Miżuri ristrettivi kontra ISIL/Da’esh u Al-Qaeda

PUNTI EWLENIN

Ir-Regolament (KE) Nru 881/2002

• Ir-regolament jeħtieġ li l-fondi u r-riżorsi ekonomiċi kollha li jappartjenu lil, huma proprjetà ta’, miżmuma jew ikkontrollati, direttament jew indirettament, minn persuni, entitajiet, korpi jew gruppi elenkati fl-Anness I u l-Anness Ia tiegħu, inkluż minn parti terza li taġixxi f’isimhom jew fid-direzzjoni tagħhom, jiġu ffriżati.
• Ma jistgħux isiru disponibbli fondi jew riżorsi ekonomiċi, b’mod dirett jew indirett, lil jew għall-benefiċċju ta’ persuni fiżiċi jew ġuridiċi, entitajiet, korpi jew gruppi elenkati fl-Anness I. Din il-projbizzjoni hija relatata wkoll ma’ fondi u riżorsi ekonomiċi użati għall-provvista ta’ hosting tal-Internet u servizzi relatati użati għall-appoġġ ta’ dawn il-persuni, għall-ħlas ta’ fidwa jew għall-kummerċ dirett jew indirett ta’ prodotti taż-żejt, raffineriji modulari u materjal relatat inklużi sustanzi kimiċi u lubrikanti, u riżorsi naturali oħra.

Deċiżjoni (PESK) 2016/1693 u Regolament (UE) 2016/1686

F’Settembru 2016, il-Kunsill tal-Unjoni Ewropea adotta deċiżjoni u regolament li jippermettu lill-UE, għall-ewwel darba, tapplika sanzjonijiet b’mod awtonomu għal ISIL jew Al-Qaeda u individwi, gruppi, impriżi jew entitajiet li jappoġġjawhom. Qabel, is-sanzjonijiet setgħu jiġu applikati biss għal persuni u entitajiet elenkati min-Nazzjonijiet Uniti jew mill-Istati Membri tal-UE li jaġixxu individwalment. Dawn iż-żewġ atti ġew emendati maż-żmien u:

• jipprojbixxu l- provvista, il-bejgħ, it-trasferiment jew l-esportazzjoni diretti jew indiretti ta’ armi jew ta’ tagħmir militari relatat tat-tipi kollha, inklużi:
  • armi u munizzjon,
  • vetturi u tagħmir militari,
  • tagħmir u partijiet tal-bdil paramilitari;
• jipprojbixxu l-provvista ta’ assistenza teknika, servizzi ta’ senserija u servizzi oħra relatati ma’ attivitajiet militari u mal-forniment, il-manifattura, il-manutenzjoni u l-użu ta’armi u ta’ tagħmir militari relatat;
• jipprojbixxu l-provvista ta’ għajnuna ta’ finanzjament jew finanzjarja relatata ma’ attivitajiet militari, inklużi b’mod partikolari:
  • għotjiet, self u assigurazzjoni ta’ kreditu għall-esportazzjoni,
  • assigurazzjoni u riassigurazzjoni għal kwalunkwe bejgħ, provvista, trasferiment jew esportazzjoni ta’ armi u ta’ tagħmir militari relatat,
  • assistenza teknika relatata, servizzi ta’ senserija u servizzi oħra b’mod dirett jew indirett lil kwalunkwe individwu, grupp, impriża jew entità;
• jintroduċu projbizzjoni ta’ vvjaġġar fuq individwi:
  • l-Anness tad-deċiżjoni jistipula l-lista ta’ individwi li l-Istati Membri għandhom iwaqqfuhom milli jidħlu jew jgħaddu mit-territorji tagħhom,
  • l-Anness jista’ jiġi emendat b’deċiżjoni unanima tal-Kunsill;
• jintroduċi ffriżar tal-assi fuq l-individwi u l-kumpaniji li huma identifikati bħala assoċjati ma’ ISIL jew Al-Qaeda:
  • L-Anness I tar-regolament jelenka l-individwi, il-kumpaniji, l-entitajiet u l-korpi li l-fondi u r-riżorsi ekonomiċi tagħhom se jiġu ffriżati (fosthom minn parti terza li taġixxi f’isimhom jew taħt it-tmexxija tagħhom),
  • l-ebda fond jew riżorsa ekonomika mhu se jsiru disponibbli, b’mod dirett jew indirett, lil dawn l-individwi, kumpaniji, entitajiet jew korpi,
  • il-Kunsill jirrevedi l-Anness I f’intervalli regolari u mill-anqas kull 12-il xahar.