MEMORANDUM TA’ SPJEGAZZJONI

1.KUNTEST TAL-ATT DELEGAT

Objettiv u bażi ġuridika tal-azzjoni proposta

Dan ir-Regolament Delegat jirrevedi l-Anness VIII u l-Parti 1 tal-Anness IX tad-Direttiva 2012/27/UE tal-Parlament Ewropew u tal-Kunsill tal-25 ta’ Ottubru 2012 dwar l-effiċjenza fl-enerġija 1 (l-“EED”). L-iskop tar-reviżjoni huwa li jiġi ssimplifikat u ċċarat il-kontenut tal-valutazzjonijiet komprensivi tal-potenzjal għal tisħin u għal tkessiħ effiċjenti. Ir-reviżjoni tallinja wkoll il-kontenut fil-konfront tal-leġiżlazzjoni aġġornata dwar l-unjoni tal-enerġija, b’mod partikolari d-Direttiva dwar ir-Rendiment tal-Bini fl-Użu tal-Enerġija 2 , id-Direttiva dwar l-Effiċjenza fl-Enerġija 3 , id-Direttiva dwar l-Enerġija Rinnovabbli 4 u r-Regolament dwar il-Governanza tal-Unjoni tal-Enerġija u l-Azzjoni Klimatika 5 .

L-Artikolu 14 tad-Direttiva 2012/27/UE jirrikjedi li l-Istati Membri jwettqu valutazzjoni komprensiva tal-potenzjal għal tisħin u għal tkessiħ effiċjenti sal-31 ta’ Diċembru 2015. F’dawn il-valutazzjonijiet komprensivi, l-Istati Membri jintalbu jiddeskrivu u jbassru l-potenzjal għall-introduzzjoni ta’ koġenerazzjoni ta’ effiċjenza għolja u għal tisħin u għal tkessiħ distrettwali effiċjenti, u jintalbu wkoll jadottaw politiki li jqisu sew il-potenzjal għall-użu ta’ sistemi ta’ tisħin u ta’ tkessiħ effiċjenti.

L-Anness VIII tad-Direttiva jelenka l-elementi li jridu jkunu inklużi fil-valutazzjonijiet komprensivi, u l-Parti 1 tal-Anness IX jiddeskrivi l-prinċipji ġenerali għall-analiżi tal-kostijiet u tal-benefiċċji li l-Istati Membri jeħtieġ li jwettqu meta jivvalutaw l-iktar soluzzjonijiet effiċjenti fir-rigward tar-riżorsi u tal-kostijiet sabiex jiġu ssodisfati l-ħtiġijiet ta’ tisħin u ta’ tkessiħ.

Fuq talba tal-Kummissjoni, l-Istati Membri jridu jaġġornaw u jinnotifikaw il-valutazzjonijiet komprensivi lill-Kummissjoni kull ħames snin. Il-Kummissjoni trid tressaq kwalunkwe talba ta’ din ix-xorta minn tal-inqas sena qabel id-data tal-iskadenza. Minn rieżami tar-riżultati tal-ewwel ċiklu ta’ valutazzjonijiet komprensivi jirriżulta li jenħtieġ li l-Kummissjoni titlob lill-Istati Membri jħejju t-tieni ċiklu ta’ valutazzjonijiet komprensivi.

Is-simplifikazzjoni tal-kontenut tal-valutazzjonijiet komprensivi, kif stabbilit fl-Anness VIII u fil-Parti 1 tal-Anness IX, tista’ ssir bl-adozzjoni ta’ atti delegati kif stabbilit fl-Artikoli 22 u 23(2) tad-Direttiva rreveduta dwar l-Effiċjenza fl-Enerġija.

Kuntest ġenerali tar-Regolament Delegat

Iċ-Ċentru Konġunt tar-Riċerka (JRC) tal-Kummissjoni Ewropea analizza l-ewwel ċiklu ta’ valutazzjonijiet komprensivi. Dan ikkonkluda li filwaqt li l-valutazzjonijiet kienu utli għal għadd ta’ raġunijiet, jenħtieġ li l-kontenut tagħhom jittejjeb qabel iċ-ċiklu li jmiss. Fost il-benefiċċji li ġew identifikati kien hemm il-ġbir ta’ data ġdida u d-deskrizzjoni tal-potenzjal ġdid għal tisħin u għal tkessiħ effiċjenti, kif ukoll it-titjib tal-interazzjoni bejn l-amministrazzjonijiet nazzjonali u lokali. Fost it-titjib li l-JRC irrakkomanda kien hemm l-istabbiliment ta’ rekwiżiti iktar ċari għall-ġbir u għall-ipproċessar tad-data u li l-Istati Membri jitħallew jiffukaw l-analiżi tagħhom fuq modi rilevanti lokalment biex it-tisħin u t-tkessiħ isiru b’mod teknoloġikament newtrali.

