Ir-regoli tal-avjazzjoni ċivili u l-Aġenzija Ewropea għas-Sikurezza fl-Avjazzjoni

 

SOMMARJU TA’:

Ir-Regolament (UE) 2018/1139 dwar regoli komuni fil-qasam tal-avjazzjoni ċivili u li jistabbilixxi Aġenzija tas-Sikurezza tal-Avjazzjoni tal-Unjoni Ewropea

X’INHU L-GĦAN TAR-REGOLAMENT?

• L-għan tiegħu huwa li jistabbilixxi livell għoli u uniformi ta’ sikurezza fl-avjazzjoni ċivili filwaqt li jiżgura l-ħarsien tal-ambjent.
• Huwa jaġġorna l-liġi dwar is-sikurezza fl-avjazzjoni u jinkludi:
  • mandat rivedut għall-Aġenzija tas-Sikurezza tal-Avjazzjoni tal-Unjoni Ewropea (EASA); u
  • regoli ġodda mfassla sabiex jippermettu lis-settur tal-avjazzjoni tal-Unjoni Ewropea (UE) jikber, isir aktar kompetittiv u jħeġġeġ l-innovazzjoni.

PUNTI EWLENIN

Ir-regolament ikopri l-oqsma ewlenin kollha tal-avjazzjoni inkluż:

• l-ajrunavigabbiltà;
• l-ekwipaġġ tat-titjir;
• l-ajrudromi;
• l-operazzjonijiet bl-ajru; u
• is-servizzi ta’ navigazzjoni bl-ajru.

Ir-regolament:

• jinkludi regoli għall-inġenji tal-ajru mingħajr ekwipaġġ (drones ċivili);
• għandu l-għan li jiffaċilita regoli aktar sempliċi għall-avjazzjoni bħala sport u dik rikreattiva;
• jistabbilixxi diviżjoni tal-kompiti bejn l-UE u l-awtoritajiet nazzjonali;
• iħassar it-tliet regolamenti preċedenti (ir-Regolamenti (KE) Nru552/2004 u (KE) Nru216/2008, u r-Regolament (KEE) Nru 3922/91);
• jemenda żewġ direttivi (id-Direttivi 2014/30/UE dwar it-tnaqqis tal-interferenza bejn apparat elettriku u elettroniku u 2014/53/UE dwar il-kummerċjalizzazzjoni ta’ tagħmir tar-radju) u erba’ regolamenti (Ir-Regolamenti (KE) Nru 2111/2005 dwar l-istabbiliment ta’ lista ta’kumpaniji tal-ajru li huma pprojbiti u u dwar l-identità tal-kumpanija tal-ajru li topera, (KE) Nru 1008/2008 dwar l-operat ta’ servizzi tal-ajru , (UE) Nru 996/2010 dwar aċċidenti u inċidenti fl-avjazzjoni ċivili, (UE) Nru 376/2014 dwar okkorrenzi fl-avjazzjoni ċivili);
• jikkomplementa r-Regolamenti (UE) Nru 1321/2014 dwar l-ajrunavigabbiltà u (UE) Nru 748/2012 dwar iċ-ċertifikazzjoni ambjentali.

