1.   Sainmhíneofar ollioncam náisiúnta ag praghsanna an mhargaidh (OIN) agus olltáirgeacht intíre ag praghsanna an mhargaidh (OTI) i gcomhréir leis an gCóras Cuntas Eorpach (CCE 2010) a bunaíodh le Rialachán (AE) Uimh. 549/2013.

2.   I gcomhréir le pointe 8.89 d'Iarscríbhinn A a ghabhann le Rialachán (AE) Uimh. 549/2013, ciallaíonn OTI an toradh deireanach ar ghníomhaíocht táirgthe na n-aonad táirgthe cónaitheach. Is féidir é a shainmhíniú ar thrí bhealach:

3.   I gcomhréir le pointe 8.94 d'Iarscríbhinn A a ghabhann le Rialachán (AE) Uimh. 549/2013, ciallaíonn OIN an t-ioncam príomha iomlán atá infhála ag aonaid institiúideacha chónaitheacha: cúiteamh d'fhostaithe, cánacha ar tháirgeadh agus ar allmhairí lúide fóirdheontais, ioncam ó mhaoin (infhála lúide iníoctha), ollbharrachas oibriúcháin agus ollioncam measctha. Tá OIN cothrom le OTI lúide ioncam príomha atá iníoctha ag aonaid chónaitheacha institiúideacha le haonaid neamhchónaitheacha institiúideacha móide ioncam príomha atá infhála ag aonaid chónaitheacha institiúideacha ón gcuid eile den domhan.

1.   Ríomhfaidh na Ballstáit OIN mar a shainmhínítear in Airteagal 1 i gcomhthéacs thiomsú na gcuntas náisiúnta.

2.   Roimh 1 Deireadh Fómhair gach bliain, cuirfidh na Ballstáit, i gcomhthéacs nósanna imeachta cuntasaíochta náisiúnta, figiúirí maidir le comhiomláin OIN agus maidir lena chomhpháirteanna ar fáil don Choimisiún (Eurostat), i gcomhréir leis na sainmhínithe dá dtagraítear in Airteagal 1. Déanfar iomláin le haghaidh OTI agus a chomhpháirteanna a thíolacadh i gcomhréir leis na trí chur chuige dá dtagraítear in Airteagal 1(2). Déanfar sonraí a tharchur don bhliain roimhe agus cuirfear in iúl aon athruithe a rinneadh ar na sonraí do bhlianta roimhe sin ag an am céanna.

3.   Beidh tuarascáil ar cháilíocht na sonraí OIN ag gabháil le tarchur na sonraí dá dtagraítear i mír 2. Sa tuarascáil sin, déanfar an mhodheolaíocht a úsáidtear chun na sonraí a tháirgeadh a mhionshonrú, agus déanfar cur síos inti ar aon athruithe suntasacha ar na foinsí agus ar na modhanna a úsáideadh agus míneofar inti na hathbhreithnithe a rinneadh ar na comhiomláin OIN agus a gcomhpháirteanna le hais na dtréimhsí roimhe sin.

1.   Tabharfaidh na Ballstáit don Choimisiún (Eurostat) fardal de na foinsí agus na modhanna a úsáideadh chun comhiomláin agus comhpháirteanna OIN a tháirgeadh i gcomhréir le CCE 2010.

2.   Bunóidh an Coimisiún, trí bhíthin gníomhartha cur chun feidhme, struchtúr agus socruithe mionsonraithe an fhardail dá dtagraítear i mír 1 den Airteagal seo, i gcomhréir le hIarscríbhinn A a ghabhann le Rialachán (AE) Uimh. 549/2013, mar aon le tráthchlár le haghaidh nuashonrú agus tarchur an fhardail. Agus a chumhacht á fheidhmiú aige, áiritheoidh an Coimisiún nach bhforchuirfidh gníomhartha cur chun feidhme den chineál sin aon chostas suntasach breise a d'fhágfadh ualach díréireach gan bonn cirt leis ar na Ballstáit. Déanfar na gníomhartha cur chun feidhme sin a ghlacadh i gcomhréir leis an nós imeachta scrúdúcháin dá dtagraítear in Airteagal 8(2) den Rialachán seo. Beidh an fardal comhsheasmhach le CCE 2010 agus seachnóidh sé dúbailt agus ró-ualú.

