ANNESS I

Garanziji addizzjonali li japplikaw għar-reġjonalizzazzjoni ta' l-Afrika ta' Isfel dwar id-dħul temporanju u l-importazzjoni fil-Komunità taż-żwiemel irreġistrati

1.   Il-mard segwenti għandu jkun innotifikat b'mod obbligatorju fl-Afrika ta' Isfel:

Il-marda Afrikana taż-żwiemel (AHS – DAŻ), il-glanders, id-dourine, it-tipi kollha ta' l-enċefalomilitis fl-ispeċi ekwina inkluża dik tal-Venezwela, l-anemija infettiva fl-ispeċi ekwina , stomatitis vesikulari, it-traċna u r-rabbja.

Iż-żona kollha tal-Provinċja tal-Kap tal-Punent hija dikjarata bħala “żona ta' kontroll għall-marda Afrikana taż-żwiemel” bi qbil mad-disposizzjonijiet ta' l-Att dwar il-Mard ta' l Annimali. Fir-rigward tar-reġjonalizzazzjoni tal-marda Afrikana taż-żwiemel, it-territorju tal-Provinċja tal-Kap tal-Punent huwa maqsum fiż-żona ħielsa mid-marda Afrikana taż żwiemel, iż-żona ta' sorveljanza u ż-żona ta' protezzjoni.

Fil-Provinċja tal-Kap tal-Punent, il-marda Afrikana taż-żwiemel hija meqjusa bħala “marda kontrollata” bi qbil mad-disposizzjonijiet ta' l-Att dwar il-Mard ta' l-Annimali.

2.   Reġjonalizzazzjoni:

2.1.   Żona ħielsa mill-marda Afrikana taż-żwiemel:

Iż-żona metroplotana ta’ Cape Town hija żona ħielsa mill-marda Afrikana taż-żwiemel li hija delinejata kif ġej:

—	:	Fruntiera tat-Tramuntana	:	Triq Blaauwberg (M14),
—	:	Fruntiera tal-Lvant	:	Triq Koeberg (M14), Triq Plattekloof (M14), il-Highway N7, il-Highway N1 u l-Highway M5,
—	:	Fruntiera ta' Nofs-in-nhar	:	Triq Ottery, Prince George Drive, Triq Wetton, Triq Riverstone, Triq Tennant, Newlands Drive, Triq Paradise, Union Drive, Rhodes Drive sa l-istazzjon tal-Forestrija ta' Newlands u matul l-Echo Gorge ta' Table Mountain sa Camps Bay,
—	:	Fruntiera tal-Punent	:	Il-linja tal-kosta minn Camps Bay sa Triq Blaauwberg.

2.2.   Żona ta’ sorveljanza tal-marda Afrikana taż-żwiemel:

Iż-żona ħielsa mill-marda Afrikana taż-żwiemel hija mdawwra biż-żona ta’ sorveljanza wiesgħa ta’ mill-anqas 50 km li tinkludi id-distretti maġisterjali ta’ Cape Town, Vredenburg, Hopefield, Mooreesburg, Malmesbury, Wellington, Paarl, Stellenbosch, Kuilsrivier, Goodwood, Wynberg, Simonstown, Somerset Punent, Mitchells Plain u Strand u hija ddefinita bil-Berg Rivier lejn it-Tramuntana, il-Muntanji Hottentots Holland lejn il-lvant u l-kosta lejn in-nofsinnhar u l-punent.

2.3.   Żona ta’ protezzjoni tal-marda Afrikana taż-żwiemel:

Iż-żona ta’ sorveljanza hija mdawwra b’żona ta’ protezzjoni wiesgħa ta’ mill-anqas 100 km li tinkludi d-distretti maġisterjali ta’ Clanwilliam, Piketberg, Ceres, Tulbagh, Worcester, Caledon, Hermanus, Bredasdorp, Robertson, Montagu, Swellendam.

