(1)

Leis an Sásra Aontais um Chosaint Shibhialta (“an Sásra Aontais”) atá rialaithe ag Cinneadh Uimh. 1313/2013/AE ó Pharlaimint na hEorpa agus ón gComhairle (4), neartaítear comhar idir an tAontas agus na Ballstáit agus éascaítear comhordú i réimse na cosanta sibhialta chun freagairt an Aontais ar thubaistí nádúrtha agus ar thubaistí de dhéantús an duine a fheabhsú.

(2)

Fad a thugtar aitheantas do phríomhchúram na mBallstát tubaistí nádúrtha nó tubaistí de dhéantús an duine a chosc agus chun ullmhú agus freagairt dóibh, leis an Sásra Aontais cuirtear dlúthpháirtíocht idir na Ballstáit chun cinn i gcomhréir le hAirteagal 3(3) den Chonradh ar an Aontas Eorpach (CAE).

(3)

Is féidir le tubaistí nádúrtha agus tubaistí de dhéantús an duine tarlú in aon áit ar fud an domhain, agus is minic gur gan rabhadh a tharlaíonn siad. Bídís ina dtubaistí nádúrtha nó ina dtubaistí de dhéantús an duine, bíonn siad ag tarlú níos minice, tá siad ag éirí níos tromchúisí agus níos casta i gcónaí, is measa iad mar gheall ar thionchar an athraithe aeráide, agus déanann siad neamhaird de theorainneacha náisiúnta. Na hiarmhairtí a d'fhéadfadh a bheith ag tubaistí don duine, don chomhshaol, don tsochaí agus don gheilleagar, is féidir leo a bheith de mhéid nach rabhthas ar an eolas faoi roimhe sin.

(4)

Maidir le tairiscintí deonacha ar chúnamh frithpháirteach atá comhordaithe agus atá éascaithe leis an Sásra Aontais, léiríodh leis an taithí is deireanaí nach leor i gcónaí iad chun a áirithiú go gcuirtear acmhainneachtaí leordhóthanacha ar fáil chun aghaidh a thabhairt, ar bhealach sásúil, ar bhunriachtanais na ndaoine atá thíos leis mar gheall ar thubaistí, ná chun a áirithiú go ndéantar an comhshaol agus réadmhaoin a chosaint mar is ceart. Bíonn an cás amhlaidh go háirithe nuair a bhíonn éifeacht ag tubaistí a tharlaíonn arís agus arís eile agus nach mbíonn coinne leo, bíodh nó nach bíodh siad ina dtubaistí nádúrtha nó ina dtubaistí de dhéantús an duine, ar Bhallstáit, ag an am céanna, agus i gcás nach leor an acmhainneacht chomhchoiteann atá acu. Chun na heaspaí sin a shárú agus chun déileáil leis na guaiseacha a thagann chun cinn, ba cheart úsáid a bhaint as ionstraimí uile an Aontais ar bhealach an-solúbtha, lena n-áirítear trí rannpháirtíocht ghníomhach na sochaí sibhialta a chur chun cinn.

(5)

Tá sé bunriachtanach go dtabharfadh na Ballstáit faoi ghníomhaíochtaí leordhóthanacha maidir le cosc agus ullmhacht, lena n-áirítear infhaighteacht lín leordhóthanaigh acmhainneachtaí chun déileáil le tubaistí, go háirithe dóiteáin foraoise. Ós rud é gurbh éigean don Aontas dul i ngleic le dóiteáin foraoise a bhí tréan agus forleathan le blianta beaga anuas, rud léirigh go raibh bearnaí oibriúcháin suntasacha i roinnt Ballstát agus in Acmhainn Práinnfhreagartha na hEorpa (EERC), a bunaíodh mar dhíorma deonach d'acmhainneachtaí freagartha de chuid na mBallstát atá réamhgheallta faoi Chinneadh Uimh. 1313/2013/AE, ba cheart bearta breise a ghlacadh ar leibhéal an Aontais freisin. Tá sé ríthábhachtach dóiteáin foraoise a chosc i gcomhthéacs an ghealltanais dhomhanda astaíochtaí CO2 a laghdú.

