Tariffi tar-roaming fi ħdan l-Unjoni Ewropea

 

SOMMARJU TA’:

Ir-Regolament (UE) 2022/612 dwar ir-roaming fuq networks pubbliċi tal-komunikazzjonijiet mobbli fi ħdan l-UE

X’INHU L-GĦAN TAR-REGOLAMENT?

Huwa għandu l-għan li jestendi u jtejjeb is-servizzi tar-roaming meta l-utenti jivvjaġġaw barra minn pajjiżhom fl-Unjoni Ewropea (UE) b’benefiċċji addizzjonali, waqt li joffrilhom konnettività u informazzjoni aħjar u jipproteġihom mill-prezzijiet eċċessivi għas-sejħiet, għall-messaġġi tal-SMS u għad-data billi jkomplu jipprojbixxu ħlas addizzjonali. Dan is-servizz imtejjeb huwa wkoll irreferut bħala “roam like at home”.

Għandu l-għan speċifiku li:

• jassigura servizz ġenwin ta’ “roam like at home” billi jirregola l-kundizzjonijiet tas-servizz tar-roaming kif ukoll l-aċċess tal-operaturi tan-networks pubbliċi tal-komunikazzjoni mobbli;
• iżid it-trasparenza u jtejjeb l-aċċess għal informazzjoni dwar it-tariffi;
• iżid it-trasparenza għal utenti ta’ servizzi tar-roaming mhux regolati, bħal abbord ta’ vapuri jew inġenji tal-ajru u servizzi ta’ valur miżjud (bħal helpdesks, kumpaniji tal-assigurazzjoni jew linji tal-ajru);
• jassigura aċċess għal servizzi ta’ emerġenza mingħajr ħlas u jżid it-trasparenza dwar aċċess għal servizzi ta’ emerġenza, b’mod partikolari permezz ta’ mezzi alternattivi ta’ komunikazzjoni f’emerġenza.

PUNTI EWLENIN

L-estensjoni tar-roaming b’rati nazzjonali sal-2032

• It-tariffi tar-roaming tneħħew fl-UE fil-15 ta’ Ġunju 2017, iżda l-leġiżlazzjoni skadiet fit-30 ta’ Ġunju 2022. Dan ir-regolament il-ġdid huwa validu sal-2032.

Aċċess għar-roaming bl-ingrossa*

• L-operaturi ta’ network mobbli jeħtieġu li jilħqu t-talbiet kollha raġonevoli għall-aċċess għar-roaming bl-ingrossa, partikolarment b’mod li jħalli lill-fornitur tar-roaming jirrepplika s-servizzi mobbli bl-imnut offerti lokalment fejn dan ikun teknikament possibbli, sabiex isir dan fuq in-network fejn qed issir iż-żjara.
• L-operaturi tan-network tal-mowbajl jistgħu jirrifjutaw biss talbiet għal aċċess għar-roaming bl-ingrossa abbażi ta’ kriterji oġġettivi, bħal fattibilità teknika u l-integrità tan-network. Konsiderazzjonijiet kummerċjali mhumiex raġunijiet għalfejn talbiet għal aċċess għar-roaming bl-ingrossa għandhom jiġu rifjutati sabiex jillimitaw il-provvediment ta’ servizzi tar-roaming kompetittivi.

Il-provvista ta’ servizzi tar-roaming bl-imnut irregolat

• Il-fornituri tar-roaming jeħtieġu li ma japplikawx ħlas addizzjonali mal-prezzijiet tal-imnut domestiċi għal klijenti fi kwalunkwe Stat Membru tal-UE sabiex:
  • isiru u jintlaqgħu sejħiet;
  • jintbagħtu u jirċievu messaġġi SMS;
  • jużaw konnessjoni tal-internet, bħal email u apps imqabbda mal-internet;
  • iniżżlu jew itellgħu data, inklużi messaġġerija instantanja, vidjokonferenzi u sejħiet bil-vuċi bl-użu ta’ data.
• Is-servizz offrut jeħtieġ li ma jkunx inqas vantaġġjat minn dak offrut lokalment, b’mod partikolari rigward il-kwalità tas-servizz, fejn l-istess ġenerazzjoni ta’ networks ta’ komunikazzjonijiet u teknoloġiji mobbli jkunu disponibbli fuq in-network li qed iżżur.
• L-operaturi tal-komunikazzjoni mobbli jeħtieġu li jevitaw dewmien mhux raġonevoli meta jgħaddu bejn in-netwerks fil-qsim tal-fruntieri interni tal-UE.

