(1)

An 12 Meitheamh 2020, thionscain an Coimisiún Eorpach (“an Coimisiún”) imscrúdú frith-fhóirdheontais i ndáil le táirgí comhréidhe teorollta áirithe déanta as iarann, cruach neamh-chóimhiotail nó cruach cóimhiotail eile (“an táirge faoi imscrúdú”) ar táirgí de thionscnamh na Tuirce iad. D’fhoilsigh an Coimisiún fógra tionscnaimh in Iris Oifigiúil an Aontais Eorpaigh (“an Fógra Tionscnaimh”) (2).

(2)

Is éard atá sa táirge faoi imscrúdú táirgí comhréidhe teorollta áirithe, ar táirgí iarainn, cruach neamh-chóimhiotail nó cruach cóimhiotail eile iad, bíodh iad i gcornaí nó ná bíodh (lena n-áirítear táirgí “gearrtha san fhad iomchuí” agus “stiallacha cúnga”) gan oibriú breise déanta orthu seachas a bheith teorollta, gan a bheith cumhdaithe, plátáilte ná brataithe, agus ar táirgí de thionscnamh na Tuirce iad.

Ní chumhdaítear na táirgí seo a leanas leis an imscrúdú seo:

(3)

Thionscain an Coimisiún an t-imscrúdú tar éis do Chomhlachas Eorpach na Cruach (“Eurofer” nó “an gearánach”) gearán a dhéanamh thar ceann tháirgeoirí an Aontais ar táirgeoirí iad a ghineann níos mó ná 25 % de tháirgeacht iomlán an Aontais den táirge faoi imscrúdú. Ba leor an fhianaise a bhí sa ghearán i leith fóirdheonú agus i leith na díobhála is toradh air sin chun údar cuí a thabhairt le tionscnamh an imscrúdaithe.

(4)

San fhógra tionscnaimh, d’iarr an Coimisiún ar na páirtithe leasmhara teagmháil a dhéanamh leis chun a bheith rannpháirteach san imscrúdú. Ina theannta sin, thug an Coimisiún fógra go sonrach do na gearánaigh, do tháirgeoirí aitheanta eile ón Aontas, do na táirgeoirí onnmhairiúcháin aitheanta agus d’údaráis na Tuirce, d’allmhaireoirí, soláthróirí agus úsáideoirí aitheanta, agus do thrádálaithe chomh maith le comhlachais arb eol iad a bheith bainteach le tionscnamh an imscrúdaithe agus d’iarr sé orthu a bheith rannpháirteach.

(5)

Bhí deis ag na páirtithe leasmhara uile barúil a thabhairt maidir le tionscnamh an imscrúdaithe agus éisteacht a iarraidh leis an gCoimisiún agus/nó leis an Oifigeach Éisteachta i nósanna imeachta trádála laistigh den tréimhse ama a leagtar síos san fhógra tionscnaimh.

(6)

An 24 Márta 2021, chuir an gearánach in iúl don Choimisiún gur tharraing sé siar an gearán.

(7)

Faoi Airteagal 14(1) de Rialachán (AE) 2016/1037, is féidir nósanna imeachta a fhoirceannadh i gcás ina ndéanfar an gearán a tharraingt siar, ach amháin mura mbeadh an foirceannadh sin chun leas an Aontais.

(8)

Níor tháinig aon chúinse chun cinn le linn an imscrúdaithe a léirigh go mbeadh sé chun leas an Aontais leanúint ar aghaidh leis an gcás.

(9)

Dá bhrí sin, an nós imeachta frith-fhóirdheontais i ndáil le hallmhairí táirgí comhréidhe teorollta áirithe déanta as iarann, cruach neamh-chóimhiotail nó cruach cóimhiotail eile ar táirgí de thionscnamh na Tuirce iad, tháinig an Coimisiún ar an gconclúid gur cheart an nós imeachta sin a fhoirceannadh.

(10)

Cuireadh na páirtithe leasmhara ar an eolas dá réir sin agus tugadh deis dóibh a mbarúlacha a chur in iúl. Ní bhfuarthas aon bharúil.

(11)

Tá an Cinneadh seo i gcomhréir leis an tuairim ón gCoiste arna bhunú le hAirteagal 15(1) de Rialachán (AE) 2016/1036 ó Pharlaimint na hEorpa agus ón gComhairle (3),