Tibdil ewlieni u żidiet

• Ir-regolament jaġġorna l-leġiżlazzjoni tal-UE dwar is-sikurezza fis-settur tal-avjazzjoni. Ġew stabbiliti rekwiżiti essenzjali għall-inġenji tal-ajru fir-rigward tal-ajrunavigabbiltà u l-kompatibbiltà ambjentali tagħhom. Il-manifatturi se jkunu meħtieġa joħorġu ċertifikati tal-ajrunavigabbiltà, skont ir-rekwiżiti tekniċi.
• Jintroduċi regoli bbażati fuq ir-riskju u fuq il-prestazzjoni li jistabbilixxu objettivi iżda jħallu ċerta flessibbiltà dwar il-mezzi biex dawn jintlaħqu. Jippromwovi wkoll it-teħid ta’ miżuri mhux vinkolanti (bħal azzjonijiet għall-promozzjoni tas-sikurezza) kull meta dan ikun possibbli.
• Jirrevedi l-kamp ta’ applikazzjoni ta’ ċerti regoli, billi jeskludi blalen tal-arja sħuna żgħar, b’okkupanza waħda, jaġġusta l-limiti tal-piż għall-gliders, u jżid l-inġenji tal-ajru tal-elettriku ħfief. Jintroduċi riformi sabiex:
  • tiġi ttrattata ż-żieda fit-traffiku tal-ajru;
  • tiżdied is-sigurtà;
  • jitnaqqsu l-kostijiet, id-dewmien u l-impatt ambjentali tat-traffiku tal-ajru.
• L-ekwipaġġ tal-kabina involut fit-trasport kummerċjali bl-ajru huwa soġġett għal ċertifikazzjoni u għandha tinħarġilhom attestazzjoni. Il-Kummissjoni Ewropea stabbiliet regoli u proċeduri dettaljati għall-kwalifiki tal-membri tal-ekwipaġġ tal-kabina.
• Ir-Regolament jistabbilixxi wkoll rekwiżiti essenzjali għal servizzi ta’ groundhandling sikuri, li issa huma inklużi fil-kamp ta’ applikazzjoni tar-regolament, u jagħlaq għadd ta’ lakuni oħra dwar is-sikurezza.
• Ġie introdott kapitolu ġdid dwar il-ġestjoni tas-sikurezza tal-avjazzjoni, li jwaqqaf il-Programm Ewropew tas-Sikurezza tal-Avjazzjoni, li jkopri s-sistema kollha tas-sikurezza tal-avjazzjoni.

Drones ċivili

• Ir-Regolament jintroduċi rekwiżiti essenzjali għad-drones. Ir-regoli huma intiżi biex ikunu proporzjonati għar-riskju tal-operazzjoni partikolari jew għat-tip ta’ operazzjoni u jistabbilixxu li d-drone għandu jkun jista’ jintuża u jiġi mmaniġġjat b’mod sikur. Għandu jkun iddisinjat biex jaqdi l-funzjoni u t-tip ta’ operazzjoni intiża tiegħu, u jqis il-privatezza u l-protezzjoni tad-data personali b’intenzjoni jew b’mod prestabbilit. Għandha tkun possibbli wkoll l-identifikazzjoni tad-drone kif ukoll tan-natura u tal-iskop tal-operazzjoni.
• L-operatur tad-drone għandu jkun responsabbli għall-operat tiegħu u għandu jkollu għarfien u ħiliet proporzjonati għall-operat sikur tad-drone. L-organizzazzjonijiet involuti fid-disinn, fil-produzzjoni, fil-manutenzjoni u fl-operazzjonijiet tad-drones, f’servizzi relatati u f’taħriġ fuq id-drones, għandhom jistabbilixxu sistema ta’ rapportar tal-okkorrenzi tas-sikurezza.
• Ir-regolament jispeċifika l-limitu tar-reġistrazzjoni li japplika għall-operaturi tad-drones: l-operaturi għandhom ikunu rreġistrati jekk joperaw drones li jistgħu jittrasferixxu ’l fuq minn 80 Joules ta’ enerġija kinetika f’każ ta’ impatt ma’ persuna. Dan il-limitu jista’ jiġi emendat fil-futur mingħajr proċeduri twal sabiex jittieħed kont tal-iżviluppi f’dan il-qasam.
• Skont in-natura u r-riskju tal-attività, il-karatteristiċi operazzjonali tal-inġenju tal-ajru u l-karatteristiċi taż-żona tal-operazzjoni, jista’ jkun meħtieġ ċertifikat għad-disinn, għall-produzzjoni, għall-manutenzjoni u għall-operat kif ukoll għall-persunal, inkluż għall-piloti remoti.
• Skont ir-regolament, il-Kummissjoni, bl-għajnuna tal-EASA, fasslet ir-Regolament (UE) 2019/947 li jistabbilixxi regoli dettaljati għad-droni u għall-operat tad-droni (ara s-sommarju).