Tariffi bl-ingrossa għal servizzi tar-roaming regolati

• Mill-1 ta’ Lulju 2022:
  • it-tariffa għal sejħiet hija limitata għal EUR 0.022 għal kull minuta, mnaqqsa għal EUR 0.019 fl-1 ta’ Jannar 2025 sat-30 ta’ Ġunju 2032;
  • it-tariffa għal messaġġi tal-SMS hija limitata għal EUR 0.004 għal kull SMS, imnaqqsa għal EUR 0.003 fl-1 ta’ Jannar 2025 sat-30 ta’ Ġunju 2032;
  • tariffi għal data huma limitati għal EUR 2.00 għal kull gigabyte, imnaqqsa gradwalment għal EUR 1.00 fl-2027, applikati sat-30 ta’ Ġunju 2032.
• Jekk il-klijenti jagħmlu iktar roaming milli huwa permess taħt il-politika tal-użu ġust, l-operatur jista’ japplika ħlas addizzjonali li ma jistax ikun iktar mil-limitu tal-prezz bl-ingrossa tar-roaming imsemmi hawn fuq.

Trasparenza

• L-operaturi tar-roaming jeħtieġ li:
  • jinfurmaw il-klijenti dwar il-kwalità tas-servizzi tar-roaming;
  • jinfurmaw il-klijenti dwar it-tipi ta’ servizzi li jistgħu jkunu soġġetti għal żidiet fit-tariffi waqt ir-roaming;
  • jassiguraw li l-klijenti jinżammu nfurmati dwar it-tariffi għas-servizzi tar-roaming tad-data regolati, b’metodi li jħallu l-utenti jifhmu l-konsegwenzi finanzjarji ta’ tali użu u jippermettulhom li jissorveljaw u jikkontrollaw l-ispiża tagħhom;
  • japplikaw il-faċilità li timblokka aktar użu tas-servizzi tar-roaming ladarba l-konsum totali jilħaq limitu, bħal EUR 50 jew EUR 100;
  • fejn xieraq, jinfurmaw il-klijenti dwar ir-riskju ta’ konnessjoni awtomatika u mhix ikkontrollata ta’ roaming u tniżżil ta’ data, qabel ma jidħlu f’kuntratt bl-imnut u regolarment wara dan;
  • jinnotifikaw lill-klijenti, mingħajr ħlas, dwar kif jistgħu jitfu l-konnessjonijiet awtomatiċi tar-roaming tad-data sabiex jevitaw konsum tad-data mhux ikkonntrollat;
  • jipprovdu informazzjoni personalizzata dwar il-prezzijiet permezz ta’ messaġġ awtomatiku bla ħlas lill-klijenti meta jindħlu fi Stat Membru, għajr dak li huwa l-fornitur tagħhom lokali, inkluż informazzjoni dwar il-politika ta’ użu ġust, kwalunkwe ħlas addizzjonali u l-fatt li huma qed jirriskjaw jiġu ċċarġjati prezz ogħla meta jużaw servizzi ta’ valur miżjud;
  • jipprovdu informazzjoni, permezz ta’ messaġġ awtomatiku bla ħlas lill-klijenti li deħlin fi Stat Membru ieħor għajr dak tal-fornitur lokali tagħhom, dwar l-aċċess għal servizzi ta’ emerġenza, inkluż permezz ta’ mezzi alternattivi;
  • jieħdu passi raġonevoli sabiex jipproteġu l-klijenti minn tariffi żejda għal sejħiet bil-vuċi u għal messaġġi tal-SMS jekk bla ma jridu jitqabbdu ma’ network mobbli pubblika mhux terrestjali jew ma’ network f’pajjiż barra mill-UE.

Użu ġust

Sabiex jipprevjenu klijenti li jużaw servizzi tar-roaming għal għanijiet oħra minbarra dawk ta’ vvjaġġar perjodiku, il-fornituri tas-servizz jistgħu japplikaw limitu ta’ użu ġust. L-operatur jeħtieġ jinforma l-klijenti bil-quddiem dwar tali limitu u jeħtieġ li jibgħat twissija jekk il-klijent jilħaq it-80% tal-limitu. Kwalunkwe politika ta’ użu ġust teħtieġ li tkun konsistenti mal-pjanijiet tat-tariffi tal-utenti u ssegwi l-formola dettaljata spjegata fir-Regolamenti ta’ Implimentazzjoni tal-Kummissjoni (UE) 2016/2286.

Kif tilħaq servizzi ta’ emerġenza barra minn pajjiżek

• Sa Ġunju 2023, l-utenti ser jirċievu awtomatikament tfakkira meta jivvjaġġaw barra minn pajjiżhom li jistgħu jaċċessaw servizzi ta’ emerġenza mingħajr ħlas meta jċemplu n-numru Ewropew tal-emerġenza “112” u tal-mezz alternattiv ta’ kuntatt disponibbli, bħal dak permezz ta’ messaġġi f’ħin reali jew apps.
• Operaturi tan-network li żżurhom m’għandhomx jiċċarġjaw għal sejħiet ta’ servizzi ta’ emerġenza.
• Sa tmien l-2022, il-Korp ta’ Regolaturi Ewropej tal-Komunikazzjonijiet Elettroniċi għandu jwaqqaf bażi ta’ data unika madwar l-UE kollha għal fornituri ta’ servizzi u awtoritajiet nazzjonali regolatorji li tinkludi:
  • l-innumerar tal-firxiet għal servizzi ta’ valur miżjud f’kull Stat Membru;
  • mezzi ta’ aċċess għal servizzi ta’ emerġenza mandati f’kull Stat Membru li jkunu teknikament fattibbli biex jintużaw minn klijenti li qed jużaw ir-roaming.

