(1)

Id-Direttiva (UE) 2015/413 tal-Parlament Ewropew u tal-Kunsill (3) tiffaċilita l-iskambju transfruntier ta’ informazzjoni dwar reati tat-traffiku relatati mas-sikurezza fit-toroq u b’hekk tnaqqas l-impunità tal-awturi tar-reati mhux residenti. Investigazzjoni transfruntiera effettiva tar-reati tat-traffiku relatati mas-sikurezza fit-toroq u l-infurzar tas-sanzjonijiet itejbu s-sikurezza fit-toroq għax iħeġġu lis-sewwieqa mhux residenti jwettqu inqas reati u jsuqu b’mod aktar sikur.

(2)

L-għarfien taċ-ċittadini tal-Unjoni dwar ir-regoli tat-traffiku fis-seħħ relatati mas-sikurezza fit-toroq, is-sanzjonijiet applikabbli fid-diversi Stati Membri u l-probabbiltà għolja ta’ sanzjoni inevitabbli jippromwovu s-sikurezza fit-toroq u jnaqqsu l-għadd ta’ reati tat-traffiku relatati mas-sikurezza fit-toroq u l-perikli tat-traffiku fit-toroq.

(3)

L-esperjenza tal-awtoritajiet tal-infurzar involuti fl-investigazzjoni tar-reati tat-traffiku relatati mas-sikurezza fit-toroq uriet li l-formulazzjoni attwali fid-Direttiva (UE) 2015/413 la tiffaċilita investigazzjoni effettiva tar-reati tat-traffiku relatati mas-sikurezza fit-toroq imwettqa minn sewwieqa mhux residenti u lanqas l-infurzar tal-penali finanzjarji sal-livell mixtieq. Dan jirriżulta f’impunità relattiva tas-sewwieqa mhux residenti u jħalli impatt negattiv fuq is-sikurezza fit-toroq tal-Unjoni. Barra minn hekk, id-drittijiet fundamentali u proċedurali tas-sewwieqa mhux residenti mhux dejjem jiġu rispettati fil-kuntest tal-investigazzjonijiet transfruntieri, b’mod partikolari minħabba nuqqas ta’ trasparenza fl-iffissar tal-ammont tal-penali finanzjarji u fil-proċeduri tal-appell. Għalhekk, din id-Direttiva għandha l-għan li ttejjeb l-effettività tal-investigazzjoni tar-reati tat-traffiku relatati mas-sikurezza fit-toroq imwettqa b’vetturi rreġistrati fi Stat Membru li ma jkunx l-Istat Membru fejn ikun sar ir-reat (“l-Istat Membru fejn isir ir-reat”). Dan jgħin biex jintlaħaq l-għan tal-Unjoni li l-għadd ta’ mwiet fil-modi kollha ta’ trasport jitnaqqas u jinġieb qrib iż-żero sal-2050 u li tissaħħaħ il-protezzjoni tad-drittijiet fundamentali u proċedurali tas-sewwieqa mhux residenti.

(4)

Fil-Qafas ta’ Politika tal-UE dwar is-Sikurezza fit-Toroq 2021-2030 – Il-Passi li jmiss lejn “Viżjoni Żero”tad-19 ta’ Ġunju 2019, il-Kummissjoni tenniet l-impenn tagħha għall-għan ambizzjuż li jseħħu kważi żero mwiet u żero korrimenti serji fit-toroq tal-Unjoni sal-2050 (“Viżjoni Żero”), kif ukoll għall-għan fuq żmien medju li l-imwiet u l-korrimenti serji jonqsu b’50 % sal-2030, mira oriġinarjament stabbilita fid-Dikjarazzjoni tal-Belt Valletta dwar is-Sikurezza fit-Toroq adottata mill-Ministri għat-Trasport tal-Istati Membri tal-Unjoni fid-29 ta’ Marzu 2017. Biex jintlaħqu dawk l-għanijiet, il-Kummissjoni, fil-komunikazzjoni tagħha tad-9 ta’ Diċembru 2020 intitolata “Strateġija għal Mobbiltà Sostenibbli u Intelliġenti – inqiegħdu t-trasport Ewropew fit-triq it-tajba għall-futur”, ħabbret l-intenzjoni tagħha li tirrevedi d-Direttiva (UE) 2015/413.

(5)

Jenħtieġ li l-kamp ta’ applikazzjoni tad-Direttiva (UE) 2015/413 jiġi estiż għal reati oħra tat-traffiku relatati mas-sikurezza fit-toroq biex jiġi żgurat it-trattament ugwali tas-sewwieqa. Meta titqies il-bażi legali li fuqha ġiet adottata d-Direttiva (UE) 2015/413, jiġifieri l-Artikolu 91(1), il-punt (c), tat-Trattat dwar il-Funzjonament tal-Unjoni Ewropea (TFUE), jenħtieġ li r-reati li għandhom jiżdiedu ma’ dik id-Direttiva juru rabta diretta mas-sikurezza fit-toroq billi jindirizzaw imġiba perikoluża u imprudenti li toħloq riskju serju għall-utenti tat-toroq. Jenħtieġ li l-estensjoni tal-kamp ta’ applikazzjoni tad-Direttiva (UE) 2015/413 tirrifletti wkoll il-progress tekniku fl-identifikazzjoni awtomatika tar-reati tat-traffiku relatati mas-sikurezza fit-toroq.

(6)

