Il-Kapaċità Militari tal-Ippjanar u t-Tmexxija tal-UE

PUNTI EWLENIN

Id-deċiżjoni tistabbilixxi l-Kapaċità Militari tal-Ippjanar u t-Tmexxija (MPCC) fi ħdan l-iStat Maġġur tal-UE (EUMS). L-MPCC tifforma parti mill-implimentazzjoni tal-Istrateġija Globali tal-UE għas-sigurtà u d-difiża.

L-MPCC ser tipprovdi appoġġ lill-kmandant tal-missjonijiet militari mhux eżekuttivi tal-UE — operazzjonijiet mhux ta’ ġlied f’pajjiżi mhux tal-UE.

Bħalissa, l-UE għandha 3 missjonijiet bħal dawn, missjonijiet ta’ taħriġ fi:

• s-Somalja;
• r-Repubblika Ċentru-Afrikana;
• l-Mali.

L-irwol tal-MPCC

L-MPCC tipprovdi struttura statika, ta’ kmand u ta’ kontroll barra mill-qasam fil-livell militari strateġiku. Hija responsabbli għall-ippjanar operattiv u l-imġiba ta’ missjonijiet mhux eżekuttivi. Dan jinkludi l-bini, it-tnedija, is-sostenn u l-irkupru tal-forzi tal-UE.

Struttura u responsabbiltà

L-MPCC hija stabbilita fi ħdan l-Istat Maġġur tal-UE, li huwa parti mis-SEAE. Ser taħdem b’mod konġunt u tikkoordina mal-Kapaċità Ċivili tal-Ippjanar u t-Tmexxija.

Id-Direttur Ġenerali tal-EUMS huwa wkoll id-Direttur tal-MPCC. Huwa għandu numru ta’ responsabbiltajiet li jinkludu:

• il-kmand u l-kontroll tat-3 missjonijiet tat-taħriġ attwali u missjonijiet militari mhux eżekuttivi futuri possibbli oħra;
• l-iskjerament u l-irkupru tal-missjonijiet kif ukoll l-ibbaġitjar, l-awditjar u r-rappurtar ġenerali.

Kontroll politiku

Id-direttur tal-MPCC jirrapporta għand il-Kumitat Politiku u ta’ Sigurtà, li huwa magħmul minn ambaxxaturi tal-pajjiżi tal-UE u huwa bbażat fi Brussell. Se tinforma wkoll lill-Kumitat Militari tal-UE.

Finanzjament

L-operazzjonijiet huma ffinanzjati permezz ta’ Athena, mekkaniżmu tal-UE biex jiffinanzja operazzjonijiet militari jew ta’ difiża tal-UE.