2.4.   Żona infettata bil-marda Afrikana taż-żwiemel:

Il-parti tat-territorju ta’ l-Afrika ta’ Isfel ’il barra mill-Provinċja tal-Kap tal-Punent u l-parti tal-Provinċja tal-Kap tal-Punent ’il barra miż-żona ħielsa AHS u ż-żona ta’ protezzjoni u sorveljanza u li tinkludi d-distretti maġisterjali ta’ Vanrynsdorp, Vredendal, Laingsburg, Ladismith, Heidelberg, Riversdale, il-Bajja Mossel, Calitzdorp, Oudtshoorn, George, Knysna, Uniondale, Prince Albert, Beaufort Punent u Murraysburg.

3.   Vaċċinazzjoni (tilqim):

3.1.   L-ebda vaċċinazzjoni sistematika kontra l-marda Afrikana taż-żwiemel m'hi awtorizzata fiż-żona ħielsa mill-AHS u f'dik ta' sorveljanza.

Madankollu, permezz ta’ deroga, id-Direttur tas-Saħħa ta’ l-Annimali tal-Ministeru ta’ l-Agrikoltura ta’ l-Afrika ta’ Isfel jista’ jagħti permess għal vaċċinazzjoni billi jintuża vaċċin reġistrat polyvalent AHS kif preskritt mill-manifattur tal-vaċċin u għandha tingħata esklussivament minn veterinarju jew Tekniku tas-Saħħa ta’ l-Annimali awtorizzat f’kariga uffiċjali tal-Gvern, ta’ dawk iż-żwiemel skedati li jħallu ż-żona ħielsa mill-AHS jew iż-żona ta’ sorveljanza hinn mill-parametri taż-żona ta’ sorveljanza, bil-kondizzjoni li dawn iż-żwiemel ma jistgħux iħallu s-sehem sat-tluq lejn destinazzjoni barra ż-żona ħielsa mill-AHS u ż-żona ta’ sorveljanza, u l-vaċċinazzjoni għandha tiġi miktuba fil-passaport.

3.2.   Meta l-vaċċinazzjoni ta’ żwiemel irreġistrati kontra l-AHS (marda Afrikana taż-żwiemel) - issir f’żona ’l barra miż-żona ħielsa mill-AHS u miż-żona ta’ sorveljanza, din għandha tingħata minn veterinarju jew Tekniku tas-Saħħa ta’ l-Annimali awtorizzat li jkollu kariga uffiċjali mal-Gvern billi juża il-vaċċin irreġistrat polyvalent AHS kif preskritt mill-manifattur tal-vaċċin u l-vaċċinazzjoni għandha tiġi miktuba fuq il-passaport.

4.   Ir-reġistrazzjoni ta' l-oqsma u l-identifikazzjoni ta' żwiemel:

4.1.   Fiż-żona ħielsa mill-AHS l-oqsma kollha (l-oqsma fit-tifsira ta' l-Artikolu 2(a) tad-Direttiva 90/426/KEE) ikunu identifikati, reġistrati u sorveljati mill-veterinarju ta' l-Istat taż-żona.

4.2.   L-equidae residenti kollha fiż-żona ħielsa mill-AHS jiġu identifikati u d-dokumenti kollha jinżammu. Dawn ta' l-aħħar ikunu jinkludu l-informazzjoni dwar il-moviment kif ukoll fuq is-saħħa u l-istorja tal-vaċċinazzjoni ta' kull annimal.

5.   Il-kontroll tal-moviment

5.1.   Kull moviment ta' l-equidae miż-żona infettata għal dik ta' protezzjoni, ta' sorveljanza u dik ħielsa mill-AHS u kwalunkwe moviment ta' żwiemel miż-żona ta' protezzjoni għal dik ta' sorveljanza u dik ħielsa mill-AHS u kwalunkwe moviment ta' żwiemel miż-żona ta' sorveljanza għal dik ħielsa mill-AHS huwa projbit.