Liċenzji tal-bdoti maħruġa minn pajjiżi li mhumiex fl-UE

• Ir-Regolament Delegat (UE) 2020/723 jistabbilixxi l-proċeduri u, b’mod partikolari, il-kreditu possibbli għall-edukazzjoni li jista’ jintalab minn bdot li kiseb liċenzja ta’ bdot f’pajjiżi mhux tal-UE u jixtieq jikkonvertiha f’liċenzja tal-UE.
• Jiżgura li l-bdoti jibqgħu jirċievu taħriġ fis-suġġetti li huma speċifiċi għall-ispazju tal-ajru tal-UE, jew inkella mhux meħtieġa f’pajjiżi mhux tal-UE, filwaqt li jiżgura li ma għandhomx għalfejn jerġgħu jitħarrġu b’mod eċċessiv f’aspetti li diġà koprew qabel.
• Preċedentement l-att kien parti mir-Regolament ta’ Implimentazzjoni (UE) 1178/2011 (ara s-sommarju), imma kellu jiġi separat f’atti delegati minħabba r-rekwiżiti tar-Regolament (UE) 2018/1139.

Ħarsien ambjentali

Fir-rigward tal-ħsejjes u l-emissjonijiet, l-inġenji tal-ajru għajr dawk mingħajr l-ekwipaġġ, l-iskruwni, il-partijiet u tagħmir mhux konnessi tagħhom għandhom jikkonformaw mar-rekwiżiti tal-protezzjoni ambjentali li jinsabu fl-Anness 16 tal-Konvenzjoni dwar l-Avjazzjoni Ċivili Internazzjonali mill-1 ta’ Jannar 2021.

L-Aġenzija tas-Sikurezza fl-Avjazzjoni tal-Unjoni Ewropea

• Ir-regolament jestendi l-kamp ta’ applikazzjoni tal-EASA għall-aspetti tas-sigurtà relatati mas-sikurezza, bħaċ-ċibersigurtà, u l-ħarsien tal-ambjent.
• Huwa jistabbilixxi mekkaniżmu għall-akkomunament u l-kondiviżjoni ta’ spetturi tal-avjazzjoni, u assistenza teknika oħra biex tappoġġja lill-Istati Membri tal-UE fil-kompiti ta’ ċertifikazzjoni, ta’ sorveljanza u ta’ infurzar.
• Ir-repożitorju elettroniku tal-informazzjoni stabbilit mill-EASA biex tiġi żgurata kooperazzjoni effettiva bejn l-EASA u l-awtoritajiet nazzjonali rilevanti jinkludi informazzjoni dwar ir-riallokazzjoni minn Stat Membru wieħed għal ieħor, jew lill-EASA, tar-responsabbiltajiet relatati maċ-ċertifikazzjoni, mas-sorveljanza u mal-infurzar, kif ukoll miżuri li jikkonċeraw titjiriet fuq żoni ta’ kunflitt.

Riskji għas-sigurtà tal-informazzjoni b’impatt potenzjali fuq is-sikurezza tal-avjazzjoni

• Ir-Regolament Delegat (UE)2022/1645, li se japplika mis-16 ta’ Ottubru 2025, jistabbilixxi r-rekwiziti li għandhom jiġu ssodisfati biex jiġu identifikati u mmaniġġjati r-riskji tas-sigurtà tal-informazzjoni b’impatt potenzjali fuq is-sikurezza tal-avjazzjoni għall-organizzazzjonijiet.
• Dawn ir-rekwiżiti jkopru firxa wiesgħa ta’ oqsma tal-avjazzjoni u l-interfaċċi tagħhom, minħabba li l-avjazzjoni hija sistema interkonnessa ħafna tas-sistemi , u japplikaw għall-organizzazzjonijiet kollha li huma diġà meħtieġa jkollhom sistema ta’ ġestjoni skont il-legiżlazzjoni dwar is-sikurezza tal-avjazzjoni tal-UE.
• L-organizzazzjonijiet koperti jinkludu organizzazzjonijiet tal-produzzjoni u tad-disinn, l-operaturi tal-ajru, l-organizzazzjonijiet tal-manutenzjoni, l-organizzazzjonijiet tal-ġestjoni tal-ajrunavigabbiltà, l-organizzazzjonijiet tat-taħriġ, l-operaturi tal-apparat ta’ taħriġ ta’ simulazzjoni tat-titjir, il-fornituri tas-servizzi tal-ġestjoni tat-traffiku tal-ajru/tas-servizzi tan-navigazzjoni tal-ajru, l-operaturi tal-ajrudromi u s-servizz tal-immaniggjar tar-rampa* fornituri.