MINN META JAPPLIKA R-REGOLAMENT?

Ilu japplika mill-1 ta’ Lulju 2022.

SFOND

Ir-Regolament ifassal mill-ġdid u jħassar ir-Regolament (UE) Nru 531/2012 u (UE) 2015/2120.

Għal aktar informazzjoni, ara:

• Roaming: imqabbad kullimkien fl-UE mingħajr ħlas addizzjonali (Il-Kummissjoni Ewropea).

TERMINI EWLENIN

DOKUMENT PRINĊIPALI

Ir-Regolament (UE) 2022/612 tal-Parlament Ewropew u tal-Kunsill tas-6 ta’ April 2022 dwar ir-roaming fuq netwerks pubbliċi ta’ komunikazzjoni mobbli fi ħdan l-Unjoni (riformulazzjoni) (ĠU L 115, 13.4.2022, pp. 1-37).

DOKUMENTI RELATATI

Ir-Regolament ta’ Implimentazzjoni tal-Kummissjoni (UE) 2016/2286 tal-15 ta’ Diċembru 2016 li jistabbilixxi regoli dettaljati dwar l-applikazzjoni ta’ politika tal-użu ġust u dwar il-metodoloġija għall-valutazzjoni tas-sostenibbiltà tat-tneħħija tal-ħlasijiet supplimentari tar-roaming bl-imnut u dwar l-applikazzjoni li għandu jressaq fornitur tar-roaming għall-finijiet ta’ dik il-valutazzjoni (ĠU L 344, 17.12.2016, pp. 46-62).

Ir-Regolament Delegat tal-Kummissjoni (UE) 2021/654 tat-18 ta’ Diċembru 2020 li jissupplimenta d-Direttiva (UE) 2018/1972 tal-Parlament Ewropew u tal-Kunsill billi jistabbilixxi rata massima unika għat-terminazzjoni ta’ telefonati bil-mobile madwar l-Unjoni u rata massima unika għat-terminazzjoni ta’ telefonati fissi madwar l-Unjoni (ĠU L 137, 22.4.2021, pp. 1-9).

Id-Direttiva (UE) 2019/882 tal-Parlament Ewropew u tal-Kunsill tas-17 ta’ April 2019 dwar ir-rekwiżiti ta’ aċċessibbiltà għall-prodotti u għas-servizzi (ĠU L 151, 7.6.2019, pp. 70-115).

Id-Direttiva (UE) 2018/1972 tal-Parlament Ewropew u tal-Kunsill tal-11 ta’ Diċembru 2018 li tistabbilixxi l-Kodiċi Ewropew għall-Komunikazzjonijiet Elettroniċi (Riformulazzjoni) (ĠU L 321, 17.12.2018, pp. 36-214).

L-emendi suċċessivi għad-Direttiva (UE) 2018/1972 ġew inkorporati fit-test oriġinali. Din il-verżjoni konsolidata għandha valur dokumentarju biss.

Ir-Regolament (UE) 2018/1971 tal-Parlament Ewropew u tal-Kunsill tal-11 ta’ Diċembru 2018 li jistabbilixxi l-Korp ta’ Regolaturi Ewropej tal-Komunikazzjonijiet Elettroniċi (BEREC) u l-Aġenzija għall-Appoġġ tal-BEREC (l-Uffiċċju tal-BEREC), li jemenda r-Regolament (UE) 2015/2120 u li jħassar ir-Regolament (KE) Nru 1211/2009 (ĠU L 321, 17.12.2018, pp. 1-35).

Id-Direttiva (UE) 2016/2102 tal-Parlament Ewropew u tal-Kunsill tas-26 ta’ Ottubru 2016 dwar l-aċċessibbiltà tas-siti elettroniċi u tal-applikazzjonijiet mobbli tal-korpi tas-settur pubbliku (ĠU L 327, 2.12.2016, pp. 1-15).

Id-Deċiżjoni tal-Kummissjoni 2008/294/KE tas-7 ta’ April 2008 dwar kondizzjonijiet armonizzati għall-użu tal-ispektrum għat-tħaddim tas-servizzi ta’ komunikazzjoni mobbli fuq l-inġenji tal-ajru (servizzi MCA) fil-Komunità (ĠU L 98, 10.4.2008, pp. 19-23).

Ara l-verżjoni konsolidata.

Id-Direttiva 2002/58/KE tal-Parlament Ewropew u tal-Kunsill tat-12 ta’ Lulju 2002 dwar l-ipproċessar tad-data personali u l-protezzjoni tal-privatezza fis-settur tal-komunikazzjoni elettronika (Direttiva dwar il-privatezza u l-komunikazzjonijiet elettroniċi) (ĠU L 201, 31.7.2002, pp. 37-47).

Ara l-verżjoni konsolidata.

l-aħħar aġġornament 05.07.2022