(1)

Foráiltear le hAirteagal 18(1) den Chomhaontú maidir le Ríocht Aontaithe na Breataine Móire agus Thuaisceart Éireann a bheith ag tarraingt siar as an Aontas Eorpach agus as an gComhphobal Eorpach do Fhuinneamh Adamhach (2) (an “Comhaontú”) go bhféadfaidh an Stát óstach a cheangal ar náisiúnaigh den Ríocht Aontaithe, ar a mbaill teaghlaigh féin agus ar dhaoine eile, atá ina gcónaí ina chríoch i gcomhréir leis na coinníollacha a leagtar amach i dTeideal II den Chomhaontú, iarratas a dhéanamh ar stádas cónaithe nua a thugann na cearta faoin Teideal sin agus doiciméad a fhianaíonn an stádas sin.

(2)

Mar a fhoráiltear in Airteagal 18(4) den Chomhaontú, i gcás inar roghnaigh Stát óstach gan a cheangal ar náisiúnaigh den Ríocht Aontaithe, ar a mbaill teaghlaigh, agus ar dhaoine eile, atá ina gcónaí ina chríoch i gcomhréir leis na coinníollacha a leagtar amach i dTeideal II den Chomhaontú, iarratas a dhéanamh ar an stádas nua cónaithe mar choinníoll le haghaidh cónaí dlíthiúil, beidh sé de cheart ag na daoine atá incháilithe do chearta cónaithe, i gcomhréir leis na coinníollacha a leagtar amach i dTreoir 2004/38/CE ó Pharlaimint na hEorpa agus ón gComhairle (3), doiciméad cónaithe a fháil ina bhfuil ráiteas gur eisíodh é i gcomhréir leis an gComhaontú.

(3)

Foráiltear le hAirteagal 26 den Chomhaontú go bhféadfaidh an Stát oibre a cheangal ar náisiúnaigh den Ríocht Aontaithe a bhfuil cearta acu mar oibrithe trasteorann faoi Theideal II den Chomhaontú iarratas a dhéanamh ar dhoiciméad lena ndeimhneofar go bhfuil na cearta sin acu faoin Teideal sin agus go mbeidh an ceart ag na náisiúnaigh sin go n-eiseofar doiciméad den sórt sin dóibh.

(4)

Leagtar síos le Rialachán (CE) Uimh. 1030/2002 ón gComhairle (4) formáid chomhionann le haghaidh ceadanna cónaithe do náisiúnaigh tríú tír. Tá an fhaisnéis uile is gá san fhormáid sin agus comhlíonann sí caighdeáin theicniúla an-ard, go háirithe a mhéid a bhaineann le coimircí i gcoinne góchumadh agus falsú.

(5)

Dá bhrí sin, ba cheart an fhormáid sin a úsáid freisin chun doiciméid chónaithe a eisiúint do náisiúnaigh den Ríocht Aontaithe, dá mbaill teaghlaigh féin agus do dhaoine eile atá ina gcónaí i gcríoch Bhallstáit i gcomhréir leis na coinníollacha a leagtar amach i dTeideal II den Chomhaontú, tar éis do Ríocht Aontaithe na Breataine Móire agus Thuaisceart Éireann tarraingt siar as an Aontas Eorpach.

(6)

Is iomchuí an fhormáid sin freisin chun doiciméid a eisiúint do náisiúnaigh den Ríocht Aontaithe a bhfuil cearta acu mar oibrithe trasteorann sa Bhallstát oibre.

(7)

Ós rud é go bhfeidhmeoidh na doiciméid sin chun fianaise a thabhairt ar chearta dá bhforáiltear faoi Theideal II den Chomhaontú, ba cheart ráiteas ina sonraítear gur eisíodh na doiciméid sin faoin gComhaontú a chur san áireamh mar iontráil faoi Uimh. 10 “Cineál ceada”.

(8)

Ba cheart do na Ballstáit a shonrú faoi iontráil 12 “Barúlacha” cibé acu a eisítear nó nach n-eisítear an doiciméad faoi Airteagal 18(1) nó (4) den Chomhaontú.

(9)

Chun a áirithiú gur féidir céannacht an tsealbhóra a sheiceáil sa dóigh nach mbeidh aon amhras ann, ba cheart íostréimhse bhailíochta 5 bliana agus uastréimhse bhailíochta 10 mbliana a bheith ag na doiciméid ionas gur féidir pictiúr an tsealbhóra a thabhairt cothrom le dáta.

(10)

I gcomhréir le hAirteagal 19(2) den Chomhaontú, níor cheart éifeacht a bheith ag na doiciméid arna n-eisiúint ag na Ballstáit faoi Airteagal 18(1) den Chomhaontú ach amháin tar éis dheireadh na hidirthréimhse dá bhforáiltear in Airteagal 126 den Chomhaontú.

(11)

Mar sin féin, féadfaidh na Ballstáit tús a chur cheana féin le ceadanna cónaithe a eisiúint do náisiúnaigh den Ríocht Aontaithe faoi Airteagal 18(1) nó (4) den Chomhaontú le linn na hidirthréimhse, má roghnaíonn siad sin a dhéanamh ar chúiseanna riaracháin nó ar chúiseanna eile. Níl Rialachán (CE) Uimh. 1030/2002 arna leasú le Rialachán (AE) 2017/1954 ó Pharlaimint na hEorpa agus ón gComhairle (5) infheidhme go hiomlán fós, áfach. Dá bhrí sin, ba cheart do na Ballstáit an fhormáid atá ann faoi láthair a úsáid le haghaidh ceadanna cónaithe do náisiúnaigh tríú tír a leagtar síos i Rialachán (CE) Uimh. 1030/2002 arna leasú le Rialachán (CE) Uimh. 380/2008 ón gComhairle (6) go dtí go dtiocfaidh Rialachán (AE) 2017/1954 i bhfeidhm.

(12)

Tá na bearta dá bhforáiltear sa Chinneadh seo i gcomhréir leis an tuairim ón gCoiste a bunaíodh le hAirteagal 6 de Rialachán (CE) Uimh. 1683/95 ón gComhairle (7),