(1)

Foráiltear le Rialachán (AE) 2015/2283 nach bhféadfar ach bianna núíosacha a údaraítear agus atá curtha ar liosta an Aontais de bhianna núíosacha a chur ar an margadh laistigh den Aontas.

(2)

De bhun Airteagal 8 de Rialachán (AE) 2015/2283, bunaíodh liosta Aontais de bhianna núíosacha le Rialachán Cur Chun Feidhme (AE) 2017/2470 ón gCoimisiún (2).

(3)

Ar liosta an Aontais a leagtar amach san Iarscríbhinn a ghabhann le Rialachán Cur Chun Feidhme (AE) 2017/2470 áirítear eastóscán próitéine ó dhuáin muc mar bhia núíosach údaraithe.

(4)

De bhun Airteagal 5 de Rialachán (CE) Uimh. 258/97 ó Pharlaimint na hEorpa agus ón gComhairle (3), an 29 Feabhra 2012 thug an chuideachta Sciotec Diagnostic Technologies, GmbH fógra don Choimisiún go raibh rún aici eastóscán próitéine ó dhuáin muc a chur ar an margadh mar chomhábhar bia núíosaigh atá le húsáid i mbianna chun críoch speisialta míochaine mar a shainmhínítear in Airteagal 2 de Rialachán (AE) Uimh. 609/2013 ó Pharlaimint na hEorpa agus ón gComhairle (4), agus i bhforbhianna mar a shainmhínítear in Airteagal 2 de Threoir 2002/46/CE ó Pharlaimint na hEorpa agus ón gComhairle (5). Ar bhonn an fhógra sin, áiríodh eastóscán próitéine ó dhuáin muc ar liosta an Aontais de bhianna núíosacha, nuair a cuireadh an liosta sin ar bun.

(5)

Le Rialachán Cur Chun Feidhme (AE) 2020/973 ón gCoimisiún (6), leasaíodh sonraíochtaí an bhia núíosaigh eastóscán próitéine ó dhuáin muc chun táibléid a bhfuil bratú eintreach orthu a áireamh mar fhoirm cheadaithe d’eastóscán próitéine ó dhuáin muc atá le húsáid i bhforbhianna mar a shainmhínítear i dTreoir 2002/46/CE ó Pharlaimint na hEorpa agus ón gComhairle agus i mbianna chun críoch speisialta míochaine mar a shainmhínítear i Rialachán (AE) Uimh. 609/2013, sa bhreis ar na millíní imchochlaithe a bhfuil bratú eintreach orthu a údaraítear.

(6)

An 11 Iúil 2022, chuir an chuideachta Bioiberica, S.A.U (‘an t-iarratasóir’) iarratas faoi bhráid an Choimisiúin i gcomhréir le hAirteagal 10(1) de Rialachán (AE) 2015/2283 ar athrú ar shonraíochtaí an bhia núíosaigh eastóscán próitéine ó dhuáin muc chun próiseas táirgthe a áireamh sna sonraíochtaí, próiseas ina n-úsáidfí sraith beart níocháin aicéatóin ar na duáin muc, agus ina dhiaidh sin bearta teas-triomaithe, meilt agus ciathrú, rud a mbeadh foirm dheiridh phúdrach bhán-donn den bhia núíosach mar thoradh air agus a fhoirmleofar i gcapsúil a bhfuil bratú eintreach orthu nó i millíní imchochlaithe a bhfuil bratú eintreach orthu nó i dtáibléid a bhfuil bratú eintreach orthu chun an áit a ndéantar an díleá go gníomhach a bhaint amach. D’iarr an t-iarratasóir freisin go n-úsáidfí Crómatagrafaíocht Leachta Ultra-Ardfheidhmíochta nasctha le Brath Fluaraiseach (‘UHPLC-FLD’) mar mhodh breise leis an modh a údaraítear faoi láthair chun gníomhaíocht einsímeach na hocsaíodáise dé-aimín atá sa phróitéin a eastósctar as duáin na muc a chinneadh. Is é toradh an mhodha sin go sloinntear gníomhaíocht na hocsaíodáise dé-aimín in aonaid tomhais atá éagsúil leis na haonaid tomhais a údaraítear faoi láthair. Údar amháin a thug an t-iarratasóir lena iarraidh go gcuirfí próiseas táirgthe nua san áireamh is ea go bhfuil a phróiseas táirgthe láidir agus comhsheasmhach ó thaobh bia núíosach a tháirgeadh i gcomhréir leis na sonraíochtaí údaraithe ach nach bhfuil sé cosanta ag paitinní tríú páirtí, ós rud é go bhfuil an próiseas táirgthe bia núíosaigh a údaraítear faoi láthair ag cur cosc ar an iarratasóir agus ar oibreoirí gnólachtaí bia eile úsáid a bhaint as. Údar eile a thug an t-iarratasóir lena iarraidh go n-úsáidfí modh UHPLC-FLD chun gníomhaíocht na hocsaíodáise dé-aimín a thomhas is ea gur modh aitheanta é an modh sin atá éasca a bhailíochtú agus a chur chun feidhme ach atá chomh hiontaofa céanna leis an modh a údaraítear faoi láthair, is é sin modh na Measúnachta Raideastósctha.