5.2.   Bħala deroga mill-projbizzjonjiet stabbiliti fil-punt 5.1, iż-żwiemel għajr dawk reġistrati jistgħu jiddaħħlu miż-żona infettata għal dik ta' protezzjoni, dik tas-sorveljanza u dik ħielsa, u miż-zona ta' protezzjoni għal dik ta' sorveljanza u dik ħielsa mill-AHS, u miż-żona ta' sorveljanza għal dik ħielsa mill-AHS esklussivament permezz tal-kondizzjonijiet ta' l-Artikolu 5(3) tad-Direttiva 90/426/KE.

5.2.1.   Ix-xhur ta' Ġunju, Lulju u Awissu huma l-perjodu bla periklu għal kontra l-insetti li jġorru l-mard kif meħtieġ fl-Artikolu 5(3)(a) tad-Direttiva 90/426/KEE.

5.2.2.   L-equidae jinħelsu mill-kwarantina identifikati kif suppost.

5.2.3.   B'żieda mad-disposizzjonijiet li hemm fil-punt 5.2, l-equidae għall-qatla m'għandhomx jidħlu fiż-żona ħielsa u għandhom jidħlu f'dik tas-sorveljanza taħt il-kontroll tal-veterinarju uffiċjali biss għall-qatla immedjata f'biċċeriji magħżula apposta.

5.3.   Bħala deroga mid-disposizzjonijiet fil-punt 5.1, il-moviment taż-żwiemel irreġistrati miż-żona infettata lejn dik ta' protezzjoni jista' jitħalla jseħħ taħt il-kondizzjonijiet li ġejjin:

5.3.1.

Iż-żiemel għandu jkun identifikat b'passaport u d-dettalji dwar il-vaċċinazzjoni għandhom ikunu mniżżla fil-passaport.

5.3.2.

Il-moviment taż-żiemel għandu jkun avżat minn qabel mill-veterinarju uffiċjali li qed jibgħat lill-veterinarju uffiċjali responsabbli fid-distrett tad-destinazzjoni.

5.3.3.

Iż-żiemel għandu jkun akkumpanjat b'ċertifikat li jkun parti mill-passaport u maħruġ mill-veterinarju uffiċjali (veterinarju uffiċjali fit-tifsira ta' l-Artikolu 2(h) tad-Direttiva 90/426/KEE) mill-bini ta' l-oriġini.

5.3.4.

Iċ-ċertifikat għandu jiddikjara li ż-żiemel: — kien klinikament eżaminat fi żmien 48 siegħa qabel id-dispaċċ u ma wera l-ebda sinjali kliniċi ta' mard, — matul l-aħħar 15-il ġurnata ma kienx f'kuntatt (sa fejn jista' jkun aċċertat) ma' żwiemel oħra li jsofru minn mard infettiv jew li jittieħed, — mhuwiex ġej minn xi żona fejn restrizzjonijiet veterinarji marbuta ma' mard li jittieħed minn żwiemel oħra jkunu fis-seħħ u ma jkunx ġej minn qasam li jkun taħt restrizzjonijiet veterinarji, — ma jkunx ġej minn qasam fejn kien hemm każ tal-marda Afrikana taż-żwiemel matul l-aħħar 60 ġurnata, — kien imlaqqam kontra l-marda Afrikana taż-żwiemel minn veterinarju li uża vaċċin polivalenti reġistrat għal kontra din il-marda kif preskritt mill-manifattur tal-vaċċin, minn ta' lanqas 60 jum u mhux aktar minn 24 xahar, qabel id-dħul ta' l-annimal fiż-żona ta' protezzjoni.

5.4.   Bħala deroga mid-disposizzjonijiet fil-punt 5.1, il-moviment taż-żwiemel reġistrati minn żona infettata jew minn dik ta' protezzjoni għaż-żona ta' sorveljanza tista' tkun awtorizzata permezz tal-kondizzjonijiet li ġejjin:

5.4.1.