MINN META BEDA JAPPLIKA R-REGOLAMENT?

Ilu japplika mill-11 ta’ Settembru 2018.

SFOND

Għal aktar informazzjoni, ara:

• L-Aġenzija tas-Sikurezza tal-Avjazzjoni tal-Unjoni Ewropea (EASA) (L-Unjoni Ewropea)
• EASA (L-Aġenzija tas-Sikurezza tal-Avjazzjoni tal-Unjoni Ewropea).

TERMINI EWLENIN

DOKUMENT PRINĊIPALI

Ir-Regolament (UE) 2018/1139 tal-Parlament Ewropew u tal-Kunsill tal-4 ta’ Lulju 2018 dwar regoli komuni fil-qasam tal-avjazzjoni ċivili u li jistabbilixxi Aġenzija tas-Sikurezza tal-Avjazzjoni tal-Unjoni Ewropea, u li jemenda r-Regolamenti (KE) Nru 2111/2005, (KE) Nru 1008/2008, (UE) Nru 996/2010, (UE) Nru 376/2014 u d-Direttivi 2014/30/UE u 2014/53/UE tal-Parlament Ewropew u tal-Kunsill, u li jħassar ir-Regolamenti (KE) Nru 552/2004 u (KE) Nru 216/2008 tal-Parlament Ewropew u tal-Kunsill u r-Regolament tal-Kunsill (KEE) Nru 3922/91 (ĠU L 212, 22.8.2018, pp. 1–122).

Emendi suċċessivi għar-Regolament (UE) 2018/1139 ġew inkorporati fid-dokument oriġinali. Din il-verżjoni konsolidata għandha valur dokumentarju biss.

DOKUMENTI RELATATI

Ir-Regolament Delegat tal-Kummissjoni (UE)2022/1645 tal-14 ta’ Lulju 2022 li jistabbilixxi regoli għall-applikazzjoni tar-Regolament (UE) 2018/1139 tal-Parlament Ewropew u tal-Kunsill, fir-rigward tar-rekwiżiti għall-ġestjoni tar-riskji għas-sigurtà tal-informazzjoni b’impatt potenzjali fuq is-sikurezza tal-avjazzjoni għall-organizzazzjonijiet koperti bir-Regolamenti tal-Kummissjoni (UE) Nru 748/2012 u (UE) Nru 139/2014 u li jemenda r-Regolamenti tal-Kummissjoni (UE) Nru 748/2012 u (UE) Nru 139/2014 (ĠU L 248, 26.9.2022, pp. 18–31).

Ir-Regolament Delegat tal-Kummissjoni (UE) Nru 2020/723 tal-4 ta’ Marzu 2020 li jistabbilixxi regoli dettaljati fir-rigward tal-aċċettazzjoni ta’ ċertifikazzjoni ta’ bdoti ta’ pajjiżi terzi u li jemenda r-Regolament (UE) Nru 1178/2011 (ĠU L 170, 2.6.2020, pp. 1–8).

Ir-Regolament ta’ Implimentazzjoni tal-Kummissjoni (UE) 2019/947 tal-24 ta’ Mejju 2019 dwar ir-regoli u l-proċeduri għall-operazzjoni ta’ inġenji tal-ajru mingħajr bdot abbord (ĠU L 152, 11.6.2019, pp. 45–71).

Ara l-verżjoni konsolidata.

