Programm ta’ Appoġġ għal Riformi Strutturali

SOMMARJU TA’:

Ir-Regolament (UE) 2017/825 — dwar l-istabbiliment ta’ Programm ta’ Appoġġ għal Riformi Strutturali għall-perijodu mill-2017 sal-2020

X’INHU L-GĦAN TAR-REGOLAMENT?

• Huwa jistabbilixxi programm tal-Unjoni Ewropea (UE) bl-għan li jingħata appoġġ għal riformi strutturali istituzzjonali, amministrattivi u li jiffavorixxi t-tkabbir fl-Istati Membri tal-UE.
• Ir-Regolament Emendatorju (UE) 2018/1671 estenda l-iskop tal-programm u żied l-allokazzjoni finanzjara tiegħu.

PUNTI EWLENIN

Objettiv

Il-programm ta’ appoġġ għal riformi strutturali (SRPS) ifittex li jissodisfa l-objettivi tiegħu billi jipprovdi appoġġ lill-awtoritajiet nazzjonali sabiex jirriformaw u jsaħħu l-istituzzjonijiet, il-governanza, l-amministrazzjoni pubblika, u s-setturi ekonomiċi u tas-soċjetà. L-SRSP għandu l-għan li jtejjeb:

• il-koeżjoni
• il-kompetittività
• il-produttività
• it-tkabbir sostenibbli
• il-ħolqien tal-impjiegi u
• l-investiment.

L-appoġġ jingħata b’mod partikolari fil-kuntest tal-proċessi tal-governanza ekonomika tal-UE, inkluż permezz tal-assistenza għall-użu effiċjenti, trasparenti u effettiv tal-Fondi Strutturali u ta’ Investiment Ewropej.

Kamp ta’ applikazzjoni

L-appoġġ għal riformi li jiffavorixxu t-tkabbir jista’ jingħata fuq talba tal-Istati Membri f’firxa wiesgħa ta’ oqsma ta’ politiki, kif deskritt hawn taħt.

• Governanza u amministrazzjoni pubblika. L-appoġġ tar-riforma istituzzjonali u l-funzjonament tal-amministrazzjoni pubblika orjentata lejn is-servizz, inkluż permezz:
  • tal-promozzjoni tal-istat tad-dritt effettiv u r-riforma tas-sistema ġudizzjarja;
  • l-infurzar tal-ġlieda kontra l-frodi, il-korruzzjoni u l-ħasil tal-flus.
• Dħul mit-taxxa u maniġment finanzjarju. L-immodernizzar ta’ sistemi ta’ amministrazzjoni tad-dħul u t-taxxa, il-ġlieda kontra l-evażjoni tat-taxxa, eċċ.
• It-tkabbir u l-ambjent kummerċjali. Intejbu l-politiki tal-klima tal-investiment, tal-enerġija u tal-azzjoni klimatika, il-promozzjoni tal-unjoni tal-enerġija, it-titjib tal-ġestjoni tal-assi pubbliċi, il-kummerċ u l-investiment dirett barrani, eċċ.
• Is-suq tax-xogħol, servizzi tas-saħħa u soċjali. L-appoġġ għall-edukazzjoni, it-taħriġ, is-sistemi tal-kura tas-saħħa, il-politiki tas-suq tax-xogħol inkluż id-djalogu soċjali, il-ġlieda kontra l-faqar, eċċ.
• Is-settur finanzjarju u l-aċċess għall-finanzi. Azzjonijiet relatati mal-unjoni tas-swieq kapitali, il-promozzjoni tal-litteriżmu finanzjarju, l-istabbiltà finanzjarja, eċċ.

Ir-Regolament Emendatorju (UE) 2018/1671 żied il-pakkett finanzjarju ddedikat għall-programm bi EUR80 miljun, biex jilħaq total ta’ EUR222.8 miljun.