Ir-reati tat-traffiku relatati mas-sikurezza fit-toroq huma kklassifikati bħala reati amministrattivi jew kriminali skont il-liġi nazzjonali. Għalhekk, skont il-proċeduri nazzjonali applikabbli, dawn ir-reati jistgħu jagħtu lok għal proċedimenti mressqa minn awtoritajiet amministrattivi jew ġudizzjarji quddiem qrati li jkollhom ġuriżdizzjoni f’materji amministrattivi jew kriminali. Fil-biċċa l-kbira tal-każijiet, dawn ir-reati tat-traffiku relatati mas-sikurezza fit-toroq jiġu pproċessati mill-Istati Membri matul l-ipproċessar tal-massa, li, f’każijiet meta l-identifikazzjoni preċiża tas-sewwieq tkun meħtieġa mil-liġi tal-Istat Membru fejn isir ir-reat bħala prekundizzjoni għall-impożizzjoni tas-sanzjoni rilevanti, tipprevjeni l-applikazzjoni effettiva u/jew il-ħruġ ta’ Ordni ta’ Investigazzjoni Ewropea. Fil-biċċa l-kbira tal-każijiet, ma jiġux issodisfati l-kundizzjonijiet biex tinħareġ Ordni ta’ Investigazzjoni Ewropea stipulati fl-Artikolu 6 tad-Direttiva 2014/41/UE tal-Parlament Ewropew u tal-Kunsill (4), u b’hekk dik id-Direttiva ma tkunx tista’ tiġi applikata, b’mod partikolari meta r-reati jiġu kkwalifikati bħala amministrattivi. F’dak il-kuntest, jenħtieġ li l-awtoritajiet nazzjonali tal-Istat Membru fejn isir ir-reat, sabiex ikunu jistgħu jidentifikaw lill-awturi tar-reati bil-livell ta’ ċertezza meħtieġ mil-liġi nazzjonali tagħhom, ikollhom proċedura effettiva għad-dispożizzjoni tagħhom biex jitolbu assistenza reċiproka mill-awtoritajiet nazzjonali rilevanti tal-Istat Membru fejn tkun irreġistrata l-vettura li biha jkun twettaq ir-reat (“l-Istat Membru tar-reġistrazzjoni”) jew l-Istat Membru tar-residenza tal-persuna kkonċernata. Jenħtieġ li dik il-proċedura tkun ibbażata fuq miżuri definiti sew, li ma jaffettwawx serjament id-drittijiet tal-persuni kkonċernati. Madankollu, jenħtieġ li dan ikun mingħajr preġudizzju għal sitwazzjonijiet fejn f’każijiet individwali l-kundizzjonijiet biex tiġi applikata d-Direttiva 2014/41/UE jitqiesu bħala ssodisfati, f’liema każ jenħtieġ li jiġu applikati l-proċeduri stabbiliti f’dik id-Direttiva minn dawk l-Istati Membri li huma marbutin b’dik id-Direttiva. Jenħtieġ li jiġi mfakkar li qafas legali speċifiku tal-Unjoni jirregola l-kooperazzjoni ġudizzjarja f’materji kriminali, abbażi tal-prinċipju tar-rikonoxximent reċiproku tas-sentenzi u d-deċiżjonijiet ġudizzjarji. Għaldaqstant jeħtieġ li l-applikazzjoni tad-Direttiva (UE) 2015/413 kif emendata b’din id-Direttiva ma ddgħajjifx id-drittijiet u l-obbligi tal-Istati Membri li jirriżultaw minn liġi applikabbli oħra tal-Unjoni f’materji kriminali, u b’mod partikolari dawk stabbiliti fid-Deċiżjoni Kwadru tal-Kunsill 2005/214/ĠAI (5) dwar ir-rikonoxximent reċiproku ta’ penali finanzjarji u d-Direttiva 2014/41/UE fejn jidħlu l-proċeduri għall-ġbir tal-evidenza, u l-Artikolu 5 tal-Konvenzjoni stabbilita mill-Kunsill f’konformità mal-Artikolu 34 tat-Trattat dwar l-Unjoni Ewropea, dwar Assistenza Reċiproka f’Materji Kriminali bejn l-Istati Membri tal-Unjoni Ewropea (6) fir-rigward tal-proċeduri biex jintbagħtu u jiġu nnotifikati l-atti proċedurali. Barra minn hekk, jenħtieġ li l-proċediment kriminali li jitolbu garanziji speċifiċi għall-individwi kkonċernati, is-salvagwardji proċedurali għall-persuni suspettati u akkużati, minquxa fid-Direttivi 2010/64/UE (7), 2012/13/UE (8), 2013/48/UE (9), (UE) 2016/343 (10), (UE) 2016/800 (11) u (UE) 2016/1919 (12) tal-Parlament Ewropew u tal-Kunsill, ma jiġux affettwati wkoll mill-implimentazzjoni tad-Direttiva (UE) 2015/413.

(7)

Jenħtieġ li r-responsabbiltajiet u l-kompetenzi tal-punti ta’ kuntatt nazzjonali jiġu ddefiniti biex jiġi żgurat li dawn jikkooperaw bla xkiel mal-awtoritajiet kompetenti kollha involuti fl-investigazzjoni tar-reati tat-traffiku relatati mas-sikurezza fit-toroq li jaqgħu fil-kamp ta’ applikazzjoni tad-Direttiva (UE) 2015/413 kif emendata b’din id-Direttiva. Jenħtieġ li l-punti ta’ kuntatt nazzjonali dejjem ikunu disponibbli għal dawn l-awtoritajiet kompetenti u jwieġbu t-talbiet tagħhom mingħajr dewmien żejjed. Jenħtieġ li dan ikun il-każ irrispettivament min-natura tar-reat jew l-istatus legali tal-awtorità kompetenti, u b’mod partikolari irrispettivament minn jekk l-awtorità kompetenti jkollhiex kompetenza nazzjonali jew subnazzjonali jew lokali.

(8)

L-elementi bażiċi tas-sistema tal-iskambju transfruntier tal-informazzjoni stabbilita bid-Direttiva (UE) 2015/413 urew li huma effettivi. Iżda hemm bżonn aktar titjib u aġġustamenti biex jissolvew kwistjonijiet li qed jinqalgħu minħabba data nieqsa, żbaljata jew mhux preċiża. Għalhekk jenħtieġ li jiġu imposti aktar obbligi fuq l-Istati Membri rigward il-ħtieġa li ċerta data fil-bażijiet tad-data rilevanti tinżamm disponibbli u aġġornata biex tiżdied l-effettività tal-iskambju tal-informazzjoni.

(9)

Għadd ta’ Stati Membri issa qed iħabbtu wiċċhom ma’ fenomenu fejn qed isiru reati serji tat-traffiku relatati mas-sikurezza fit-toroq b’karozzi mikrija fi Stati Membri oħra. Is-sewwieqa ta’ dawn il-karozzi tal-kiri li jwettqu reat tat-traffiku relatat mas-sikurezza fit-toroq mhux qed jiġu kkastigati minħabba li jistgħu jisfruttaw id-differenzi fir-regoli fost l-Istati Membri, kif ukoll nuqqasijiet fir-rigward tal-iskambju ta’ informazzjoni u l-assistenza reċiproka.

(10)

Jenħtieġ li l-punt ta’ kuntatt nazzjonali tal-Istat Membru fejn isir ir-reat jitħalla jwettaq tiftixiet awtomatizzati fir-reġistri tal-vetturi biex jikseb data dwar l-utenti finali tal-vetturi meta dik l-informazzjoni tkun diġà disponibbli. Barra minn hekk, jenħtieġ li jiġi stabbilit perjodu għaż-żamma tad-data fir-rigward tal-identità tad-detenturi, is-sidien u l-utenti finali preċedenti tal-vetturi biex l-awtoritajiet ikollhom l-informazzjoni xierqa li jeħtieġu għall-investigazzjoni.