Iż-żiemel irid ikun identifikat b'passaport waqt li d-dettalji dwar il-vaċċinazzjoni għandhom jitniżżlu fil-passaport.

5.4.2.

Il-moviment taż-żiemel għandu jkun avżat minn qabel mill-veterinarju uffiċjali li qed jawtorizza l-ħruġ lill-veterinarju uffiċjali fid-distrett tad-destinazzjoni.

5.4.3.

Iż-żiemel għandu jkun akkumpanjat b'ċertifikat li jkun parti mill-passaport u maħruġ mill-veterinarju uffċjali (veterinarju uffiċjali fit-tifsira ta' l-Artikolu 2(h) tad-Direttiva 90/426/KEE) fil-bini ta' l-oriġini.

5.4.4.

Iċ-ċertifikat għandu jiddikjara li ż-żiemel: — kien klinikament eżaminat fi żmien 48 siegħa mid-dispaċċ u ma wera l-ebda sinjali kliniċi ta' mard, — matul dawn l-aħħar 15-il ġurnata ma kienx f'kuntatt (sa fejn jista' jkun aċċertat) ma' equidae oħra li jsofru minn xi marda infettiva jew li tittieħed, — ma joriġinax minn żona fejn hemm fis-seħħ restrizzjonijiet veterinarji marbuta ma' mard li jittieħed minn żwiemel oħra u ma jkunx ġej minn qasam li jkun taħt restrizzjonijiet veterinarji, — ma jkunx ġej minn qasam fejn kien hemm każ tal-marda Afrikana taż-żwiemel matul l-aħħar 60 ġurnata, — kien imlaqqam kontra l-marda Afrikana taż-żwiemel minn veterinarju li uża vaċċin polivalenti reġistrat għal kontra din il-marda kif preskritt mill-manifattur tal-vaċċin f'mhux inqas minn 60 jum u mhux aktar minn 24 xahar, qabel id-dħul ta' l-annimal fiż-żona tas-sorveljanza.

5.5.   Bħala deroga mid-disposizzjonijiet fil-punt 5.1, il-moviment taż-żwiemel reġistrati fiż-żona ħielsa mill-AHS jista' jkun awtorizzat permezz tal-kondizzjonijiet li ġejjin:

5.5.1.