Ir-Regolament tal-Kummissjoni (UE) Nru 1321/2014 tas-26 ta’ Novembru 2014 dwar il-kontinwità tal-ajrunavigabbiltà ta’ inġenji tal-ajru u prodotti, partijiet u tagħmir ajrunawtiku, u dwar l-approvazzjoni ta’ organizzazzjonijiet u persunal involut f’dan ix-xogħol (ĠU L 362, 17.12.2014, pp. 1–194).

Ara l-verżjoni konsolidata.

Id-Direttiva 2014/53/UE tal-Parlament Ewropew u tal-Kunsill tas-16 ta’ April 2014 dwar l-armonizzazzoni tal-liġijiet tal-Istati Membri marbuta mat-tqegħid fis-suq ta’ tagħmir tar-radju u li tħassar id-Direttiva 1999/5/KE (ĠU L 153, 22.5.2014, pp. 62–106).

Ara l-verżjoni konsolidata.

Ir-Regolament (UE) Nru 376/2014 tal-Parlament Ewropew u tal-Kunsill tat-3 ta’ April 2014 dwar ir-rappurtar, l-analiżi u s-segwitu ta’ okkorrenzi fl-avjazzjoni ċivili, li jemenda r-Regolament (UE) Nru 996/2010 tal-Parlament Ewropew u tal-Kunsill u li jħassar id-Direttiva 2003/42/KE tal-Parlament Ewropew u tal-Kunsill, u r-Regolamenti tal-Kummissjoni (KE) Nru 1321/2007 u (KE) Nru 1330/2007 (ĠU L 122, 24.4.2014, pp. 18–43).

Ara l-verżjoni konsolidata.

Id-Direttiva 2014/30/UE tal-Parlament Ewropew u tal-Kunsill tas-26 ta’ Frar 2014 dwar l-armonizzazzjoni tal-liġijiet tal-Istati Membri relatati mal-kompatibbiltà elettromanjetika (riformulazzjoni) (ĠU L 96, 29.3.2014, pp. 79–106).

Ara l-verżjoni konsolidata.

Ir-Regolament tal-Kummissjoni (UE) Nru 748/2012 tat-3 ta’ Awissu 2012 li jistabbilixxi regoli ta’ implimentazzjoni għaċ-ċertifikazzjoni tal-airworthiness u ambjentali ta’ inġenji tal-ajru u ta’ prodotti, partijiet u tagħmir relatat, kif ukoll għaċ-ċertifikazzjoni ta’ organizzazzjonijiet relatati mad-disinn u l-produzzjoni (riformulazzjoni) (ĠU L 224, 21.8.2012, pp. 1–85).

Ara l-verżjoni konsolidata.

Ir-Regolament (UE) Nru 996/2010 tal-Parlament Ewropew u tal-Kunsill tal-20 ta’ Ottubru 2010 dwar l-investigazzjoni u l-prevenzjoni ta’ aċċidenti u inċidenti fis-settur tal-avjazzjoni ċivili u li jħassar id-Direttiva 94/56/KE (ĠU L 295, 12.11.2010, pp. 35–50).

Ara l-verżjoni konsolidata.

Ir-Regolament (KE) Nru 1008/2008 tal-Parlament Ewropew u tal-Kunsill tal-24 ta’ Settembru 2008 dwar regoli komuni għall-operat ta’ servizzi tal-ajru fil-Komunità (Riformulazzjoni) (ĠU L 293, 31.10.2008, pp. 3–20).

Ara l-verżjoni konsolidata.

Ir-Regolament (KE) Nru 2111/2005 tal-Parlament Ewropew u tal-Kunsill tal-14 ta’ Diċembru 2005 dwar l-istabbiliment ta’ lista Komunitarja ta’ kumpaniji tal-ajru li huma suġġetti għal projbizzjoni ta’ operar fil-Komunità u li jinforma lill-passiġġieri tat-trasport bl-ajru dwar l-identità tal-kumpanija tal-ajru li topera, u li tħassar l-Artikolu 9 tad-Direttiva 2004/36/KE (ĠU L 344, 27.12.2005, pp. 15–22).

Ara l-verżjoni konsolidata.

l-aħħar aġġornament 18.10.2022