(11)

Il-persuna kkonċernata tista’ ma tkunx familjari mas-sistema legali tal-Istat Membru fejn isir ir-reat u lanqas ma tkun titkellem il-lingwa jew lingwi uffiċjali tiegħu, u għalhekk jenħtieġ li d-drittijiet fundamentali u proċedurali tal-persuni kkonċernati jitħarsu aħjar. Sabiex jintlaħaq dak l-objettiv, jenħtieġ li jiġu stabbiliti rekwiżiti minimi obbligatorji għall-kontenut tal-avviż ta’ reat tat-traffiku, u jenħtieġ li ma jibqax jintuża l-mudell attwali għall-ittra ta’ informazzjoni li tinkludi informazzjoni bażika biss, kif stipulat fl-Anness II tad-Direttiva (UE) 2015/413.

(12)

Bħala minimu, jenħtieġ li l-avviż ta’ reat tat-traffiku juża kliem li jinftiehem minn dawk mingħajr taħriġ legali u jinkludi informazzjoni dettaljata dwar il-klassifikazzjoni legali u l-konsegwenzi legali tar-reat tat-traffiku relatat mas-sikurezza fit-toroq, b’mod partikolari bit-teħid inkunsiderazzjoni li s-sanzjonijiet għar-reati koperti fil-kamp ta’ applikazzjoni tad-Direttiva (UE) 2015/413 kif emendata b’din id-Direttiva jista’ jkollhom natura mhux pekunarja, bħal restrizzjonijiet imposti fuq id-dritt tas-sewqan tal-awtur tar-reat. Jenħtieġ ukoll li d-drittijiet tad-difiża jiġu appoġġati billi tingħata informazzjoni dettaljata dwar fejn, meta u kif jistgħu jiġu eżerċitati dawk id-drittijiet fl-Istat Membru fejn isir ir-reat. F’dak ir-rigward, jenħtieġ li l-persuni mhux residenti jingħataw biżżejjed żmien biex ifittxu rimedju, pereżempju appell. Jenħtieġ li tingħata wkoll deskrizzjoni tal-proċeduri in absentia meta dan ikun applikabbli, peress li l-persuna kkonċernata jaf ma tkunx qed tippjana li tirritorna fl-Istat Membru fejn isir ir-reat biex tipparteċipa fil-proċedimenti. Jenħtieġ li anke l-alternattivi tal-ħlas u l-modi kif jista’ jittaffa l-volum tas-sanzjonijiet jinftiehmu faċilment sabiex tiġi inċentivata l-kooperazzjoni volontarja. Fl-aħħar nett, peress li jenħtieġ li l-avviż ta’ reat tat-traffiku jkun l-ewwel dokument li l-persuna kkonċernata tirċievi, jenħtieġ li dan ikun fih l-informazzjoni speċifikata fl-Artikolu 13 tad-Direttiva (UE) 2016/680 tal-Parlament Ewropew u tal-Kunsill (13), li, skont l-Artikolu 13(2), il-punt (d), ta’ dik id-Direttiva jenħtieġ li jinkludi informazzjoni dwar is-sors li minnu toriġina d-data personali, u l-informazzjoni speċifikata fl-Artikoli 13 u 14 tar-Regolament (UE) 2016/679 tal-Parlament Ewropew u tal-Kunsill (14). Jenħtieġ li din l-informazzjoni tingħata fl-avviż ta’ reat tat-traffiku direttament jew b’referenza għall-post fejn tkun disponibbli. L-Istati Membri jeħtieġ li jgħinu lill-utenti tat-toroq jivverifikaw l-awtentiċità tal-avviżi ta’ reat tat-traffiku u tad-dokumenti ta’ segwitu. Għal dan il-għan, l-Istati Membri jeħtieġ li jikkondividu bejniethom u mal-Kummissjoni permezz ta’ mezzi siguri l-mudelli tal-avviżi ta’ reati tat-traffiku u l-mudelli tad-dokumenti ta’ segwitu maħruġa mill-awtoritajiet kompetenti tagħhom, li jintużaw fil-każijiet transfruntieri. L-Istati Membri jridu jinfurmaw ukoll lil xulxin dwar l-awtoritajiet kompetenti li għandhom id-dritt joħorġu dawk l-avviżi ta’ reat tat-traffiku u d-dokumenti ta’ segwitu.

(13)

Meta sewwieq mhux residenti jiġi ċċekkjat fuq il-post waqt spezzjoni fit-triq, u dik l-azzjoni twassal biex jinbdew proċedimenti ta’ segwitu b’rabta ma’ reat tat-traffiku relatat mas-sikurezza fit-toroq, jenħtieġ li avviż ta’ reat tat-traffiku jintbagħat lis-sewwieq mhux residenti. Fil-każijiet ta’ spezzjonijiet fuq il-post b’rabta ma’ reat tat-traffiku relatat mas-sikurezza fit-toroq imwettaq mis-sewwieq mhux residenti u meta l-awtorità kompetenti tkun infurzat is-sanzjoni relatata mar-reat imwettaq billi s-sewwieq mhux residenti jkun imġiegħel iħallas il-multa fuq il-post, jenħtieġ li s-sewwieq mhux residenti jingħata biss ċerti elementi essenzjali ta’ avviż ta’ reat tat-traffiku fuq il-post.

(14)

Sabiex jiġi żgurat li l-persuna kkonċernata tkun dik li fil-fatt tirċievi l-avviż ta’ reat tat-traffiku u kwalnukwe dokument ta’ segwitu, u biex jiġi evitat l-involviment żbaljat ta’ partijiet terzi mhux ikkonċernati, jenħtieġ li din id-Direttiva tistabbilixxi regoli dwar in-notifika tal-avviż ta’ reat tat-traffiku u d-dokumenti ta’ segwitu.

(15)

Jenħtieġ li kemm l-avviż ta’ reat tat-traffiku kif ukoll kwalunkwe dokument ta’ segwitu essenzjali jintbagħtu bil-lingwa tad-dokument ta’ reġistrazzjoni tal-vettura. F’dawk il-każijiet meta avviż ta’ reat tat-traffiku u dokumenti ta’ segwitu jkunu qed jintbagħtu b’lingwa li l-persuna kkonċernata ma tifhimhiex, jenħtieġ li dik il-persuna kkonċernata titħalla titlob li tirċievi d-dokumenti ta’ segwitu b’lingwa uffiċjali addizzjonali tal-istituzzjonijiet tal-Unjoni li tagħżel hi, għajr il-lingwa tad-dokument ta’ reġistrazzjoni tal-vettura. Jenħtieġ li l-awtorità kompetenti tal-Istat Membru fejn isir ir-reat tilqa’ din it-talba.

