Il-governanza tad-data Ewropea

SOMMARJU TA’:

Ir-Regolament (UE) 2022/868 dwar il-governanza Ewropea tad-data u li jemenda r-Regolament (UE) 2018/1724 (L-Att dwar il-Governanza tad-Data)

X’INHU L-GĦAN TAR-REGOLAMENT?

L-Att dwar il-Governanza tad-Data (DGA) għandu l-għan li jagħmel iktar data* disponibbli biex terġa’ tintuża u biex tiffaċilita l-kondiviżjoni tad-data f’oqsma bħas-saħħa, l-ambjent, l-enerġija, l-agrikoltura, il-mobilità, il-finanzi, il-manifattura, l-amministrazzjoni pubblika kif ukoll ħiliet għall-benefiċċju taċ-ċittadini u tan-negozji tal-Unjoni Ewropea (UE), biex toħloq impjiegi u tistimula l-innovazzjoni.

PUNTI EWLENIN

Ir-regolament jistabbilixxi:

• kundizzjonijiet għall-użu mill-ġdid ta’ ċerta data protetta li tkun miżmuma minn korpi tas-settur pubbliku;
• regoli għal kumpaniji li jipprovdu servizzi ta’ intermedjazzjoni tad-data;
• qafas għall-altruwiżmu tad-data (il-kondiviżjoni volontarja ta’ data u għall-ebda premju);
• qafas għall-Bord Ewropew għall-Innovazzjoni fil-Qasam tad-Data (EDIB); u
• miżuri li jippermettu l-fluss sigur ta’ data mhux personali barra l-UE.

• 1.

  L-użu mill-ġdid ta’ ċerti kategoriji ta’ data miżmuma pubblikament

  Il-korpi tas-settur pubbliku jżommu ammonti vasti ta’ data protetta mid-drittijiet ta’ partijiet terzi (bħal sigrieti kummerċjali, data personali jew propjetà intellettwali) li ma tistax tintuża bħala data miftuħa iżda li tista’ terġa’ tiġi użatha taħt regoli speċifiċi tal-UE jew nazzjonali. Kull meta tali użu mill-ġdidjitħalla jseħħ, il-korpi tas-settur pubbliku jkollhom jikkonformaw mal-kundizzjonijiet tal-użu mill-ġdid stabbilit mid-DGA. Notevolment, il-kundizzjonijiet tal-użu mill-ġdid għandhom ikunu mhux diskriminatorji, trasparenti, proporzjonati, ġustifikati u disponibbli pubblikament.

  Trasferiment tad-data għal pajjiżi mhux tal-UE

  Utent li ser jerġa’ jagħmel użu mill-ġdid bl-intenzjoni li jittrasferixxi data protetta, mhux personali lejn pajjiż mhux tal-UE ser ikollu jikkonforma mar-regoli speċifiċi fid-DGA.

  Tariffi

  Tariffi għall-użu mill-ġdid għandhom ikunu trasparenti, proporzjonati, mhux diskriminatorji u ġustifikati b’mod oġġettiv. Korpi tas-settur pubbliku li jagħtu permessi għall-użu mill-ġdid jistgħu japplikaw tariffi mnaqqsa jew l-ebda tariffi, pereżempju għal intrapriżi żgħar u ta’ daqs medju, start-ups, organizzazzjonijiet tas-soċjetà ċivili u stabbilimenti edukattivi.

  Punt uniu ta’ informazzjoni

  Sabiex id-data tkun tista’ tinstab (“rintraċċabbiltà”), l-Istati membri tal-UE ser ikollhom jassiguraw li l-informazzjoni kollha rilevanti dwar il-kundizzjonijiet għall-użu mill-ġdid kif ukoll dwar it-tariffi tkun disponibbli u faċilment aċċessibbly permezz ta’ punt uniku ta’ informazzjoni. Il-Kummissjoni Ewropea, min-naħa tagħha, ser tiġbor din l-informazzjoni fuq data.europa.eu.

• 2.

  Servizzi ta’ intermedjazzjoni għad-data

  Id-DGA jirregola l-fornituri tas-servizzi ta’ intermedjazzjoni tad-data li huma partijiet terzi newtrali li jikkollegaw individwi u kumpaniji li jżommu d-data ma’ oħrajn li jridu jużawha. Ir-rekwiżiti għal tali servizzi għandhom l-għan li jassiguraw li tali intermedjarji tad-data ser jiffunzjonaw bħala oragnizzaturi affidabbli tal-kondiviżjoni tad-data. Sabiex tiżdied il-fiduċja fil-kondiviżjoni tad-data, dan l-approċċ jistabbilixxi mudell ibbażat fuq in-newtralità u t-trasparenza tal-intermedjarji tad-data, filwaqt li jpoġġi l-individwi u l-kumpaniji fil-kontroll tad-data tagħhom.

  Entitajiet li jixtiequ jipprovdu servizzi ta’ intermedjazzjoni tad-data jeħtieġ li:

  • jikkonformaw ma’ rekwiżiti stretti sabiex jassiguraw newtralità u jevitaw kunflitti ta’ interess;
  • ikollhom separazzjoni strutturali minn kwalunkwe servizzi oħra ta’ valur miżjud ipprovduti;
  • ikollhom termini tal-prezzijiet independentement minn detentur potenzjali tad-data* jew utent tad-data* qed juża servizzi oħra; u
  • jirreġistra ma’ awtorità kompetenti.
• 3.

