Responsabbiltà Soċjali Korporattiva (CSR)

Responsabbiltà Soċjali Korporattiva tirreferi għal negozji li jieħdu r-responsabilità għall-imġiba tagħhom u għall-impatt tagħha fuq is-soċjetà. Din tista’ tinkludi l-kundizzjonijiet ta’ impjiegi u l-istandards tax-xogħol, il-libertà ta’ assoċjazzjoni, il-benesseri fuq il-post tax-xogħol, in-nondiskriminazzjoni u l-bilanċ bejn is-sessi, l-involviment tal-partijiet interessati, id-drittijiet tal-bniedem, il-prevenzjoni ta’ ħsara ambjentali, u l-eliminazzjoni ta’ tixħim u korruzzjoni.

Is-CSR hija meqjus importanti għall-kompetittività u ntwera li tagħti benefiċċji f’termini tal-ġestjoni tar-riskji, l-iffrankar tal-ispejjeż, l-aċċess għall-kapital, ir-relazzjonijiet mal-klijenti, il-ġestjoni tar-riżorsi umani u l-kapaċita fl-innovazzjoni.

L-istrateġija tas-CSR tal-Kummissjoni Ewropea għall-2011 tħeġġeġ lill-kumpaniji jistabbilixxu proċeduri sabiex “jintegraw id-drittijiet soċjali, ambjentali u etiċi tal-bniedem, u t-tħassib tal-konsumaturi fl-operazzjonijiet kummerċjali tagħhom u fl-istrateġija ewlenija tagħhom f’kollaborazzjoni mill-qrib ma’ dawk kollha interessati”.

Minn dakinhar, l-UE wriet l-impenn tagħha għas-CSR, l-aġenda 2030 tan-Nazzjonijiet Uniti (NU) għall-iżvilupp sostenibbli u l-Għanijiet ta’ Żvilupp Sostenibbli tan-NU, inkluż billi:

• tippubblika dokumenti bħala l-komunikazzjoni tagħha “Il-passi li jmiss għal futur Ewropew sostenibbli — Azzjoni Ewropea għas-sostenibbiltà”;
• l-adozzjoni ta’ leġiżlazzjoni bħad-Direttiva 2014/95/UE dwar l-iżvelar ta’; informazzjoni mhux finanzjarja u dwar id-diversità minn kumpaniji u gruppi kbar;
• l-appoġġ ta’ inizjattivi internazzjonali bħall-prinċipji tal-Organizzazzjoni Internazzjonali tax-Xogħol dwar l-intrapriżi multinazzjonali u l-politika soċjali, u l-ħidma tal-Organizzazzjoni għall-Kooperazzjoni Ekonomika u l-Iżvilupp dwar id-diliġenza dovuta.