L-enerġija rinnovabbli

 

SOMMARJU TA’:

Id-Direttiva (UE) 2018/2001 dwar il-promozzjoni tal-użu tal-enerġija minn sorsi rinnovabbli

X’INHU L-GĦAN TAD-DIRETTIVA?

• Din tistabbilixxi sistema komuni għall-promozzjoni tal-enerġija minn sorsi rinnovabbli* fis-setturi differenti. B’mod partikolari din:
  • tistabbilixxi mira vinkolanti għall-Unjoni Ewropea (UE) għas-sehem tagħha fit-taħlita enerġetika fl-2030;
  • tirregola l-awtokonsum għall-ewwel darba; u
  • tistabbilixxi sett komuni ta’ regoli għall-użu ta’ sorsi ta’ enerġija rinnovabbli fl-elettriku, fit-tisħin u fit-tkessiħ, u fit-trasport fl-UE.
• Hi għandha l-għan li żżid l-użu tal-enerġija minn sorsi rinnovabbli biex tiġġieled il-bidla fil-klima, tipproteġi l-ambjent u tnaqqas id-dipendenza tal-UE fuq l-enerġija, u tikkontribwixxi għat-tmexxija teknoloġika u industrijali tal-UE u l-ħolqien ta’ impjiegi u tkabbir, inklużi f’żoni rurali u iżolati.

PUNTI EWLENIN

L-enerġija rinnovabbli

• Il-promozzjoni ta’ forom ta’ enerġija rinnovabbli hija waħda mill-għanijiet tal-politika enerġetika tal-UE.
• L-użu li żdied tal-enerġija minn sorsi rinnovabbli hu parti importanti tal-pakkett ta’ miżuri li hemm bżonn biex innaqsu l-emissjonijiet tal-gass b’effett ta’ serra u biex nikkonformaw mal-Ftehim ta’ Pariġi 2015 u l-qafas tal-politika tal-UE għall-klima u enerġija (2020 sa 2030).
• Il-pakkett dwar l-Enerġija Nadifa għall-Ewropej kollha jissettja regoli komprensivi tal-UE dwar enerġija rinnovabbli, effiċjenza fl-użu tal-enerġija u governanza.

Emendi 2023

• L-UE aġġornat ir-regoli tagħha dwar l-enerġija bħala parti mill-Patt Ekoloġiku Ewropew u l-pakkett “lest għal mira ta’ 55%” tagħha, li għandu l-għan li jassikura li dawk ir-regoli jkunu alinjati mal-objettiv tan-newtralità klimatika 2050 u mal-objettivi tagħha li tnaqqas l-emissjonijiet nett tal-gass b’effett ta’ serra b’tal-inqas 55% sal-2030 meta mqabbla mal-livelli tal-1990.
• Dawn ir-regoli ġew emendati wkoll biex jiġi implimentat il-pjan REPowerEU li għandu l-għan li jnaqqas id-dipendenza tal-UE fuq żejt u gass Russu.
• Id-direttiva ġiet emendata mid-Direttiva (UE) 2023/2413.

Id-direttiva tinkludi:

• regoli għal appoġġ finanzjarju kosteffikaċi u bbażat fuq is-suq għall-elettriku minn sorsi rinnovabbli;
• protezzjoni għal skemi ta’ sostenn minn modifiki li jpoġġu proġetti eżistenti f’riskju;
• mekkaniżmi għal kooperazzjoni bejn Stati Membri tal-UE, u bejn Stati Membri u pajjiżi mhux tal-UE;
• regoli li jgħinu lil vetturi u batteriji tal-elettriku biex jipprovdu flessibilità lis-sistema tal-enerġija tagħna billi jmantnu l-elettriku rinnovabbli fil-grilja meta jkun hemm bżonn;
• regoli li jippermettu lill-konsumaturi jipproduċu l-elettriku tagħhom stess, b’mod individwali jew bħala parti minn komunitajiet ta’ enerġija rinnovabbli, mingħajr restrizzjonijiet bla bżonn;
• proċeduri aċċelerati għal permess għal proġetti tal-enerġija rinnovabbli;
• rekwiżiti msaħħa għall-appoġġ u użu ta’ bijomassa għall-enerġija, biex jitnaqqas ir-riskju tal-produzzjoni mhux sostenibbli tal-bijoenerġija.