(16)

Jenħtieġ li jiġi pprovdut rieżami legali effettiv f’każijiet fejn l-awtoritajiet kompetenti tal-Istat Membru fejn isir ir-reat ma jikkonformawx mal-istandards tal-lingwa u mar-regoli dwar in-notifika tad-dokumenti stabbiliti f’din id-Direttiva u fil-liġijiet nazzjonali rispettivi tagħhom.

(17)

F’każijiet fejn il-persuna kkonċernata ma tkunx tista’ tiġi identifikata bil-livell ta’ ċertezza meħtieġ mil-liġi tal-Istat Membru fejn isir ir-reat abbażi tal-informazzjoni miksuba mir-reġistru tal-vetturi, jenħtieġ li l-Istati Membri jikkooperaw bejniethom biex jaċċertaw l-identità tal-persuna kkonċernata. Għal dak il-għan, jenħtieġ li tiġi introdotta proċedura tal-assistenza reċiproka biex tiġi identifikata l-persuna kkonċernata, jew b’talba għal konferma, abbażi tal-informazzjoni diġà miżmuma mill-awtorità kompetenti tal-Istat Membru fejn isir ir-reat, jew inkella b’talba għal inkjesta mmirata li għandha titwettaq mill-awtoritajiet kompetenti rilevanti tal-Istat Membru tar-reġistrazzjoni jew tal-Istat Membru tar-residenza.

(18)

Jenħtieġ li l-awtoritajiet kompetenti tal-Istati Membri jużaw formola elettronika standard biex jitolbu u jwieġbu għal assistenza reċiproka, sabiex jipprovdu l-informazzjoni addizzjonali mitluba mill-awtorità kompetenti tal-Istat Membru fejn isir ir-reat li tkun meħtieġa għall-identifikazzjoni tal-persuna kkonċernata. Jenħtieġ li l-Istati Membri jużaw il-punti ta’ kuntatt nazzjonali tagħhom biex ikun jista’ jsir trasferiment sigur u effiċjenti ħafna kemm tat-talbiet għal assistenza reċiproka li joħorġu kif ukoll tat-tweġibiet li jidħlu għalihom. Jenħtieġ li l-informazzjoni mitluba tinġabar mingħajr ebda dewmien żejjed u fi kwalunkwe każ fi ħdan l-iskadenzi msemmijin f’din id-Direttiva. Meta jiġbor l-informazzjoni u jwieġeb għat-talba għall-assistenza, l-Istat Membru tar-reġistrazzjoni jew l-Istat Membru tar-residenza li jkun irċieva t-talba għandu jqis kemm il-ħtieġa li l-persuna kkonċernata tiġi nnotifikata fi żmien debitu kif ukoll il-ħtieġa tal-Istat Membru fejn isir ir-reat li jkun għamel it-talba li jkun jista’ jieħu l-passi meħtieġa fi żmien debitu, b’mod partikolari b’kont meħud tal-preskrizzjonijiet stipulati fil-liġi nazzjonali tal-Istat Membru fejn isir ir-reat.

(19)

Jenħtieġ li l-awtorità kompetenti tal-Istat Membru tar-reġistrazzjoni jew tal-Istat Membru tar-residenza tidentifika speċifikament ir-raġunijiet li abbażi tagħhom tista’ tirrifjuta li tagħti assistenza reċiproka għall-identifikazzjoni tal-persuna kkonċernata. B’mod partikolari, jenħtieġ li jiddaħħlu salvagwardji biex jiġi evitat li meta tingħata assistenza reċiproka, tiġi żvelata l-identità ta’ persuni protetti, bħal xhieda protetti.

(20)

Jenħtieġ li l-Istati Membri jitħallew jużaw l-istess proċeduri nazzjonali li kienu jużaw kieku r-reat tat-traffiku relatat mas-sikurezza fit-toroq ikun sar minn wieħed mir-residenti tagħhom sabiex jidentifikaw il-persuna kkonċernata li mhijiex residenti tagħhom. Jenħtieġ li ċ-ċertezza legali tissaħħaħ fir-rigward tal-applikabbiltà ta’ miżuri speċifiċi meħuda skont dawn il-proċeduri, jiġifieri b’rabta mad-dokumenti li jeħtieġu l-konferma jew iċ-ċaħda tat-twettiq tar-reat jew l-impożizzjoni ta’ obbligi fuq il-persuni kkonċernati biex jikkooperaw fl-identifikazzjoni tal-persuna responsabbli. Peress li jenħtieġ li dawk il-miżuri jkollhom l-istess effetti legali fuq il-persuni kkonċernati bħal f’każijiet domestiċi, jenħtieġ li dawk il-persuni jgawdu wkoll l-istess standards ta’ drittijiet fundamentali u proċedurali.

(21)

Meta l-liġi tal-Unjoni jew dik nazzjonali tipprovdi, b’mod espliċitu, aċċess għall-informazzjoni jew il-possibbiltà ta’ skambju tal-informazzjoni minn bażijiet tad-data oħra nazzjonali jew tal-Unjoni għall-finijiet tad-Direttiva (UE) 2015/413, jenħtieġ li l-Istati Membri jkollhom il-possibbiltà li jiskambjaw l-informazzjoni billi jużaw dawn il-bażijiet tad-data, filwaqt li jirrispettaw id-drittijiet fundamentali tal-persuni mhux residenti kkonċernati.

(22)

Fil-każ meta d-dokumenti ma jkunux jistgħu jitwasslu bil-posta, b’konsenja reġistrata, b’posta reġistrata jew b’mezzi elettroniċi tal-istess valur, jenħtieġ li l-awtorità kompetenti tal-Istat Membru fejn isir ir-reat titħalla toqgħod fuq l-awtorità kompetenti tal-Istat Membru tar-reġistrazzjoni jew l-Istat Membru tar-residenza biex tinnotifika d-dokumenti u l-komunikazzjonijiet lill-persuna kkonċernata skont il-liġi nazzjonali tiegħu li tirregola n-notifika tad-dokumenti. Jenħtieġ li l-Istati Membri jużaw il-punti ta’ kuntatt nazzjonali tagħhom biex ikun jista’ jsir trasferiment sigur u effiċjenti kemm tat-talba li toħroġ biex jintbagħtu atti proċedurali kif ukoll tat-tweġiba li tidħol għaliha.

