REGOLAMENT TAL-KUMMISSJONI (UE) .../...

ta’ 6.12.2022

li jemenda r-Regolament (UE) Nru 582/2011 fir-rigward tal-approvazzjoni tat-tip tal-emissjonijiet ta’ vetturi heavy-duty li jużaw bijodiżil pur

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (KE) Nru 595/2009 tal-Parlament Ewropew u tal-Kunsill tat-18 ta’ Ġunju 2009 dwar l-approvazzjoni tat-tip ta’ vetturi bil-mutur u magni rigward l-emissjonijiet minn vetturi heavy-duty (Euro VI) u dwar l-aċċess għal informazzjoni dwar it-tiswija u l-manutenzjoni tal-vetturi u li jemenda r-Regolament (KE) Nru 715/2007 u d-Direttiva 2007/46/KE u li jħassar id-Direttivi 80/1269/KEE, 2005/55/KE u 2005/78/KE 1 , u b’mod partikolari l-Artikolu 4(3) u 5(4) u l-Artikolu 12 tiegħu,

Billi:

(1)Il-vetturi b’approvazzjoni tat-tip fl-UE jeħtieġ li jkunu jistgħu jaħdmu bil-bijodiżil pur u b’taħlitiet differenti ta’ bijodiżil u fjuwils fossili f’każ ta’ bżonn.

(2)F’konformità mal-Artikolu 3 tar-Regolament tal-Kummissjoni (UE) Nru 582/2011 2 , l-approvazzjoni tat-tip ta’ vetturi bil-mutur u ta’ magni fir-rigward tal-emissjonijiet tirrikjedi li l-manifattur jiżgura l-konformità mal-ispeċifikazzjonijiet tal-fjuwils ta’ referenza stabbiliti fl-Anness IX ta’ dak ir-Regolament li jintużaw għall-ittestjar tal-approvazzjoni tat-tip.

(3)Il-bijodiżil pur (FAME B100) mhuwiex elenkat fl-Anness IX tar-Regolament (UE) Nru 582/2011 bħala fjuwil ta’ referenza għall-approvazzjoni tat-tip tal-emissjonijiet tal-vetturi heavy-duty. L-ittestjar tal-approvazzjoni tat-tip jeħtieġ li jiġi dduplikat kemm fuq id-diżil (B7) kif ukoll fuq il-bijodiżil pur (B100) sabiex tintwera l-konformità mar-rekwiżiti tal-emissjonijiet. Sabiex tiġi minimizzata d-duplikazzjoni tal-ittestjar u sabiex tiġi ffaċilitata ċ-ċertifikazzjoni għall-użu tal-bijodiżil pur u tat-taħlitiet tal-bijodiżil (bħal FAME B20/B30), jeħtieġ li jiddaħħlu l-ispeċifikazzjonijiet għall-bijodiżil pur bħala fjuwil ta’ referenza, abbażi ta’ standards internazzjonali u Ewropej rilevanti. Jenħtieġ li l-konformità mar-rekwiżiti tal-ittestjar tal-emissjonijiet għall-approvazzjoni tat-tip B100 tkun tista’ tintwera bl-ittestjar tal-emissjonijiet tal-magna referenzjarja li taħdem bil-bijodiżil pur. Filwaqt li għall-ittestjar tal-konformità meħtieġ waqt is-servizz tista’ tintgħażel kwalunkwe taħlita ta’ bijofjuwils.

(4)Għall-approvazzjoni tal-vetturi b’magna approvata, huwa meħtieġ addendum għall-ispeċifikazzjonijiet taċ-ċertifikat tal-approvazzjoni tat-tip.

(5)Għalhekk, jenħtieġ li r-Regolament tal-Kummissjoni (UE) Nru 582/2011 jiġi emendat skont dan.

(6)Il-miżuri previsti f’dan ir-Regolament huma skont l-opinjoni tal-Kumitat Tekniku – Vetturi bil-Mutur.

ADOTTAT DAN IR-REGOLAMENT:

Artikolu 1

L-Annessi I, II u IX tar-Regolament (UE) 582/2011 huma emendati f’konformità mal-Anness ta’ dan ir-Regolament.

Artikolu 2

Dan ir-Regolament għandu jidħol fis-seħħ fit-tielet jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, 6.12.2022

(1)    ĠU L 188, 18.7.2009, p. 1.