L-ewwel ċiklu ta’ valutazzjonijiet komprensivi indika li sabiex ikompli jkun hemm benefiċċji mill-potenzjal ta’ dawn il-valutazzjonijiet, jenħtieġ li jibqgħu t-tliet elementi strutturali tagħhom. Dawn it-tliet elementi huma: (1) ħarsa kumplessiva lejn id-domanda, il-provvista u l-infrastruttura attwali tat-tisħin u tat-tkessiħ, flimkien ma’ rappreżentazzjoni viżiva ta’ dan fuq mappa u projezzjonijiet tad-domanda futura, (2) analiżi tal-potenzjal għal tisħin u għal tkessiħ effiċjenti, u (3) ħarsa kumplessiva lejn il-politiki u l-miżuri eżistenti u ppjanati flimkien mal-impatt tagħhom.

Sabiex il-valutazzjonijiet ikunu iktar rilevanti għat-tfassil tal-politika nazzjonali u sabiex jitlestew iktar malajr, jenħtieġ li l-Istati Membri jkollhom iktar flessibbiltà fir-rigward tal-kontenut rilevanti għall-politiki tagħhom dwar l-enerġija u dwar l-ambjent.

2.KONSULTAZZJONIJIET QABEL L-ADOZZJONI TAL-ATT

Konsultazzjoni tal-Istati Membri u tal-partijiet ikkonċernati

Minħabba l-kamp ta’ applikazzjoni limitat u n-natura teknika tas-simplifikazzjoni tal-kontenut tal-valutazzjonijiet komprensivi, l-emendar jista’ jsir permezz ta’ att delegat u permezz ta’ proċedura ssimplifikata. B’konformità mal-Artikolu 23 tad-Direttiva rreveduta dwar l-Effiċjenza fl-Enerġija, il-Kummissjoni kkonsultat lill-esperti ddeżinjati mill-Istati Membri kif ukoll lill-partijiet ikkonċernati.

L-Istati Membri u l-partijiet ikkonċernati ġew mistiedna għal laqgħa ta’ konsultazzjoni fi Brussell fil-25 ta’ Ottubru 2018. Abbozz ta’ dokument ta’ ħidma kien disponibbli għall-parteċipanti u dan ġie ppreżentat fil-laqgħa. Kienu preżenti parteċipanti minn 16-il Stat Membru u 17-il parti kkonċernata. Il-maġġoranza tal-parteċipanti, inkluż il-partijiet ikkonċernati kollha, appoġġaw il-ħtieġa li l-Kummissjoni titlob għat-tieni ċiklu ta’ valutazzjonijiet komprensivi.

Diversi punti minuri ġew iċċarati, u waslu wkoll xi kummenti dwar il-parti tat-test li jiddeskrivi dak li huwa meħtieġ meta tinġabar id-data għall-ħarsa kumplessiva lejn id-domanda, il-provvista u l-infrastruttura attwali tat-tisħin u tat-tkessiħ. F’din il-parti tad-dokument, li hija l-iktar teknika, diversi partijiet ikkonċernati pproponew aġġustamenti fil-kamp ta’ applikazzjoni tal-ġbir tad-data sabiex jiżguraw li s-setturi tagħhom ikunu rrappreżentati biżżejjed. Tliet Stati Membri pproponew il-preżentazzjoni tad-data dwar it-teknoloġiji tal-provvista tal-enerġija f’livell iktar ġenerali li jkun aggregat nazzjonalment. Barra minn hekk, tliet Stati Membri talbu għal bidla fil-livell limitu tar-rekwiżit tal-ġbir tad-data dwar il-provvista potenzjali ta’ sħana residwa għall-ġenerazzjoni annwali tal-enerġija, li jirriżulta mill-Anness VIII tal-EED eżistenti, minn kapaċità ta’ ġenerazzjoni ta’ 20 GWh għal 20 MW. Żewġ Stati Membri fakkru l-ħtieġa li tinżamm konsistenza mad-Direttiva rreveduta dwar l-Enerġija Rinnovabbli.

Il-mekkaniżmu ta’ feedback seħħ mit-13 ta’ Diċembru 2018 sal-10 ta’ Jannar 2019. Waslu kummenti minn 14-il entità: 10 min-negozji, 3 mill-impriżi tat-tisħin distrettwali u 1 minn Stat Membru. Il-kontributuri kollha qablu li t-tisħin u t-tkessiħ huma elementi kruċjali li jistħoqqilhom analiżi bir-reqqa. Il-maġġoranza tal-kummenti indirizzaw ir-rekwiżiti għall-ġbir u għall-analiżi tad-data, fejn ġew proposti suġġerimenti biex ir-rekwiżiti jkunu iktar dettaljati u iktar flessibbli. Fir-rigward tar-rapportar tal-politika eżistenti u ppjanata, ġew issuġġeriti l-benefiċċji tas-CHP għas-sistema, filwaqt li tqajmet ukoll il-kwistjoni taż-żamma tan-newtralità teknoloġika.

Fl-24 ta’ Jannar 2019 seħħet laqgħa tal-Grupp ta’ Esperti tad-Direttiva dwar l-Effiċjenza fl-Enerġija, fejn ġie diskuss l-abbozz tad-dokument ta’ ħidma. Intlaħaq konsensus biex jiġi appoġġat l-att delegat, u saru xi bidliet tekniċi. Ġie ċċarat li fejn ir-Regolament ma jirregolax mod ieħor, l-Istati Membri jistgħu jaġixxu abbażi tal-liġi nazzjonali eżistenti tagħhom.

