagtar amach creat cothrománach le haghaidh faireachas margaidh ar tháirgí agus rialú táirgí a thagann isteach i margadh an Aontais maidir le pacáistíocht dá socraítear ceanglais inbhuanaitheachta de bhun an Rialacháin seo. Leis na sásraí faireachais margaidh a leagtar síos i Rialachán (AE) 2019/1020, leagtar amach na ceanglais maidir le faireachas margaidh a bhaineann le táirgí a mhargú agus déantar foráil do shásraí coimirce chun comhlíonadh an Rialacháin seo a sheiceáil i ndáil le pacáistíocht a chur ar an margadh.

(169)

Níor cheart pacáistíocht a chur ar an margadh ach amháin mura gcuireann sí comhshaol ná sláinte an duine i mbaol. Chun go ndíreofar sna hiarrachtaí maidir le faireachas margaidh, ba cheart, chun críocha an Rialacháin seo, pacáistíocht lena mbaineann riosca a shainiú mar phacáistíocht a d’fhéadfadh dochar a dhéanamh don chomhshaol nó do leasanna eile de chuid an phobail a chosnaítear leis na ceanglais ábhartha, toisc nach gcomhlíonann sí na ceanglais inbhuanaitheachta nó toisc nach gcomhlíonann an t-oibreoir eacnamaíoch atá freagrach ceanglas inbhuanaitheachta.

(170)

Ba cheart nós imeachta a bheith ann faoina gcuirtear páirtithe leasmhara ar an eolas faoi bhearta a bheartaítear a dhéanamh i ndáil le pacáistíocht lena mbaineann riosca. Chomh maith leis sin, ba cheart do na húdaráis um fhaireachas margaidh sna Ballstáit, i gcomhar leis na hoibreoirí eacnamaíocha ábhartha, a bheith in ann gníomhú ag céim luath maidir leis an bpacáistíocht sin mar gheall air. Chun coinníollacha aonfhoirmeacha a áirithiú maidir le cur chun feidhme an Rialacháin seo, ba cheart cumhachtaí cur chun feidhme a thabhairt don Choimisiún chun a chinneadh an bhfuil bonn cirt le bearta náisiúnta i leith táirgí neamhchomhlíontacha. Ba cheart don Choimisiún gníomhartha cur chun feidhme atá infheidhme láithreach a ghlacadh más rud é, i gcásanna a bhfuil údar cuí leo agus a bhaineann leis an gcomhshaol nó le sláinte an duine a chosaint, go n-éilítear amhlaidh ar mhórfhorais phráinne.

(171)

Ba cheart an ceart a bheith ag na húdaráis um fhaireachas margaidh a cheangal ar oibreoirí eacnamaíocha gníomhaíocht cheartaitheach a dhéanamh ar bhonn torthaí a léiríonn nach gcomhlíonann pacáistíocht na ceanglais inbhuanaitheachta agus na ceanglais maidir le lipéadú nó gur sháraigh an t-oibreoir eacnamaíoch na rialacha eile maidir le pacáistíocht a chur ar an margadh nó a chur ar fáil ar an margadh. Chun coinníollacha aonfhoirmeacha a áirithiú maidir le cur chun feidhme an cheanglais ar oibreoirí eacnamaíocha gníomhaíocht cheartaitheach a dhéanamh, ba cheart cumhachtaí cur chun feidhme a thabhairt don Choimisiún chun a chinneadh an bhfuil bonn cirt le beart náisiúnta.

(172)

I gcás ábhar imní maidir le sláinte an duine, ní cheart don údarás um fhaireachas margaidh meastóireacht a dhéanamh ar riosca do shláinte an duine ná do shláinte ainmhithe, riosca de thionscnamh an ábhair pacáistíochta, má aistrítear é ón ábhar pacáistíochta chuig an ábhar pacáistithe, ach ba cheart dó na húdaráis atá inniúil ar na rioscaí a rialú agus a ceapadh de bhun Rialachán (AE) 2017/625 ó Pharlaimint na hEorpa agus ón gComhairle, (46) Rialacháin (AE) 2017/745, (AE) 2017/746, (AE) 2019/6 nó Treoir 2001/83/CE a chur ar an eolas faoin riosca sin.