3.   Chun anailísí inchomparáide ar chomhlíonadh a éascú, déanfaidh an Coimisiún treoir a tharraingt suas maidir le fardail i ndlúthchomhar leis an sainghrúpa dá dtagraítear in Airteagal 4.

1.   Déanfaidh an Coimisiún na foinsí, a n-úsáidí agus na modhanna san fhardal dá dtagraítear in Airteagal 3(1) a fhíorú. Chun na críche sin, úsáidfear samhail fíorúcháin arna dréachtú ag an gCoimisiún i ndlúthchomhar leis an sainghrúpa dá dtagraítear in Airteagal 4. Beidh an tsamhail bunaithe ar na prionsabail um athbhreithniú piaraí agus um éifeachtúlacht costais agus cuirfear san áireamh inti na gníomhartha tarmligthe dá dtagraítear sa dara fomhír de mhír 2 den Airteagal seo.

2.   Beidh sonraí OIN iontaofa, uileghabhálach agus inchomparáide.

Glacfaidh an Coimisiún gníomhartha tarmligthe i gcomhréir le hAirteagal 7 chun an fhoráil a leagtar síos sa chéad fhomhír den mhír seo a fhorlíonadh tríd an liosta saincheisteanna a ndíreofar orthu i ngach timthriall fíorúcháin a shainiú ar mhaithe le hiontaofacht, uileghabhálacht agus an méid is mó inchomparáideachta is féidir a áirithiú i dtaca le sonraí OIN, i gcomhréir le CCE 2010.

3.   Bunóidh an Coimisiún, trí bhíthin gníomhartha cur chun feidhme, bearta ar leith chun go mbeidh sonraí OIN níos inchomparáide, níos iontaofa agus níos uileghabhálaí, bunaithe ar an liosta saincheisteanna a shaineoidh an Coimisiún sna gníomhartha tarmligthe dá dtagraítear sa dara fomhír de mhír 2 den Airteagal seo. Tabharfar an t-údar cuí le gníomhartha cur chun feidhme den sórt sin, i gcomhréir le CCE 2010. Déanfar na gníomhartha cur chun feidhme sin a ghlacadh i gcomhréir leis an nós imeachta scrúdúcháin dá dtagraítear in Airteagal 8(2).

1.   Gan dochar do na cigireachtaí dá bhforáiltear in Airteagal 2 de Rialachán (AE, Euratom) Uimh. 608/2014, féadfaidh an Coimisiún (Eurostat) cuairteanna faisnéise OIN a thabhairt sna Ballstáit, i gcás ina meastar gurb iomchuí sin.

2.   Eagrófar na cuairteanna faisnéise dá dtagraítear i mír 1 den Airteagal seo chun críocha cáilíocht na gcomhiomlán OIN agus a gcomhpháirteanna a fhíorú agus comhlíonadh CCE 2010 a fhíorú. Agus a cheart chun cuairteanna faisnéise den sórt sin a thabhairt á fheidhmiú aige, urramóidh an Coimisiún (Eurostat) na rialacha maidir le rúndacht staidrimh atá leagtha síos i gCaibidil V de Rialachán (CE) Uimh. 223/2009.

3.   Le linn dó cuairteanna faisnéise a thabhairt sna Ballstáit, féadfaidh an Coimisiún (Eurostat), cabhair a iarraidh ó shaineolaithe cuntas náisiúnta a dhéanann ionadaíocht ar údaráis staidrimh náisiúnta Ballstát eile agus gríosaítear é chun é sin a dhéanamh.