3.ELEMENTI ĠURIDIĊI TAL-ATT DELEGAT

Bażi ġuridika

Il-bażi ġuridika biex tittieħed azzjoni fil-livell tal-UE fir-rigward tal-effiċjenza fl-enerġija hija l-Artikolu 194 tat-Trattat dwar il-Funzjonament tal-Unjoni Ewropea (TFUE). L-Artikolu 194 jagħti l-objettiv tal-UE “fil-kuntest tal-istabbiliment u l-funzjonament tas-suq intern u b’kont meħud tal-ħtieġa ta’ preservazzjoni u titjib tal-ambjent”. Fost għanijiet oħra, il-politika tal-Unjoni għandha timmira li “tassigura s-sigurtà tal-provvista tal-enerġija fl-Unjoni” u “tippromwovi l-effiċjenza fl-enerġija u l-iffrankar fl-użu tal-enerġija kif ukoll l-iżvilupp ta’ forom ta’ enerġija ġodda u rinnovabbli”.

Dan ir-Regolament Delegat irid jiġi adottat skont l-Artikoli 22 u 23(2) tad-Direttiva 2012/27/UE, li tagħti s-setgħa lill-Kummissjoni biex tadotta atti delegati sabiex tadatta l-Annessi VIII u IX.

Proporzjonalità

Ir-rekwiżiti tal-valutazzjonijiet komprensivi tal-potenzjal għal tisħin u għal tkessiħ effiċjenti huma stabbiliti fl-EED. Is-settur tat-tisħin u tat-tkessiħ huwa l-iktar settur sinifikanti tal-użu finali tal-enerġija, b’konsum ta’ madwar 50 % tad-domanda totali għall-enerġija fl-Unjoni Ewropea. Għalhekk, sabiex isir paragun u allinjament tal-politiki u sabiex jinkiseb l-iffrankar fl-użu tal-enerġija fl-Istati Membri kollha, huwa importanti li titfassal leġiżlazzjoni fil-livell tal-Unjoni Ewropea. Għaldaqstant, il-proposta biex jiġi aġġornat u ssimplifikat il-kontenut tal-valutazzjonijiet komprensivi hija proporzjonali mal-eżitu mixtieq.

Sommarju tal-azzjoni proposta

Ir-Regolament Delegat jissimplifika l-valutazzjonijiet komprensivi tal-potenzjal għal tisħin u għal tkessiħ effiċjenti billi jitnaqqas l-ammont ta’ informazzjoni li l-Istati Membri jeħtieġ li jipprovdu. Ir-Regolament Delegat huwa strutturat f’erba’ blokok: (a) ħarsa kumplessiva lejn id-domanda, il-provvista u l-infrastruttura attwali tat-tisħin u tat-tkessiħ, flimkien ma’ rappreżentazzjoni viżiva ta’ dan fuq mappa u projezzjoni tad-domanda futura, (b) l-għanijiet, l-istrateġiji u l-miżuri ta’ politika li jikkontribwixxu għall-ħames dimensjonijiet tal-unjoni tal-enerġija, (c) analiżi ekonomika u finanzjarja tal-potenzjal għal tisħin u għal tkessiħ effiċjenti u (d) strateġiji u miżuri ta’ politika ġodda potenzjali.

Is-simplifikazzjoni tintegra l-obbligu ta’ rapportar f’inizjattivi oħra tal-leġiżlazzjoni dwar l-unjoni tal-enerġija u tallinja l-valutazzjonijiet magħhom.

Għażla tal-istrument

Il-forma ta’ azzjoni proposta hija Regolament Delegat li jemenda u li jissupplimenta l-Anness VIII u l-Parti 1 tal-Anness IX tad-Direttiva 2012/27/UE.

Implikazzjoni baġitarja

Il-proposta ma għandha l-ebda impatt fuq il-baġit tal-UE.

REGOLAMENT DELEGAT TAL-KUMMISSJONI (UE) .../...

ta’ 4.3.2019

li jemenda l-Annessi VIII u IX tad-Direttiva 2012/27/UE dwar il-kontenut tal-valutazzjonijiet komprensivi tal-potenzjal għal tisħin u għal tkessiħ effiċjenti

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva 2012/27/UE tal-Parlament Ewropew u tal-Kunsill tal-25 ta’ Ottubru 2012 dwar l-effiċjenza fl-enerġija 6 , u b’mod partikolari l-Artikolu 22 tagħha,

Billi:

(1)Id-Direttiva 2012/27/UE tistabbilixxi l-qafas u l-kontenut tal-valutazzjonijiet komprensivi mill-Istati Membri dwar il-potenzjal għal tisħin u għal tkessiħ effiċjenti.

(2)L-Artikoli 22 u 23(2) tad-Direttiva 2012/27/UE jagħtu lill-Kummissjoni s-setgħa li tadotta atti delegati biex tadatta r-rekwiżiti tal-Annessi VIII u IX.

