(1)

Il-Kunsill, bir-Regolament (KE) Nru 1015/94 (2), impona dazji definittivi ta' anti-dumping fuq l-importazzjoni ta’ sistemi ta’ kameras tat-televiżjoni li joriġinaw mill-Ġappun.

(2)

Fl-Artikolu 1(3)(e) tar-Regolament Nru 1015/94, il-Kunsill speċifikament eskluda mill-kamp ta’ applikazzjoni tad-dazju anti-dumping, sistemi ta’ kameras elenkati fl-Anness għal dak ir-Regolament (“l-Anness”), li jirrappreżentaw sistemi ta’ kameras professjonali ta’ livell għoli li teknikament jaqgħu fit-tifsira ta’ prodott taħt l-Artikolu 1(2) tar-Regolament (KE) Nru 1015/94, iżda li ma jistgħux jitqiesu bħala sistemi ta’ kameras għat-televiżjoni.

(3)

F’Ottubru 1995, il-Kunsill, bir-Regolament (KE) Nru 2474/95 (3), emenda r-Regolament (KE) Nru 1015/94, b’mod partikolari rigward it-tifsira ta’ prodott simili u rigward ċerti mudelli ta’ sistemi ta’ kameras professjonali li huma espliċitament eżentati mid-dazju anti-dumping definittiv.

(4)

F’Ottubru 1997, il-Kunsill, bir-Regolament (KE) Nru 1952/97 (4), emenda r-rati tad-dazju anti-dumping definittiv għal żewġ kumpanniji konċernati, jiġifieri s-Sony Corporation u l-Ikegami Tsushinki Co. Ltd., skond l-Artikolu 12 tar-Regolament bażiku. Barra minn hekk, il-Kunsill speċifikament eskluda mill-kamp ta’ applikazzjoni tad-dazju anti-dumping ċerti mudelli ġodda ta’ sistemi ta’ kameras professjonali billi żiedhom ma’ l-Anness.

(5)

F’Jannar 1999 u f’Jannar 2000, il-Kunsill, bir-Regolamenti (KE) Nru 193/1999 (5) u (KE) Nru 176/2000 (6), emenda r-Regolament (KE) Nru 1015/94 billi żied ċerti mudelli suċċessuri ta’ sistemi ta’ kameras professjonali ma’ l-Anness u għalhekk eskluda lil dawk mill-applikazzjoni tad-dazju anti-dumping definittiv.

(6)

F’Settembru 2000, il-Kunsill, bir-Regolament (KE) Nru 2042/2000 (7), ikkonferma d-dazji anti-dumping definittivi imposti bir-Regolament (KE) Nru 1015/94 skond l-Artikolu 11(2) tar-Regolament bażiku.

(7)

F’Jannar 2001 u f’Mejju 2001, il-Kunsill, bir-Regolamenti (KE) Nru 198/2001 (8) u (KE) Nru 951/2001 (9), emenda r-Regolament (KE) Nru 2042/2000 billi żied ċerti mudelli suċċessuri ta’ sistemi ta’ kameras professjonali ma’ l-Anness għar-Regolament (KE) Nru 2042/2000 u għalhekk eskludihom mill-applikazzjoni tad-dazju anti-dumping definittiv.

(8)

F’Settembru 2001, wara reviżjoni interim skond l-Artikolu 11(3) tar-Regolament bażiku, il-Kunsill, bir-Regolament (KE) Nru 1900/2001 (10) ikkonferma l-livell tad-dazju anti-dumping definittiv impost bir-Regolament (KE) Nru 2042/2000 dwar importazzjonijiet ta’ TCS mill-produttur esportatur Hitachi Denshi Ltd.

