Straitéis an Aontais Eorpaigh maidir le cearta an linbh agus an ráthaíocht Eorpach do leanaí

PRÍOMHPHOINTÍ

Straitéis an Aontais maidir le cearta an linbh

• Tugtar le chéile in aon chreat cuimsitheach amháin leis an straitéis gach ionstraim reachtach, beartas agus maoinithe nua AE maidir le cearta an linbh.
• Forbraítear an straitéis seo ar theachtaireachtaí roimhe seo ón gCoimisiún Eorpach agus ar reachtaíocht agus beartas AE atá ann cheana, amhail clár oibre AE um chearta an linbh.
• Cuireann sé le haidhmeanna Cholún Eorpach na gCeart Sóisialta a bhaint amach.
• Tá an straitéis bunaithe ar Choinbhinsiún na Náisiún Aontaithe um Chearta an Linbh agus cuireann sí le cuspóirí forbartha inbhuanaithe na Náisiún Aontaithe a bhaint amach.
• Moltar léi sraith gníomhaíochtaí spriocdhírithe thar sé réimse tosaíochta théamacha:
  • rannpháirtíocht sa saol polaitiúil agus daonlathach;
  • cuimsiú socheacnamaíoch, sláinte agus oideachas;
  • dul i ngleic le foréigean in aghaidh leanaí agus cosaint leanaí a áirithiú;
  • ceartas a thacaíonn le leanaí;
  • sochaí dhigiteach agus sochaí faisnéise;
  • gné dhomhanda — tacaíocht a thabhairt do leanaí ar fud an domhain, iad a chosaint agus iad a chumhachtú, lena n-áirítear le linn géarchéimeanna agus coimhlintí.
• Chun tacú leis na gníomhaíochtaí, déantar cearta leanaí a phríomhshruthú ar fud bheartais ábhartha uile an Aontais Eorpaigh.
• Soláthraítear maoiniú i gcomhair na ngníomhaíochtaí sin trí roinnt foinsí lena n-áirítear Ciste Sóisialta na hEorpa Plus (CSE+) (féach an achoimre) agus Ciste Forbartha Réigiúnaí na hEorpa (féach an achoimre).

An ráthaíocht Eorpach do leanaí

• Leis an ráthaíocht Eorpach do leanaí comhlánaítear an straitéis maidir le cearta an linbh, agus go háirithe an téama socheacnamaíoch, sláinte agus oideachais.
• Cuirtear i ngníomh leis prionsabal 11 de Cholún Eorpach na gCeart Sóisialta, maidir le cúram leanaí agus tacaíocht do leanaí.
• Baineann sé le leanaí faoi 18 mbliana d’aois atá i mbaol na bochtaineachta nó an eisiaimh shóisialta.
• Leagtar amach léi roinnt príomh-mholtaí do Bhallstáit AE lena n-áirítear:
  • rochtain éifeachtach agus rochtain saor in aisce a sholáthar ar oideachas agus ar chúram luath-óige ar ardchaighdeán, oideachas agus gníomhaíochtaí scoilbhunaithe, aon bhéile sláintiúil amháin ar a laghad gach lá scoile agus cúram sláinte;
  • rochtain éifeachtach ar chothú sláintiúil agus ar thithíocht leordhóthanach a sholáthar;
  • deireadh a chur le timthriallta bochtaineachta agus míbhuntáiste idirghlúine, agus tús áite a thabhairt do leas an linbh;
  • creat beartais a chruthú chun bacainní airgeadais agus neamhairgeadais ar rannpháirtíocht in oideachas agus sa cúram luath-óige, oideachas agus gníomhaíochtaí scoilbhunaithe a shainaithint agus aghaidh a thabhairt orthu, go háirithe do na grúpaí leanaí sin atá faoi mhíbhuntáistí ar leith;
  • Comhordaitheoir Ráthaíochta Leanaí a ainmniú chun faireachán agus comhordú a dhéanamh ar chur chun feidhme;
  • pleananna gníomhaíochta náisiúnta a chur isteach don tréimhse suas go 2030 laistigh de 9 mí ón moladh a ghlacadh.
• Féadfaidh na Ballstáit leas a bhaint as maoiniú AE chun tacú lena ngníomhaíochtaí, go háirithe ón CSE+ agus ó Ionstraim Théarnaimh an Aontais Eorpaigh.