(3)L-ewwel ċiklu ta’ valutazzjonijiet komprensivi ġie analizzat mill-Kummissjoni. Il-ġbir ta’ data ġdida, l-identifikazzjoni ta’ potenzjali ġodda u l-iskambju tal-aqwa prattiki għall-effiċjenza fl-enerġija għat-tisħin u għat-tkessiħ ikkonfermaw il-benefiċċji tal-valutazzjonijiet komprensivi u kkonfermaw il-ħtieġa li l-Kummissjoni titlob lill-Istati Membri jaġġornaw u jinnotifikaw it-tieni ċiklu ta’ valutazzjonijiet komprensivi.

(4)Il-valutazzjonijiet varjaw fil-metodoloġija u fil-kontenut, u għalhekk rekwiżiti iktar ċari, in-newtralità teknoloġika u rabta aħjar mal-politiki ġew identifikati bħala oqsma fejn jista’ jsir titjib. Ir-rekwiżiti dwar il-kontenut tal-valutazzjonijiet komprensivi jeħtieġ li jiġu aġġornati qabel it-tieni ċiklu sabiex tiżdied l-informazzjoni miġbura tkun iktar utli għall-Istati Membri u għall-Kummissjoni, sabiex tiġi ssimplifikata l-informazzjoni li trid tiġi pprovduta u sabiex ikun hemm rabta aħjar ma’ leġiżlazzjoni oħra tal-unjoni tal-enerġija, b’mod partikolari r-Regolament 2018/1999/UE tal-Parlament Ewropew u tal-Kunsill 7 dwar il-Governanza tal-Unjoni tal-Enerġija u l-Azzjoni Klimatika u d-Direttivi 2018/844/UE tal-Parlament Ewropew u tal-Kunsill 8 li temenda d-Direttiva 2010/31/UE dwar ir-rendiment tal-bini fl-użu tal-enerġija u d-Direttiva 2012/27/UE dwar l-effiċjenza fl-enerġija, 2018/2002/UE tal-Parlament Ewropew u tal-Kunsill 9 li temenda d-Direttiva 2012/27/UE dwar l-effiċjenza fl-enerġija, u 2018/2001/UE tal-Parlament Ewropew u tal-Kunsill 10 dwar il-promozzjoni tal-użu tal-enerġija minn sorsi rinnovabbli.

(5)Għodda xierqa li jistgħu jużaw l-Istati Membri fl-identifikazzjoni tal-punti tal-provvista ppjanati tat-tisħin u tat-tkessiħ u tal-installazzjonijiet ippjanati tat-trażmissjoni tat-tisħin distrettwali hija d-data dwar l-applikazzjonijiet għall-permessi.

(6)l-Istati Membri u l-partijiet ikkonċernati ġew ikkonsultati dwar il-proċess tal-valutazzjonijiet komprensivi u dwar abbozz ta’ dokument ta’ ħidma tal-Anness VIII aġġornat f’laqgħa ta’ konsultazzjoni konġunta fil-25 ta’ Ottubru 2018.

(7)Il-miżuri previsti f’dan ir-Regolament ġew diskussi mill-esperti tal-Istati Membri skont l-Artikolu 22 tad-Direttiva 2018/2002/UE.

(8)għalhekk, jenħtieġ li l-Anness VIII u l-Parti 1 tal-Anness IX tad-Direttiva 2012/27/UE jiġu adattati,

ADOTTAT DAN IR-REGOLAMENT:

Artikolu 1
Potenzjal għal tisħin u għal tkessiħ effiċjenti

(1)L-Anness VIII tad-Direttiva 2012/27/UE huwa sostitwit bit-test fl-Anness I ta’ dan ir-Regolament.

(2)L-Anness IX tad-Direttiva 2012/27/UE huwa emendat kif stabbilit fl-Anness II ta’ dan ir-Regolament.

Artikolu 2
Dħul fis-seħħ u applikazzjoni

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, 4.3.2019

(1)    ĠU L 315, 14.11.2012, p. 1.

(2)    ĠU L 156, 19.6.2018, p. 75.

(3)    ĠU L 328, 21.12.2018, p. 210.

(4)    ĠU L 328, 21.12.2018, p. 82.

(5)    ĠU L 328, 21.12.2018, p. 1.

(6)    ĠU L 315, 14.11.2012, p. 1.

(7)    Ir-Regolament 2018/1999/UE tal-Parlament Ewropew u tal-Kunsill tal-11 ta’ Diċembru 2018 dwar il-Governanza tal-Unjoni tal-Enerġija u tal-Azzjoni Klimatika, li jemenda r-Regolamenti (KE) Nru 663/2009 u (KE) Nru 715/2009 tal-Parlament Ewropew u tal-Kunsill, id-Direttivi 94/22/KE, 98/70/KE, 2009/31/KE, 2009/73/KE, 2010/31/UE, 2012/27/UE u 2013/30/UE tal-Parlament Ewropew u tal-Kunsill, id-Direttivi tal-Kunsill 2009/119/KE u (UE) 2015/652 u li jħassar ir-Regolament (UE) Nru 525/2013 tal-Parlament Ewropew u tal-Kunsill (ĠU L 328, 21.12.2018, p. 1).

