Rochtain oscailte ar an idirlíon agus cumarsáid laistigh den Aontas

 

ACHOIMRE AR:

Rialachán (AE) 2015/2120 lena leagtar síos bearta maidir le rochtain oscailte ar an idirlíon

CAD IS AIDHM LEIS AN RIALACHÁN?

• Tugtar isteach leis rialacha chun cóir chomhionann agus neamh-idirdhealaitheach do thrácht idirlín (neodracht idirlín) idir Ballstáit an Aontais Eorpaigh (AE) a chosaint.
• Leagtar síos leis rialacha comhchoiteanna freisin chun a áirithiú nach ngearrtar praghsanna iomarcacha ar thomhaltóirí as cumarsáid idirphearsanta uimhirbhunaithe* a dhéanamh ó Bhallstát a sholáthraí baile go dtí aon uimhir sheasta nó mhóibíleach i mBallstát eile, agus socraíonn sé muirir mhiondíola ar chumarsáid rialáilte laistigh den Aontas*.
• Leasaíodh an méid seo a leanas leis freisin:
  • Treoir 2002/22/CE maidir le seirbhís uilíoch agus cearta úsáideoirí i dtaca le líonraí agus seirbhísí cumarsáide leictreonaí (ó rinneadh í a aisghairm le Treoir (AE) 2018/1972 lena mbunaítear an Cód um Chumarsáid Leictreonach Eorpach); agus
  • Rialachán (AE) Uimh. 531/2012 maidir le fánaíocht a dhéanamh ar líonraí poiblí cumarsáide soghluaiste laistigh den Aontas (ó rinneadh é a aisghairm le Rialachán (AE) 2022/612 maidir le muirir fánaíochta).

PRÍOMHPHOINTÍ

Rochtain oscailte ar an idirlíon

Ceanglaítear ar sholáthraithe idirlín caitheamh go cothrom le gach trácht agus seirbhísí rochtana idirlín á soláthar acu:

• gan idirdhealú, gan srian nó gan cur isteach; agus
• beag beann ar:
  • an seoltóir agus an faighteoir;
  • an t-ábhar ar a bhfaighfear rochtain nó a dháilfear; nó
  • na feidhmchláir nó na seirbhísí a úsáidfear.

Tá cead ag soláthraithe bearta bainistíochta tráchta réasúnta a úsáid, ach ní foláir go mbeidh na bearta sin trédhearcach, neamh-idirdhealaitheach, comhréireach agus nach mbeidh siad bunaithe ar bhreithnithe tráchtála.

Ní foláir nach ndéanfar monatóireacht leis na bearta bainistíochta tráchta ar ábhar sonrach agus ní foláir nach mbeidh siad i bhfeidhm ar feadh tréimhse níos faide ná mar is gá. Tá cosc ar bhearta a théann níos faide ná bainistíocht tráchta réasúnta den sórt sin (mar shampla, bacadh nó toirmeasc), ach amháin le haghaidh líon teoranta cásanna arna sainiú sa rialachán.

Ceadaítear comhaontuithe maidir le seirbhísí a éilíonn leibhéal sonrach cáilíochta, ar choinníoll nach gcuirtear rochtain ar an idirlíon ina n-ionad agus nach laghdaíonn siad infhaighteacht ná cáilíocht na seirbhísí rochtana ar an idrlíon. Ba cheart do sholáthraithe seirbhíse rochtana idirlín custaiméirí a chur ar an eolas faoi na nithe seo a leanas:

• an chaoi a bhféadfadh cleachtais bainistithe tráchta agus seirbhísí eile difear a dhéanamh do cháilíocht na rochtana ar an idirlíon;
• an luas idirlín a bhíonn ar fáil de ghnáth agus na nósanna imeachta gearáin atá ar fáil d’úsáideoirí i gcás neamhchomhlíonta.