(23)

Hemm bżonn jiġi enfasizzat li hemm problema sinifikanti ta’ nuqqas ta’ infurzar fir-rigward tar-reati tat-traffiku relatati mas-sikurezza fit-toroq imwettqa minn persuni mhux residenti u li emendi għall-Artikolu 1 tad-Deċiżjoni Kwadru tal-Kunsill 2005/214/ĠAI li jistabbilixxi d-definizzjoni ta’ deċiżjoni, jistgħu ma jkunux biżżejjed biex din il-problema tiġi indirizzata b’mod effettiv.

(24)

Peress li d-Deċiżjoni Kwadru 2005/214/ĠAI mhijiex imfassla għall-ipproċessar tal-massa ta’ reati tat-traffiku relatati mas-sikurezza fit-toroq, li għalihom sanzjonijiet pekunarji żgħar spiss jiġu kkwalifikati bħala amministrattivi, u biex jiġi żgurat it-trattament ugwali tas-sewwieqa residenti u dawk mhux residenti, jenħtieġ li f’din id-Direttiva jiġu stabbiliti dispożizzjonijiet speċifiċi biex l-Istati Membri jingħataw il-possibbiltà li jinfurzaw deċiżjonijiet amministrattivi dwar multi tat-traffiku minn naħa għal oħra tal-fruntieri u biex tingħata assistenza reċiproka għal dak l-infurzar. Dan ma jipprekludix l-applikazzjoni tad-Deċiżjoni Kwadru 2005/214/ĠAI.

(25)

Il-Kummissjoni, f’kooperazzjoni mal-Istati Membri, trid twettaq rieżami tas-soluzzjonijiet għall-aċċess elettroniku transfruntier għar-reġistri tar-reati tat-traffiku relatati mas-sikurezza fit-toroq ġestiti mill-awtoritajiet nazzjonali bl-għan li jiġu vvalutati modi kif jista’ jittejjeb l-aċċess taċ-ċittadini għall-avviżi ta’ reati tat-traffiku u d-dokumenti ta’ segwitu li jiġu indirizzati lilhom.

(26)

Jenħtieġ li t-talba għall-iżvelar tad-data tar-reġistrazzjoni tal-vetturi u l-iskambju tal-elementi tad-data f’każijiet transfruntieri jsiru b’sistema elettronika unika. Għalhekk, filwaqt li jibni fuq il-qafas tekniku li diġà jeżisti, jenħtieġ li t-tiftix awtomatizzat tad-data tar-reġistrazzjoni tal-vetturi skont id-Direttiva (UE) 2015/413 isir biss bl-użu tal-applikazzjoni ta’ software b’livell għoli ta’ sigurtà tas-Sistema ta’ Informazzjoni Ewropea tal-Liċenzji tal-Vetturi u tas-Sewqan (EUCARIS), u l-verżjonijiet emendati ta’ dik l-applikazzjoni ta’ software. Jenħtieġ li dik l-applikazzjoni ta’ software tippermetti l-iskambju rapidu, kosteffiċjenti, sigur u affidabbli ta’ data speċifika tar-reġistrazzjoni tal-vetturi fost l-Istati Membri, u b’hekk iżżid l-effiċjenza tal-investigazzjoni dwar ir-reati tat-traffiku relatati mas-sikurezza fit-toroq. Jenħtieġ li l-Istati Membri ma jiskambjawx informazzjoni b’mezzi oħra, li jkunu inqas kosteffiċjenti u possibbilment ma jiżgurawx il-protezzjoni tad-data trażmessa. Fil-proċess tal-iskambju tad-data tar-reġistrazzjoni tal-vetturi, l-awtoritajiet kompetenti jaf jiltaqgħu ma’ talbiet anormali li jistgħu jwasslu għal suspett ta’ użu ħażin tal-proċess ta’ skambju ta’ informazzjoni u jkunu jeħtieġu t-teħid ta’ miżuri xierqa mill-awtoritajiet kompetenti. Dawn it-talbiet anormali jistgħu b’mod partikolari jkunu talbiet li ma jkunux tas-soltu fil-frekwenza jew fil-kontenut tagħhom, li jsiru għal għarrieda jew li jikkonċernaw reati speċifiċi biss. Jenħtieġ li l-Istati Membri jużaw il-EUCARIS speċifikament għal tiftixiet awtomatizzati ta’ data tar-reġistrazzjoni tal-vetturi u assistenza reċiproka fl-identifikazzjoni tal-persuna kkonċernata, assistenza reċiproka fin-notifika tal-avviż ta’ reat tat-traffiku u d-dokumenti ta’ segwitu u assistenza reċiproka fl-attivitajiet ta’ infurzar.

(27)

Sabiex jiġu evitati l-prattiki abbużivi li ħarġu matul l-implimentazzjoni tad-Direttiva (UE) 2015/413 u biex jiġu ssalvagwardjati d-drittijiet fundamentali taċ-ċittadini kkonċernati mill-proċedimenti transfruntieri stabbiliti minn dik id-Direttiva kif emendata b’din id-Direttiva, jenħtieġ li l-Istati Membri jiżguraw li l-awtoritajiet kompetenti tagħhom u l-punti ta’ kuntatt nazzjonali inkarigati mill-implimentazzjoni tad-Direttiva (UE) 2015/413 kif emendata b’din id-Direttiva jikkonformaw bis-sħiħ mal-obbligi assenjati lilhom mingħajr ma jagħtu s-setgħa lill-entitajiet legali bi sjieda jew ġestjoni privata li jwettqu l-attivitajiet relatati mal-implimentazzjoni ta’ din id-Direttiva. B’mod partikolari, id-dritt għall-protezzjoni tad-data personali tal-persuni kkonċernati, id-dritt għal amministrazzjoni tajba, id-dritt għal rimedju effettiv u għal proċess ġust, id-dritt għall-preżunzjoni tal-innoċenza u d-drittijiet tad-difiża, kif ukoll il-funzjonament tajjeb tal-mekkaniżmu ta’ skambju transfruntier ta’ informazzjoni stabbilit mid-Direttiva (UE) 2015/413 jirrikjedu li l-awtoritajiet kompetenti nazzjonali u l-punti ta’ kuntatt nazzjonali maħtura biss ikunu jistgħu jibdew, iwettqu u jinfurzaw proċeduri relatati mar-reati tat-traffiku relatati mas-sikurezza fit-toroq. Dan huwa mingħajr preġudizzju għall-possibbiltà li l-awtoritajiet kompetenti jiddependu mis-servizzi ta’ appoġġ tekniku pprovduti minn entitajiet legali bi sjieda jew ġestjoni privata, bħal servizzi postali, il-bini jew il-manutenzjoni tar-radars u l-analiżi tal-użu tad-droga jew tal-alkoħol mil-laboratorji privati. Perjodu tranżizzjonali ta’ sentejn jippermetti lill-Istati Membri li kienu rrikorrew għall-entitajiet legali bi sjieda jew ġestjoni privata fl-implimentazzjoni ta’ din id-Direttiva jiżguraw li l-awtoritajiet kompetenti tagħhom ikunu kompletament operattivi u kapaċi jimmaniġġaw il-proċeduri relatati mal-iskambju transfruntier b’rispett sħiħ għar-regoli stipulati fid-Direttiva (UE) 2015/413 kif emendata b’din id-Direttiva.