(7)

Measann an Coimisiún nach dócha go mbeidh tionchar ag an nuashonrú a iarradh ar liosta an Aontais ar shláinte an duine agus nach gá don Údarás Eorpach um Shábháilteacht Bia (‘an tÚdarás’) meastóireacht sábháilteachta a dhéanamh i gcomhréir le hAirteagal 10(3) de Rialachán (AE) 2015/2283. Is é an toradh a bhíonn ar an bpróiseas táirgthe ina n-úsáidtear modh an níocháin aicéatóin agus bearta teas-triomaithe, meilt agus criathrú ina dhiaidh sin go dtáirgtear bia núíosach a chomhlíonann na sonraíochtaí údaraithe uile agus níl de dhifríocht ann ach an fhoirm (púdar) agus an dath (bán-donn). Ní mheastar go mbeidh tionchar ag na hathruithe ar fhoirm fhisiceach agus ar chuma an bhia núíosaigh a fhaightear tríd mhodh an níocháin aicéatóin ar shábháilteacht an bhia núíosaigh má urramaítear na coinníollacha úsáide údaraithe agus na sonraíochtaí. Tá úsáid na gcapsúl údaraithe faoi láthair nuair is i bhfoirm millíní a bhfuil bratú eintreach orthu é an bia núíosach, agus ní dócha go n-athróidh úsáid na gcapsúl i bhfoirm phúdrach an bhia núíosaigh próifíl sábháilteachta an bhia núíosaigh údaraithe sin ach oiread.

(8)

Údaraítear aicéatón mar thuaslagóir a úsáidtear in ullmhú bianna le Treoir 2009/32/CE ó Pharlaimint na hEorpa agus ón gComhairle (7), agus rinne an tÚdarás leibhéil suas le 5 000 mg/kg d’aicéatón a mheasúnú i gcomhthéacs an mheasúnaithe sábháilteachta ar an iarratas ar chlóiríd riobóisíde nicitíonaimíde mar bhia núíosach (8), lenar bhain úsáidí beartaithe agus leibhéil iontógála a bhfuil coinne léi dá bharr atá comhionann le húsáidí agus leibhéil iontógála an eastóscáin próitéine ó dhuáin mhuc. Mar sin féin, measann an Coimisiún, mar ghné bhreise athdhearbhúcháin sábháilteachta, gur cheart aicéatón a chur mar pharaiméadar le sonraíochtaí an eastóscáin próitéine ó dhuáin muc a tháirgtear trí phróiseas táirgthe an níocháin aicéatóin, ar na leibhéil chéanna (≤ 5 000 mg/kg) a ndearna an tÚdarás measúnú orthu agus a áirítear i sonraíochtaí na clóiríde riobóisíde nicitíonaimíde a údaraítear le Rialachán Cur Chun Feidhme (AE) 2020/16 ón gCoimisiún (9).

(9)

Má chuirtear an modh UHPLC-FLD ar liosta an Aontais chun gníomhaíocht einsímeach na hocsaíodáise dé-aimín a chinneadh, agus maidir le sloinneadh na gníomhaíochta a thagann as sin in aonaid tomhais éagsúla, sa bhreis ar na haonaid mhodha agus tomhais a údaraítear faoi láthair, measann an Coimisiún freisin go dtabharfar modh eile d’oibreoirí gnólachtaí bia agus d’údaráis forfheidhmithe na mBallstát chun feidhmíocht agus cáilíocht an bhia núíosaigh a chuirtear ar an margadh a fhíorú.

(10)

Is leor na forais atá le fáil san fhaisnéis a sholáthraítear san iarratas chun a shuí go bhfuil na hathruithe ar shonraíochtaí an bhia núíosaigh eastóscán próitéine ó dhuáin muc i gcomhréir le coinníollacha Airteagal 12 de Rialachán (AE) 2015/2283 agus gur cheart iad a fhormheas.

(11)

Dá bhrí sin, ba cheart an Iarscríbhinn a ghabhann le Rialachán Cur Chun Feidhme (AE) 2017/2470 a leasú dá réir.

(12)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,