(173)

Is éard atá sa soláthar poiblí 14 % de OTI an Aontais. Chun rannchuidiú leis na cuspóirí aeráidneodracht a bhaint amach, éifeachtúlacht fuinnimh agus acmhainní a fheabhsú agus aistriú chuig geilleagar ciorclach lena gcosnaítear an tsláinte phoiblí agus an bhithéagsúlacht, ba cheart cumhachtaí cur chun feidhme a thabhairt don Choimisiún, chun a cheangal, i gcás inarb iomchuí, ar údaráis chonarthacha agus eintitis chonarthacha, mar a shainmhínítear i dTreoracha 2014/24/AE (47) agus 2014/25/AE (48) ó Pharlaimint na hEorpa agus ón gComhairle, a soláthar poiblí a ailíniú le híoscheanglais shainordaitheacha shonracha maidir le soláthar poiblí glas, a bheidh le leagan amach sna gníomhartha cur chun feidhme a ghlacfar de bhun an Rialacháin seo. I gcomparáid le cur chuige deonach, ba cheart le ceanglais shainordaitheacha giaráil an chaiteachais phoiblí a uasmhéid chun borradh a chur faoin éileamh ar phacáistíocht a fheidhmíonn ar bhealach níos fearr. Ba cheart na ceanglais sin a bheith trédhearcach, oibiachtúil agus neamh-idirdhealaitheach. Ba cheart na Ballstáit a bheith in ann tagairt a dhéanamh do shonraíochtaí teicniúla, critéir roghnúcháin nó coinníollacha feidhmíochta conartha ina gceanglais soláthair phoiblí agus níor cheart é a bheith riachtanach do na ceanglais sin a bheith carnach. Ba cheart d’údaráis chonarthacha agus eintitis chonarthacha Ballstát, agus iad ag cloí leis na rialacha ginearálta a leagtar síos in CFAE agus ag gníomhú dóibh i gcomhréir leis an Rialachán seo, a bheith in ann forálacha a ghlacadh a théann thar na híoscheanglais maidir le soláthar poiblí glas a leagtar síos sa Rialachán seo.

(174)

Chun feidhmiú an mhargaidh inmheánaigh a choimirciú, agus chun go mbeidh cothrom iomaíochta ann, is gá a áirithiú maidir le pacáistíocht ó thríú tíortha a thagann isteach i margadh an Aontais go mbeidh sí i gcomhréir leis an Rialachán seo, bíodh sí á hallmhairiú mar phacáistíocht neamhspleách nó in éineacht le táirge pacáistithe. Is gá, go háirithe, a áirithiú gur chuir monaróirí nósanna imeachta iomchuí um measúnú comhréireachta i gcrích maidir leis an bpacáistíocht sin. Ba cheart tús áite a thabhairt don chomhar sa mhargadh idir údaráis um fhaireachas margaidh agus oibreoirí eacnamaíocha. Dá bhrí sin, cé go bhféadfaidís a bheith bainteach le haon phacáistíocht a thagann isteach i margadh an Aontais, ba cheart díriú go príomha, le hidirghabhálacha na n-údarás a ainmnítear de bhun Airteagal 25(1) de Rialachán (AE) 2019/1020 ar an bpacáistíocht, atá faoi réir na mbeart toirmisc a dhéanann na húdaráis um fhaireachas margaidh. I gcás ina ndéanfaidh siad na bearta toirmisc sin, agus nach mbeidh na bearta toirmisc teoranta don chríoch náisiúnta, ba cheart d’údaráis um fhaireachas margaidh cumarsáid a dhéanamh leis na húdaráis a ainmnítear le haghaidh na rialuithe ar phacáistíocht a thagann isteach chuig margadh an Aontais, cumarsáid maidir leis na sonraí is gá chun an phacáistíocht neamhchomhlíontach sin a shainaithint ag na teorainneacha, lena n-áirítear faisnéis maidir leis na táirgí pacáistithe agus na hoibreoirí eacnamaíocha ionas gur féidir cur chuige rioscabhunaithe a ghlacadh i leith táirgí a thagann isteach i margadh an Aontais. Sna cásanna sin, déanfaidh lucht custaim a dhícheall an phacáistíocht sin a shainaithint agus stop a chur leis ag na teorainneacha.