(2)    Ir-Regolament tal-Kummissjoni (UE) Nru 582/2011 tal-25 ta' Mejju 2011 li jimplimenta u jemenda r-Regolament (KE) Nru 595/2009 tal-Parlament Ewropew u tal-Kunsill rigward l-emissjonijiet minn vetturi heavy-duty (Euro VI) u li jemenda l-Annessi I u III għad- Direttiva 2007/46/KE tal-Parlament Ewropew u tal-Kunsill (ĠU L 167, 25.6.2011, p. 1)

ANNESS

(1)L-Anness I huwa emendat kif ġej:

(a)Fil-punt 1.1.2, is-sentenza introduttorja hija sostitwita b’dan li ġej:

“1.1.2. Jekk il-manifattur jippermetti li l-familja ta’ magni taħdem bi fjuwils fis-suq li ma jikkonformawx la mad-Direttiva 98/70/KE tal-Parlament Ewropew u tal-Kunsill*, la mal-istandard tas-CEN EN 228:2012 fil-każ tal-petrol bla ċomb jew mal-istandard tas-CEN EN 590:2013 fil-każ tad-diżil, u lanqas mal-istandard tas-CEN EN 14214:2012+A2:2019 fil-każ tal-FAME B100, bħal fjuwil paraffiniku (l-istandard tas-CEN EN 15940) jew oħrajn, il-manifattur għandu, flimkien mar-rekwiżiti stabbiliti fil-punt 1.1.1, jikkonforma mar-rekwiżiti li ġejjin”;

   *Id-Direttiva 98/70/KE tal-Parlament Ewropew u tal-Kunsill tat-13 ta’ Ottubru 1998 dwar il-kwalità tal-karburanti tal-petrol u tad-diżil u li temenda d-Direttiva tal-Kunsill 93/12/KEE (ĠU L 350, 28.12.1998, p. 58).”;

(b)wara l-punt 1.3. jiddaħħal il-punt li ġej:

“1.4. Rekwiżiti għall-approvazzjoni tat-tip B100

1.4.1. L-approvazzjoni tat-tip ta’ familja B100 b’magna referenzjarja ttestjata bil-FAME B100 għandha tiġi estiża għall-membri tal-familja u għat-taħlitiet tal-bijodiżil kollha b’kontenut tal-FAME li jiżboq dak tal-FAME B30 (l-istandard tas-CEN EN 16709), mingħajr ittestjar ulterjuri. L-approvazzjoni tat-tip tista’ tiġi estiża għal taħlitiet ta’ bijodiżil b’kontenut tal-FAME aktar baxx, jekk ir-rekwiżiti ta’ dan ir-Regolament jiġu ssodisfati wkoll għal dawn it-taħlitiet, mingħajr ma jsiru aġġustamenti lill-vettura. F’każ bħal dan il-manifattur għandu jiddikjara liema huma t-taħlitiet tal-bijodiżil li l-familja ta’ magni tista’ taħdem bihom fil-punt 3.2.2.2.1 tad-Dokument ta’ Informazzjoni kif stabbilit fil-Parti 1 tal-Appendiċi 4. Jekk l-awtorità tal-approvazzjoni tiddetermina li l-applikazzjoni mressqa ma tkunx rappreżentattiva għalkollox, taħlitiet tal-bijodiżil għajr il-FAME B100 jistgħu jintgħażlu mill-awtorità tal-approvazzjoni u jiġu ttestjati.”;

(c)jiddaħħal il-punt 3.2.1.7. li ġej:

“3.2.1.7. Fil-każ ta’ approvazzjoni tat-tip B100, il-marka tal-approvazzjoni għandha tinkludi “B100” wara s-simbolu nazzjonali.”;

(d)Fl-Appendiċi 4 PARTI 1, il-punt 3.2.2.2 huwa sostitwit b’dan li ġej:

“3.2.2.2. Vetturi heavy-duty Diżil/Petrol/LPG/NG-H/NG-L/NG-HL/Etanol (ED95)/Etanol (E85)/ LNG/LNG20/B100 (1) (6)”;

(e)Fl-Addendum tal-Appendiċi 5, il-punt 1.1.5 huwa sostitwit b’dan li ġej:

“1.1.5. Kategorija tal-magna: Diżil/Petrol/LPG/NG-H/NG-L/NG-HL/Etanol (ED95)/Etanol (E85)/LNG/LNG20/B100 (1)”;

(f)Il-Punt 8 tal-Appendiċi 6 huwa sostitwit b’dan li ġej:

“8. Firma:

Mehmuż: Pakkett ta’ informazzjoni.

Rapport tat-test.

