Conarthaí chun ábhar digiteach agus seirbhísí digiteacha a sholáthar

PRÍOMHPHOINTÍ

Raon feidhme

Beidh feidhm ag an treoir maidir le haon chonradh ar faoina bhun a sholáthróidh trádálaí ábhar digiteach nó seirbhís dhigiteach don tomhaltóir, agus a íocfaidh an tomhaltóir an praghas, nó a gheallfaidh sé nó sí an praghas a íoc. Tá feidhm léi freisin i gcás nach n–íocann an tomhaltóir praghas ach go soláthraíonn sé nó sí sonraí pearsanta don trádálaí nó go ngeallann sé nó sí sonraí pearsanta a sholáthar don trádálaí, ach amháin i gcás go ndéanfaidh an trádálaí na sonraí pearsanta a sholáthraíonn an tomhaltóir a phróiseáil go heisiach chun críche an t–ábhar digiteach nó an tseirbhís dhigiteach a sholáthar nó chun go gcomhlíonfaidh an tradálaí ceanglais dlí.

Áirítear le heisceachtaí conarthaí maidir leis na nithe seo a leanas:

• earraí lena bhfuil gnéithe digiteacha (a rialaítear i dTreoir (AE) 2019/771);
• rochtain ar an idirlíon;
• téacsáil (mar shampla SMS), cé is moite de chumarsáid idirphearsanta atá neamhspleách ar uimhreacha;
• cúram sláinte;
• seirbhísí cearrbhachais;
• seirbhísí airgeadais;
• bogearraí a thairgtear faoi shaorcheadúnas agus nó faoi cheadúnas foinse oscailte (i gcás nach n–íoctar aon phraghas agus go n–úsáidtear na sonraí pearsanta a sholáthraíonn an tomhaltóir chun na bogearraí sonracha a fheabhsú agus chuige sin amháin);
• ábhar digiteach mar chuid de léiriú nó d’imeacht, amhail teilgean digiteach cineamatagrafaíochta;
• ábhar digiteach arna sholáthar ag comhlachtaí na hearnála poiblí i gcomhréir le Treoir 2003/98/CE.

Comhréireacht

Ní mór an méid seo a leanas a bheith ag baint le hábhar digiteach nó seirbhísí digiteacha go ginearálta:

• go bhfuil siad i gcomhréir leis an tuairisc, leis an gcainníocht agus leis an gcáilíocht, agus gnéithe eile a bheidh leo amhail feidhmiúlacht, comhoiriúnacht, idir-inoibritheacht, mar a cheanglaítear leis an gconradh;
• go bhfuil siad oiriúnach don chuspóir arna aontú mar chuid den phróiseas conartha;
• gur soláthraíodh iad leis na hoiriúintí, na treoracha agus an cúnamh go léir de réir mar a cheanglaítear leis an gconradh;
• go ndéantar iad a nuashonrú mar a shonraítear sa chonradh;
• go bhfuil siad oiriúnach do na feidhmeanna a mbainfí úsáid as ábhar digiteach nó seirbhís dhigiteach den chineál céanna ina leith de ghnáth;
• go bhfuil na cáilíochtaí agus na gnéithe feidhmíochta (lena n–áirítear feidhmiúlacht, comhoiriúnacht, inrochtaineacht, leanúnachas) leo lena bhféadfadh an tomhaltóir a bheith ag súil le réasún;
• gur soláthraíodh iad le haon oiriúintí agus treoracha lena bhféadfadh an tomhaltóir a bheith ag súil le réasún;
• go gcloíonn siad le haon leagan trialach nó réamhamhairc a chuirfear ar fáil sular tugadh an conradh i gcrích.

Ní mór do thrádálaithe a áirithiú go gcuirfear an tomhaltóir ar an eolas faoi nuashonruithe, lena n–áirítear nuashonruithe slándála, agus go ndéanfar iad a sholáthar dó nó di, rud is gá chun go mbeidh an t–ábhar digiteach nó an tseirbhís dhigiteach comhlíontach i gcónaí. Tá rialacha níos mionsonraithe sa treoir freisin maidir leis an oibleagáid nuashonruithe a sholáthar.

Dliteanas trádálaí

• Tá an trádálaí faoi dhliteanas i leith:
  • aon mhainneachtain soláthair maidir leis an ábhar digiteach nó an tseirbhís dhigiteach;
  • aon easpa comhréireachta maidir leis an ábhar digiteach nó an tseirbhís dhigiteach tráth an tsoláthair agus a éireoidh follasach laistigh de dhá bhliain ar a laghad. Má éiríonn an easpa comhréireachta follasach le linn na chéad bhliana, ní gá don tomhaltóir a chruthú go raibh sé ann tráth an tsoláthair.
• I gcás ina soláthrófar an t–ábhar digiteach nó an tseirbhís dhigiteach go leanúnach, beidh an trádálaí faoi dhliteanas i leith aon easpa comhréireachta a thagann chun solais le linn na tréimhse soláthair.

Leigheasanna

• I gcás nár sholáthair an tradálaí an t–ábhar digiteach nó an tseirbhís dhigiteach gan moill mhíchuí nó laistigh de thréimhse ama arna comhaontú, beidh an tomhaltóir i dteideal an conradh a fhoirceannadh.
• I gcás easpa comhréireachta, beidh an tomhaltóir i dteideal an t–ábhar digiteach nó an tseirbhís dhigiteach a bheith curtha chun comhréireachta, (ach amháin dá mbeadh sé sin dodhéanta nó dá gcuirfeadh sé sin costais dhíréireacha ar an trádálaí). I gcás go mainneoidh tradálaí é sin a dhéanamh, beidh an tomhaltóir i dteideal laghdú comhréireach ar phraghas a fháil, nó an conradh a fhoirceannadh.
• Ar fhoirceannadh an chonartha, ní mór don trádálaí an tomhaltóir a chúiteamh go hiomlán ach amháin i gcás tréimhsí nuair a bhí an t–ábhar digiteach nó an tseirbhís dhigiteach a soláthraíodh go leanúnach comhlíontach.

Oibleagáidí agus cearta i gcás ina ndéanfar an conradh a fhoirceannadh

• Tar éis fhoirceannadh an chonartha, ní mór do thrádálaithe oibleagáidí maidir le sonraí pearsanta Rialachán (AE) 2016/679 ((An Rialachán Ginearálta maidir le Cosaint Sonraí) a chomhlíonadh. Faoi choinníollacha áirithe, ní mór do thrádálaithe:
  • staonadh freisin ó úsáid a bhaint as aon ábhar seachas sonraí pearsanta agus a chuir an tomhaltóir ar fáil nó a chruthú sé nó sí agus úsáid á baint aige nó aici as an ábhar digiteach nó an tseirbhís dhigiteach;
  • ligean don tomhaltóir freisin an t–ábhar digiteach sin a aisghabháil saor in aisce, gan bac ón trádálaí, laistigh de thréimhse réasúnta ama.
• Tar éis fhoirceannadh an chonartha, ní mór do thomhaltóirí staonadh ó úsáid a bhaint as an ábhar digiteach nó an tseirbhís dhigiteach agus ón ábhar nó an tseirbhís sin a chur ar fáil do thríú páirtithe.
• Ní mór do na Ballstáit a áirithiú gur ann do mhodhanna éifeachtacha chun comhlíonadh na Treorach seo a áirithiú.

Comhlánaítear leis an treoir Treoir (AE) 2019/771 maidir le conarthaí le haghaidh díolacháin earraí.