(6)

Is den ríthábhacht é go ndíreofaí ar chosc chun cosaint a thabhairt in aghaidh tubaistí nádúrtha agus tubaistí de dhéantús an duine agus is gá tuilleadh a dhéanamh ina leith. Chun na críche sin, ba cheart do na Ballstáit achoimrí rialta a roinnt leis an gCoimisiún ar a gcuid measúnuithe riosca agus a gcuid measúnuithe ar a gcumas bainistithe riosca, lena ndíreofaí ar na príomhrioscaí. Ina theannta sin, ba cheart do na Ballstáit faisnéis a roinnt faoi bhearta maidir le cosc agus ullmhacht, go háirithe na bearta sin atá riachtanach chun aghaidh a thabhairt ar na príomhrioscaí a mbíonn tionchar trasteorann orthu agus, nuair is iomchuí sin, na rioscaí lena ngabhann dóchúlacht íseal ach tionchar mór.

(7)

Ba cheart don Coimisiún, i gcomhar leis na Ballstáit, treoirlínte a fhorbairt tuilleadh chun roinnt faisnéise maidir le bainistiú rioscaí tubaistí a éascú. Le treoirlínte den sórt sin, ba cheart cuidiú le hinchomparáideachta faisnéise den sórt sin a chur chun cinn, go háirithe i gcás ina bhfuil Ballstáit ag tabhairt aghaidh ar rioscaí comhchosúla nó ar rioscaí trasteorann.

(8)

Tugtar le tuiscint le cosc agus bainistiú rioscaí tubaistí gur gá bearta bainistithe riosca a leagan amach agus a chur chun feidhme, ar bearta iad lena mbaineann comhar ó mhórchuid gníomhaithe. Agus measúnuithe riosca agus bearta bainistithe riosca á n-ullmhú, tá sé tábhachtach inathraitheacht reatha na haeráide agus treochtaí réamh-mheasta an athraithe aeráide a chur san áireamh. Is gné ríthábhachtach de ghníomhaíochtaí maidir le cosc agus den acmhainneacht freagartha mapaí riosca a ullmhú. Baineann tábhacht thar na bearta le gníomhaíochtaí chun laghdú a dhéanamh ar leochaileacht an daonra, na ngníomhachtaí eacnamaíocha, lena n-áirítear an bonneagar criticiúil, an leasa ainmhithe agus an fhiadhúlra, na n-acmhainní comhshaoil agus cultúrtha, amhail an bhitheolaíocht, seirbhísí éiceachórais na bhforaoisí agus na n-acmhainní uisce.

(9)

Chun an phleanáil agus an comhordú maidir le cosc agus ullmhacht a fheabhsú idir na Ballstáit, ba cheart don Choimisiún, i gcomhar leis na Ballstáit, a bheith in ann sásraí comhairliúcháin ar leith a bhunú. Ina theannta sin, ba cheart don Choimisiún a bheith in ann faisnéis a iarraidh faoi bhearta maidir le cosc agus ullmhacht a bhaineann le rioscaí sonracha i gcás ina ndearna Ballstát iarrataí rialta ar chúnamh. Ba cheart don Choimisiún faisnéis den sórt a mheas d'fhonn tacaíocht fhoriomlán an Aontais do bhainistiú rioscaí tubaistí a uasmhéadú agus d'fhonn leibhéal coisc agus ullmhachta na mBallstát a neartú. Ba cheart an t-ualach riaracháin a laghdú agus ba cheart naisc le príomhbheartais agus le príomhionstraimí eile de chuid an Aontais a neartú, go háirithe le Cistí Struchtúracha agus Infheistíochta na hEorpa dá dtagraítear i Rialachán (AE) Uimh. 1303/2013 ó Pharlaimint na hEorpa agus ón gComhairle (5).

(10)

Is ag méadú atá an riosca a bhaineann le tuile do shaoránaigh an Aontais. Chun gníomhaíochtaí maidir le cosc agus ullmhacht a neartú i réimse na cosanta sibhialta agus chun leochaileacht a ndaonraí faoi seach i ndáil le rioscaí tuilte a laghdú, tá sé riachtanach, agus iad i mbun a gcuid measúnuithe riosca faoin gCinneadh seo, go mbaineann na Ballstáit lánúsáid, inter alia, as na measúnuithe riosca a rinneadh faoi Threoir 2007/60/CE ó Pharlaimint na hEorpa agus ón gComhairle (6) chun a chinneadh cibé atá a gcuid uiscebhealaí agus línte cósta i mbaol tuilte nó nach bhfuil, agus bearta leordhóthanacha comhordaithe a dhéanamh chun rioscaí den sórt sin a laghdú.