Miri

• Mira kumplessivament vinkolanti ta’ 42.5% sal-2030 għas-sehem ta’ rinnovabbli fil-konsum kumplessiv tal-enerġija tal-UE, b’żieda indikattiva ta’ 2.5% biex tinkiseb il-mira ta’ 45%.
• Għas-settur tat-trasport, l-Istati Membri jistgħu jagħżlu bejn:
  • mira vinkolanti ta’ tnaqqis ta’ 14.5 % fl-intensità tal-gass b’effett ta’ serra fit-trasport mill-użu tar-rinnovabbli sal-2030, jew
  • sehem vinkolanti ta’ mill-inqas 29 % tar-rinnovabbli fi ħdan il-konsum finali tal-enerġija fis-settur tat-trasport sal-2030.
• Għas-settur industrijali:
  • żieda annwali indikattiva medja fl-użu tal-enerġija rinnovabbli ta’ 1.6 %;
  • 42 % tal-idroġenu użat fl-industrija jrid jiġi minn fjuwils rinnovabbli ta’ oriġini mhux bijoloġika sal-2030 u 60 % sal-2035.
• Għas-settur tal-bini u s-settur tat-tisħin u tat-tkessiħ:
  • mira indikattiva ta’ mill-inqas 49 % mis-sehem tal-enerġija rinnovabbli fil-bini sal-2030;
  • żieda gradwali fil-miri rinnovabbli għat-tisħin u għat-tkessiħ ta’ 0.8 % kull sena fil-livell nazzjonali sal-2026 u 1.1 % mill-2026 sal-2030.

Atti delegati u atti ta’ implimentazzjoni

• Bosta atti delegati u atti ta’ implimentazzjoni ġew adottati mill-Kummissjoni Ewropea.
• Fost dawn, ir-Regolament Delegat (UE) 2021/2003 jistabbilixxi l-pjattaforma għall-iżvilupp tal-enerġija rinnovabbli tal-UE, li għandha l-għan li tappoġġja lill-Istati Membri interessati fil-mekkaniżmi ta’ kooperazzjoni tal-enerġija rinnovabbli u, b’mod partikolari, it-trasferimenti tal-istatistika.

MINN META JAPPLIKAW IR-REGOLI?

• Id-Direttiva (UE) 2018/2001 kellha tkun inkorporata f’liġi nazzjonali sat-30 ta’ Ġunju 2021.
• Il-biċċa l-kbira tar-regoli introdotti mid-Direttiva emendatorja (UE) 2023/2413 kellhom ikunu inkorporati sal-21 ta’ Mejju 2025, għalkemm il-biċċa l-kbira ta’ dawk li jikkonċernaw proċeduri tal-għotja ta’ permessi jridu jkunu inkorporati sal-1 ta’ Lulju 2024.

SFOND

Għal aktar informazzjoni, ara:

• L-enerġija rinnovabbli (Kummissjoni Ewropea).

TERMINI EWLENIN

DOKUMENTI PRINĊIPALI

Id-Direttiva (UE) 2018/2001 tal-Parlament Ewropew u tal-Kunsill tal-11 ta’ Diċembru 2018 dwar il-promozzjoni tal-użu tal-enerġija minn sorsi rinnovabbli (riformulazzjoni) (ĠU L 328, 21.12.2018, pp. 82–209).

Emendi suċċessivi għad-Direttiva (UE) 2018/2001 ġew inkorporati fit-test oriġinali. Din il-verżjoni konsolidata għandha valur dokumentarju biss.

Id-Direttiva (UE) 2023/2413 tal-Parlament Ewropew u tal-Kunsill tat-18 ta’ Ottubru 2023 li temenda d-Direttiva (UE) 2018/2001, ir-Regolament (UE) 2018/1999 u d-Direttiva 98/70/KE fir-rigward tal-promozzjoni tal-enerġija minn sorsi rinnovabbli, u li tħassar id-Direttiva tal-Kunsill (UE) 2015/652 (ĠU L, 2023/2413, 31.10.2023).

DOKUMENTI RELATATI

Ir-Regolament Delegat tal-Kummissjoni (UE) 2023/1184 tal-10 ta’ Frar 2023 li jissupplimenta d-Direttiva (UE) 2018/2001 tal-Parlament Ewropew u tal-Kunsill billi jistabbilixxi metodoloġija tal-Unjoni li tistipula regoli dettaljati għall-produzzjoni ta’ karburanti għat-trasport rinnovabbli likwidi u gassużi ta’ oriġini mhux bijoloġika (ĠU L 157, 20.6.2023, pp. 11–19).

Ir-Regolament Delegat tal-Kummissjoni (UE) 2023/1185 tal-10 ta’ Frar 2023 li jissupplimenta d-Direttiva (UE) 2018/2001 tal-Parlament Ewropew u tal-Kunsill billi jistabbilixxi livell limitu minimu għall-iffrankar tal-emissjonijiet ta’ gassijiet serra ta’ fjuwils tal-karbonju riċiklat u billi jispeċifika metodoloġija għall-valutazzjoni tal-iffrankar tal-emissjonijiet ta’ gassijiet serra minn fjuwils rinnovabbli likwidi u gassużi għat-trasport ta’ oriġini mhux bijoloġika u minn fjuwils tal-karbonju riċiklat (ĠU L 157, 20.6.2023, pp. 20–33).

