Comhaontú Comhpháirtíochta Eacnamaíche idir an tAontas Eorpach agus stáit Fhóram Mhuir Chairib

PRÍOMHPHOINTÍ

CARIFORUM

• Cuimsítear 15 stát de chuid Mhuir Cairib i bhFóram Mhuir Chairib (CARIFORUM): Antigua agus Barbúda, na Bahámaí, Barbadós, an Bheilís, Doiminice, an Phoblacht Dhoiminiceach, Greanáda, an Ghuáin, Háítí, Iamáice, Oileán na Tríonóide agus Tobága, Saint Lucia, San Uinseann agus na Greanáidíní agus Suranam.
• Shínigh na 15 stát ar fad an comhaontú; ní bheidh sé á chur i bhfeidhm ag Háítí, áfach, go dtí go mbeidh sé daingnithe.

Cuspóirí

Áirítear iad seo a leanas i measc na bpríomhchuspóirí leis an gcomhaontú:

• cur le laghdú agus le díothú de réir a chéile na bochtaineachta trí chomhpháirtíocht trádála a bhunú a bheidh bunaithe ar chuspóirí na forbartha inbhuanaithe agus spriocanna forbartha na Mílaoise (ar cuireadh na spriocanna forbartha inbhuanaithe ina n–ionad) agus Chomhaontú Contonou.
• lánpháirtiú réigiúnach, comhar eacnamaíoch agus dea–rialachas a chur chun cinn, agus creat rialála éifeachtach, intuartha agus trédhearcach a bhunú agus a chur chun feidhme dá réir maidir le trádáil agus infheistíocht idir na páirtithe agus i réigiún Fhóram Mhuir Cairib;
• lánpháirtiú de réir a chéile stáit Fhóram Mhuir Chairib sa gheilleagar domhanda a chur chun cinn, ar bhonn a roghanna polaitiúla agus a dtosaíochtaí forbartha;
• feabhas a chur ar chumas stáit Fhóram Mhuir Chairib sa bheartas trádála agus i gceiseanna eile a bhaineann le trádáil;
• tacú leis na coinníollacha maidir le hinfheistíocht agus le tionscnamh na hearnála poiblí a mhéadú agus an cumas soláthair, an t–iomaíochas agus an fás eacnamaíoch a threisiú i réigiún Fhóram Mhuir Chairib;
• an caidreamh atá idir na páirtithe cheana a neartú tríd an gcaidreamh tráchtála agus eacnamaíoch a threisiú.

Raon feidhme

Cumhdaítear sa chomhaontú roinnt gnéithe polaitiúla agus eacnamaíocha, lena n–áirítear:

• trádáil agus cúrsaí a bhaineann le trádáil, lena n–áirítear dleachtanna custam, éascú trádála, bearta frithdhumpála, talmhaíocht agus iascaigh, bacainní teicniúla ar thrádáil, agus bearta i dtaca le sláintíocht agus fíteashláintíocht;
• infheistíocht, trádáil i seirbhísí agus ríomhthráchtáil;
• ceisteanna a bhaineann le trádáil amhail:
  • iomaíochas,
  • nuálaíocht agus maoin intleachtúil,
  • soláthar poiblí,
  • an comhshaol;
• rialacha maidir le réiteach díospóidí;
• rialacha institiúideacha, lena n–áirítear Comhchomhairle Fhóram Mhuir Chairib-AE a bhunú chun maoirseacht a dhéanamh ar chur chun feidhme an chomhaontaithe agus cinntí a ghlacadh nuair is gá.