Iż-żwiemel irreġistrati jistgħu jitmexxew miż-żona infettata jew minn dik ta' protezzjoni jew minn dik ta' sorveljanza għaż-żona ħielsa mill-AHS permezz tal-kondizzjonijiet li ġejjin: 5.5.1.1. Iż-żiemel għandu jkun identifikat b'passaport u d-dettalji dwar il-vaċċinazzjoni għandhom ikunu mniżżla fil-passaport. 5.5.1.2. Il-moviment taż-żiemel għandu jkun avżat minn qabel mill-veterinarju uffiċjali li jawtorizza l-ħruġ lill-veterinarju uffiċjali tad-distertt tad-destinazzjoni. 5.5.1.3. Iż-żiemel għandu jkun akkumpanjat minn ċertifikat li jifforma parti mill-passaport u jkun maħruġ mill-veterinarju uffiċjali (veterinarju uffiċjali fit-tifsira ta' l-Artikolu 2(g) tad-Direttiva 90/426/KEE) fil-bini ta' l-oriġini. 5.5.1.4. Iċ-ċertifikat għandu jgħid li ż-żiemel: — kien eżaminat klinikament fi 48 siegħa qabel id-dispaċċ u ma wera l-ebda sinjal kliniku ta' mard, u — ma ġiex f'kuntatt waqt l-aħħar 15-il jum (sa fejn hu aċċertabbli) ma' equidae oħrajn li jsofru minn marda kontaġġuża jew infettuża, u — ma joriġinax minn żona fejn hemm restrizzjonijiet veterinarji marbuta ma' mard li jittieħeħed mil-equidae fis-seħħ u m'hux ġej minn azjenda fejn hemm restrizzjonijiet veterinarji, u — nhux ġej minn azjenda fejn kien hemm każ tal-marda Afrikana taż-żwiemel waqt l-aħħar 60 jum, u — jekk iż-żiemel joriġina minn żona barra miż-żona ta' sorveljanza, kien (i) mlaqqam kontra l-marda Afrikana taż-żwiemel minn veterinarju bl-użu ta' tilqima polyvalent reġistrata kif preskritt mil-produttur ta' l-anqas 60 jum, u mhux aktar minn 24 xahar, qabel id-dħul fiż-żona ħielsa mill-AHS, jew (ii) iż-żiemel kien impurtat minn territorju ta' pajjiż jew parti mit-territorju reġjonaliżżat skond l-Artikolu 13(2) tad-Direttiva Nru. 90/426/KEE, kkunsidrata skond il-leġislazzjoni Komunitarja bħala li mhux infettata bil-marda Afrikana taż-żwiemel u nġarr bl-ajru taħt kondizzjonijiet li joffru protezzjoni mill-insetti trasportaturi tal-mard mill-ajruport ta' Johannesburg, għaż-żona ħielsa mill-AHS. 5.5.1.5. Bħala deroga mill-ħames inċiż ta’ punt 5.5.1.4, l-awtoritajiet kompetenti jistgħu, f'każijiet eċċezzjonali, kif stabbiliti fil-leġislazzjoni nazzjonali jew lokali tal-pajjiż li qed jesporta, speċifikament jawtorizzaw it-trasport ta' żiemel reġistrat miż-żona infettata, ta' protezzjoni jew ta' sorveljanza għal żona ħielsa mill-AHS taħt il-kondizzjonijiet segwenti: — iż-żiemel huwa trasportat direttament għall-istazzjon tal-kwarantina approvata għal dak l-użu fiż-żona libera, — it-trasport isir taħt kondizzjonijiet li joffru protezzjoni mill-insetti trasportaturi tal-mard, u għandu jittieħed kont tal-fatturi li jnaqqsu r-riskju, bħall-istaġun liberu mill-insetti trasportaturi, jew bi nhar, l-applikazzjoni ta' repellanti, kopertura ta' l-annimal u ventilazzjoni furzata fuq il-mezz tat-trasport, — iż-żiemel huwa iżolat fl-istazzjon ta' kwarantina li joffru protezzjoni mill-insetti trasportaturi tal-mard għal ta' l-anqas 40 jum, — waqt il-perjodu ta' iżolament, iż-żiemel huwa soġġett għal testijiet għall-marda Afrikana taż-żwiemel magħmula skond l-Anness D tad-Direttiva 90/426/KEE f'żewġ okkażjonijiet, li jsiru fuq kampjuni ta' demm li ttieħdu b'intervall ta' bejn 21 u 30 jum, u t-tieni kampjun ittieħed waqt għaxart ijiem minn mindu telaq mill-istazzjon tal-kwarantina, b'riżultat negattiv, jekk iż-żiemel ma ġiex mlaqqam jew mingħajr żieda fil-livell ta' anti korpi jekk iż-żiemel kien imlaqqam qabel.

5.5.2.