(28)

L-ambitu tal-informazzjoni li l-Istati Membri jirrapportaw lill-Kummissjoni jenħtieġ li jiġi estiż biex jinkludi elementi relatati mill-qrib mal-objettiv tat-titjib tas-sikurezza fit-toroq u biex jinkludi informazzjoni dwar l-għadd ta’ reati tat-traffiku relatati mas-sikurezza fit-toroq imwettqa minn sewwieqa ta’ vetturi rreġistrati f’pajjiż terz u identifikati minn awtorità kompetenti ta’ Stat Membru. L-għan ta’ din l-estensjoni huwa li l-Kummissjoni tkun tista’ tanalizza s-sitwazzjoni attwali fl-Istati Membri u tipproponi inizjattivi fuq bażi fattwali soda. Bħala kumpens għall-piż amministrattiv addizzjonali fuq l-awtoritajiet tal-Istati Membri u biex ir-rappurtar jiġi allinjat mal-kalendarju tal-evalwazzjoni tal-Kummissjoni, jenħtieġ li l-perjodu tar-rapportar jiġi estiż. Jenħtieġ li jingħata perjodu tranżizzjonali biex il-perjodu attwali ta’ sentejn għar-rapportar ikun jista’ jintemm bla xkiel.

(29)

Biex jinkisbu l-objettivi ppreżentati fil-Qafas ta’ Politika tal-UE dwar is-Sikurezza fit-Toroq 2021-2030 – il-passi li jmiss lejn “Viżjoni Żero”, tista’ tiġi kkunsidrata l-mistoqsija dwar kif għandhom jiġu indirizzati r-reati tat-traffiku relatati mas-sikurezza fit-toroq imwettqa minn sewwieqa ta’ vetturi reġistrati f’pajjiż terz. Għal dak il-għan, hemm bżonn li jiġu esplorati mezzi differenti għat-tisħiħ tal-kooperazzjoni u l-iskambju tal-informazzjoni dwar ir-reati tat-traffiku relatati mas-sikurezza fit-toroq bejn l-Istati Membri u pajjiżi terzi, dment li tingħata protezzjoni ekwivalenti lill-persuni kkonċernati u li jiġu rispettati r-regoli dwar it-trasferiment ta’ data personali lil pajjiżi terzi. Hemm bżonn li jiġu esplorati wkoll soluzzjonijiet diġitali ddedikati. Dan ikun mingħajr preġudizzju għad-dritt tal-Istati Membri li jikkonkludu ftehimiet bilaterali jew multilaterali ma’ pajjiżi terzi dwar il-kooperazzjoni fl-infurzar b’rabta ma’ reati tat-traffiku relatati mas-sikurezza fit-toroq.

(30)

Jenħtieġ li din id-Direttiva ma tipprekludix lill-Istati Membri milli jikkonkludu u japplikaw ftehimiet bilaterali jew multilaterali bejniethom, sa fejn tali ftehimiet jmorru lil hinn mill-proċeduri stipulati f’din id-Direttiva, u jgħinu biex dawn jiġu ssimplifikati jew iffaċilitati.

(31)

Peress li d-data relatata mal-identifikazzjoni tal-persuna kkonċernata tikkostitwixxi data personali skont it-tifsira tar-Regolament (UE) 2016/679 u d-Direttiva (UE) 2016/680, u billi l-qafas legali tal-Unjoni dwar it-trattament tad-data personali ġie emendat b’mod sinifikanti minn meta ġiet adottata d-Direttiva (UE) 2015/413 ‘il hawn, id-dispożizzjonijiet dwar l-ipproċessar ta’ data personali jenħtieġ li jiġu allinjati mal-qafas legali l-ġdid.

(32)

Skont l-Artikolu 62(6) tad-Direttiva (UE) 2016/680, il-Kummissjoni rrieżaminat atti legali oħra adottati mill-Unjoni li jirregolaw l-ipproċessar tad-data personali mill-awtoritajiet kompetenti għall-finijiet stipulati fl-Artikolu 1(1) ta’ dik id-Direttiva, sabiex tevalwa l-ħtieġa li tallinja dawk l-atti ma’ dik id-Direttiva u biex, meta jkun xieraq, tagħmel il-proposti meħtieġa biex temenda dawk l-atti u tiżgura approċċ konsistenti rigward il-protezzjoni tad-data personali fil-kamp ta’ applikazzjoni ta’ dik id-Direttiva. Dak ir-rieżami ppreżentat fil-komunikazzjoni tal-Kummissjoni tal-24 ta’ Ġunju 2020 bit-titolu “It-triq ‘il quddiem biex jiġi allinjat dak li kien l-acquis tat-tielet pilastru mar-regoli dwar il-protezzjoni tad-data” wassal għall-identifikazzjoni tad-Direttiva (UE) 2015/413 bħala waħda minn dawk l-atti l-oħra li kellhom jiġu emendati. Għalhekk jenħtieġ li jiġi ċċarat f’din id-Direttiva li l-ipproċessar tad-data personali jenħtieġ li jikkonforma wkoll mad-Direttiva (UE) 2016/680, meta l-ipproċessar ikun fil-kamp ta’ applikazzjoni materjali u personali tagħha.

(33)

Kwalunkwe ipproċessar tad-data personali skont id-Direttiva (UE) 2015/413 jenħtieġ li jikkonforma mar-Regolament (UE) 2016/679, mad-Direttiva (UE) 2016/680 u mar-Regolament (UE) 2018/1725 tal-Parlament Ewropew u tal-Kunsill (15) meta l-ipproċessar ikun fil-kamp ta’ applikazzjoni materjali u personali rispettiv tagħhom.

