Regolament dwar il-proċedura ta’ ritorn fuq il-fruntiera (RBPR)

PUNTI EWLENIN

Proċedura ta’ ritorn fuq il-fruntiera

Ċittadini ta’ pajjiżi terzi u persuni ipolidi li l-applikazzjonijiet tagħhom kienu miċħuda fil-kuntest tal-proċedura ta’ ażil fuq il-fruntiera ma jitħallewx jidħu fit-territorju tal-Istat Membru kkonċernat.

• Dawn l-individwi normalment iridu joqgħodu f’postijiet ħdejn il-fruntiera esterna jew żoni ta’ tranżitu sa 12-il ġimgħa wara d-deċiżjoni.
• Li toqgħod ġo dawn il-postijiet ma jfissirx li l-individwi huma awtorizzati li jidħlu fil-pajjiż.
• Il-kundizzjonijiet f’dawn il-postijiet jridu jissodisfaw il-kundizzjonijiet materjali għal akkoljenza u kura tas-saħħa, kif deskritt fil-direttiva dwar kundizzjonijiet ta’ akkoljenza (Direttiva (UE) 2024/1346, ara s-sommarju).
• Jekk in-nies kkonċernati ma jkunux jistgħu jkunu rritornati fl-iskadenza ta’ 12-il ġimgħa, il-pajjiż irid ikompli l-proċess ta’ ritorn konformi ma’ dak elenkat fid-direttiva (Direttiva 2008/115/KE, ara s-sommarju)/
• Perjodu ta’ tluq volontarju ta’ sa 15-il jum jista’ jingħata (mingħajr id-dritt li tidħol fil-pajjiż matul dan il-ħin), ħlief jekk:
  • ikun hemm riskju ta’ xi ħarba; jew
  • l-applikazzjoni tagħhom fil-kuntest ta’ proċedura ta’ ażil fuq il-fruntiera tkun miċħuda għax manifestament bla bażi; jew
  • il-persuna kkonċernata tkun ta’ riskju għall-ordni pubblika, sigurtà pubblika jew is-sigurtà nazzjonali tal-Istati Membri.

Detenzjoni

Detenzjoni tista’ tintuża biss bħala miżura tal-aħħar alternattiva wara valutazzjoni individwali tal-każ u għal sitwazzjoniijiet fejn miżuri inqas koerċittivi ma jaħdmux.

• Meta persuna tkun miżmuma matul il-proċedura ta’ ażil fuq il-fruntiera, huma jibqgħu jkunu miżmuma għall-iskopijiet ta’ prevenzjoni tad-dħul tagħhom fit-territorju tal-Istat Membru kkonċernat, waqt it-tħejjija tar-ritorn tagħhom jew it-twettiq tal-proċess ta’ tneħħija.
• Persuni li ma jkunux miżmuma matul il-proċedura ta’ ażil fuq il-fruntiera, huma jistgħu jkunu miżmuma jekk ikun hemm riskju li jaħarbu, jekk jevitaw jew jimpedixxu t-tħejjija tal-proċess tar-ritorn jew tneħħija jew ikunu ta’ riskju għall-ordni pubblika, sigurtà pubblika jew sigurtà nazzjonali.
• Detezzjoni għandha tkun għal perjodu kemm jista’ jkun qasir u ma tistax teċċedi 12-il ġimgħa, ħlief f’sitwazzjonijiet speċifiċi ta’ kriżi.
• Sa Diċembru 2024, l-Aġenzija tal-Unjoni Ewropea għall-Ażil kellha tiżviluppa linji gwida fuq alternattivi għal detezzjoni li tkun tista’ tintuża fil-kuntest ta’ proċedura għal fruntieri.