(8)    Id-Direttiva 2018/844/UE tal-Parlament Ewropew u tal-Kunsill tat-30 ta’ Mejju 2018 li temenda d-Direttiva 2010/31/UE dwar ir-rendiment tal-bini fl-użu tal-enerġija u d-Direttiva 2012/27/UE dwar l-effiċjenza fl-enerġija (ĠU L 156, 19.6.2018, p. 75).

(9)    Id-Direttiva 2018/2002/UE tal-Parlament Ewropew u tal-Kunsill tal-11 ta’ Diċembru 2018 li temenda d-Direttiva 2012/27/UE dwar l-effiċjenza fl-enerġija (ĠU L 328, 21.12.2018, p. 210).

(10)    Id-Direttiva 2018/2001/UE tal-Parlament Ewropew u tal-Kunsill tal-11 ta’ Diċembru 2018 dwar il-promozzjoni tal-użu tal-enerġija minn sorsi rinnovabbli (ĠU L 328, 21.12.2018, p. 82).

ANNESS I
Emenda għall-Anness VIII

L-Anness VIII tad-Direttiva 2012/27/UE huwa sostitwit kif ġej:

“ANNESS VIII

Potenzjal għal tisħin u għal tkessiħ effiċjenti

Il-valutazzjoni komprensiva tal-potenzjali nazzjonali għal tisħin u għal tkessiħ effiċjenti msemmija fl-Artikolu 14(1) għandha tinkludi u tkun ibbażata fuq dan li ġej:

Parti I: ĦARSA KUMPLESSIVA LEJN IT-TISĦIN U T-TKESSIĦ

1.id-domanda għat-tisħin u għat-tkessiħ f’termini ta’ enerġija utli vvalutata 1 u f’termini ta’ konsum finali tal-enerġija kkwantifikat f’GWh kull sena 2 skont is-setturi:

(a)is-settur residenzjali;

(b)is-settur tas-servizzi;

(c)is-settur tal-industrija;

(d)kwalunkwe settur ieħor li individwalment jikkonsma iktar minn 5 % tad-domanda nazzjonali totali għat-tisħin u għat-tkessiħ utli;

2.l-identifikazzjoni, jew fil-każ tal-punt 2(a)(i), l-identifikazzjoni jew l-istima, tal-provvista attwali ta’ tisħin u ta’ tkessiħ:

(a)skont it-teknoloġija, f’GWh kull sena 3 , fis-setturi msemmija fil-punt 1 fejn ikun possibbli, filwaqt li ssir distinzjoni bejn l-enerġija minn sorsi fossili u dik minn sorsi rinnovabbli:

(i)ipprovduta fil-post f’siti mhux ta’ servizz u mhux residenzjali permezz ta’:

–bojlers tas-sħana biss;

–koġenerazzjoni tas-sħana u tal-enerġija b’effiċjenza għolja;

–pompi tas-sħana;

–teknoloġiji u sorsi oħra fil-post;

(ii)ipprovduta fil-post f’siti mhux ta’ servizz u mhux residenzjali permezz ta’:

–bojlers tas-sħana biss;

–koġenerazzjoni tas-sħana u tal-enerġija b’effiċjenza għolja;

–pompi tas-sħana;

–teknoloġiji u sorsi oħra fil-post;

(iii)ipprovduta mhux fil-post permezz ta’:

–koġenerazzjoni tas-sħana u tal-enerġija b’effiċjenza għolja;

–sħana residwa;

–teknoloġiji u sorsi oħra mhux fil-post;

(b)l-identifikazzjoni ta’ installazzjonijiet li jiġġeneraw sħana jew kesħa residwa u l-provvista potenzjali tagħhom ta’ tisħin jew ta’ tkessiħ, f’GWh kull sena:

(i)l-installazzjonijiet ta’ ġenerazzjoni tal-enerġija termali li jistgħu jipprovdu jew li jistgħu jiġu mmodifikati retroattivament biex jipprovdu s-sħana residwa b’input termali totali li jaqbeż l-50 MW;

(ii)l-installazzjonijiet tal-koġenerazzjoni tas-sħana u tal-enerġija li jużaw it-teknoloġiji msemmija fil-Parti II tal-Anness I b’input termali totali li jaqbeż l-20 MW;

(iii)l-impjanti ta’ inċinerazzjoni tal-iskart;

(iv)l-installazzjonijiet tal-enerġija rinnovabbli b’input termali totali li jaqbeż l-20 MW, ħlief l-installazzjonijiet speċifikati fil-punt 2(b)(i) u (ii) li jiġġeneraw it-tisħin jew it-tkessiħ bl-użu ta’ enerġija minn sorsi rinnovabbli;

(v)l-installazzjonijiet industrijali b’input termali totali li jaqbeż l-20 MW u li jistgħu jipprovdu sħana residwa;

(c)l-ammont irrapportat ta’ enerġija minn sorsi rinnovabbli u minn sħana jew kesħa residwa fil-konsum finali tal-enerġija tas-settur tat-tisħin u tat-tkessiħ distrettwali 4 matul l-aħħar ħames snin, b’konformità mad-Direttiva (UE) 2018/2001;

3.mappa li tkopri t-territorju nazzjonali kollu u li tidentifika (filwaqt li tiġi ppreservata l-informazzjoni kummerċjalment sensittiva):