(175)

Chun an próiseas rialaithe a bharrfheabhsú ag teorannacha seachtracha an Aontais, agus chun an t-ualach ar an bpróiseas sin a laghdú, is gá aistriú uathoibrithe sonraí idir Córas Faisnéise agus Cumarsáide maidir le Faireachas Margaidh (ICSMS) agus córais chustaim a chumasú. Ba cheart idirdhealú a dhéanamh idir dhá chineál aistrithe sonraí éagsúla i bhfianaise a gcuspóirí faoi seach. Ar an gcéad dul síos, ba cheart don Chóras Faisnéise agus Cumarsáide maidir le Faireachas Margaidh bearta toirmisc arna gcinneadh ag údaráis um fhaireachas margaidh a bhaineann le sainaithint pacáistíochta neamhchomhlíontaí a chur in iúl don lucht custaim lena n-úsáid ag údaráis a ainmnítear chun rialuithe a dhéanamh ag teorainneacha seachtracha chun pacáistíocht a shainaithint ar cheart feidhm a bheith ag an beart toirmisc sin. An Córas Bainistíochta Riosca Custaim leictreonach (CBRC) a leagtar amach in Airteagal 36 de Rialachán Cur Chun Feidhme (AE) 2015/2447 ón gCoimisiún (49), gan dochar d’aon athrú amach anseo ar an timpeallacht bainistíochta riosca custaim, ba cheart an córas sin a úsáid le haghaidh na gcéad aistrithe sonraí sin. Ar an dara dul síos, i gcás ina sainaithneoidh údaráis chustaim pacáistíocht neamhchomhlíontach, beidh gá le bainistiú cáis, i measc nithe eile, chun an fógra faoin bhfionraí, conclúid na n-údarás um fhaireachas margaidh agus toradh na mbeart a rinne lucht custaim a aistriú. Tacaíonn Timpeallacht Ionaid Ilfhreastail an Aontais Eorpaigh maidir le Custam leis na dara haistrithe sonraí sin idir an Córas Faisnéise agus Cumarsáide maidir le Faireachas Margaidh agus córais náisiúnta chustaim.

(176)

Chun coinníollacha aonfhoirmeacha a áirithiú maidir le cur chun feidhme an idirnaisc maidir le cumarsáid idir na húdaráis um fhaireachas margaidh agus na húdaráis chustaim, ba cheart na cumhachtaí cur chun feidhme a thabhairt don Choimisiún chun na rialacha nós imeachta agus sonraí na socruithe cur chun feidhme a shonrú, lena n-áirítear na feidhmiúlachtaí, na heilimintí sonraí agus próiseáil sonraí, chomh maith leis na rialacha maidir le próiseáil sonraí pearsanta, rúndacht agus an rialú i gcás an idirnaisc sin.

(177)

Agus gníomhartha tarmligthe á nglacadh aige de bhun Airteagal 290 CFAE, tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear é sin a dhéanamh ar leibhéal na saineolaithe, agus go ndéanfaí na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (50). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid ar fad ag an am céanna leis na saineolaithe sna Ballstáit, agus tá rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe. Agus na gníomhartha tarmligthe seo á bhforbairt, ba cheart don Choimisiún faisnéis eolaíoch nó faisnéis theicniúil eile atá ar fáil a chur san áireamh, lena n-áirítear caighdeáin idirnáisiúnta ábhartha.

(178)

Ba cheart na cumhachtaí cur chun feidhme a thugtar don Choimisiún leis an Rialachán seo a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (51).

(179)

Chun a áirithiú gur féidir faireachán a dhéanamh ar cheanglais táirgí i dTreoir (AE) 2019/904 agus gur féidir iad a fhorfheidhmiú agus go mbíonn siad faoi réir faireachas margaidh iomchuí, ba cheart Rialachán (AE) 2019/1020 a leasú chun Treoir (AE) 2019/904 a áireamh faoina raon feidhme. Ba cheart na ceanglais a bhaineann leis an ábhar plaisteach athchúrsáilte i gcás buidéil dí, ar táirgí plaisteacha iad, ón 1 Eanáir 2030, agus oibleagáidí tuairiscithe comhfhreagracha a scriosadh ó Threoir (AE) 2019/904, toisc go rialaítear an t-ábhar sin go heisiach leis an Rialachán seo.