(11)

Is gá treisiú leis an ábaltacht chomhchoiteann atá ann ullmhú do thubaistí agus freagairt dóibh, go háirithe trí thacaíocht fhrithpháirteach san Eoraip. Chun léiriú a thabhairt ar an gcreat dlí nua faoin gCinneadh seo, ba cheart an t-ainm “Acmhainn Práinnfhreagartha na hEorpa” (ERC) nó “an díorma deonach” a athrú go “Díorma Eorpach um Chosaint Shibhialta”.

(12)

Chun an Díorma Eorpach um Chosaint Shibhialta a neartú, tá gá le maoiniú méadaithe de chuid an Aontais ó thaobh acmhainneachtaí a oiriúnú agus a dheisiú, chomh maith le costais oibriúcháin.

(13)

Sa bhreis ar na hacmhainneachtaí foriomlána atá ann cheana a neartú, ba cheart rescEU a bhunú chun freagairt do chásanna ollmhóra mar rogha dheiridh i gcás, sna himthosca, nach féidir leis na hacmhainneachtaí atá ann cheana ar an leibhéal náisiúnta agus iad siúd atá réamhgheallta ag na Ballstáit don Díorma Eorpach um Chosaint Shibhialta freagairt éifeachtach do chineálacha éagsúla tubaistí a áirithiú.

(14)

Is den mhórthábhacht an ról atá ag údaráis réigiúnacha agus áitiúla tubaistí a chosc agus a bhainistiú, agus ní mór baint iomchuí a bheith ag a n-acmhainneachtaí freagartha in aon ghníomhaíochtaí a bhaineann le comhordú agus imscaradh a dhéantar faoin gCinneadh seo, i gcomhréir le creataí institiúideacha agus dlí na mBallstát, d'fhonn aon fhorluí a laghdú agus idir-inoibritheacht a chothú. Féadfaidh údaráis den sórt sin ról láidir coisctheach a ghlacadh agus is iadsan freisin a ghníomhaíonn ar dtús báire i ndiaidh tubaiste, in éineacht le hacmhainneachtaí a gcuid saorálaithe. Tá gá, dá bhrí sin, le comhar leanúnach ar an leibhéal áitiúil, réigiúnach agus trasteorann d'fhonn córais choiteanna rabhaidh le haghaidh mear-idirghabhála a bhunú roimh rescEU a shlógadh, chomh maith le feachtais faisnéise phoiblí rialta maidir le bearta freagartha tosaigh.

(15)

Maidir le cineál na n-acmhainneachtaí atá ag rescEU, ba cheart dóibh leanúint de bheith solúbtha agus ábalta athrú chun aghaidh a thabhairt ar fhorbairtí nua agus ar dhúshláin amach anseo, amhail iarmhairtí an athraithe aeráide.

(16)

Ós rud é go mbíonn éagsúlacht ann in imeacht ama i gcás rioscaí, acmhainneachtaí foriomlána agus bearnaí sainaitheanta, tá gá le solúbthacht agus rescEU á bhunú. Ba cheart an chumhacht a thabhairt don Choimisiún, dá bhrí sin, gníomhartha cur chun feidhme a ghlacadh lena sainítear acmhainneachtaí rescEU, lena gcuirtear rioscaí sainaitheanta, acmhainneachtaí foriomlána agus bearnaí san áireamh.

(17)

Chun dea-fheidhmiú acmhainneachtaí rescEU a bheith ann, ba cheart leithreasuithe airgeadais breise a chur ar fáil chun gníomhaíochtaí a mhaoiniú faoin Sásra Aontais.

(18)

Ba cheart don Aontas a bheith in ann tacú leis na Ballstáit trí chómhaoiniú a dhéanamh ar fhorbairt acmhainneachtaí rescEU, lena n-áirítear na hacmhainneachtaí sin a fháil ar cíos, a léasú nó a fháil. Ar an gcuma sin, thiocfadh méadú suntasach ar éifeachtúlacht an tSásra Aontais, trína áirithiú go mbeadh acmhainneachtaí ar fáil i gcás nach ndéanfaí freagairt éifeachtach do thubaistí a ráthú seachas sin, go háirithe maidir le tubaistí ar mó go mór a n-iarmhairtí do líon mór Ballstát. Le soláthar comhpháirteach acmhainneachtaí, ba cheart barainneachtaí scála agus comhordú níos fearr a bheith ann nuair a fhreagrófar do thubaistí.