(a)iż-żoni tad-domanda għat-tisħin u għat-tkessiħ wara l-analiżi tal-punt 1, filwaqt li jintużaw kriterji konsistenti biex issir enfasi fuq iż-żoni b’densità tal-enerġija fil-muniċipalitajiet u fil-konurbazzjonijiet;

(b)il-punti tal-provvista eżistenti ta’ tisħin u ta’ tkessiħ identifikati skont il-punt 2(b) u l-installazzjonijiet eżistenti tat-trażmissjoni tat-tisħin distrettwali;

(c)il-punti tal-provvista ppjanati ta’ tisħin u ta’ tkessiħ tat-tip deskritt skont il-punt 2(b) u l-installazzjonijiet eżistenti tat-trażmissjoni tat-tisħin distrettwali;

4.tbassir tax-xejriet fid-domanda għat-tisħin u għat-tkessiħ biex tinżamm perspettiva tat-30 sena li jmiss f’GWh u filwaqt li jitqiesu b’mod partikolari l-projezzjonijiet għall-10 snin li ġejjin, il-bidla fid-domanda fil-bini u f’setturi differenti tal-industrija, u l-impatt tal-politiki u tal-istrateġiji marbuta mal-ġestjoni tad-domanda, bħall-istrateġiji fit-tul ta’ rinnovazzjoni tal-bini skont id-Direttiva (UE) 2018/844;

Parti II: OBJETTIVI, STRATEĠIJI U MIŻURI TA’ POLITIKA

5.il-kontribuzzjoni ppjanata tal-Istat Membru fir-rigward tal-għanijiet, tal-miri u tal-kontribuzzjonijiet nazzjonali tiegħu għall-ħames dimensjonijiet tal-unjoni tal-enerġija, kif stipulat fl-Artikolu 3(2)(b) tar-Regolament (UE) 2018/1999, imwassla permezz ta’ tisħin u ta’ tkessiħ effiċjenti, b’mod partikolari b’rabta mal-punti 1 sa 4 tal-Artikolu 4(b) u mal-paragrafu (4)(b) tal-Artikolu 15, li tidentifika liema minn dawn l-elementi huwa addizzjonali meta mqabbel mal-pjanijiet nazzjonali integrati għall-enerġija u għall-klima;

6.ħarsa kumplessiva ġenerali lejn il-politiki u l-miżuri eżistenti kif deskritt fl-iktar rapport reċenti ppreżentat b’konformità mal-Artikoli 3, 20, 21 u 27(a) tar-Regolament (UE) 2018/1999;

Parti III: ANALIŻI TAL-POTENZJAL EKONOMIKU TAT-TISĦIN U TAT-TKESSIĦ EFFIĊJENTI

7.analiżi tal-potenzjal ekonomiku 5 ta’ teknoloġiji differenti tat-tisħin u tat-tkessiħ għandha titwettaq għat-territorju nazzjonali kollu billi tintuża l-analiżi tal-kostijiet u tal-benefiċċji msemmija fl-Artikolu 14(3) u għandha tidentifika xenarji alternattivi għal teknoloġiji iktar effiċjenti tat-tisħin u tat-tkessiħ, filwaqt li ssir distinzjoni bejn l-enerġija minn sorsi fossili u dik minn sorsi rinnovabbli fejn ikun applikabbli.

Jenħtieġ li jiġu kkunsidrati t-teknoloġiji li ġejjin:

(a)is-sħana u l-kesħa residwa industrijali;

(b)l-inċinerazzjoni tal-iskart;

(c)il-koġenerazzjoni b’effiċjenza għolja;

(d)sorsi ta’ enerġija rinnovabbli (pereżempju l-enerġija ġeotermali, l-enerġija termali solari u l-bijomassa) ħlief dawk li jintużaw għall-koġenerazzjoni b’effiċjenza għolja;

(e)il-pompi tas-sħana;

(f)it-tnaqqis tat-telf tas-sħana min-netwerks distrettwali eżistenti;

8.din l-analiżi tal-potenzjal ekonomiku għandha tinkludi l-passi u l-kunsiderazzjonijiet li ġejjin:

(a)Kunsiderazzjonijiet:

(i)l-analiżi tal-kostijiet u tal-benefiċċji għall-iskopijiet tal-Artikolu 14(3) għandha tinkludi analiżi ekonomika li tikkunsidra l-fatturi soċjoekonomiċi u ambjentali 6 , u analiżi finanzjarja mwettqa biex jiġu vvalutati l-proġetti mill-perspettiva tal-investituri. Kemm l-analiżi ekonomika u kemm dik finanzjarja għandhom jużaw il-valur preżenti nett bħala kriterju għall-valutazzjoni;

(ii)jenħtieġ li x-xenarju bażi jservi bħala punt ta’ referenza, iqis il-politiki eżistenti meta titħejja din il-valutazzjoni komprensiva 7 , u jkun marbut mad-data miġbura skont il-Parti I u l-punt 6 tal-Parti II ta’ dan l-Anness;

(iii)ix-xenarji alternattivi għax-xenarju bażi għandhom iqisu l-objettivi tal-effiċjenza fl-enerġija u tal-enerġija rinnovabbli tar-Regolament (UE) 2018/1999. Kull xenarju għandu jippreżenta l-elementi li ġejjin imqabbla max-xenarju bażi:

–il-potenzjal ekonomiku tat-teknoloġiji eżaminat billi l-valur preżenti nett jintuża bħala kriterju;

–it-tnaqqis tal-emissjonijiet tal-gassijiet b’effett ta’ serra;

–mal-iffrankar previst tal-enerġija primarja f’GWh kull sena;

–l-impatt fuq l-ammont ta’ sorsi ta’ enerġija rinnovabbli fit-taħlita tal-enerġija nazzjonali.