(180)

Bunaítear leis an Rialachán seo rialacha ginearálta a bhfuil feidhm acu maidir leis an bpacáistíocht ar fad. Mar sin féin, meastar gur pacáistíocht iad táirgí plaisteacha aon úsáide áirithe a chumhdaítear le Treoir (AE) 2019/904, amhail málaí siopadóireachta plaisteacha, cupáin deochanna, coimeádáin bhia agus deochanna, lena n-áirítear buidéil. Is lex specialis í Treoir (AE) 2019/904 i ndáil leis an Rialachán seo. I gcás ina mbeidh coimhlint idir Treoir (AE) 2019/904 agus an Rialachán seo, ba cheart forlámhas a bheith ag Treoir (AE) 2019/904 faoina raon feidhme. Le Treoir (AE) 2019/904, ceanglaítear ar na Ballstáit bearta, lena n-áirítear srianta margaíochta, a dhéanamh chun tomhaltas táirgí plaisteacha aon úsáide áirithe a laghdú. Ba cheart feidhm a bheith ag na srianta margaíochta sin agus forlámhas a bheith acu ar aon fhorálacha contrártha sa Rialachán seo. Leis an Rialachán seo, cuirtear srian ar na táirgí plaisteacha a chur ar an margadh a liostaítear i bpointe 3 d’Iarscríbhinn V a ghabhann leis, agus le Treoir (AE) 2019/904 ceadaítear do na Ballstáit na bearta is gá a dhéanamh chun laghdú a bhaint amach i dtomhaltas na dtáirgí plaisteacha aon úsáide sin. Ós rud é go bhféadfadh sé nach mbeadh bearta cur chun feidhme náisiúnta faoi Threoir (AE) 2019/904 chomh sriantach le toirmeasc ar chur ar an margadh, ba cheart forlámhas a bheith ag an Rialachán seo ar Threoir (AE) 2019/904 a mhéid a bhaineann leis na táirgí sin a thagann faoin sainmhíniú ar phacáistíocht, chun borradh a chur faoin laghdú ar phacáistíocht phlaisteach aon úsáide agus chun méid na pacáistíochta plaisteacha aon úsáide sa chomhshaol a laghdú. Dá thoradh sin, níor cheart na Ballstáit a bheith in ann díolúine a ghlacadh ón toirmeasc i dTreoir (AE) 2019/904 maidir le pacáistíocht atá déanta as polaistiréin inleathnaithe a chur ar an margadh. Chun an méid sin a léiriú, ba cheart Treoir (AE) Uimh. 2019/904 a leasú dá réir.

(181)

Ós rud é nach rialaítear leis an Rialachán seo cion an ábhair athchúrsáilte sa chuid phlaisteach den phacáistíocht roimh an 1 Eanáir 2030, ba cheart do na forálacha maidir le cion an ábhair athchúrsáilte le haghaidh buidéil dí phlaisteacha i dTreoir (AE) 2019/904 fanacht i bhfeidhm go dtí an dáta sin.

(182)

Chun muinín an phobail i bpacáistíocht a chuirtear ar an margadh a fheabhsú, go háirithe a mhéid a bhaineann le comhlíonadh ceanglas inbhuanaitheachta, ba cheart na hoibreoirí eacnamaíocha a chuireann pacáistíocht neamhchomhlíontach ar an margadh nó oibreoirí eacnamaíocha nach gcomhlíonann a gcuid oibleagáidí a bheith faoi réir pionós. Dá bhrí sin, is gá do na Ballstáit pionóis atá éifeachtach, comhréireach agus athchomhairleach a leagan síos sa dlí náisiúnta in aghaidh neamhchomhlíonadh an Rialacháin seo.

(183)

Ceanglaítear le hAirteagal 19(1) den Chonradh ar an Aontas Eorpach (CAE) ar na Ballstáit leigheasanna a chur ar fáil atá leordhóthanach chun cosaint bhreithiúnach éifeachtach a áirithiú sna réimsí a chumhdaítear le dlí an Aontais, lena n-áirítear cúirteanna na mBallstát. I ndáil leis sin, ba cheart do na Ballstáit a áirithiú go mbeidh rochtain ar cheartas ag daoine lena mbaineann, amhail daoine nádúrtha nó dlítheanacha a rinne gearán nó a thuairiscigh neamhchomhlíonadh líomhnaithe na pacáistíochta, bíodh sin mar phacáistíocht neamhspleách nó in éineacht le táirge pacáistithe, leis an Rialachán seo, i gcomhréir leis na hoibleagáidí ar chomhaontaigh na Ballstáit leo mar pháirtithe sa Choinbhinsiún maidir le Rochtain ar Fhaisnéis, Rannpháirtíocht Phoiblí i gCinnteoireacht agus Rochtain ar Cheartas i gCúrsaí Comhshaoil (52), arna dhéanamh in Aarhus an 25 Meitheamh 1998 (‘Coinbhinsiún Aarhus’).