Sitwazzjonijiet ta’ kriżi

X’jikkostitwixxi kriżi hu definit fir-regolament dwar kriżi (ir-Regolament (UE) 2024/1359, (ara s-sommarju). Dawn il-miżuri dwar kriżijiet japplikaw għal nies suġġetti għall-proċedura tal-ażil fuq il-fruntiera li l-applikazzjonijiet tagħhom kienu miċħuda qabel l-adozzjoni tad-deċiżjoni ta’ implimentazzjoni tal-Kunsill referuta f’Artikolu 4(3) tar-Regolament (UE) 2024/1359 u li m’għandhomx id-dritt jibqgħu hemm, u li m’għandhomx permess jibqgħu wara l-adozzjoni ta’ dik id-deċiżjoni ta’ implimentazzjoni.

• L-Istati Membri jistgħu, għal applikanti li jkunu ġew miċħuda:
  • jestendu l-perjodu tar-residenza ta’ 12-il ġimgħa fil-fruntiera jew f’postijiet tat-tranżitu għal mhux aktar minn sitt ġimgħat;
  • jtawlu l-perjodu ta’ detenzjoni għal nies li t-talbiet ta’ ażil tagħhom ikunu ġew miċħuda.
• Organizzazzjonijiet li joffru konsulenza legali u appoġġ għandhom aċċess għan-nies miżmuma f’detenzjoni jew fil-qsim tal-fruntieri, għalkemm l-Istati Membri jistgħu jillimitaw l-aċċess għal raġunijiet ta’ sigurtà.
• Jekk Stat Membru jemmen li għandu kriżi, hu jista’ jippreżenta talba biex japplika d-derogi previsti fir-regolament dwar kriżijiet (ir-Regolament (UE) 2024/1359).
• L-Istati Membri li japplikaw miżuri ta’ kriżijiet jridu jinfurmaw lin-nies affettwati dwar il-miżuri applikati u d-durata tal-miżuri f’lingwa li jifhmu.

Kontestazzjoni mill-awtoritajiet pubbliċi

Dan ir-regolament ma jaffettwax il-possibbiltà li l-awtoritajiet pubbliċi jikkontestjaw deċiżjonijiet amministrasttivi u ġudizzjarji kif previst fil-leġiżlazzjoni nazzjonali.

Tranżizzjoni għar-regoli l-ġodda

• Sa Settembru 2024, il-Kummissjoni Ewropea, flimkien mal-Istati Membri u aġenziji tal-UE rilevanti, kellha tippreżenta pjan ta’ implimentazzjoni komuni biex tassikura li l-pajjiżi jkunu lesti jimplimentaw il-proċedura tar-ritorn fuq il-fruntiera sa Lulju 2026.
• L-Istati Membri kellhom jiżviluppaw pjanijiet nazzjonali ta’ implimentazzjoni sa Diċembru 2024 biex jiddeskrivu kif ser jibdew iħaddmu dawn il-proċeduri.
• il-Kummissjoni u l-aġenziji tal-UE ser jipprovdu appoġġ.
• L-emenda għar-Regolament (UE) 2021/1148 tiggarantixxi kontribuzzjoni sħiħa mill-UE għall-ispiża rilevanti ta’ ġestjoni tal-fruntieri.

Monitoraġġ u evalwazzjoni

• Il-Kummissjoni trid tirrapporta lill-Parlament Ewropew u lill-Kunsill tal-Unjoni Ewropea dwar l-applikazzjoni ta’ dan ir-regolament sa Ġunju 2028 u kull ħames snin wara dan.
• L-Istati Membri jridu jipprovdu l-informazzjoni bżonnjuża lill-Kummissjoni għal evalwazzjoni.

Iż-żona Schengen

• Ir-regolament jikkostitwixxi żvilupp tal-acquis ta’ Schengen u hu applikabbli għall-Iżlanda, in-Norveġja, il-Liechtenstein u l-Iżvizzera bħala rilevanti.
• Id-Danimarka ddeċidiet li ma tridx tieħu sehem fir-regolament, imma aktar tard tista’ tadottah f’liġi nazzjonali konformi mar-regoli ta’ Schengen.
• Ir-regolament ma japplikax għall-Irlanda għax mhijiex fiż-żona ta’ Schengen.