Ix-xenarji li ma jkunux fattibbli minħabba raġunijiet tekniċi, minħabba raġunijiet finanzjarji jew minħabba r-regolamentazzjoni nazzjonali jistgħu jiġu esklużi fi stadju bikri tal-analiżi tal-kostijiet u tal-benefiċċji jekk dan ikun iġġustifikat abbazi ta’ kunsiderazzjonijiet attenti, espliċiti u dokumentati sew.

Jenħtieġ li l-valutazzjoni u t-teħid tad-deċiżjonijiet iqisu l-kostijiet u l-iffrankar tal-enerġija miż-żieda fil-flessibbiltà fil-provvista tal-enerġija u minn tħaddim iktar ottimali tan-netwerks tal-elettriku, inkluż il-kostijiet evitati u l-iffrankar mit-tnaqqis fl-investiment fl-infrastruttura, fix-xenarji analizzati.

(b)Kostijiet u benefiċċji

Il-kostijiet u l-benefiċċji msemmija fil-punt 8(a) għandhom jinkludu minn tal-inqas il-kostijiet u l-benefiċċji li ġejjin:

(i)Benefiċċji:

–il-valur tal-output għall-konsumatur (it-tisħin, it-tkessiħ u l-elettriku);

–il-benefiċċji esterni bħall-benefiċċji ambjentali, tat-tnaqqis ta’ emissjonijiet tal-gassijiet b’effett ta’ serra u tas-saħħa u tas-sikurezza, kemm jista’ jkun;

–l-effetti fuq is-suq tax-xogħol, is-sigurtà tal-enerġija u l-kompetittività, kemm jista’ jkun.

(ii)Kostijiet:

–il-kostijiet kapitali tal-impjanti u tat-tagħmir;

–il-kostijiet kapitali tan-netwerks tal-enerġija assoċjati;

–il-kostijiet varjabbli u fissi tat-tħaddim;

–il-kostijiet tal-enerġija;

–il-kostijiet ambjentali, tas-saħħa u tas-sikurezza, kemm jista’ jkun;

–il-kostijiet tas-suq tax-xogħol, is-sigurtà tal-enerġija u l-kompetittività, kemm jista’ jkun.

(c)Xenarji rilevanti mqabbla max-xenarju bażi:

Għandhom jiġu kkunsidrati x-xenarji rilevanti kollha mqabbla max-xenarju bażi, inkluż ir-rwol tat-tisħin u tat-tkessiħ individwali effiċjenti.

(i)L-analiżi tal-kostijiet u tal-benefiċċji tista’ tkopri valutazzjoni ta’ proġett jew grupp ta’ proġetti għal valutazzjoni lokali, reġjonali jew nazzjonali usa’ sabiex tiġi stabbilita l-iktar soluzzjoni tat-tisħin u tat-tkessiħ li tkun kosteffettiva u ta’ benefiċċju mqabbla ma’ xenarju bażi għal żona ġeografika partikolari għall-iskop tal-ippjanar;

(ii)l-Istati Membri għandhom jiddeżinjaw l-awtoritajiet kompetenti responsabbli għat-twettiq tal-analizijiet tal-kostijiet u tal-benefiċċji skont l-Artikolu 14. Huma għandhom jipprovdu l-metodoloġiji u s-suppożizzjonijiet dettaljati b’konformità ma’ dan l-Anness u għandhom jistabbilixxu l-proċeduri għall-analiżi ekonomika u jagħmluhom pubbliċi.

(d)Konfini u approċċ integrat:

(i)il-konfini ġeografiku għandu jkopri żona ġeografika adegwata li tkun definita sew;

(ii)l-analiżijiet tal-kostijiet u tal-benefiċċji għandhom iqisu r-riżorsi ċentralizzati jew deċentralizzati rilevanti kollha ta’ provvista fis-sistema u fil-konfini ġeografiku, inkluż it-teknoloġiji kkunsidrati fil-punt 7 tal-Parti III ta’ dan l-Anness, kif ukoll ix-xejriet u l-karatteristiki kollha tat-tisħin u tat-tkessiħ.

