(1)

Le Rialachán (CE) Uimh. 853/2004 leagtar síos rialacha sonracha maidir le sláinteachas bia de bhunadh ainmhíoch le haghaidh oibreoirí gnólachtaí bia. Go háirithe, in Iarscríbhinn II a ghabhann leis an Rialachán sin, leagtar síos ceanglais maidir le roinnt táirgí de bhunadh ainmhíoch, agus in Iarscríbhinn III de leagtar síos ceanglais shonracha. I Roinn I d’Iarscríbhinn II a ghabhann le Rialachán (CE) Uimh. 853/2004, leagtar síos ceanglais maidir le marc aitheantais a chur ar tháirgí de bhunadh ainmhíoch. I gCuid B de Roinn I d’Iarscríbhinn II a ghabhann le Rialachán (CE) Uimh. 853/2004, tagraítear don Chomhphobal Eorpach, in ionad an Aontais Eorpaigh. Dá bhrí sin, ba cheart giorrúcháin an mhairc aitheantais a thagraíonn don ‘Aontas Eorpach’ a chur in ionad tagairtí don ‘Chomhphobal Eorpach’. Mar sin féin, bíonn ualach substaintiúil riaracháin i gceist le hathsholáthar den sórt sin. Ba cheart foráil a dhéanamh maidir le hidirthréimhse ar lena linn a bhféadfar na táirgí ar a bhfuil marc aitheantais leis an ngiorrúchán le haghaidh an Chomhphobail Eorpaigh roimh dheireadh na hidirthréimhse fanacht ar an margadh.

(2)

Ina theannta sin, tá gá le soiléiriú ar an nasc idir foirm an mhairc aitheantais a cheanglaítear le Rialachán (CE) Uimh. 853/2004, agus na ceanglais maidir le marc aitheantais speisialta a leagtar síos chun galair áirithe ainmhithe a rialú i Rialachán (AE) 2016/429 ó Pharlaimint na hEorpa agus ón gComhairle (2). Ba cheart Cuid B de Roinn I d’Iarscríbhinn II a ghabhann le Rialachán (CE) Uimh. 853/2004 a leasú chun a shoiléiriú cén fhoirm ba cheart a chur i bhfeidhm in imthosca sonracha.

(3)

Ceanglaítear le hIarscríbhinn II freisin ar oibreoirí gnólachtaí bia a oibríonn seamlais faisnéis faoin mbiashlabhra a iarraidh, a fháil agus a sheiceáil agus gníomh a dhéanamh ina leith, de réir mar is iomchuí, maidir le gach ainmhí, seachas géim fiáin, a sheoltar, nó a bhfuil sé beartaithe é a sheoladh, chuig an seamlas. Ba cheart feidhm a bheith ag na ceanglais chéanna maidir le hoibreoirí gnólachtaí bia a oibríonn i mbunaíochtaí láimhseála géim i gcás ina seoltar an géim saothraithe a mharaítear ag an áit tionscnaimh chuig an mbunaíocht láimhseála géim.

(4)

Tá méadú tagtha ar an úsáid a bhaintear as seamlais shoghluaiste chun saincheisteanna leasa ainmhithe a d’fhéadfadh a bheith ann le linn an iompair a sheachaint, mar shampla, de bharr amanna fada iompair i gcás ainmhithe a thógtar i gceantair iargúlta. Tá seamlais shoghluaiste faoi réir formheasa mar aon le haon seamlas eile i gcomhréir le hAirteagal 4(2) de Rialachán (CE) Uimh. 853/2004 i ngach Ballstát ina n-oibríonn siad. Mar sin féin, is gá a shoiléiriú conas ba cheart an formheas sin a chur i bhfeidhm i gcás meascán de shaoráidí soghluaiste agus buana an tseamlais. Tá formheas na seamlas bunaithe go príomha ar chomhlíonadh na gceanglas maidir le tógáil, leagan amach agus trealamh na seamlas sin dá bhforáiltear i gCaibidil II de Ranna I agus II d’Iarscríbhinn III a ghabhann le Rialachán (CE) Uimh. 853/2004.

(5)

Le hAirteagal 43(6) de Rialachán Cur Chun Feidhme (AE) 2019/627 ón gCoimisiún (3), ceadaítear, in imthosca eisceachtúla, go bhféadfar ainmhithe beo a aistriú chuig seamlas eile. Ní dhéantar foráil maidir leis an bhféidearthacht sin le Rialachán (CE) Uimh. 853/2004. Ar mhaithe le comhsheasmhacht reachtaíocht an Aontais, ba cheart Rialachán (CE) Uimh. 853/2004 a ailíniú ina leith sin le Rialachán Cur Chun Feidhme (AE) 2019/627. Dá bhrí sin, ba cheart Caibidil IV de Roinn I d’Iarscríbhinn III a ghabhann le Rialachán (CE) Uimh. 853/2004 a leasú dá réir.

