Beartas forbartha AE: clár oibre don athrú

ACHOIMRE AR:

Teachtaireacht ón gCoimisiún (COIM(2011) 637 leagan deireanach) – An tionchar a bhíonn ag beartas forbartha AE a mhéadú: clár oibre don athrú

ACHOIMRE

CAD A DHÉANTAR SA TEACHTAIREACHT?

Cuirtear smaointe i láthair sa pháipéar beartais seo de chuid an Choimisiúin Eorpaigh maidir le conas is féidir leis an Aontas Eorpach cuidiú le tíortha i mbéal forbartha leis an mbochtaineacht a dhíothú, arb é sin príomhchuspóir bheartas forbartha AE.

PRÍOMHPHOINTÍ

Agus fás ag teacht ar dhaonra an domhain i gcónaí, is gá tuilleadh a dhéanamh le dul i ngleic le dúshláin amhail coinbhleachtaí a chosc, slándáil, an comhshaol a chosaint agus athrú aeráide agus sochair phoiblí dhomhanda a sheachadadh amhail slándáil bhia, rochtain ar uisce agus ar shláintíocht, slándáil fuinnimh agus imirce.

Is é ceann den dá aidhm sháraitheacha tacaíocht a thabhairt don athrú i dtíortha comhpháirtíochta (tíortha i mbéal forbartha a bhfuil comhaontuithe déanta acu leis an Aontas Eorpach) chun dlús a chur leis an dul chun cinn maidir leis an mbochtaineacht a laghdú agus maidir leSpriocanna Forbartha na Mílaoise de chuid na Náisiún Aontaithe (a bhfuil na Spriocanna Forbartha Inbhuanaithe curtha ina n-áit ó bhí 2016 ann).

Tá súil ag an gCoimisiún go dtiocfaidh líon feabhsuithe as an gClár don Athrú, lena n-áirítear méadú ar mhéid agus ar sciar chabhair AE do na tíortha is mó gátar agus san áit is féidir leis an Aontas Eorpach fíorthionchar a bheith aige (lena n-áirítear stáit leochaileacha).

Is é an aidhm eile cuidiú le fás a chruthú i dtíortha i mbéal forbartha ionas go mbeidh sé d’acmhainn acu iad féin a thógáil amach as an mbochtaineacht. Díreofar an chabhair dá réir sin ar réimsí faoi leith:

• cosaint shóisialta, sláinte, oideachas agus poist;
• an timpeallacht ghnó, imeascadh réigiúnach agus margaí domhanda;
• talmhaíocht agus fuinneamh inbhuanaithe.

Is é ceann de na príomhsmaointe cur chuige AE difreáilte a bheith ann maidir le leithdháileadh agus comhpháirtíochtaí cabhrach chun acmhainní a sheachadadh san áit is mó a dteastaíonn siad, chun an bhochtaineacht a chomhrac. I ngníomh, ciallaíonn sé sin cistí AE a leithdháileadh i leith comhar forbartha de réir

• riachtanais tíre;
• a cumais foinsí eile airgid a ghiniúint (e.g. chun cánacha a ghearradh); agus
• a feidhmíocht i réimsí amhail oideachas nó sláinte.

Tá sé á mholadh ag an gCoimisiún chomh maith go n-ullmhóidh tíortha AE agus an Coimisiún a straitéisí agus a gcláir i gcomhpháirt agus an cúram atá orthu a chinntiú go mbeidh an chabhair a sheachadann AE níos éifeachtúla a roinnt níos fearr eatarthu féin.

Smaoineamh eile is ea scrúdú a dhéanamh ar bhealaí nuálacha chun forbairt a mhaoiniú, amhail “maoiniú measctha” (i.e. deontais agus iasachtaí a mheascadh).

GNÍOMH

Teachtaireacht ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún: An tionchar a bhíonn ag beartas forbartha AE a mhéadú: Clár Oibre don Athrú (COIM(2011) 637 leagan deireanach an 13.10.2011)

Nuashonraithe 27.01.2016