(34)

Il-bażi legali għall-ipproċessar tal-attivitajiet meħtieġ biex tiġi stabbilita l-identità tal-persuna kkonċernata u biex l-avviż ta’ reat tat-traffiku u d-dokumenti ta’ segwitu jintbagħtu lill-persuna kkonċernata, hi stabbilita fid-Direttiva (UE) 2015/413, f’konformità mal-Artikolu 6(1), l-ewwel subparagrafu, il-punt (e), u, meta applikabbli, mal-Artikolu 10 tar-Regolament (UE) 2016/679 u l-Artikolu 8 tad-Direttiva (UE) 2016/680. F’konformità mal-istess regoli, din id-Direttiva tistabbilixxi l-bażi legali għall-obbligu tal-Istati Membri li jipproċessaw id-data personali għall-fini tal-għoti tal-assistenza reċiproka lil xulxin biex jiġu identifikati l-persuni kkonċernati.

(35)

F’xi Stati Membri, id-data personali tal-persuni mhux residenti kkonċernati tinħażen f’network ta’ servers (“cloud”). Mingħajr preġudizzju għar-regoli dwar il-ksur tad-data personali stabbiliti fir-Regolament (UE) 2016/679 u d-Direttiva (UE) 2016/680, u dwar il-ksur tad-data personali u l-inċidenti tas-sigurtà stabbiliti fid-Direttiva (UE) 2022/2555 tal-Parlament Ewropew u tal-Kunsill (16), jenħtieġ li l-Istati Membri jiżguraw li jinfurmaw lil xulxin dwar l-inċidenti taċ-ċibersigurtà relatati ma’ dik id-data.

(36)

Jenħtieġ li l-Kummissjoni tipprovdi appoġġ finanzjarju proporzjonat għall-inizjattivi li jtejbu l-kooperazzjoni transfruntiera fl-infurzar tar-regoli tat-traffiku relatati mas-sikurezza fit-toroq fl-Unjoni. Dan l-appoġġ jista’ jingħata wkoll għal kampanji ta’ informazzjoni madwar l-Unjoni dwar id-differenzi fil-liġi nazzjonali, b’enfasi partikolari fuq il-pajjiżi ġirien.

(37)

Jenħtieġ li jiġi stabbilit portal online (“Portal CBE”) biex l-utenti tat-toroq fl-Unjoni jingħataw informazzjoni komprensiva dwar ir-regoli tat-traffiku fis-seħħ relatati mas-sikurezza fit-toroq fl-Istati Membri. Hemm bżonn li din l-informazzjoni tkun tinftiehem u aċċessibbli. Jenħtieġ li din l-informazzjoni tkopri informazzjoni dwar rimedji legali, dwar kwalunkwe dritt mogħti lill-persuni kkonċernati skont id-Direttiva (UE) 2015/413 kif emendata b’din id-Direttiva, inkluż għażliet lingwistiċi, informazzjoni dwar ir-regoli dwar il-protezzjoni tad-data u dwar is-sanzjonijiet applikabbli, inkluż fejn rilevanti r-riperkussjonijiet mhux finanzjarji applikabbli, u l-iskemi u l-mezzi disponibbli għall-ħlas tal-multi tat-traffiku impost fir-rigward ta’ reati tat-traffiku relatati mas-sikurezza fit-toroq. Ir-riperkussjonijiet mhux finanzjarji jirreferu għal sistemi ta’ punti penali jew għall-fatt li meta jitwettaq reat tat-traffiku speċifiku relatat mas-sikurezza fit-toroq, dan jista’ jwassal għall-iskwalifika mis-sewqan permezz ta’ rtirar temporanju jew permanenti tal-liċenzja tas-sewqan tal-persuna kkonċernata.

(38)

Jenħtieġ li l-Istati Membri jistinkaw biex jiżguraw li d-dħul iġġenerat minn penali finanzjarji għal reati tat-traffiku relatati mas-sikurezza fit-toroq, infurzati skont id-Direttiva (UE) 2015/413 kif emendata b’din id-Direttiva, jintuża biex tiżdied is-sikurezza fit-toroq u biex tiġi żgurata t-trasparenza dwar il-miżuri tas-sikurezza fit-toroq.

(39)

Biex jitqiesu l-progress tekniku rilevanti jew il-bidliet fl-atti legali rilevanti tal-Unjoni, jenħtieġ li s-setgħa ta’ adozzjoni ta’ atti f’konformità mal-Artikolu 290 TFUE tiġi delegata lill-Kummissjoni biex taġġorna l-Anness ta’ din id-Direttiva billi temendah. Huwa partikolarment importanti li l-Kummissjoni jkollha konsultazzjonijiet xierqa matul ix-xogħol tagħha ta’ tħejjija, inkluż fil-livell ta’ esperti, u li dawk il-konsultazzjonijiet isiru f’konformità mal-prinċipji stabbiliti fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (17). B’mod partikolari, biex tkun żgurata parteċipazzjoni ugwali fit-tħejjija tal-atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija tal-atti delegati.

(40)

Sabiex jiġu żgurati kundizzjonijiet uniformi għall-implimentazzjoni tad-Direttiva (UE) 2015/413, jenħtieġ li l-Kummissjoni tingħata setgħat ta’ implimentazzjoni biex tistabbilixxi l-proċeduri, il-kontenut u l-ispeċifikazzjonijiet tekniċi, inkluż il-miżuri taċ-ċibersigurtà, għat-tiftixiet awtomatizzati li jridu jsiru b’rabta mal-investigazzjoni tar-reati tat-traffiku relatati mas-sikurezza fit-toroq, il-kontenut tal-formola elettronika standard għat-talba u l-mezzi ta’ trażmissjoni tal-informazzjoni relatata mat-talba għal assistenza reċiproka fl-identifikazzjoni tal-persuna kkonċernata, il-kontenut tal-formoli elettroniċi għat-talba għal assistenza reċiproka għan-notifika tal-avviż ta’ reat tat-traffiku u d-dokumenti ta’ segwitu u l-użu u l-manutenzjoni tal-Portal CBE. Jenħtieġ li s-soluzzjonijiet tekniċi jkunu allinjati mal-Qafas Ewropew għall-Interoperabbiltà u mas-soluzzjonijiet rilevanti ta’ Ewropa Interoperabbli msemmija fir-Regolament (UE) 2024/903 tal-Parlament Ewropew u tal-Kunsill (18). Jenħtieġ li s-setgħat ta’ implimentazzjoni jiġu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill (19). Madankollu, sakemm l-atti ta’ implimentazzjoni adottati mill-Kummissjoni jsiru applikabbli, jenħtieġ li jkun hemm fis-seħħ miżuri tranżizzjonali għall-iskambju awtomatizzat tad-data tar-reġistrazzjoni tal-vetturi abbażi tas-sistema elettronika eżistenti biex jiġu żgurati skambji bla xkiel tad-data.