(6)

Le Rialachán (CE) Uimh. 853/2004, ceadaítear stiúdadh agus fuiliú líon teoranta crúbach áirithe a dhéanamh ar an bhfeirm faoi réir ceanglais shonracha lena n-áirítear nach féidir na hainmhithe a iompar chuig an seamlas chun aon riosca don láimhseálaí a sheachaint agus chun aon ghortú do na hainmhithe le linn a n-iompair a chosc. Leis an gceanglas sin, déantar an fhéidearthacht sin stiúdadh agus fuiliú a dhéanamh ar an bhfeirm d’ainmhithe a tógadh go forleathan den chuid is mó agus níl formhór na n-ainmhithe a láimhseálann feirmeoirí go minic san áireamh ann, agus dá bhrí sin iompraítear go héasca gan riosca iad. Ar bhonn na taithí atá faighte ag oibreoirí gnólachtaí bia agus údaráis inniúla, agus an t-éileamh atá ag méadú maidir le haon saincheist leasa ainmhithe a chosc le linn an iompair á chur san áireamh, is iomchuí an fhéidearthacht sin a leathnú chun stiúdadh agus fuiliú crúbach a dhéanamh ar an bhfeirm a chumhdach i gcomhréir le ceanglais shonracha maidir le hainmhithe den speiceas caorach agus den speiceas gabhair agus crúbaigh eile a thógtar faoi aon riocht tithíochta.

(7)

An 19 Eanáir 2023 d’fhoilsigh an tÚdarás Eorpach um Shábháilteacht Bia Tuairim Eolaíoch maidir le Sábháilteacht Mhicribhitheolaíoch Feola Aibithe (4) (‘an Tuairim ó EFSA’). Sa tuairim ó EFSA, léirítear nach bhfuil riosca níos airde ann don tsláinte phoiblí i gcás feoil aibithe ná i gcás feoil úr má chomhlíontar ceanglais áirithe. Agus an méadú atá ag teacht ar thomhaltas feola aibithe á chur san áireamh, is iomchuí ceanglais shonracha a leagan síos a mholtar sa Tuairim ó EFSA i Rialachán (CE) Uimh. 853/2004, go háirithe a mhéid a bhaineann le feoil tirim-aibithe ó bhó-ainmhithe. Cuirtear feoil den sórt sin ar an margadh mar fheoil úr nó, e.g. trí shaothráin aibithe a chur le feoil úr le linn an tirim-aibithe, mar ullmhóid feola. Dá bhrí sin, ba cheart Ranna I agus V d’Iarscríbhinn III a ghabhann le Rialachán (CE) Uimh. 853/2004 a leasú dá réir.

(8)

Le Rialachán (CE) Uimh. 853/2004, i gCaibidil VII de Roinn I d’Iarscríbhinn III a ghabhann le Rialachán (CE) Uimh. 853/2004, déantar foráil maidir le dálaí iompair malartacha i gcás conablach, leathchonablach, ceathrúchonablaigh nó leathchonablaigh ainmhithe den speiceas caorach, ainmhithe den speiceas gabhair, bó-ainmhithe agus ainmhithe den speiceas mucúil a ghearrtar i dtrí ghearradh le haghaidh mórdhíola. Tá na dálaí iompair sin bunaithe ar rialú theocht dromchla na feola in ionad a lár-theochta agus ní mór dóibh ceanglais shonracha a chomhlíonadh.

(9)

Ar bhonn na taithí atá faighte ag oibreoirí gnólachtaí bia agus údaráis inniúla, is iomchuí na ceanglais shonracha sin a leagtar síos i gCaibidil VII de Roinn I de Roinn I d’Iarscríbhinn III a ghabhann le Rialachán (CE) Uimh. 853/2004 a leasú, go háirithe chun go bhféadfar an fheoil ó fhuarstóras agus ó líon teoranta seamlas a bhailiú, an iompar a dhéanamh san urrann chéanna ina gcomhlíonann cineálacha difriúla feola ceanglais teochta deiridh na feola sin, agus chun dálaí breise teochta agus ama a sholáthar maidir le conablaigh, leathchonablaigh, ceathrúchonablaigh nó leathchonablaigh ainmhithe den speiceas caorach, ainmhithe den speiceas gabhair agus bó-ainmhithe a gearradh i dtrí ghearradh le haghaidh mórdhíola le linn uastréimhse iompair de 30 uair an chloig a iompar.