  Altruwiżmu tad-data

  L-altruwiżmu tad-data jseħħ meta individwi u kumpaniji jagħtu l-kunsens jew il-permess tagħhom biex jagħmlu d-data li jiġġeneraw disponibbli għall-użu fl-interess pubbliku, volontarjament u mingħajr kumpens. Tali data għandha potenzjal enormi li tavvanza r-riċerka u li tiżviluppa prodotti u servizzi aħjar, inkluż fl-oqsma tas-saħħa, tal-azzjoni klimatika u tal-mobilità. L-Istati Membri jistgħu jiżviluppaw politiki nazzjonali biex jinkoraġġixxu l-altruwiżmu tad-data u entità impenjata bl-altruwiżmu tad-data biex japplikaw għar-reġistrazzjoni bħala “organizzazzjoni ta’ data ta’ altruwiżmu rikonoxxuta fl-Unjoni”. Il-Kummissjoni ser iżżomm reġistru ta’ dawn l-organizzazzjonijiet fuq livell tal-UE.

• 4.

  Il-Bord Ewropew għall-Innovazzjoni tad-Data

  Il-Kummissjoni ser tistabbilixxi l-EDIB li ser jikkonsisti minn rappreżentanti ta’:

  • awtoritajiet nazzjonali mfassla taħt id-DGA;
  • il-Bord Ewropew għall-Protezzjoni tad-Data;
  • il-Kontrollur Ewropew għall-Protezzjoni tad-Data;
  • l-Aġenzija tal-Unjoni Ewropea għaċ-Ċibersigurtà;
  • ir-rappreżentant tal-UE għall-SMEs; u
  • setturi u korpi speċifiċi oħra bi kwalifika speċjali.

  Il-ħidmiet tal-EDIB jinkludu rakkomandazzjonijiet u assistenza għall-Kummissjoni fi:

  • l-iżvilupp ta’ prattika konsistenti fl-ipproċessar ta’ rikjesti għall-użu mill-ġdid ta’ data;
  • it-titjib tal-interoperabbiltà tad-data u tas-servizzi dwar il-kondiviżjoni tad-data;
  • l-iżvilupp ta’ prattika konsistenti ta’ awtoritajiet kompetenti li jinfurzaw ir-rekwiżiti applikabbli għas-servizz ta’ intermedjazzjoni dwar id-data* fornituri.
• 5.

  Flussi internazzjonali tad-data

  Data mhux personali jista’ jkollha valur ekonomiku konsiderevoli, id-DGA jintroduċi salvagwardji biex jipproteġi tali data minn aċċess mhux awtorizzat minn awtoritajiet ta’ pajjiżi mhux tal-UE.

MINN META JAPPLIKA R-REGOLAMENT?

Dan se japplika mill-24 ta’ Settembru 2023.

SFOND

Id-DGA jemenda wkoll ir-Regolament (UE) 2018/1724 dwar il-gateway diġitali unika.

Għal aktar informazzjoni, ara:

• Att Ewropew dwar il-Governanza tad-Data (il-Kummissjoni Ewropea)
• Att dwar il-Governanza tad-Data spjegat (il-Kummissjoni Ewropea)
• Strateġija Ewropea għad-data (il-Kummissjoni Ewropea)
• Futur diġitali għall-Ewropa (il-Kunsill tal-Unjoni Ewropea)
• Il-governanza tad-data: għalfejn il-liġi tal-UE dwar il-kondiviżjoni tad-data hija importanti? (Il-Parlament Ewropew).

TERMINI EWLENIN

DOKUMENT PRINĊIPALI

Ir-Regolament (UE) 2021/868 tal-Parlament Ewropew u tal-Kunsill tal-30 ta’ Mejju 2022 dwar il-governanza Ewropea tad-data u li jemenda r-Regolament (UE) 2018/1724 (Att dwar il-Governanza tad-Data) (ĠU L 152, 3.6.2022, p. 1-44).

DOKUMENTI RELATATI

Ir-Regolament (UE) 2019/881tal-Parlament Ewropew u tal-Kunsill tas-17 ta’ April 2019 dwar l-ENISA (l-Aġenzija tal-Unjoni Ewropea għaċ-Ċibersigurtà) u dwar iċ-ċertifikazzjoni taċ-ċibersigurtà tat-teknoloġija tal-informazzjoni u tal-komunikazzjoni u li jħassar ir-Regolament (UE) Nru 526/2013 (l-Att dwar iċ-Ċibersigurtà) (ĠU L 151, 7.6.2019, pp. 15-69).

Ir-Regolament (UE) 2018/1724 tal-Parlament Ewropew u tal-Kunsill tat-2 ta’ Ottubru 2018 li jistabbilixxi gateway diġitali unika li tipprovdi aċċess għal informazzjoni, għal proċeduri u għas-servizzi ta’ assistenza u ta’ soluzzjoni tal-problemi u li jemenda r-Regolament (UE) Nru 1024/2012 (ĠU L 295, 21.11.2018, pp. 1-38).

Ir-Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (ĠU L 295, 21.11.2018, pp. 39-98).

l-aħħar aġġornament 20.07.2022