(19)

Ba cheart méid an chúnaimh airgeadais ón Aontas a íoctar chun acmhainneachtaí rescEU a fhorbairt a chinneadh agus an liosta de na catagóirí costas incháilithe atá leagtha amach sa Chinneadh seo á chur san áireamh. Ba cheart cúnamh airgeadais iomlán ón Aontas a bheith ar fáil do na hacmhainneachtaí a bhfuil gá leo chun freagairt do rioscaí lena ngabhann dóchúlacht íseal ach tionchar mór a bhféadfadh mórthionchair trasteorann teacht astu agus nach meastar ina leith, ar bhonn anailísí ar bhearna acmhainneachta arna ndéanamh ag na húdaráis náisiúnta cosanta sibhialta agus ag an gCoimisiún, go bhfuil na leibhéil ullmhachta san Aontas leordhóthanach. Ba cheart cómhaoiniú suntasach a bheartú freisin d'acmhainneachtaí lena mbaineann na costais is airde maidir le fáil agus na costais athfhillteacha is airde, amhail acmhainneachtaí chun dóiteáin foraoise a chomhrac ón aer. Ba cheart rátaí cómhaoinithe beachta a chinneadh i gcláir oibre bhliantúla.

(20)

Chun cothromaíocht a chothú idir an fhreagracht náisiúnta agus an dlúthpháirtíocht i measc na mBallstát, ba cheart cuid de na costais oibriúcháin a bhaineann le hacmhainneachtaí rescEU a imscaradh a bheith incháilithe le haghaidh cúnamh airgeadais ón Aontas.

(21)

D'fhéadfadh tionchar suntasach a bheith ag tubaistí a tharlaíonn i dtríú tíortha ar Bhallstáit nó ar a gcuid saoránach. I gcásanna den sórt sin, ba cheart acmhainneachtaí rescEU a bheith ar fáil lena n-imscaradh lasmuigh den Aontas. Ar chúiseanna a bhaineann leis an dlúthpháirtíocht i measc na mBallstát, ba cheart, i gcás ina ndéantar acmhainneachtaí rescEU a imscaradh lasmuigh den Aontas, gur ar bhuiséad an Aontais a thitfeadh na costais oibriúcháin.

(22)

Chun a áirithiú go mbeidh an fhreagairt comhordaithe agus mear, ba cheart gurbh é an Coimisiún, i ndlúthchomhar leis an mBallstát iarrthach agus leis an mBallstát ar leis acmhainneachtaí rescEU i dtrácht, a bhfuil siad ar cíos nó á léasú aige, a dhéanfadh cinntí maidir le himscaradh agus díshlógadh agus aon chinneadh i gcás iarrataí codarsnacha. Ba cheart don Choimisiún agus don Bhallstát ar leis acmhainneachtaí rescEU, a bhfuil siad ar cíos nó á léasú aige, conarthaí oibríochtúla a thabhairt i gcrích ina sonrófar na téarmaí agus na coinníollacha a bhaineann le hacmhainneachtaí rescEU a imscaradh.

(23)

Is gnéithe bunriachtanacha den chomhar i réimse na cosanta sibhialta iad oiliúint, taighde agus nuálaíocht. Chun feabhas a chur ar éifeachtúlacht agus éifeachtacht na hoiliúna agus na gcleachtaí maidir leis an gcosaint shibhialta, chun an nuálaíocht agus idirphlé a chur chun cinn, agus chun an comhar a threisiú idir údaráis agus seirbhísí náisiúnta cosanta sibhialta na mBallstát, is gá Líonra Eolais an Aontais um Chosaint Shibhialta a bhunú. Ba cheart an líonra sin a bheith bunaithe ar na struchtúir atá ann cheana lena n-áirítear ionaid barr feabhais, ollscoileanna, taighdeoirí agus saineolaithe eile, gairmithe óga agus saorálaithe a bhfuil taithí acu i réimse bhainistiú na n-éigeandálaí. Ba cheart comhar breise le heagraíochtaí idirnáisiúnta a neartú maidir le hoiliúint, taighde agus nuálaíocht, agus, i gcás inar féidir, ba cheart an comhar sin a shíneadh chun go mbeadh tríú tíortha, go háirithe tíortha comharsanachta, rannpháirteach ann.