(184)

Ba cheart don Choimisiún meastóireacht a dhéanamh ar an Rialachán seo. De bhun mhír 22 den Chomhaontú Idirinstitiúideach an 13 Aibreán 2016 maidir le Reachtóireacht Níos Fearr, ba cheart an mheastóireacht sin a bhunú ar chúig chritéar mar atá éifeachtúlacht, éifeachtacht, ábharthacht, comhleanúnachas agus breisluach an Aontais agus ba cheart í a bheith mar bhonn le measúnuithe tionchair ar bhearta a d’fhéadfadh a bheith ann amach anseo. Ba cheart don Choimisiún tuarascáil ar chur chun feidhme an Rialacháin seo agus ar a thionchar ar inbhuanaitheacht comhshaoil pacáistíochta agus ar fheidhmiú an mhargaidh inmheánaigh a chur faoi bhráid Pharlaimint na hEorpa, na Comhairle, Choiste Eacnamaíoch agus Sóisialta na hEorpa agus Choiste na Réigiún.

(185)

Is gá foráil a dhéanamh go mbeidh am leordhóthanach ag oibreoirí eacnamaíocha a oiriúnú chun a n-oibleagáidí agus na ceanglais faoin Rialachán seo a chomhlíonadh, agus ag na Ballstáit chun an bonneagar rialacháin is gá a bhunú chun é a chur i bhfeidhm. Ar an gcaoi chéanna, is gá foráil a dhéanamh go mbeidh am leordhóthanach ag na Ballstáit chun bearta riaracháin a ghlacadh maidir le heagrú na nósanna imeachta údarúcháin ag na húdaráis inniúla, agus leanúnachas á choinneáil ar bun d’oibreoirí eacnamaíocha, agus chun an bonneagar riaracháin is gá a chur ar bun maidir leis an Rialachán seo a chur i bhfeidhm. Dá bhrí sin, ba cheart cur i bhfeidhm an Rialacháin seo a chur siar go dtí dáta ar réasúnta é go mbeidh bailchríoch curtha ar na hullmhúcháin sin. Ba cheart aird faoi leith a thabhairt ar éascú chomhlíonadh na micrifhiontar agus na bhfiontar beag agus meánmhéide (FBManna) i ndáil lena n-oibleagáidí agus a gceanglais faoin Rialachán seo, lena n-áirítear le treoraíocht a sholáthróidh an Coimisiún chun comhlíonadh ag oibreoirí eacnamaíocha a éascú, agus aird faoi leith á tabhairt ar FBManna.

(186)

Chun na gealltanais sin a chomhlíonadh agus chun creat uaillmhianach comhchuibhithe maidir le pacáistíocht a bhunú, is gá Rialachán lena mbunaítear ceanglais ar phacáistíocht le linn a saolré iomláine a ghlacadh. Ba cheart, dá bhrí sin, Treoir 94/62/CE a aisghairm.

(187)

Ba cheart Treoir 94/62/CE a aisghairm le héifeacht ó dháta chur i bhfeidhm an Rialacháin seo. Mar sin féin, chun aistriú réidh agus leanúnachas a áirithiú go dtí go nglacfaidh an Coimisiún rialacha nua faoin Rialachán seo, agus chun foráil a dhéanamh do leanúnachas agus córas acmhainní dílse an Aontais i dtaca leis na boinn acmhainní dílse maidir le dramhaíl ó phacáistíocht phlaisteach neamh-athchúrsáilte á chur i bhfeidhm, ba cheart d’oibleagáidí áirithe faoin Treoir sin maidir le lipéadú, spriocanna athchúrsála agus tarchur sonraí chuig an gCoimisiún fanacht i bhfeidhm go ceann tréimhse ama áirithe.

(188)

Maidir le cuspóirí an Rialacháin seo, is é sin inbhuanaitheacht comhshaoil pacáistíochta a fheabhsú agus saorghluaiseacht pacáistíochta sa mhargadh inmheánach a áirithiú, ós rud é nach féidir leis na Ballstáit na cuspóirí sin a ghnóthú go leordhóthanach agus, de thairbhe a fhairsinge agus a éifeachtaí, gur fearr is féidir iad a ghnóthú ar leibhéal an Aontais agus ar an leibhéal sin amháin, féadfaidh an tAontas bearta a dhéanamh, i gcomhréir le prionsabal na coimhdeachta a leagtar amach in Airteagal 5 de CAE. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun na cuspóirí sin a ghnóthú,