Metodi ta’ teħid ta’ kampjuni u analiżi għall-kontroll tal-livelli ta’ ċerti elementi fl-oġġetti tal-ikel

PUNTI EWLENIN

Is-sitt regolamenti huma relatati mar-Regolament (UE) 2017/625 dwar regoli għall-katina agroalimentari, inklużi kontrolli uffiċjali u attivitajiet uffiċjali oħra mwettqa biex tiġi żgurata l-applikazzjoni tal-liġi dwar l-ikel u l-għalf. L-Artikolu 34 tar-Regolament (UE) 2017/625 jistabbilixxi regoli għall-użu ta’ metodi ta’ teħid ta’ kampjuni u analiżi għall-kontroll uffiċjali u attivitajiet uffiċjali oħra. Ir-Regolament (UE) 2017/625 issostitwixxa u ħassar ir-Regolament (KE) Nru 882/2004 fl-2019.

Ir-Regolament (KE) Nru 1882/2006 jistabbilixxi l-metodi ta’ teħid ta’ kampjuni u analiżi għall-kontroll uffiċjali tal-livelli ta’ nitrati fl-ispinaċi, fil-ħass, fil-ħass tat-tip iceberg, fl-ikel tat-trabi u fl-ikel ipproċessat ibbażat fuq iċ-ċereali għat-trabi u t-tfal żgħar.

Ir-Regolament (KE) Nru 333/2007 jistabbilixxi l-metodi ta’ teħid ta’ kampjuni u analiżi ta’ livelli ta’ elementi ta’ traċċa u kontaminanti tal-ipproċessar fl-oġġetti tal-ikel.

• L-oligoelementi u l-kontaminanti mill-ipproċessar jistgħu jkunu preżenti fl-ikel bħala riżultat ta’ kontaminazzjoni ambjentali jew migrazzjoni mill-imballaġġ u jistgħu jidħlu wkoll fil-katina alimentari waqt l-ipproċessar, u jistgħu jakkumulaw fit-tessut uman.
• L-idrokarburi aromatiċi poliċikliċi (PAH) huma preżenti fl-ikel bħala riżultat ta’ kontaminazzjoni ambjentali jew migrazzjoni mill-imballaġġ u jistgħu jidħlu wkoll fil-katina alimentari waqt l-ipproċessar.
• Iċ-ċomb, l-arseniku, il-kadmju, il-merkurju u l-perklorat huma preżenti l-aktar fl-ikel bħala riżultat ta’ kontaminazzjoni ambjentali u proċessi industrijali, iżda jistgħu jidħlu wkoll fl-ikel permezz ta’ ċerti tipi ta’ materjali li jiġu f’kuntatt mal-ikel. Il-landa tinsab fl-ikel fil-laned permezz tal-migrazzjoni tal-landa mill-bott għall-ikel.
• L-esteri tal-aċidi grassi ta’ 3-MCPD u l-esteri tal-aċidi grassi tal-gliċidol jinsabu fiż-żjut veġetali raffinati, u fl-ikel li fih dawn iż-żjut, bħala riżultat tal-proċess tal-irfinar taż-żjut.
• L-akrilamid jifforma f’ikel rikk fil-karboidrati waqt il-ħami, ix-xiwi, it-tisjir fuq il-grill, il-qali u t-togħlija. Il-benżo(a)piren u idrokarburi aromatiċi poliċikliċi oħra jirriżultaw mill-kombustjoni mhux kompluta ta’ materja organika u jinstabu f’afna ikel, speċjalment laħam affumikat u msajjar fuq il-grill, ħut u ġobon.
• Ir-Regolament (UE) 2023/915 jistabbilixxi l-livelli massimi permissibbli.
• Il-kampjunar u l-analiżi jitwettqu bl-użu tal-kriterji u l-metodi deskritti fl-anness tar-Regolament (KE) Nru 333/2007.
• Ir-Regolament (KE) Nru 333/2007 ġie emendat diversi drabi:
  • bir-Regolament (UE) 2021/705 li jistabbilixxi metodi speċifiċi ta’ teħid ta’ kampjuni għal supplimenti tal-ikel, ħwawar jew ħxejjex aromatiċi mnixxfa, fungi mnixxfa, alka jew likeni;
  • bir-Regolament (UE) 2022/685 fir-rigward tar-rekwiżiti ta’ teħid ta’ kampjuni għall-ħut u l-annimali terrestri;
  • bir-Regolament (UE) 2022/2418 li jaġġorna l-anness skont il-Guidance document on the estimation of the limit of detection and limit of quantification for measurements in the field of contaminants in feed and food tal-EU Reference Laboratories; u
  • bir-Regolament (UE) 2024/1045 dwar il-metodi ta’ teħid ta’ kampjuni u analiżi għall-kontroll tal-livelli tan-nikil fl-oġġetti tal-ikel u li jemenda ċerti referenzi.
• Id-Direttivi 2001/22/KE, 2004/16/KE u 2005/10/KE huma mħassra u kwalunkwe referenza għalihom issa hija relatata mar-Regolament (KE) Nru 333/2007.