(9)

F’Settembru 2002 u f’April 2004, il-Kunsill, bir-Regolamenti (KE) Nru 1696/2002 (11) u (KE) Nru 825/2004 (12), emenda r-Regolament (KE) Nru 2042/2000 billi żied ċerti mudelli suċċessuri ta’ sistemi ta’ kameras professjonali ma’ l-Anness għar-Regolament (KE) Nru 2042/2000 u għalhekk eskludihom mill-applikazzjoni tad-dazju anti-dumping definittiv.

(10)

F’Jannar 2005, il-Kunsill, bir-Regolament (KE) Nru 84/2005 emenda r-Regolament (KE) Nru 2042/2000 billi żied żewġ mudelli ta’ sistemi ta’ kameras professjonali ma’ l-Anness għar-Regolament (KE) Nru 2042/2000 u għalhekk eskludihom mill-applikazzjoni tad-dazju anti-dumping definittiv.

(11)

Tliet produtturi esportaturi Ġappuniżi, notevolment l-Ikegami Tsushinki Co. Ltd (“Ikegami”), il-Hitachi Denshi (Europa) GmbH (“Hitachi”) u l-Matsushita informaw lill-Kummissjoni li huma kellhom l-intenzjoni li jintroduċu mudelli ġodda ta’ sistemi ta’ kameras professjonali fis-suq Komunitarju u talbu lill-Kummissjoni biex iżżid dawn il-mudelli l-ġodda, inklużi l-aċċessorji tagħhom, ma’ l-Anness għar-Regolament (KE) Nru 2042/2000 u għalhekk teżentahom mill-kamp ta’ applikazzjoni tad-dazji anti-dumping.

(12)

Il-Kummissjoni infurmat b’dan lill-industrija Komunitarja u bdiet investigazzjoni limitata biex tiddetermina jekk il-prodotti kkunsidrati jaqgħux taħt il-kamp ta’ applikazzjoni tad-dazji anti-dumping u jekk il-parti operattiva tar-Regolament (KE) Nru 2042/2000 għandhiex tkun għaldaqstant emendata.

(13)

It-talbiet għal eżenzjoni kienu riċevuti għall-mudelli li ġejjin ta’ sistemi ta’ kameras, fornuti bl-informazzjoni teknika rilevanti:

Il-mudelli kollha kienu ppreżentati bħala suċċessuri għal mudelli diġà esklużi mill-miżuri anti-dumping fis-seħħ.

(14)

Instab li l-heads ta’ kameras HC-500 u HC-500W jaqgħu taħt id-deskrizzjoni ta’ prodott ta’ l-Artikolu 1(2)(a) tar-Regolament (KE) Nru 2042/2000. Madankollu, dawn il-mudelli huma l-aktar użati għal applikazzjonijiet professjonali. L-industrija Komunitarja stqarret li dawn il-heads ta’ kameras jistgħu jintużaw għal finijiet ta’ xandir f’rabta mas-sistema triax korrispondenti u/jew adapter triax. Madankollu, abbażi ta’ l-informazzjoni disponibbli u simili għall-mudelli predeċessuri tagħha, instab li l-heads ta’ kameras HC-500 u HC-500W mhumiex mibjugħin mas-sistema triax jew adapter korrispondenti fis-suq Komunitarju. Konsegwentement, f’dan is-suq, dawn il-mudelli ma kinux jintużaw bħala kameras għax-xandir fit-tifsira tar-Regolament (KE) Nru 2042/2000. Għalhekk, skond il-prattika preċedenti ta’ l-istituzzjoni Komunitarja, kien konkluż li dawn il-kameras għandhom jitqiesu bħala sistemi ta’ kameras professjonali li jaqgħu taħt it-tifsira ta’ l-Artikolu 1(3)(e) tar-Regolament (KE) Nru 2042/2000. Bħala riżultat, dawn il-mudelli għandhom ikunu esklużi mill-kamp ta’ applikazzjoni tal-miżuri anti-dumping definittivi u miżjudin ma’ l-Anness għar-Regolament (KE) Nru 2042/2000.