(e)Suppożizzjonijiet:

(i)l-Istati Membri għandhom jipprovdu suppożizzjonijiet, għall-iskop tal-analiżijiet tal-kostijiet u tal-benefiċċji, dwar il-prezzijiet ta’ fatturi maġġuri ta’ input u ta’ output kif ukoll ir-rata ta’ skont;

(ii)ir-rata ta’ skont li tintuża fl-analiżi ekonomika biex jiġi kkalkulat il-valur preżenti nett għandha tintgħażel b’konformità mal-linji gwida Ewropej jew nazzjonali;

(iii)l-Istati Membri għandhom jużaw tbassir nazzjonali, Ewropew jew internazzjonali tal-iżvilupp tal-prezz tal-enerġija jekk ikun xieraq fil-kuntest nazzjonali u/jew reġjonali/lokali tagħhom;

(iv)il-prezzijiet li jintużaw fl-analiżi ekonomika għandhom jirriflettu l-kostijiet u l-benefiċċji soċjoekonomiċi. Il-kostijiet esterni, bħall-effetti ambjentali u tas-saħħa, jenħtieġ li jiġu inklużi kemm jista’ jkun, jiġifieri meta jeżisti prezz tas-suq jew meta dan ikun diġà inkluż fir-regolamentazzjoni Ewropea jew nazzjonali.

(f)Analiżi tas-sensittività:

(i)għandha tiġi inkluża analiżi tas-sensittività biex jiġu vvalutati l-kostijiet u l-benefiċċji ta’ proġett jew ta’ grupp ta’ proġetti abbażi ta’ fatturi varjabbli li jkollhom impatt sinifikanti fuq l-eżitu tal-kalkoli, pereżempju prezzijiet differenti tal-enerġija, il-livelli tad-domanda, ir-rati ta’ skont u oħrajn.

Parti IV — STRATEĠIJI U MIŻURI TA’ POLITIKA ĠODDA POTENZJALI

9.ħarsa ġenerali lejn il-miżuri ġodda ta’ politika leġiżlattivi u mhux leġiżlattivi 8 sabiex jitwettaq il-potenzjal ekonomiku identifikat skont il-punti 7 u 8, flimkien:

(a)mat-tnaqqis previst tal-emissjonijiet tal-gassijiet b’effett ta’ serra;

(b)mal-iffrankar previst tal-enerġija primarja f’GWh kull sena;

(c)mal-impatt previst fuq l-ammont ta’ koġenerazzjoni b’effiċjenza għolja;

(d)mal-impatt previst fuq l-ammont ta’ sorsi ta’ enerġija rinnovabbli fit-taħlita tal-enerġija nazzjonali u fis-settur tat-tisħin u tat-tkessiħ;

(e)mar-rabtiet previsti mal-ipprogrammar finanzjarju nazzjonali u mal-iffrankar previst tal-kostijiet għall-baġit pubbliku u għall-parteċipanti tas-suq;

(f)mal-istima tal-miżuri previsti ta’ sostenn pubbliku, jekk ikun hemm, bil-baġit annwali tagħhom u bl-identifikazzjoni tal-element ta’ għajnuna potenzjali.

ANNESS II
Emenda għall-Anness IX tad-Direttiva 2012/27/UE

Il-Parti 1 tal-Anness IX tad-Direttiva 2012/27/UE titħassar.

(1)    L-ammont ta’ enerġija termali meħtieġ biex tiġi ssodisfata d-domanda tal-utenti finali għat-tisħin u għat-tkessiħ.

(2)    Jenħtieġ li tintuża l-iktar data reċenti disponibbli.

(3)    Jenħtieġ li tintuża l-iktar data reċenti disponibbli.

(4)    Wara li tiġi stabbilita l-metodoloġija għall-kalkolu tal-kwantità ta’ enerġija rinnovabbli li tintuża għat-tkessiħ u għat-tkessiħ distrettwali skont l-Artikolu 35 tad-Direttiva (UE) 2018/2001, l-identifikazzjoni ta’ “tkessiħ rinnovabbli” għandha titwettaq b’konformità ma’ dik id-Direttiva. Sakemm jasal dak iż-żmien, l-identifikazzjoni għandha titwettaq skont metodoloġija nazzjonali xierqa.

(5)    Jenħtieġ li l-analiżi tal-potenzjal ekonomiku tippreżenta l-volum ta’ enerġija (f’GWh) li jista’ jiġi ġġenerat kull sena minn kull teknoloġija analizzata. Jenħtieġ li jitqiesu wkoll il-limitazzjonijiet u l-interrelazzjonijiet fis-sistema tal-enerġija. L-analiżi tista’ tuża mudelli bbażati fuq suppożizzjonijiet li jirrappreżentaw it-tħaddim ta’ tipi komuni ta’ teknoloġiji jew ta’ sistemi.

(6)    Inkluż il-valutazzjoni msemmija fl-Artikolu 15(7) tad-Direttiva 2018/2001.

(7)    Id-data limitu biex jitqiesu l-politiki għax-xenarju bażi hija tmiem is-sena ta’ qabel is-sena li sa tmiemha trid issir il-valutazzjoni komprensiva. Jiġifieri, il-politiki ppromulgati fi żmien sena qabel l-iskadenza għall-preżentazzjoni tal-valutazzjoni komprensiva ma hemmx għalfejn jitqiesu.

(8)    Din il-ħarsa ġenerali għandha tinkludi l-miżuri u l-programmi ta’ finanzjament li jistgħu jiġu adottati matul il-perjodu tal-valutazzjoni komprensiva, mingħajr ma tiġi ppreġudikata notifika separata tal-iskemi ta’ sostenn pubbliku għal valutazzjoni ta’ għajnuna mill-Istat,