Bħala deroga mid- disposizzjonijiet fil-punt 5.5.1, l-awtoritajiet veterinarji kompetenti jistgħu jawtorizzaw id-dħul temporanju fiż-żona ħielsa mill-AHS ta' żiemel irreġistrat minn qasam magħżul fiż-żona ta' sorveljanza skond il-kondizzjonijiet li ġejjin: 5.5.2.1. Iż-żiemel ikun akkumpanjat minn passaport. Id-dettalji dwar il-vaċċinazzjoni għandhom jitniżżlu fuq il-passaport. 5.5.2.2. Iż-żiemel ikun immarkat b'tali mod biex tkun assigurata verifika sempliċi ta' l-identità u b'hekk tkun tista' ssir korrelazzjoni bejn l-annimal u l-passaport. 5.5.2.3. Il-passaport ikun fih il-liċenzja. Il-liċenzja għandha tiġi rtirata fil-każ li l-kondizzjonijiet li taħthom il-liċenzja tkun inħarġet ma jkunux għadhom aktar imwettqa. 5.5.2.4. Iż-żiemel ma jkunx ġej minn żona fejn ikun hemm fis-seħħ restrizzjonijiet veterinarji marbuta ma' mard li jittieħed minn equidae oħra u ma jkunx ġej minn qasam li jkun taħt restrizzjonijiet veterinarji. 5.5.2.5. Il-qasam magħżul fiż-żona ta' sorveljanza jkun inkluż fi programm ta' sorveljanza ekwivalenti għal dak li jsir fiż-żona ħielsamill-AHS. 5.5.2.6. Iż-żiemel jiddaħħal biss minn sagħtejn wara tlugħ ix-xemx sa sagħtejn qabel inżul ix-xemx fl-istess jum. 5.5.2.7. Iż-żiemel jinżamm separat minn żwiemel li ma jkunux ta' l-istess status ta' saħħa.

5.5.3.

Bħala deroga mid-dispożizzjonijiet fil-punt 5.5.1, l-awtoritajiet veterinarji kompetenti jistgħu joħorġu liċenzja għad-dħul mill-ġdid ta' żiemel reġistrat f'qasam fiż-żona ħielsa mill-AHS li jkun qiegħed jirritorna wara moviment temporanju lejn oqsma magħżula fiż-żona ta' sorveljanza permezz tad-disposizzjonijiet li ġejjin: 5.5.3.1. Iż-żiemel ikun akkumpanjat minn passaport. Id-dettalji dwar il-vaċċinazzjoni għandhom jitniżżlu fil-passaport. 5.5.3.2. Il-passaport għandu jkollu fih il-liċenzja. Il-liċenzja għandha tiġi rtirata fil-każ li l-kondizzjonijiet li permezz tagħhom il-liċenzja tkun inħarġet ma jkunux għadhom aktar imwettqa. 5.5.3.3. Iż-żiemel ma jkunx ġej minn żona fejn ikun hemm fis-seħħ restrizzjonijiet veterinarji marbuta ma' mard li jittieħed minn żwiemel oħra u ma jkunx ġej minn qasam li jkun taħt restrizzjonijiet veterinarji. 5.5.3.4. Il-qasam magħżul fiż-żona ta' sorveljanza huwa inkluż fi programm ta' sorveljanza ekwivalenti għal dak li jsir fiż-żona ħielsa mill-AHS. 5.5.3.5. Iż-żiemel jitħalla jiċċaqlaq minn żona ħielsa mill-AHS għal żona ta' sorveljanza u lura għal dik ħielsa mill-AHS biss minn sagħtejn wara tlugħ ix-xemx sa sagħtejn qabel inżul ix-xemx fl-istess jum. 5.5.3.6. Iż-żiemel jinżamm separat minn żwiemel li ma jkunux ta' l-istess status ta' saħħa.

6.   Sorveljanza

6.1.   Sorveljanza kontinwa ssir fiż-żona ħielsa mill-AHS u fiż-żona ta' sorveljanza li ddur magħha.

6.2.   Ta' kull xahar issir sorveljanza sero-epidemijoloġika għad-marda Afrikana taż-żwiemel fuq minn ta' lanqas 60 żiemel ta' l-għassa identifikati bħala mhux imlaqqma u mferrxa ma' tul iż-żona ħielsa mill-AHS u dik ta' sorveljanza kollha biex ikun ikkonfermat in-nuqqas tal-marda Afrikana taż-żwiemel fiż-żona ħielsa mill-AHS kif ukoll f'dik ta' sorveljanza. Ir-riżultati tat-testijiet għandhom ikunu kkomunikati ta' kull xahar lill-Kummissjoni.

