Straitéis Fostaíochta na hEorpa (EES)

Seoladh an EES in 1997 ag Comhairle Eorpach Lucsamburg, agus is í an straitéis príomh-ionstraim an Aontais Eorpaigh (AE) chun iarrachtaí athchóirithe thíortha AE i réimse an mhargaidh saothair agus na mbeartas sóisialta a chomhordú. Tá an sásra sin bunaithe ar thagarmharcáil, ar mhonatóireacht agus ar fhoghlaim seachas ar reachtaíocht.

Ó 1997 i leith, tá athruithe éagsúla déanta ar EES i dtaca lena treo rialachais agus beartais araon. In 2005, athsheoladh an straitéis mar chuid de Straitéis Liospóin. Mar gheall air sin rinneadh comhtháthú ar Threoirlínte Fostaíochta na hEorpa agus ar na Treoirlínte Ginearálta maidir le Beartais Eacnamaíocha (BEPG) agus rinneadh sraith aonair Treoirlínte Comhtháite um Fhorás agus um Fhostaíocht díobh. Rinneadh athbhreithniú ar Straitéis Liospóin in 2010 agus seoladh Straitéis Eoraip 2020 ansin. Tháinig tíortha AE ar chomhaontú maidir le tosaíochtaí nua, a cuireadh in iúl i spriocanna agus i dtreoirlínte comhtháite nua. Ó 2011 i leith, tá EES comhtháite go hiomlán sa Seimeastar Eorpach, an tsraith bhliantúil de chomhordú beartais eacnamaíoch.

Tá an EES bunaithe orthu seo a leanas:

• an Comhthuarascáil Fostaíochta, ina ndéantar anailís ar na príomhdhúshláin fostaíochta atá os comhair thíortha AE agus na freagairtí beartais a thug siad ar na Treoirlínte Fostaíochta le bliain anuas;
• an Suirbhé Bliantúil ar Fhás, ina leagtar amach tosaíochtaí maicreacnamaíocha AE chun borradh a chur faoi fhás eacnamaíoch agus cruthú fostaíochta, agus osclaítear an Seimeastar Eorpach leis;
• na Treoirlínte Comhtháite, ina leagtar síos na príomhthosaíochtaí beartais maidir le fostaíocht agus cúrsaí sóisialta;
• na Moltaí a Bhaineann go Sonrach le Tíortha Faoi Leith, ina dtairgtear treoir saincheaptha do thíortha AE maidir le dhul i ngleic leis na dúshláin eacnamaíocha, fostaíochta agus sóisialta atá os a gcomhair.