Ir-Regolament tal-Kummissjoni (UE) 2017/644 jistabbilixxi metodi ta’ teħid ta’ kampjuni u analiżi għall-kontroll tal-livelli ta’ diossini, bifenili poliklorinati (PCBs) simili għad-dijossini u PCBs mhux simili għad-dijossini f’ċerti oġġetti tal-ikel. Id-diossini u l-komposti simili għad-diossini huma sustanza niġġiesa ambjentali persistenti, l-aktar prodotti sekondarji minuri ta’ proċessi ta’ ħruq jew industrijali. Il-PCBs kienu jintużaw biex isir tagħmir elettriku, linka, adeżivi, ritardanti tal-fjammi u żebgħa. Dawn huma persistenti ħafna u solubbli ħafna fix-xaħam, u dan jispjega għaliex il-PCBs għadhom preżenti u jistgħu jakkumulaw fix-xaħam tal-annimali u tul il-katina alimentari.

• L-Anness II jiddeskrivi l-metodi ta’ teħid ta’ kampjuni.
• L-Annessi III u IV jistabbilixxu l-metodi u l-kriterji tal-prestazzjoni applikati fir-rigward tat-tħejjija u l-analiżi tal-kampjuni.

Ir-Regolament (UE) 2022/1428 jistabbilixxi metodi ta’ teħid ta’ kampjuni u analiżi għall-kontroll ta’ sustanzi perfluworalkiliċi f’oġġetti tal-ikel bħal ħut, laħam u ġewwieni, li għalihom ġew stabbiliti livelli massimi fir-Regolament (KE) Nru 1881/2006, li ġie mħassar u sostitwit bir-Regolament (UE) 2023/915.

Ir-Regolament (UE) 2023/2782 li jistabbilixxi l-metodi ta’ kampjunar u analiżi għall-kontroll tal-livelli ta’ mikotossini fl-ikel. Il-mikotossini huma sustanzi tossiċi prodotti minn fungi li potenzjalment jikkontaminaw l-ikel u l-għalf fl-istadji kollha tal-katina tal-provvista alimentari. Ċerti mikotossini jista’ jkollhom effetti karċinoġeniċi fuq il-fwied u l-kliewi. Ir-Regolament Emendatorju (UE) 2024/885 jaġġorna l-metodi ta’ teħid ta’ kampjuni għall-kontroll tal-livelli ta’ mikotossini fi ħxejjex aromatiċi mnixxfa, infużjonijiet tal-ħxejjex aromatiċi (prodott imnixxef), tejiet (prodott imnixxef) u trab tal-ħwawar użati fis-supplimenti tal-ikel. Ir-regolament ħassar ir-Regolament (KE) Nru 401/2006 mill-1 ta’ April 2024 għalkemm, sal-1 ta’ Jannar 2029, ir-rekwiżiti speċifiċi għal metodi ta’ skrinjar konfermatorji, semikwantitattivi u kwalitattivi previsti fil-punt 4.3 tal-Anness II għar-Regolament (KE) Nru 401/2006 ikomplu japplikaw għal metodi li ġew ivvalidati qabel id-dħul fis-seħħ tar-regolament il-ġdid.

Ir-Regolament 2023/2783 jistabbilixxi l-metodi ta’ teħid ta’ kampjuni u jipprovdi kriterji għat-tħejjija tal-kampjuni u għall-metodi ta’ analiżi għall-kontroll tal-livelli ta’ tossini tal-pjanti fl-ikel. Dan ħassar ir-Regolament (UE) 2015/705 dwar il-kontroll uffiċjali tal-livelli ta’ aċidu eruċiku fl-oġġetti tal-ikel mill-1 ta’ April 2024.