6.3.   Il-każi kollha ta' mwiet ta' żwiemel fiż-żona ħielsa mill-AHS li jkunu ssuspettati minħabba xi marda infettiva u kwalunkwe mewt ta' żiemel identifikat, ikunu eżaminati permezz ta' nekropsja uffiċjali u r-riżultati jkunu kkonfermati bi proċeduri diagnostiċi aċċettabbli u jkunu kkomunikati lill-Kummissjoni.

7.   Il-kriterji ta' residenza

7.1.   Żwiemel reġistrati li ħa jkunu impurtati b’mod permanenti fil-Komunità għandhom jkunu residenti fil-pajjiż minn fejn intbagħtu għal mill-anqas 90 jum, jew mit-twelid f’każ li jkollhom anqas minn 90 jum, jew minn meta jkunu iddaħħlu fil-każ li jkunu impurtati direttament mill-Komunità matul id-90 jum qabel iċ-ċertifikazzjoni għall-esportazzjoni għall-Komunità u għandhom jkunu baqgħu fiż-żona ħielsa mill-AHS għal mill-anqas 60 jum jew mit-twelid f’każ li għandhom anqas minn 60 jum, jew minn meta jkunu iddaħħlu fil-każ li jkunu impurtati direttament fiż-żona ħielsa mill-AHS mill-Komunità matul is-60 jum qabel iċ-ċertifikazzjoni għall-esportazzjoni għall-Komunità.

7.2.   Iż-żwiemel irreġistrati intiżi għal dħul temporanju fil-Komunità għandhom ikunu residenti matul l-aħħar 60 ġurnata immedjatament qabel l-esportazzjoni lejn il-Komunità f'oqsma taħt sorveljanza veterinarja:

—	fiż-żona ħielsa mill-AHS, jew

—	fi Stat Membru, jekk dawn ikunu ġew impurtati lejn iż-żona ħielsa mill-AHS ta' l-Afrika ta' Isfel direttament minn Stat Membru, jew

—

fit-territorju jew parti mit-territorju ta' pajjiżi terzi approvati mill-Komunità għad-dħul temporanju jew l-importazzjoni permanenti taż-żwiemel reġistrati b'mod konformi mad-Direttiva 90/426/KEE jekk dawn kienu ġew importati fiż-żona ħielsa mill-AHS ta' l-Afrika ta' Isfel direttament u permezz tal-kondizzjonijiet stretti daqs dawk stabbiliti għad-dħul temporanju jew l-importazzjoni permanenti taż-żwiemel irreġistrati mill-pajjiżi terzi kkonċernati direttament fl-Istati Membri.

8.   Kriterji ta' kwarantina

8.1.   Iż-żwiemel reġistrati intiżi għall-importazzjoni jew għad-dħul temporanju fil-Komunità għandhom ikunu għaddew minn 40 jum ta' iżolament qabel l-esportazzjoni fi stazzjon ta' kwarantina approvat uffiċjalment u protett kontra l-mard. Dan il-perjodu huwa parti obbligatorja mill-perjodu ta' residenza meħtieġ fiż-żona ħielsa.

8.2.   Matul il-perjodu ta' l-iżolament iż-żiemel għandu jinżamm ġo stalla protetta minn aġenti li jġorru mard minn ta' lanqas minn sagħtejn qabel tlugħ ix-xemx sa sagħtejn wara t-tlugħ ix-xemx ta' l-għada. Jekk ikun meħtieġ xi eżerċizzju, dan għandu jsir fil-perimetri delineati tal-bini ta' kwarantina taħt sorveljanza veterinarja uffiċjali, wara li jkun ingħata t-titlqim effettiv għal kontra l-insetti qabel it-tneħħija tiegħu mill-istalla, u f'iżolament strett minn żwiemel li ma jkunux imħejjija għall-esportazzjoni permezz tal-kondizzjonijiet li jkunu minn ta' lanqas stretti daqs dawk meħtieġa għad-dħul temporanju u l-importazzjoni fil-Komunità.

