(1)

Le Rialachán (CE) Uimh. 1831/2003 déantar foráil maidir le húdarú breiseán lena n-úsáid i gcothú ainmhithe agus maidir leis an bhforas agus na nósanna imeachta i leith an t-údarú sin a dheonú. Le hAirteagal 10(2) de Rialachán (CE) Uimh. 1831/2003, déantar foráil maidir le hathmheastóireacht ar bhreiseáin a údaraítear de bhun Threoir 70/524/CEE ón gComhairle (2).

(2)

Údaraíodh Buí oráiste S gan teorainn ama i gcomhréir le Treoir 70/524/CEE mar bhreiseán beathaithe le haghaidh éisc ornáideacha a bhaineann leis an ngrúpa ‘datháin, lena n-áirítear líocha’ faoin gceannteideal ‘datháin eile’ agus i gcás madraí agus cat faoin gceannteideal ‘datháin eile – oibreáin dathúcháin a údaraítear chun earraí bia a dhathú le rialacha an Chomhphobail’. Faoin Treoir chéanna, údaraíodh é gan teorainn ama le haghaidh gach speicis nó catagóire ainmhithe, cé is moite de chait agus madraí, i mbeatha ainmhithe i dtáirgí a phróiseáiltear ó na nithe seo a leanas agus sna táirgí sin amháin: (i) dramhtháirgí earraí bia, (ii) bunsubstaintí eile, cé is moite de ghránaigh agus de phlúr casabhaigh, iad dínádúraithe trí bhíthin na n-oibreán sin nó dathaithe le linn na hullmhóide teicniúla chun an tsainaithint is gá le linn na monaraíochta a áirithiú. Údaraíodh é gan teorainn ama freisin le haghaidh éin ornáideacha a itheann gráin agus creimirí beaga le Rialachán (CE) Uimh. 358/2005 ón gCoimisiún (3). Ina dhiaidh sin cuireadh an breiseán i gClár na mbreiseán beathaithe mar tháirge a bhí ann cheana, i gcomhréir le hAirteagal 10(1), pointe (b) de Rialachán (CE) Uimh. 1831/2003.

(3)

I gcomhréir le hAirteagal 10(2) de Rialachán (CE) Uimh. 1831/2003 i gcomhar le hAirteagal 7 de, cuireadh iarratas isteach ar athmheastóireacht a dhéanamh ar Bhuí Oráiste S mar bhreiseán beathaithe le haghaidh madraí, cat, éisc ornáideacha, éin ornáideacha a itheann gráin agus creimirí beaga. D’iarr an t-iarratasóir go n-aicmeofaí an breiseán sin i gcatagóir na mbreiseán ‘breiseán céadfach’ agus san fheidhmghrúpa ‘dathúcháin’. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas.

(4)

Sa tuairim ón Údarás Eorpach um Shábháilteacht Bia (‘an tÚdarás’) an 23 Márta 2022 (4), is é an chonclúid ar ar thángthas nach bhfuil éifeachtaí díobhálacha ag Buí Oráiste S ar shláinte ainmhithe. Mar sin féin, in éagmais faisnéis leordhóthanach, níorbh fhéidir teacht ar chonclúid i ndáil le greannú féideartha súl agus craicinn, agus i ndáil le braistint fhéideartha craicinn an bhreiseáin. Is dócha go mbeidh teagmháil ag úsáideoirí leis an mbreiseán trí ionanálú. I gcomhréir le Rialachán (CE) Uimh. 429/2008 ón gCoimisiún (5), i gcéim I den mheasúnú riosca comhshaoil, cinneadh go bhfuil Buí oráiste S, mar bhreiseán a bhfuil sé beartaithe é a úsáid le haghaidh bia-ainmhithe, díolmhaithe ó mheasúnú breise mar gheall ar an neamhdhóchúlacht go mbeadh tionchar mór aige ar an gcomhshaol, agus gan aon fhianaise eolaíochtbhunaithe ann ar ábhar imní í sainaitheanta ag an Údarás sa tuairim thuasluaite uaidh. Níorbh fhéidir leis an Údarás teacht ar chonclúid maidir le héifeachtúlacht Buí oráiste S, agus an raon leathan ábhar beatha a úsáidtear in ábhar beatha iomlán agus forlíontach le haghaidh an spriocspeicis á chur san áireamh, mar aon leis an neamhchinnteacht maidir le cén tiúchan de Bhuí oráiste S a mbeadh éifeacht fheiceálach mar thoradh air. Mar sin féin, dhearbhaigh an tÚdarás freisin maidir leis an mbreiseán sin, ar breiseán é a údaraítear i mbia, go bhféadfaí nach mbeadh gá le léiriú breise éifeachtúlachta i gcás inarb ionann an fheidhm atá aige i mbeatha agus atá aige i mbia. Sholáthair an t-iarratasóir faisnéis bhreise freisin agus mheas an Coimisiún go bhfuil dóthain fianaise ann maidir le héifeachtúlacht Buí oráiste S. D’fhíoraigh an tÚdarás freisin an tuarascáil ar na modhanna a úsáidtear chun anailís a dhéanamh ar an mbreiseán beathaithe arna cur isteach ag an Saotharlann Tagartha a bunaíodh le Rialachán (CE) Uimh. 1831/2003.

(5)

Léirítear leis an measúnú ar Bhuí Oráiste S go gcomhlíontar na coinníollacha maidir le húdarú dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid an bhreiseáin sin a údarú faoi mar a shonraítear san Iarscríbhinn a ghabhann leis an Rialachán seo é. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc.

(6)

Ós rud é nach gceanglaítear, ar chúiseanna sábháilteachta, go gcuirfear na modhnuithe i bhfeidhm láithreach ar na coinníollacha maidir le húdarú i leith an bhreiseáin, is iomchuí go mbeadh idirthréimhse ag na páirtithe leasmhara chun iad féin a ullmhú chun na ceanglais nua a eascraíonn as an údarú a chomhlíonadh.

(7)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,