(10)

Chuir na húdaráis inniúla torthaí éagsúla in iúl maidir le teocht an dromchla a thomhas nuair a úsáidtear modhanna éagsúla. Dá bhrí sin, is iomchuí modh tagartha bunaithe ar an taithí a fuair oibreoirí gnólachtaí bia agus ar fhorbairtí teicneolaíocha, agus an fhéidearthacht a choinneáil modhanna malartacha a úsáid an tráth céanna.

(11)

Le Roinn III d’Iarscríbhinn III a ghabhann le Rialachán (CE) Uimh. 853/2004, ceanglaítear go ndéanfar raitítigh agus crúbaigh fheirmshaothraithe a mharaítear ar an bhfeirm a iompar chuig an seamlas le haghaidh tuilleadh láimhseála. Ós rud é go bhfuil saoráidí iomchuí ag bunaíochtaí láimhseála géim chun géim saothraithe den sórt sin a mharaítear ar an bhfeirm a láimhseáil ar bhonn sláinteach, ba cheart iad a údarú freisin raitítigh fheirmshaothraithe agus crúbacha feirmshaothraithe a láimhseáil.

(12)

Le pointe (3)(i) de Roinn III d’Iarscríbhinn III, ceanglaítear freisin ar an oibreoir gnólachta bia a thóg na hainmhithe dearbhú dá chuid a bheith ag gabháil chomh fada leis an seamlas le raitítigh fheirmshaothraithe agus crúbacha feirmshaothraithe a mharaítear ar an bhfeirm. Tá an fhaisnéis a sholáthraítear ar an dearbhú sin cosúil leis an bhfaisnéis faoin mbiashlabhra. Chun an t-ualach riaracháin a bhaineann le dúbailt na faisnéise sin a laghdú, ba cheart an ceanglas sin maidir le dearbhú a scriosadh. Ba cheart tagairtí d’fhaisnéis faoin mbiashlabhra a chur in ionad tagairtí do phointe 3(i).

(13)

Maidir le géim saothraithe a mharaítear ag an ngabháltas bunáitíochta, ní mór deimhniú a bheith ag gabháil leis lena bhfíoraítear go comhlíontar na ceanglais a leagtar amach i Roinn III, pointe 3 d’Iarscríbhinn III a ghabhann le Rialachán (CE) Uimh. 853/2004, agus úsáid á baint as an deimhniú sláinte caighdeánach a leagtar amach i gCaibidil 3 d’Iarscríbhinn IV a ghabhann le Rialachán Cur Chun Feidhme (AE) 2020/2235 ón gCoimisiún (5). Chun aon débhríocht a sheachaint idir an ceanglas dlíthiúil a leagtar síos i Rialachán (CE) Uimh. 853/2004 agus an deimhniú sláinte caighdeánach a leagtar amach i Rialachán Cur Chun Feidhme (AE) 2020/2235, ba cheart foclaíocht an deimhnithe sláinte i Rialachán (CE) Uimh. 853/2004 agus i Rialachán cur Chun Feidhme (AE) Uimh. 2020/2235 a bheith go hiomlán comhsheasmhach.

(14)

In Iarscríbhinn III, Roinn VIII, Caibidil VII, pointí 1 agus 2 a ghabhann le Rialachán (CE) Uimh. 853/2004, déantar foráil go gcoinneofar táirgí iascaigh úra agus táirgí iascaigh neamhphróiseáilte díreoite ag teocht atá gar do theocht an oighir agus é ag leá agus go gcoinneofar táirgí iascaigh reoite ag teocht nach mó ná - 18 °C i ngach cuid de na táirgí. Uaireanta ní mór d’earnáil an iascaigh meaisíní a úsáid lena slistear táirgí iascaigh neamhphróiseáilte úra díreoite nó táirgí iascaigh próiseáilte agus lenar féidir na slisní a chur le chéile arís trí úsáid a bhaint as bileoga idirdhuillithe a chuirtear orthu go huathoibríoch. Sa chás sin, cuirtear na táirgí iascaigh sin i seomra fuar chun a dteocht tosaigh a laghdú nó, i gcás táirgí atá reoite cheana féin, a dteochta a mhéadú go teocht atá níos airde ná -18 °C chun gur féidir an gearradh nó an slisniú a dhéanamh. Dá bhrí sin, is iomchuí a údarú, i gcás inar gá le haghaidh na teochta a éilítear ar bhonn teicneolaíoch, go mbeidh teocht na dtáirgí iascaigh a chuirtear faoi réir an chleachtais sin difriúil ó na teochtaí a éilítear i bpointí 1 agus 2 de Chaibidil VII de Roinn VIII d’Iarscríbhinn III ar feadh tréimhse theoranta ama. Mar sin féin, níor cheart stóráil agus iompar ag an teocht sin a cheadú.