Addendum”

(g)Jiżdied l-Addendum li ġej mal-Appendiċi 6:

“Addendum

għaċ-ċertifikat tal-approvazzjoni tat-tip KE Nru …

1. INFORMAZZJONI ADDIZZJONALI

1.1. Id-dettalji li għandhom jimtlew b’rabta mal-approvazzjoni tat-tip ta’ vettura b’magna approvata installata:

1.1.1. Id-ditta tal-magna (l-isem tal-impriża):

1.1.2. Tip u deskrizzjoni kummerċjali (semmi kwalunkwe varjanti):

1.1.3. Il-kodiċi tal-manifattur kif immarkat fuq il-magna:

1.1.4. Il-kategorija tal-vettura (jekk applikabbli) (b):

1.1.5. Il-kategorija tal-magna: Diżil/Petrol/LPG/NG-H/NG-L/NG-HL/Etanol (ED95)/Etanol (E85)/LNG/LNG20/ B100 (1):

1.1.5.1. It-tip ta’ magna li tuża żewġ tipi ta’ fjuwil: Tip 1A/Tip 1B/Tip 2A/Tip 2B/Tip 3B (1)(d1):

1.1.6. Isem u indirizz tal-manifattur:

1.1.7. Isem u indirizz tar-rappreżentant awtorizzat tal-manifattur (jekk ikun hemm):

1.2. Jekk il-magna li ssir referenza għaliha fil-paragrafu 1.1. ġietx approvata għat-tip bħala unità teknika separata:

1.2.1. In-numru ta’ approvazzjoni tat-tip tal-magna/tal-familja ta’ magni (1):

1.2.2. In-numru tal-kalibrar tas-softwer tal-Unità ta’ Kontroll tal-Magna (ECU):

1.3. Id-dettalji li għandhom jimtlew b’rabta mal-approvazzjoni tat-tip ta’ magna/familja ta’ magni (1) bħala unità teknika separata (kundizzjonijiet li għandhom jiġu osservati għall-installazzjoni tal-magna fuq vettura):

1.3.1. It-tnaqqis massimu u/jew minimu tal-pressjoni tad-dħul:

1.3.2. Il-kontropressjoni massima permissibbli:

1.3.3. Il-volum tas-sistema tal-egżost:

1.3.4. Ir-restrizzjonijiet tal-użu (jekk ikun hemm):

1.4. Il-livelli tal-emissjonijiet tal-magna/magna referenzjarja (1)

Fattur ta’ Deterjorament (DF): ikkalkulat/fiss (1)

Speċifika l-valuri DF u l-emissjonijiet tat-testijiet WHSC (jekk applikabbli) u WHTC fit-tabella hawn taħt

1.4.1. It-Test WHSC

Tabella 4

It-Test WHSC

1.4.2. It-Test WHTC

Tabella 5

It-Test WHTC

1.4.3. Test tal-magna fuq idle

Tabella 6

Test tal-magna fuq idle

1.4.4. Test ta’ dimostrazzjoni tal-PEMS

Tabella 6a

Test ta’ dimostrazzjoni tal-PEMS

1.5. Kejl tal-potenza

1.5.1. Potenza tal-magna mkejla fuq il-bank tat-test

Tabella 7

Potenza tal-magna mkejla fuq il-bank tat-test

1.5.2. Data addizzjonali, pereż. il-fattur ta’ korrezzjoni tal-potenza għal kull fjuwil iddikjarat (jekk applikabbli)

”;

(h)Fl-Addendum tal-Appendiċi 7, il-punt 1.1.5 huwa sostitwit b’dan li ġej:

“1.1.5. Kategorija tal-magna: Diżil/Petrol/LPG/NG-H/NG-L/NG-HL/Etanol (ED95)/Etanol (E85)/LNG/LNG20/B100 (1)”;

(2)Fl-Anness II, il-punt 4.4.2 tiżdied is-sentenza li ġejja:

“Fil-każ tal-approvazzjoni tat-tip B100, l-awtoritajiet tal-approvazzjoni jistgħu jitolbu li l-vettura li taħdem bil-bijodiżil tiġi ttestjata bi kwalunkwe kontenut tal-FAME.”;

(3)Fl-Anness IX, taħt l-intestatura “Data teknika dwar il-fjuwils għall-ittestjar ta’ magni bi tqabbid bil-kompressjoni u magni li jużaw żewġ tipi ta’ fjuwils”, it-tabella li ġejja tiddaħħal wara t-tabella “Tip: Diżil (B7)”:

”.