Karatteristiċi tal-SRSP

• Implimentati mill-Kummissjoni Ewropea jikkonformaw mar-regoli stabbiliti fir-regolament finanzjarju tal-UE (Regolament (EU, Euratom) 2018/1046 — ara s-sommarju).
• Il-Kummissjoni u l-Istati Membri benefiċjarji, fi ħdan ir-responsabbiltajiet rispettivi tagħhom, iħeġġu sinerġiji u jiżguraw koordinazzjoni effettiva bejn l-SRSP u programmi u strumenti oħra ta’ finanzjament mill-UE.
• Il-Kummissjoni timmonitorja l-implimentazzjoni tal-azzjonijiet iffinanzjati mill-programm u tkejjel il-progress billi tuża l-indikaturi stabbiliti fir-regolament SRSP.

Programm suċċessur: Strument ta’ Appoġġ Tekniku

L-Istrument ta’ Appoġġ Tekniku tal-UE, stabbilit taħt ir-Regolament (UE) 2021/240 (ara s-sommarju), jibni fuq l-esperjenza tal-SRSP u se jdum għaddej mill-2021 sal-2027.

MINN META JAPPLIKA R-REGOLAMENT?

Ir-Regolament (UE) 2017/825 ilu japplika mill-20 ta’ Mejju 2017.

SFOND

Għal aktar informazzjoni, ara:

• Strument ta’ Appoġġ Tekniku (TSI) (il-Kummissjoni Ewropea).

DOKUMENT EWLIENI

Regolament (UE) 2017/825 tal-Parlament Ewropew u tal-Kunsill tas-17 ta’ Mejju 2017 dwar l-istabbiliment ta’ Programm ta’ Appoġġ għal Riformi Strutturali għall-perijodu mill-2017 sal-2020 u li jemenda r-Regolamenti (UE) Nru 1303/2013 u (UE) Nru 1305/2013 (ĠU L 129, 19.5.2017, pp. 1–16).

L-emendi suċċessivi għar-Regolament (UE) 2017/825 ġew inkorporati fit-test oriġinali. Din il-verżjoni konsolidata għandha valur dokumentarju biss.

DOKUMENTI RELATATI

Ir-Regolament (UE) 2021/240 tal-Parlament Ewropew u tal-Kunsill tal-10 ta’ Frar 2021 li jistabbilixxi Strument ta’ Appoġġ Tekniku (ĠU L 57, 18.2.2021, pp. 1–16).

Ir-Regolament (UE, Euratom) 2018/1046 tal-Parlament Ewropew u tal-Kunsill tat-18 ta’ Lulju 2018 dwar ir-regoli finanzjarji applikabbli għall-baġit ġenerali tal-Unjoni, li jemenda r-Regolamenti (UE) Nru 1296/2013, (UE) Nru 1301/2013, (UE) Nru 1303/2013, (UE) Nru 1304/2013, (UE) Nru 1309/2013, (UE) Nru 1316/2013, (UE) Nru 223/2014, (UE) Nru 283/2014, u d-Deċiżjoni Nru 541/2014/UE u li jħassar ir-Regolament (UE, Euratom) Nru 966/2012 (ĠU L 193, 30.7.2018, pp. 1–222).

Ara l-verżjoni konsolidata.

Ir-Regolament (UE) Nru 1303/2013 tal-Parlament Ewropew u tal-Kunsill tas-17 ta’ Diċembru 2013 li jistabbilixxi dispożizzjonijiet komuni dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta’ Koeżjoni, il-Fond Agrikolu Ewropew għall-Iżvilupp Rurali u l-Fond Marittimu u tas-Sajd Ewropew u li jistabbilixxi d-dispożizzjonijiet ġenerali dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta’ Koeżjoni u l-Fond Ewropew għall-Affarijiet Marittimi u s-Sajd u li jħassar ir-Regolament tal-Kunsill (KE) Nru 1083/2006 (ĠU L 347, 20.12.2013, pp. 320–469).

Ara l-verżjoni konsolidata.

Ir-Regolament (UE) Nru 1305/2013 tal-Parlament Ewropew u tal-Kunsill tas-17 ta’ Diċembru 2013 dwar appoġġ għall-iżvilupp rurali mill-Fond Agrikolu Ewropew għall-Iżvilupp Rurali (FAEŻR) u li jħassar ir-Regolament tal-Kunsill (KE) Nru 1698/2005 (ĠU L 347, 20.12.2013, pp. 487–548).

Ara l-verżjoni konsolidata.

l-aħħar aġġornament 25.11.2021