(15)

Skond il-prattika stabbilita ta’ l-istituzzjonijiet Komunitarji, dawn il-mudelli għandhom ikunu eżentati mid-dazju anti-dumping mid-data ta’ l-irċevuta mis-servizzi tal-Kummissjoni tat-talba rilevanti għal eżenzjoni. Għalhekk, l-importazzjonijiet kollha tal-kameras li ġejjin importati fi jew wara t-28 ta’ Ottubru 2004 għandhom ikunu eżentati mid-dazju anti-dumping minn din id-data:

Ikegami — Heads ta’ kameras HC-500 u HC-500W;

(16)

Instab li l-Head ta’ kamera V-35, l-istazzjon bażi RU-Z35 u l-adapters CA-Z35 u EA-Z35 jaqgħu fid-deskrizzjoni ta’ prodott ta’ l-Artikolu 1(2)(a) tar-Regolament (KE) Nru 2042/2000. Madankollu, huma l-aktar użati għal applikazzjonijiet professjonali u mhumiex mibjugħin mas-sistema triax jew adapter korrispondenti fis-suq Komunitarju. Għalhekk, kien konkluż li huma għandhom jitqiesu bħala sistema ta’ kamera professjonali li taqa’ taħt id-definizzjoni ta’ l-Artikolu 1(3)(e) tar-Regolament (KE) Nru 2042/2000. Bħala riżultat, din is-sistema (head, stazzjon bażi u adapters) u l-aċċessorji tagħha għandhom ikunu esklużi mill-kamp ta’ applikazzjoni tal-miżuri anti-dumping definittivi u miżjudin ma’ l-Anness għar-Regolament (KE) Nru 2042/2000.

(17)

Skond il-prattika stabbilita ta’ l-istituzzjonijiet Komunitarji, din is-sistema ta’ kamera għat-televiżjoni għandha tkun eżentata mid-dazju anti-dumping mid-data ta’ l-irċevuta mis-servizzi tal-Kummissjoni tat-talba rilevanti għal eżenzjoni. Għalhekk, l-importazzjonijiet kollha tal-kamera li ġejja u l-aċċessorji tagħha importati fi jew wara s-27 ta’ Jannar 2005 għandhom ikunu eżentati mid-dazju anti-dumping minn din id-data:

(18)

Instab li l-head ta’ kamera AW-E860L kienet kważi identika għall-mudelli predeċessuri tagħha diġà elenkati fl-Anness għar-Regolament (KE) Nru 2042/2000. Il-mudell il-ġdid kien biss aġġornament tekniku rigward il-ħtiġiet ambjentali ġodda fil-Komunità. Għalhekk, kien konkluż li dan il-mudell għandu jkun eskluż mill-kamp ta’ applikazzjoni tal-miżuri anti-dumping eżistenti.

(19)

Skond il-prattika stabbilita ta’ l-istituzzjonijiet Komunitarji, din is-sistema ta’ kamera tat-televiżjoni għandha tkun eżentata mid-dazju anti-dumping mid-data ta’ l-irċevuta mis-servizzi tal-Kummissjoni tat-talba rilevanti għal eżenzjoni. Għalhekk, l-importazzjonijiet kollha tal-kamera li ġejja importati fi jew wara l-10 ta’ Mejju 2005 għandhom ikunu eżentati mid-dazju anti-dumping minn din id-data:

Matsushita — Head ta’ kamera AW-E860L.

(20)

Il-Kummissjoni infurmat lill-industrija Komunitarja u lill-esportaturi tat-TCS bis-sejbiet tagħha u pprovdiethom b’opportunità biex jippreżentaw il-fehmiet tagħhom. L-ebda parti ma oġġezzjonat għas-sejbiet tal-Kummissjoni.

(21)

Abbażi ta’ dan ta’ qabel, ir-Regolament (KE) Nru 2042/2000 għandu jkun għaldaqstant emendat,