(15)

I gCuid I de Chaibidil I de Roinn IX d’Iarscríbhinn III a ghabhann le Rialachán (CE) Uimh. 853/2004, leagtar síos na ceanglais sláinte maidir le táirgeadh bainne amh agus grutha bhuí i dtréada ainmhithe feirmshaothraithe óna mbailítear an bainne d’fhonn iad a chur ar an margadh. Le pointe 3 de Chuid I, déantar foráil go ndéanfar cóireáil teasa ar bhainne amh ó bhuabhaill, caoirigh nó gabhair nach dtagann ó thréada atá saor ó bhruisealóis agus eitinn, cóireáil teasa amhail cóireáil chun frithghníomh diúltach ar thástáil fosfatáise alcailí a léiriú Mar sin féin, ní modh oiriúnach é an tástáil fosfatáise alcailí chun fíorú a dhéanamh maidir le cóireáil teasa ar bhainne amh ó speicis nach bó-ainmhithe iad nó bainne amh a scartar i gcodáin dhifriúla sula ndéanfar cóireáil teasa air i monarchana próiseála nua-aimseartha. Dá bhrí sin, maidir le roghanna malartacha atá bunaithe ar prionsabail na hanailíse guaise agus na bpointí rialúcháin criticiúla (AGPRC) a leagtar síos i Rialachán (CE) Uimh. 852/2004 ó Pharlaimint na hEorpa agus ón gComhairle (6), ba cheart iad a thairiscint d’oibreoirí gnólachtaí bia chun éifeachtacht na cóireála teasa a chuirtear i bhfeidhm a léiriú.

(16)

I gCuid II de Chaibidil II de Roinn IX d’Iarscríbhinn III a ghabhann le Rialachán (CE) Uimh. 853/2004, leagtar síos na ceanglais maidir le cóireáil teasa le haghaidh táirgí bainne amh, gruth buí, déiríochta nó táirgí bunaithe ar ghruth buí. I bpointe 1(a) den Chuid II sin, foráiltear nach mór do tháirgí paistéartha frithghníomh diúltach ar thástáil fosfatáise alcailí a léiriú díreach tar éis na cóireála sin, i gcás inarb infheidhme. Ós rud é nach bhfuil an tástáil fosfatáise alcailí oiriúnach chun fíorú a dhéanamh maidir le cóireáil teasa ar bhainne amh ó speicis nach bó-ainmhithe iad nó bainne amh a scartar i gcodáin dhifriúla sula ndéanfar cóireáil teasa orthu, ba cheart roghanna malartacha atá bunaithe ar phrionsabail AGPRC a thairiscint d’oibreoirí gnólachtaí bia chun éifeachtacht an phaistéartha a léiriú.

(17)

I gCaibidil I de Roinn X d’Iarscríbhinn III a ghabhann le Rialachán (CE) Uimh. 853/2004, leagtar síos rialacha sláinteachais maidir le huibheacha a tháirgeadh agus foráiltear go háirithe nach mór uibheacha a choinneáil saor ó bholadh coimhthíoch ós rud é go bhféadfadh boladh den chineál sin athrú ar na huibheacha a thabhairt le fios, rud a d’fhágfadh go mbeidís mí-oiriúnach lena gcaitheamh go díreach ag an tomhaltóir deiridh, go dtí go ndíolfar leis an tomhaltóir iad. Mar sin féin, i gcás inar chuir oibreoir gnólachta bia boladh coimhthíoch ar uibheacha d’aon ghnó chun blasanna áirithe chur orthu, ní chiallaíonn sin go mbaineann riosca don tomhaltóir leis na huibheacha de bharr láithreacht bolaidh den sórt sin. Dá bhrí sin, ba cheart a údarú go gcuirfí uibheacha ar cuireadh boladh orthu d’aon ghnó ar an margadh, ar choinníoll nach bhfuil sé beartaithe le cleachtas den sórt sin aon bholadh eachtrach a bhí ar na huibheacha cheana a cheilt.

(18)

Is iomchuí go leor ama a thabhairt d’oibreoirí gnólachtaí bia chun oiriúnú do na ceanglais nua maidir le tirim-aibiú mairteola nó chun sábháilteacht na gcur chuige malartach a léiriú chun shástacht na n-údarás inniúil. Dá bhrí sin, maidir leis na ceanglais nua sin a leagtar síos i gCaibidil VII de Roinn I d’Iarscríbhinn III a ghabhann le Rialachán (CE) Uimh. 853/2004, arna leasú leis an Rialachán seo, ba cheart feidhm a bheith acu 6 mhí ó dháta theacht i bhfeidhm an Rialacháin seo.

(19)

Dá bhrí sin, ba cheart Rialachán (CE) Uimh. 853/2004 a leasú dá réir sin,