An Chibearshlándáil

Is éard atá i gceist leis an gcibearshlándáil, ar a dtugtar teicneolaíocht faisnéise nó slándáil ríomhaireachta freisin, bearta a leagan síos a chosnaíonn córais agus líonraí ar nochtadh faisnéise, ar ghoid a gcuid crua-earraí, ar a mbogearraí nó ar a sonraí leictreonacha nó ar dhamáiste dóibh, agus ar chur isteach nó ar mhíthreorú na seirbhísí a chuireann siad ar fáil.

Is tosaíocht de chuid an Aontais Eorpaigh (AE) í an chibearshlándáil le fada. Léirítear sin le déanaí ina bhuiséad fadtéarmach (an creat airgeadais ilbhliantúil) don tréimhse 2021–2027, le maoiniú suntasach curtha in áirithe chun tacú le taighde, nuálaíocht agus bonneagar cibearshlándála, cibearchosaint agus tionscal na cibearshlándála.

Ó 2004 i leith, agus a neartaíodh le Gníomh an Aontais um Chibearshlándáil 2019, tá Gníomhaireacht an Aontais Eorpaigh um Chibearshlándáil (ENISA) ag obair le Ballstáit an Aontais agus le páirtithe ábhartha eile, ag cur comhairle agus réitigh ar fáil agus ag cur lena gcumais chibearshlándála chun freagairt go comhpháirteach do theagmhais chibearshlándála trasteorann mhórscála.

Leis an tstraitéis cibearshlándál is déanaí de chuid an Aontais, a cuireadh i láthair in 2020, féachtar lena hathléimneacht chomhchoiteann i gcoinne cibearbhagairtí a threisiú agus cuidiú lena chinntiú gur féidir le saoránaigh agus gnólachtaí tairbhe iomlán a bhaint as seirbhísí agus uirlisí digiteacha iontaofa ar féidir brath orthu. Tá tograí ann maidir le tionscnaimh rialála, infheistíochta agus beartais atá le déanamh i dtrí réimse.

• Athléimneacht, ceannasacht theicneolaíoch agus ceannaireacht a fheabhsú. Bainfear é sin amach trí athchóiriú a dhéanamh ar na rialacha maidir le slándáil na gcóras gréasán agus faisnéise. Áirítear leis sin reachtaíocht athbhreithnithe a ghlacadh (treoir nua, a moladh in 2020) maidir le bearta le haghaidh ardleibhéal comhchoiteann cibearshlándála ar fud an Aontais chun cibear-athléimneacht bhonneagair chriticiúla na hearnála poiblí agus na hearnála príobháidí a mhéadú.
• Acmhainneacht oibríochtúil a fhorbairt chun cosc, díspreagadh freagairt. Tá Cibearaonad Comhpháirteach nua le cruthú chun borradh a chur faoin gcomhar idir comhlachtaí an Aontais agus údaráis na mBallstát atá freagrach as cibirionsaithe a chosc, a dhíspreagadh agus freagairt dóibh. Déanfar uasghrádú ar bhosca uirlisí cibearthaidhleoireachta an Aontais chun cibirghníomhaíochtaí mailíseacha a chosc, a dhíspreagadh, cur ina gcoinne agus chun freagairt dóibh go héifeachtach, go háirithe iad siúd a dhéanann difear dá bhonneagar criticiúil, dá shlabhraí soláthair, dá institiúidí agus dá phróisis dhaonlathacha.
• Cibearspás domhanda agus oscailte a chur chun cinn trí chomhar méadaithe. Bainfear é sin amach trí bheith ag obair le comhpháirtithe agus eagraíochtaí idirnáisiúnta chun an t-ord domhanda atá bunaithe ar rialacha a neartú, slándáil agus cobhsaíocht idirnáisiúnta a chur chun cinn sa chibearspás agus cearta an duine agus saoirsí bunúsacha ar líne a chosaint. Méadóidh an tAontas iarrachtaí fothaithe cibear-acmhainneachta i dtíortha nach bhfuil san Aontas, mar aon leis an gcibear-idirphlé le tíortha nach bhfuil san Aontas, le heagraíochtaí réigiúnacha agus idirnáisiúnta agus leis an bpobal il-gheallsealbhóirí.