(24)

Tiomnaíonn oibreoirí cosanta sibhialta a saolta chun cabhrú le daoine eile agus déanann siad infheistíocht ama agus iarrachta chun cúnamh a thabhairt dóibh siúd atá i ngátar. Ba cheart don Aontas aitheantas a thabhairt don chineál sin misnigh agus tiomantais i leith chosaint shibhialta an Aontais.

(25)

Cé go bhfuil sé ar cheann de na tosaíochtaí is mó san Aontas trí chéile an chosaint shibhialta a neartú i bhfianaise threochtaí na dtubaistí, amhail tubaistí a bhaineann leis an aimsir agus tubaistí a bhaineann le slándáil inmheánach, tá sé bunriachtanach gné láidir chríochach atá faoi stiúir an phobail a áirithiú, toisc gurb í gníomhaíocht an phobail áitiúil an bealach is éifeachtaí chun teorainn a chur leis an damáiste a dhéanann tubaiste.

(26)

Is gá nósanna imeachta an tSásra Aontais a shimpliú, a chuíchóiriú agus a dhéanamh níos solúbtha chun a áirithiú gur féidir leis na Ballstáit rochtain thapa a bheith acu ar an gcúnamh agus ar na hacmhainneachtaí is gá chun freagairt a luaithe agus a éifeachtúla is féidir do thubaistí nádúrtha nó do thubaistí de dhéantús an duine.

(27)

Chun an úsáid is mó is féidir a bhaint as na hionstraimí cistiúcháin atá ann cheana agus tacú leis na Ballstáit maidir le cúnamh a sholáthar, lena n-áirítear mar fhreagairt ar thubaistí lasmuigh den Aontas, deonaítear maoiniú de bhun Airteagal 21, Airteagal 22 agus Airteagal 23 de Chinneadh Uimh. 1313/2013/AE i gcomhréir le Airteagal 191(1) de Rialachán (AE, Euratom) 2018/1046 ó Pharlaimint na hEorpa agus ón gComhairle (7). Mar sin féin, ba cheart cistiú le haghaidh gníomhaíochtaí cosanta sibhialta agus cistiú le haghaidh cabhair dhaonnúil, ach go háirithe, a dheighilt go soiléir óna chéile i gcónaí agus ba cheart dóibh a bheith i gcomhréir go hiomlán lena gcuspóirí agus lena gceanglais dhlíthiúla faoi seach.

(28)

Tá sé tábhachtach a áirithiú go ndéanfaidh na Ballstáit na gníomhaíochtaí uile is gá chun tubaistí nádúrtha agus tubaistí de dhéantús an duine a chosc go héifeachtach agus chun na héifeachtaí a ghabhann leo a mhaolú. Ba cheart d'fhorálacha an Chinnidh seo cur leis na naisc atá ann idir gníomhaíochtaí maidir le cosc, ullmhacht agus freagairt faoin Sásra Aontais. Ba cheart comhleanúnachas a áirithiú freisin le reachtaíocht ábhartha eile de chuid an Aontais maidir le cosc agus bainistiú rioscaí tubaistí, lena n-áirítear ar mhaithe le gníomhaíocht trasteorann maidir le cosc agus ar mhaithe le freagairt do bhagairtí amhail bagairtí tromchúiseacha trasteorann ar an tsláinte, mar a leagtar amach i gCinneadh Uimh. 1082/2013/AE ó Pharlaimint na hEorpa agus ón gComhairle (8). I gcláir um chomhar críochach faoin mbeartas comhtháthaithe, déantar foráil do ghníomhaíochtaí lena gcuirtear san áireamh an athléimneacht ó thubaistí, cosc ar rioscaí agus bainistiú rioscaí, agus ba cheart tuilleadh iarrachtaí a dhéanamh i dtreo comhtháthú níos láidre agus sineirgí níos fearr. Ina theannta sin, ba cheart gach gníomhaíocht a bheith i gcomhréir le gealltanais idirnáisiúnta amhail Creat Sendai 2015 — 2030 um Laghdú Rioscaí Tubaistí, Comhaontú Pháras faoi Chreat-Choinbhinsiún na Náisiún Aontaithe (NA) maidir leis an Athrú Aeráide agus Clár Oibre 2030 NA don Fhorbairt Inbhuanaithe, agus ba cheart do gach gníomhaíocht rannchuidiú le gealltanais idirnáisiúnta den sórt sin ar bhealach gníomhach.