Muirir mhiondíola ar chumarsáid rialáilte laistigh den Aontas

• Ón 15 Bealtaine 2019, aon phraghas miondíola (gan CBL a áireamh) a ghearrtar ar thomhaltóirí as cumarsáid rialáilte laistigh den Aontas, tá uasteorainn €0.19 in aghaidh an nóiméid le haghaidh glaonna agus €0.06 in aghaidh na teachtaireachta SMS leis.
• Mar sin féin, féadfaidh soláthraithe cumarsáide taraif mhalartach a thairiscint do chumarsáid idirnáisiúnta, lena n-áirítear cumarsáid rialáilte laistigh den Aontas, ina ngearrtar taraif éagsúil ar thomhaltóirí ar chumarsáid rialáilte laistigh den Aontas ná mar a ghearrfadh siad gan rogha den sórt sin, agus tá saoirse ag tomhaltóirí an taraif sin a roghnú. D’fhéadfadh sé gur sampla de phacáiste den sórt sin taraif lena n-áirítear muirear €0.30/nóiméad le haghaidh glaonna laistigh den Aontas agus glaonna a dhéantar i dtreo tíortha nach bhfuil sa Limistéar Eorpach Eacnamaíoch. Ní mór don soláthraí tomhaltóirí a chur ar an eolas faoi na buntáistí a chaillfí sula roghnóidís an taraif mhalartach.

CÉN UAIR ATÁ TOSACH FEIDHME AN RIALACHÁIN?

Tá sé i bhfeidhm ón 30 Aibreán 2016.

CÚLRA

Le haghaidh tuilleadh faisnéise, féach:

• Glaonna laistigh den Aontas: muirir níos ísle agus táillí teoranta ar thíortha eile de chuid an Aontais a ghlaoch (an Coimisiún Eorpach)
• An t-eolas ar fad atá uait faoi rialacha an Idirlín Oscailte san Aontas Eorpach (Comhlacht na Rialálaithe Eorpacha um Chumarsáid Leictreonach — BEREC)
• Fánaíocht: nasctha áit ar bith in AE gan aon mhuirear bhreise (An Coimisiún Eorpach)
• Treoirlínte maidir le Cur Chun Feidhme an Rialacháin maidir le hIdirlíon Oscailte (BEREC).

PRÍOMHTHÉARMAÍ

PRÍOMHDHOICIMÉAD

Rialachán (AE) 2015/2120 ó Pharlaimint na hEorpa agus ón gComhairle an 25 Samhain 2015 lena leagtar síos bearta maidir le rochtain oscailte ar an idirlíon agus lena leasaítear Treoir 2002/22/CE maidir le seirbhís uilíoch agus cearta úsáideoirí a bhaineann le líonraí agus seirbhísí cumarsáide leictreonaí agus Rialachán (AE) Uimh. 531/2012 maidir le fánaíocht a dhéanamh ar líonraí poiblí cumarsáide soghluaiste laistigh den Aontas (IO L 310, 26.11.2015, lgh. 1-18).

Rinneadh leasuithe comhleanúnacha ar Rialachán (AE) 2015/2120 a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

DOICIMÉID GHAOLMHARA

Rialachán (AE) 2018/1971 ó Pharlaimint na hEorpa agus ón gComhairle an 11 Nollaig 2018 lena mbunaítear Comhlacht na Rialálaithe Eorpacha um Chumarsáid Leictreonach (BEREC) agus Gníomhaireacht Tacaíochta BEREC (Oifig BEREC), lena leasaítear Rialachán (AE) 2015/2120 agus lena n–aisghairtear Rialachán (CE) Uimh. 1211/2009 (IO L 321, 17.12.2018, lgh. 1-35).

Treoir (AE) 2018/1972 ó Pharlaimint na hEorpa agus ón gComhairle an 11 Nollaig 2018 lena mbunaítear an Cód um Chumarsáid Leictreonach Eorpach (Athmhúnlú) (IO L 321, 17.12.2018, pp. 36-214).

Féach an leagan comhdhlúite.

Rialachán Cur Chun Feidhme (AE) 2016/2286 ón gCoimisiún an 15 Nollaig 2016 lena leagtar síos rialacha mionsonraithe maidir le cur i bhfeidhm an bheartais maidir le húsáid chóir agus maidir leis an modheolaíocht chun measúnú a dhéanamh ar inbhuanaitheacht dhíothú formhuirear fánaíochta miondíola agus maidir leis an iarratas a bheidh le cur isteach ag soláthraí seirbhísí fánaíochta chun críocha an mheasúnaithe sin (IO L 344, 17.12.2016, lgh. 46-62).

Féach an leagan comhdhlúite.

Nuashonraithe 21.06.2022