8.3.   S'issa l-istazzjon tal-kwarantina fil-Ġonna Montagu u f'Kenilworth Racecourse biss ġew identifikati għall-istabbiliment ta' dawn il-faċilitajiet ta' kwarantina fiż-żona ħielsa mil-AHS metropolitana ta' Cape Town. L-awtoritajiet veterinarji ntrabtu li javżaw lill-Kummissjoni u lill-Istati Membri bl-approvazzjoni ta' stazzjonijiet ta' kwarantina addizzjonali.

9.   Il-kriterji tat-test

9.1.   Matul il-perjodu ta' l-iżolament, it-testijiet tas-saħħa ta' l-annimal għad-marda Afrikana taż-żwiemel, id-dourine, glanders l-enċefalożi ta' l-ispeci ekwina u kwalunkwe marda oħra, kif meħtieġ fiċ-ċertifikati xierqa tas-saħħa ta' l-annimali, għandhom jitwettqu, bir-riżultati jkunu speċifikati fiċ-ċertifikat.

9.2.   It-testijiet kollha tas-saħħa għandhom isiru f'laboratorju akkreditat.

10.   Iċ-ċertifikat tas-saħħa ta' l-annimal għandu jinħareġ u jkun iffirmat mill-veterinarju uffiċjali ta' l-istazzjon tal-kwarantina.

11.   Jekk żwiemel reġistrati jkunu trasportati bl-ajru, it-trasport taż-żwiemel mill-istazzjoni ta’ kwarantina sa’ l-ajruplan għandu jsir taħt kundizzjonijiet li jipproteġuhom minn vettori. Dawn il-kundizzjonijiet jinżammu matul il-vjaġġ kollu.

12.   Jekk żwiemel reġistrati jkunu trasportati bil-baħar, għandhom japplikaw il-kundizzjonijiet li ġejjin:

Vapuri li jittrasportaw żwiemel reġistrati mill-port ta’ Cape Town lejn port fil-Komunità approvat skond id-Direttiva tal-Kunsill 91/496/KEE (1) bħala post ta’ spezzjoni fuq il-fruntiera għal kontrolli veterinarji fuq żwiemel reġistrati, ma jistgħux, fl-ebda punt bejn it-tluq u l-wasla tagħhom fid-destinazzjoni tagħhom, jieqfu f’port fit-territorju jew f’parti mit-territorju ta’ pajjiż terz li ma huwiex approvat għall-importazzjoni ta’ equidae fil-Komunità. Il-kaptan tal-vapur għandu jagħti prova li dawn il-kundizzjoni kienu rispettati billi jimla d-dikjarazzjoni fl-Anness II.

---

(1)  ĠU L 268, 24.9.1991, p. 56.

ANNESS II

Test ta 'immaġni

ANNESS III

Deċiżjoni mħassra flimkien ma’ l-emendamenti suċċessivi tagħha

Deċiżjoni tal-Kummissjoni 97/10/KE (ĠU L 3, 7.1.1997, p. 9)
Deċiżjoni tal-Kummissjoni 2001/622/KE (ĠU L 216, 10.8.2001, p. 26)	Artikolu 2 u Anness biss
Deċiżjoni tal-Kummissjoni 2003/541/KE (ĠU L 185, 24.7.2003, p. 41)	Artikolu 3 u Annessi III u IV biss
Deċiżjoni tal-Kummissjoni 2004/117/KE (ĠU L 36, 7.2.2004, p. 20)	Artikolu 3 u Anness III biss

ANNESS IV

TABELLA TA’ KORRELAZZJONI

Deċiżjoni 97/10/KE	Din id-Deċiżjoni
Artikolu 1	Artikolu 1
Artikolus 2 sa 5	—
—	Artikolu 2
Artikolu 6	Artikolu 3
Anness I	Anness I
Anness II	—
Anness III	—
Anness IV	Anness II
—	Anness III
—	Anness IV