(41)

Hemm bżonn li l-Istati Membri jiżguraw li jkun hemm fis-seħħ mekkaniżmi adegwati u effikaċi għall-infurzar jew l-irkupru ta’ penali finanzjarji.

(42)

Minħabba li l-objettivi ta’ din id-Direttiva, jiġifieri li jiġi żgurat livell għoli ta’ protezzjoni lill-utenti kollha tat-toroq fl-Unjoni u trattament ugwali tal-persuni kkonċernati billi jiġu ssimplifikati l-proċeduri ta’ assistenza reċiproka bejn l-Istati Membri waqt l-investigazzjoni transfruntiera tar-reati tat-traffiku relatati mas-sikurezza fit-toroq u billi tissaħħaħ il-protezzjoni tad-drittijiet fundamentali tal-persuni mhux residenti kkonċernati meta dawk ir-reati jsiru b’vettura rreġistrata fi Stat Membru differenti mill-Istat Membru fejn ikun sar ir-reat, ma jistgħux jinkisbu b’mod suffiċjenti mill-Istati Membri iżda jistgħu pjuttost, minħabba l-iskala u l-effetti ta’ din id-Direttiva, jinkisbu aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju ta’ proporzjonalità kif stabbilit f’dak l-Artikolu, din id-Direttiva ma tmurx lil hinn minn dak li huwa meħtieġ sabiex jinkisbu dawk l-objettivi.

(43)

Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 u ta l-opinjoni tiegħu fl-24 ta’ April 2023.

(44)

Għalhekk, jenħtieġ li d-Direttiva (UE) 2015/413 tiġi emendata skont dan,

(1)

it-titolu tad-Direttiva huwa sostitwit b’dan li ġej:

“Direttiva (UE) 2015/413 tal-Parlament Ewropew u tal-Kunsill tal-11 ta’ Marzu 2015 li tiffaċilita l-iskambju transfruntier ta’ informazzjoni u assistenza reċiproka dwar reati tat-traffiku relatati mas-sikurezza fit-toroq”

(2)

l-Artikolu 1 huwa sostitwit b’dan li ġej:

(3)

l-Artikolu 2 huwa emendat kif ġej:

(4)

l-Artikolu 3 huwa emendat kif ġej:

(5)

jiddaħħal l-artikolu li ġej:

(6)

l-Artikolu 4 huwa sostitwit b’dan li ġej:

(7)

jiddaħħal l-artikolu li ġej:

(8)

l-Artikolu 5 huwa sostitwit b’dan li ġej:

(*12)  Id-Direttiva (UE) 2016/680 tal-Parlament Ewropew u tal-Kunsill tas-27 ta’ April 2016 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-awtoritajiet kompetenti għall-finijiet tal-prevenzjoni, l-investigazzjoni, is-sejbien jew il-prosekuzzjoni ta’ reati kriminali jew l-eżekuzzjoni ta’ pieni kriminali, u dwar il-moviment liberu ta’ tali data, u li tħassar id-Deċiżjoni Qafas tal-Kunsill 2008/977/ĠAI (ĠU L 119, 4.5.2016, p. 89)."

(*13)  Ir-Regolament (UE) 2016/679 tal-Parlament Ewropew u tal-Kunsill tas-27 ta’ April 2016 dwar il-protezzjoni tal-persuni fiżiċi fir-rigward tal-ipproċessar ta’ data personali u dwar il-moviment liberu ta’ tali data, u li jħassar id-Direttiva 95/46/KE (Regolament Ġenerali dwar il-Protezzjoni tad-Data) (ĠU L 119, 4.5.2016, p. 1).”;"

(9)

jiddaħħlu l-artikoli li ġejjin:

(*14)  Ir-Regolament (UE) Nru 910/2014 tal-Parlament Ewropew u tal-Kunsill tat-23 ta’ Lulju 2014 dwar l-identifikazzjoni elettronika u s-servizzi fiduċjarji għal tranżazzjonijiet elettroniċi fis-suq intern u li jħassar id-Direttiva 1999/93/KE (ĠU L 257, 28.8.2014, p. 73)."

(*15)  Id-Deċiżjoni tal-Kunsill 2008/616/ĠAI tat-23 ta’ Ġunju 2008 dwar l-implimentazzjoni tad-Deċiżjoni 2008/615/ĠAI dwar it-titjib tal-kooperazzjoni transkonfinali, b’mod partikolari fil-ġlieda kontra t-terroriżmu u l-kriminalità transkonfinali (ĠU L 210, 6.8.2008, p. 12).”;"

(10)

l-Artikolu 6 huwa sostitwit b’dan li ġej:

(11)

l-Artikolu 7 huwa sostitwit b’dan li ġej:

(*16)  Id-Direttiva (UE) 2022/2555 tal-Parlament Ewropew u tal-Kunsill tal-14 ta’ Diċembru 2022 dwar miżuri għal livell għoli komuni ta’ ċibersigurtà madwar l-Unjoni kollha, li temenda r-Regolament (UE) Nru 910/2014 u d-Direttiva (UE) 2018/1972, u li tħassar id-Direttiva (UE) 2016/1148 (Direttiva NIS 2) (ĠU L 333, 27.12.2022, p. 80).”;"

(12)

jiddaħħal l-artikolu li ġej:

(13)

l-Artikolu 8 huwa sostitwit b’dan li ġej:

(*17)  Ir-Regolament (UE) 2018/1724 tal-Parlament Ewropew u tal-Kunsill tat-2 ta’ Ottubru 2018 li jistabbilixxi gateway diġitali unika li tipprovdi aċċess għal informazzjoni, għal proċeduri u għas-servizzi ta’ assistenza u ta’ soluzzjoni tal-problemi u li jemenda r-Regolament (UE) Nru 1024/2012 (ĠU L 295, 21.11.2018, p. 1).”;"

(14)

jiddaħħal l-artikolu li ġej:

(15)

l-Artikolu 9 huwa sostitwit b’dan li ġej:

(16)

jiddaħħlu l-artikoli li ġejjin:

(*18)  Ir-Regolament (UE) Nru 182/2011 tal-Parlament Ewropew u tal-Kunsill tas-16 ta’ Frar 2011 li jistabbilixxi r-regoli u l-prinċipji ġenerali dwar il-modalitajiet ta’ kontroll mill-Istati Membri tal-eżerċizzju mill-Kummissjoni tas-setgħat ta’ implimentazzjoni (ĠU L 55, 28.2.2011, p. 13).”;"

(17)

l-Artikolu 11 huwa sostitwit b’dan li ġej:

(18)

l-Anness I huwa sostitwit bit-test stipulat fl-Anness ta’ din id-Direttiva;

(19)

l-Anness II jitħassar.