(1)

Bunaítear Lárionad Eolaíochta agus Teicniúla na hEorpa (“ETSC”) laistigh d’Ard-Stiúrthóireacht Gnóthaí Eacnamaíocha agus Airgeadais an Choimisiúin (AS ECFIN), i gcomhréir le hAirteagal 1 de Chinneadh 2005/37/CE ón gCoimisiún (3).

(2)

De bhun Airteagal 7(2) de Rialachán (CE) Uimh. 1338/2001 ón gComhairle (4), tá na húdaráis inniúla náisiúnta, an Coimisiún agus an Banc Ceannais Eorpach le comhoibriú chun an euro a chosaint ar ghóchumadh, trí fhaisnéis a mhalartú agus trí chúnamh frithpháirteach a áirithiú.

(3)

Déanann ETSC a chuid cúraimí sa Bhruiséil. Cuirtear cuid dá chúraimí i gcrích in Ionad Náisiúnta Anailíse Bonn na Fraince, arna bunú laistigh den Mhionta Francach in Pessac.

(4)

De bhun Airteagal 2 de Chinneadh 2005/37/CE, tá ETSC le cur chun feidhme na nósanna imeachta fíordheimhnithe a chomhordú mar a cheanglaítear le Rialachán (AE) Uimh. 1210/2010 ó Pharlaimint na hEorpa agus ón gComhairle (5).

(5)

Úsáideann ETSC an trealamh teicniúil atá ar fáil chun réamhanailís neamhscriosach a dhéanamh ar bhoinn euro ghóchumtha. Áirítear leis sin inter alia anailís mhicreascópach, amhairc agus theicniúil ar bhoinn euro ghóchumtha arna n-urghabháil ag na Ballstáit, na doiciméid theicniúla ábhartha a ullmhú agus taighde a dhéanamh trí bhunachair sonraí thiomnaithe TF a úsáid chun saintréithe comhchoiteanna a shainaithint atá ag catagóirí boinn euro ghóchumtha atá ann cheana agus atá aicmithe cheana.

(6)

Tá sé riachtanach go ndéanfaidh ETSC ardanailís neamhscriosach freisin d’fhonn boinn euro ghóchumtha ardcháilíochta a shainaithint ar bhealach tráthúil, a ngnéithe teicniúla a shainiú agus measúnú a dhéanamh go pras ar an leibhéal bagartha a bhaineann leo. Le hardanailís neamhscriosach den chineál sin, chuirfí ar chumas ETSC na cinntí beartais iomchuí, tráthúla agus éifeachtacha a dhéanamh chun dul i ngleic le bagairtí atá ag teacht chun cinn agus chun údaráis forfheidhmithe dlí a chur ar an eolas faoi bhagairtí atá ag teacht chun cinn mar chuid den straitéis frith-ghóchumtha. Chuige sin, ba cheart do ETSC a bheith in ann an trealamh teicniúil iomchuí a fháil chun ardanailís neamhscriosach den sórt sin a dhéanamh. Faoi na rialacháin airgeadais is infheidhme, ba cheart na speansais a bhaineann le trealamh teicniúil a chuirtear ar fáil agus le pearsanra ETSC a mhuirearú ar bhuiséad ginearálta an Aontais Eorpaigh.

(7)

Déanann ETSC anailís chomhlántach neamhscriosach ar an Mionta Francach chun aicmiú cineálacha nua boinn euro ghóchumtha a thabhairt chun críche. Ar bhonn ad hoc, déanann ETSC anailís scriosach chomhlántach freisin trí úsáid a bhaint as trealamh teicniúil speisialaithe ag an Mionta Francach.

(8)

Dá bhrí sin, ba cheart Cinneadh 2005/37/CE a leasú dá réir,