(29)

Chun a áirithiú go ndéanfar faisnéis faoi na hacmhainneachtaí agus na modúlacha atá ar fáil do na Ballstáit a mhalartú ar bhealach cuimsitheach gan uaim, is gá an fhaisnéis a uaslódáiltear ar an gComhchóras Cumarsáide agus Faisnéise Éigeandála (CECIS) a choinneáil cothrom le dáta i gcónaí. Maidir le faisnéis a chuirtear ar fáil trí CECIS, is iomchuí freisin go ndéanfadh na Ballstáit acmhainneachtaí a chlárú ann nach bhfuil réamhgheallta don Díorma Eorpach um Chosaint Shibhialta agus atá ar fáil do na Ballstáit lena n-imscaradh tríd an Sásra Aontais.

(30)

Is den tábhacht chéanna é go gcruthófaí sineirgí agus go gcuirfí feabhas ar chomhlántacht agus comhar idir an Sásra Aontais agus ionstraimí eile de chuid an Aontais, lena n-áirítear iad siúd a d'fhéadfadh rannchuidiú leis an damáiste a dhéanann tubaistí a dheisiú nó a mhaolú.

(31)

Chun leasú a dhéanamh ar chatagóirí na gcostas incháilithe a úsáidfear chun cúnamh airgeadais ón Aontas a chinneadh le haghaidh acmhainneachtaí rescEU a fhorbairt, ba cheart an chumhacht chun gníomhartha a ghlacadh i gcomhréir le hAirteagal 290 den Chonradh ar Fheidhmiú an Aontais Eorpaigh a tharmligean chuig an gCoimisiún. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfar na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (9). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(32)

Chun coinníollacha aonfhoirmeacha a áirithiú maidir le chur chun feidhme an Chinnidh seo i ndáil leis an méid seo a leanas: cineálacha agus líon na bpríomhacmhainneachtaí freagartha is gá don Díorma Eorpach um Chosaint Shibhialta a shainiú; na hacmhainneachtaí atá ag rescEU a shainiú, agus aird á tabhairt ar rioscaí sainaitheanta, acmhainneachtaí foriomlána agus bearnaí; rescEU a bhunú, a bhainistiú agus a choinneáil; Líonra Eolais an Aontais um Chosaint Shibhialta a bhunú agus a eagrú; na catagóirí de rioscaí lena ngabhann dóchúlacht íseal ach tionchar mór agus na hacmhainneachtaí comhfhreagracha chun iad a bhainistiú; agus critéir agus nósanna imeachta chun tiomantas seanbhunaithe agus rannchuidiú urghnách le cosaint shibhialta an Aontais a aithint, ba cheart cumhachtaí cur chun feidhme a thabhairt don Choimisiún. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (10).

(33)

Ós rud é nach féidir leis na Ballstáit cuspóirí an Chinnidh seo, eadhon méadú a dhéanamh ar an ábaltacht chomhchoiteann atá ann tubaistí a chosc, agus ullmhú agus freagairt dóibh, a ghnóthú go leordhóthanach agus, de bharr a fhairsinge nó éifeachtaí, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh i gcomhréir le prionsabal na coimhdeachta a leagtar amach in Airteagal 5 CAE. I gcomhréir le prionsabal na comhréireachta a leagtar amach san Airteagal sin, ní théann an Cinneadh seo thar a bhfuil riachtanach chun an cuspóir sin a ghnóthú.

(34)

Chun a áirithiú go mbeidh aistriú rianúil i dtreo chur chun feidhme iomlán rescEU, ba cheart don Choimisiún a bheith in ann, ar feadh idirthréimhse, maoiniú a chur ar fáil chun a áirithiú go mbeidh na hacmhainneachtaí náisiúnta ábhartha ar fáil go tapa. Ba cheart don Choimisiún agus na Ballstáit a ndícheall a dhéanamh acmhainneachtaí breise a fháil, lena n-áirítear héileacaptair comhrac dóiteáin, chun aghaidh a thabhairt, chomh luath agus samhradh na bliana 2019, ar riosca na ndóiteán foraoise.

(35)

Ba cheart, dá bhrí sin, Cinneadh Uimh. 1313/2013/AE a leasú dá réir sin.

(36)

Ionas go bhféadfar na bearta dá bhforáiltear sa Chinneadh seo a chur i bhfeidhm go pras, ba cheart don Chinneadh seo teacht i bhfeidhm an lá tar éis lá a fhoilsithe in Iris Oifigiúil an Aontais Eorpaigh,