Ir-Regolament Delegat tal-Kummissjoni (UE) 2023/1640 tal-5 ta’ Ġunju 2023 dwar il-metodoloġija għad-determinazzjoni tas-sehem tal-bijofjuwils u tal-bijogass użati fit-trasport li jirriżulta mill-bijomassa li tkun qiegħda tiġi pproċessata mal-fjuwils fossili fi proċess komuni (ĠU L 205, 18.8.2023, pp. 1–6).

Id-Direttiva (UE) 2023/1791 tal-Parlament Ewropew u tal-Kunsill tat-13 ta’ Settembru 2023 dwar l-effiċjenza enerġetika u li temenda r-Regolament (UE) 2023/955 (riformulazzjoni) (ĠU L 231, 20.9.2023, pp. 1–111).

Ir-Regolament Delegat tal-Kummissjoni (UE) 2022/759 tal-14 ta’ Diċembru 2021 li jemenda l-Anness VII tad-Direttiva (UE) 2018/2001 tal-Parlament Ewropew u tal-Kunsill fir-rigward ta’ metodoloġija għall-kalkolu tal-ammont ta’ enerġija rinnovabbli użata għat-tkessiħ u għat-tkessiħ distrettwali (ĠU L 139, 18.5.2022, pp. 1–12).

Ir-Regolament Delegat tal-Kummissjoni (UE) 2021/2003 tas-6 ta’ Awwissu 2021 li jissupplimenta r-Regolament (UE) 2018/2001 tal-Parlament Ewropew u tal-Kunsill billi jistabbilixxi l-pjattaforma għall-iżvilupp rinnovabbli tal-Unjoni (ĠU L 407, 17.11.2021, pp. 4–8).

Ir-Regolament Delegat tal-Kummissjoni (UE) 2019/807 tat-13 ta’ Marzu 2019 li jissupplimenta d-Direttiva (UE) 2018/2001 tal-Parlament Ewropew u tal-Kunsill fir-rigward tad-determinazzjoni ta’ materja prima b’riskju għoli ta’ tibdil indirett fl-użu tal-art li għaliha qed tiġi osservata espansjoni sinifikanti taż-żona ta’ produzzjoni f’art b’ħażna kbira ta’ karbonju u ċ-ċertifikazzjoni ta’ bijokarburanti, bijolikwidi u karburanti mill-bijomassa b’riskju baxx ta’ tibdil indirett fl-użu tal-art (ĠU L 133, 21.5.2019, pp. 1–7).

Ir-Regolament (UE) 2018/1999 tal-Parlament Ewropew u tal-Kunsill tal-11 ta’ Diċembru 2018 dwar il-Governanza tal-Unjoni tal-Enerġija u tal-Azzjoni Klimatika, li jemenda r-Regolamenti (KE) Nru 663/2009 u (KE) Nru 715/2009 tal-Parlament Ewropew u tal-Kunsill, id-Direttivi 94/22/KE, 98/70/KE, 2009/31/KE, 2009/73/KE, 2010/31/UE, 2012/27/UE u 2013/30/UE tal-Parlament Ewropew u tal-Kunsill, id-Direttivi tal-Kunsill 2009/119/KE u (UE) 2015/652 u li jħassar ir-Regolament (UE) Nru 525/2013 tal-Parlament Ewropew u tal-Kunsill (ĠU L 328, 21.12.2018, pp. 1–77).

Ara l-verżjoni konsolidata.

Id-Direttiva (UE) 2018/2002 tal-Parlament Ewropew u tal-Kunsill tal-11 ta’ Diċembru 2018 li temenda d-Direttiva 2012/27/UE dwar l-effiċjenza fl-enerġija (ĠU L 328, 21.12.2018, pp. 210–230).

Id-Direttiva 2012/27/UE tal-Parlament Ewropew u tal-Kunsill tal-25 ta’ Ottubru 2012 dwar l-effiċjenza fl-enerġija, li temenda d-Direttivi 2009/125/KE u 2010/30/UE u li tħassar id-Direttivi 2004/8/KE u 2006/32/KE (ĠU L 315, 14.11.2012, pp. 1–56).

Ara l-verżjoni konsolidata.

Id-Direttiva 98/70/KE tal-Parlament Ewropew u tal-Kunsill tat-13 ta’ Ottubru 1998 dwar il-kwalità tal-karburanti tal-petrol u tad-diżil u li temenda d-Direttiva tal-Kunsill 93/12/KEE (ĠU L 350, 28.12.1998, pp. 58–68).

Ara l-verżjoni konsolidata.

l-aħħar aġġornament 16.01.2024