Beidh na saineolaithe cuntas náisiúnta cláraithe ar liosta a bheidh bunaithe ar thograí deonacha arna seoladh chuig an gCoimisiún (Eurostat) ag na húdaráis náisiúnta atá freagrach as cuntais náisiúnta a thuairisciú.Is deonach atá rannpháirtíocht saineolaithe cuntas náisiúnta na mBallstát eile sna cuairteanna faisnéise sin.

1.   Is faoi réir na gcoinníollacha a leagtar síos san Airteagal seo a thugtar an chumhacht don Choimisiún chun gníomhartha tarmligthe a ghlacadh.

2.   Déanfar an chumhacht chun gníomhartha tarmligthe a ghlacadh dá dtagraítear sa dara fomhír d'Airteagal 5(2) a thabhairt don Choimisiún go ceann tréimhse 5 bliana amhail ón 18 Aibreán 2019. Déanfaidh an Coimisiún, tráth nach déanaí ná 9 mí roimh dheireadh na tréimhse 5 bliana, tuarascáil a tharraingt suas maidir le tarmligean na cumhachta. Déanfar tarmligean na cumhachta a fhadú go hintuigthe go ceann tréimhsí comhfhaid, mura rud é go gcuireann Parlaimint na hEorpa nó an Chomhairle in aghaidh an fhadaithe sin tráth nach déanaí ná 3 mhí roimh dheireadh gach tréimhse.

3.   Féadfaidh Parlaimint na hEorpa nó an Chomhairle tarmligean na cumhachta dá dtagraítear sa dara fomhír d'Airteagal 5(2) a chúlghairm aon tráth. Déanfaidh cinneadh chun cúlghairm a dhéanamh deireadh a chur le tarmligean na cumhachta atá sonraithe sa chinneadh sin. Gabhfaidh éifeacht leis an lá tar éis fhoilsiú an chinnidh in Iris Oifigiúil an Aontais Eorpaigh nó ar dháta is déanaí a shonrófar sa chinneadh. Ní dhéanfaidh sé difear do bhailíocht aon ghníomhartha tarmligthe atá i bhfeidhm cheana.

4.   Roimh dó gníomh tarmligthe a ghlacadh, rachaidh an Coimisiún i mbun comhairliúchán le saineolaithe arna n-ainmniú ag gach Ballstát i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr.

5.   A luaithe a ghlacfaidh sé gníomh tarmligthe, tabharfaidh an Coimisiún fógra, an tráth céanna do Pharlaimint na hEorpa agus don Chomhairle faoi.

6.   Ní thiocfaidh gníomh tarmligthe a ghlactar de bhun an dara fomhír d'Airteagal 5(2) i bhfeidhm ach amháin mura mbeidh aon agóid curtha in iúl ag Parlaimint na hEorpa ná ag an gComhairle laistigh de thréimhse 2 mhí tar éis fógra faoin ngníomh sin a thabhairt do Pharlaimint na hEorpa agus don Chomhairle nó más rud é, roimh dhul in éag na tréimhse sin, go mbeidh Parlaimint na hEorpa agus an Chomhairle araon tar éis a chur in iúl don Choimisiún nach ndéanfaidh siad aon agóid. Déanfar an tréimhse sin a fhadú 2 mhí ar thionscnamh Pharlaimint na hEorpa nó na Comhairle.

1.   Déanfaidh an Coiste um an gCóras Staidrimh Eorpach a bunaíodh le Rialachán (CE) Uimh. 223/2009 cúnamh a thabhairt don Choimisiún. Beidh an coiste sin ina choiste de réir bhrí Rialachán (AE) Uimh. 182/2011.

2.   I gcás ina ndéanfar tagairt don mhír seo, beidh feidhm ag Airteagal 5 de Rialachán (AE) Uimh. 182/2011.